| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
5. махаанаамад̇т̇зраг̇аат̇ааван̣н̣анаа
5. Mahānāmattheragāthāvaṇṇanā
зсаавахияяасз баб̣б̣ад̇знаад̇и ааяасмад̇о махаанаамад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз бун̃н̃аани убажинанд̇о сумзд̇хасса бхаг̇авад̇о гаалз б̣раахман̣агулз ниб̣б̣ад̇д̇ид̇ваа б̣раахман̣авиж̇ж̇аасу нибпад̇д̇им̣ г̇ад̇о гхарааваасам̣ бахааяа ан̃н̃ад̇арааяа над̣̇ияаа д̇ийрз ассамам̣ гаарзд̇ваа самб̣ахулз б̣раахман̣з манд̇з ваажзнд̇о вихарад̇и. ат̇згад̣̇ивасам̣ бхаг̇аваа д̇ам̣ ануг̇г̇ан̣хид̇ум̣ д̇асса асамабад̣̇ам̣ убаг̇ажчи. со бхаг̇аванд̇ам̣ д̣̇исваа басаннажид̇д̇о аасанам̣ бан̃н̃аабзд̇ваа ад̣̇ааси . нисиннз бхаг̇авад̇и сумад̇хурам̣ мад̇хум̣ убанаамзси. д̇ам̣ бхаг̇аваа барибхун̃ж̇ид̇ваа хздтаа ад̇химуд̇д̇ад̇т̇зравад̇т̇умхи вуд̇д̇анаязна анааг̇ад̇ам̣ б̣яаагарид̇ваа баггаами. со д̇зна бун̃н̃агаммзна д̣̇звалогз ниб̣б̣ад̇д̇ид̇ваа абараабарам̣ суг̇ад̇ийсуязва баривад̇д̇знд̇о имасмим̣ б̣уд̣̇д̇хуббаад̣̇з саавад̇т̇ияам̣ б̣раахман̣агулз ниб̣б̣ад̇д̇ид̇ваа махаанаамод̇и лад̣̇д̇ханаамо вин̃н̃уд̇ам̣ бад̇д̇о бхаг̇авад̇о санд̇игам̣ убасан̇гамид̇ваа д̇хаммам̣ суд̇ваа бадилад̣̇д̇хасад̣̇д̇хо баб̣б̣аж̇ид̇ваа гаммадтаанам̣ г̇ахзд̇ваа нзсаад̣̇агз наама баб̣б̣ад̇з вихаранд̇о гилзсабарияудтаанам̣ вигкамбхзд̇ум̣ асаггонд̇о ‘‘гим̣ мз иминаа сам̣гилидтажид̇д̇асса ж̇ийвид̇знаа’’д̇и ад̇д̇абхаавам̣ ниб̣б̣инд̣̇анд̇о ужжам̣ баб̣б̣ад̇асикарам̣ абхирухид̇ваа ‘‘ид̇о баад̇зд̇ваа д̇ам̣ маарзссаамий’’д̇и ад̇д̇аанам̣ барам̣ вияа нид̣̇д̣̇исанд̇о –
Esāvahiyyasepabbatenāti āyasmato mahānāmattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinanto sumedhassa bhagavato kāle brāhmaṇakule nibbattitvā brāhmaṇavijjāsu nipphattiṃ gato gharāvāsaṃ pahāya aññatarāya nadiyā tīre assamaṃ kāretvā sambahule brāhmaṇe mante vācento viharati. Athekadivasaṃ bhagavā taṃ anuggaṇhituṃ tassa asamapadaṃ upagacchi. So bhagavantaṃ disvā pasannacitto āsanaṃ paññāpetvā adāsi . Nisinne bhagavati sumadhuraṃ madhuṃ upanāmesi. Taṃ bhagavā paribhuñjitvā heṭṭhā adhimuttattheravatthumhi vuttanayena anāgataṃ byākaritvā pakkāmi. So tena puññakammena devaloke nibbattitvā aparāparaṃ sugatīsuyeva parivattento imasmiṃ buddhuppāde sāvatthiyaṃ brāhmaṇakule nibbattitvā mahānāmoti laddhanāmo viññutaṃ patto bhagavato santikaṃ upasaṅkamitvā dhammaṃ sutvā paṭiladdhasaddho pabbajitvā kammaṭṭhānaṃ gahetvā nesādake nāma pabbate viharanto kilesapariyuṭṭhānaṃ vikkhambhetuṃ asakkonto ‘‘kiṃ me iminā saṃkiliṭṭhacittassa jīvitenā’’ti attabhāvaṃ nibbindanto uccaṃ pabbatasikharaṃ abhiruhitvā ‘‘ito pātetvā taṃ māressāmī’’ti attānaṃ paraṃ viya niddisanto –
115.
