| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༡༠. མཧཱཔདེསསུཏྟཝཎྞནཱ
10. Mahāpadesasuttavaṇṇanā
༡༨༠. དསམེ མཧཱཨོཀཱསེཏི མཧནྟེ ཨོཀཱསེ མཧནྟཱནི དྷམྨསྶ པཏིཊྛཱཔནཊྛཱནཱནི། ཡེསུ པཏིཊྛཱཔིཏོ དྷམྨོ ནིཙྪཱིཡཏི ཨསནྡེཧཏོ། ཀཱནི པན ཏཱནི? ཨཱགམནཝིསིཊྛཱནི སུཏྟོཏརཎཱདཱིནི། དུཏིཡཝིཀཔྤེ ཨཔདིསཱིཡནྟཱིཏི ཨཔདེསཱ, མཧནྟཱ ཨཔདེསཱ ཨེཏེསནྟི མཧཱཔདེསཱ། ‘‘སམྨུཁཱ མེཏཾ, ཨཱཝུསོ, བྷགཝཏོ སུཏ’’ནྟིཨཱདིནཱ ཀེནཙི ཨཱབྷཏསྶ དྷམྨོཏི ཝིནིཙྪཡནེ ཀཱརཎཾ། ཀིཾ པན ཏནྟི? ཏསྶ ཡཐཱབྷཏསྶ སུཏྟོཏརཎཱདི ཨེཝ། ཡདི ཨེཝཾ ཀཐཾ ཙཏྟཱརོཏི? ཡསྨཱ དྷམྨསྶ དྭེ སམྤདཱཡོ སཏྠཱ སཱཝཀོ ཙ། ཏེསུ སཱཝཀཱ སངྒྷགཎཔུགྒལཝསེན ཏིཝིདྷཱ། ཨེཝམིམམྷཱ མཡཱཡཾ དྷམྨོ པཊིགྒཧིཏོཏི ཨཔདིསིཏབྦཱནཾ བྷེདེན ཙཏྟཱརོ། ཏེནཱཧ ‘‘སམྨུཁཱ མེཏཾ, ཨཱཝུསོ, བྷགཝཏོ སུཏ’’ནྟིཨཱདི། ཏཐཱ ཙ ཝུཏྟཾ ནེཏྟིཡཾ (ནེཏྟི॰ ༤.༡༨) ‘‘ཙཏྟཱརོ མཧཱཔདེསཱ བུདྡྷཱཔདེསོ, སངྒྷཱཔདེསོ, གཎཱཔདེསོ, པུགྒལཱཔདེསོ། ཨིམེ ཙཏྟཱརོ མཧཱཔདེསཱ’’ཏི། བུདྡྷོ ཨཔདེསོ ཨེཏསྶཱཏི བུདྡྷཱཔདེསོ། ཨེས ནཡོ སེསེསུཔི། ཏེནཱཧ ‘‘བུདྡྷཱདཡོ…པེ॰… མཧཱཀཱརཎཱནཱི’’ཏི།
180. Dasame mahāokāseti mahante okāse mahantāni dhammassa patiṭṭhāpanaṭṭhānāni. Yesu patiṭṭhāpito dhammo nicchīyati asandehato. Kāni pana tāni? Āgamanavisiṭṭhāni suttotaraṇādīni. Dutiyavikappe apadisīyantīti apadesā, mahantā apadesā etesanti mahāpadesā. ‘‘Sammukhā metaṃ, āvuso, bhagavato suta’’ntiādinā kenaci ābhatassa dhammoti vinicchayane kāraṇaṃ. Kiṃ pana tanti? Tassa yathābhatassa suttotaraṇādi eva. Yadi evaṃ kathaṃ cattāroti? Yasmā dhammassa dve sampadāyo satthā sāvako ca. Tesu sāvakā saṅghagaṇapuggalavasena tividhā. Evamimamhā mayāyaṃ dhammo paṭiggahitoti apadisitabbānaṃ bhedena cattāro. Tenāha ‘‘sammukhā metaṃ, āvuso, bhagavato suta’’ntiādi. Tathā ca vuttaṃ nettiyaṃ (netti. 4.18) ‘‘cattāro mahāpadesā buddhāpadeso, saṅghāpadeso, gaṇāpadeso, puggalāpadeso. Ime cattāro mahāpadesā’’ti. Buddho apadeso etassāti buddhāpadeso. Esa nayo sesesupi. Tenāha ‘‘buddhādayo…pe… mahākāraṇānī’’ti.
