| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೧೦. ಮಹಾನಾಮಸುತ್ತವಣ್ಣನಾ
10. Mahānāmasuttavaṇṇanā
೧೦. ದಸಮೇ ಮಹಾನಾಮೋತಿ ದಸಬಲಸ್ಸ ಚೂಳಪಿತು ಪುತ್ತೋ ಏಕೋ ಸಕ್ಯರಾಜಾ। ಯೇನ ಭಗವಾ ತೇನುಪಸಙ್ಕಮೀತಿ ಭುತ್ತಪಾತರಾಸೋ ಹುತ್ವಾ ದಾಸಪರಿಜನಪರಿವುತೋ ಗನ್ಧಮಾಲಾದೀನಿ ಗಾಹಾಪೇತ್ವಾ ಯತ್ಥ ಸತ್ಥಾ, ತತ್ಥ ಅಗಮಾಸಿ। ಅರಿಯಫಲಂ ಅಸ್ಸ ಆಗತನ್ತಿ ಆಗತಫಲೋ। ಸಿಕ್ಖಾತ್ತಯಸಾಸನಂ ಏತೇನ ವಿಞ್ಞಾತನ್ತಿ ವಿಞ್ಞಾತಸಾಸನೋ। ಇತಿ ಅಯಂ ರಾಜಾ ‘‘ಸೋತಾಪನ್ನಸ್ಸ ನಿಸ್ಸಯವಿಹಾರಂ ಪುಚ್ಛಾಮೀ’’ತಿ ಪುಚ್ಛನ್ತೋ ಏವಮಾಹ।
10. Dasame mahānāmoti dasabalassa cūḷapitu putto eko sakyarājā. Yenabhagavā tenupasaṅkamīti bhuttapātarāso hutvā dāsaparijanaparivuto gandhamālādīni gāhāpetvā yattha satthā, tattha agamāsi. Ariyaphalaṃ assa āgatanti āgataphalo. Sikkhāttayasāsanaṃ etena viññātanti viññātasāsano. Iti ayaṃ rājā ‘‘sotāpannassa nissayavihāraṃ pucchāmī’’ti pucchanto evamāha.
ನೇವಸ್ಸ ರಾಗಪರಿಯುಟ್ಠಿತನ್ತಿ ನ ಉಪ್ಪಜ್ಜಮಾನೇನ ರಾಗೇನ ಉಟ್ಠಹಿತ್ವಾ ಗಹಿತಂ। ಉಜುಗತನ್ತಿ ಬುದ್ಧಾನುಸ್ಸತಿಕಮ್ಮಟ್ಠಾನೇ ಉಜುಕಮೇವ ಗತಂ। ತಥಾಗತಂ ಆರಬ್ಭಾತಿ ತಥಾಗತಗುಣೇ ಆರಬ್ಭ। ಅತ್ಥವೇದನ್ತಿ ಅಟ್ಠಕಥಂ ನಿಸ್ಸಾಯ ಉಪ್ಪನ್ನಂ ಪೀತಿಪಾಮೋಜ್ಜಂ। ಧಮ್ಮವೇದನ್ತಿ ಪಾಳಿಂ ನಿಸ್ಸಾಯ ಉಪ್ಪನ್ನಂ ಪೀತಿಪಾಮೋಜ್ಜಂ। ಧಮ್ಮೂಪಸಞ್ಹಿತನ್ತಿ ಪಾಳಿಞ್ಚ ಅಟ್ಠಕಥಞ್ಚ ನಿಸ್ಸಾಯ ಉಪ್ಪನ್ನಂ। ಪಮುದಿತಸ್ಸಾತಿ ದುವಿಧೇನ ಪಾಮೋಜ್ಜೇನ ಪಮುದಿತಸ್ಸ। ಪೀತಿ ಜಾಯತೀತಿ ಪಞ್ಚವಿಧಾ ಪೀತಿ ನಿಬ್ಬತ್ತತಿ। ಕಾಯೋ ಪಸ್ಸಮ್ಭತೀತಿ ನಾಮಕಾಯೋ ಚ ಕರಜಕಾಯೋ ಚ ದರಥಪಟಿಪ್ಪಸ್ಸದ್ಧಿಯಾ ಪಟಿಪ್ಪಸ್ಸಮ್ಭತಿ। ಸುಖನ್ತಿ ಕಾಯಿಕಚೇತಸಿಕಸುಖಂ। ಸಮಾಧಿಯತೀತಿ ಆರಮ್ಮಣೇ ಸಮ್ಮಾ ಠಪಿತಂ ಹೋತಿ। ವಿಸಮಗತಾಯ ಪಜಾಯಾತಿ ರಾಗದೋಸಮೋಹವಿಸಮಗತೇಸು ಸತ್ತೇಸು। ಸಮಪ್ಪತ್ತೋತಿ ಸಮಂ ಉಪಸಮಂ ಪತ್ತೋ ಹುತ್ವಾ। ಸಬ್ಯಾಪಜ್ಝಾಯಾತಿ ಸದುಕ್ಖಾಯ। ಧಮ್ಮಸೋತಂ ಸಮಾಪನ್ನೋತಿ ವಿಪಸ್ಸನಾಸಙ್ಖಾತಂ ಧಮ್ಮಸೋತಂ ಸಮಾಪನ್ನೋ। ಬುದ್ಧಾನುಸ್ಸತಿಂ ಭಾವೇತೀತಿ ಬುದ್ಧಾನುಸ್ಸತಿಕಮ್ಮಟ್ಠಾನಂ ಬ್ರೂಹೇತಿ ವಡ್ಢೇತಿ। ಇಮಿನಾ ನಯೇನ ಸಬ್ಬತ್ಥ ಅತ್ಥೋ ವೇದಿತಬ್ಬೋ। ಇತಿ ಮಹಾನಾಮೋ ಸೋತಾಪನ್ನಸ್ಸ ನಿಸ್ಸಯವಿಹಾರಂ ಪುಚ್ಛಿ। ಸತ್ಥಾಪಿಸ್ಸ ತಮೇವ ಕಥೇಸಿ। ಏವಂ ಇಮಸ್ಮಿಂ ಸುತ್ತೇ ಸೋತಾಪನ್ನೋವ ಕಥಿತೋತಿ।