115.
‘‘зсаавахияяасз баб̣б̣ад̇зна, б̣ахугудаж̇асаллагигзна;
‘‘Esāvahiyyase pabbatena, bahukuṭajasallakikena;
нзсаад̣̇агзна г̇иринаа, яасассинаа барижчад̣̇знаа’’д̇и. – г̇аат̇ам̣ абхааси;
Nesādakena girinā, yasassinā paricchadenā’’ti. – gāthaṃ abhāsi;
д̇ад̇т̇а зсаавахияяасзд̇и зсо д̇вам̣ махаанаама авахияяасз барихааяаси. баб̣б̣ад̇знаад̇и ниваасадтаанабхууд̇зна иминаа баб̣б̣ад̇зна. б̣ахугудаж̇асаллагигзнаад̇и б̣ахуухи гудаж̇зхи инд̣̇асааларугкзхи саллагийхи инд̣̇асааларугкзхи ваа саманнааг̇ад̇зна. нзсаад̣̇агзнаад̇и звам̣наамагзна. г̇иринаад̇и сзлзна. сзло хи санд̇хисан̇каад̇зхи баб̣б̣зхи тид̇ад̇д̇аа ‘‘баб̣б̣ад̇о’’д̇и, басаванаад̣̇ивасзна ж̇аласса, саарабхууд̇аанам̣ бхзсаж̇ж̇аад̣̇ивад̇т̇уунан̃жа г̇иран̣ад̇о ‘‘г̇ирий’’д̇и вужжад̇и. д̇ад̣̇убхаяад̇т̇асамбхавад̇о банзд̇т̇а ‘‘баб̣б̣ад̇знаа’’д̇и вад̇ваа ‘‘г̇иринаа’’д̇и жа вуд̇д̇ам̣. яасассинаад̇и саб̣б̣аг̇ун̣зхи виссуд̇зна багаасзна. барижчад̣̇знаад̇и наанаавид̇харугкаг̇ажчалад̇аахи саманд̇ад̇о чаннзна, васанадтаанад̇ааяа ваа д̇уяхам̣ барижчад̣̇абхууд̇зна. аяан̃хзд̇т̇а ад̇хиббааяо – махаанаама, яад̣̇и гаммадтаанам̣ виссаж̇ж̇зд̇ваа вид̇аггаб̣ахуло хоси, звам̣ д̇вам̣ иминаа чааяууд̣̇агасамбаннзна саббааязна ниваасанадтаанабхууд̇зна нзсаад̣̇агаг̇иринаа барихааяаси, ид̣̇аанихам̣ д̇ам̣ ид̇о баад̇зд̇ваа маарзссаами, д̇асмаа на лаб̣бхаа вид̇аггавасигзна бхавид̇унд̇и. звам̣ т̇зро ад̇д̇аанам̣ санд̇аж̇ж̇знд̇оязва вибассанам̣ уссуггаабзд̇ваа арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 1.40.333-352) –
Tattha esāvahiyyaseti eso tvaṃ mahānāma avahiyyase parihāyasi. Pabbatenāti nivāsaṭṭhānabhūtena iminā pabbatena. Bahukuṭajasallakikenāti bahūhi kuṭajehi indasālarukkhehi sallakīhi indasālarukkhehi vā samannāgatena. Nesādakenāti evaṃnāmakena. Girināti selena. Selo hi sandhisaṅkhātehi pabbehi ṭhitattā ‘‘pabbato’’ti, pasavanādivasena jalassa, sārabhūtānaṃ bhesajjādivatthūnañca giraṇato ‘‘girī’’ti vuccati. Tadubhayatthasambhavato panettha ‘‘pabbatenā’’ti vatvā ‘‘girinā’’ti ca vuttaṃ. Yasassināti sabbaguṇehi vissutena pakāsena. Paricchadenāti nānāvidharukkhagacchalatāhi