Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ (ཊཱིཀཱ) • Dīghanikāya (ṭīkā)

    ༣. མཧཱཔརིནིབྦཱནསུཏྟཝཎྞནཱ

    3. Mahāparinibbānasuttavaṇṇanā

    ༡༣༡. པཱུཛནཱིཡབྷཱཝཏོ , བུདྡྷསམྤདཉྩ པཧཱཡ པཝཏྟཏཱ མཧནྟཉྩ ཏཾ པརིནིབྦཱནཉྩཱཏི མཧཱཔརིནིབྦཱནཾ; སཝཱསནཔྤཧཱནཏོ མཧནྟཾ ཀིལེསཀྑཡཾ ནིསྶཱཡ པཝཏྟཾ པརིནིབྦཱནནྟིཔི མཧཱཔརིནིབྦཱནཾ; མཧཏཱ ཀཱལེན མཧཏཱ ཝཱ གུཎརཱསིནཱ སཱདྷིཏཾ པརིནིབྦཱནནྟིཔི མཧཱཔརིནིབྦཱནཾ; མཧནྟབྷཱཝཱཡ, དྷཱཏཱུནཾ བཧུབྷཱཝཱཡ པརིནིབྦཱནནྟིཔི མཧཱཔརིནིབྦཱནཾ; མཧཏོ ལོཀཏོ ནིསྶཊཾ པརིནིབྦཱནནྟིཔི མཧཱཔརིནིབྦཱནཾ; སབྦལོཀཱསཱདྷཱརཎཏྟཱ བུདྡྷཱནཾ སཱིལཱདིགུཎེཧི མཧཏོ བུདྡྷསྶ བྷགཝཏོ པརིནིབྦཱནནྟིཔི མཧཱཔརིནིབྦཱནཾ; མཧཏི སཱསནེ པཏིཊྛིཏེ པརིནིབྦཱནནྟིཔི མཧཱཔརིནིབྦཱནནྟི བུདྡྷསྶ བྷགཝཏོ པརིནིབྦཱནཾ ཝུཙྩཏི, ཏཔྤཊིསཾཡུཏྟཾ སུཏྟཾ མཧཱཔརིནིབྦཱནསུཏྟཾ། གིཛ྄ཛྷཱ ཨེཏྠ ཝསནྟཱིཏི གིཛ྄ཛྷཾ, གིཛ྄ཛྷཾ ཀཱུཊཾ ཨེཏསྶཱཏི གིཛ྄ཛྷཀཱུཊོ, གིཛ྄ཛྷཾ ཝིཡ ཝཱ གིཛ྄ཛྷཾ, ཀཱུཊཾ, ཏཾ ཨེཏསྶཱཏི གིཛ྄ཛྷཀཱུཊོ, པབྦཏོ, ཏསྨིཾ གིཛ྄ཛྷཀཱུཊེ། ཏེནཱཧ ‘‘གིཛ྄ཛྷཱ’’ཏིཨཱདི། ཨབྷིཡཱཏུཀཱམོཏི ཨེཏྠ ཨབྷི-སདྡོ ཨབྷིབྷཝནཏྠོ, ‘‘ཨབྷིཝིཛཱནཱཏཱུ’’ཏིཨཱདཱིསུ (དཱི॰ ནི॰ ༢.༢༤༤; ༣.༨༥; མ॰ ནི॰ ༣.༢༥༦) ཝིཡཱཏི ཨཱཧ ‘‘ཨབྷིབྷཝནཏྠཱཡ ཡཱཏུཀཱམོ’’ཏི། ཝཛྫིརཱཛཱནོཏི ‘‘ཝཛྫེཏབྦཱ ཨིམེ’’ཏིཨཱདིཏོ པཝཏྟཾ ཝཙནཾ ཨུཔཱདཱཡ ‘‘ཝཛྫཱི’’ཏི ལདྡྷནཱམཱ རཱཛཱནོ, ཝཛྫཱིརཊྛསྶ ཝཱ རཱཛཱནོ ཝཛྫིརཱཛཱནོ། ཝཛྫིརཊྛསྶ པན ཝཛྫིསམཉྙཱ ཏནྣིཝཱསིརཱཛཀུམཱརཝསེན ཝེདིཏབྦཱ། རཱཛིདྡྷིཡཱཏི རཱཛབྷཱཝཱནུགཏེན སབྷཱཝེན། སོ པན སབྷཱཝོ ནེསཾ གཎརཱཛཱུནཾ མིཐོ སཱམགྒིཡཱ ལོཀེ པཱཀཊོ, ཙིརཊྛཱཡཱི ཙ ཨཧོསཱིཏི ‘‘སམགྒབྷཱཝཾ ཀཐེསཱི’’ཏི ཝུཏྟཾ། ཨནུ ཨནུ ཏཾསམངྒིནོ བྷཱཝེཏི ཝཌྜྷེཏཱིཏི ཨནུབྷཱཝོ, ཨནུབྷཱཝོ ཨེཝ ཨཱནུབྷཱཝོ, པཏཱཔོ, སོ པན ནེསཾ པཏཱཔོ ཧཏྠིཨསྶཱདིཝཱཧནསམྤཏྟིཡཱ, ཏཏྠ ཙ སུསིཀྑིཏབྷཱཝེན ལོཀེ པཱཀཊོ ཛཱཏོཏི ‘‘ཨེཏེན…པེ॰… ཀཐེསཱི’’ཏི ཝུཏྟཾ། ཏཱལ༹ཙྪིགྒལེནཱཏི ཀུཉྩིཀཱཚིདྡེན། ཨསནནྟི སརཾ། ཨཏིཔཱཏཡིསྶནྟཱིཏི ཨཏིཀྐཱམེནྟི། པོངྑཱནུཔོངྑནྟི པོངྑསྶ ཨནུཔོངྑཾ, པུརིམསརསྶ པོངྑཔདཱནུགཏཔོངྑཾ ཨིཏརཾ སརཾ ཀཏྭཱཏི ཨཏྠོ། ཨཝིརཱདྷིཏནྟི ཨཝིརཛ྄ཛྷིཏཾ། ཨུཙྪིནྡིསྶཱམཱིཏི ཨུམྨཱུལནཝསེན ཀུལསནྟཏིཾ ཚིནྡིསྶཱམི། ཨཡནཾ ཝཌྜྷནཾ ཨཡོ, ཏཔྤཊིཀྑེཔེན ཨནཡོཏི ཨཱཧ ‘‘ཨཝཌྜྷིཡཱ ཨེཏཾ ནཱམ’’ནྟི། ཝིཀྑིཔཏཱིཏི ཝིདཱུརཏོ ཁིཔཏི, ཨཔནེཏཱིཏི ཨཏྠོ།

    131. Pūjanīyabhāvato , buddhasampadañca pahāya pavattatā mahantañca taṃ parinibbānañcāti mahāparinibbānaṃ; savāsanappahānato mahantaṃ kilesakkhayaṃ nissāya pavattaṃ parinibbānantipi mahāparinibbānaṃ; mahatā kālena mahatā vā guṇarāsinā sādhitaṃ parinibbānantipi mahāparinibbānaṃ; mahantabhāvāya, dhātūnaṃ bahubhāvāya parinibbānantipi mahāparinibbānaṃ; mahato lokato nissaṭaṃ parinibbānantipi mahāparinibbānaṃ; sabbalokāsādhāraṇattā buddhānaṃ sīlādiguṇehi mahato buddhassa bhagavato parinibbānantipi mahāparinibbānaṃ; mahati sāsane patiṭṭhite parinibbānantipi mahāparinibbānanti buddhassa bhagavato parinibbānaṃ vuccati, tappaṭisaṃyuttaṃ suttaṃ mahāparinibbānasuttaṃ. Gijjhā ettha vasantīti gijjhaṃ, gijjhaṃ kūṭaṃ etassāti gijjhakūṭo, gijjhaṃ viya vā gijjhaṃ, kūṭaṃ, taṃ etassāti gijjhakūṭo, pabbato, tasmiṃ gijjhakūṭe. Tenāha ‘‘gijjhā’’tiādi. Abhiyātukāmoti ettha abhi-saddo abhibhavanattho, ‘‘abhivijānātū’’tiādīsu (dī. ni. 2.244; 3.85; ma. ni. 3.256) viyāti āha ‘‘abhibhavanatthāya yātukāmo’’ti. Vajjirājānoti ‘‘vajjetabbā ime’’tiādito pavattaṃ vacanaṃ upādāya ‘‘vajjī’’ti laddhanāmā rājāno, vajjīraṭṭhassa vā rājāno vajjirājāno. Vajjiraṭṭhassa pana vajjisamaññā tannivāsirājakumāravasena veditabbā. Rājiddhiyāti rājabhāvānugatena sabhāvena. So pana sabhāvo nesaṃ gaṇarājūnaṃ mitho sāmaggiyā loke pākaṭo, ciraṭṭhāyī ca ahosīti ‘‘samaggabhāvaṃ kathesī’’ti vuttaṃ. Anu anu taṃsamaṅgino bhāveti vaḍḍhetīti anubhāvo, anubhāvo eva ānubhāvo, patāpo, so pana nesaṃ patāpo hatthiassādivāhanasampattiyā, tattha ca susikkhitabhāvena loke pākaṭo jātoti ‘‘etena…pe… kathesī’’ti vuttaṃ. Tāḷacchiggalenāti kuñcikāchiddena. Asananti saraṃ. Atipātayissantīti atikkāmenti. Poṅkhānupoṅkhanti poṅkhassa anupoṅkhaṃ, purimasarassa poṅkhapadānugatapoṅkhaṃ itaraṃ saraṃ katvāti attho. Avirādhitanti avirajjhitaṃ. Ucchindissāmīti ummūlanavasena kulasantatiṃ chindissāmi. Ayanaṃ vaḍḍhanaṃ ayo, tappaṭikkhepena anayoti āha ‘‘avaḍḍhiyā etaṃ nāma’’nti. Vikkhipatīti vidūrato khipati, apanetīti attho.

