| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. மஹாபதே³ஸஸுத்தவண்ணனா
10. Mahāpadesasuttavaṇṇanā
180. த³ஸமே போ⁴க³னக³ரே விஹரதீதி பரினிப்³பா³னஸமயே சாரிகங் சரந்தோ தங் நக³ரங் பத்வா தத்த² விஹரதி. ஆனந்த³சேதியேதி ஆனந்த³யக்க²ஸ்ஸ ப⁴வனட்டா²னே பதிட்டி²தவிஹாரே. மஹாபதே³ஸேதி மஹாஓகாஸே மஹாஅபதே³ஸே வா, பு³த்³தா⁴த³யோ மஹந்தே மஹந்தே அபதி³ஸித்வா வுத்தானி மஹாகாரணானீதி அத்தோ². நேவ அபி⁴னந்தி³தப்³ப³ந்தி ஹட்ட²துட்டே²ஹி ஸாது⁴காரங் த³த்வா புப்³பே³வ ந ஸோதப்³ப³ங். ஏவங் கதே ஹி பச்சா² ‘‘இத³ங் ந ஸமேதீ’’தி வுச்சமானோபி ‘‘கிங் புப்³பே³வ அயங் த⁴ம்மோ, இதா³னி ந த⁴ம்மோ’’தி வத்வா லத்³தி⁴ங் ந விஸ்ஸஜ்ஜேதி. நப்படிக்கோஸிதப்³ப³ந்தி ‘‘கிங் ஏஸ பா³லோ வத³தீ’’தி ஏவங் புப்³பே³வ ந வத்தப்³ப³ங். ஏவங் வுத்தே ஹி வத்துங் யுத்தம்பி ந வக்க²தி. தேனாஹ – அனபி⁴னந்தி³த்வா அப்படிக்கோஸித்வாதி. பத³ப்³யஞ்ஜனானீதி பத³ஸங்கா²தானி ப்³யஞ்ஜனானி. ஸாது⁴கங் உக்³க³ஹெத்வாதி ‘‘இமஸ்மிங் டா²னே பாளி வுத்தா, இமஸ்மிங் டா²னே அத்தோ² வுத்தோ, இமஸ்மிங் டா²னே அனுஸந்தி⁴ கதி²தா , இமஸ்மிங் டா²னே புப்³பா³பரங் கதி²த’’ந்தி ஸுட்டு² க³ஹெத்வா. ஸுத்தே ஓதாரேதப்³பா³னீதி ஸுத்தே ஓதரிதப்³பா³னி. வினயே ஸந்த³ஸ்ஸேதப்³பா³னீதி வினயே ஸங்ஸந்தே³தப்³பா³னி.
180. Dasame bhoganagare viharatīti parinibbānasamaye cārikaṃ caranto taṃ nagaraṃ patvā tattha viharati. Ānandacetiyeti ānandayakkhassa bhavanaṭṭhāne patiṭṭhitavihāre. Mahāpadeseti mahāokāse mahāapadese vā, buddhādayo mahante mahante apadisitvā vuttāni mahākāraṇānīti attho. Neva abhinanditabbanti haṭṭhatuṭṭhehi sādhukāraṃ datvā pubbeva na sotabbaṃ. Evaṃ kate hi pacchā ‘‘idaṃ na sametī’’ti vuccamānopi ‘‘kiṃ pubbeva ayaṃ dhammo, idāni na dhammo’’ti vatvā laddhiṃ na vissajjeti. Nappaṭikkositabbanti ‘‘kiṃ esa bālo vadatī’’ti evaṃ pubbeva na vattabbaṃ. Evaṃ vutte hi vattuṃ yuttampi na vakkhati. Tenāha – anabhinanditvā appaṭikkositvāti. Padabyañjanānīti padasaṅkhātāni byañjanāni. Sādhukaṃ uggahetvāti ‘‘imasmiṃ ṭhāne pāḷi vuttā, imasmiṃ ṭhāne attho vutto, imasmiṃ ṭhāne anusandhi kathitā , imasmiṃ ṭhāne pubbāparaṃ kathita’’nti suṭṭhu gahetvā. Sutte otāretabbānīti sutte otaritabbāni. Vinaye sandassetabbānīti vinaye saṃsandetabbāni.
