| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
10. பி⁴க்கு²னிக்க²ந்த⁴கங்
10. Bhikkhunikkhandhakaṃ
மஹாபஜாபதிகோ³தமீவத்து²கதா²
Mahāpajāpatigotamīvatthukathā
402. பி⁴க்கு²னிக்க²ந்த⁴கே – அலங் கோ³தமி மா தே ருச்சீதி கஸ்மா படிக்கி²பதி, நனு ஸப்³பே³ஸம்பி பு³த்³தா⁴னங் சதஸ்ஸோ பரிஸா ஹொந்தீதி? காமங் ஹொந்தி, கிலமெத்வா பன அனேகக்க²த்துங் யாசிதேன அனுஞ்ஞாதங் பப்³ப³ஜ்ஜங் ‘‘து³க்கே²ன லத்³தா⁴ அயங் அம்ஹேஹீ’’தி ஸம்மா பரிபாலெஸ்ஸந்தீதி ப⁴த்³த³கங் கத்வா அனுஜானிதுகாமோ படிக்கி²பதி. அட்ட²க³ருத⁴ம்மகதா² மஹாவிப⁴ங்கே³யேவ கதி²தா.
402. Bhikkhunikkhandhake – alaṃ gotami mā te ruccīti kasmā paṭikkhipati, nanu sabbesampi buddhānaṃ catasso parisā hontīti? Kāmaṃ honti, kilametvā pana anekakkhattuṃ yācitena anuññātaṃ pabbajjaṃ ‘‘dukkhena laddhā ayaṃ amhehī’’ti sammā paripālessantīti bhaddakaṃ katvā anujānitukāmo paṭikkhipati. Aṭṭhagarudhammakathā mahāvibhaṅgeyeva kathitā.
403. கும்ப⁴தே²னகேஹீதி கும்பே⁴ தீ³பங் ஜாலெத்வா தேன ஆலோகேன பரக⁴ரே ப⁴ண்ட³ங் விசினித்வா தே²னகசோரேஹி.
403.Kumbhathenakehīti kumbhe dīpaṃ jāletvā tena ālokena paraghare bhaṇḍaṃ vicinitvā thenakacorehi.
ஸேதட்டி²கா நாம ரோக³ஜாதீதி ஏகோ பாணகோ நாளிமஜ்ஜ²க³தங் கண்ட³ங் விஜ்ஜ²தி, யேன வித்³த⁴த்தா நிக்க²ந்தம்பி ஸாலிஸீஸங் கீ²ரங் க³ஹேதுங் ந ஸக்கோதி.
Setaṭṭhikā nāma rogajātīti eko pāṇako nāḷimajjhagataṃ kaṇḍaṃ vijjhati, yena viddhattā nikkhantampi sālisīsaṃ khīraṃ gahetuṃ na sakkoti.
மஞ்ஜிட்டி²கா நாம ரோக³ஜாதீதி உச்சூ²னங் அந்தோரத்தபா⁴வோ. மஹதோ தளாகஸ்ஸ படிகச்சேவ ஆளிந்தி இமினா பன ஏதமத்த²ங் த³ஸ்ஸேதி – யதா² மஹதோ தளாகஸ்ஸ ஆளியா அப³த்³தா⁴யபி கிஞ்சி உத³கங் திட்டெ²ய்ய, பட²மமேவ ப³த்³தா⁴ய பன யங் அப³த்³த⁴பச்சயா ந திட்டெ²ய்ய, தம்பி திட்டெ²ய்ய; ஏவமேவ யே இமே அனுப்பன்னே வத்து²ஸ்மிங் படிகச்சேவ அவீதிக்கமனத்தா²ய க³ருத⁴ம்மா பஞ்ஞத்தா. தேஸு அபஞ்ஞத்தேஸுபி மாதுகா³மஸ்ஸ பப்³ப³ஜிதத்தா பஞ்சேவ வஸ்ஸஸதானி ஸத்³த⁴ம்மோ திட்டெ²ய்ய. படிகச்சேவ பஞ்ஞத்தத்தா பன அபரானிபி பஞ்சவஸ்ஸஸதானி ட²ஸ்ஸதீதி ஏவங் பட²மங் வுத்தங் வஸ்ஸஸஹஸ்ஸமேவ ட²ஸ்ஸதீதி. வஸ்ஸஸஹஸ்ஸந்தி சேதங் படிஸம்பி⁴தா³பபே⁴த³ப்பத்தகீ²ணாஸவவஸேனேவ வுத்தங். ததோ பன உத்தரிம்பி ஸுக்க²விபஸ்ஸககீ²ணாஸவவஸேன வஸ்ஸஸஹஸ்ஸங், அனாகா³மிவஸேன வஸ்ஸஸஹஸ்ஸங், ஸகதா³கா³மிவஸேன வஸ்ஸஸஹஸ்ஸங், ஸோதாபன்னவஸேன வஸ்ஸஸஹஸ்ஸந்தி ஏவங் பஞ்சவஸ்ஸஸஹஸ்ஸானி படிவேத⁴ஸத்³த⁴ம்மோ ட²ஸ்ஸதி. பரியத்தித⁴ம்மோபி தானியேவ. ந ஹி பரியத்தியா அஸதி படிவேதோ⁴ அத்தி², நாபி பரியத்தியா ஸதி படிவேதோ⁴ ந ஹோதி; லிங்க³ங் பன பரியத்தியா அந்தரஹிதாயபி சிரங் பவத்திஸ்ஸதீதி.
