Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ • Dīghanikāya

    ༢. མཧཱནིདཱནསུཏྟཾ

    2. Mahānidānasuttaṃ

    པཊིཙྩསམུཔྤཱདོ

    Paṭiccasamuppādo

    ༩༥. ཨེཝཾ མེ སུཏཾ – ཨེཀཾ སམཡཾ བྷགཝཱ ཀུརཱུསུ ཝིཧརཏི ཀམྨཱསདྷམྨཾ ནཱམ 1 ཀུརཱུནཾ ནིགམོ། ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ – ‘‘ཨཙྪརིཡཾ, བྷནྟེ, ཨབྦྷུཏཾ, བྷནྟེ! ཡཱཝ གམྦྷཱིརོ ཙཱཡཾ, བྷནྟེ, པཊིཙྩསམུཔྤཱདོ གམྦྷཱིརཱཝབྷཱསོ ཙ, ཨཐ ཙ པན མེ ཨུཏྟཱནཀུཏྟཱནཀོ ཝིཡ ཁཱཡཏཱི’’ཏི། ‘‘མཱ ཧེཝཾ, ཨཱནནྡ, ཨཝཙ, མཱ ཧེཝཾ, ཨཱནནྡ, ཨཝཙ། གམྦྷཱིརོ ཙཱཡཾ, ཨཱནནྡ, པཊིཙྩསམུཔྤཱདོ གམྦྷཱིརཱཝབྷཱསོ ཙ། ཨེཏསྶ, ཨཱནནྡ, དྷམྨསྶ ཨནནུབོདྷཱ ཨཔྤཊིཝེདྷཱ ཨེཝམཡཾ པཛཱ ཏནྟཱཀུལཀཛཱཏཱ ཀུལགཎྛིཀཛཱཏཱ 2 མུཉྫཔབྦཛབྷཱུཏཱ ཨཔཱཡཾ དུགྒཏིཾ ཝིནིཔཱཏཾ སཾསཱརཾ ནཱཏིཝཏྟཏི།

    95. Evaṃ me sutaṃ – ekaṃ samayaṃ bhagavā kurūsu viharati kammāsadhammaṃ nāma 3 kurūnaṃ nigamo. Atha kho āyasmā ānando yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca – ‘‘acchariyaṃ, bhante, abbhutaṃ, bhante! Yāva gambhīro cāyaṃ, bhante, paṭiccasamuppādo gambhīrāvabhāso ca, atha ca pana me uttānakuttānako viya khāyatī’’ti. ‘‘Mā hevaṃ, ānanda, avaca, mā hevaṃ, ānanda, avaca. Gambhīro cāyaṃ, ānanda, paṭiccasamuppādo gambhīrāvabhāso ca. Etassa, ānanda, dhammassa ananubodhā appaṭivedhā evamayaṃ pajā tantākulakajātā kulagaṇṭhikajātā 4 muñjapabbajabhūtā apāyaṃ duggatiṃ vinipātaṃ saṃsāraṃ nātivattati.

    ༩༦. ‘‘‘ཨཏྠི ཨིདཔྤཙྩཡཱ ཛརཱམརཎ’ནྟི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ། ‘ཀིཾཔཙྩཡཱ ཛརཱམརཎ’ནྟི ཨིཏི ཙེ ཝདེཡྻ, ‘ཛཱཏིཔཙྩཡཱ ཛརཱམརཎ’ནྟི ཨིཙྩསྶ ཝཙནཱིཡཾ།

    96. ‘‘‘Atthi idappaccayā jarāmaraṇa’nti iti puṭṭhena satā, ānanda, atthītissa vacanīyaṃ. ‘Kiṃpaccayā jarāmaraṇa’nti iti ce vadeyya, ‘jātipaccayā jarāmaraṇa’nti iccassa vacanīyaṃ.

    ‘‘‘ཨཏྠི ཨིདཔྤཙྩཡཱ ཛཱཏཱི’ཏི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ། ‘ཀིཾཔཙྩཡཱ ཛཱཏཱི’ཏི ཨིཏི ཙེ ཝདེཡྻ, ‘བྷཝཔཙྩཡཱ ཛཱཏཱི’ཏི ཨིཙྩསྶ ཝཙནཱིཡཾ།

    ‘‘‘Atthi idappaccayā jātī’ti iti puṭṭhena satā, ānanda, atthītissa vacanīyaṃ. ‘Kiṃpaccayā jātī’ti iti ce vadeyya, ‘bhavapaccayā jātī’ti iccassa vacanīyaṃ.

    ‘‘‘ཨཏྠི ཨིདཔྤཙྩཡཱ བྷཝོ’ཏི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ ། ‘ཀིཾཔཙྩཡཱ བྷཝོ’ཏི ཨིཏི ཙེ ཝདེཡྻ, ‘ཨུཔཱདཱནཔཙྩཡཱ བྷཝོ’ཏི ཨིཙྩསྶ ཝཙནཱིཡཾ།

    ‘‘‘Atthi idappaccayā bhavo’ti iti puṭṭhena satā, ānanda, atthītissa vacanīyaṃ . ‘Kiṃpaccayā bhavo’ti iti ce vadeyya, ‘upādānapaccayā bhavo’ti iccassa vacanīyaṃ.

    ‘‘‘ཨཏྠི ཨིདཔྤཙྩཡཱ ཨུཔཱདཱན’ནྟི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ། ‘ཀིཾཔཙྩཡཱ ཨུཔཱདཱན’ནྟི ཨིཏི ཙེ ཝདེཡྻ, ‘ཏཎྷཱཔཙྩཡཱ ཨུཔཱདཱན’ནྟི ཨིཙྩསྶ ཝཙནཱིཡཾ།

    ‘‘‘Atthi idappaccayā upādāna’nti iti puṭṭhena satā, ānanda, atthītissa vacanīyaṃ. ‘Kiṃpaccayā upādāna’nti iti ce vadeyya, ‘taṇhāpaccayā upādāna’nti iccassa vacanīyaṃ.

    ‘‘‘ཨཏྠི ཨིདཔྤཙྩཡཱ ཏཎྷཱ’ཏི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ། ‘ཀིཾཔཙྩཡཱ ཏཎྷཱ’ཏི ཨིཏི ཙེ ཝདེཡྻ, ‘ཝེདནཱཔཙྩཡཱ ཏཎྷཱ’ཏི ཨིཙྩསྶ ཝཙནཱིཡཾ།

    ‘‘‘Atthi idappaccayā taṇhā’ti iti puṭṭhena satā, ānanda, atthītissa vacanīyaṃ. ‘Kiṃpaccayā taṇhā’ti iti ce vadeyya, ‘vedanāpaccayā taṇhā’ti iccassa vacanīyaṃ.

    ‘‘‘ཨཏྠི ཨིདཔྤཙྩཡཱ ཝེདནཱ’ཏི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ། ‘ཀིཾཔཙྩཡཱ ཝེདནཱ’ཏི ཨིཏི ཙེ ཝདེཡྻ, ‘ཕསྶཔཙྩཡཱ ཝེདནཱ’ཏི ཨིཙྩསྶ ཝཙནཱིཡཾ།

    ‘‘‘Atthi idappaccayā vedanā’ti iti puṭṭhena satā, ānanda, atthītissa vacanīyaṃ. ‘Kiṃpaccayā vedanā’ti iti ce vadeyya, ‘phassapaccayā vedanā’ti iccassa vacanīyaṃ.

    ‘‘‘ཨཏྠི ཨིདཔྤཙྩཡཱ ཕསྶོ’ཏི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ། ‘ཀིཾཔཙྩཡཱ ཕསྶོ’ཏི ཨིཏི ཙེ ཝདེཡྻ, ‘ནཱམརཱུཔཔཙྩཡཱ ཕསྶོ’ཏི ཨིཙྩསྶ ཝཙནཱིཡཾ།

    ‘‘‘Atthi idappaccayā phasso’ti iti puṭṭhena satā, ānanda, atthītissa vacanīyaṃ. ‘Kiṃpaccayā phasso’ti iti ce vadeyya, ‘nāmarūpapaccayā phasso’ti iccassa vacanīyaṃ.

    ‘‘‘ཨཏྠི ཨིདཔྤཙྩཡཱ ནཱམརཱུཔ’ནྟི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ། ‘ཀིཾཔཙྩཡཱ ནཱམརཱུཔ’ནྟི ཨིཏི ཙེ ཝདེཡྻ, ‘ཝིཉྙཱཎཔཙྩཡཱ ནཱམརཱུཔ’ནྟི ཨིཙྩསྶ ཝཙནཱིཡཾ།

    ‘‘‘Atthi idappaccayā nāmarūpa’nti iti puṭṭhena satā, ānanda, atthītissa vacanīyaṃ. ‘Kiṃpaccayā nāmarūpa’nti iti ce vadeyya, ‘viññāṇapaccayā nāmarūpa’nti iccassa vacanīyaṃ.

    ‘‘‘ཨཏྠི ཨིདཔྤཙྩཡཱ ཝིཉྙཱཎ’ནྟི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ། ‘ཀིཾཔཙྩཡཱ ཝིཉྙཱཎ’ནྟི ཨིཏི ཙེ ཝདེཡྻ, ‘ནཱམརཱུཔཔཙྩཡཱ ཝིཉྙཱཎ’ནྟི ཨིཙྩསྶ ཝཙནཱིཡཾ།

    ‘‘‘Atthi idappaccayā viññāṇa’nti iti puṭṭhena satā, ānanda, atthītissa vacanīyaṃ. ‘Kiṃpaccayā viññāṇa’nti iti ce vadeyya, ‘nāmarūpapaccayā viññāṇa’nti iccassa vacanīyaṃ.

    ༩༧. ‘‘ཨིཏི ཁོ, ཨཱནནྡ, ནཱམརཱུཔཔཙྩཡཱ ཝིཉྙཱཎཾ, ཝིཉྙཱཎཔཙྩཡཱ ནཱམརཱུཔཾ, ནཱམརཱུཔཔཙྩཡཱ ཕསྶོ, ཕསྶཔཙྩཡཱ ཝེདནཱ, ཝེདནཱཔཙྩཡཱ ཏཎྷཱ, ཏཎྷཱཔཙྩཡཱ ཨུཔཱདཱནཾ, ཨུཔཱདཱནཔཙྩཡཱ བྷཝོ, བྷཝཔཙྩཡཱ ཛཱཏི , ཛཱཏིཔཙྩཡཱ ཛརཱམརཎཾ སོཀཔརིདེཝདུཀྑདོམནསྶུཔཱཡཱསཱ སམྦྷཝནྟི། ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏི།

    97. ‘‘Iti kho, ānanda, nāmarūpapaccayā viññāṇaṃ, viññāṇapaccayā nāmarūpaṃ, nāmarūpapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā bhavo, bhavapaccayā jāti , jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.

    ༩༨. ‘‘‘ཛཱཏིཔཙྩཡཱ ཛརཱམརཎ’ནྟི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཛཱཏིཔཙྩཡཱ ཛརཱམརཎཾ། ཛཱཏི ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སེཡྻཐིདཾ – དེཝཱནཾ ཝཱ དེཝཏྟཱཡ, གནྡྷབྦཱནཾ ཝཱ གནྡྷབྦཏྟཱཡ, ཡཀྑཱནཾ ཝཱ ཡཀྑཏྟཱཡ, བྷཱུཏཱནཾ ཝཱ བྷཱུཏཏྟཱཡ, མནུསྶཱནཾ ཝཱ མནུསྶཏྟཱཡ, ཙཏུཔྤདཱནཾ ཝཱ ཙཏུཔྤདཏྟཱཡ, པཀྑཱིནཾ ཝཱ པཀྑིཏྟཱཡ, སརཱིསཔཱནཾ ཝཱ སརཱིསཔཏྟཱཡ 5, ཏེསཾ ཏེསཉྩ ཧི, ཨཱནནྡ, སཏྟཱནཾ ཏདཏྟཱཡ ཛཱཏི ནཱབྷཝིསྶ། སབྦསོ ཛཱཏིཡཱ ཨསཏི ཛཱཏིནིརོདྷཱ ཨཔི ནུ ཁོ ཛརཱམརཎཾ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཛརཱམརཎསྶ, ཡདིདཾ ཛཱཏི’’།

    98. ‘‘‘Jātipaccayā jarāmaraṇa’nti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā jātipaccayā jarāmaraṇaṃ. Jāti ca hi, ānanda, nābhavissa sabbena sabbaṃ sabbathā sabbaṃ kassaci kimhici, seyyathidaṃ – devānaṃ vā devattāya, gandhabbānaṃ vā gandhabbattāya, yakkhānaṃ vā yakkhattāya, bhūtānaṃ vā bhūtattāya, manussānaṃ vā manussattāya, catuppadānaṃ vā catuppadattāya, pakkhīnaṃ vā pakkhittāya, sarīsapānaṃ vā sarīsapattāya 6, tesaṃ tesañca hi, ānanda, sattānaṃ tadattāya jāti nābhavissa. Sabbaso jātiyā asati jātinirodhā api nu kho jarāmaraṇaṃ paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo jarāmaraṇassa, yadidaṃ jāti’’.

