Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    ༡༠. མཧཱཔདེསསུཏྟཾ

    10. Mahāpadesasuttaṃ

    ༡༨༠. ཨེཀཾ སམཡཾ བྷགཝཱ བྷོགནགརེ ཝིཧརཏི ཨཱནནྡཙེཏིཡེ 1། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ – ‘‘ཙཏྟཱརོམེ, བྷིཀྑཝེ, མཧཱཔདེསེ དེསེསྶཱམི, ཏཾ སུཎཱཐ , སཱདྷུཀཾ མནསི ཀརོཐ; བྷཱསིསྶཱམཱི’’ཏི། ‘‘ཨེཝཾ, བྷནྟེ’’ཏི ཁོ ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –

    180. Ekaṃ samayaṃ bhagavā bhoganagare viharati ānandacetiye 2. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘cattārome, bhikkhave, mahāpadese desessāmi, taṃ suṇātha , sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –

    ‘‘ཀཏམེ, བྷིཀྑཝེ, ཙཏྟཱརོ མཧཱཔདེསཱ? ཨིདྷ, བྷིཀྑཝེ, བྷིཀྑུ ཨེཝཾ ཝདེཡྻ – ‘སམྨུཁཱ མེཏཾ, ཨཱཝུསོ, བྷགཝཏོ སུཏཾ སམྨུཁཱ པཊིགྒཧིཏཾ – ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསན’ནྟི། ཏསྶ, བྷིཀྑཝེ, བྷིཀྑུནོ བྷཱསིཏཾ ནེཝ ཨབྷིནནྡིཏབྦཾ ནཔྤཊིཀྐོསིཏབྦཾ། ཨནབྷིནནྡིཏྭཱ ཨཔྤཊིཀྐོསིཏྭཱ ཏཱནི པདབྱཉྫནཱནི སཱདྷུཀཾ ཨུགྒཧེཏྭཱ སུཏྟེ ཨོཏཱརེཏབྦཱནི 3, ཝིནཡེ སནྡསྶེཏབྦཱནི། ཏཱནི ཙེ སུཏྟེ ཨོཏཱརིཡམཱནཱནི 4 ཝིནཡེ སནྡསྶིཡམཱནཱནི ན ཙེཝ སུཏྟེ ཨོཏརནྟི 5 ན ཝིནཡེ སནྡིསྶནྟི, ནིཊྛམེཏྠ གནྟབྦཾ – ‘ཨདྡྷཱ, ཨིདཾ ན ཙེཝ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ; ཨིམསྶ ཙ བྷིཀྑུནོ དུགྒཧིཏ’ནྟི། ཨིཏི ཧེཏཾ 6, བྷིཀྑཝེ, ཚཌྜེཡྻཱཐ།

    ‘‘Katame, bhikkhave, cattāro mahāpadesā? Idha, bhikkhave, bhikkhu evaṃ vadeyya – ‘sammukhā metaṃ, āvuso, bhagavato sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni 7, vinaye sandassetabbāni. Tāni ce sutte otāriyamānāni 8 vinaye sandassiyamānāni na ceva sutte otaranti 9 na vinaye sandissanti, niṭṭhamettha gantabbaṃ – ‘addhā, idaṃ na ceva tassa bhagavato vacanaṃ arahato sammāsambuddhassa; imassa ca bhikkhuno duggahita’nti. Iti hetaṃ 10, bhikkhave, chaḍḍeyyātha.

