| Library / Tipiṭaka / තිපිටක • Tipiṭaka / චූළවග්‌ග-අට්‌ඨකථා • Cūḷavagga-aṭṭhakathā |
10. භික්‌ඛුනික්‌ඛන්‌ධකං
10. Bhikkhunikkhandhakaṃ
මහාපජාපතිගොතමීවත්‌ථුකථා
Mahāpajāpatigotamīvatthukathā
402. භික්‌ඛුනික්‌ඛන්‌ධකෙ – අලං ගොතමි මා තෙ රුච්‌චීති කස්‌මා පටික්‌ඛිපති, නනු සබ්‌බෙසම්‌පි බුද්‌ධානං චතස්‌සො පරිසා හොන්‌තීති? කාමං හොන්‌ති, කිලමෙත්‌වා පන අනෙකක්‌ඛත්‌තුං යාචිතෙන අනුඤ්‌ඤාතං පබ්‌බජ්‌ජං ‘‘දුක්‌ඛෙන ලද්‌ධා අයං අම්‌හෙහී’’ති සම්‌මා පරිපාලෙස්‌සන්‌තීති භද්‌දකං කත්‌වා අනුජානිතුකාමො පටික්‌ඛිපති. අට්‌ඨගරුධම්‌මකථා මහාවිභඞ්‌ගෙයෙව කථිතා.
402. Bhikkhunikkhandhake – alaṃ gotami mā te ruccīti kasmā paṭikkhipati, nanu sabbesampi buddhānaṃ catasso parisā hontīti? Kāmaṃ honti, kilametvā pana anekakkhattuṃ yācitena anuññātaṃ pabbajjaṃ ‘‘dukkhena laddhā ayaṃ amhehī’’ti sammā paripālessantīti bhaddakaṃ katvā anujānitukāmo paṭikkhipati. Aṭṭhagarudhammakathā mahāvibhaṅgeyeva kathitā.
403. කුම්‌භථෙනකෙහීති කුම්‌භෙ දීපං ජාලෙත්‌වා තෙන ආලොකෙන පරඝරෙ භණ්‌ඩං විචිනිත්‌වා ථෙනකචොරෙහි.
403.Kumbhathenakehīti kumbhe dīpaṃ jāletvā tena ālokena paraghare bhaṇḍaṃ vicinitvā thenakacorehi.
සෙතට්‌ඨිකා නාම රොගජාතීති එකො පාණකො නාළිමජ්‌ඣගතං කණ්‌ඩං විජ්‌ඣති, යෙන විද්‌ධත්‌තා නික්‌ඛන්‌තම්‌පි සාලිසීසං ඛීරං ගහෙතුං න සක්‌කොති.
Setaṭṭhikā nāma rogajātīti eko pāṇako nāḷimajjhagataṃ kaṇḍaṃ vijjhati, yena viddhattā nikkhantampi sālisīsaṃ khīraṃ gahetuṃ na sakkoti.