    ༩༩. ‘‘‘བྷཝཔཙྩཡཱ ཛཱཏཱི’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ བྷཝཔཙྩཡཱ ཛཱཏི། བྷཝོ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སེཡྻཐིདཾ – ཀཱམབྷཝོ ཝཱ རཱུཔབྷཝོ ཝཱ ཨརཱུཔབྷཝོ ཝཱ, སབྦསོ བྷཝེ ཨསཏི བྷཝནིརོདྷཱ ཨཔི ནུ ཁོ ཛཱཏི པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཛཱཏིཡཱ, ཡདིདཾ བྷཝོ’’།

    99. ‘‘‘Bhavapaccayā jātī’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā bhavapaccayā jāti. Bhavo ca hi, ānanda, nābhavissa sabbena sabbaṃ sabbathā sabbaṃ kassaci kimhici, seyyathidaṃ – kāmabhavo vā rūpabhavo vā arūpabhavo vā, sabbaso bhave asati bhavanirodhā api nu kho jāti paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo jātiyā, yadidaṃ bhavo’’.

    ༡༠༠. ‘‘‘ཨུཔཱདཱནཔཙྩཡཱ བྷཝོ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཨུཔཱདཱནཔཙྩཡཱ བྷཝོ། ཨུཔཱདཱནཉྩ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི , སེཡྻཐིདཾ – ཀཱམུཔཱདཱནཾ ཝཱ དིཊྛུཔཱདཱནཾ ཝཱ སཱིལབྦཏུཔཱདཱནཾ ཝཱ ཨཏྟཝཱདུཔཱདཱནཾ ཝཱ, སབྦསོ ཨུཔཱདཱནེ ཨསཏི ཨུཔཱདཱནནིརོདྷཱ ཨཔི ནུ ཁོ བྷཝོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ བྷཝསྶ, ཡདིདཾ ཨུཔཱདཱནཾ’’།

    100. ‘‘‘Upādānapaccayā bhavo’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā upādānapaccayā bhavo. Upādānañca hi, ānanda, nābhavissa sabbena sabbaṃ sabbathā sabbaṃ kassaci kimhici , seyyathidaṃ – kāmupādānaṃ vā diṭṭhupādānaṃ vā sīlabbatupādānaṃ vā attavādupādānaṃ vā, sabbaso upādāne asati upādānanirodhā api nu kho bhavo paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo bhavassa, yadidaṃ upādānaṃ’’.

    ༡༠༡. ‘‘‘ཏཎྷཱཔཙྩཡཱ ཨུཔཱདཱན’ནྟི ཨིཏི ཁོ པནེཏཾ ཝུཏྟཾ ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཏཎྷཱཔཙྩཡཱ ཨུཔཱདཱནཾ། ཏཎྷཱ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སེཡྻཐིདཾ – རཱུཔཏཎྷཱ སདྡཏཎྷཱ གནྡྷཏཎྷཱ རསཏཎྷཱ ཕོཊྛབྦཏཎྷཱ དྷམྨཏཎྷཱ, སབྦསོ ཏཎྷཱཡ ཨསཏི ཏཎྷཱནིརོདྷཱ ཨཔི ནུ ཁོ ཨུཔཱདཱནཾ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཨུཔཱདཱནསྶ, ཡདིདཾ ཏཎྷཱ’’།

    101. ‘‘‘Taṇhāpaccayā upādāna’nti iti kho panetaṃ vuttaṃ tadānanda, imināpetaṃ pariyāyena veditabbaṃ, yathā taṇhāpaccayā upādānaṃ. Taṇhā ca hi, ānanda, nābhavissa sabbena sabbaṃ sabbathā sabbaṃ kassaci kimhici, seyyathidaṃ – rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā, sabbaso taṇhāya asati taṇhānirodhā api nu kho upādānaṃ paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo upādānassa, yadidaṃ taṇhā’’.

    ༡༠༢. ‘‘‘ཝེདནཱཔཙྩཡཱ ཏཎྷཱ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཝེདནཱཔཙྩཡཱ ཏཎྷཱ། ཝེདནཱ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སེཡྻཐིདཾ – ཙཀྑུསམྥསྶཛཱ ཝེདནཱ སོཏསམྥསྶཛཱ ཝེདནཱ གྷཱནསམྥསྶཛཱ ཝེདནཱ ཛིཝ྄ཧཱསམྥསྶཛཱ ཝེདནཱ ཀཱཡསམྥསྶཛཱ ཝེདནཱ མནོསམྥསྶཛཱ ཝེདནཱ, སབྦསོ ཝེདནཱཡ ཨསཏི ཝེདནཱནིརོདྷཱ ཨཔི ནུ ཁོ ཏཎྷཱ པཉྙཱཡེཐཱ’’ཏི ? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཏཎྷཱཡ, ཡདིདཾ ཝེདནཱ’’།

    102. ‘‘‘Vedanāpaccayā taṇhā’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā vedanāpaccayā taṇhā. Vedanā ca hi, ānanda, nābhavissa sabbena sabbaṃ sabbathā sabbaṃ kassaci kimhici, seyyathidaṃ – cakkhusamphassajā vedanā sotasamphassajā vedanā ghānasamphassajā vedanā jivhāsamphassajā vedanā kāyasamphassajā vedanā manosamphassajā vedanā, sabbaso vedanāya asati vedanānirodhā api nu kho taṇhā paññāyethā’’ti ? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo taṇhāya, yadidaṃ vedanā’’.

    ༡༠༣. ‘‘ཨིཏི ཁོ པནེཏཾ, ཨཱནནྡ, ཝེདནཾ པཊིཙྩ ཏཎྷཱ, ཏཎྷཾ པཊིཙྩ པརིཡེསནཱ, པརིཡེསནཾ པཊིཙྩ ལཱབྷོ, ལཱབྷཾ པཊིཙྩ ཝིནིཙྪཡོ, ཝིནིཙྪཡཾ པཊིཙྩ ཚནྡརཱགོ, ཚནྡརཱགཾ པཊིཙྩ ཨཛ྄ཛྷོསཱནཾ, ཨཛ྄ཛྷོསཱནཾ པཊིཙྩ པརིགྒཧོ, པརིགྒཧཾ པཊིཙྩ མཙྪརིཡཾ, མཙྪརིཡཾ པཊིཙྩ ཨཱརཀྑོ། ཨཱརཀྑཱདྷིཀརཎཾ དཎྜཱདཱནསཏྠཱདཱནཀལཧཝིགྒཧཝིཝཱདཏུཝཾཏུཝཾཔེསུཉྙམུསཱཝཱདཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི།

    103. ‘‘Iti kho panetaṃ, ānanda, vedanaṃ paṭicca taṇhā, taṇhaṃ paṭicca pariyesanā, pariyesanaṃ paṭicca lābho, lābhaṃ paṭicca vinicchayo, vinicchayaṃ paṭicca chandarāgo, chandarāgaṃ paṭicca ajjhosānaṃ, ajjhosānaṃ paṭicca pariggaho, pariggahaṃ paṭicca macchariyaṃ, macchariyaṃ paṭicca ārakkho. Ārakkhādhikaraṇaṃ daṇḍādānasatthādānakalahaviggahavivādatuvaṃtuvaṃpesuññamusāvādā aneke pāpakā akusalā dhammā sambhavanti.

    ༡༠༤. ‘‘‘ཨཱརཀྑཱདྷིཀརཎཾ 7 དཎྜཱདཱནསཏྠཱདཱནཀལཧཝིགྒཧཝིཝཱདཏུཝཾཏུཝཾཔེསུཉྙམུསཱཝཱདཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟཱི’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཨཱརཀྑཱདྷིཀརཎཾ དཎྜཱདཱནསཏྠཱདཱནཀལཧཝིགྒཧཝིཝཱདཏུཝཾཏུཝཾཔེསུཉྙམུསཱཝཱདཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟི། ཨཱརཀྑོ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སབྦསོ ཨཱརཀྑེ ཨསཏི ཨཱརཀྑནིརོདྷཱ ཨཔི ནུ ཁོ དཎྜཱདཱནསཏྠཱདཱནཀལཧཝིགྒཧཝིཝཱདཏུཝཾཏུཝཾཔེསུཉྙམུསཱཝཱདཱ ཨནེཀེ པཱཔཀཱ ཨཀུསལཱ དྷམྨཱ སམྦྷཝེཡྻུ’’ནྟི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ དཎྜཱདཱནསཏྠཱདཱནཀལཧཝིགྒཧཝིཝཱདཏུཝཾཏུཝཾཔེསུཉྙམུསཱཝཱདཱནཾ ཨནེཀེསཾ པཱཔཀཱནཾ ཨཀུསལཱནཾ དྷམྨཱནཾ སམྦྷཝཱཡ ཡདིདཾ ཨཱརཀྑོ།

    104. ‘‘‘Ārakkhādhikaraṇaṃ 8 daṇḍādānasatthādānakalahaviggahavivādatuvaṃtuvaṃpesuññamusāvādā aneke pāpakā akusalā dhammā sambhavantī’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā ārakkhādhikaraṇaṃ daṇḍādānasatthādānakalahaviggahavivādatuvaṃtuvaṃpesuññamusāvādā aneke pāpakā akusalā dhammā sambhavanti. Ārakkho ca hi, ānanda, nābhavissa sabbena sabbaṃ sabbathā sabbaṃ kassaci kimhici, sabbaso ārakkhe asati ārakkhanirodhā api nu kho daṇḍādānasatthādānakalahaviggahavivādatuvaṃtuvaṃpesuññamusāvādā aneke pāpakā akusalā dhammā sambhaveyyu’’nti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo daṇḍādānasatthādānakalahaviggahavivādatuvaṃtuvaṃpesuññamusāvādānaṃ anekesaṃ pāpakānaṃ akusalānaṃ dhammānaṃ sambhavāya yadidaṃ ārakkho.

    ༡༠༥. ‘‘‘མཙྪརིཡཾ པཊིཙྩ ཨཱརཀྑོ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ མཙྪརིཡཾ པཊིཙྩ ཨཱརཀྑོ། མཙྪརིཡཉྩ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི , སབྦསོ མཙྪརིཡེ ཨསཏི མཙྪརིཡནིརོདྷཱ ཨཔི ནུ ཁོ ཨཱརཀྑོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཨཱརཀྑསྶ, ཡདིདཾ མཙྪརིཡཾ’’།

    105. ‘‘‘Macchariyaṃ paṭicca ārakkho’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā macchariyaṃ paṭicca ārakkho. Macchariyañca hi, ānanda, nābhavissa sabbena sabbaṃ sabbathā sabbaṃ kassaci kimhici , sabbaso macchariye asati macchariyanirodhā api nu kho ārakkho paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo ārakkhassa, yadidaṃ macchariyaṃ’’.

