| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၃. ပညာဝဂ္ဂော
3. Paññāvaggo
၁. မဟာပညာကထာ
1. Mahāpaññākathā
၁. အနိစ္စာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ဒုက္ခာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အနတ္တာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ။ပေ.။ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ?
1. Aniccānupassanā bhāvitā bahulīkatā katamaṃ paññaṃ paripūreti? Dukkhānupassanā bhāvitā bahulīkatā katamaṃ paññaṃ paripūreti? Anattānupassanā bhāvitā bahulīkatā katamaṃ paññaṃ paripūreti…pe… paṭinissaggānupassanā bhāvitā bahulīkatā katamaṃ paññaṃ paripūreti?
အနိစ္စာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ ဒုက္ခာနုပသ္သနာ ဘာဝိတာ ဗဟုလီကတာ နိဗ္ဗေဓိကပညံ ပရိပူရေတိ။ အနတ္တာနုပသ္သနာ ဘာဝိတာ ဗဟုလီကတာ မဟာပညံ ပရိပူရေတိ။ နိဗ္ဗိဒာနုပသ္သနာ ဘာဝိတာ ဗဟုလီကတာ တိက္ခပညံ ပရိပူရေတိ။ ဝိရာဂာနုပသ္သနာ ဘာဝိတာ ဗဟုလီကတာ ဝိပုလပညံ ပရိပူရေတိ။ နိရောဓာနုပသ္သနာ ဘာဝိတာ ဗဟုလီကတာ ဂမ္ဘီရပညံ ပရိပူရေတိ။ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ အသာမန္တပညံ 1 ပရိပူရေတိ။ ဣမာ သတ္တ ပညာ ဘာဝိတာ ဗဟုလီကတာ ပဏ္ဍိစ္စံ ပရိပူရေန္တိ။ ဣမာ အဋ္ဌ ပညာ ဘာဝိတာ ဗဟုလီကတာ ပုထုပညံ ပရိပူရေန္တိ။ ဣမာ နဝ ပညာ ဘာဝိတာ ဗဟုလီကတာ ဟာသပညံ ပရိပူရေန္တိ။
Aniccānupassanā bhāvitā bahulīkatā javanapaññaṃ paripūreti. Dukkhānupassanā bhāvitā bahulīkatā nibbedhikapaññaṃ paripūreti. Anattānupassanā bhāvitā bahulīkatā mahāpaññaṃ paripūreti. Nibbidānupassanā bhāvitā bahulīkatā tikkhapaññaṃ paripūreti. Virāgānupassanā bhāvitā bahulīkatā vipulapaññaṃ paripūreti. Nirodhānupassanā bhāvitā bahulīkatā gambhīrapaññaṃ paripūreti. Paṭinissaggānupassanā bhāvitā bahulīkatā asāmantapaññaṃ 2 paripūreti. Imā satta paññā bhāvitā bahulīkatā paṇḍiccaṃ paripūrenti. Imā aṭṭha paññā bhāvitā bahulīkatā puthupaññaṃ paripūrenti. Imā nava paññā bhāvitā bahulīkatā hāsapaññaṃ paripūrenti.
ဟာသပညာ ပဋိဘာနပဋိသမ္ဘိဒာ။ တသ္သာ အတ္ထဝဝတ္ထာနတော အတ္ထပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ ဓမ္မဝဝတ္ထာနတော ဓမ္မပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ နိရုတ္တိဝဝတ္ထာနတော နိရုတ္တိပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ ပဋိဘာနဝဝတ္ထာနတော ပဋိဘာနပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ တသ္သိမာ စတသ္သော ပဋိသမ္ဘိဒာယော အဓိဂတာ ဟောန္တိ သစ္ဆိကတာ ဖသ္သိတာ ပညာယ။
Hāsapaññā paṭibhānapaṭisambhidā. Tassā atthavavatthānato atthapaṭisambhidā adhigatā hoti sacchikatā phassitā paññāya. Dhammavavatthānato dhammapaṭisambhidā adhigatā hoti sacchikatā phassitā paññāya. Niruttivavatthānato niruttipaṭisambhidā adhigatā hoti sacchikatā phassitā paññāya. Paṭibhānavavatthānato paṭibhānapaṭisambhidā adhigatā hoti sacchikatā phassitā paññāya. Tassimā catasso paṭisambhidāyo adhigatā honti sacchikatā phassitā paññāya.