ནེཝ ཨབྷིནནྡིཏབྦནྟི ན སམྤཊིཙྪིཏབྦཾ, གནྠསྶ སམྤཊིཙྪནཾ ནཱམ སཝནནྟི ཨཱཧ ‘‘ན སོཏབྦ’’ནྟི། པདབྱཉྫནཱནཱིཏི པདཱནི ཙ བྱཉྫནཱནི ཙ, ཨཏྠཔདཱནི བྱཉྫནཔདཱནི ཙཱཏི ཨཏྠོ། པཛྫཏི ཨཏྠོ ཨེཏེཧཱིཏི པདཱནི, ཨཀྑརཱདཱིནི བྱཉྫནཔདཱནི། པཛྫིཏབྦཏོ པདཱནི, སངྐཱསནཱདཱིནི ཨཏྠཔདཱནི། ‘‘ཨཊྛཀཐཱཡཾ པདསངྑཱཏཱནི བྱཉྫནཱནཱིཏི བྱཉྫནཔདཱནེཝ ཝུཏྟཱནཱི’’ཏི ཀེཙི། ཨཏྠཾ བྱཉྫེནྟཱིཏི བྱཉྫནཱནི, བྱཉྫནཔདཱནི། ཏེཧི བྱཉྫིཏབྦཏོ བྱཉྫནཱནི, ཨཏྠཔདཱནཱིཏི ཨུབྷཡསངྒཧཏོ། ཨིམསྨིཾ ཋཱནེཏི ཏེནཱབྷཏསུཏྟསྶ ཨིམསྨིཾ པདེསེ། པཱལི༹ ཝུཏྟཱཏི ཀེཝལོ པཱལི༹དྷམྨོ ཝུཏྟོ། ཨཏྠོ ཝུཏྟོཏི པཱལི༹ཡཱ ཨཏྠོ ཝུཏྟོ ནིདྡིཊྛོ། ཨནུསནྡྷི ཀཐིཏོཏི ཡཐཱརདྡྷདེསནཱཡ ཨུཔརིདེསནཱཡ ཙ ཨནུསནྡྷཱནཾ ཀཐིཏཾ, སམྦནྡྷོ ཀཐིཏོ། པུབྦཱཔརཾ ཀཐིཏནྟི པུབྦེན པརཾ ཨཝིརུཛ྄ཛྷནཉྩེཝ ཝིསེསཊྛཱནཉྩ ཀཐིཏཾ པཀཱསིཏཾ། ཨེཝཾ པཱལི༹དྷམྨཱདཱིནི སམྨདེཝ སལླཀྑེཏྭཱ གཧཎཾ སཱདྷུཀཾ ཨུགྒཧཎནྟི ཨཱཧ ‘‘སུཊྛུ གཧེཏྭཱ’’ཏི། སུཏྟེ ཨོཏཱརེཏབྦཱནཱིཏི ཉཱཎེན སུཏྟེ ཨོགཱཧེཏྭཱ ཏཱརེཏབྦཱནི། ཏཾ པན ཨོགཱཧེཏྭཱ ཏརཎཾ ཏཏྠ ཨོཏརཎཾ ཨནུཔྤཝེསནཾ ཧོཏཱིཏི ཝུཏྟཾ ‘‘ཨོཏརིཏབྦཱནཱི’’ཏི། སཾསནྡེཏྭཱ དསྶནཾ སནྡསྶནནྟི ཨཱཧ ‘‘ཝིནཡེ སཾསནྡེཏབྦཱནཱི’’ཏི།
Neva abhinanditabbanti na sampaṭicchitabbaṃ, ganthassa sampaṭicchanaṃ nāma savananti āha ‘‘na sotabba’’nti. Padabyañjanānīti padāni ca byañjanāni ca, atthapadāni byañjanapadāni cāti attho. Pajjati attho etehīti padāni, akkharādīni byañjanapadāni. Pajjitabbato padāni, saṅkāsanādīni atthapadāni. ‘‘Aṭṭhakathāyaṃ padasaṅkhātāni byañjanānīti byañjanapadāneva vuttānī’’ti keci. Atthaṃ byañjentīti byañjanāni, byañjanapadāni. Tehi byañjitabbato byañjanāni, atthapadānīti ubhayasaṅgahato. Imasmiṃ ṭhāneti tenābhatasuttassa imasmiṃ padese. Pāḷi vuttāti kevalo pāḷidhammo vutto. Attho vuttoti pāḷiyā attho vutto niddiṭṭho. Anusandhi kathitoti yathāraddhadesanāya uparidesanāya ca anusandhānaṃ kathitaṃ, sambandho kathito. Pubbāparaṃ kathitanti pubbena paraṃ avirujjhanañceva visesaṭṭhānañca kathitaṃ pakāsitaṃ. Evaṃ pāḷidhammādīni sammadeva sallakkhetvā gahaṇaṃ sādhukaṃ uggahaṇanti āha ‘‘suṭṭhu gahetvā’’ti. Sutte otāretabbānīti ñāṇena sutte ogāhetvā tāretabbāni. Taṃ pana ogāhetvā taraṇaṃ tattha otaraṇaṃ anuppavesanaṃ hotīti vuttaṃ ‘‘otaritabbānī’’ti. Saṃsandetvā dassanaṃ sandassananti āha ‘‘vinaye saṃsandetabbānī’’ti.