    གངྒཱཡནྟི གངྒཱསམཱིཔེ། པཊྚནགཱམནྟི སཀཊཔཊྚནགཱམཾ། ཨཱཎཱཏི ཨཱཎཱ ཝཏྟཏི། ཨཌྜྷཡོཛནནྟི ཙ ཏསྨིཾ པཊྚནེ ཨཌྜྷཡོཛནཊྛཱནཝཱསིནོ སནྡྷཱཡ ཝུཏྟཾ། ཏཏྲཱཏི ཏསྨིཾ པཊྚནེ། བལཝཱགྷཱཏཛཱཏོཏི ཨུཔྤནྣབལཝཀོདྷོ།

    Gaṅgāyanti gaṅgāsamīpe. Paṭṭanagāmanti sakaṭapaṭṭanagāmaṃ. Āṇāti āṇā vattati. Aḍḍhayojananti ca tasmiṃ paṭṭane aḍḍhayojanaṭṭhānavāsino sandhāya vuttaṃ. Tatrāti tasmiṃ paṭṭane. Balavāghātajātoti uppannabalavakodho.

    མེཏི མཡ྄ཧཾ། གཏེནཱཏི གམནེན།

    Meti mayhaṃ. Gatenāti gamanena.

    རཱཛཨཔརིཧཱནིཡདྷམྨཝཎྞནཱ

    Rājaaparihāniyadhammavaṇṇanā

    ༡༣༤. སཱིཏཾ ཝཱ ཨུཎྷཾ ཝཱ ནཏྠི, ཏཱཡཾ ཝེལཱཡཾ པུཉྙཱནུབྷཱཝེན བུདྡྷཱནཾ སབྦཀཱལཾ སམསཱིཏུཎྷཱཝ ཨུཏུ ཧོཏི, ཏཾ སནྡྷཱཡ ཏཐཱ ཝུཏྟཾ། ཨབྷིཎྷཾ སནྣིཔཱཏཱཏི ནིཙྩསནྣིཔཱཏཱ, ཏཾ པན ནིཙྩསནྣིཔཱཏཏཾ དསྶེཏུཾ ‘‘དིཝསསྶཱ’’ཏིཨཱདི ཝུཏྟཾ། སནྣིཔཱཏབཧུལཱཏི པཙུརསནྣིཔཱཏཱ། ཝོསཱནནྟི སངྐོཙཾ། ‘‘ཡཱཝཀཱིཝ’’ནྟི ཨེཀམེཝེཏཾ པདཾ ཨནིཡམཏོ པརིམཱཎཝཱཙཱི, ཀཱལོ ཙེཏྠ ཨདྷིཔྤེཏོཏི ཨཱཧ ‘‘ཡཏྟཀཾ ཀཱལ’’ནྟི། ‘‘ཝུདྡྷིཡེཝཱ’’ཏིཨཱདིནཱ ཝུཏྟམཏྠཾ བྱཏིརེཀམུཁེན དསྶེཏུཾ ‘‘ཨབྷིཎྷཾ ཨསནྣིཔཏནྟཱ ཧཱི’’ཏིཨཱདི ཝུཏྟཾ། ཨཱཀུལཱཏི ཁུབྷིཏཱ, ན པསནྣཱ། བྷིཛྫིཏྭཱཏི ཝགྒབནྡྷཏོ ཝིབྷཛྫ ཝིསུཾ ཝིསུཾ ཧུཏྭཱ།

    134.Sītaṃ vā uṇhaṃ vā natthi, tāyaṃ velāyaṃ puññānubhāvena buddhānaṃ sabbakālaṃ samasītuṇhāva utu hoti, taṃ sandhāya tathā vuttaṃ. Abhiṇhaṃ sannipātāti niccasannipātā, taṃ pana niccasannipātataṃ dassetuṃ ‘‘divasassā’’tiādi vuttaṃ. Sannipātabahulāti pacurasannipātā. Vosānanti saṅkocaṃ. ‘‘Yāvakīva’’nti ekamevetaṃ padaṃ aniyamato parimāṇavācī, kālo cettha adhippetoti āha ‘‘yattakaṃ kāla’’nti. ‘‘Vuddhiyevā’’tiādinā vuttamatthaṃ byatirekamukhena dassetuṃ ‘‘abhiṇhaṃ asannipatantā hī’’tiādi vuttaṃ. Ākulāti khubhitā, na pasannā. Bhijjitvāti vaggabandhato vibhajja visuṃ visuṃ hutvā.

    སནྣིཔཱཏབྷེརིཡཱཏི སནྣིཔཱཏཱརོཙནབྷེརིཡཱ། ཨཌྜྷབྷུཏྟཱ ཝཱཏི སཱམིབྷུཏྟཱ ཙ། ཨོསཱིདམཱནེཏི ཧཱཡམཱནེ།

    Sannipātabheriyāti sannipātārocanabheriyā. Aḍḍhabhuttā vāti sāmibhuttā ca. Osīdamāneti hāyamāne.

    པུབྦེ ཨཀཏནྟི པུབྦེ ཨནིབྦཏྟཾ། སུངྐནྟི བྷཎྜཾ གཧེཏྭཱ གཙྪནྟེཧི པབྦཏཁཎྜ ནདཱིཏིཏྠགཱམདྭཱརཱདཱིསུ རཱཛཔུརིསཱནཾ དཱཏབྦབྷཱགཾ། བལིནྟི ནིཔྥནྣསསྶཱདིཏོ ཚབྷཱགཾ, སཏྟབྷཱགནྟིཨཱདིནཱ ལདྡྷཀརཾ། དཎྜནྟི དསཝཱིསཏིཀཧཱཔཎཱདིཀཾ ཨཔརཱདྷཱནུརཱུཔཾ གཧེཏབྦདྷནདཎྜཾ། ཝཛྫིདྷམྨནྟི ཝཛྫིརཱཛདྷམྨཾ། ཨིདཱནི ཨཔཉྙཏྟཔཉྙཱཔནཱདཱིསུ ཏཔྤཊིཀྑེཔ ཨཱདཱིནཝཱནིསཾསེ ཝིཏྠཱརཏོ དསྶེཏུཾ ‘‘ཏེསཾ ཨཔཉྙཏྟ’’ནྟིཨཱདི ཝུཏྟཾ། པཱརིཙརིཡཀྑམཱཏི ཨུཔཊྛཱནཀྑམཱ།

    Pubbe akatanti pubbe anibbattaṃ. Suṅkanti bhaṇḍaṃ gahetvā gacchantehi pabbatakhaṇḍa nadītitthagāmadvārādīsu rājapurisānaṃ dātabbabhāgaṃ. Balinti nipphannasassādito chabhāgaṃ, sattabhāgantiādinā laddhakaraṃ. Daṇḍanti dasavīsatikahāpaṇādikaṃ aparādhānurūpaṃ gahetabbadhanadaṇḍaṃ. Vajjidhammanti vajjirājadhammaṃ. Idāni apaññattapaññāpanādīsu tappaṭikkhepa ādīnavānisaṃse vitthārato dassetuṃ ‘‘tesaṃ apaññatta’’ntiādi vuttaṃ. Pāricariyakkhamāti upaṭṭhānakkhamā.