ရူပေ အနိစ္စာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ။ပေ.။ ရူပေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ရူပေ အနိစ္စာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ပေ.။ ရူပေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ အသာမန္တပညံ ပရိပူရေတိ။ ဣမာ သတ္တ ပညာ ဘာဝိတာ ဗဟုလီကတာ ပဏ္ဍိစ္စံ ပရိပူရေန္တိ။ ဣမာ အဋ္ဌ ပညာ ဘာဝိတာ ဗဟုလီကတာ ပုထုပညံ ပရိပူရေန္တိ။ ဣမာ နဝ ပညာ ဘာဝိတာ ဗဟုလီကတာ ဟာသပညံ ပရိပူရေန္တိ။
Rūpe aniccānupassanā bhāvitā bahulīkatā katamaṃ paññaṃ paripūreti…pe… rūpe paṭinissaggānupassanā bhāvitā bahulīkatā katamaṃ paññaṃ paripūreti? Rūpe aniccānupassanā bhāvitā bahulīkatā javanapaññaṃ paripūreti…pe… rūpe paṭinissaggānupassanā bhāvitā bahulīkatā asāmantapaññaṃ paripūreti. Imā satta paññā bhāvitā bahulīkatā paṇḍiccaṃ paripūrenti. Imā aṭṭha paññā bhāvitā bahulīkatā puthupaññaṃ paripūrenti. Imā nava paññā bhāvitā bahulīkatā hāsapaññaṃ paripūrenti.
ဟာသပညာ ပဋိဘာနပဋိသမ္ဘိဒာ။ တသ္သာ အတ္ထဝဝတ္ထာနတော အတ္ထပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ ဓမ္မဝဝတ္ထာနတော ဓမ္မပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ နိရုတ္တိဝဝတ္ထာနတော နိရုတ္တိပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ ပဋိဘာနဝဝတ္ထာနတော ပဋိဘာနပဋိသမ္ဘိဒာ အဓိဂတာ ဟောတိ, သစ္ဆိကတာ ဖသ္သိတာ ပညာယ။ တသ္သိမာ စတသ္သော ပဋိသမ္ဘိဒာယော အဓိဂတာ ဟောန္တိ သစ္ဆိကတာ ဖသ္သိတာ ပညာယ။
Hāsapaññā paṭibhānapaṭisambhidā. Tassā atthavavatthānato atthapaṭisambhidā adhigatā hoti sacchikatā phassitā paññāya. Dhammavavatthānato dhammapaṭisambhidā adhigatā hoti sacchikatā phassitā paññāya. Niruttivavatthānato niruttipaṭisambhidā adhigatā hoti sacchikatā phassitā paññāya. Paṭibhānavavatthānato paṭibhānapaṭisambhidā adhigatā hoti, sacchikatā phassitā paññāya. Tassimā catasso paṭisambhidāyo adhigatā honti sacchikatā phassitā paññāya.
ဝေဒနာယ။ပေ.။ သညာယ။ သင္ခာရေသု။ ဝိညာဏေ။ စက္ခုသ္မိံ။ပေ.။ ဇရာမရဏေ အနိစ္စာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ။ပေ.။ ဇရာမရဏေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ဇရာမရဏေ အနိစ္စာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ပေ.။ ဇရာမရဏေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ အသာမန္တပညံ ပရိပူရေတိ။ ဣမာ သတ္တ ပညာ ဘာဝိတာ ဗဟုလီကတာ ပဏ္ဍိစ္စံ ပရိပူရေန္တိ။ ဣမာ အဋ္ဌ ပညာ ဘာဝိတာ ဗဟုလီကတာ ပုထုပညံ ပရိပူရေန္တိ။ ဣမာ နဝ ပညာ ဘာဝိတာ ဗဟုလီကတာ ဟာသပညံ ပရိပူရေန္တိ။
Vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā bhāvitā bahulīkatā katamaṃ paññaṃ paripūreti…pe… jarāmaraṇe paṭinissaggānupassanā bhāvitā bahulīkatā katamaṃ paññaṃ paripūreti? Jarāmaraṇe aniccānupassanā bhāvitā bahulīkatā javanapaññaṃ paripūreti…pe… jarāmaraṇe paṭinissaggānupassanā bhāvitā bahulīkatā asāmantapaññaṃ paripūreti. Imā satta paññā bhāvitā bahulīkatā paṇḍiccaṃ paripūrenti. Imā aṭṭha paññā bhāvitā bahulīkatā puthupaññaṃ paripūrenti. Imā nava paññā bhāvitā bahulīkatā hāsapaññaṃ paripūrenti.
