Library / Tipiṭaka / තිපිටක • Tipiṭaka / ථෙරගාථාපාළි • Theragāthāpāḷi |
3. මහාපන්ථකත්ථෙරගාථා
3. Mahāpanthakattheragāthā
510.
510.
‘‘යදා පඨමමද්දක්ඛිං, සත්ථාරමකුතොභයං;
‘‘Yadā paṭhamamaddakkhiṃ, satthāramakutobhayaṃ;
තතො මෙ අහු සංවෙගො, පස්සිත්වා පුරිසුත්තමං.
Tato me ahu saṃvego, passitvā purisuttamaṃ.
511.
511.
‘‘සිරිං හත්ථෙහි පාදෙහි, යො පණාමෙය්ය ආගතං;
‘‘Siriṃ hatthehi pādehi, yo paṇāmeyya āgataṃ;
එතාදිසං සො සත්ථාරං, ආරාධෙත්වා විරාධයෙ.
Etādisaṃ so satthāraṃ, ārādhetvā virādhaye.
512.
512.
‘‘තදාහං පුත්තදාරඤ්ච, ධනධඤ්ඤඤ්ච ඡඩ්ඩයිං;
‘‘Tadāhaṃ puttadārañca, dhanadhaññañca chaḍḍayiṃ;
කෙසමස්සූනි ඡෙදෙත්වා, පබ්බජිං අනගාරියං.
Kesamassūni chedetvā, pabbajiṃ anagāriyaṃ.
513.
513.
‘‘සික්ඛාසාජීවසම්පන්නො, ඉන්ද්රියෙසු සුසංවුතො;
‘‘Sikkhāsājīvasampanno, indriyesu susaṃvuto;
නමස්සමානො සම්බුද්ධං, විහාසිං අපරාජිතො.
Namassamāno sambuddhaṃ, vihāsiṃ aparājito.
514.
514.
‘‘තතො මෙ පණිධී ආසි, චෙතසො අභිපත්ථිතො;
‘‘Tato me paṇidhī āsi, cetaso abhipatthito;
න නිසීදෙ මුහුත්තම්පි, තණ්හාසල්ලෙ අනූහතෙ.
Na nisīde muhuttampi, taṇhāsalle anūhate.
515.
515.
‘‘තස්ස මෙවං විහරතො, පස්ස වීරියපරක්කමං;
‘‘Tassa mevaṃ viharato, passa vīriyaparakkamaṃ;
තිස්සො විජ්ජා අනුප්පත්තා, කතං බුද්ධස්ස සාසනං.
Tisso vijjā anuppattā, kataṃ buddhassa sāsanaṃ.
516.
516.
‘‘පුබ්බෙනිවාසං ජානාමි, දිබ්බචක්ඛු විසොධිතං;
‘‘Pubbenivāsaṃ jānāmi, dibbacakkhu visodhitaṃ;
අරහා දක්ඛිණෙය්යොම්හි, විප්පමුත්තො නිරූපධි.
Arahā dakkhiṇeyyomhi, vippamutto nirūpadhi.
517.
517.
සබ්බං තණ්හං විසොසෙත්වා, පල්ලඞ්කෙන උපාවිසි’’න්ති.
Sabbaṃ taṇhaṃ visosetvā, pallaṅkena upāvisi’’nti.
… මහාපන්ථකො ථෙරො….
… Mahāpanthako thero….
අට්ඨකනිපාතො නිට්ඨිතො.
Aṭṭhakanipāto niṭṭhito.
තත්රුද්දානං –
Tatruddānaṃ –
මහාකච්චායනො ථෙරො, සිරිමිත්තො මහාපන්ථකො;
Mahākaccāyano thero, sirimitto mahāpanthako;
එතෙ අට්ඨනිපාතම්හි, ගාථායො චතුවීසතීති.
Ete aṭṭhanipātamhi, gāthāyo catuvīsatīti.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ථෙරගාථා-අට්ඨකථා • Theragāthā-aṭṭhakathā / 3. මහාපන්ථකත්ථෙරගාථාවණ්ණනා • 3. Mahāpanthakattheragāthāvaṇṇanā