    ཀུལབྷོགཨིསྶརིཡཱདིཝསེན མཧཏཱི མཏྟཱ པམཱཎཾ ཨེཏེསནྟི མཧཱམཏྟཱ, ནཱིཏིསཏྠཝིཧིཏེ ཝིནིཙྪཡེ ཋཔིཏཱ མཧཱམཏྟཱ ཝིནིཙྪཡམཧཱམཏྟཱ, ཏེསཾ། དེནྟཱིཏི ནིཡྻཱཏེནྟི། སཙེ ཙོརོཏི ཨེཝཾསཉྙིནོ སཙེ ཧོནྟི། པཱཔབྷཱིརུཏཱཡ ཨཏྟནཱ ཀིཉྩི ཨཝཏྭཱ། དཎྜནཱིཏིསཉྙིཏེ ཝོཧཱརེ ནིཡུཏྟཱཏི ཝོཧཱརིཀཱ, ཡེ ‘‘དྷམྨཊྛཱ’’ཏི ཝུཙྩནྟི། སུཏྟདྷརཱ ནཱིཏིསུཏྟདྷརཱ , ཨཱིདིསེ ཝོཧཱརཝིནིཙྪཡེ ནིཡམེཏྭཱ ཋཔིཏཱ། པརམྤརཱབྷཏེསུ ཨཊྛསུ ཀུལེསུ ཛཱཏཱ ཨགཏིགམནཝིརཏཱ ཨཊྛམཧལླཀཔུརིསཱ ཨཊྛཀུལིཀཱ།

    Kulabhogaissariyādivasena mahatī mattā pamāṇaṃ etesanti mahāmattā, nītisatthavihite vinicchaye ṭhapitā mahāmattā vinicchayamahāmattā, tesaṃ. Dentīti niyyātenti. Sace coroti evaṃsaññino sace honti. Pāpabhīrutāya attanā kiñci avatvā. Daṇḍanītisaññite vohāre niyuttāti vohārikā, ye ‘‘dhammaṭṭhā’’ti vuccanti. Suttadharā nītisuttadharā , īdise vohāravinicchaye niyametvā ṭhapitā. Paramparābhatesu aṭṭhasu kulesu jātā agatigamanaviratā aṭṭhamahallakapurisā aṭṭhakulikā.

    སཀྐཱརནྟི ཨུཔཀཱརཾ། གརུབྷཱཝཾ པཙྩུཔཊྛཔེཏྭཱཏི ‘‘ཨིམེ ཨམྷཱཀཾ གརུནོ’’ཏི ཏཏྠ གརུབྷཱཝཾ པཏི པཏི ཨུཔཊྛཔེཏྭཱ། མཱནེནྟཱིཏི སམྨཱནེནྟི, ཏཾ པན སམྨཱནནཾ ཏེསུ ནེསཾ ཨཏྟམནཏཱཔུབྦཀནྟི ཨཱཧ ‘‘མནེན པིཡཱཡནྟཱི’’ཏི། ནིཔཙྩཀཱརནྟི པཎིཔཱཏཾ། དསྶེནྟཱིཏི ‘‘ཨིམེ ཨམྷཱཀཾ པིཏཱམཧཱ , མཱཏཱམཧཱ’’ཏིཨཱདིནཱ ནཱིཙཙིཏྟཱ ཧུཏྭཱ གརུཙིཏྟཱཀཱརཾ དསྶེནྟི། སནྡྷཱརེཏུནྟི སམྦནྡྷཾ ཨཝིཙྪིནྣཾ ཀཏྭཱ གྷཊེཏུཾ།

    Sakkāranti upakāraṃ. Garubhāvaṃ paccupaṭṭhapetvāti ‘‘ime amhākaṃ garuno’’ti tattha garubhāvaṃ pati pati upaṭṭhapetvā. Mānentīti sammānenti, taṃ pana sammānanaṃ tesu nesaṃ attamanatāpubbakanti āha ‘‘manena piyāyantī’’ti. Nipaccakāranti paṇipātaṃ. Dassentīti ‘‘ime amhākaṃ pitāmahā , mātāmahā’’tiādinā nīcacittā hutvā garucittākāraṃ dassenti. Sandhāretunti sambandhaṃ avicchinnaṃ katvā ghaṭetuṃ.

    པསཡ྄ཧཱཀཱརསྶཱཏི བལཀྐཱརསྶ། ཀཱམཾ ཝུདྡྷིཡཱ པཱུཛནཱིཡཏཱཡ ‘‘ཝུདྡྷིཧཱནིཡོ’’ཏི ཝུཏྟཾ, ཨཏྠོ པན ཝུཏྟཱནུཀྐམེནེཝ ཡོཛེཏབྦོ, པཱལི༹ཡཾ ཝཱ ཡསྨཱ ‘‘ཝུདྡྷིཡེཝ པཱཊིཀངྑཱ, ནོ པརིཧཱནཱི’’ཏི ཝུཏྟཾ, ཏསྨཱ ཏདནུཀྐམེན ‘‘ཝུདྡྷིཧཱནིཡོ’’ཏི ཝུཏྟཾ།

    Pasayhākārassāti balakkārassa. Kāmaṃ vuddhiyā pūjanīyatāya ‘‘vuddhihāniyo’’ti vuttaṃ, attho pana vuttānukkameneva yojetabbo, pāḷiyaṃ vā yasmā ‘‘vuddhiyeva pāṭikaṅkhā, no parihānī’’ti vuttaṃ, tasmā tadanukkamena ‘‘vuddhihāniyo’’ti vuttaṃ.

    ཝིཔཙྩིཏུཾ ཨལདྡྷོཀཱསེ པཱཔཀམྨེ, ཏསྶ ཀམྨསྶ ཝིཔཱཀེ ཝཱ ཨནཝསརོཝ དེཝཏོཔསགྒོ, ཏསྨིཾ པན ལདྡྷོཀཱསེ སིཡཱ དེཝཏོཔསགྒསྶ ཨཝསརོཏི ཨཱཧ ‘‘ཨནུཔྤནྣཾ…པེ॰… ཝཌྜྷེནྟཱི’’ཏི། ཨེཏེནེཝ ཨནུཔྤནྣཾ སུཁནྟི ཨེཏྠཱཔི ཨཏྠོ ཝེདིཏབྦོ། ‘‘བལཀཱཡསྶ དིགུཎཏིགུཎཏཱདསྶནཾ, པཊིབྷཡབྷཱཝདསྶན’’ནྟི ཨེཝཾ ཨཱདིནཱ དེཝཏཱནཾ སངྒཱམསཱིསེ སཧཱཡཏཱ ཝེདིཏབྦཱ།

    Vipaccituṃ aladdhokāse pāpakamme, tassa kammassa vipāke vā anavasarova devatopasaggo, tasmiṃ pana laddhokāse siyā devatopasaggassa avasaroti āha ‘‘anuppannaṃ…pe… vaḍḍhentī’’ti. Eteneva anuppannaṃ sukhanti etthāpi attho veditabbo. ‘‘Balakāyassa diguṇatiguṇatādassanaṃ, paṭibhayabhāvadassana’’nti evaṃ ādinā devatānaṃ saṅgāmasīse sahāyatā veditabbā.