ဟာသပညာ ပဋိဘာနပဋိသမ္ဘိဒာ။ တသ္သာ အတ္ထဝဝတ္ထာနတော အတ္ထပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ ။ ဓမ္မဝဝတ္ထာနတော ဓမ္မပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ နိရုတ္တိဝဝတ္ထာနတော နိရုတ္တိပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ ပဋိဘာနဝဝတ္ထာနတော ပဋိဘာနပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ တသ္သိမာ စတသ္သော ပဋိသမ္ဘိဒာယော အဓိဂတာ ဟောန္တိ သစ္ဆိကတာ ဖသ္သိတာ ပညာယ။
Hāsapaññā paṭibhānapaṭisambhidā. Tassā atthavavatthānato atthapaṭisambhidā adhigatā hoti sacchikatā phassitā paññāya . Dhammavavatthānato dhammapaṭisambhidā adhigatā hoti sacchikatā phassitā paññāya. Niruttivavatthānato niruttipaṭisambhidā adhigatā hoti sacchikatā phassitā paññāya. Paṭibhānavavatthānato paṭibhānapaṭisambhidā adhigatā hoti sacchikatā phassitā paññāya. Tassimā catasso paṭisambhidāyo adhigatā honti sacchikatā phassitā paññāya.
၂. ရူပေ အနိစ္စာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အတီတာနာဂတပစ္စုပ္ပန္နေ ရူပေ အနိစ္စာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ရူပေ ဒုက္ခာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အတီတာနာဂတပစ္စုပ္ပန္နေ ရူပေ ဒုက္ခာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ရူပေ အနတ္တာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အတီတာနာဂတပစ္စုပ္ပန္နေ ရူပေ အနတ္တာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ရူပေ နိဗ္ဗိဒာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အတီတာနာဂတပစ္စုပ္ပန္နေ ရူပေ နိဗ္ဗိဒာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ရူပေ ဝိရာဂာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အတီတာနာဂတပစ္စုပ္ပန္နေ ရူပေ ဝိရာဂာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ရူပေ နိရောဓာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အတီတာနာဂတပစ္စုပ္ပန္နေ ရူပေ နိရောဓာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ရူပေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အတီတာနာဂတပစ္စုပ္ပန္နေ ရူပေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ?
2. Rūpe aniccānupassanā bhāvitā bahulīkatā katamaṃ paññaṃ paripūreti? Atītānāgatapaccuppanne rūpe aniccānupassanā bhāvitā bahulīkatā katamaṃ paññaṃ paripūreti? Rūpe dukkhānupassanā bhāvitā bahulīkatā katamaṃ paññaṃ paripūreti? Atītānāgatapaccuppanne rūpe dukkhānupassanā bhāvitā bahulīkatā katamaṃ paññaṃ paripūreti? Rūpe anattānupassanā bhāvitā bahulīkatā katamaṃ paññaṃ paripūreti? Atītānāgatapaccuppanne rūpe anattānupassanā bhāvitā bahulīkatā katamaṃ paññaṃ paripūreti? Rūpe nibbidānupassanā bhāvitā bahulīkatā katamaṃ paññaṃ paripūreti? Atītānāgatapaccuppanne rūpe nibbidānupassanā bhāvitā bahulīkatā katamaṃ paññaṃ paripūreti? Rūpe virāgānupassanā bhāvitā bahulīkatā katamaṃ paññaṃ paripūreti? Atītānāgatapaccuppanne rūpe virāgānupassanā bhāvitā bahulīkatā katamaṃ paññaṃ paripūreti? Rūpe nirodhānupassanā bhāvitā bahulīkatā katamaṃ paññaṃ paripūreti? Atītānāgatapaccuppanne rūpe nirodhānupassanā bhāvitā bahulīkatā katamaṃ paññaṃ paripūreti? Rūpe paṭinissaggānupassanā bhāvitā bahulīkatā katamaṃ paññaṃ paripūreti? Atītānāgatapaccuppanne rūpe paṭinissaggānupassanā bhāvitā bahulīkatā katamaṃ paññaṃ paripūreti?
