| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
১০. ভিক্খুনিক্খন্ধকং
10. Bhikkhunikkhandhakaṃ
মহাপজাপতিগোতমীৰত্থুকথা
Mahāpajāpatigotamīvatthukathā
৪০২. ভিক্খুনিক্খন্ধকে – অলং গোতমি মা তে রুচ্চীতি কস্মা পটিক্খিপতি, ননু সব্বেসম্পি বুদ্ধানং চতস্সো পরিসা হোন্তীতি? কামং হোন্তি, কিলমেত্ৰা পন অনেকক্খত্তুং যাচিতেন অনুঞ্ঞাতং পব্বজ্জং ‘‘দুক্খেন লদ্ধা অযং অম্হেহী’’তি সম্মা পরিপালেস্সন্তীতি ভদ্দকং কত্ৰা অনুজানিতুকামো পটিক্খিপতি। অট্ঠগরুধম্মকথা মহাৰিভঙ্গেযেৰ কথিতা।
402. Bhikkhunikkhandhake – alaṃ gotami mā te ruccīti kasmā paṭikkhipati, nanu sabbesampi buddhānaṃ catasso parisā hontīti? Kāmaṃ honti, kilametvā pana anekakkhattuṃ yācitena anuññātaṃ pabbajjaṃ ‘‘dukkhena laddhā ayaṃ amhehī’’ti sammā paripālessantīti bhaddakaṃ katvā anujānitukāmo paṭikkhipati. Aṭṭhagarudhammakathā mahāvibhaṅgeyeva kathitā.
৪০৩. কুম্ভথেনকেহীতি কুম্ভে দীপং জালেত্ৰা তেন আলোকেন পরঘরে ভণ্ডং ৰিচিনিত্ৰা থেনকচোরেহি।
403.Kumbhathenakehīti kumbhe dīpaṃ jāletvā tena ālokena paraghare bhaṇḍaṃ vicinitvā thenakacorehi.
সেতট্ঠিকা নাম রোগজাতীতি একো পাণকো নাল়িমজ্ঝগতং কণ্ডং ৰিজ্ঝতি, যেন ৰিদ্ধত্তা নিক্খন্তম্পি সালিসীসং খীরং গহেতুং ন সক্কোতি।
Setaṭṭhikā nāma rogajātīti eko pāṇako nāḷimajjhagataṃ kaṇḍaṃ vijjhati, yena viddhattā nikkhantampi sālisīsaṃ khīraṃ gahetuṃ na sakkoti.
মঞ্জিট্ঠিকা নাম রোগজাতীতি উচ্ছূনং অন্তোরত্তভাৰো। মহতো তল়াকস্স পটিকচ্চেৰ আল়িন্তি ইমিনা পন এতমত্থং দস্সেতি – যথা মহতো তল়াকস্স আল়িযা অবদ্ধাযপি কিঞ্চি উদকং তিট্ঠেয্য, পঠমমেৰ বদ্ধায পন যং অবদ্ধপচ্চযা ন তিট্ঠেয্য, তম্পি তিট্ঠেয্য; এৰমেৰ যে ইমে অনুপ্পন্নে ৰত্থুস্মিং পটিকচ্চেৰ অৰীতিক্কমনত্থায গরুধম্মা পঞ্ঞত্তা। তেসু অপঞ্ঞত্তেসুপি মাতুগামস্স পব্বজিতত্তা পঞ্চেৰ ৰস্সসতানি সদ্ধম্মো তিট্ঠেয্য। পটিকচ্চেৰ পঞ্ঞত্তত্তা পন অপরানিপি পঞ্চৰস্সসতানি ঠস্সতীতি এৰং পঠমং ৰুত্তং ৰস্সসহস্সমেৰ ঠস্সতীতি। ৰস্সসহস্সন্তি চেতং পটিসম্ভিদাপভেদপ্পত্তখীণাসৰৰসেনেৰ ৰুত্তং। ততো পন উত্তরিম্পি সুক্খৰিপস্সকখীণাসৰৰসেন ৰস্সসহস্সং, অনাগামিৰসেন ৰস্সসহস্সং, সকদাগামিৰসেন ৰস্সসহস্সং, সোতাপন্নৰসেন ৰস্সসহস্সন্তি এৰং পঞ্চৰস্সসহস্সানি পটিৰেধসদ্ধম্মো ঠস্সতি। পরিযত্তিধম্মোপি তানিযেৰ। ন হি পরিযত্তিযা অসতি পটিৰেধো অত্থি, নাপি পরিযত্তিযা সতি পটিৰেধো ন হোতি; লিঙ্গং পন পরিযত্তিযা অন্তরহিতাযপি চিরং পৰত্তিস্সতীতি।
Mañjiṭṭhikā nāma rogajātīti ucchūnaṃ antorattabhāvo. Mahato taḷākassa paṭikacceva āḷinti iminā pana etamatthaṃ dasseti – yathā mahato taḷākassa āḷiyā abaddhāyapi kiñci udakaṃ tiṭṭheyya, paṭhamameva baddhāya pana yaṃ abaddhapaccayā na tiṭṭheyya, tampi tiṭṭheyya; evameva ye ime anuppanne vatthusmiṃ paṭikacceva avītikkamanatthāya garudhammā paññattā. Tesu apaññattesupi mātugāmassa pabbajitattā pañceva vassasatāni saddhammo tiṭṭheyya. Paṭikacceva paññattattā pana aparānipi pañcavassasatāni ṭhassatīti evaṃ paṭhamaṃ vuttaṃ vassasahassameva ṭhassatīti. Vassasahassanti cetaṃ paṭisambhidāpabhedappattakhīṇāsavavaseneva vuttaṃ. Tato pana uttarimpi sukkhavipassakakhīṇāsavavasena vassasahassaṃ, anāgāmivasena vassasahassaṃ, sakadāgāmivasena vassasahassaṃ, sotāpannavasena vassasahassanti evaṃ pañcavassasahassāni paṭivedhasaddhammo ṭhassati. Pariyattidhammopi tāniyeva. Na hi pariyattiyā asati paṭivedho atthi, nāpi pariyattiyā sati paṭivedho na hoti; liṅgaṃ pana pariyattiyā antarahitāyapi ciraṃ pavattissatīti.
মহাপজাপতিগোতমীৰত্থুকথা নিট্ঠিতা।
Mahāpajāpatigotamīvatthukathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
মহাপজাপতিগোতমীৰত্থু • Mahāpajāpatigotamīvatthu
অট্ঠগরুধম্মা • Aṭṭhagarudhammā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
মহাপজাপতিগোতমীৰত্থুকথাৰণ্ণনা • Mahāpajāpatigotamīvatthukathāvaṇṇanā
অট্ঠগরুধম্মকথাৰণ্ণনা • Aṭṭhagarudhammakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / মহাপজাপতিগোতমীৰত্থুকথাৰণ্ণনা • Mahāpajāpatigotamīvatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / মহাপজাপতিগোতমীৰত্থুকথাৰণ্ণনা • Mahāpajāpatigotamīvatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / মহাপজাপতিগোতমীৰত্থুকথা • Mahāpajāpatigotamīvatthukathā