    11 ‘‘ཨིདྷ པན, བྷིཀྑཝེ, བྷིཀྑུ ཨེཝཾ ཝདེཡྻ – ‘སམྨུཁཱ མེཏཾ, ཨཱཝུསོ, བྷགཝཏོ སུཏཾ སམྨུཁཱ པཊིགྒཧིཏཾ – ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསན’ནྟི། ཏསྶ, བྷིཀྑཝེ, བྷིཀྑུནོ བྷཱསིཏཾ ནེཝ ཨབྷིནནྡིཏབྦཾ ནཔྤཊིཀྐོསིཏབྦཾ། ཨནབྷིནནྡིཏྭཱ ཨཔྤཊིཀྐོསིཏྭཱ ཏཱནི པདབྱཉྫནཱནི སཱདྷུཀཾ ཨུགྒཧེཏྭཱ སུཏྟེ ཨོཏཱརེཏབྦཱནི, ཝིནཡེ སནྡསྶེཏབྦཱནི 12། ཏཱནི ཙེ སུཏྟེ ཨོཏཱརིཡམཱནཱནི ཝིནཡེ སནྡསྶིཡམཱནཱནི སུཏྟེ ཙེཝ ཨོཏརནྟི ཝིནཡེ ཙ སནྡིསྶནྟི, ནིཊྛམེཏྠ གནྟབྦཾ – ‘ཨདྡྷཱ, ཨིདཾ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ; ཨིམསྶ ཙ བྷིཀྑུནོ སུགྒཧིཏ’ནྟི། ཨིདཾ, བྷིཀྑཝེ, པཋམཾ མཧཱཔདེསཾ དྷཱརེཡྻཱཐ།

    13 ‘‘Idha pana, bhikkhave, bhikkhu evaṃ vadeyya – ‘sammukhā metaṃ, āvuso, bhagavato sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni 14. Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṃ – ‘addhā, idaṃ tassa bhagavato vacanaṃ arahato sammāsambuddhassa; imassa ca bhikkhuno suggahita’nti. Idaṃ, bhikkhave, paṭhamaṃ mahāpadesaṃ dhāreyyātha.

    ‘‘ཨིདྷ པན, བྷིཀྑཝེ, བྷིཀྑུ ཨེཝཾ ཝདེཡྻ – ‘ཨསུཀསྨིཾ ནཱམ ཨཱཝཱསེ སངྒྷོ ཝིཧརཏི སཐེརོ སཔཱམོཀྑོ། ཏསྶ མེ སངྒྷསྶ སམྨུཁཱ སུཏཾ སམྨུཁཱ པཊིགྒཧིཏཾ – ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསན’ནྟི། ཏསྶ, བྷིཀྑཝེ, བྷིཀྑུནོ བྷཱསིཏཾ ནེཝ ཨབྷིནནྡིཏབྦཾ ནཔྤཊིཀྐོསིཏབྦཾ། ཨནབྷིནནྡིཏྭཱ ཨཔྤཊིཀྐོསིཏྭཱ ཏཱནི པདབྱཉྫནཱནི སཱདྷུཀཾ ཨུགྒཧེཏྭཱ སུཏྟེ ཨོཏཱརེཏབྦཱནི, ཝིནཡེ སནྡསྶེཏབྦཱནི། ཏཱནི ཙེ སུཏྟེ ཨོཏཱརིཡམཱནཱནི ཝིནཡེ སནྡསྶིཡམཱནཱནི ན ཙེཝ སུཏྟེ ཨོཏརནྟི ན ཝིནཡེ སནྡིསྶནྟི, ནིཊྛམེཏྠ གནྟབྦཾ – ‘ཨདྡྷཱ, ཨིདཾ ན ཙེཝ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ ; ཏསྶ ཙ སངྒྷསྶ དུགྒཧིཏ’ནྟི། ཨིཏི ཧེཏཾ, བྷིཀྑཝེ, ཚཌྜེཡྻཱཐ།

    ‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse saṅgho viharati sathero sapāmokkho. Tassa me saṅghassa sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṃ – ‘addhā, idaṃ na ceva tassa bhagavato vacanaṃ arahato sammāsambuddhassa ; tassa ca saṅghassa duggahita’nti. Iti hetaṃ, bhikkhave, chaḍḍeyyātha.