Nevassa rāgapariyuṭṭhitanti na uppajjamānena rāgena uṭṭhahitvā gahitaṃ. Ujugatanti buddhānussatikammaṭṭhāne ujukameva gataṃ. Tathāgataṃ ārabbhāti tathāgataguṇe ārabbha. Atthavedanti aṭṭhakathaṃ nissāya uppannaṃ pītipāmojjaṃ. Dhammavedanti pāḷiṃ nissāya uppannaṃ pītipāmojjaṃ. Dhammūpasañhitanti pāḷiñca aṭṭhakathañca nissāya uppannaṃ. Pamuditassāti duvidhena pāmojjena pamuditassa. Pīti jāyatīti pañcavidhā pīti nibbattati. Kāyo passambhatīti nāmakāyo ca karajakāyo ca darathapaṭippassaddhiyā paṭippassambhati. Sukhanti kāyikacetasikasukhaṃ. Samādhiyatīti ārammaṇe sammā ṭhapitaṃ hoti. Visamagatāya pajāyāti rāgadosamohavisamagatesu sattesu. Samappattoti samaṃ upasamaṃ patto hutvā. Sabyāpajjhāyāti sadukkhāya. Dhammasotaṃsamāpannoti vipassanāsaṅkhātaṃ dhammasotaṃ samāpanno. Buddhānussatiṃ bhāvetīti buddhānussatikammaṭṭhānaṃ brūheti vaḍḍheti. Iminā nayena sabbattha attho veditabbo. Iti mahānāmo sotāpannassa nissayavihāraṃ pucchi. Satthāpissa tameva kathesi. Evaṃ imasmiṃ sutte sotāpannova kathitoti.
ಆಹುನೇಯ್ಯವಗ್ಗೋ ಪಠಮೋ।
Āhuneyyavaggo paṭhamo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧೦. ಮಹಾನಾಮಸುತ್ತಂ • 10. Mahānāmasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೦. ಮಹಾನಾಮಸುತ್ತವಣ್ಣನಾ • 10. Mahānāmasuttavaṇṇanā