எத்த² ச ஸுத்தந்தி வினயோ வுத்தோ. யதா²ஹ – ‘‘கத்த² படிக்கி²த்தங், ஸாவத்தி²யங் ஸுத்தவிப⁴ங்கே³’’தி (சூளவ॰ 457) வினயோதி க²ந்த⁴கோ. யதா²ஹ – ‘‘வினயாதிஸாரே’’தி. ஏவங் வினயபிடகம்பி ந பரியாதி³யதி. உப⁴தோவிப⁴ங்கா³ பன ஸுத்தங், க²ந்த⁴கபரிவாரா வினயோதி ஏவங் வினயபிடகங் பரியாதி³யதி. அத² வா ஸுத்தந்தபிடகங் ஸுத்தங், வினயபிடகங் வினயோதி ஏவங் த்³வேயேவ பிடகானி பரியாதி³யந்தி. ஸுத்தந்தாபி⁴த⁴ம்மபிடகானி வா ஸுத்தங், வினயபிடகங் வினயோதி ஏவம்பி தீணி பிடகானி ந தாவ பரியாதி³யந்தி. அஸுத்தனாமகஞ்ஹி பு³த்³த⁴வசனங் நாம அத்தி². ஸெய்யதி²த³ங் – ஜாதகங் படிஸம்பி⁴தா³ நித்³தே³ஸோ ஸுத்தனிபாதோ த⁴ம்மபத³ங் உதா³னங் இதிவுத்தகங் விமானவத்து² பேதவத்து² தே²ரகா³தா² தே²ரீகா³தா² அபதா³னந்தி.
Ettha ca suttanti vinayo vutto. Yathāha – ‘‘kattha paṭikkhittaṃ, sāvatthiyaṃ suttavibhaṅge’’ti (cūḷava. 457) vinayoti khandhako. Yathāha – ‘‘vinayātisāre’’ti. Evaṃ vinayapiṭakampi na pariyādiyati. Ubhatovibhaṅgā pana suttaṃ, khandhakaparivārā vinayoti evaṃ vinayapiṭakaṃ pariyādiyati. Atha vā suttantapiṭakaṃ suttaṃ, vinayapiṭakaṃ vinayoti evaṃ dveyeva piṭakāni pariyādiyanti. Suttantābhidhammapiṭakāni vā suttaṃ, vinayapiṭakaṃ vinayoti evampi tīṇi piṭakāni na tāva pariyādiyanti. Asuttanāmakañhi buddhavacanaṃ nāma atthi. Seyyathidaṃ – jātakaṃ paṭisambhidā niddeso suttanipāto dhammapadaṃ udānaṃ itivuttakaṃ vimānavatthu petavatthu theragāthā therīgāthā apadānanti.
ஸுதி³ன்னத்தே²ரோ பன ‘‘அஸுத்தனாமகங் பு³த்³த⁴வசனங் நத்தீ²’’தி தங் ஸப்³ப³ங் படிக்கி²பித்வா ‘‘தீணி பிடகானி ஸுத்தங், வினயோ பன காரண’’ந்தி ஆஹ. ததோ தங் காரணங் த³ஸ்ஸெந்தோ இத³ங் ஸுத்தமாஹரி –
Sudinnatthero pana ‘‘asuttanāmakaṃ buddhavacanaṃ natthī’’ti taṃ sabbaṃ paṭikkhipitvā ‘‘tīṇi piṭakāni suttaṃ, vinayo pana kāraṇa’’nti āha. Tato taṃ kāraṇaṃ dassento idaṃ suttamāhari –
‘‘யே கோ² த்வங், கோ³தமி, த⁴ம்மே ஜானெய்யாஸி, இமே த⁴ம்மா ஸராகா³ய ஸங்வத்தந்தி நோ விராகா³ய, ஸங்யோகா³ய ஸங்வத்தந்தி நோ விஸங்யோகா³ய, ஸஉபாதா³னாய ஸங்வத்தந்தி நோ அனுபாதா³னாய, மஹிச்ச²தாய ஸங்வத்தந்தி நோ அப்பிச்ச²தாய, அஸந்துட்டி²யா ஸங்வத்தந்தி நோ ஸந்துட்டி²யா, கோஸஜ்ஜாய ஸங்வத்தந்தி நோ வீரியாரம்பா⁴ய, ஸங்க³ணிகாய ஸங்வத்தந்தி நோ பவிவேகாய, ஆசயாய ஸங்வத்தந்தி நோ அபசயாய. ஏகங்ஸேன, கோ³தமி, ஜானெய்யாஸி ‘நேஸோ த⁴ம்மோ நேஸோ வினயோ நேதங் ஸத்து² ஸாஸன’ந்தி.
‘‘Ye kho tvaṃ, gotami, dhamme jāneyyāsi, ime dhammā sarāgāya saṃvattanti no virāgāya, saṃyogāya saṃvattanti no visaṃyogāya, saupādānāya saṃvattanti no anupādānāya, mahicchatāya saṃvattanti no appicchatāya, asantuṭṭhiyā saṃvattanti no santuṭṭhiyā, kosajjāya saṃvattanti no vīriyārambhāya, saṅgaṇikāya saṃvattanti no pavivekāya, ācayāya saṃvattanti no apacayāya. Ekaṃsena, gotami, jāneyyāsi ‘neso dhammo neso vinayo netaṃ satthu sāsana’nti.