‘‘ཀིཾ པན ཏཾ སུཏྟཾ, ཀོ ཝཱ ཝིནཡོ’’ཏི ཝིཙཱརཎཱཡཾ ཨཱཙརིཡཱནཾ མཏིབྷེདམུཁེན ཏམཏྠཾ དསྶེཏུཾ ‘‘ཨེཏྠ ཙཱ’’ཏིཨཱདི ཝུཏྟཾ། ཝིནཡོཏི ཝིབྷངྒཔཱཋམཱཧ། སོ ཧི མཱཏིཀཱསཉྙིཏསྶ སུཏྟསྶ ཨཏྠེ སཱུཙནཏོ ‘‘སུཏྟ’’ནྟི ཝཏྟབྦཏཾ ཨརཧཏི། ཝིཝིདྷནཡཏྟཱ ཝིསིཊྛནཡཏྟཱ ཙ ཝིནཡོ, ཁནྡྷཀཔཱཋོ། ཨེཝནྟི ཨེཝཾ སུཏྟཝིནཡེསུ པརིགྒཡ྄ཧམཱནེསུ ཝིནཡཔིཊཀམྤི ན པརིཡཱདིཡཏི པརིཝཱརཔཱལི༹ཡཱ ཨསངྒཧིཏཏྟཱ། སུཏྟནྟཱབྷིདྷམྨཔིཊཀཱནི ཝཱ སུཏྟཾ ཨཏྠསཱུཙནཱདིཨཏྠསམྦྷཝཏོ། ཨེཝམྤཱིཏི སུཏྟནྟཱབྷིདྷམྨཔིཊཀཱནི སུཏྟཾ, ཝིནཡཔིཊཀཾ ཝིནཡོཏི ཨེཝཾ སུཏྟཝིནཡཝིབྷཱགེ ཝུཙྩམཱནེཔི། ན ཏཱཝ པརིཡཱདིཡནྟཱིཏི ན ཏཱཝ ཨནཝསེསཏོ པརིགྒཡ྄ཧནྟི ། ཀསྨཱཏི ཙེཏི ཨཱཧ ‘‘ཨསུཏྟནཱམཀཉྷཱི’’ཏིཨཱདི། ཡསྨཱ སུཏྟནྟི ཨིམཾ ནཱམཾ ཨནཱརོཔེཏྭཱ སངྒཱིཏཾ ཛཱཏཀཱདིབུདྡྷཝཙནཾ ཨཏྠི, ཏསྨཱ ཝུཏྟནཡེན ཏཱིཎི པིཊཀཱནི ན པརིཡཱདིཡནྟཱིཏི། སུཏྟནིཔཱཏཨུདཱནཨིཏིཝུཏྟཀཱནི དཱིགྷནིཀཱཡཱདཡོ ཝིཡ སུཏྟནྟི ནཱམཾ ཨཱརོཔེཏྭཱ ཨསངྒཱིཏཱནཱིཏི ཨདྷིཔྤཱཡེནེཏྠ ཛཱཏཀཱདཱིཧི སདྡྷིཾ ཏཱནིཔི གཧིཏཱནི། བུདྡྷཝཾསཙརིཡཱཔིཊཀཱནཾ པནེཏྠ ཨགྒཧཎེ ཀཱརཎཾ མགྒིཏབྦཾ, ཀིཾ ཝཱ ཨེཏེན མགྒནེན། སབྦོཔཱཡཾ ཝཎྞནཱནཡོ ཐེརཝཱདདསྶནམུཁེན པཊིཀྑིཏྟོ ཨེཝཱཏི།
‘‘Kiṃ pana taṃ suttaṃ, ko vā vinayo’’ti vicāraṇāyaṃ ācariyānaṃ matibhedamukhena tamatthaṃ dassetuṃ ‘‘ettha cā’’tiādi vuttaṃ. Vinayoti vibhaṅgapāṭhamāha. So hi mātikāsaññitassa suttassa atthe sūcanato ‘‘sutta’’nti vattabbataṃ arahati. Vividhanayattā visiṭṭhanayattā ca vinayo, khandhakapāṭho. Evanti evaṃ suttavinayesu pariggayhamānesu