    ༡༠༦. ‘‘‘པརིགྒཧཾ པཊིཙྩ མཙྪརིཡ’ནྟི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ པརིགྒཧཾ པཊིཙྩ མཙྪརིཡཾ། པརིགྒཧོ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སབྦསོ པརིགྒཧེ ཨསཏི པརིགྒཧནིརོདྷཱ ཨཔི ནུ ཁོ མཙྪརིཡཾ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ མཙྪརིཡསྶ, ཡདིདཾ པརིགྒཧོ’’།

    106. ‘‘‘Pariggahaṃ paṭicca macchariya’nti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā pariggahaṃ paṭicca macchariyaṃ. Pariggaho ca hi, ānanda, nābhavissa sabbena sabbaṃ sabbathā sabbaṃ kassaci kimhici, sabbaso pariggahe asati pariggahanirodhā api nu kho macchariyaṃ paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo macchariyassa, yadidaṃ pariggaho’’.

    ༡༠༧. ‘‘‘ཨཛ྄ཛྷོསཱནཾ པཊིཙྩ པརིགྒཧོ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཨཛ྄ཛྷོསཱནཾ པཊིཙྩ པརིགྒཧོ། ཨཛ྄ཛྷོསཱནཉྩ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སབྦསོ ཨཛ྄ཛྷོསཱནེ ཨསཏི ཨཛ྄ཛྷོསཱནནིརོདྷཱ ཨཔི ནུ ཁོ པརིགྒཧོ པཉྙཱཡེཐཱ’’ཏི ? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ པརིགྒཧསྶ – ཡདིདཾ ཨཛ྄ཛྷོསཱནཾ’’།

    107. ‘‘‘Ajjhosānaṃ paṭicca pariggaho’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā ajjhosānaṃ paṭicca pariggaho. Ajjhosānañca hi, ānanda, nābhavissa sabbena sabbaṃ sabbathā sabbaṃ kassaci kimhici, sabbaso ajjhosāne asati ajjhosānanirodhā api nu kho pariggaho paññāyethā’’ti ? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo pariggahassa – yadidaṃ ajjhosānaṃ’’.

    ༡༠༨. ‘‘‘ཚནྡརཱགཾ པཊིཙྩ ཨཛ྄ཛྷོསཱན’ནྟི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཚནྡརཱགཾ པཊིཙྩ ཨཛ྄ཛྷོསཱནཾ། ཚནྡརཱགོ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སབྦསོ ཚནྡརཱགེ ཨསཏི ཚནྡརཱགནིརོདྷཱ ཨཔི ནུ ཁོ ཨཛ྄ཛྷོསཱནཾ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཨཛ྄ཛྷོསཱནསྶ, ཡདིདཾ ཚནྡརཱགོ’’།

    108. ‘‘‘Chandarāgaṃ paṭicca ajjhosāna’nti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā chandarāgaṃ paṭicca ajjhosānaṃ. Chandarāgo ca hi, ānanda, nābhavissa sabbena sabbaṃ sabbathā sabbaṃ kassaci kimhici, sabbaso chandarāge asati chandarāganirodhā api nu kho ajjhosānaṃ paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo ajjhosānassa, yadidaṃ chandarāgo’’.

    ༡༠༩. ‘‘‘ཝིནིཙྪཡཾ པཊིཙྩ ཚནྡརཱགོ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཝིནིཙྪཡཾ པཊིཙྩ ཚནྡརཱགོ། ཝིནིཙྪཡོ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སབྦསོ ཝིནིཙྪཡེ ཨསཏི ཝིནིཙྪཡནིརོདྷཱ ཨཔི ནུ ཁོ ཚནྡརཱགོ པཉྙཱཡེཐཱ’’ཏི? ‘‘ནོ ཧེཏཾ , བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཚནྡརཱགསྶ, ཡདིདཾ ཝིནིཙྪཡོ’’།

    109. ‘‘‘Vinicchayaṃ paṭicca chandarāgo’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā vinicchayaṃ paṭicca chandarāgo. Vinicchayo ca hi, ānanda, nābhavissa sabbena sabbaṃ sabbathā sabbaṃ kassaci kimhici, sabbaso vinicchaye asati vinicchayanirodhā api nu kho chandarāgo paññāyethā’’ti? ‘‘No hetaṃ , bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo chandarāgassa, yadidaṃ vinicchayo’’.

    ༡༡༠. ‘‘‘ལཱབྷཾ པཊིཙྩ ཝིནིཙྪཡོ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ལཱབྷཾ པཊིཙྩ ཝིནིཙྪཡོ། ལཱབྷོ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སབྦསོ ལཱབྷེ ཨསཏི ལཱབྷནིརོདྷཱ ཨཔི ནུ ཁོ ཝིནིཙྪཡོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཝིནིཙྪཡསྶ, ཡདིདཾ ལཱབྷོ’’།

    110. ‘‘‘Lābhaṃ paṭicca vinicchayo’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā lābhaṃ paṭicca vinicchayo. Lābho ca hi, ānanda, nābhavissa sabbena sabbaṃ sabbathā sabbaṃ kassaci kimhici, sabbaso lābhe asati lābhanirodhā api nu kho vinicchayo paññāyethā’’ti? ‘‘No hetaṃ, bhante’’. ‘‘Tasmātihānanda eseva hetu etaṃ nidānaṃ esa samudayo esa paccayo vinicchayassa, yadidaṃ lābho’’.

    ༡༡༡. ‘‘‘པརིཡེསནཾ པཊིཙྩ ལཱབྷོ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ པརིཡེསནཾ པཊིཙྩ ལཱབྷོ། པརིཡེསནཱ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སབྦསོ པརིཡེསནཱཡ ཨསཏི པརིཡེསནཱནིརོདྷཱ ཨཔི ནུ ཁོ ལཱབྷོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ལཱབྷསྶ, ཡདིདཾ པརིཡེསནཱ’’།

    111. ‘‘‘Pariyesanaṃ paṭicca lābho’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā pariyesanaṃ paṭicca lābho. Pariyesanā ca hi, ānanda, nābhavissa sabbena sabbaṃ sabbathā sabbaṃ kassaci kimhici, sabbaso pariyesanāya asati pariyesanānirodhā api nu kho lābho paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo lābhassa, yadidaṃ pariyesanā’’.

    ༡༡༢. ‘‘‘ཏཎྷཾ པཊིཙྩ པརིཡེསནཱ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཏཎྷཾ པཊིཙྩ པརིཡེསནཱ། ཏཎྷཱ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སེཡྻཐིདཾ – ཀཱམཏཎྷཱ བྷཝཏཎྷཱ ཝིབྷཝཏཎྷཱ, སབྦསོ ཏཎྷཱཡ ཨསཏི ཏཎྷཱནིརོདྷཱ ཨཔི ནུ ཁོ པརིཡེསནཱ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ པརིཡེསནཱཡ, ཡདིདཾ ཏཎྷཱ། ཨིཏི ཁོ, ཨཱནནྡ, ཨིམེ དྭེ དྷམྨཱ 9 དྭཡེན ཝེདནཱཡ ཨེཀསམོསརཎཱ བྷཝནྟི’’།

    112. ‘‘‘Taṇhaṃ paṭicca pariyesanā’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā taṇhaṃ paṭicca pariyesanā. Taṇhā ca hi, ānanda, nābhavissa sabbena sabbaṃ sabbathā sabbaṃ kassaci kimhici, seyyathidaṃ – kāmataṇhā bhavataṇhā vibhavataṇhā, sabbaso taṇhāya asati taṇhānirodhā api nu kho pariyesanā paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo pariyesanāya, yadidaṃ taṇhā. Iti kho, ānanda, ime dve dhammā 10 dvayena vedanāya ekasamosaraṇā bhavanti’’.

    ༡༡༣. ‘‘‘ཕསྶཔཙྩཡཱ ཝེདནཱ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ‘ཕསྶཔཙྩཡཱ ཝེདནཱ། ཕསྶོ ཙ ཧི, ཨཱནནྡ, ནཱབྷཝིསྶ སབྦེན སབྦཾ སབྦཐཱ སབྦཾ ཀསྶཙི ཀིམྷིཙི, སེཡྻཐིདཾ – ཙཀྑུསམྥསྶོ སོཏསམྥསྶོ གྷཱནསམྥསྶོ ཛིཝ྄ཧཱསམྥསྶོ ཀཱཡསམྥསྶོ མནོསམྥསྶོ, སབྦསོ ཕསྶེ ཨསཏི ཕསྶནིརོདྷཱ ཨཔི ནུ ཁོ ཝེདནཱ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ , ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཝེདནཱཡ, ཡདིདཾ ཕསྶོ’’།

    113. ‘‘‘Phassapaccayā vedanā’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā ‘phassapaccayā vedanā. Phasso ca hi, ānanda, nābhavissa sabbena sabbaṃ sabbathā sabbaṃ kassaci kimhici, seyyathidaṃ – cakkhusamphasso sotasamphasso ghānasamphasso jivhāsamphasso kāyasamphasso manosamphasso, sabbaso phasse asati phassanirodhā api nu kho vedanā paññāyethā’’ti? ‘‘No hetaṃ, bhante’’. ‘‘Tasmātihānanda , eseva hetu etaṃ nidānaṃ esa samudayo esa paccayo vedanāya, yadidaṃ phasso’’.

    ༡༡༤. ‘‘‘ནཱམརཱུཔཔཙྩཡཱ ཕསྶོ’ཏི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ནཱམརཱུཔཔཙྩཡཱ ཕསྶོ། ཡེཧི, ཨཱནནྡ, ཨཱཀཱརེཧི ཡེཧི ལིངྒེཧི ཡེཧི ནིམིཏྟེཧི ཡེཧི ཨུདྡེསེཧི ནཱམཀཱཡསྶ པཉྙཏྟི ཧོཏི, ཏེསུ ཨཱཀཱརེསུ ཏེསུ ལིངྒེསུ ཏེསུ ནིམིཏྟེསུ ཏེསུ ཨུདྡེསེསུ ཨསཏི ཨཔི ནུ ཁོ རཱུཔཀཱཡེ ཨདྷིཝཙནསམྥསྶོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཡེཧི, ཨཱནནྡ, ཨཱཀཱརེཧི ཡེཧི ལིངྒེཧི ཡེཧི ནིམིཏྟེཧི ཡེཧི ཨུདྡེསེཧི རཱུཔཀཱཡསྶ པཉྙཏྟི ཧོཏི, ཏེསུ ཨཱཀཱརེསུ…པེ॰… ཏེསུ ཨུདྡེསེསུ ཨསཏི ཨཔི ནུ ཁོ ནཱམཀཱཡེ པཊིགྷསམྥསྶོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཡེཧི, ཨཱནནྡ, ཨཱཀཱརེཧི…པེ॰… ཡེཧི ཨུདྡེསེཧི ནཱམཀཱཡསྶ ཙ རཱུཔཀཱཡསྶ ཙ པཉྙཏྟི ཧོཏི , ཏེསུ ཨཱཀཱརེསུ…པེ॰… ཏེསུ ཨུདྡེསེསུ ཨསཏི ཨཔི ནུ ཁོ ཨདྷིཝཙནསམྥསྶོ ཝཱ པཊིགྷསམྥསྶོ ཝཱ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཡེཧི, ཨཱནནྡ, ཨཱཀཱརེཧི…པེ॰… ཡེཧི ཨུདྡེསེཧི ནཱམརཱུཔསྶ པཉྙཏྟི ཧོཏི, ཏེསུ ཨཱཀཱརེསུ …པེ॰… ཏེསུ ཨུདྡེསེསུ ཨསཏི ཨཔི ནུ ཁོ ཕསྶོ པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཕསྶསྶ, ཡདིདཾ ནཱམརཱུཔཾ’’།

    114. ‘‘‘Nāmarūpapaccayā phasso’ti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā nāmarūpapaccayā phasso. Yehi, ānanda, ākārehi yehi liṅgehi yehi nimittehi yehi uddesehi nāmakāyassa paññatti hoti, tesu ākāresu tesu liṅgesu tesu nimittesu tesu uddesesu asati api nu kho rūpakāye adhivacanasamphasso paññāyethā’’ti? ‘‘No hetaṃ, bhante’’. ‘‘Yehi, ānanda, ākārehi yehi liṅgehi yehi nimittehi yehi uddesehi rūpakāyassa paññatti hoti, tesu ākāresu…pe… tesu uddesesu asati api nu kho nāmakāye paṭighasamphasso paññāyethā’’ti? ‘‘No hetaṃ, bhante’’. ‘‘Yehi, ānanda, ākārehi…pe… yehi uddesehi nāmakāyassa ca rūpakāyassa ca paññatti hoti , tesu ākāresu…pe… tesu uddesesu asati api nu kho adhivacanasamphasso vā paṭighasamphasso vā paññāyethā’’ti? ‘‘No hetaṃ, bhante’’. ‘‘Yehi, ānanda, ākārehi…pe… yehi uddesehi nāmarūpassa paññatti hoti, tesu ākāresu …pe… tesu uddesesu asati api nu kho phasso paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo phassassa, yadidaṃ nāmarūpaṃ’’.