    ཨནིཙྪིཏནྟི ཨནིཊྛཾ། ཨཱཝརཎཏོཏི ནིསེདྷནཏོ། ཡསྶ དྷམྨཏོ ཨནཔེཏཱ དྷམྨིཡཱཏི ཨིདྷ ‘‘དྷམྨིཀཱ’’ཏི ཝུཏྟཱ། མིགསཱུཀརཱདིགྷཱཏཱཡ སུནཁཱདཱིནཾ ཀཌྜྷིཏྭཱ ཝནཙརཎཾ ཝཱཛོ, མིགཝཱ, ཏཏྠ ནིཡུཏྟཱ, ཏེ ཝཱ ཝཱཛེནྟི ནེནྟཱིཏི ཝཱཛིཀཱ, མིགཝདྷཙཱརིནོ། ཙིཏྟཔྤཝཏྟིཾ པུཙྪཏི། ཀཱཡིཀཝཱཙསིཀཔཡོགེན ཧི སཱ ལོཀེ པཱཀཊཱ པཀཱསབྷཱུཏཱཏི།

    Anicchitanti aniṭṭhaṃ. Āvaraṇatoti nisedhanato. Yassa dhammato anapetā dhammiyāti idha ‘‘dhammikā’’ti vuttā. Migasūkarādighātāya sunakhādīnaṃ kaḍḍhitvā vanacaraṇaṃ vājo, migavā, tattha niyuttā, te vā vājenti nentīti vājikā, migavadhacārino. Cittappavattiṃ pucchati. Kāyikavācasikapayogena hi sā loke pākaṭā pakāsabhūtāti.

    ༡༣༥. དེཝཱཡཏནབྷཱཝེན ཙིཏཏྟཱ, ལོཀསྶ ཙིཏྟཱིཀཱརཊྛཱནཏྟཱ ཙ ཙེཏིཡཾ ཨཧོསི།

    135. Devāyatanabhāvena citattā, lokassa cittīkāraṭṭhānattā ca cetiyaṃ ahosi.

    ཀཱམཾཀཱརཝསེན ཀིཉྩིཔི ན ཀརཎཱིཡཱཏི ཨཀརཎཱིཡཱ། ཀཱམཾཀཱརོ པན ཧཏྠགཏཀརཎཝསེནཱཏི ཨཱཧ ‘‘ཨགྒཧེཏབྦཱཏི ཨཏྠོ’’ཏི། ཨབྷིམུཁཡུདྡྷེནཱཏི ཨབྷིམུཁཾ ཨུཛུཀམེཝ སངྒཱམཀརཎེན། ཨུཔལཱཔནཾ སཱམཾ དཱནཉྩཱཏི དསྶེཏུཾ ‘‘ཨལ’’ནྟིཨཱདི ཝུཏྟཾ། བྷེདོཔི ཨིདྷ ཨུཔཱཡོ ཨེཝཱཏི ཝུཏྟཾ ‘‘ཨཉྙཏྲ མིཐུབྷེདཱཡཱ’’ཏི། ཡུདྡྷསྶ པན ཨནུཔཱཡཏཱ པགེཝ པཀཱསིཏཱ། ཨིདནྟི ‘‘ཨཉྙཏྲ ཨུཔལཱཔནཱཡ, ཨཉྙཏྲ མིཐུབྷེདཱ’’ཏི ཙ ཨིདཾ ཝཙནཾ། ཀཐཱཡ ནཡཾ ལབྷིཏྭཱཏི ‘‘ཡཱཝཀཱིཝཉྩ…པེ॰… ནོ པརིཧཱནཱི’’ཏི ཨིམཱཡ བྷགཝཏོ ཀཐཱཡ ནཡཾ ཨུཔཱཡཾ ལབྷིཏྭཱ།

    Kāmaṃkāravasena kiñcipi na karaṇīyāti akaraṇīyā. Kāmaṃkāro pana hatthagatakaraṇavasenāti āha ‘‘aggahetabbāti attho’’ti. Abhimukhayuddhenāti abhimukhaṃ ujukameva saṅgāmakaraṇena. Upalāpanaṃ sāmaṃ dānañcāti dassetuṃ ‘‘ala’’ntiādi vuttaṃ. Bhedopi idha upāyo evāti vuttaṃ ‘‘aññatra mithubhedāyā’’ti. Yuddhassa pana anupāyatā pageva pakāsitā. Idanti ‘‘aññatra upalāpanāya, aññatra mithubhedā’’ti ca idaṃ vacanaṃ. Kathāya nayaṃ labhitvāti ‘‘yāvakīvañca…pe… no parihānī’’ti imāya bhagavato kathāya nayaṃ upāyaṃ labhitvā.

    ཨནུཀམྤཱཡཱཏི ཝཛྫིརཱཛེསུ ཨནུགྒཧེན། ཨསྶཱཏི བྷགཝཏོ།

    Anukampāyāti vajjirājesu anuggahena. Assāti bhagavato.

    ཀཐནྟི ཝཛྫཱིཧི སདྡྷིཾ ཀཱཏབྦཡུདྡྷཀཐཾ། ཨུཛུཾ ཀརིསྶཱམཱིཏི པཊིརཱཛཱནོ ཨཱནེཏྭཱ པཱཀཱརཔརིཁཱནཾ ཨཉྙཐཱབྷཱཝཱཔཱདནེན ཨུཛུབྷཱཝཾ ཀརིསྶཱམི།

    Kathanti vajjīhi saddhiṃ kātabbayuddhakathaṃ. Ujuṃ karissāmīti paṭirājāno ānetvā pākāraparikhānaṃ aññathābhāvāpādanena ujubhāvaṃ karissāmi.

    པཏིཊྛིཏགུཎོཏི པཏིཊྛིཏཱཙརིཡགུཎོ། ཨིསྶརཱ སནྣིཔཏནྟུ, མཡཾ ཨནིསྶརཱ, ཏཏྠ གནྟྭཱ ཀིཾ ཀརིསྶཱམཱཏི ལིཙྪཝིནོ ན སནྣིཔཏིཾསཱུཏི ཡོཛནཱ། སཱུརཱ སནྣིཔཏནྟཱུཏི ཨེཏྠཱཔི ཨེསེཝ ནཡོ།

    Patiṭṭhitaguṇoti patiṭṭhitācariyaguṇo. Issarā sannipatantu, mayaṃ anissarā, tattha gantvā kiṃ karissāmāti licchavino na sannipatiṃsūti yojanā. Sūrā sannipatantūti etthāpi eseva nayo.

    བལབྷེརིནྟི ཡུདྡྷཱཡ བལཀཱཡསྶ ཨུཊྛཱནབྷེརིཾ།

    Balabherinti yuddhāya balakāyassa uṭṭhānabheriṃ.

    བྷིཀྑུཨཔརིཧཱནིཡདྷམྨཝཎྞནཱ

    Bhikkhuaparihāniyadhammavaṇṇanā

    ༡༣༦. ཨཔརིཧཱནཱཡ ཧིཏཱཏི ཨཔརིཧཱནིཡཱ, ན པརིཧཱཡནྟི ཨེཏེཧཱིཏི ཝཱ ཨཔརིཧཱནིཡཱ, ཏེ པན ཡསྨཱ ཨཔརིཧཱནིཡཱ ཀཱརཀཱ ནཱམ ཧོནྟི, ཏསྨཱ ཝུཏྟཾ ‘‘ཨཔརིཧཱནིཀརེ’’ཏི། ཡསྨཱ པན ཏེ པརིཧཱནིཀརཱནཾ ཨུཛུཔཊིཔཀྑབྷཱུཏཱ, ཏསྨཱ ཨཱཧ ‘‘ཝུདྡྷིཧེཏུབྷཱུཏེ’’ཏི། ཡསྨཱ བྷགཝཏོ དེསནཱ ཨུཔརཱུཔརི ཉཱཎཱལོཀཾ པསཱདེནྟཱི སཏྟཱནཾ ཧདཡནྡྷཀཱརཾ ཝིདྷམཏི, པཀཱསེཏབྦེ ཙ ཨཏྠེ ཧཏྠཏལེ ཨཱམལཀཾ ཝིཡ སུཊྛུཏརཾ པཱཀཊེ ཀཏྭཱ དསྶེཏི, ཏསྨཱ ཝུཏྟཾ ‘‘ཙནྡསཧསྶཾ…པེ॰… ཀཐཡིསྶཱམཱི’’ཏི།

    136. Aparihānāya hitāti aparihāniyā, na parihāyanti etehīti vā aparihāniyā, te pana yasmā aparihāniyā kārakā nāma honti, tasmā vuttaṃ ‘‘aparihānikare’’ti. Yasmā pana te parihānikarānaṃ ujupaṭipakkhabhūtā, tasmā āha ‘‘vuddhihetubhūte’’ti. Yasmā bhagavato desanā uparūpari ñāṇālokaṃ pasādentī sattānaṃ hadayandhakāraṃ vidhamati, pakāsetabbe ca atthe hatthatale āmalakaṃ viya suṭṭhutaraṃ pākaṭe katvā dasseti, tasmā vuttaṃ ‘‘candasahassaṃ…pe… kathayissāmī’’ti.