    ‘‘ཨིདྷ པན, བྷིཀྑཝེ, བྷིཀྑུ ཨེཝཾ ཝདེཡྻ – ‘ཨསུཀསྨིཾ ནཱམ ཨཱཝཱསེ སངྒྷོ ཝིཧརཏི སཐེརོ སཔཱམོཀྑོ། ཏསྶ མེ སངྒྷསྶ སམྨུཁཱ སུཏཾ སམྨུཁཱ པཊིགྒཧིཏཾ – ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསན’ནྟི། ཏསྶ, བྷིཀྑཝེ, བྷིཀྑུནོ བྷཱསིཏཾ ནེཝ ཨབྷིནནྡིཏབྦཾ ནཔྤཊིཀྐོསིཏབྦཾ། ཨནབྷིནནྡིཏྭཱ ཨཔྤཊིཀྐོསིཏྭཱ ཏཱནི པདབྱཉྫནཱནི སཱདྷུཀཾ ཨུགྒཧེཏྭཱ སུཏྟེ ཨོཏཱརེཏབྦཱནི, ཝིནཡེ སནྡསྶེཏབྦཱནི། ཏཱནི ཙེ སུཏྟེ ཨོཏཱརིཡམཱནཱནི, ཝིནཡེ སནྡསྶིཡམཱནཱནི སུཏྟེ ཙེཝ ཨོཏརནྟི ཝིནཡེ ཙ སནྡིསྶནྟི, ནིཊྛམེཏྠ གནྟབྦཾ – ‘ཨདྡྷཱ, ཨིདཾ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ; ཏསྶ ཙ སངྒྷསྶ སུགྒཧིཏ’ནྟི། ཨིདཾ, བྷིཀྑཝེ, དུཏིཡཾ མཧཱཔདེསཾ དྷཱརེཡྻཱཐ།

    ‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse saṅgho viharati sathero sapāmokkho. Tassa me saṅghassa sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni, vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṃ – ‘addhā, idaṃ tassa bhagavato vacanaṃ arahato sammāsambuddhassa; tassa ca saṅghassa suggahita’nti. Idaṃ, bhikkhave, dutiyaṃ mahāpadesaṃ dhāreyyātha.

    ‘‘ཨིདྷ པན, བྷིཀྑཝེ, བྷིཀྑུ ཨེཝཾ ཝདེཡྻ – ‘ཨསུཀསྨིཾ ནཱམ ཨཱཝཱསེ སམྦཧུལཱ ཐེརཱ བྷིཀྑཱུ ཝིཧརནྟི བཧུསྶུཏཱ ཨཱགཏཱགམཱ དྷམྨདྷརཱ ཝིནཡདྷརཱ མཱཏིཀཱདྷརཱ། ཏེསཾ མེ ཐེརཱནཾ སམྨུཁཱ སུཏཾ སམྨུཁཱ པཊིགྒཧིཏཾ – ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསན’ནྟི། ཏསྶ, བྷིཀྑཝེ , བྷིཀྑུནོ བྷཱསིཏཾ ནེཝ ཨབྷིནནྡིཏབྦཾ ནཔྤཊིཀྐོསིཏབྦཾ། ཨནབྷིནནྡིཏྭཱ ཨཔྤཊིཀྐོསིཏྭཱ ཏཱནི པདབྱཉྫནཱནི སཱདྷུཀཾ ཨུགྒཧེཏྭཱ སུཏྟེ ཨོཏཱརེཏབྦཱནི, ཝིནཡེ སནྡསྶེཏབྦཱནི། ཏཱནི ཙེ སུཏྟེ ཨོཏཱརིཡམཱནཱནི ཝིནཡེ སནྡསྶིཡམཱནཱནི ན ཙེཝ སུཏྟེ ཨོཏརནྟི ན ཝིནཡེ སནྡིསྶནྟི, ནིཊྛམེཏྠ གནྟབྦཾ – ‘ཨདྡྷཱ, ཨིདཾ ན ཙེཝ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ; ཏེསཉྩ ཐེརཱནཾ དུགྒཧིཏ’ནྟི། ཨིཏི ཧེཏཾ, བྷིཀྑཝེ, ཚཌྜེཡྻཱཐ།

    ‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse sambahulā therā bhikkhū viharanti bahussutā āgatāgamā dhammadharā vinayadharā mātikādharā. Tesaṃ me therānaṃ sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave , bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṃ – ‘addhā, idaṃ na ceva tassa bhagavato vacanaṃ arahato sammāsambuddhassa; tesañca therānaṃ duggahita’nti. Iti hetaṃ, bhikkhave, chaḍḍeyyātha.

