| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
10. මහානාමසුත්‌තවණ්‌ණනා
10. Mahānāmasuttavaṇṇanā
10. දසමෙ මහානාමොති දසබලස්‌ස චූළපිතු පුත්‌තො එකො සක්‍යරාජා. යෙන භගවා තෙනුපසඞ්‌කමීති භුත්‌තපාතරාසො හුත්‌වා දාසපරිජනපරිවුතො ගන්‌ධමාලාදීනි ගාහාපෙත්‌වා යත්‌ථ සත්‌ථා, තත්‌ථ අගමාසි. අරියඵලං අස්‌ස ආගතන්‌ති ආගතඵලො. සික්‌ඛාත්‌තයසාසනං එතෙන විඤ්‌ඤාතන්‌ති විඤ්‌ඤාතසාසනො. ඉති අයං රාජා ‘‘සොතාපන්‌නස්‌ස නිස්‌සයවිහාරං පුච්‌ඡාමී’’ති පුච්‌ඡන්‌තො එවමාහ.
10. Dasame mahānāmoti dasabalassa cūḷapitu putto eko sakyarājā. Yenabhagavā tenupasaṅkamīti bhuttapātarāso hutvā dāsaparijanaparivuto gandhamālādīni gāhāpetvā yattha satthā, tattha agamāsi. Ariyaphalaṃ assa āgatanti āgataphalo. Sikkhāttayasāsanaṃ etena viññātanti viññātasāsano. Iti ayaṃ rājā ‘‘sotāpannassa nissayavihāraṃ pucchāmī’’ti pucchanto evamāha.
නෙවස්‌ස රාගපරියුට්‌ඨිතන්‌ති න උප්‌පජ්‌ජමානෙන රාගෙන උට්‌ඨහිත්‌වා ගහිතං. උජුගතන්‌ති බුද්‌ධානුස්‌සතිකම්‌මට්‌ඨානෙ උජුකමෙව ගතං. තථාගතං ආරබ්‌භාති තථාගතගුණෙ ආරබ්‌භ. අත්‌ථවෙදන්‌ති අට්‌ඨකථං නිස්‌සාය උප්‌පන්‌නං පීතිපාමොජ්‌ජං. ධම්‌මවෙදන්‌ති පාළිං නිස්‌සාය උප්‌පන්‌නං පීතිපාමොජ්‌ජං. ධම්‌මූපසඤ්‌හිතන්‌ති පාළිඤ්‌ච අට්‌ඨකථඤ්‌ච නිස්‌සාය උප්‌පන්‌නං. පමුදිතස්‌සාති දුවිධෙන පාමොජ්‌ජෙන පමුදිතස්‌ස. පීති ජායතීති පඤ්‌චවිධා පීති නිබ්‌බත්‌තති. කායො පස්‌සම්‌භතීති නාමකායො ච කරජකායො ච දරථපටිප්‌පස්‌සද්‌ධියා පටිප්‌පස්‌සම්‌භති. සුඛන්‌ති කායිකචෙතසිකසුඛං. සමාධියතීති ආරම්‌මණෙ සම්‌මා ඨපිතං හොති. විසමගතාය පජායාති රාගදොසමොහවිසමගතෙසු සත්‌තෙසු. සමප්‌පත්‌තොති සමං උපසමං පත්‌තො හුත්‌වා. සබ්‍යාපජ්‌ඣායාති සදුක්‌ඛාය. ධම්‌මසොතං සමාපන්‌නොති විපස්‌සනාසඞ්‌ඛාතං ධම්‌මසොතං සමාපන්‌නො. බුද්‌ධානුස්‌සතිං භාවෙතීති බුද්‌ධානුස්‌සතිකම්‌මට්‌ඨානං බ්‍රූහෙති වඩ්‌ඪෙති. ඉමිනා නයෙන සබ්‌බත්‌ථ අත්‌ථො වෙදිතබ්‌බො. ඉති මහානාමො සොතාපන්‌නස්‌ස නිස්‌සයවිහාරං පුච්‌ඡි. සත්‌ථාපිස්‌ස තමෙව කථෙසි. එවං ඉමස්‌මිං සුත්‌තෙ සොතාපන්‌නොව කථිතොති.
Nevassa rāgapariyuṭṭhitanti na uppajjamānena rāgena uṭṭhahitvā gahitaṃ. Ujugatanti buddhānussatikammaṭṭhāne ujukameva gataṃ. Tathāgataṃ ārabbhāti tathāgataguṇe ārabbha. Atthavedanti aṭṭhakathaṃ nissāya uppannaṃ pītipāmojjaṃ. Dhammavedanti pāḷiṃ nissāya uppannaṃ pītipāmojjaṃ. Dhammūpasañhitanti pāḷiñca aṭṭhakathañca nissāya uppannaṃ. Pamuditassāti duvidhena pāmojjena pamuditassa. Pīti jāyatīti pañcavidhā pīti nibbattati. Kāyo passambhatīti nāmakāyo ca karajakāyo ca darathapaṭippassaddhiyā paṭippassambhati. Sukhanti kāyikacetasikasukhaṃ. Samādhiyatīti ārammaṇe sammā ṭhapitaṃ hoti. Visamagatāya pajāyāti rāgadosamohavisamagatesu sattesu. Samappattoti samaṃ upasamaṃ patto hutvā. Sabyāpajjhāyāti sadukkhāya. Dhammasotaṃsamāpannoti vipassanāsaṅkhātaṃ dhammasotaṃ samāpanno. Buddhānussatiṃ bhāvetīti buddhānussatikammaṭṭhānaṃ brūheti vaḍḍheti. Iminā nayena sabbattha attho veditabbo. Iti mahānāmo sotāpannassa nissayavihāraṃ pucchi. Satthāpissa tameva kathesi. Evaṃ imasmiṃ sutte sotāpannova kathitoti.
ආහුනෙය්‍යවග්‌ගො පඨමො.
Āhuneyyavaggo paṭhamo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. මහානාමසුත්‌තං • 10. Mahānāmasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. මහානාමසුත්‌තවණ්‌ණනා • 10. Mahānāmasuttavaṇṇanā