vinayapiṭakampi na pariyādiyati parivārapāḷiyā asaṅgahitattā. Suttantābhidhammapiṭakāni vā suttaṃ atthasūcanādiatthasambhavato. Evampīti suttantābhidhammapiṭakāni suttaṃ, vinayapiṭakaṃ vinayoti evaṃ suttavinayavibhāge vuccamānepi. Na tāva pariyādiyantīti na tāva anavasesato pariggayhanti . Kasmāti ceti āha ‘‘asuttanāmakañhī’’tiādi. Yasmā suttanti imaṃ nāmaṃ anāropetvā saṅgītaṃ jātakādibuddhavacanaṃ atthi, tasmā vuttanayena tīṇi piṭakāni na pariyādiyantīti. Suttanipātaudānaitivuttakāni dīghanikāyādayo viya suttanti nāmaṃ āropetvā asaṅgītānīti adhippāyenettha jātakādīhi saddhiṃ tānipi gahitāni. Buddhavaṃsacariyāpiṭakānaṃ panettha aggahaṇe kāraṇaṃ maggitabbaṃ, kiṃ vā etena magganena. Sabbopāyaṃ vaṇṇanānayo theravādadassanamukhena paṭikkhitto evāti.
ཀིཾ ཨཏྠཱིཏི ཨསུཏྟནཱམཀཾ བུདྡྷཝཙནཾ ནཏྠིཡེཝཱཏི དསྶེཏི། ཏཾ སབྦཾ པཊིཀྑིཔིཏྭཱཏི ‘‘སུཏྟནྟི ཝིནཡོ’’ཏིཨཱདིནཱ ཝུཏྟསཾཝཎྞནཱཡཾ ‘‘ནཱཡམཏྠོ ཨིདྷཱདྷིཔྤེཏོ’’ཏི པཊིསེདྷེཏྭཱ། ཝིནེཏི ཨེཏེན ཀིལེསེཏི ཝིནཡོ, ཀིལེསཝིནཡནཱུཔཱཡོ, སོ ཨེཝ ཀཱརཎནྟི ཨཱཧ ‘‘ཝིནཡོ པན ཀཱརཎ’’ནྟི།
Kiṃ atthīti asuttanāmakaṃ buddhavacanaṃ natthiyevāti dasseti. Taṃ sabbaṃ paṭikkhipitvāti ‘‘suttanti vinayo’’tiādinā vuttasaṃvaṇṇanāyaṃ ‘‘nāyamattho idhādhippeto’’ti paṭisedhetvā. Vineti etena kileseti vinayo, kilesavinayanūpāyo, so eva kāraṇanti āha ‘‘vinayo pana kāraṇa’’nti.