    ༡༡༥. ‘‘‘ཝིཉྙཱཎཔཙྩཡཱ ནཱམརཱུཔ’ནྟི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ཝིཉྙཱཎཔཙྩཡཱ ནཱམརཱུཔཾ། ཝིཉྙཱཎཉྩ ཧི, ཨཱནནྡ, མཱཏུཀུཙྪིསྨིཾ ན ཨོཀྐམིསྶཐ, ཨཔི ནུ ཁོ ནཱམརཱུཔཾ མཱཏུཀུཙྪིསྨིཾ སམུཙྩིསྶཐཱ’’ཏི? ‘‘ནོ ཧེཏཾ, བྷནྟེ’’། ‘‘ཝིཉྙཱཎཉྩ ཧི, ཨཱནནྡ, མཱཏུཀུཙྪིསྨིཾ ཨོཀྐམིཏྭཱ ཝོཀྐམིསྶཐ, ཨཔི ནུ ཁོ ནཱམརཱུཔཾ ཨིཏྠཏྟཱཡ ཨབྷིནིབྦཏྟིསྶཐཱ’’ཏི? ‘‘ནོ ཧེཏཾ, བྷནྟེ’’། ‘‘ཝིཉྙཱཎཉྩ ཧི, ཨཱནནྡ, དཧརསྶེཝ སཏོ ཝོཙྪིཛྫིསྶཐ ཀུམཱརཀསྶ ཝཱ ཀུམཱརིཀཱཡ ཝཱ, ཨཔི ནུ ཁོ ནཱམརཱུཔཾ ཝུདྡྷིཾ ཝིརཱུལ༹ྷིཾ ཝེཔུལླཾ ཨཱཔཛྫིསྶཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ནཱམརཱུཔསྶ – ཡདིདཾ ཝིཉྙཱཎཾ’’།

    115. ‘‘‘Viññāṇapaccayā nāmarūpa’nti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā viññāṇapaccayā nāmarūpaṃ. Viññāṇañca hi, ānanda, mātukucchismiṃ na okkamissatha, api nu kho nāmarūpaṃ mātukucchismiṃ samuccissathā’’ti? ‘‘No hetaṃ, bhante’’. ‘‘Viññāṇañca hi, ānanda, mātukucchismiṃ okkamitvā vokkamissatha, api nu kho nāmarūpaṃ itthattāya abhinibbattissathā’’ti? ‘‘No hetaṃ, bhante’’. ‘‘Viññāṇañca hi, ānanda, daharasseva sato vocchijjissatha kumārakassa vā kumārikāya vā, api nu kho nāmarūpaṃ vuddhiṃ virūḷhiṃ vepullaṃ āpajjissathā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo nāmarūpassa – yadidaṃ viññāṇaṃ’’.

    ༡༡༦. ‘‘‘ནཱམརཱུཔཔཙྩཡཱ ཝིཉྙཱཎ’ནྟི ཨིཏི ཁོ པནེཏཾ ཝུཏྟཾ, ཏདཱནནྡ, ཨིམིནཱཔེཏཾ པརིཡཱཡེན ཝེདིཏབྦཾ, ཡཐཱ ནཱམརཱུཔཔཙྩཡཱ ཝིཉྙཱཎཾ། ཝིཉྙཱཎཉྩ ཧི, ཨཱནནྡ, ནཱམརཱུཔེ པཏིཊྛཾ ན ལབྷིསྶཐ, ཨཔི ནུ ཁོ ཨཱཡཏིཾ ཛཱཏིཛརཱམརཎཾ དུཀྑསམུདཡསམྦྷཝོ 11 པཉྙཱཡེཐཱ’’ཏི? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེསེཝ ཧེཏུ ཨེཏཾ ནིདཱནཾ ཨེས སམུདཡོ ཨེས པཙྩཡོ ཝིཉྙཱཎསྶ ཡདིདཾ ནཱམརཱུཔཾ། ཨེཏྟཱཝཏཱ ཁོ, ཨཱནནྡ, ཛཱཡེཐ ཝཱ ཛཱིཡེཐ 12 ཝཱ མཱིཡེཐ 13 ཝཱ ཙཝེཐ ཝཱ ཨུཔཔཛྫེཐ ཝཱ། ཨེཏྟཱཝཏཱ ཨདྷིཝཙནཔཐོ, ཨེཏྟཱཝཏཱ ནིརུཏྟིཔཐོ, ཨེཏྟཱཝཏཱ པཉྙཏྟིཔཐོ, ཨེཏྟཱཝཏཱ པཉྙཱཝཙརཾ, ཨེཏྟཱཝཏཱ ཝཊྚཾ ཝཏྟཏི ཨིཏྠཏྟཾ པཉྙཱཔནཱཡ ཡདིདཾ ནཱམརཱུཔཾ སཧ ཝིཉྙཱཎེན ཨཉྙམཉྙཔཙྩཡཏཱ པཝཏྟཏི།

    116. ‘‘‘Nāmarūpapaccayā viññāṇa’nti iti kho panetaṃ vuttaṃ, tadānanda, imināpetaṃ pariyāyena veditabbaṃ, yathā nāmarūpapaccayā viññāṇaṃ. Viññāṇañca hi, ānanda, nāmarūpe patiṭṭhaṃ na labhissatha, api nu kho āyatiṃ jātijarāmaraṇaṃ dukkhasamudayasambhavo 14 paññāyethā’’ti? ‘‘No hetaṃ, bhante’’. ‘‘Tasmātihānanda, eseva hetu etaṃ nidānaṃ esa samudayo esa paccayo viññāṇassa yadidaṃ nāmarūpaṃ. Ettāvatā kho, ānanda, jāyetha vā jīyetha 15 vā mīyetha 16 vā cavetha vā upapajjetha vā. Ettāvatā adhivacanapatho, ettāvatā niruttipatho, ettāvatā paññattipatho, ettāvatā paññāvacaraṃ, ettāvatā vaṭṭaṃ vattati itthattaṃ paññāpanāya yadidaṃ nāmarūpaṃ saha viññāṇena aññamaññapaccayatā pavattati.

    ཨཏྟཔཉྙཏྟི

    Attapaññatti

    ༡༡༧. ‘‘ཀིཏྟཱཝཏཱ ཙ, ཨཱནནྡ, ཨཏྟཱནཾ པཉྙཔེནྟོ པཉྙཔེཏི? རཱུཔིཾ ཝཱ ཧི, ཨཱནནྡ, པརིཏྟཾ ཨཏྟཱནཾ པཉྙཔེནྟོ པཉྙཔེཏི – ‘‘རཱུཔཱི མེ པརིཏྟོ ཨཏྟཱ’’ཏི། རཱུཔིཾ ཝཱ ཧི , ཨཱནནྡ, ཨནནྟཾ ཨཏྟཱནཾ པཉྙཔེནྟོ པཉྙཔེཏི – ‘རཱུཔཱི མེ ཨནནྟོ ཨཏྟཱ’ཏི། ཨརཱུཔིཾ ཝཱ ཧི, ཨཱནནྡ, པརིཏྟཾ ཨཏྟཱནཾ པཉྙཔེནྟོ པཉྙཔེཏི – ‘ཨརཱུཔཱི མེ པརིཏྟོ ཨཏྟཱ’ཏི། ཨརཱུཔིཾ ཝཱ ཧི, ཨཱནནྡ, ཨནནྟཾ ཨཏྟཱནཾ པཉྙཔེནྟོ པཉྙཔེཏི – ‘ཨརཱུཔཱི མེ ཨནནྟོ ཨཏྟཱ’ཏི།

    117. ‘‘Kittāvatā ca, ānanda, attānaṃ paññapento paññapeti? Rūpiṃ vā hi, ānanda, parittaṃ attānaṃ paññapento paññapeti – ‘‘rūpī me paritto attā’’ti. Rūpiṃ vā hi , ānanda, anantaṃ attānaṃ paññapento paññapeti – ‘rūpī me ananto attā’ti. Arūpiṃ vā hi, ānanda, parittaṃ attānaṃ paññapento paññapeti – ‘arūpī me paritto attā’ti. Arūpiṃ vā hi, ānanda, anantaṃ attānaṃ paññapento paññapeti – ‘arūpī me ananto attā’ti.

    ༡༡༨. ‘‘ཏཏྲཱནནྡ, ཡོ སོ རཱུཔིཾ པརིཏྟཾ ཨཏྟཱནཾ པཉྙཔེནྟོ པཉྙཔེཏི། ཨེཏརཧི ཝཱ སོ རཱུཔིཾ པརིཏྟཾ ཨཏྟཱནཾ པཉྙཔེནྟོ པཉྙཔེཏི, ཏཏྠ བྷཱཝིཾ ཝཱ སོ རཱུཔིཾ པརིཏྟཾ ཨཏྟཱནཾ པཉྙཔེནྟོ པཉྙཔེཏི, ‘ཨཏཐཾ ཝཱ པན སནྟཾ ཏཐཏྟཱཡ ཨུཔཀཔྤེསྶཱམཱི’ཏི ཨིཏི ཝཱ པནསྶ ཧོཏི། ཨེཝཾ སནྟཾ ཁོ, ཨཱནནྡ, རཱུཔིཾ 17 པརིཏྟཏྟཱནུདིཊྛི ཨནུསེཏཱིཏི ཨིཙྩཱལཾ ཝཙནཱཡ།

    118. ‘‘Tatrānanda, yo so rūpiṃ parittaṃ attānaṃ paññapento paññapeti. Etarahi vā so rūpiṃ parittaṃ attānaṃ paññapento paññapeti, tattha bhāviṃ vā so rūpiṃ parittaṃ attānaṃ paññapento paññapeti, ‘atathaṃ vā pana santaṃ tathattāya upakappessāmī’ti iti vā panassa hoti. Evaṃ santaṃ kho, ānanda, rūpiṃ 18 parittattānudiṭṭhi anusetīti iccālaṃ vacanāya.

    ‘‘ཏཏྲཱནནྡ, ཡོ སོ རཱུཔིཾ ཨནནྟཾ ཨཏྟཱནཾ པཉྙཔེནྟོ པཉྙཔེཏི། ཨེཏརཧི ཝཱ སོ རཱུཔིཾ ཨནནྟཾ ཨཏྟཱནཾ པཉྙཔེནྟོ པཉྙཔེཏི, ཏཏྠ བྷཱཝིཾ ཝཱ སོ རཱུཔིཾ ཨནནྟཾ ཨཏྟཱནཾ པཉྙཔེནྟོ པཉྙཔེཏི, ‘ཨཏཐཾ ཝཱ པན སནྟཾ ཏཐཏྟཱཡ ཨུཔཀཔྤེསྶཱམཱི’ཏི ཨིཏི ཝཱ པནསྶ ཧོཏི། ཨེཝཾ སནྟཾ ཁོ, ཨཱནནྡ, རཱུཔིཾ 19 ཨནནྟཏྟཱནུདིཊྛི ཨནུསེཏཱིཏི ཨིཙྩཱལཾ ཝཙནཱཡ།

    ‘‘Tatrānanda, yo so rūpiṃ anantaṃ attānaṃ paññapento paññapeti. Etarahi vā so rūpiṃ anantaṃ attānaṃ paññapento paññapeti, tattha bhāviṃ vā so rūpiṃ anantaṃ attānaṃ paññapento paññapeti, ‘atathaṃ vā pana santaṃ tathattāya upakappessāmī’ti iti vā panassa hoti. Evaṃ santaṃ kho, ānanda, rūpiṃ 20 anantattānudiṭṭhi anusetīti iccālaṃ vacanāya.