ရူပေ အနိစ္စာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ အတီတာနာဂတပစ္စုပ္ပန္နေ ရူပေ အနိစ္စာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ ရူပေ ဒုက္ခာနုပသ္သနာ ဘာဝိတာ ဗဟုလီကတာ နိဗ္ဗေဓိကပညံ ပရိပူရေတိ။ အတီတာနာဂတပစ္စုပ္ပန္နေ ရူပေ ဒုက္ခာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ ရူပေ အနတ္တာနုပသ္သနာ ဘာဝိတာ ဗဟုလီကတာ မဟာပညံ ပရိပူရေတိ။ အတီတာနာဂတပစ္စုပ္ပန္နေ ရူပေ အနတ္တာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ ရူပေ နိဗ္ဗိဒာနုပသ္သနာ ဘာဝိတာ ဗဟုလီကတာ တိက္ခပညံ ပရိပူရေတိ။ အတီတာနာဂတပစ္စုပ္ပန္နေ ရူပေ နိဗ္ဗိဒာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ ရူပေ ဝိရာဂာနုပသ္သနာ ဘာဝိတာ ဗဟုလီကတာ ဝိပုလပညံ ပရိပူရေတိ။ အတီတာနာဂတပစ္စုပ္ပန္နေ ရူပေ ဝိရာဂာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ ရူပေ နိရောဓာနုပသ္သနာ ဘာဝိတာ ဗဟုလီကတာ ဂမ္ဘီရပညံ ပရိပူရေတိ။ အတီတာနာဂတပစ္စုပ္ပန္နေ ရူပေ နိရောဓာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ ရူပေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ အသာမန္တပညံ ပရိပူရေတိ။ အတီတာနာဂတပစ္စုပ္ပန္နေ ရူပေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ ဣမာ သတ္တ ပညာ ဘာဝိတာ ဗဟုလီကတာ ပဏ္ဍိစ္စံ ပရိပူရေန္တိ။ ဣမာ အဋ္ဌ ပညာ ဘာဝိတာ ဗဟုလီကတာ ပုထုပညံ ပရိပူရေန္တိ။ ဣမာ နဝ ပညာ ဘာဝိတာ ဗဟုလီကတာ ဟာသပညံ ပရိပူရေန္တိ။
Rūpe aniccānupassanā bhāvitā bahulīkatā javanapaññaṃ paripūreti. Atītānāgatapaccuppanne rūpe aniccānupassanā bhāvitā bahulīkatā javanapaññaṃ paripūreti. Rūpe dukkhānupassanā bhāvitā bahulīkatā nibbedhikapaññaṃ paripūreti. Atītānāgatapaccuppanne rūpe dukkhānupassanā bhāvitā bahulīkatā javanapaññaṃ paripūreti. Rūpe anattānupassanā bhāvitā bahulīkatā mahāpaññaṃ paripūreti. Atītānāgatapaccuppanne rūpe anattānupassanā bhāvitā bahulīkatā javanapaññaṃ paripūreti. Rūpe nibbidānupassanā bhāvitā bahulīkatā tikkhapaññaṃ paripūreti. Atītānāgatapaccuppanne rūpe nibbidānupassanā bhāvitā bahulīkatā javanapaññaṃ paripūreti. Rūpe virāgānupassanā bhāvitā bahulīkatā vipulapaññaṃ paripūreti. Atītānāgatapaccuppanne rūpe virāgānupassanā bhāvitā bahulīkatā javanapaññaṃ paripūreti. Rūpe nirodhānupassanā bhāvitā bahulīkatā gambhīrapaññaṃ paripūreti. Atītānāgatapaccuppanne rūpe nirodhānupassanā bhāvitā bahulīkatā javanapaññaṃ paripūreti. Rūpe paṭinissaggānupassanā bhāvitā bahulīkatā asāmantapaññaṃ paripūreti. Atītānāgatapaccuppanne rūpe paṭinissaggānupassanā bhāvitā bahulīkatā javanapaññaṃ paripūreti. Imā satta paññā bhāvitā bahulīkatā paṇḍiccaṃ paripūrenti. Imā aṭṭha paññā bhāvitā bahulīkatā puthupaññaṃ paripūrenti. Imā nava paññā bhāvitā bahulīkatā hāsapaññaṃ paripūrenti.