    ‘‘ཨིདྷ པན, བྷིཀྑཝེ, བྷིཀྑུ ཨེཝཾ ཝདེཡྻ – ‘ཨསུཀསྨིཾ ནཱམ ཨཱཝཱསེ སམྦཧུལཱ ཐེརཱ བྷིཀྑཱུ ཝིཧརནྟི བཧུསྶུཏཱ ཨཱགཏཱགམཱ དྷམྨདྷརཱ ཝིནཡདྷརཱ མཱཏིཀཱདྷརཱ། ཏེསཾ མེ ཐེརཱནཾ སམྨུཁཱ སུཏཾ སམྨུཁཱ པཊིགྒཧིཏཾ – ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསན’ནྟི། ཏསྶ, བྷིཀྑཝེ , བྷིཀྑུནོ བྷཱསིཏཾ ནེཝ ཨབྷིནནྡིཏབྦཾ ནཔྤཊིཀྐོསིཏབྦཾ། ཨནབྷིནནྡིཏྭཱ ཨཔྤཊིཀྐོསིཏྭཱ ཏཱནི པདབྱཉྫནཱནི སཱདྷུཀཾ ཨུགྒཧེཏྭཱ སུཏྟེ ཨོཏཱརེཏབྦཱནི, ཝིནཡེ སནྡསྶེཏབྦཱནི། ཏཱནི ཙེ སུཏྟེ ཨོཏཱརིཡམཱནཱནི ཝིནཡེ སནྡསྶིཡམཱནཱནི སུཏྟེ ཙེཝ ཨོཏརནྟི ཝིནཡེ ཙ སནྡིསྶནྟི, ནིཊྛམེཏྠ གནྟབྦཾ – ‘ཨདྡྷཱ, ཨིདཾ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ; ཏེསཉྩ ཐེརཱནཾ སུགྒཧིཏ’ནྟི། ཨིདཾ, བྷིཀྑཝེ, ཏཏིཡཾ མཧཱཔདེསཾ དྷཱརེཡྻཱཐ།

    ‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse sambahulā therā bhikkhū viharanti bahussutā āgatāgamā dhammadharā vinayadharā mātikādharā. Tesaṃ me therānaṃ sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave , bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṃ – ‘addhā, idaṃ tassa bhagavato vacanaṃ arahato sammāsambuddhassa; tesañca therānaṃ suggahita’nti. Idaṃ, bhikkhave, tatiyaṃ mahāpadesaṃ dhāreyyātha.