    ‘‘ཏཏྲཱནནྡ, ཡོ སོ ཨརཱུཔིཾ པརིཏྟཾ ཨཏྟཱནཾ པཉྙཔེནྟོ པཉྙཔེཏི། ཨེཏརཧི ཝཱ སོ ཨརཱུཔིཾ པརིཏྟཾ ཨཏྟཱནཾ པཉྙཔེནྟོ པཉྙཔེཏི, ཏཏྠ བྷཱཝིཾ ཝཱ སོ ཨརཱུཔིཾ པརིཏྟཾ ཨཏྟཱནཾ པཉྙཔེནྟོ པཉྙཔེཏི, ‘ཨཏཐཾ ཝཱ པན སནྟཾ ཏཐཏྟཱཡ ཨུཔཀཔྤེསྶཱམཱི’ཏི ཨིཏི ཝཱ པནསྶ ཧོཏི། ཨེཝཾ སནྟཾ ཁོ, ཨཱནནྡ, ཨརཱུཔིཾ 21 པརིཏྟཏྟཱནུདིཊྛི ཨནུསེཏཱིཏི ཨིཙྩཱལཾ ཝཙནཱཡ།

    ‘‘Tatrānanda, yo so arūpiṃ parittaṃ attānaṃ paññapento paññapeti. Etarahi vā so arūpiṃ parittaṃ attānaṃ paññapento paññapeti, tattha bhāviṃ vā so arūpiṃ parittaṃ attānaṃ paññapento paññapeti, ‘atathaṃ vā pana santaṃ tathattāya upakappessāmī’ti iti vā panassa hoti. Evaṃ santaṃ kho, ānanda, arūpiṃ 22 parittattānudiṭṭhi anusetīti iccālaṃ vacanāya.

    ‘‘ཏཏྲཱནནྡ, ཡོ སོ ཨརཱུཔིཾ ཨནནྟཾ ཨཏྟཱནཾ པཉྙཔེནྟོ པཉྙཔེཏི། ཨེཏརཧི ཝཱ སོ ཨརཱུཔིཾ ཨནནྟཾ ཨཏྟཱནཾ པཉྙཔེནྟོ པཉྙཔེཏི, ཏཏྠ བྷཱཝིཾ ཝཱ སོ ཨརཱུཔིཾ ཨནནྟཾ ཨཏྟཱནཾ པཉྙཔེནྟོ པཉྙཔེཏི, ‘ཨཏཐཾ ཝཱ པན སནྟཾ ཏཐཏྟཱཡ ཨུཔཀཔྤེསྶཱམཱི’ཏི ཨིཏི ཝཱ པནསྶ ཧོཏི། ཨེཝཾ སནྟཾ ཁོ, ཨཱནནྡ, ཨརཱུཔིཾ 23 ཨནནྟཏྟཱནུདིཊྛི ཨནུསེཏཱིཏི ཨིཙྩཱལཾ ཝཙནཱཡ། ཨེཏྟཱཝཏཱ ཁོ, ཨཱནནྡ, ཨཏྟཱནཾ པཉྙཔེནྟོ པཉྙཔེཏི།

    ‘‘Tatrānanda, yo so arūpiṃ anantaṃ attānaṃ paññapento paññapeti. Etarahi vā so arūpiṃ anantaṃ attānaṃ paññapento paññapeti, tattha bhāviṃ vā so arūpiṃ anantaṃ attānaṃ paññapento paññapeti, ‘atathaṃ vā pana santaṃ tathattāya upakappessāmī’ti iti vā panassa hoti. Evaṃ santaṃ kho, ānanda, arūpiṃ 24 anantattānudiṭṭhi anusetīti iccālaṃ vacanāya. Ettāvatā kho, ānanda, attānaṃ paññapento paññapeti.

    ནཨཏྟཔཉྙཏྟི

    Naattapaññatti

    ༡༡༩. ‘‘ཀིཏྟཱཝཏཱ ཙ, ཨཱནནྡ, ཨཏྟཱནཾ ན པཉྙཔེནྟོ ན པཉྙཔེཏི? རཱུཔིཾ ཝཱ ཧི, ཨཱནནྡ, པརིཏྟཾ ཨཏྟཱནཾ ན པཉྙཔེནྟོ ན པཉྙཔེཏི – ‘རཱུཔཱི མེ པརིཏྟོ ཨཏྟཱ’ཏི། རཱུཔིཾ ཝཱ ཧི, ཨཱནནྡ, ཨནནྟཾ ཨཏྟཱནཾ ན པཉྙཔེནྟོ ན པཉྙཔེཏི – ‘རཱུཔཱི མེ ཨནནྟོ ཨཏྟཱ’ཏི། ཨརཱུཔིཾ ཝཱ ཧི, ཨཱནནྡ, པརིཏྟཾ ཨཏྟཱནཾ ན པཉྙཔེནྟོ ན པཉྙཔེཏི – ‘ཨརཱུཔཱི མེ པརིཏྟོ ཨཏྟཱ’ཏི། ཨརཱུཔིཾ ཝཱ ཧི, ཨཱནནྡ, ཨནནྟཾ ཨཏྟཱནཾ ན པཉྙཔེནྟོ ན པཉྙཔེཏི – ‘ཨརཱུཔཱི མེ ཨནནྟོ ཨཏྟཱ’ཏི།

    119. ‘‘Kittāvatā ca, ānanda, attānaṃ na paññapento na paññapeti? Rūpiṃ vā hi, ānanda, parittaṃ attānaṃ na paññapento na paññapeti – ‘rūpī me paritto attā’ti. Rūpiṃ vā hi, ānanda, anantaṃ attānaṃ na paññapento na paññapeti – ‘rūpī me ananto attā’ti. Arūpiṃ vā hi, ānanda, parittaṃ attānaṃ na paññapento na paññapeti – ‘arūpī me paritto attā’ti. Arūpiṃ vā hi, ānanda, anantaṃ attānaṃ na paññapento na paññapeti – ‘arūpī me ananto attā’ti.

    ༡༢༠. ‘‘ཏཏྲཱནནྡ, ཡོ སོ རཱུཔིཾ པརིཏྟཾ ཨཏྟཱནཾ ན པཉྙཔེནྟོ ན པཉྙཔེཏི། ཨེཏརཧི ཝཱ སོ རཱུཔིཾ པརིཏྟཾ ཨཏྟཱནཾ ན པཉྙཔེནྟོ ན པཉྙཔེཏི, ཏཏྠ བྷཱཝིཾ ཝཱ སོ རཱུཔིཾ པརིཏྟཾ ཨཏྟཱནཾ ན པཉྙཔེནྟོ ན པཉྙཔེཏི, ‘ཨཏཐཾ ཝཱ པན སནྟཾ ཏཐཏྟཱཡ ཨུཔཀཔྤེསྶཱམཱི’ཏི ཨིཏི ཝཱ པནསྶ ན ཧོཏི། ཨེཝཾ སནྟཾ ཁོ, ཨཱནནྡ, རཱུཔིཾ པརིཏྟཏྟཱནུདིཊྛི ནཱནུསེཏཱིཏི ཨིཙྩཱལཾ ཝཙནཱཡ།

    120. ‘‘Tatrānanda, yo so rūpiṃ parittaṃ attānaṃ na paññapento na paññapeti. Etarahi vā so rūpiṃ parittaṃ attānaṃ na paññapento na paññapeti, tattha bhāviṃ vā so rūpiṃ parittaṃ attānaṃ na paññapento na paññapeti, ‘atathaṃ vā pana santaṃ tathattāya upakappessāmī’ti iti vā panassa na hoti. Evaṃ santaṃ kho, ānanda, rūpiṃ parittattānudiṭṭhi nānusetīti iccālaṃ vacanāya.

    ‘‘ཏཏྲཱནནྡ , ཡོ སོ རཱུཔིཾ ཨནནྟཾ ཨཏྟཱནཾ ན པཉྙཔེནྟོ ན པཉྙཔེཏི། ཨེཏརཧི ཝཱ སོ རཱུཔིཾ ཨནནྟཾ ཨཏྟཱནཾ ན པཉྙཔེནྟོ ན པཉྙཔེཏི, ཏཏྠ བྷཱཝིཾ ཝཱ སོ རཱུཔིཾ ཨནནྟཾ ཨཏྟཱནཾ ན པཉྙཔེནྟོ ན པཉྙཔེཏི, ‘ཨཏཐཾ ཝཱ པན སནྟཾ ཏཐཏྟཱཡ ཨུཔཀཔྤེསྶཱམཱི’ཏི ཨིཏི ཝཱ པནསྶ ན ཧོཏི། ཨེཝཾ སནྟཾ ཁོ, ཨཱནནྡ, རཱུཔིཾ ཨནནྟཏྟཱནུདིཊྛི ནཱནུསེཏཱིཏི ཨིཙྩཱལཾ ཝཙནཱཡ།

    ‘‘Tatrānanda , yo so rūpiṃ anantaṃ attānaṃ na paññapento na paññapeti. Etarahi vā so rūpiṃ anantaṃ attānaṃ na paññapento na paññapeti, tattha bhāviṃ vā so rūpiṃ anantaṃ attānaṃ na paññapento na paññapeti, ‘atathaṃ vā pana santaṃ tathattāya upakappessāmī’ti iti vā panassa na hoti. Evaṃ santaṃ kho, ānanda, rūpiṃ anantattānudiṭṭhi nānusetīti iccālaṃ vacanāya.

    ‘‘ཏཏྲཱནནྡ, ཡོ སོ ཨརཱུཔིཾ པརིཏྟཾ ཨཏྟཱནཾ ན པཉྙཔེནྟོ ན པཉྙཔེཏི། ཨེཏརཧི ཝཱ སོ ཨརཱུཔིཾ པརིཏྟཾ ཨཏྟཱནཾ ན པཉྙཔེནྟོ ན པཉྙཔེཏི, ཏཏྠ བྷཱཝིཾ ཝཱ སོ ཨརཱུཔིཾ པརིཏྟཾ ཨཏྟཱནཾ ན པཉྙཔེནྟོ ན པཉྙཔེཏི, ‘ཨཏཐཾ ཝཱ པན སནྟཾ ཏཐཏྟཱཡ ཨུཔཀཔྤེསྶཱམཱི’ཏི ཨིཏི ཝཱ པནསྶ ན ཧོཏི། ཨེཝཾ སནྟཾ ཁོ, ཨཱནནྡ, ཨརཱུཔིཾ པརིཏྟཏྟཱནུདིཊྛི ནཱནུསེཏཱིཏི ཨིཙྩཱལཾ ཝཙནཱཡ།

    ‘‘Tatrānanda, yo so arūpiṃ parittaṃ attānaṃ na paññapento na paññapeti. Etarahi vā so arūpiṃ parittaṃ attānaṃ na paññapento na paññapeti, tattha bhāviṃ vā so arūpiṃ parittaṃ attānaṃ na paññapento na paññapeti, ‘atathaṃ vā pana santaṃ tathattāya upakappessāmī’ti iti vā panassa na hoti. Evaṃ santaṃ kho, ānanda, arūpiṃ parittattānudiṭṭhi nānusetīti iccālaṃ vacanāya.