samantato channena, vasanaṭṭhānatāya vā tuyhaṃ paricchadabhūtena. Ayañhettha adhippāyo – mahānāma, yadi kammaṭṭhānaṃ vissajjetvā vitakkabahulo hosi, evaṃ tvaṃ iminā chāyūdakasampannena sappāyena nivāsanaṭṭhānabhūtena nesādakagirinā parihāyasi, idānihaṃ taṃ ito pātetvā māressāmi, tasmā na labbhā vitakkavasikena bhavitunti. Evaṃ thero attānaṃ santajjentoyeva vipassanaṃ ussukkāpetvā arahattaṃ pāpuṇi. Tena vuttaṃ apadāne (apa. thera 1.40.333-352) –
‘‘синд̇хуяаа над̣̇ияаа д̇ийрз, сугад̇о ассамо мама;
‘‘Sindhuyā nadiyā tīre, sukato assamo mama;
д̇ад̇т̇а ваажзмахам̣ сиссз, ид̇ихаасам̣ салагкан̣ам̣.
Tattha vācemahaṃ sisse, itihāsaṃ salakkhaṇaṃ.
‘‘д̇хаммагаамаа винийд̇аа д̇з, сод̇угаамаа сусаасанам̣;
‘‘Dhammakāmā vinītā te, sotukāmā susāsanaṃ;
чал̣ан̇г̇з баарамиббад̇д̇аа, синд̇хугуулз васанд̇и д̇з.
Chaḷaṅge pāramippattā, sindhukūle vasanti te.
‘‘уббаад̇аг̇аманз жзва, лагкан̣зсу жа говид̣̇аа;
‘‘Uppātagamane ceva, lakkhaṇesu ca kovidā;
уд̇д̇амад̇т̇ам̣ г̇авзсанд̇аа, васанд̇и вибинз д̇ад̣̇аа.
Uttamatthaṃ gavesantā, vasanti vipine tadā.
‘‘сумзд̇хо наама самб̣уд̣̇д̇хо, логз уббаж̇ж̇и д̇аавад̣̇з;
‘‘Sumedho nāma sambuddho, loke uppajji tāvade;
амхаагам̣ анугамбанд̇о, убааг̇ажчи винааяаго.
Amhākaṃ anukampanto, upāgacchi vināyako.
‘‘убааг̇ад̇ам̣ махаавийрам̣, сумзд̇хам̣ логанааяагам̣;
‘‘Upāgataṃ mahāvīraṃ, sumedhaṃ lokanāyakaṃ;
д̇ин̣асант̇аарагам̣ гад̇ваа, логаж̇здтассад̣̇аасахам̣.
Tiṇasanthārakaṃ katvā, lokajeṭṭhassadāsahaṃ.
‘‘вибинаад̇о мад̇хум̣ г̇аяха, б̣уд̣̇д̇хасздтассад̣̇аасахам̣;
‘‘Vipināto madhuṃ gayha, buddhaseṭṭhassadāsahaṃ;
самб̣уд̣̇д̇хо барибхун̃ж̇ид̇ваа, ид̣̇ам̣ важанамаб̣рави.
Sambuddho paribhuñjitvā, idaṃ vacanamabravi.
‘‘яо д̇ам̣ ад̣̇ааси мад̇хум̣ мз, басанно сзхи баан̣ибхи;
‘‘Yo taṃ adāsi madhuṃ me, pasanno sehi pāṇibhi;
д̇амахам̣ гид̇д̇аяиссаами, сун̣аат̇а мама бхаасад̇о.
Tamahaṃ kittayissāmi, suṇātha mama bhāsato.
‘‘иминаа мад̇худ̣̇аанзна, д̇ин̣асант̇аарагзна жа;
‘‘Iminā madhudānena, tiṇasanthārakena ca;
д̇им̣са габбасахассаани, д̣̇звалогз рамиссад̇и.
Tiṃsa kappasahassāni, devaloke ramissati.
