| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၁၀. မဟာနာမသုတ္တဝဏ္ဏနာ
10. Mahānāmasuttavaṇṇanā
၁၀. ဒသမေ တသ္မိံ သမယေတိ ဗုဒ္ဓာဂုဏာနုသ္သရဏသမယေ။ ရာဂပရိယုဋ္ဌိတန္တိ ရာဂေန ပရိယုဋ္ဌိတံ။ ပရိယုဋ္ဌာနပ္ပတ္တိပိ, ရာဂေန ဝာ သံဟိတံ စိတ္တံ အရညမိဝ စောရေဟိ တေန ပရိယုဋ္ဌိတန္တိ ဝုတ္တံ, တသ္သ ပရိယုဋ္ဌာနဋ္ဌာနဘာဝတောပိ ပရိယုဋ္ဌိတရာဂန္တိ အတ္ထော။ ဗ္ယဉ္ဇနံ ပန အနာဒိယိတ္ဝာ အတ္ထမတ္တံ ဒသ္သေန္တော ‘‘ဥပ္ပဇ္ဇမာနေန ရာဂေန ဥဋ္ဌဟိတ္ဝာ ဂဟိတ’’န္တိ အာဟ။ ဥဇုကမေဝာတိ ပဂေဝ ကာယဝင္ကာဒီနံ အပနီတတ္တာ စိတ္တသ္သ စ အနုဇုဘာဝကရာနံ မာနာဒီနံ အဘာဝတော, ရာဂာဒိပရိယုဋ္ဌာနာဘာဝေန ဝာ ဩဏတိဥဏ္ဏတိဝိရဟတော ဥဇုဘာဝမေဝ ဂတံ။ အထ ဝာ ဥဇုကမေဝာတိ ကမ္မဋ္ဌာနသ္သ ထိနံ မိဒ္ဓံ ဩတိဏ္ဏတာယ လီနုဒ္ဓစ္စဝိဂမတော မဇ္ဈိမသမထနိမိတ္တပ္ပဋိပတ္တိယာ ဥဇုဘာဝမေဝ ဂတံ။ အဋ္ဌကထံ နိသ္သာယာတိ ဘဝဇာတိအာဒီနံ ပဒာနံ အတ္ထံ နိသ္သာယ။ အတ္ထဝေဒန္တိ ဝာ ဟေတုဖလံ ပဋိစ္စ ဥပ္ပန္နံ တုဋ္ဌိမာဟ။ ဓမ္မဝေဒန္တိ ဟေတုံ ပဋိစ္စ ဥပ္ပန္နံ တုဋ္ဌိံ။ ‘‘အာရကတ္တာ အရဟ’’န္တိ အနုသ္သရန္တသ္သ ဟိ ယဒိဒံ ဘဂဝတော ကိလေသေဟိ အာရကတ္တံ, သော ဟေတု။ ဉာပကော စေတ္ထ ဟေတု အဓိပ္ပေတော, န ကာရကော သမ္ပာပကော။ တတောနေန ဉာယမာနော အရဟတ္တတ္ထော ဖလံ။ ဣမိနာ နယေန သေသပဒေသုပိ ဟေတုသော ဖလဝိပာကော ဝေဒိတဗ္ဗော။ ဓမ္မာနုသ္သတိအာဒီသုပိ ဟိ အာဒိမဇ္ဈပရိယောသာနကလ္ယာဏတာဒယော သုပ္ပဋိပတ္တိအာဒယော စ တတ္ထ တတ္ထ ဟေတုဘာဝေန နိဒ္ဒိဋ္ဌာယေဝ။ ဓမ္မူပသံဟိတန္တိ ယထာဝုတ္တဟေတုဖလသင္ခာတဂုဏူပသံဟိတံ။
10. Dasame tasmiṃ samayeti buddhāguṇānussaraṇasamaye. Rāgapariyuṭṭhitanti rāgena pariyuṭṭhitaṃ. Pariyuṭṭhānappattipi, rāgena vā saṃhitaṃ cittaṃ araññamiva corehi tena pariyuṭṭhitanti vuttaṃ, tassa pariyuṭṭhānaṭṭhānabhāvatopi pariyuṭṭhitarāganti attho. Byañjanaṃ pana anādiyitvā atthamattaṃ dassento ‘‘uppajjamānena rāgena uṭṭhahitvā gahita’’nti āha. Ujukamevāti pageva kāyavaṅkādīnaṃ apanītattā cittassa ca anujubhāvakarānaṃ mānādīnaṃ abhāvato, rāgādipariyuṭṭhānābhāvena vā oṇatiuṇṇativirahato ujubhāvameva gataṃ. Atha vā ujukamevāti kammaṭṭhānassa thinaṃ middhaṃ otiṇṇatāya līnuddhaccavigamato majjhimasamathanimittappaṭipattiyā ujubhāvameva gataṃ. Aṭṭhakathaṃ nissāyāti bhavajātiādīnaṃ padānaṃ atthaṃ nissāya. Atthavedanti vā hetuphalaṃ paṭicca uppannaṃ tuṭṭhimāha. Dhammavedanti hetuṃ paṭicca uppannaṃ tuṭṭhiṃ. ‘‘Ārakattā araha’’nti anussarantassa hi yadidaṃ bhagavato kilesehi ārakattaṃ, so hetu. Ñāpako cettha hetu adhippeto, na kārako sampāpako. Tatonena ñāyamāno arahattattho phalaṃ. Iminā nayena sesapadesupi hetuso phalavipāko veditabbo. Dhammānussatiādīsupi hi ādimajjhapariyosānakalyāṇatādayo suppaṭipattiādayo ca tattha tattha hetubhāvena niddiṭṭhāyeva. Dhammūpasaṃhitanti yathāvuttahetuphalasaṅkhātaguṇūpasaṃhitaṃ.
မဟာနာမသုတ္တဝဏ္ဏနာ နိဋ္ဌိတာ။
Mahānāmasuttavaṇṇanā niṭṭhitā.
အာဟုနေယ္ယဝဂ္ဂဝဏ္ဏနာ နိဋ္ဌိတာ။
Āhuneyyavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. မဟာနာမသုတ္တံ • 10. Mahānāmasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. မဟာနာမသုတ္တဝဏ္ဏနာ • 10. Mahānāmasuttavaṇṇanā