    ‘‘ཏཏྲཱནནྡ, ཡོ སོ ཨརཱུཔིཾ ཨནནྟཾ ཨཏྟཱནཾ ན པཉྙཔེནྟོ ན པཉྙཔེཏི། ཨེཏརཧི ཝཱ སོ ཨརཱུཔིཾ ཨནནྟཾ ཨཏྟཱནཾ ན པཉྙཔེནྟོ ན པཉྙཔེཏི, ཏཏྠ བྷཱཝིཾ ཝཱ སོ ཨརཱུཔིཾ ཨནནྟཾ ཨཏྟཱནཾ ན པཉྙཔེནྟོ ན པཉྙཔེཏི, ‘ཨཏཐཾ ཝཱ པན སནྟཾ ཏཐཏྟཱཡ ཨུཔཀཔྤེསྶཱམཱི’ཏི ཨིཏི ཝཱ པནསྶ ན ཧོཏི། ཨེཝཾ སནྟཾ ཁོ, ཨཱནནྡ, ཨརཱུཔིཾ ཨནནྟཏྟཱནུདིཊྛི ནཱནུསེཏཱིཏི ཨིཙྩཱལཾ ཝཙནཱཡ། ཨེཏྟཱཝཏཱ ཁོ, ཨཱནནྡ, ཨཏྟཱནཾ ན པཉྙཔེནྟོ ན པཉྙཔེཏི།

    ‘‘Tatrānanda, yo so arūpiṃ anantaṃ attānaṃ na paññapento na paññapeti. Etarahi vā so arūpiṃ anantaṃ attānaṃ na paññapento na paññapeti, tattha bhāviṃ vā so arūpiṃ anantaṃ attānaṃ na paññapento na paññapeti, ‘atathaṃ vā pana santaṃ tathattāya upakappessāmī’ti iti vā panassa na hoti. Evaṃ santaṃ kho, ānanda, arūpiṃ anantattānudiṭṭhi nānusetīti iccālaṃ vacanāya. Ettāvatā kho, ānanda, attānaṃ na paññapento na paññapeti.

    ཨཏྟསམནུཔསྶནཱ

    Attasamanupassanā

    ༡༢༡. ‘‘ཀིཏྟཱཝཏཱ ཙ, ཨཱནནྡ, ཨཏྟཱནཾ སམནུཔསྶམཱནོ སམནུཔསྶཏི? ཝེདནཾ ཝཱ ཧི, ཨཱནནྡ, ཨཏྟཱནཾ སམནུཔསྶམཱནོ སམནུཔསྶཏི – ‘ཝེདནཱ མེ ཨཏྟཱ’ཏི། ‘ན ཧེཝ ཁོ མེ ཝེདནཱ ཨཏྟཱ, ཨཔྤཊིསཾཝེདནོ མེ ཨཏྟཱ’ཏི ཨིཏི ཝཱ ཧི, ཨཱནནྡ, ཨཏྟཱནཾ སམནུཔསྶམཱནོ སམནུཔསྶཏི། ‘ན ཧེཝ ཁོ མེ ཝེདནཱ ཨཏྟཱ, ནོཔི ཨཔྤཊིསཾཝེདནོ མེ ཨཏྟཱ, ཨཏྟཱ མེ ཝེདིཡཏི, ཝེདནཱདྷམྨོ ཧི མེ ཨཏྟཱ’ཏི ཨིཏི ཝཱ ཧི, ཨཱནནྡ, ཨཏྟཱནཾ སམནུཔསྶམཱནོ སམནུཔསྶཏི།

    121. ‘‘Kittāvatā ca, ānanda, attānaṃ samanupassamāno samanupassati? Vedanaṃ vā hi, ānanda, attānaṃ samanupassamāno samanupassati – ‘vedanā me attā’ti. ‘Na heva kho me vedanā attā, appaṭisaṃvedano me attā’ti iti vā hi, ānanda, attānaṃ samanupassamāno samanupassati. ‘Na heva kho me vedanā attā, nopi appaṭisaṃvedano me attā, attā me vediyati, vedanādhammo hi me attā’ti iti vā hi, ānanda, attānaṃ samanupassamāno samanupassati.

    ༡༢༢. ‘‘ཏཏྲཱནནྡ, ཡོ སོ ཨེཝམཱཧ – ‘ཝེདནཱ མེ ཨཏྟཱ’ཏི, སོ ཨེཝམསྶ ཝཙནཱིཡོ – ‘ཏིསྶོ ཁོ ཨིམཱ, ཨཱཝུསོ, ཝེདནཱ – སུཁཱ ཝེདནཱ དུཀྑཱ ཝེདནཱ ཨདུཀྑམསུཁཱ ཝེདནཱ། ཨིམཱསཾ ཁོ ཏྭཾ ཏིསྶནྣཾ ཝེདནཱནཾ ཀཏམཾ ཨཏྟཏོ སམནུཔསྶསཱི’ཏི? ཡསྨིཾ, ཨཱནནྡ, སམཡེ སུཁཾ ཝེདནཾ ཝེདེཏི, ནེཝ ཏསྨིཾ སམཡེ དུཀྑཾ ཝེདནཾ ཝེདེཏི, ན ཨདུཀྑམསུཁཾ ཝེདནཾ ཝེདེཏི; སུཁཾཡེཝ ཏསྨིཾ སམཡེ ཝེདནཾ ཝེདེཏི། ཡསྨིཾ, ཨཱནནྡ, སམཡེ དུཀྑཾ ཝེདནཾ ཝེདེཏི, ནེཝ ཏསྨིཾ སམཡེ སུཁཾ ཝེདནཾ ཝེདེཏི, ན ཨདུཀྑམསུཁཾ ཝེདནཾ ཝེདེཏི; དུཀྑཾཡེཝ ཏསྨིཾ སམཡེ ཝེདནཾ ཝེདེཏི། ཡསྨིཾ, ཨཱནནྡ, སམཡེ ཨདུཀྑམསུཁཾ ཝེདནཾ ཝེདེཏི, ནེཝ ཏསྨིཾ སམཡེ སུཁཾ ཝེདནཾ ཝེདེཏི, ན དུཀྑཾ ཝེདནཾ ཝེདེཏི; ཨདུཀྑམསུཁཾཡེཝ ཏསྨིཾ སམཡེ ཝེདནཾ ཝེདེཏི།

    122. ‘‘Tatrānanda, yo so evamāha – ‘vedanā me attā’ti, so evamassa vacanīyo – ‘tisso kho imā, āvuso, vedanā – sukhā vedanā dukkhā vedanā adukkhamasukhā vedanā. Imāsaṃ kho tvaṃ tissannaṃ vedanānaṃ katamaṃ attato samanupassasī’ti? Yasmiṃ, ānanda, samaye sukhaṃ vedanaṃ vedeti, neva tasmiṃ samaye dukkhaṃ vedanaṃ vedeti, na adukkhamasukhaṃ vedanaṃ vedeti; sukhaṃyeva tasmiṃ samaye vedanaṃ vedeti. Yasmiṃ, ānanda, samaye dukkhaṃ vedanaṃ vedeti, neva tasmiṃ samaye sukhaṃ vedanaṃ vedeti, na adukkhamasukhaṃ vedanaṃ vedeti; dukkhaṃyeva tasmiṃ samaye vedanaṃ vedeti. Yasmiṃ, ānanda, samaye adukkhamasukhaṃ vedanaṃ vedeti, neva tasmiṃ samaye sukhaṃ vedanaṃ vedeti, na dukkhaṃ vedanaṃ vedeti; adukkhamasukhaṃyeva tasmiṃ samaye vedanaṃ vedeti.

    ༡༢༣. ‘‘སུཁཱཔི ཁོ, ཨཱནནྡ, ཝེདནཱ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱ། དུཀྑཱཔི ཁོ, ཨཱནནྡ, ཝེདནཱ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱ། ཨདུཀྑམསུཁཱཔི ཁོ, ཨཱནནྡ, ཝེདནཱ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱ། ཏསྶ སུཁཾ ཝེདནཾ ཝེདིཡམཱནསྶ ‘ཨེསོ མེ ཨཏྟཱ’ཏི ཧོཏི། ཏསྶཱཡེཝ སུཁཱཡ ཝེདནཱཡ ནིརོདྷཱ ‘བྱགཱ 25 མེ ཨཏྟཱ’ཏི ཧོཏི། དུཀྑཾ ཝེདནཾ ཝེདིཡམཱནསྶ ‘ཨེསོ མེ ཨཏྟཱ’ཏི ཧོཏི། ཏསྶཱཡེཝ དུཀྑཱཡ ཝེདནཱཡ ནིརོདྷཱ ‘བྱགཱ མེ ཨཏྟཱ’ཏི ཧོཏི། ཨདུཀྑམསུཁཾ ཝེདནཾ ཝེདིཡམཱནསྶ ‘ཨེསོ མེ ཨཏྟཱ’ཏི ཧོཏི། ཏསྶཱཡེཝ ཨདུཀྑམསུཁཱཡ ཝེདནཱཡ ནིརོདྷཱ ‘བྱགཱ མེ ཨཏྟཱ’ཏི ཧོཏི། ཨིཏི སོ དིཊྛེཝ དྷམྨེ ཨནིཙྩསུཁདུཀྑཝོཀིཎྞཾ ཨུཔྤཱདཝཡདྷམྨཾ ཨཏྟཱནཾ སམནུཔསྶམཱནོ སམནུཔསྶཏི, ཡོ སོ ཨེཝམཱཧ – ‘ཝེདནཱ མེ ཨཏྟཱ’ཏི། ཏསྨཱཏིཧཱནནྡ, ཨེཏེན པེཏཾ ནཀྑམཏི – ‘ཝེདནཱ མེ ཨཏྟཱ’ཏི སམནུཔསྶིཏུཾ།

    123. ‘‘Sukhāpi kho, ānanda, vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Dukkhāpi kho, ānanda, vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Adukkhamasukhāpi kho, ānanda, vedanā aniccā saṅkhatā paṭiccasamuppannā khayadhammā vayadhammā virāgadhammā nirodhadhammā. Tassa sukhaṃ vedanaṃ vediyamānassa ‘eso me attā’ti hoti. Tassāyeva sukhāya vedanāya nirodhā ‘byagā 26 me attā’ti hoti. Dukkhaṃ vedanaṃ vediyamānassa ‘eso me attā’ti hoti. Tassāyeva dukkhāya vedanāya nirodhā ‘byagā me attā’ti hoti. Adukkhamasukhaṃ vedanaṃ vediyamānassa ‘eso me attā’ti hoti. Tassāyeva adukkhamasukhāya vedanāya nirodhā ‘byagā me attā’ti hoti. Iti so diṭṭheva dhamme aniccasukhadukkhavokiṇṇaṃ uppādavayadhammaṃ attānaṃ samanupassamāno samanupassati, yo so evamāha – ‘vedanā me attā’ti. Tasmātihānanda, etena petaṃ nakkhamati – ‘vedanā me attā’ti samanupassituṃ.

    ༡༢༤. ‘‘ཏཏྲཱནནྡ , ཡོ སོ ཨེཝམཱཧ – ‘ན ཧེཝ ཁོ མེ ཝེདནཱ ཨཏྟཱ, ཨཔྤཊིསཾཝེདནོ མེ ཨཏྟཱ’ཏི, སོ ཨེཝམསྶ ཝཙནཱིཡོ – ‘ཡཏྠ པནཱཝུསོ, སབྦསོ ཝེདཡིཏཾ ནཏྠི ཨཔི ནུ ཁོ, ཏཏྠ ‘‘ཨཡམཧམསྨཱི’’ཏི སིཡཱ’’’ཏི ? ‘‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེཏེན པེཏཾ ནཀྑམཏི – ‘ན ཧེཝ ཁོ མེ ཝེདནཱ ཨཏྟཱ, ཨཔྤཊིསཾཝེདནོ མེ ཨཏྟཱ’ཏི སམནུཔསྶིཏུཾ།

    124. ‘‘Tatrānanda , yo so evamāha – ‘na heva kho me vedanā attā, appaṭisaṃvedano me attā’ti, so evamassa vacanīyo – ‘yattha panāvuso, sabbaso vedayitaṃ natthi api nu kho, tattha ‘‘ayamahamasmī’’ti siyā’’’ti ? ‘‘No hetaṃ, bhante’’. ‘‘Tasmātihānanda, etena petaṃ nakkhamati – ‘na heva kho me vedanā attā, appaṭisaṃvedano me attā’ti samanupassituṃ.