དྷམྨེཏི པརིཡཏྟིདྷམྨེ། སརཱགཱཡཱཏི སརཱགབྷཱཝཱཡ ཀཱམརཱགབྷཝརཱགཔརིབྲཱུཧནཱཡ། སཾཡོགཱཡཱཏི བྷཝསཾཡོཛནཱཡ། སཨུཔཱདཱནཱཡཱཏི ཙཏུརཱུཔཱདཱནཱུཔསཾཧིཏཏཱཡ། མཧིཙྪཏཱཡཱཏི མཧིཙྪབྷཱཝཱཡ། ཨསནྟུཊྛིཡཱཏི ཨསནྟུཊྛབྷཱཝཱཡ། ཀོསཛྫཱཡཱཏི ཀུསཱིཏབྷཱཝཱཡ། སངྒཎིཀཱཡཱཏི ཀིལེསསངྒཎིཀཝིཧཱརཱཡ། ཨཱཙཡཱཡཱཏི ཏིཝིདྷཝཊྚཱཙཡཱཡ། ཝིརཱགཱཡཱཏི སཀལཝཊྚཏོ ཝིརཛྫནཏྠཱཡ། ཝིསཾཡོགཱཡཱཏི ཀཱམརཱགཱདཱིཧི ཝིསཾཡུཛྫནཏྠཱཡ། ཨནུཔཱདཱནཱཡཱཏི སབྦསྶཔི ཀམྨབྷཝསྶ ཨགྒཧཎཱཡ། ཨཔྤིཙྪཏཱཡཱཏི པཙྩཡཔྤིཙྪཏཱདིཝསེན སབྦསོ ཨིཙྪཱཡ ཨཔགམཱཡ། སནྟུཊྛིཡཱཏི དྭཱདསཝིདྷསནྟུཊྛབྷཱཝཱཡ། ཝཱིརིཡཱརམྦྷཱཡཱཏི ཀཱཡིཀསྶ ཙེཝ ཙེཏསིཀསྶ ཙ ཝཱིརིཡསྶ པགྒཎྷནཏྠཱཡ། ཝིཝེཀཱཡཱཏི པཝིཝིཏྟབྷཱཝཱཡ ཀཱམཝིཝེཀཱདིཏདངྒཝིཝེཀཱདིཝིཝེཀསིདྡྷིཡཱ། ཨཔཙཡཱཡཱཏི སབྦསྶཔི ཝཊྚསྶ ཨཔཙཡནཱཡ, ནིབྦཱནཱཡཱཏི ཨཏྠོ། ཨེཝཾ ཡོ པརིཡཏྟིདྷམྨོ ཨུགྒཧཎདྷཱརཎཔརིཔུཙྪཱམནསིཀཱརཝསེན ཡོནིསོ པཊིཔཛྫནྟསྶ སརཱགཱདིབྷཱཝཔརིཝཛྫནསྶ ཀཱརཎཾ ཧུཏྭཱ ཝིརཱགཱདིབྷཱཝཱཡ སཾཝཏྟཏི, ཨེཀཾསཏོ ཨེསོ དྷམྨོ, ཨེསོ ཝིནཡོ སམྨདེཝ ཨཔཱཡཱདཱིསུ ཨཔཏནཝསེན དྷཱརཎཏོ ཀིལེསཱནཾ ཝིནཡནཏོ ཙ། སཏྠུ སམྨཱསམྦུདྡྷསྶ ཨོཝཱདཱནུརཱུཔཔྤཝཏྟིབྷཱཝཏོ ཨེཏཾ སཏྠུསཱསནནྟི ཙ ཛཱནེཡྻཱསཱིཏི ཨཏྠོ།
Dhammeti pariyattidhamme. Sarāgāyāti sarāgabhāvāya kāmarāgabhavarāgaparibrūhanāya. Saṃyogāyāti bhavasaṃyojanāya. Saupādānāyāti caturūpādānūpasaṃhitatāya. Mahicchatāyāti mahicchabhāvāya. Asantuṭṭhiyāti asantuṭṭhabhāvāya. Kosajjāyāti kusītabhāvāya. Saṅgaṇikāyāti kilesasaṅgaṇikavihārāya. Ācayāyāti tividhavaṭṭācayāya. Virāgāyāti sakalavaṭṭato virajjanatthāya. Visaṃyogāyāti kāmarāgādīhi visaṃyujjanatthāya. Anupādānāyāti sabbassapi kammabhavassa aggahaṇāya. Appicchatāyāti paccayappicchatādivasena sabbaso icchāya apagamāya. Santuṭṭhiyāti dvādasavidhasantuṭṭhabhāvāya. Vīriyārambhāyāti kāyikassa ceva cetasikassa ca vīriyassa paggaṇhanatthāya. Vivekāyāti pavivittabhāvāya kāmavivekāditadaṅgavivekādivivekasiddhiyā. Apacayāyāti sabbassapi vaṭṭassa apacayanāya, nibbānāyāti attho. Evaṃ yo pariyattidhammo uggahaṇadhāraṇaparipucchāmanasikāravasena yoniso paṭipajjantassa sarāgādibhāvaparivajjanassa kāraṇaṃ hutvā virāgādibhāvāya saṃvattati, ekaṃsato eso dhammo, eso vinayo sammadeva apāyādīsu apatanavasena dhāraṇato kilesānaṃ vinayanato ca. Satthu sammāsambuddhassa ovādānurūpappavattibhāvato etaṃ satthusāsananti ca jāneyyāsīti attho.