‘‘யே ச கோ² த்வங், கோ³தமி, த⁴ம்மே ஜானெய்யாஸி, இமே த⁴ம்மா விராகா³ய ஸங்வத்தந்தி நோ ஸராகா³ய, விஸங்யோகா³ய ஸங்வத்தந்தி நோ ஸங்யோகா³ய. அனுபாதா³னாய ஸங்வத்தந்தி நோ ஸஉபாதா³னாய, அப்பிச்ச²தாய ஸங்வத்தந்தி நோ மஹிச்ச²தாய, ஸந்துட்டி²யா ஸங்வத்தந்தி நோ அஸந்துட்டி²யா, வீரியாரம்பா⁴ய ஸங்வத்தந்தி நோ கோஸஜ்ஜாய, பவிவேகாய ஸங்வத்தந்தி நோ ஸங்க³ணிகாய, அபசயாய ஸங்வத்தந்தி நோ ஆசயாய. ஏகங்ஸேன, கோ³தமி , ஜானெய்யாஸி ‘ஏஸோ த⁴ம்மோ ஏஸோ வினயோ ஏதங் ஸத்து² ஸாஸன’’’ந்தி (சூளவ॰ 406; அ॰ நி॰ 8.53).
‘‘Ye ca kho tvaṃ, gotami, dhamme jāneyyāsi, ime dhammā virāgāya saṃvattanti no sarāgāya, visaṃyogāya saṃvattanti no saṃyogāya. Anupādānāya saṃvattanti no saupādānāya, appicchatāya saṃvattanti no mahicchatāya, santuṭṭhiyā saṃvattanti no asantuṭṭhiyā, vīriyārambhāya saṃvattanti no kosajjāya, pavivekāya saṃvattanti no saṅgaṇikāya, apacayāya saṃvattanti no ācayāya. Ekaṃsena, gotami , jāneyyāsi ‘eso dhammo eso vinayo etaṃ satthu sāsana’’’nti (cūḷava. 406; a. ni. 8.53).
தஸ்மா ஸுத்தேதி தேபிடகபு³த்³த⁴வசனே ஓதாரேதப்³பா³னி. வினயேதி ஏதஸ்மிங் ராகா³தி³வினயகாரணே ஸங்ஸந்தே³தப்³பா³னீதி அயமெத்த² அத்தோ². ந சேவ ஸுத்தே ஓதரந்தீதி ஸுத்தபடிபாடியா கத்த²சி அனாக³ந்த்வா ச²ல்லிங் உட்ட²பெத்வா கு³ள்ஹவெஸ்ஸந்தர-கு³ள்ஹஉம்மக்³க³-கு³ள்ஹவினயவேத³ல்லபிடகானங் அஞ்ஞதரதோ ஆக³தானி பஞ்ஞாயந்தீதி அத்தோ². ஏவங் ஆக³தானி ஹி ராகா³தி³வினயே ச அபஞ்ஞாயமானானி ச²ட்³டே³தப்³பா³னி ஹொந்தி. தேன வுத்தங் – ‘‘இதி ஹித³ங், பி⁴க்க²வே, ச²ட்³டெ³ய்யாதா²’’தி. ஏதேனுபாயேன ஸப்³ப³த்த² அத்தோ² வேதி³தப்³போ³. இத³ங், பி⁴க்க²வே, சதுத்த²ங் மஹாபதே³ஸங் தா⁴ரெய்யாதா²தி இமங், பி⁴க்க²வே, சதுத்த²ங் த⁴ம்மஸ்ஸ பதிட்டா²னோகாஸங் தா⁴ரெய்யாதா²தி.
Tasmā sutteti tepiṭakabuddhavacane otāretabbāni. Vinayeti etasmiṃ rāgādivinayakāraṇe saṃsandetabbānīti ayamettha attho. Na ceva sutte otarantīti suttapaṭipāṭiyā katthaci anāgantvā challiṃ uṭṭhapetvā guḷhavessantara-guḷhaummagga-guḷhavinayavedallapiṭakānaṃ aññatarato āgatāni paññāyantīti attho. Evaṃ āgatāni hi rāgādivinaye ca apaññāyamānāni chaḍḍetabbāni honti. Tena vuttaṃ – ‘‘iti hidaṃ, bhikkhave, chaḍḍeyyāthā’’ti. Etenupāyena sabbattha attho veditabbo. Idaṃ, bhikkhave, catutthaṃ mahāpadesaṃ dhāreyyāthāti imaṃ, bhikkhave, catutthaṃ dhammassa patiṭṭhānokāsaṃ dhāreyyāthāti.
ஸஞ்சேதனியவக்³கோ³ ததியோ.
Sañcetaniyavaggo tatiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. மஹாபதே³ஸஸுத்தங் • 10. Mahāpadesasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. மஹாபதே³ஸஸுத்தவண்ணனா • 10. Mahāpadesasuttavaṇṇanā