    ༡༢༥. ‘‘ཏཏྲཱནནྡ , ཡོ སོ ཨེཝམཱཧ – ‘ན ཧེཝ ཁོ མེ ཝེདནཱ ཨཏྟཱ, ནོཔི ཨཔྤཊིསཾཝེདནོ མེ ཨཏྟཱ, ཨཏྟཱ མེ ཝེདིཡཏི, ཝེདནཱདྷམྨོ ཧི མེ ཨཏྟཱ’ཏི། སོ ཨེཝམསྶ ཝཙནཱིཡོ – ཝེདནཱ ཙ ཧི, ཨཱཝུསོ, སབྦེན སབྦཾ སབྦཐཱ སབྦཾ ཨཔརིསེསཱ ནིརུཛ྄ཛྷེཡྻུཾ། སབྦསོ ཝེདནཱཡ ཨསཏི ཝེདནཱནིརོདྷཱ ཨཔི ནུ ཁོ ཏཏྠ ‘ཨཡམཧམསྨཱི’ཏི སིཡཱ’’ཏི? ‘ནོ ཧེཏཾ, བྷནྟེ’’། ‘‘ཏསྨཱཏིཧཱནནྡ, ཨེཏེན པེཏཾ ནཀྑམཏི – ‘‘ན ཧེཝ ཁོ མེ ཝེདནཱ ཨཏྟཱ, ནོཔི ཨཔྤཊིསཾཝེདནོ མེ ཨཏྟཱ, ཨཏྟཱ མེ ཝེདིཡཏི, ཝེདནཱདྷམྨོ ཧི མེ ཨཏྟཱ’ཏི སམནུཔསྶིཏུཾ།

    125. ‘‘Tatrānanda , yo so evamāha – ‘na heva kho me vedanā attā, nopi appaṭisaṃvedano me attā, attā me vediyati, vedanādhammo hi me attā’ti. So evamassa vacanīyo – vedanā ca hi, āvuso, sabbena sabbaṃ sabbathā sabbaṃ aparisesā nirujjheyyuṃ. Sabbaso vedanāya asati vedanānirodhā api nu kho tattha ‘ayamahamasmī’ti siyā’’ti? ‘No hetaṃ, bhante’’. ‘‘Tasmātihānanda, etena petaṃ nakkhamati – ‘‘na heva kho me vedanā attā, nopi appaṭisaṃvedano me attā, attā me vediyati, vedanādhammo hi me attā’ti samanupassituṃ.

    ༡༢༦. ‘‘ཡཏོ ཁོ, ཨཱནནྡ, བྷིཀྑུ ནེཝ ཝེདནཾ ཨཏྟཱནཾ སམནུཔསྶཏི, ནོཔི ཨཔྤཊིསཾཝེདནཾ ཨཏྟཱནཾ སམནུཔསྶཏི, ནོཔི ‘ཨཏྟཱ མེ ཝེདིཡཏི, ཝེདནཱདྷམྨོ ཧི མེ ཨཏྟཱ’ཏི སམནུཔསྶཏི། སོ ཨེཝཾ ན སམནུཔསྶནྟོ ན ཙ ཀིཉྩི ལོཀེ ཨུཔཱདིཡཏི, ཨནུཔཱདིཡཾ ན པརིཏསྶཏི, ཨཔརིཏསྶཾ 27 པཙྩཏྟཉྙེཝ པརིནིབྦཱཡཏི, ‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱ’ཏི པཛཱནཱཏི། ཨེཝཾ ཝིམུཏྟཙིཏྟཾ ཁོ, ཨཱནནྡ, བྷིཀྑུཾ ཡོ ཨེཝཾ ཝདེཡྻ – ‘ཧོཏི ཏཐཱགཏོ པརཾ མརཎཱ ཨིཏིསྶ 28 དིཊྛཱི’ཏི, ཏདཀལླཾ། ‘ན ཧོཏི ཏཐཱགཏོ པརཾ མརཎཱ ཨིཏིསྶ དིཊྛཱི’ཏི, ཏདཀལླཾ། ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ ཨིཏིསྶ དིཊྛཱི’ཏི, ཏདཀལླཾ། ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ ཨིཏིསྶ དིཊྛཱི’ཏི, ཏདཀལླཾ། ཏཾ ཀིསྶ ཧེཏུ? ཡཱཝཏཱ, ཨཱནནྡ, ཨདྷིཝཙནཾ ཡཱཝཏཱ ཨདྷིཝཙནཔཐོ, ཡཱཝཏཱ ནིརུཏྟི ཡཱཝཏཱ ནིརུཏྟིཔཐོ, ཡཱཝཏཱ པཉྙཏྟི ཡཱཝཏཱ པཉྙཏྟིཔཐོ, ཡཱཝཏཱ པཉྙཱ ཡཱཝཏཱ པཉྙཱཝཙརཾ, ཡཱཝཏཱ ཝཊྚཾ 29, ཡཱཝཏཱ ཝཊྚཏི 30, ཏདབྷིཉྙཱཝིམུཏྟོ བྷིཀྑུ, ཏདབྷིཉྙཱཝིམུཏྟཾ བྷིཀྑུཾ ‘ན ཛཱནཱཏི ན པསྶཏི ཨིཏིསྶ དིཊྛཱི’ཏི, ཏདཀལླཾ།

    126. ‘‘Yato kho, ānanda, bhikkhu neva vedanaṃ attānaṃ samanupassati, nopi appaṭisaṃvedanaṃ attānaṃ samanupassati, nopi ‘attā me vediyati, vedanādhammo hi me attā’ti samanupassati. So evaṃ na samanupassanto na ca kiñci loke upādiyati, anupādiyaṃ na paritassati, aparitassaṃ 31 paccattaññeva parinibbāyati, ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti. Evaṃ vimuttacittaṃ kho, ānanda, bhikkhuṃ yo evaṃ vadeyya – ‘hoti tathāgato paraṃ maraṇā itissa 32 diṭṭhī’ti, tadakallaṃ. ‘Na hoti tathāgato paraṃ maraṇā itissa diṭṭhī’ti, tadakallaṃ. ‘Hoti ca na ca hoti tathāgato paraṃ maraṇā itissa diṭṭhī’ti, tadakallaṃ. ‘Neva hoti na na hoti tathāgato paraṃ maraṇā itissa diṭṭhī’ti, tadakallaṃ. Taṃ kissa hetu? Yāvatā, ānanda, adhivacanaṃ yāvatā adhivacanapatho, yāvatā nirutti yāvatā niruttipatho, yāvatā paññatti yāvatā paññattipatho, yāvatā paññā yāvatā paññāvacaraṃ, yāvatā vaṭṭaṃ 33, yāvatā vaṭṭati 34, tadabhiññāvimutto bhikkhu, tadabhiññāvimuttaṃ bhikkhuṃ ‘na jānāti na passati itissa diṭṭhī’ti, tadakallaṃ.

    སཏྟ ཝིཉྙཱཎཊྛིཏི

    Satta viññāṇaṭṭhiti

    ༡༢༧. ‘‘སཏྟ ཁོ, ཨཱནནྡ 35, ཝིཉྙཱཎཊྛིཏིཡོ, དྭེ ཨཱཡཏནཱནི། ཀཏམཱ སཏྟ? སནྟཱནནྡ, སཏྟཱ ནཱནཏྟཀཱཡཱ ནཱནཏྟསཉྙིནོ, སེཡྻཐཱཔི མནུསྶཱ , ཨེཀཙྩེ ཙ དེཝཱ, ཨེཀཙྩེ ཙ ཝིནིཔཱཏིཀཱ། ཨཡཾ པཋམཱ ཝིཉྙཱཎཊྛིཏི། སནྟཱནནྡ, སཏྟཱ ནཱནཏྟཀཱཡཱ ཨེཀཏྟསཉྙིནོ, སེཡྻཐཱཔི དེཝཱ བྲཧྨཀཱཡིཀཱ པཋམཱབྷིནིབྦཏྟཱ། ཨཡཾ དུཏིཡཱ ཝིཉྙཱཎཊྛིཏི། སནྟཱནནྡ, སཏྟཱ ཨེཀཏྟཀཱཡཱ ནཱནཏྟསཉྙིནོ, སེཡྻཐཱཔི དེཝཱ ཨཱབྷསྶརཱ། ཨཡཾ ཏཏིཡཱ ཝིཉྙཱཎཊྛིཏི། སནྟཱནནྡ, སཏྟཱ ཨེཀཏྟཀཱཡཱ ཨེཀཏྟསཉྙིནོ, སེཡྻཐཱཔི དེཝཱ སུབྷཀིཎྷཱ། ཨཡཾ ཙཏུཏྠཱི ཝིཉྙཱཎཊྛིཏི། སནྟཱནནྡ, སཏྟཱ སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཱུཔགཱ། ཨཡཾ པཉྩམཱི ཝིཉྙཱཎཊྛིཏི ། སནྟཱནནྡ, སཏྟཱ སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཱུཔགཱ། ཨཡཾ ཚཊྛཱི ཝིཉྙཱཎཊྛིཏི། སནྟཱནནྡ, སཏྟཱ སབྦསོ ཝིཉྙཱཎཉྩཱཡཏནཾ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཱུཔགཱ། ཨཡཾ སཏྟམཱི ཝིཉྙཱཎཊྛིཏི། ཨསཉྙསཏྟཱཡཏནཾ ནེཝསཉྙཱནཱསཉྙཱཡཏནམེཝ དུཏིཡཾ།

    127. ‘‘Satta kho, ānanda 36, viññāṇaṭṭhitiyo, dve āyatanāni. Katamā satta? Santānanda, sattā nānattakāyā nānattasaññino, seyyathāpi manussā , ekacce ca devā, ekacce ca vinipātikā. Ayaṃ paṭhamā viññāṇaṭṭhiti. Santānanda, sattā nānattakāyā ekattasaññino, seyyathāpi devā brahmakāyikā paṭhamābhinibbattā. Ayaṃ dutiyā viññāṇaṭṭhiti. Santānanda, sattā ekattakāyā nānattasaññino, seyyathāpi devā ābhassarā. Ayaṃ tatiyā viññāṇaṭṭhiti. Santānanda, sattā ekattakāyā ekattasaññino, seyyathāpi devā subhakiṇhā. Ayaṃ catutthī viññāṇaṭṭhiti. Santānanda, sattā sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ananto ākāso’ti ākāsānañcāyatanūpagā. Ayaṃ pañcamī viññāṇaṭṭhiti . Santānanda, sattā sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanūpagā. Ayaṃ chaṭṭhī viññāṇaṭṭhiti. Santānanda, sattā sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanūpagā. Ayaṃ sattamī viññāṇaṭṭhiti. Asaññasattāyatanaṃ nevasaññānāsaññāyatanameva dutiyaṃ.

    ༡༢༨. ‘‘ཏཏྲཱནནྡ, ཡཱཡཾ པཋམཱ ཝིཉྙཱཎཊྛིཏི ནཱནཏྟཀཱཡཱ ནཱནཏྟསཉྙིནོ, སེཡྻཐཱཔི མནུསྶཱ, ཨེཀཙྩེ ཙ དེཝཱ, ཨེཀཙྩེ ཙ ཝིནིཔཱཏིཀཱ། ཡོ ནུ ཁོ, ཨཱནནྡ, ཏཉྩ པཛཱནཱཏི, ཏསྶཱ ཙ སམུདཡཾ པཛཱནཱཏི, ཏསྶཱ ཙ ཨཏྠངྒམཾ པཛཱནཱཏི, ཏསྶཱ ཙ ཨསྶཱདཾ པཛཱནཱཏི, ཏསྶཱ ཙ ཨཱདཱིནཝཾ པཛཱནཱཏི, ཏསྶཱ ཙ ནིསྶརཎཾ པཛཱནཱཏི, ཀལླཾ ནུ ཏེན ཏདབྷིནནྡིཏུ’’ནྟི? ‘‘ནོ ཧེཏཾ, བྷནྟེ’’…པེ॰… ‘‘ཏཏྲཱནནྡ, ཡམིདཾ ཨསཉྙསཏྟཱཡཏནཾ། ཡོ ནུ ཁོ, ཨཱནནྡ, ཏཉྩ པཛཱནཱཏི, ཏསྶ ཙ སམུདཡཾ པཛཱནཱཏི, ཏསྶ ཙ ཨཏྠངྒམཾ པཛཱནཱཏི, ཏསྶ ཙ ཨསྶཱདཾ པཛཱནཱཏི, ཏསྶ ཙ ཨཱདཱིནཝཾ པཛཱནཱཏི, ཏསྶ ཙ ནིསྶརཎཾ པཛཱནཱཏི, ཀལླཾ ནུ ཏེན ཏདབྷིནནྡིཏུ’’ནྟི? ‘‘ནོ ཧེཏཾ, བྷནྟེ’’། ‘‘ཏཏྲཱནནྡ, ཡམིདཾ ནེཝསཉྙཱནཱསཉྙཱཡཏནཾ། ཡོ ནུ ཁོ, ཨཱནནྡ, ཏཉྩ པཛཱནཱཏི, ཏསྶ ཙ སམུདཡཾ པཛཱནཱཏི, ཏསྶ ཙ ཨཏྠངྒམཾ པཛཱནཱཏི, ཏསྶ ཙ ཨསྶཱདཾ པཛཱནཱཏི, ཏསྶ ཙ ཨཱདཱིནཝཾ པཛཱནཱཏི, ཏསྶ ཙ ནིསྶརཎཾ པཛཱནཱཏི, ཀལླཾ ནུ ཏེན ཏདབྷིནནྡིཏུ’’ནྟི? ‘‘ནོ ཧེཏཾ, བྷནྟེ’’། ཡཏོ ཁོ, ཨཱནནྡ, བྷིཀྑུ ཨིམཱསཉྩ སཏྟནྣཾ ཝིཉྙཱཎཊྛིཏཱིནཾ ཨིམེསཉྩ དྭིནྣཾ ཨཱཡཏནཱནཾ སམུདཡཉྩ ཨཏྠངྒམཉྩ ཨསྶཱདཉྩ ཨཱདཱིནཝཉྩ ནིསྶརཎཉྩ ཡཐཱབྷཱུཏཾ ཝིདིཏྭཱ ཨནུཔཱདཱ ཝིམུཏྟོ ཧོཏི, ཨཡཾ ཝུཙྩཏཱནནྡ, བྷིཀྑུ པཉྙཱཝིམུཏྟོ།