    ཡསྨཱ བྷགཝཱ ‘‘ཏསྶ བྲཱཧྨཎསྶ སམྨུཁཱ ཝཛྫཱིནཾ ཨབྷིཎྷསནྣིཔཱཏཱདིཔཊིཔཏྟིཾ ཀཐེནྟོཡེཝ ཨཡཾ ཨཔརིཧཱནིཡཀཐཱ ཨནིཡྻཱནིཀཱ ཝཊྚནིསྶིཏཱ, མཡ྄ཧཾ པན སཱསནེ ཏཐཱརཱུཔཱི ཀཐཱ ཀཐེཏབྦཱ, སཱ ཧོཏི ནིཡྻཱནིཀཱ ཝིཝཊྚནིསྶིཏཱ, ཡཱཡ སཱསནཾ མཡ྄ཧཾ པརིནིབྦཱནཏོ པརམྤི ཨདྡྷནིཡཾ ཨསྶ ཙིརཊྛིཏིཀ’’ནྟི ཙིནྟེསི, ཏསྨཱ བྷིཀྑཱུ སནྣིཔཱཏཱཔེཏྭཱ ཏེསཾ ཨཔརིཧཱནིཡེ དྷམྨེ དེསེནྟོ ཏེནེཝ ནིཡཱམེན དེསེསི། ཏེན ཝུཏྟཾ ‘‘ཨིདཾ ཝཛྫིསཏྟཀེ ཝུཏྟསདིསམེཝཱ’’ཏི། ཨེཝཾ སངྑེཔཏོ ཝུཏྟམཏྠཾ ཝིཏྠཱརཏོ དསྶེནྟོ ‘‘ཨིདྷཱཔི ཙཱ’’ཏིཨཱདིམཱཧ། ཏཏྠ ‘‘ཏཏོ’’ཏིཨཱདི དིསཱསུ ཨཱགཏསཱསནེ ཝུཏྟཾ ཏཾ ཀཐནཾ། ཝིཧཱརསཱིམཱ ཨཱཀུལཱ ཡསྨཱ, ཏསྨཱ ཨུཔོསཐཔཝཱརཎཱ ཋིཏཱ།

    Yasmā bhagavā ‘‘tassa brāhmaṇassa sammukhā vajjīnaṃ abhiṇhasannipātādipaṭipattiṃ kathentoyeva ayaṃ aparihāniyakathā aniyyānikā vaṭṭanissitā, mayhaṃ pana sāsane tathārūpī kathā kathetabbā, sā hoti niyyānikā vivaṭṭanissitā, yāya sāsanaṃ mayhaṃ parinibbānato parampi addhaniyaṃ assa ciraṭṭhitika’’nti cintesi, tasmā bhikkhū sannipātāpetvā tesaṃ aparihāniye dhamme desento teneva niyāmena desesi. Tena vuttaṃ ‘‘idaṃ vajjisattake vuttasadisamevā’’ti. Evaṃ saṅkhepato vuttamatthaṃ vitthārato dassento ‘‘idhāpi cā’’tiādimāha. Tattha ‘‘tato’’tiādi disāsu āgatasāsane vuttaṃ taṃ kathanaṃ. Vihārasīmā ākulā yasmā, tasmā uposathapavāraṇā ṭhitā.

    ཨོལཱིཡམཱནཀོཏི པཱལི༹ཏོ, ཨཏྠཏོ ཙ ཝིནསྶམཱནོ། ཨུཀྑིཔཱཔེནྟཱཏི པགུཎབྷཱཝཀརཎེན, ཨཏྠསཾཝཎྞནེན ཙ པགྒཎྷནྟཱ།

    Olīyamānakoti pāḷito, atthato ca vinassamāno. Ukkhipāpentāti paguṇabhāvakaraṇena, atthasaṃvaṇṇanena ca paggaṇhantā.

    སཱཝཏྠིཡཾ བྷིཀྑཱུ ཝིཡ པཱཙིཏྟིཡཾ དེསཱཔེཏབྦོཏི (པཱརཱ॰ ༥༦༥ ཝིཏྠཱརཝཏྠུ)། ཝཛྫིཔུཏྟཀཱ ཝིཡ དསཝཏྠུདཱིཔནེན (ཙཱུལ༹ཝ॰ ༤༤༦ ཝིཏྠཱརཝཏྠུ)། ‘‘གིཧིགཏཱནཱིཏི གིཧིཔཊིསཾཡུཏྟཱནཱི’’ཏི ཝདནྟི། གིཧཱིསུ གཏཱནི, ཏེཧི ཉཱཏཱནི གིཧིགཏཱནི། དྷཱུམཀཱལོ ཨེཏསྶཱཏི དྷཱུམཀཱལིཀཾ ཙིཏཀདྷཱུམཝཱུཔསམཏོ པརཾ ཨཔྤཝཏྟནཏོ།

    Sāvatthiyaṃ bhikkhū viya pācittiyaṃ desāpetabboti (pārā. 565 vitthāravatthu). Vajjiputtakā viya dasavatthudīpanena (cūḷava. 446 vitthāravatthu). ‘‘Gihigatānīti gihipaṭisaṃyuttānī’’ti vadanti. Gihīsu gatāni, tehi ñātāni gihigatāni. Dhūmakālo etassāti dhūmakālikaṃ citakadhūmavūpasamato paraṃ appavattanato.

    ཐིརབྷཱཝཔྤཏྟཱཏི སཱསནེ ཐིརབྷཱཝཾ ཨནིཝཏྟིཏབྷཱཝཾ ཨུཔགཏཱ། ཐེརཀཱརཀེཧཱིཏི ཐེརབྷཱཝསཱདྷཀེཧི སཱིལཱདིགུཎེཧི ཨསེཀྑདྷམྨེཧི། བཧཱུ རཏྟིཡོཏི པབྦཛིཏཱ ཧུཏྭཱ བཧཱུ རཏྟིཡོ ཛཱནནྟི། སཱིལཱདིགུཎེསུ པཏིཊྛཱཔནམེཝ སཱསནེ པརིཎཱཡཀཏཱཏི ཨཱཧ ‘‘ཏཱིསུ སིཀྑཱསུ པཝཏྟེནྟཱི’’ཏི།

    Thirabhāvappattāti sāsane thirabhāvaṃ anivattitabhāvaṃ upagatā. Therakārakehīti therabhāvasādhakehi sīlādiguṇehi asekkhadhammehi. Bahū rattiyoti pabbajitā hutvā bahū rattiyo jānanti. Sīlādiguṇesu patiṭṭhāpanameva sāsane pariṇāyakatāti āha ‘‘tīsu sikkhāsu pavattentī’’ti.

    ཨོཝཱདཾ ན དེནྟི ཨབྷཱཛནབྷཱཝཏོ། པཝེཎཱིཀཐནྟི ཨཱཙརིཡཔརམྤརཱབྷཏཾ སམྨཱཔཊིཔཏྟིདཱིཔནཾ དྷམྨཀཐཾ། སཱརབྷཱུཏཾ དྷམྨཔརིཡཱཡནྟི སམཐཝིཔསྶནཱམགྒཕལསམྤཱཔནེན སཱརབྷཱུཏཾ བོཛ྄ཛྷངྒཀོསལླཨནུཏྟརསཱིཏཱིབྷཱཝཨདྷིཙིཏྟསུཏྟཱདིདྷམྨཏནྟིཾ།

    Ovādaṃ na denti abhājanabhāvato. Paveṇīkathanti ācariyaparamparābhataṃ sammāpaṭipattidīpanaṃ dhammakathaṃ. Sārabhūtaṃ dhammapariyāyanti samathavipassanāmaggaphalasampāpanena sārabhūtaṃ bojjhaṅgakosallaanuttarasītībhāvaadhicittasuttādidhammatantiṃ.

    པུནབྦྷཝདཱནཾ པུནབྦྷཝོ ཨུཏྟརཔདལོཔེན། ཨིཏརེཏི ཡེ ན པཙྩཡཝསིཀཱ ན ཨཱམིསཙཀྑུཀཱ, ཏེ ན གཙྪནྟི ཏཎྷཱཡ ཝསཾ།

    Punabbhavadānaṃ punabbhavo uttarapadalopena. Itareti ye na paccayavasikā na āmisacakkhukā, te na gacchanti taṇhāya vasaṃ.