    ‘‘ཨིདྷ པན, བྷིཀྑཝེ, བྷིཀྑུ ཨེཝཾ ཝདེཡྻ – ‘ཨསུཀསྨིཾ ནཱམ ཨཱཝཱསེ ཨེཀོ ཐེརོ བྷིཀྑུ ཝིཧརཏི བཧུསྶུཏོ ཨཱགཏཱགམོ དྷམྨདྷརོ ཝིནཡདྷརོ མཱཏིཀཱདྷརོ། ཏསྶ མེ ཐེརསྶ སམྨུཁཱ སུཏཾ སམྨུཁཱ པཊིགྒཧིཏཾ – ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསན’ནྟི། ཏསྶ, བྷིཀྑཝེ, བྷིཀྑུནོ བྷཱསིཏཾ ནེཝ ཨབྷིནནྡིཏབྦཾ ནཔྤཊིཀྐོསིཏབྦཾ། ཨནབྷིནནྡིཏྭཱ ཨཔྤཊིཀྐོསིཏྭཱ ཏཱནི པདབྱཉྫནཱནི སཱདྷུཀཾ ཨུགྒཧེཏྭཱ སུཏྟེ ཨོཏཱརེཏབྦཱནི, ཝིནཡེ སནྡསྶེཏབྦཱནི། ཏཱནི ཙེ སུཏྟེ ཨོཏཱརིཡམཱནཱནི ཝིནཡེ སནྡསྶིཡམཱནཱནི ན ཙེཝ སུཏྟེ ཨོཏརནྟི ན ཝིནཡེ སནྡིསྶནྟི, ནིཊྛམེཏྠ གནྟབྦཾ – ‘ཨདྡྷཱ, ཨིདཾ ན ཙེཝ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ; ཏསྶ ཙ ཐེརསྶ དུགྒཧིཏ’ནྟི། ཨིཏི ཧེཏཾ, བྷིཀྑཝེ, ཚཌྜེཡྻཱཐ།

    ‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse eko thero bhikkhu viharati bahussuto āgatāgamo dhammadharo vinayadharo mātikādharo. Tassa me therassa sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni na ceva sutte otaranti na vinaye sandissanti, niṭṭhamettha gantabbaṃ – ‘addhā, idaṃ na ceva tassa bhagavato vacanaṃ arahato sammāsambuddhassa; tassa ca therassa duggahita’nti. Iti hetaṃ, bhikkhave, chaḍḍeyyātha.

    ‘‘ཨིདྷ པན, བྷིཀྑཝེ, བྷིཀྑུ ཨེཝཾ ཝདེཡྻ – ‘ཨསུཀསྨིཾ ནཱམ ཨཱཝཱསེ ཨེཀོ ཐེརོ བྷིཀྑུ ཝིཧརཏི བཧུསྶུཏོ ཨཱགཏཱགམོ དྷམྨདྷརོ ཝིནཡདྷརོ མཱཏིཀཱདྷརོ། ཏསྶ མེ ཐེརསྶ སམྨུཁཱ སུཏཾ སམྨུཁཱ པཊིགྒཧིཏཾ – ཨཡཾ དྷམྨོ, ཨཡཾ ཝིནཡོ, ཨིདཾ སཏྠུསཱསན’ནྟི། ཏསྶ, བྷིཀྑཝེ, བྷིཀྑུནོ བྷཱསིཏཾ ནེཝ ཨབྷིནནྡིཏབྦཾ ནཔྤཊིཀྐོསིཏབྦཾ། ཨནབྷིནནྡིཏྭཱ ཨཔྤཊིཀྐོསིཏྭཱ ཏཱནི པདབྱཉྫནཱནི སཱདྷུཀཾ ཨུགྒཧེཏྭཱ སུཏྟེ ཨོཏཱརེཏབྦཱནི, ཝིནཡེ སནྡསྶེཏབྦཱནི། ཏཱནི ཙེ སུཏྟེ ཨོཏཱརིཡམཱནཱནི ཝིནཡེ སནྡསྶིཡམཱནཱནི སུཏྟེ ཙེཝ ཨོཏརནྟི ཝིནཡེ ཙ སནྡིསྶནྟི, ནིཊྛམེཏྠ གནྟབྦཾ – ‘ཨདྡྷཱ, ཨིདཾ ཏསྶ བྷགཝཏོ ཝཙནཾ ཨརཧཏོ སམྨཱསམྦུདྡྷསྶ; ཏསྶ ཙ ཐེརསྶ སུགྒཧིཏ’ནྟི། ཨིདཾ, བྷིཀྑཝེ, ཙཏུཏྠཾ མཧཱཔདེསཾ དྷཱརེཡྻཱཐ། ཨིམེ ཁོ, བྷིཀྑཝེ, ཙཏྟཱརོ མཧཱཔདེསཱ’’ཏི། དསམཾ།