ဟာသပညာ ပဋိဘာနပဋိသမ္ဘိဒာ။ တသ္သာ အတ္ထဝဝတ္ထာနတော အတ္ထပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ ဓမ္မဝဝတ္ထာနတော ဓမ္မပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ နိရုတ္တိဝဝတ္ထာနတော နိရုတ္တိပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ ပဋိဘာနဝဝတ္ထာနတော ပဋိဘာနပဋိသမ္ဘိဒာ အဓိဂတာ ဟောတိ သစ္ဆိကတာ ဖသ္သိတာ ပညာယ။ တသ္သိမာ စတသ္သော ပဋိသမ္ဘိဒာယော အဓိဂတာ ဟောန္တိ သစ္ဆိကတာ ဖသ္သိတာ ပညာယ။
Hāsapaññā paṭibhānapaṭisambhidā. Tassā atthavavatthānato atthapaṭisambhidā adhigatā hoti sacchikatā phassitā paññāya. Dhammavavatthānato dhammapaṭisambhidā adhigatā hoti sacchikatā phassitā paññāya. Niruttivavatthānato niruttipaṭisambhidā adhigatā hoti sacchikatā phassitā paññāya. Paṭibhānavavatthānato paṭibhānapaṭisambhidā adhigatā hoti sacchikatā phassitā paññāya. Tassimā catasso paṭisambhidāyo adhigatā honti sacchikatā phassitā paññāya.
ဝေဒနာယ။ပေ.။ သညာယ။ သင္ခာရေသု။ ဝိညာဏေ။ စက္ခုသ္မိံ။ပေ.။ ဇရာမရဏေ အနိစ္စာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အတီတာနာဂတပစ္စုပ္ပန္နေ ဇရာမရဏေ အနိစ္စာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ။ပေ.။ ဇရာမရဏေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? အတီတာနာဂတပစ္စုပ္ပန္နေ ဇရာမရဏေ ပဋိနိသ္သဂ္ဂာနုပသ္သနာ ဘာဝိတာ ဗဟုလီကတာ ကတမံ ပညံ ပရိပူရေတိ? ဇရာမရဏေ အနိစ္စာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ အတီတာနာဂတပစ္စုပ္ပန္နေ ဇရာမရဏေ အနိစ္စာနုပသ္သနာ ဘာဝိတာ ဗဟုလီကတာ ဇဝနပညံ ပရိပူရေတိ။ပေ.။ တသ္သိမာ စတသ္သော ပဋိသမ္ဘိဒာယော အဓိဂတာ ဟောန္တိ သစ္ဆိကတာ ဖသ္သိတာ ပညာယ။
Vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā bhāvitā bahulīkatā katamaṃ paññaṃ paripūreti? Atītānāgatapaccuppanne jarāmaraṇe aniccānupassanā bhāvitā bahulīkatā katamaṃ paññaṃ paripūreti…pe… jarāmaraṇe paṭinissaggānupassanā bhāvitā bahulīkatā katamaṃ paññaṃ paripūreti? Atītānāgatapaccuppanne jarāmaraṇe paṭinissaggānupassanā bhāvitā bahulīkatā katamaṃ paññaṃ paripūreti? Jarāmaraṇe aniccānupassanā bhāvitā bahulīkatā javanapaññaṃ paripūreti. Atītānāgatapaccuppanne jarāmaraṇe aniccānupassanā bhāvitā bahulīkatā javanapaññaṃ paripūreti…pe… tassimā catasso paṭisambhidāyo adhigatā honti sacchikatā phassitā paññāya.
၃. ‘‘စတ္တာရောမေ , ဘိက္ခဝေ 3, ဓမ္မာ ဘာဝိတာ ဗဟုလီကတာ သောတာပတ္တိဖလသစ္ဆိကိရိယာယ သံဝတ္တန္တိ။ ကတမေ စတ္တာရော? သပ္ပုရိသသံသေဝော, သဒ္ဓမ္မသ္သဝနံ, ယောနိသောမနသိကာရော, ဓမ္မာနုဓမ္မပဋိပတ္တိ – ဣမေ ခော, ဘိက္ခဝေ, စတ္တာရော ဓမ္မာ ဘာဝိတာ ဗဟုလီကတာ သောတာပတ္တိဖလသစ္ဆိကိရိယာယ သံဝတ္တန္တိ။
3. ‘‘Cattārome , bhikkhave 4, dhammā bhāvitā bahulīkatā sotāpattiphalasacchikiriyāya saṃvattanti. Katame cattāro? Sappurisasaṃsevo, saddhammassavanaṃ, yonisomanasikāro, dhammānudhammapaṭipatti – ime kho, bhikkhave, cattāro dhammā bhāvitā bahulīkatā sotāpattiphalasacchikiriyāya saṃvattanti.