    ཨཱརཉྙཀེསཱུཏི ཨརཉྙབྷཱགེསུ ཨརཉྙཔརིཡཱཔནྣེསུ། ནནུ ཡཏྠ ཀཏྠཙིཔི ཏཎྷཱ སཱཝཛྫཱ ཨེཝཱཏི ཙོདནཾ སནྡྷཱཡཱཧ ‘‘གཱམནྟསེནཱསནེསུ ཧཱི’’ཏིཨཱདི, ཏེན ‘‘ཨནུཏྟརེསུ ཝིམོཀྑེསུ པིཧཾ ཨུཔཊྛཱཔཡཏོ’’ཏི ཨེཏྠ ཝུཏྟསིནེཧཱདཡོ ཝིཡ ཨཱརཉྙཀེསུ སེནཱསནེསུ སཱལཡཏཱ སེཝིཏབྦཔཀྑིཡཱ ཨེཝཱཏི དསྶེཏི།

    Āraññakesūti araññabhāgesu araññapariyāpannesu. Nanu yattha katthacipi taṇhā sāvajjā evāti codanaṃ sandhāyāha ‘‘gāmantasenāsanesu hī’’tiādi, tena ‘‘anuttaresu vimokkhesu pihaṃ upaṭṭhāpayato’’ti ettha vuttasinehādayo viya āraññakesu senāsanesu sālayatā sevitabbapakkhiyā evāti dasseti.

    ཨཏྟནཱཝཱཏི སཡམེཝ, ཏེན པརེཧི ཨནུསྶཱཧིཏཱནཾ སརསེནེཝ ཨནཱགཏཱནཾ པེསལཱནཾ བྷིཀྑཱུནཾ ཨཱགམནཾ, ཨཱགཏཱནཉྩ ཕཱསུཝིཧཱརཾ པཙྩཱསིསནྟཱིཏི དསྶེཏི། ཨིམིནཱ ནཱིཧཱརེནཱཏི ཨིམཱཡ པཊིཔཏྟིཡཱ། ཨགྒཧིཏདྷམྨགྒཧཎནྟི ཨགྒཧིཏསྶ པརིཡཏྟིདྷམྨསྶ ཨུགྒཧཎཾ། གཧིཏསཛ྄ཛྷཱཡཀརཎནྟི ཨུགྒཧིཏསྶ སུཊྛུ ཨཏྠཙིནྟནཾ། ཙིནྟནཏྠོ ཧི སཛ྄ཛྷཱཡསདྡོ།

    Attanāvāti sayameva, tena parehi anussāhitānaṃ saraseneva anāgatānaṃ pesalānaṃ bhikkhūnaṃ āgamanaṃ, āgatānañca phāsuvihāraṃ paccāsisantīti dasseti. Iminā nīhārenāti imāya paṭipattiyā. Aggahitadhammaggahaṇanti aggahitassa pariyattidhammassa uggahaṇaṃ. Gahitasajjhāyakaraṇanti uggahitassa suṭṭhu atthacintanaṃ. Cintanattho hi sajjhāyasaddo.

    ཨེནྟཱིཏི ཨུཔགཙྪནྟི། ནིསཱིདནྟི ཨཱསནཔཉྙཱཔནཱདིནཱ།

    Entīti upagacchanti. Nisīdanti āsanapaññāpanādinā.

    ༡༣༧. ཨཱརམིཏབྦཊྛེན ཀམྨཾ ཨཱརཱམོ། ཀམྨེ རཏཱ, ན གནྠདྷུརེ, ཝཱསདྷུརེ ཝཱཏི ཀམྨརཏཱ, ཨནུཡུཏྟཱཏི ཏཔྤརབྷཱཝེན པུནཔྤུནཾ པསུཏཱ། ཨིཏི ཀཱཏབྦཀམྨནྟི ཏཾ ཏཾ བྷིཀྑཱུནཾ ཀཱཏབྦཾ ཨུཙྩཱཝཙཀམྨཾ ཙཱིཝརཝིཙཱརཎཱདི། ཏེནཱཧ ‘‘སེཡྻཐིད’’ནྟིཨཱདི། ཨུཔཏྠམྦྷནནྟི དུཔཊྚཏིཔཊྚཱདིཀརཎཾ། ཏཉྷི པཋམཔཊལཱདཱིནཾ ཨུཔཏྠམྦྷནཀཱརཎཏྟཱ ཏཐཱ ཝུཏྟཾ། ཡདི ཨེཝཾ ཀཐཾ ཨཡཾ ཀམྨརཱམཏཱ པཊིཀྑིཏྟཱཏི ཨཱཧ ‘‘ཨེཀཙྩོ ཧཱི’’ཏིཨཱདི།

    137. Āramitabbaṭṭhena kammaṃ ārāmo. Kamme ratā, na ganthadhure, vāsadhure vāti kammaratā, anuyuttāti tapparabhāvena punappunaṃ pasutā. Iti kātabbakammanti taṃ taṃ bhikkhūnaṃ kātabbaṃ uccāvacakammaṃ cīvaravicāraṇādi. Tenāha ‘‘seyyathida’’ntiādi. Upatthambhananti dupaṭṭatipaṭṭādikaraṇaṃ. Tañhi paṭhamapaṭalādīnaṃ upatthambhanakāraṇattā tathā vuttaṃ. Yadi evaṃ kathaṃ ayaṃ kammarāmatā paṭikkhittāti āha ‘‘ekacco hī’’tiādi.

    ཀརོནྟོ ཡེཝཱཏི ཡཐཱཝུཏྟཏིརཙྪཱནཀཐཾ ཀཐེནྟོཡེཝ། ཨཏིརཙྪཱནཀཐཱབྷཱཝེཔི ཏསྶ ཏཏྠ ཏཔྤརབྷཱཝདསྶནཏྠཾ ཨཝདྷཱརཎཝཙནཾ། པརིཡནྟཀཱརཱིཏི སཔརིཡནྟཾ ཀཏྭཱ ཝཏྟཱ། ‘‘པརིཡནྟཝཏིཾ ཝཱཙཾ བྷཱསིཏཱ’’ཏི (དཱི॰ ནི॰ ༡.༩, ༡༩༤) ཧི ཝུཏྟཾ། ཨཔྤབྷསྶོ ཝཱཏི པརིམིཏཀཐོཡེཝ ཨེཀནྟེན ཀཐེཏབྦསྶེཝ ཀཐནཏོ། སམཱཔཏྟིསམཱཔཛྫནཾ ཨརིཡོ ཏུཎྷཱིབྷཱཝོ།

    Karonto yevāti yathāvuttatiracchānakathaṃ kathentoyeva. Atiracchānakathābhāvepi tassa tattha tapparabhāvadassanatthaṃ avadhāraṇavacanaṃ. Pariyantakārīti sapariyantaṃ katvā vattā. ‘‘Pariyantavatiṃ vācaṃ bhāsitā’’ti (dī. ni. 1.9, 194) hi vuttaṃ. Appabhasso vāti parimitakathoyeva ekantena kathetabbasseva kathanato. Samāpattisamāpajjanaṃ ariyo tuṇhībhāvo.

    ནིདྡཱཡཏིཡེཝཱཏི ནིདྡོཀྐམནེ ཨནཱདཱིནཝདསྶཱི ནིདྡཱཡཏིཡེཝ། ཨིརིཡཱཔཐཔརིཝཏྟནཱདིནཱ ན ནཾ ཝིནོདེཏི།

    Niddāyatiyevāti niddokkamane anādīnavadassī niddāyatiyeva. Iriyāpathaparivattanādinā na naṃ vinodeti.

    ཨེཝཾ སཾསཊྛོ ཝཱཏི ཝུཏྟནཡེན གཎསངྒཎིཀཱཡ སཾསཊྛོ ཨེཝ ཝིཧརཏི།

    Evaṃ saṃsaṭṭho vāti vuttanayena gaṇasaṅgaṇikāya saṃsaṭṭho eva viharati.

    དུསྶཱིལཱ པཱཔིཙྪཱ ནཱམཱཏི སཡཾ ནིསྶཱིལཱ ཨསནྟགུཎསམྦྷཱཝནིཙྪཱཡ སམནྣཱགཏཏྟཱ པཱཔཱ ལཱམཀཱ ཨིཙྪཱ ཨེཏེསནྟི པཱཔིཙྪཱ།

    Dussīlā pāpicchā nāmāti sayaṃ nissīlā asantaguṇasambhāvanicchāya samannāgatattā pāpā lāmakā icchā etesanti pāpicchā.