    ‘‘Idha pana, bhikkhave, bhikkhu evaṃ vadeyya – ‘asukasmiṃ nāma āvāse eko thero bhikkhu viharati bahussuto āgatāgamo dhammadharo vinayadharo mātikādharo. Tassa me therassa sammukhā sutaṃ sammukhā paṭiggahitaṃ – ayaṃ dhammo, ayaṃ vinayo, idaṃ satthusāsana’nti. Tassa, bhikkhave, bhikkhuno bhāsitaṃ neva abhinanditabbaṃ nappaṭikkositabbaṃ. Anabhinanditvā appaṭikkositvā tāni padabyañjanāni sādhukaṃ uggahetvā sutte otāretabbāni, vinaye sandassetabbāni. Tāni ce sutte otāriyamānāni vinaye sandassiyamānāni sutte ceva otaranti vinaye ca sandissanti, niṭṭhamettha gantabbaṃ – ‘addhā, idaṃ tassa bhagavato vacanaṃ arahato sammāsambuddhassa; tassa ca therassa suggahita’nti. Idaṃ, bhikkhave, catutthaṃ mahāpadesaṃ dhāreyyātha. Ime kho, bhikkhave, cattāro mahāpadesā’’ti. Dasamaṃ.

    སཉྩེཏནིཡཝགྒོ ཏཏིཡོ།

    Sañcetaniyavaggo tatiyo.

    ཏསྶུདྡཱནཾ –

    Tassuddānaṃ –

    ཙེཏནཱ ཝིབྷཏྟི ཀོཊྛིཀོ, ཨཱནནྡོ ཨུཔཝཱཎཔཉྩམཾ།

    Cetanā vibhatti koṭṭhiko, ānando upavāṇapañcamaṃ;

    ཨཱཡཱཙན-རཱཧུལ-ཛམྦཱལཱི, ནིབྦཱནཾ མཧཱཔདེསེནཱཏི༎

    Āyācana-rāhula-jambālī, nibbānaṃ mahāpadesenāti.




    Next: (༡༩) ༤. བྲཱཧྨཎཝགྒོ • (19) 4. Brāhmaṇavaggo




    Footnotes:
    1. ཨཱནནྡེ ཙེཏིཡེ (དཱི॰ ནི॰ ༢.༡༨༦) མཧཱཝ॰ ༣༠༣ པན ཨཉྙཐཱ ཨཱགཏཾ
    2. ānande cetiye (dī. ni. 2.186) mahāva. 303 pana aññathā āgataṃ
    3. ཨོསཱརེཏབྦཱནི
    4. ཨོསཱརིཡམཱནཱནི
    5. ཨོསརནྟི (དཱི॰ ནི॰ ༢.༡༨༨)
    6. ཨིཏི ཧིདཾ (སཱི॰ སྱཱ॰ ཀཾ॰ ཀ॰)
    7. osāretabbāni
    8. osāriyamānāni
    9. osaranti (dī. ni. 2.188)
    10. iti hidaṃ (sī. syā. kaṃ. ka.)
    11. ཨེཏྟཀོ པཱཋོ དཱིགྷནིཀཱཡེ ན དིསྶཏི, པེཡྻཱལམུཁེན དསྶིཏོ བྷཝེཡྻ
    12. ཨེཏྟཀོ པཱཋོ དཱིགྷནིཀཱཡེ ན དིསྶཏི, པེཡྻཱལམུཁེན དསྶིཏོ བྷཝེཡྻ
    13. ettako pāṭho dīghanikāye na dissati, peyyālamukhena dassito bhaveyya
    14. ettako pāṭho dīghanikāye na dissati, peyyālamukhena dassito bhaveyya



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༠. མཧཱཔདེསསུཏྟཝཎྞནཱ • 10. Mahāpadesasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡༠. མཧཱཔདེསསུཏྟཝཎྞནཱ • 10. Mahāpadesasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact