| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੧੦. ਮਹਾਨਾਮਸੁਤ੍ਤવਣ੍ਣਨਾ
10. Mahānāmasuttavaṇṇanā
੧੦. ਦਸਮੇ ਮਹਾਨਾਮੋਤਿ ਦਸਬਲਸ੍ਸ ਚੂਲ਼ਪਿਤੁ ਪੁਤ੍ਤੋ ਏਕੋ ਸਕ੍ਯਰਾਜਾ। ਯੇਨ ਭਗવਾ ਤੇਨੁਪਸਙ੍ਕਮੀਤਿ ਭੁਤ੍ਤਪਾਤਰਾਸੋ ਹੁਤ੍વਾ ਦਾਸਪਰਿਜਨਪਰਿવੁਤੋ ਗਨ੍ਧਮਾਲਾਦੀਨਿ ਗਾਹਾਪੇਤ੍વਾ ਯਤ੍ਥ ਸਤ੍ਥਾ, ਤਤ੍ਥ ਅਗਮਾਸਿ। ਅਰਿਯਫਲਂ ਅਸ੍ਸ ਆਗਤਨ੍ਤਿ ਆਗਤਫਲੋ। ਸਿਕ੍ਖਾਤ੍ਤਯਸਾਸਨਂ ਏਤੇਨ વਿਞ੍ਞਾਤਨ੍ਤਿ વਿਞ੍ਞਾਤਸਾਸਨੋ। ਇਤਿ ਅਯਂ ਰਾਜਾ ‘‘ਸੋਤਾਪਨ੍ਨਸ੍ਸ ਨਿਸ੍ਸਯવਿਹਾਰਂ ਪੁਚ੍ਛਾਮੀ’’ਤਿ ਪੁਚ੍ਛਨ੍ਤੋ ਏવਮਾਹ।
10. Dasame mahānāmoti dasabalassa cūḷapitu putto eko sakyarājā. Yenabhagavā tenupasaṅkamīti bhuttapātarāso hutvā dāsaparijanaparivuto gandhamālādīni gāhāpetvā yattha satthā, tattha agamāsi. Ariyaphalaṃ assa āgatanti āgataphalo. Sikkhāttayasāsanaṃ etena viññātanti viññātasāsano. Iti ayaṃ rājā ‘‘sotāpannassa nissayavihāraṃ pucchāmī’’ti pucchanto evamāha.
ਨੇવਸ੍ਸ ਰਾਗਪਰਿਯੁਟ੍ਠਿਤਨ੍ਤਿ ਨ ਉਪ੍ਪਜ੍ਜਮਾਨੇਨ ਰਾਗੇਨ ਉਟ੍ਠਹਿਤ੍વਾ ਗਹਿਤਂ। ਉਜੁਗਤਨ੍ਤਿ ਬੁਦ੍ਧਾਨੁਸ੍ਸਤਿਕਮ੍ਮਟ੍ਠਾਨੇ ਉਜੁਕਮੇવ ਗਤਂ। ਤਥਾਗਤਂ ਆਰਬ੍ਭਾਤਿ ਤਥਾਗਤਗੁਣੇ ਆਰਬ੍ਭ। ਅਤ੍ਥવੇਦਨ੍ਤਿ ਅਟ੍ਠਕਥਂ ਨਿਸ੍ਸਾਯ ਉਪ੍ਪਨ੍ਨਂ ਪੀਤਿਪਾਮੋਜ੍ਜਂ। ਧਮ੍ਮવੇਦਨ੍ਤਿ ਪਾਲ਼ਿਂ ਨਿਸ੍ਸਾਯ ਉਪ੍ਪਨ੍ਨਂ ਪੀਤਿਪਾਮੋਜ੍ਜਂ। ਧਮ੍ਮੂਪਸਞ੍ਹਿਤਨ੍ਤਿ ਪਾਲ਼ਿਞ੍ਚ ਅਟ੍ਠਕਥਞ੍ਚ ਨਿਸ੍ਸਾਯ ਉਪ੍ਪਨ੍ਨਂ। ਪਮੁਦਿਤਸ੍ਸਾਤਿ ਦੁવਿਧੇਨ ਪਾਮੋਜ੍ਜੇਨ ਪਮੁਦਿਤਸ੍ਸ। ਪੀਤਿ ਜਾਯਤੀਤਿ ਪਞ੍ਚવਿਧਾ ਪੀਤਿ ਨਿਬ੍ਬਤ੍ਤਤਿ। ਕਾਯੋ ਪਸ੍ਸਮ੍ਭਤੀਤਿ ਨਾਮਕਾਯੋ ਚ ਕਰਜਕਾਯੋ ਚ ਦਰਥਪਟਿਪ੍ਪਸ੍ਸਦ੍ਧਿਯਾ ਪਟਿਪ੍ਪਸ੍ਸਮ੍ਭਤਿ। ਸੁਖਨ੍ਤਿ ਕਾਯਿਕਚੇਤਸਿਕਸੁਖਂ। ਸਮਾਧਿਯਤੀਤਿ ਆਰਮ੍ਮਣੇ ਸਮ੍ਮਾ ਠਪਿਤਂ ਹੋਤਿ। વਿਸਮਗਤਾਯ ਪਜਾਯਾਤਿ ਰਾਗਦੋਸਮੋਹવਿਸਮਗਤੇਸੁ ਸਤ੍ਤੇਸੁ। ਸਮਪ੍ਪਤ੍ਤੋਤਿ ਸਮਂ ਉਪਸਮਂ ਪਤ੍ਤੋ ਹੁਤ੍વਾ। ਸਬ੍ਯਾਪਜ੍ਝਾਯਾਤਿ ਸਦੁਕ੍ਖਾਯ। ਧਮ੍ਮਸੋਤਂ ਸਮਾਪਨ੍ਨੋਤਿ વਿਪਸ੍ਸਨਾਸਙ੍ਖਾਤਂ ਧਮ੍ਮਸੋਤਂ ਸਮਾਪਨ੍ਨੋ। ਬੁਦ੍ਧਾਨੁਸ੍ਸਤਿਂ ਭਾવੇਤੀਤਿ ਬੁਦ੍ਧਾਨੁਸ੍ਸਤਿਕਮ੍ਮਟ੍ਠਾਨਂ ਬ੍ਰੂਹੇਤਿ વਡ੍ਢੇਤਿ। ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ વੇਦਿਤਬ੍ਬੋ। ਇਤਿ ਮਹਾਨਾਮੋ ਸੋਤਾਪਨ੍ਨਸ੍ਸ ਨਿਸ੍ਸਯવਿਹਾਰਂ ਪੁਚ੍ਛਿ। ਸਤ੍ਥਾਪਿਸ੍ਸ ਤਮੇવ ਕਥੇਸਿ। ਏવਂ ਇਮਸ੍ਮਿਂ ਸੁਤ੍ਤੇ ਸੋਤਾਪਨ੍ਨੋવ ਕਥਿਤੋਤਿ।
Nevassa rāgapariyuṭṭhitanti na uppajjamānena rāgena uṭṭhahitvā gahitaṃ. Ujugatanti buddhānussatikammaṭṭhāne ujukameva gataṃ. Tathāgataṃ ārabbhāti tathāgataguṇe ārabbha. Atthavedanti aṭṭhakathaṃ nissāya uppannaṃ pītipāmojjaṃ. Dhammavedanti pāḷiṃ nissāya uppannaṃ pītipāmojjaṃ. Dhammūpasañhitanti pāḷiñca aṭṭhakathañca nissāya uppannaṃ. Pamuditassāti duvidhena pāmojjena pamuditassa. Pīti jāyatīti pañcavidhā pīti nibbattati. Kāyo passambhatīti nāmakāyo ca karajakāyo ca darathapaṭippassaddhiyā paṭippassambhati. Sukhanti kāyikacetasikasukhaṃ. Samādhiyatīti ārammaṇe sammā ṭhapitaṃ hoti. Visamagatāya pajāyāti rāgadosamohavisamagatesu sattesu. Samappattoti samaṃ upasamaṃ patto hutvā. Sabyāpajjhāyāti sadukkhāya. Dhammasotaṃsamāpannoti vipassanāsaṅkhātaṃ dhammasotaṃ samāpanno. Buddhānussatiṃ bhāvetīti buddhānussatikammaṭṭhānaṃ brūheti vaḍḍheti. Iminā nayena sabbattha attho veditabbo. Iti mahānāmo sotāpannassa nissayavihāraṃ pucchi. Satthāpissa tameva kathesi. Evaṃ imasmiṃ sutte sotāpannova kathitoti.
ਆਹੁਨੇਯ੍ਯવਗ੍ਗੋ ਪਠਮੋ।
Āhuneyyavaggo paṭhamo.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧੦. ਮਹਾਨਾਮਸੁਤ੍ਤਂ • 10. Mahānāmasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧੦. ਮਹਾਨਾਮਸੁਤ੍ਤવਣ੍ਣਨਾ • 10. Mahānāmasuttavaṇṇanā