Mañjiṭṭhikā nāma rogajātīti ucchūnaṃ antorattabhāvo. Mahato taḷākassa paṭikacceva āḷinti iminā pana etamatthaṃ dasseti – yathā mahato taḷākassa āḷiyā abaddhāyapi kiñci udakaṃ tiṭṭheyya, paṭhamameva baddhāya pana yaṃ abaddhapaccayā na tiṭṭheyya, tampi tiṭṭheyya; evameva ye ime anuppanne vatthusmiṃ paṭikacceva avītikkamanatthāya garudhammā paññattā. Tesu apaññattesupi mātugāmassa pabbajitattā pañceva vassasatāni saddhammo tiṭṭheyya. Paṭikacceva paññattattā pana aparānipi pañcavassasatāni ṭhassatīti evaṃ paṭhamaṃ vuttaṃ vassasahassameva ṭhassatīti. Vassasahassanti cetaṃ paṭisambhidāpabhedappattakhīṇāsavavaseneva vuttaṃ. Tato pana uttarimpi sukkhavipassakakhīṇāsavavasena vassasahassaṃ, anāgāmivasena vassasahassaṃ, sakadāgāmivasena vassasahassaṃ, sotāpannavasena vassasahassanti evaṃ pañcavassasahassāni paṭivedhasaddhammo ṭhassati. Pariyattidhammopi tāniyeva. Na hi pariyattiyā asati paṭivedho atthi, nāpi pariyattiyā sati paṭivedho na hoti; liṅgaṃ pana pariyattiyā antarahitāyapi ciraṃ pavattissatīti.
மஹாபஜாபதிகோ³தமீவத்து²கதா² நிட்டி²தா.
Mahāpajāpatigotamīvatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
மஹாபஜாபதிகோ³தமீவத்து² • Mahāpajāpatigotamīvatthu
அட்ட²க³ருத⁴ம்மா • Aṭṭhagarudhammā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
மஹாபஜாபதிகோ³தமீவத்து²கதா²வண்ணனா • Mahāpajāpatigotamīvatthukathāvaṇṇanā
அட்ட²க³ருத⁴ம்மகதா²வண்ணனா • Aṭṭhagarudhammakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மஹாபஜாபதிகோ³தமீவத்து²கதா²வண்ணனா • Mahāpajāpatigotamīvatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மஹாபஜாபதிகோ³தமீவத்து²கதா²வண்ணனா • Mahāpajāpatigotamīvatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / மஹாபஜாபதிகோ³தமீவத்து²கதா² • Mahāpajāpatigotamīvatthukathā