මඤ්‌ජිට්‌ඨිකා නාම රොගජාතීති උච්‌ඡූනං අන්‌තොරත්‌තභාවො. මහතො තළාකස්‌ස පටිකච්‌චෙව ආළින්‌ති ඉමිනා පන එතමත්‌ථං දස්‌සෙති – යථා මහතො තළාකස්‌ස ආළියා අබද්‌ධායපි කිඤ්‌චි උදකං තිට්‌ඨෙය්‍ය, පඨමමෙව බද්‌ධාය පන යං අබද්‌ධපච්‌චයා න තිට්‌ඨෙය්‍ය, තම්‌පි තිට්‌ඨෙය්‍ය; එවමෙව යෙ ඉමෙ අනුප්‌පන්‌නෙ වත්‌ථුස්‌මිං පටිකච්‌චෙව අවීතික්‌කමනත්‌ථාය ගරුධම්‌මා පඤ්‌ඤත්‌තා. තෙසු අපඤ්‌ඤත්‌තෙසුපි මාතුගාමස්‌ස පබ්‌බජිතත්‌තා පඤ්‌චෙව වස්‌සසතානි සද්‌ධම්‌මො තිට්‌ඨෙය්‍ය. පටිකච්‌චෙව පඤ්‌ඤත්‌තත්‌තා පන අපරානිපි පඤ්‌චවස්‌සසතානි ඨස්‌සතීති එවං පඨමං වුත්‌තං වස්‌සසහස්‌සමෙව ඨස්‌සතීති. වස්‌සසහස්‌සන්‌ති චෙතං පටිසම්‌භිදාපභෙදප්‌පත්‌තඛීණාසවවසෙනෙව වුත්‌තං. තතො පන උත්‌තරිම්‌පි සුක්‌ඛවිපස්‌සකඛීණාසවවසෙන වස්‌සසහස්‌සං, අනාගාමිවසෙන වස්‌සසහස්‌සං, සකදාගාමිවසෙන වස්‌සසහස්‌සං, සොතාපන්‌නවසෙන වස්‌සසහස්‌සන්‌ති එවං පඤ්‌චවස්‌සසහස්‌සානි පටිවෙධසද්‌ධම්‌මො ඨස්‌සති. පරියත්‌තිධම්‌මොපි තානියෙව. න හි පරියත්‌තියා අසති පටිවෙධො අත්‌ථි, නාපි පරියත්‌තියා සති පටිවෙධො න හොති; ලිඞ්‌ගං පන පරියත්‌තියා අන්‌තරහිතායපි චිරං පවත්‌තිස්‌සතීති.
Mañjiṭṭhikā nāma rogajātīti ucchūnaṃ antorattabhāvo. Mahato taḷākassa paṭikacceva āḷinti iminā pana etamatthaṃ dasseti – yathā mahato taḷākassa āḷiyā abaddhāyapi kiñci udakaṃ tiṭṭheyya, paṭhamameva baddhāya pana yaṃ abaddhapaccayā na tiṭṭheyya, tampi tiṭṭheyya; evameva ye ime anuppanne vatthusmiṃ paṭikacceva avītikkamanatthāya garudhammā paññattā. Tesu apaññattesupi mātugāmassa pabbajitattā pañceva vassasatāni saddhammo tiṭṭheyya. Paṭikacceva paññattattā pana aparānipi pañcavassasatāni ṭhassatīti evaṃ paṭhamaṃ vuttaṃ vassasahassameva ṭhassatīti. Vassasahassanti cetaṃ paṭisambhidāpabhedappattakhīṇāsavavaseneva vuttaṃ. Tato pana uttarimpi sukkhavipassakakhīṇāsavavasena vassasahassaṃ, anāgāmivasena vassasahassaṃ, sakadāgāmivasena vassasahassaṃ, sotāpannavasena vassasahassanti evaṃ pañcavassasahassāni paṭivedhasaddhammo ṭhassati. Pariyattidhammopi tāniyeva. Na hi pariyattiyā asati paṭivedho atthi, nāpi pariyattiyā sati paṭivedho na hoti; liṅgaṃ pana pariyattiyā antarahitāyapi ciraṃ pavattissatīti.
මහාපජාපතිගොතමීවත්‌ථුකථා නිට්‌ඨිතා.
Mahāpajāpatigotamīvatthukathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi
මහාපජාපතිගොතමීවත්‌ථු • Mahāpajāpatigotamīvatthu
අට්‌ඨගරුධම්‌මා • Aṭṭhagarudhammā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā
මහාපජාපතිගොතමීවත්‌ථුකථාවණ්‌ණනා • Mahāpajāpatigotamīvatthukathāvaṇṇanā
අට්‌ඨගරුධම්‌මකථාවණ්‌ණනා • Aṭṭhagarudhammakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / මහාපජාපතිගොතමීවත්‌ථුකථාවණ්‌ණනා • Mahāpajāpatigotamīvatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / මහාපජාපතිගොතමීවත්‌ථුකථාවණ්‌ණනා • Mahāpajāpatigotamīvatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / මහාපජාපතිගොතමීවත්‌ථුකථා • Mahāpajāpatigotamīvatthukathā