    པཱཔཔུགྒལེཧི མེཏྟིཀརཎཏོ པཱཔམིཏྟཱ། ཏེཧི སདཱ སཧ པཝཏྟནེན པཱཔསཧཱཡཱ། ཏཏྠ ནིནྣཏཱདིནཱ ཏདདྷིམུཏྟཏཱཡ པཱཔསམྤཝངྐཱ།

    Pāpapuggalehi mettikaraṇato pāpamittā. Tehi sadā saha pavattanena pāpasahāyā. Tattha ninnatādinā tadadhimuttatāya pāpasampavaṅkā.

    ༡༣༨. སདྡྷཱ ཨེཏེསཾ ཨཏྠཱིཏི སདྡྷཱཏི ཨཱཧ ‘‘སདྡྷཱསམྤནྣཱ’’ཏི། ཨཱགམནཱིཡཔཊིཔདཱཡ ཨཱགཏསདྡྷཱ ཨཱགམནཱིཡསདྡྷཱ, སཱ སཱཏིསཡཱ མཧཱབོདྷིསཏྟཱནཾ པརོཔདེསེན ཝིནཱ སདྡྷེཡྻཝཏྠུཾ ཨཝིཔརཱིཏཏོ ཨོགཱཧེཏྭཱ ཨདྷིམུཙྩནཏོཏི ཨཱཧ ‘‘སབྦཉྙུབོདྷིསཏྟཱནཾ ཧོཏཱི’’ཏི། སཙྩཔཊིཝེདྷཏོ ཨཱགཏསདྡྷཱ ཨདྷིགམསདྡྷཱ སུརབནྡྷཱདཱིནཾ (དཱི॰ ནི॰ ཨཊྛ॰ ༣.༡༡༨; དྷ॰ པ॰ ཨཊྛ॰ ༡.སུཔྤབུདྡྷཀུཊྛིཝཏྠུ; ཨུདཱ॰ ཨཊྛ॰ ༤༣) ཝིཡ། ‘‘སམྨཱསམྦུདྡྷོ བྷགཝཱ’’ཏིཨཱདིནཱ བུདྡྷཱདཱིསུ ཨུཔྤཛྫནཀཔསཱདོ པསཱདསདྡྷཱ མཧཱཀཔྤིནརཱཛཱདཱིནཾ (ཨ॰ ནི॰ ཨཊྛ॰ ༡.༡.༢༣༡; དྷ॰ པ॰ ཨཊྛ॰ ༡.མཧཱཀཔྤིནཏྠེརཝཏྠུ; ཐེརགཱ॰ ཨཊྛ॰ ༢.མཧཱཀཔྤིནཏྠེརགཱཐཱཝཎྞནཱ, ཝིཏྠཱརོ) ཝིཡ། ‘‘ཨེཝམེཏ’’ནྟི ཨོཀྐནྟིཏྭཱ པཀྑནྡིཏྭཱ སདྡཧནཝསེན ཀཔྤནཾ ཨོཀཔྤནཾ། དུཝིདྷཱཔཱིཏི པསཱདསདྡྷཱཔི ཨོཀཔྤནསདྡྷཱཔི། ཏཏྠ པསཱདསདྡྷཱ ཨཔརནེཡྻརཱུཔཱ ཧོཏི སཝནམཏྟེན པསཱིདནཏོ། ཨོཀཔྤནསདྡྷཱ སདྡྷེཡྻཝཏྠུཾ ཨོགཱཧེཏྭཱ ཨནུཔཝིསིཏྭཱ ‘‘ཨེཝམེཏ’’ནྟི པཙྩཀྑཾ ཀརོནྟཱི ཝིཡ པཝཏྟཏི། ཏེནཱཧ ‘‘སདྡྷཱདྷིམུཏྟོ ཝཀྐལིཏྠེརསདིསོ ཧོཏཱི’’ཏི། ཏསྶ ཧཱིཏི ཨོཀཔྤནསདྡྷཱཡ སམནྣཱགཏསྶ། ཧིརཱི ཨེཏསྶ ཨཏྠཱིཏི ཧིརི, ཧིརི མནོ ཨེཏེསནྟི ཧིརིམནཱཏི ཨཱཧ ‘‘པཱཔ…པེ॰… ཙིཏྟཱ’’ཏི། པཱཔཏོ ཨོཏྟཔྤེནྟི ཨུབྦིཛྫནྟི བྷཱཡནྟཱིཏི ཨོཏྟཔྤཱི།

    138. Saddhā etesaṃ atthīti saddhāti āha ‘‘saddhāsampannā’’ti. Āgamanīyapaṭipadāya āgatasaddhā āgamanīyasaddhā, sā sātisayā mahābodhisattānaṃ paropadesena vinā saddheyyavatthuṃ aviparītato ogāhetvā adhimuccanatoti āha ‘‘sabbaññubodhisattānaṃ hotī’’ti. Saccapaṭivedhato āgatasaddhā adhigamasaddhā surabandhādīnaṃ (dī. ni. aṭṭha. 3.118; dha. pa. aṭṭha. 1.suppabuddhakuṭṭhivatthu; udā. aṭṭha. 43) viya. ‘‘Sammāsambuddho bhagavā’’tiādinā buddhādīsu uppajjanakapasādo pasādasaddhā mahākappinarājādīnaṃ (a. ni. aṭṭha. 1.1.231; dha. pa. aṭṭha. 1.mahākappinattheravatthu; theragā. aṭṭha. 2.mahākappinattheragāthāvaṇṇanā, vitthāro) viya. ‘‘Evameta’’nti okkantitvā pakkhanditvā saddahanavasena kappanaṃ okappanaṃ. Duvidhāpīti pasādasaddhāpi okappanasaddhāpi. Tattha pasādasaddhā aparaneyyarūpā hoti savanamattena pasīdanato. Okappanasaddhā saddheyyavatthuṃ ogāhetvā anupavisitvā ‘‘evameta’’nti paccakkhaṃ karontī viya pavattati. Tenāha ‘‘saddhādhimutto vakkalittherasadiso hotī’’ti. Tassa hīti okappanasaddhāya samannāgatassa. Hirī etassa atthīti hiri, hiri mano etesanti hirimanāti āha ‘‘pāpa…pe… cittā’’ti. Pāpato ottappenti ubbijjanti bhāyantīti ottappī.

    བཧུ སུཏཾ སུཏྟགེཡྻཱདི ཨེཏེནཱཏི བཧུསྶུཏོ, སུཏགྒཧཎཾ ཙེཏྠ ནིདསྶནམཏྟཾ དྷཱརཎཔརིཙཡཔརིཔུཙྪཱནུཔེཀྑནདིཊྛིནིཛ྄ཛྷཱནཱནཾ པེཏྠ ཨིཙྪིཏབྦཏྟཱ། སཝནམཱུལཀཏྟཱ ཝཱ ཏེསམྤི ཏགྒཧཎེནེཝ གཧཎཾ དཊྛབྦཾ། ཨཏྠཀཱམེན པརིཡཱཔུཎིཏབྦཏོ, དིཊྛདྷམྨིཀཱདིཔུརིསཏྠསིདྡྷིཡཱ པརིཡཏྟབྷཱཝཏོ ཙ པརིཡཏྟི, ཏཱིཎི པིཊཀཱནི། སཙྩཔྤཊིཝེདྷོ སཙྩཱནཾ པཊིཝིཛ྄ཛྷནཾ། ཏདཔི བཱཧུསཙྩཾ ཡཐཱཝུཏྟབཱཧུསཙྩཀིཙྩནིཔྥཏྟིཏོ། པརིཡཏྟི ཨདྷིཔྤེཏཱ སཙྩཔཊིཝེདྷཱཝཧེན བཱཧུསཙྩེན བཧུསྶུཏབྷཱཝསྶ ཨིདྷ ཨིཙྪིཏཏྟཱ། སོཏི པརིཡཏྟིབཧུསྶུཏོ། ཙཏུབྦིདྷོ ཧོཏི པཉྩམསྶ པཀཱརསྶ ཨབྷཱཝཏོ། སབྦཏྠཀབཧུསྶུཏོཏི ནིསྶཡམུཙྩནཀབཧུསྶུཏཱདཡོ ཝིཡ པདེསིཀོ ཨཧུཏྭཱ པིཊཀཏྟཡེ སབྦཏྠཀམེཝ བཱཧུསཙྩསབྦྷཱཝཏོ སབྦསྶ ཨཏྠསྶ ཀཱཡནཏོ ཀཐནཏོ སབྦཏྠཀབཧུསྶུཏོ། ཏེ ཨིདྷ ཨདྷིཔྤེཏཱ པཊིཔཏྟིཔཊིཝེདྷསདྡྷམྨཱནཾ མཱུལབྷཱུཏེ པརིཡཏྟིསདྡྷམྨེ སུཔྤཏིཊྛིཏབྷཱཝཏོ།