‘‘စတ္တာရောမေ, ဘိက္ခဝေ, ဓမ္မာ ဘာဝိတာ ဗဟုလီကတာ သကဒာဂာမိဖလသစ္ဆိကိရိယာယ သံဝတ္တန္တိ။ပေ.။ အနာဂာမိဖလသစ္ဆိကိရိယာယ သံဝတ္တန္တိ။ပေ.။ အရဟတ္တဖလသစ္ဆိကိရိယာယ သံဝတ္တန္တိ။ ကတမေ စတ္တာရော? သပ္ပုရိသသံသေဝော, သဒ္ဓမ္မသ္သဝနံ, ယောနိသောမနသိကာရော, ဓမ္မာနုဓမ္မပဋိပတ္တိ – ဣမေ ခော, ဘိက္ခဝေ, စတ္တာရော ဓမ္မာ ဘာဝိတာ ဗဟုလီကတာ အရဟတ္တမဂ္ဂဖလသစ္ဆိကိရိယာယ သံဝတ္တန္တိ။
‘‘Cattārome, bhikkhave, dhammā bhāvitā bahulīkatā sakadāgāmiphalasacchikiriyāya saṃvattanti…pe… anāgāmiphalasacchikiriyāya saṃvattanti…pe… arahattaphalasacchikiriyāya saṃvattanti. Katame cattāro? Sappurisasaṃsevo, saddhammassavanaṃ, yonisomanasikāro, dhammānudhammapaṭipatti – ime kho, bhikkhave, cattāro dhammā bhāvitā bahulīkatā arahattamaggaphalasacchikiriyāya saṃvattanti.
‘‘စတ္တာရောမေ , ဘိက္ခဝေ, ဓမ္မာ ဘာဝိတာ ဗဟုလီကတာ ပညာပဋိလာဘာယ သံဝတ္တန္တိ။ပေ.။ ပညာဗုဒ္ဓိယာ သံဝတ္တန္တိ, ပညာဝေပုလ္လာယ သံဝတ္တန္တိ, မဟာပညတာယ သံဝတ္တန္တိ, ပုထုပညတာယ သံဝတ္တန္တိ, ဝိပုလပညတာယ သံဝတ္တန္တိ, ဂမ္ဘီရပညတာယ သံဝတ္တန္တိ, အသာမန္တပညတာယ 5 သံဝတ္တန္တိ, ဘူရိပညတာယ သံဝတ္တန္တိ, ပညာဗာဟုလ္လာယ သံဝတ္တန္တိ, သီဃပညတာယ သံဝတ္တန္တိ, လဟုပညတာယ သံဝတ္တန္တိ, ဟာသပညတာယ သံဝတ္တန္တိ, ဇဝနပညတာယ သံဝတ္တန္တိ, တိက္ခပညတာယ သံဝတ္တန္တိ, နိဗ္ဗေဓိကပညတာယ သံဝတ္တန္တိ။ ကတမေ စတ္တာရော? သပ္ပုရိသသံသေဝော, သဒ္ဓမ္မသ္သဝနံ, ယောနိသောမနသိကာရော, ဓမ္မာနုဓမ္မပဋိပတ္တိ – ဣမေ ခော, ဘိက္ခဝေ, စတ္တာရော ဓမ္မာ ဘာဝိတာ ဗဟုလီကတာ ပညာပဋိလာဘာယ သံဝတ္တန္တိ, ပညာဗုဒ္ဓိယာ သံဝတ္တန္တိ။ပေ.။ နိဗ္ဗေဓိကပညတာယ သံဝတ္တန္တိ’’။
‘‘Cattārome , bhikkhave, dhammā bhāvitā bahulīkatā paññāpaṭilābhāya saṃvattanti…pe… paññābuddhiyā saṃvattanti, paññāvepullāya saṃvattanti, mahāpaññatāya saṃvattanti, puthupaññatāya saṃvattanti, vipulapaññatāya saṃvattanti, gambhīrapaññatāya saṃvattanti, asāmantapaññatāya 6 saṃvattanti, bhūripaññatāya saṃvattanti, paññābāhullāya saṃvattanti, sīghapaññatāya saṃvattanti, lahupaññatāya saṃvattanti, hāsapaññatāya saṃvattanti, javanapaññatāya saṃvattanti, tikkhapaññatāya saṃvattanti, nibbedhikapaññatāya saṃvattanti. Katame cattāro? Sappurisasaṃsevo, saddhammassavanaṃ, yonisomanasikāro, dhammānudhammapaṭipatti – ime kho, bhikkhave, cattāro dhammā bhāvitā bahulīkatā paññāpaṭilābhāya saṃvattanti, paññābuddhiyā saṃvattanti…pe… nibbedhikapaññatāya saṃvattanti’’.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / မဟာပညာကထာဝဏ္ဏနာ • Mahāpaññākathāvaṇṇanā