‘‘д̇им̣сагаббасахассамхи, оггаагагуласамбхаво;
‘‘Tiṃsakappasahassamhi, okkākakulasambhavo;
г̇од̇амо наама г̇од̇д̇зна, сад̇т̇аа логз бхависсад̇и.
Gotamo nāma gottena, satthā loke bhavissati.
‘‘д̇асса д̇хаммзсу д̣̇ааяаад̣̇о, орасо д̇хамманиммид̇о;
‘‘Tassa dhammesu dāyādo, oraso dhammanimmito;
саб̣б̣аасавз барин̃н̃ааяа, ниб̣б̣ааяиссад̇инаасаво.
Sabbāsave pariññāya, nibbāyissatināsavo.
‘‘д̣̇звалогаа ид̇хааг̇анд̇ваа, маад̇угужчим̣ убааг̇ад̇з;
‘‘Devalokā idhāgantvā, mātukucchiṃ upāgate;
мад̇хувассам̣ бавассид̇т̇а, чаад̣̇аяам̣ мад̇хунаа махим̣.
Madhuvassaṃ pavassittha, chādayaṃ madhunā mahiṃ.
‘‘маяи нигканд̇амад̇д̇амхи, гужчияаа жа суд̣̇уд̇д̇араа;
‘‘Mayi nikkhantamattamhi, kucchiyā ca suduttarā;
д̇ад̇рааби мад̇хувассам̣ мз, вассад̇з нижжагаалигам̣.
Tatrāpi madhuvassaṃ me, vassate niccakālikaṃ.
‘‘аг̇аараа абхинигкамма, баб̣б̣аж̇им̣ анаг̇аарияам̣;
‘‘Agārā abhinikkhamma, pabbajiṃ anagāriyaṃ;
лаабхий аннасса баанасса, мад̇худ̣̇аанассид̣̇ам̣ палам̣.
Lābhī annassa pānassa, madhudānassidaṃ phalaṃ.
‘‘саб̣б̣агаамасамид̣̇д̇хохам̣, бхавид̇ваа д̣̇звамаанусз;
‘‘Sabbakāmasamiddhohaṃ, bhavitvā devamānuse;
д̇знзва мад̇худ̣̇аанзна, бад̇д̇омхи аасавагкаяам̣.
Teneva madhudānena, pattomhi āsavakkhayaṃ.
‘‘вудтамхи д̣̇звз жад̇уран̇г̇улз д̇ин̣з, самбубпид̇з д̇харан̣ийрухз сан̃чаннз;
‘‘Vuṭṭhamhi deve caturaṅgule tiṇe, sampupphite dharaṇīruhe sañchanne;
сун̃н̃з гхарз ман̣д̣абаругкамуулагз, васаами нижжам̣ сукид̇о анаасаво.
Suññe ghare maṇḍaparukkhamūlake, vasāmi niccaṃ sukhito anāsavo.
‘‘маж̇жхз маханд̇з хийнз жа, бхавз саб̣б̣з ад̇иггамим̣;
‘‘Majjhe mahante hīne ca, bhave sabbe atikkamiṃ;
аж̇ж̇а мз аасаваа кийн̣аа, над̇т̇и д̣̇аани бунаб̣бхаво.
Ajja me āsavā khīṇā, natthi dāni punabbhavo.
‘‘д̇им̣сагаббасахассамхи, яам̣ д̣̇аанамад̣̇ад̣̇им̣ д̇ад̣̇аа;
‘‘Tiṃsakappasahassamhi, yaṃ dānamadadiṃ tadā;
д̣̇уг̇г̇ад̇им̣ наабхиж̇аанаами, мад̇худ̣̇аанассид̣̇ам̣ палам̣.
Duggatiṃ nābhijānāmi, madhudānassidaṃ phalaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
аяамзва жа т̇зрасса ан̃н̃ааб̣яаагаран̣аг̇аат̇аа ахосийд̇и.
Ayameva ca therassa aññābyākaraṇagāthā ahosīti.
махаанаамад̇т̇зраг̇аат̇ааван̣н̣анаа нидтид̇аа.
Mahānāmattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 5. махаанаамад̇т̇зраг̇аат̇аа • 5. Mahānāmattheragāthā