    Bahu sutaṃ suttageyyādi etenāti bahussuto, sutaggahaṇaṃ cettha nidassanamattaṃ dhāraṇaparicayaparipucchānupekkhanadiṭṭhinijjhānānaṃ pettha icchitabbattā. Savanamūlakattā vā tesampi taggahaṇeneva gahaṇaṃ daṭṭhabbaṃ. Atthakāmena pariyāpuṇitabbato, diṭṭhadhammikādipurisatthasiddhiyā pariyattabhāvato ca pariyatti, tīṇi piṭakāni. Saccappaṭivedho saccānaṃ paṭivijjhanaṃ. Tadapi bāhusaccaṃ yathāvuttabāhusaccakiccanipphattito. Pariyatti adhippetā saccapaṭivedhāvahena bāhusaccena bahussutabhāvassa idha icchitattā. Soti pariyattibahussuto. Catubbidho hoti pañcamassa pakārassa abhāvato. Sabbatthakabahussutoti nissayamuccanakabahussutādayo viya padesiko ahutvā piṭakattaye sabbatthakameva bāhusaccasabbhāvato sabbassa atthassa kāyanato kathanato sabbatthakabahussuto. Te idha adhippetā paṭipattipaṭivedhasaddhammānaṃ mūlabhūte pariyattisaddhamme suppatiṭṭhitabhāvato.

    ཨཱརདྡྷནྟི པགྒཧིཏཾ། ཏཾ པན དུཝིདྷམྤི ཝཱིརིཡཱརམྦྷཝིབྷཱགེན དསྶེཏུཾ ‘‘ཏཏྠཱ’’ཏིཨཱདི ཝུཏྟཾ། ཏཏྠ ཨེཀཀཱཏི ཨེཀཱཀིནོ, ཝཱུཔཀཊྛཝིཧཱརིནོཏི ཨཏྠོ།

    Āraddhanti paggahitaṃ. Taṃ pana duvidhampi vīriyārambhavibhāgena dassetuṃ ‘‘tatthā’’tiādi vuttaṃ. Tattha ekakāti ekākino, vūpakaṭṭhavihārinoti attho.

    པུཙྪིཏྭཱཏི པརཏོ པུཙྪིཏྭཱ། སམྤཊིཙྪཱཔེཏུནྟི ‘‘ཏྭཾ ཨསུཀནཱམོ’’ཏི ཝཏྭཱ ཏེཧི ‘‘ཨཱམཱ’’ཏི པཊིཛཱནཱཔེཏུནྟི ཨཏྠོ། ཨེཝཾ ཙིརཀཏཱདིཨནུསྶརཎསམཏྠསཏིནེཔཀྐཱནཾ ཨཔྤཀསིརེནེཝ སཏིསམྦོཛ྄ཛྷངྒབྷཱཝནཱཔཱརིཔཱུརིཾ གཙྪཏཱིཏི དསྶནཏྠཾ ‘‘ཨེཝརཱུཔེ བྷིཀྑཱུ སནྡྷཱཡཱ’’ཏི ཝུཏྟཾ། ཏེནེཝཱཧ ‘‘ཨཔིཙཱ’’ཏིཨཱདི།

    Pucchitvāti parato pucchitvā. Sampaṭicchāpetunti ‘‘tvaṃ asukanāmo’’ti vatvā tehi ‘‘āmā’’ti paṭijānāpetunti attho. Evaṃ cirakatādianussaraṇasamatthasatinepakkānaṃ appakasireneva satisambojjhaṅgabhāvanāpāripūriṃ gacchatīti dassanatthaṃ ‘‘evarūpe bhikkhū sandhāyā’’ti vuttaṃ. Tenevāha ‘‘apicā’’tiādi.

    ༡༣༩. བུཛ྄ཛྷཏི ཨེཏཱཡཱཏི ‘‘བོདྷཱི’’ཏི ལདྡྷནཱམཱཡ སམྨཱདིཊྛིཨཱདིདྷམྨསཱམགྒིཡཱ ཨངྒོཏི བོཛ྄ཛྷངྒོ, པསཏྠོ, སུནྡརོ ཝཱ བོཛ྄ཛྷངྒོ སམྦོཛ྄ཛྷངྒོ། ཨུཔཊྛཱནལཀྑཎོཏི ཀཱཡཝེདནཱཙིཏྟདྷམྨཱནཾ ཨསུབྷདུཀྑཱནིཙྩཱནཏྟབྷཱཝསལླཀྑཎསངྑཱཏཾ ཨཱརམྨཎེ ཨུཔཊྛཱནཾ ལཀྑཎཾ ཨེཏསྶཱཏི ཨུཔཊྛཱནལཀྑཎོ། ཙཏུནྣཾ ཨརིཡསཙྩཱནཾ པཱིལ༹ནཱདིཔྤཀཱརཏོ ཝིཙཡོ ཨུཔཔརིཀྑཱ ལཀྑཎཾ ཨེཏསྶཱཏི པཝིཙཡལཀྑཎོ། ཨནུཔྤནྣཱ ཀུསལཱནུཔྤཱདནཱདིཝསེན ཙིཏྟསྶ པགྒཧོ པགྒཎྷནཾ ལཀྑཎཾ ཨེཏསྶཱཏི པགྒཧལཀྑཎོ། ཕརཎཾ ཝིཔྥཱརིཀཏཱ ལཀྑཎཾ ཨེཏསྶཱཏི ཕརཎལཀྑཎོ། ཨུཔསམོ ཀཱཡཙིཏྟཔརིལཱ༹ཧཱནཾ ཝཱུཔསམནཾ ལཀྑཎཾ ཨེཏསྶཱཏི ཨུཔསམལཀྑཎོ། ཨཝིཀྑེཔོ ཝིཀྑེཔཝིདྡྷཾསནཾ ལཀྑཎཾ ཨེཏསྶཱཏི ཨཝིཀྑེཔལཀྑཎོ། ལཱིནུདྡྷཙྩརཧིཏེ ཨདྷིཙིཏྟེ པཝཏྟམཱནེ པགྒཧནིགྒཧསམྤཧཾསནེསུ ཨབྱཱཝཊཏྟཱ ཨཛ྄ཛྷུཔེཀྑནཾ པཊིསངྑཱནཾ ལཀྑཎཾ ཨེཏསྶཱཏི པཊིསངྑཱནལཀྑཎོ།

    139. Bujjhati etāyāti ‘‘bodhī’’ti laddhanāmāya sammādiṭṭhiādidhammasāmaggiyā aṅgoti bojjhaṅgo, pasattho, sundaro vā bojjhaṅgo sambojjhaṅgo. Upaṭṭhānalakkhaṇoti kāyavedanācittadhammānaṃ asubhadukkhāniccānattabhāvasallakkhaṇasaṅkhātaṃ ārammaṇe upaṭṭhānaṃ lakkhaṇaṃ etassāti upaṭṭhānalakkhaṇo. Catunnaṃ ariyasaccānaṃ pīḷanādippakārato vicayo upaparikkhā lakkhaṇaṃ etassāti pavicayalakkhaṇo. Anuppannā kusalānuppādanādivasena cittassa paggaho paggaṇhanaṃ lakkhaṇaṃ etassāti paggahalakkhaṇo. Pharaṇaṃ vipphārikatā lakkhaṇaṃ etassāti pharaṇalakkhaṇo. Upasamo kāyacittapariḷāhānaṃ vūpasamanaṃ lakkhaṇaṃ etassāti upasamalakkhaṇo. Avikkhepo vikkhepaviddhaṃsanaṃ lakkhaṇaṃ etassāti avikkhepalakkhaṇo. Līnuddhaccarahite adhicitte pavattamāne paggahaniggahasampahaṃsanesu abyāvaