| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. மஹாபரிளாஹஸுத்தங்
3. Mahāpariḷāhasuttaṃ
1113. ‘‘அத்தி², பி⁴க்க²வே, மஹாபரிளாஹோ நாம நிரயோ. தத்த² யங் கிஞ்சி சக்கு²னா ரூபங் பஸ்ஸதி, அனிட்ட²ரூபஞ்ஞேவ பஸ்ஸதி நோ இட்ட²ரூபங்; அகந்தரூபஞ்ஞேவ பஸ்ஸதி நோ கந்தரூபங்; அமனாபரூபஞ்ஞேவ பஸ்ஸதி நோ மனாபரூபங். யங் கிஞ்சி ஸோதேன ஸத்³த³ங் ஸுணாதி…பே॰… யங் கிஞ்சி காயேன பொ²ட்ட²ப்³ப³ங் பு²ஸதி…பே॰… யங் கிஞ்சி மனஸா த⁴ம்மங் விஜானாதி, அனிட்ட²ரூபஞ்ஞேவ விஜானாதி நோ இட்ட²ரூபங்; அகந்தரூபஞ்ஞேவ விஜானாதி நோ கந்தரூபங்; அமனாபரூபஞ்ஞேவ விஜானாதி நோ மனாபரூப’’ந்தி.
1113. ‘‘Atthi, bhikkhave, mahāpariḷāho nāma nirayo. Tattha yaṃ kiñci cakkhunā rūpaṃ passati, aniṭṭharūpaññeva passati no iṭṭharūpaṃ; akantarūpaññeva passati no kantarūpaṃ; amanāparūpaññeva passati no manāparūpaṃ. Yaṃ kiñci sotena saddaṃ suṇāti…pe… yaṃ kiñci kāyena phoṭṭhabbaṃ phusati…pe… yaṃ kiñci manasā dhammaṃ vijānāti, aniṭṭharūpaññeva vijānāti no iṭṭharūpaṃ; akantarūpaññeva vijānāti no kantarūpaṃ; amanāparūpaññeva vijānāti no manāparūpa’’nti.
ஏவங் வுத்தே அஞ்ஞதரோ பி⁴க்கு² ப⁴க³வந்தங் ஏதத³வோச – ‘‘மஹா வத ஸோ, ப⁴ந்தே, பரிளாஹோ, ஸுமஹா வத ஸோ, ப⁴ந்தே, பரிளாஹோ! அத்தி² நு கோ², ப⁴ந்தே, ஏதம்ஹா பரிளாஹா அஞ்ஞோ பரிளாஹோ மஹந்ததரோ சேவ ப⁴யானகதரோ சா’’தி? ‘‘அத்தி² கோ², பி⁴க்கு², ஏதம்ஹா பரிளாஹா அஞ்ஞோ பரிளாஹோ மஹந்ததரோ ச ப⁴யானகதரோ சா’’தி.
Evaṃ vutte aññataro bhikkhu bhagavantaṃ etadavoca – ‘‘mahā vata so, bhante, pariḷāho, sumahā vata so, bhante, pariḷāho! Atthi nu kho, bhante, etamhā pariḷāhā añño pariḷāho mahantataro ceva bhayānakataro cā’’ti? ‘‘Atthi kho, bhikkhu, etamhā pariḷāhā añño pariḷāho mahantataro ca bhayānakataro cā’’ti.
‘‘கதமோ பன, ப⁴ந்தே, ஏதம்ஹா பரிளாஹா அஞ்ஞோ பரிளாஹோ மஹந்ததரோ ச ப⁴யானகதரோ சா’’தி? ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா ‘இத³ங் து³க்க²’ந்தி யதா²பூ⁴தங் நப்பஜானந்தி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் நப்பஜானந்தி, தே ஜாதிஸங்வத்தனிகேஸு ஸங்கா²ரேஸு அபி⁴ரமந்தி…பே॰… அபி⁴ரதா…பே॰… அபி⁴ஸங்க²ரொந்தி…பே॰… அபி⁴ஸங்க²ரித்வா ஜாதிபரிளாஹேனபி பரிட³ய்ஹந்தி, ஜராபரிளாஹேனபி பரிட³ய்ஹந்தி, மரணபரிளாஹேனபி பரிட³ய்ஹந்தி, ஸோகபரிதே³வது³க்க²தோ³மனஸ்ஸுபாயாஸபரிளாஹேனபி பரிட³ய்ஹந்தி . தே ந பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ‘ந பரிமுச்சந்தி து³க்க²ஸ்மா’தி வதா³மி’’.
‘‘Katamo pana, bhante, etamhā pariḷāhā añño pariḷāho mahantataro ca bhayānakataro cā’’ti? ‘‘Ye hi keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ nappajānanti…pe… ‘ayaṃ dukkhanirodhagāminī paṭipadā’ti yathābhūtaṃ nappajānanti, te jātisaṃvattanikesu saṅkhāresu abhiramanti…pe… abhiratā…pe… abhisaṅkharonti…pe… abhisaṅkharitvā jātipariḷāhenapi pariḍayhanti, jarāpariḷāhenapi pariḍayhanti, maraṇapariḷāhenapi pariḍayhanti, sokaparidevadukkhadomanassupāyāsapariḷāhenapi pariḍayhanti . Te na parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Na parimuccanti dukkhasmā’ti vadāmi’’.
‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா ‘இத³ங் து³க்க²’ந்தி யதா²பூ⁴தங் பஜானந்தி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானந்தி. தே ஜாதிஸங்வத்தனிகேஸு ஸங்கா²ரேஸு நாபி⁴ரமந்தி…பே॰… அனபி⁴ரதா…பே॰… நாபி⁴ஸங்க²ரொந்தி…பே॰… அனபி⁴ஸங்க²ரித்வா ஜாதிபரிளாஹேனபி ந பரிட³ய்ஹந்தி, ஜராபரிளாஹேனபி ந பரிட³ய்ஹந்தி, மரணபரிளாஹேனபி ந பரிட³ய்ஹந்தி, ஸோகபரிதே³வது³க்க²தோ³மனஸ்ஸுபாயாஸபரிளாஹேனபி ந பரிட³ய்ஹந்தி. தே பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ‘பரிமுச்சந்தி து³க்க²ஸ்மா’தி வதா³மி’’.
‘‘Ye ca kho keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ pajānanti…pe… ‘ayaṃ dukkhanirodhagāminī paṭipadā’ti yathābhūtaṃ pajānanti. Te jātisaṃvattanikesu saṅkhāresu nābhiramanti…pe… anabhiratā…pe… nābhisaṅkharonti…pe… anabhisaṅkharitvā jātipariḷāhenapi na pariḍayhanti, jarāpariḷāhenapi na pariḍayhanti, maraṇapariḷāhenapi na pariḍayhanti, sokaparidevadukkhadomanassupāyāsapariḷāhenapi na pariḍayhanti. Te parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Parimuccanti dukkhasmā’ti vadāmi’’.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. ததியங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-3. பபாதஸுத்தாதி³வண்ணனா • 2-3. Papātasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2-3. பபாதஸுத்தாதி³வண்ணனா • 2-3. Papātasuttādivaṇṇanā