ཙཏུསཙྩཏྠསཱུཙནཾ སུཏྟནྟི ཨཱཧ ‘‘སུཏྟེཏི ཏེཔིཊཀེ བུདྡྷཝཙནེ’’ཏི། ཏེཔིཊཀཉྷི བུདྡྷཝཙནཾ སཙྩཝིནིམུཏྟཾ ནཏྠི། རཱགཱདིཝིནཡཀཱརཎཾ ཡཐཱ ཏེན སུཏྟཔདེན པཀཱསིཏནྟི ཨཱཧ ‘‘ཝིནཡེཏི ཨེཏསྨིཾ རཱགཱདིཝིནཡཀཱརཎེ’’ཏི། སུཏྟེ ཨོཏརཎཉྩེཏྠ ཏེཔིཊཀབུདྡྷཝཙནཔརིཡཱཔནྣཏཱཝསེནེཝ ཝེདིཏབྦཾ, ན ཨཉྙཐཱཏི ཨཱཧ ‘‘སུཏྟཔྤཊིཔཱཊིཡཱ ཀཏྠཙི ཨནཱགནྟྭཱ’’ཏི། ཚལླིཾ ཨུཊྛཔེཏྭཱཏི ཨརོགསྶ མཧཏོ རུཀྑསྶ ཏིཊྛཏོ ཨུཔཀྐམེན ཚལླིཀཱཡ སཀལིཀཱཡ པཔཊིཀཱཡ ཝཱ ཨུཊྛཱཔནཾ ཝིཡ ཨརོགསྶ སཱསནདྷམྨསྶ ཏིཊྛཏོ བྱཉྫནམཏྟེན ཏཔྤརིཡཱཔནྣཾ ཝིཡ ཧུཏྭཱ ཚལླིསདིསཾ པུབྦཱཔརཝིརུདྡྷཏཱདིདོསཾ ཨུཊྛཔེཏྭཱ པརིདཱིཔེཏྭཱ། ཏཱདིསཱནི པན ཨེཀཾསཏོ གུལ༹ྷཝེསྶནྟརཱདིཔརིཡཱཔནྣཱནི ཧོནྟཱིཏི ཨཱཧ ‘‘གུལ༹ྷཝེསྶནྟར…པེ॰… པཉྙཱཡནྟཱིཏི ཨཏྠོ’’ཏི། རཱགཱདིཝིནཡེཏི རཱགཱདིཝིནཡནཏྠེན ཨཏདཱཀཱརཏཱཡ ཨཔཉྙཱཡམཱནཱནི ཚཌྜེཏབྦཱནི ཙཛིཏབྦཱནི ན གཧེཏབྦཱནི། སབྦཏྠཱཏི སབྦཝཱརེསུ།
Catusaccatthasūcanaṃ suttanti āha ‘‘sutteti tepiṭake buddhavacane’’ti. Tepiṭakañhi buddhavacanaṃ saccavinimuttaṃ natthi. Rāgādivinayakāraṇaṃ yathā tena suttapadena pakāsitanti āha ‘‘vinayeti etasmiṃ rāgādivinayakāraṇe’’ti. Sutte otaraṇañcettha tepiṭakabuddhavacanapariyāpannatāvaseneva veditabbaṃ, na aññathāti āha ‘‘suttappaṭipāṭiyā katthaci anāgantvā’’ti. Challiṃ uṭṭhapetvāti arogassa mahato rukkhassa tiṭṭhato upakkamena challikāya sakalikāya papaṭikāya vā uṭṭhāpanaṃ viya arogassa sāsanadhammassa tiṭṭhato byañjanamattena tappariyāpannaṃ viya hutvā challisadisaṃ pubbāparaviruddhatādidosaṃ uṭṭhapetvā paridīpetvā. Tādisāni pana ekaṃsato guḷhavessantarādipariyāpannāni hontīti āha ‘‘guḷhavessantara…pe… paññāyantīti attho’’ti. Rāgādivinayeti rāgādivinayanatthena atadākāratāya apaññāyamānāni chaḍḍetabbāni cajitabbāni na gahetabbāni. Sabbatthāti sabbavāresu.
མཧཱཔདེསསུཏྟཝཎྞནཱ ནིཊྛིཏཱ།
Mahāpadesasuttavaṇṇanā niṭṭhitā.
སཉྩེཏནིཡཝགྒཝཎྞནཱ ནིཊྛིཏཱ།
Sañcetaniyavaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡༠. མཧཱཔདེསསུཏྟཾ • 10. Mahāpadesasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༠. མཧཱཔདེསསུཏྟཝཎྞནཱ • 10. Mahāpadesasuttavaṇṇanā