    128. ‘‘Tatrānanda, yāyaṃ paṭhamā viññāṇaṭṭhiti nānattakāyā nānattasaññino, seyyathāpi manussā, ekacce ca devā, ekacce ca vinipātikā. Yo nu kho, ānanda, tañca pajānāti, tassā ca samudayaṃ pajānāti, tassā ca atthaṅgamaṃ pajānāti, tassā ca assādaṃ pajānāti, tassā ca ādīnavaṃ pajānāti, tassā ca nissaraṇaṃ pajānāti, kallaṃ nu tena tadabhinanditu’’nti? ‘‘No hetaṃ, bhante’’…pe… ‘‘tatrānanda, yamidaṃ asaññasattāyatanaṃ. Yo nu kho, ānanda, tañca pajānāti, tassa ca samudayaṃ pajānāti, tassa ca atthaṅgamaṃ pajānāti, tassa ca assādaṃ pajānāti, tassa ca ādīnavaṃ pajānāti, tassa ca nissaraṇaṃ pajānāti, kallaṃ nu tena tadabhinanditu’’nti? ‘‘No hetaṃ, bhante’’. ‘‘Tatrānanda, yamidaṃ nevasaññānāsaññāyatanaṃ. Yo nu kho, ānanda, tañca pajānāti, tassa ca samudayaṃ pajānāti, tassa ca atthaṅgamaṃ pajānāti, tassa ca assādaṃ pajānāti, tassa ca ādīnavaṃ pajānāti, tassa ca nissaraṇaṃ pajānāti, kallaṃ nu tena tadabhinanditu’’nti? ‘‘No hetaṃ, bhante’’. Yato kho, ānanda, bhikkhu imāsañca sattannaṃ viññāṇaṭṭhitīnaṃ imesañca dvinnaṃ āyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ viditvā anupādā vimutto hoti, ayaṃ vuccatānanda, bhikkhu paññāvimutto.

    ཨཊྛ ཝིམོཀྑཱ

    Aṭṭha vimokkhā

    ༡༢༩. ‘‘ཨཊྛ ཁོ ཨིམེ, ཨཱནནྡ, ཝིམོཀྑཱ། ཀཏམེ ཨཊྛ? རཱུཔཱི རཱུཔཱནི པསྶཏི ཨཡཾ པཋམོ ཝིམོཀྑོ། ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི, ཨཡཾ དུཏིཡོ ཝིམོཀྑོ། སུབྷནྟེཝ ཨདྷིམུཏྟོ ཧོཏི, ཨཡཾ ཏཏིཡོ ཝིམོཀྑོ། སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཾ ཨུཔསམྤཛྫ ཝིཧརཏི, ཨཡཾ ཙཏུཏྠོ ཝིམོཀྑོ། སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཾ ཨུཔསམྤཛྫ ཝིཧརཏི, ཨཡཾ པཉྩམོ ཝིམོཀྑོ། སབྦསོ ཝིཉྙཱཎཉྩཱཡཏནཾ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཾ ཨུཔསམྤཛྫ ཝིཧརཏི, ཨཡཾ ཚཊྛོ ཝིམོཀྑོ། སབྦསོ ཨཱཀིཉྩཉྙཱཡཏནཾ སམཏིཀྐམྨ ‘ནེཝསཉྙཱནཱསཉྙཱ’ཡཏནཾ ཨུཔསམྤཛྫ ཝིཧརཏི, ཨཡཾ སཏྟམོ ཝིམོཀྑོ། སབྦསོ ནེཝསཉྙཱནཱསཉྙཱཡཏནཾ སམཏིཀྐམྨ སཉྙཱཝེདཡིཏནིརོདྷཾ ཨུཔསམྤཛྫ ཝིཧརཏི, ཨཡཾ ཨཊྛམོ ཝིམོཀྑོ། ཨིམེ ཁོ, ཨཱནནྡ, ཨཊྛ ཝིམོཀྑཱ།

    129. ‘‘Aṭṭha kho ime, ānanda, vimokkhā. Katame aṭṭha? Rūpī rūpāni passati ayaṃ paṭhamo vimokkho. Ajjhattaṃ arūpasaññī bahiddhā rūpāni passati, ayaṃ dutiyo vimokkho. Subhanteva adhimutto hoti, ayaṃ tatiyo vimokkho. Sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ananto ākāso’ti ākāsānañcāyatanaṃ upasampajja viharati, ayaṃ catuttho vimokkho. Sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanaṃ upasampajja viharati, ayaṃ pañcamo vimokkho. Sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanaṃ upasampajja viharati, ayaṃ chaṭṭho vimokkho. Sabbaso ākiñcaññāyatanaṃ samatikkamma ‘nevasaññānāsaññā’yatanaṃ upasampajja viharati, ayaṃ sattamo vimokkho. Sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati, ayaṃ aṭṭhamo vimokkho. Ime kho, ānanda, aṭṭha vimokkhā.

    ༡༣༠. ‘‘ཡཏོ ཁོ, ཨཱནནྡ, བྷིཀྑུ ཨིམེ ཨཊྛ ཝིམོཀྑེ ཨནུལོམམྤི སམཱཔཛྫཏི, པཊིལོམམྤི སམཱཔཛྫཏི, ཨནུལོམཔཊིལོམམྤི སམཱཔཛྫཏི, ཡཏྠིཙྪཀཾ ཡདིཙྪཀཾ ཡཱཝཏིཙྪཀཾ སམཱཔཛྫཏིཔི ཝུཊྛཱཏིཔི། ཨཱསཝཱནཉྩ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏི, ཨཡཾ ཝུཙྩཏཱནནྡ, བྷིཀྑུ ཨུབྷཏོབྷཱགཝིམུཏྟོ། ཨིམཱཡ ཙ ཨཱནནྡ ཨུབྷཏོབྷཱགཝིམུཏྟིཡཱ ཨཉྙཱ ཨུབྷཏོབྷཱགཝིམུཏྟི ཨུཏྟརིཏརཱ ཝཱ པཎཱིཏཏརཱ ཝཱ ནཏྠཱི’’ཏི། ཨིདམཝོཙ བྷགཝཱ། ཨཏྟམནོ ཨཱཡསྨཱ ཨཱནནྡོ བྷགཝཏོ བྷཱསིཏཾ ཨབྷིནནྡཱིཏི།

    130. ‘‘Yato kho, ānanda, bhikkhu ime aṭṭha vimokkhe anulomampi samāpajjati, paṭilomampi samāpajjati, anulomapaṭilomampi samāpajjati, yatthicchakaṃ yadicchakaṃ yāvaticchakaṃ samāpajjatipi vuṭṭhātipi. Āsavānañca khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, ayaṃ vuccatānanda, bhikkhu ubhatobhāgavimutto. Imāya ca ānanda ubhatobhāgavimuttiyā aññā ubhatobhāgavimutti uttaritarā vā paṇītatarā vā natthī’’ti. Idamavoca bhagavā. Attamano āyasmā ānando bhagavato bhāsitaṃ abhinandīti.

    མཧཱནིདཱནསུཏྟཾ ནིཊྛིཏཾ དུཏིཡཾ།

    Mahānidānasuttaṃ niṭṭhitaṃ dutiyaṃ.




    Next: ༣. མཧཱཔརིནིབྦཱནསུཏྟཾ • 3. Mahāparinibbānasuttaṃ




    Footnotes:
    1. ཀམྨཱསདམྨཾ ནཱམ (སྱཱ॰)
    2. གུལཱགུཎྛིཀཛཱཏཱ (སཱི॰ པཱི॰), གུཎགཎྛིཀཛཱཏཱ (སྱཱ॰)
    3. kammāsadammaṃ nāma (syā.)
    4. gulāguṇṭhikajātā (sī. pī.), guṇagaṇṭhikajātā (syā.)
    5. སིརིཾསཔཱནཾ སིརིཾསཔཏྟཱཡ (སཱི॰ སྱཱ॰)
    6. siriṃsapānaṃ siriṃsapattāya (sī. syā.)
    7. ཨཱརཀྑཾ པཊིཙྩ ཨཱརཀྑཱདྷིཀརཎཾ (སྱཱ॰)
    8. ārakkhaṃ paṭicca ārakkhādhikaraṇaṃ (syā.)
    9. ཨིམེ དྷམྨཱ (ཀ॰)
    10. ime dhammā (ka.)
    11. ཛཱཏིཛརཱམརཎདུཀྑསམུདཡསམྦྷཝོ (སཱི॰ སྱཱ॰ པཱི॰)
    12. ཛིཡྻེཐ (ཀ॰)
    13. མིཡྻེཐ (ཀ॰)
    14. jātijarāmaraṇadukkhasamudayasambhavo (sī. syā. pī.)
    15. jiyyetha (ka.)
    16. miyyetha (ka.)
    17. རཱུཔཱི (ཀ॰)
    18. rūpī (ka.)
    19. རཱུཔཱི (ཀ॰)
    20. rūpī (ka.)
    21. ཨརཱུཔཱི (ཀ॰)
    22. arūpī (ka.)
    23. ཨརཱུཔཱི (ཀ॰)
    24. arūpī (ka.)
    25. བྱགྒཱ (སཱི॰ ཀ॰)
    26. byaggā (sī. ka.)
    27. ཨཔརིཏསྶནཾ (ཀ॰)
    28. ཨིཏི སཱ (ཨཊྛཀཐཱཡཾ པཱཋནྟརཾ)
    29. ཡཱཝཏཱ ཝཊྚཾ ཝཊྚཏི (ཀ॰ སཱི॰)
    30. ཡཱཝཏཱ ཝཊྚཾ ཝཊྚཏི (ཀ॰ སཱི॰)
    31. aparitassanaṃ (ka.)
    32. iti sā (aṭṭhakathāyaṃ pāṭhantaraṃ)
    33. yāvatā vaṭṭaṃ vaṭṭati (ka. sī.)
    34. yāvatā vaṭṭaṃ vaṭṭati (ka. sī.)
    35. སཏྟ ཁོ ཨིམཱ ཨཱནནྡ (ཀ॰ སཱི॰ སྱཱ॰)
    36. satta kho imā ānanda (ka. sī. syā.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༢. མཧཱནིདཱནསུཏྟཝཎྞནཱ • 2. Mahānidānasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / དཱིགྷནིཀཱཡ (ཊཱིཀཱ) • Dīghanikāya (ṭīkā) / ༢. མཧཱནིདཱནསུཏྟཝཎྞནཱ • 2. Mahānidānasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact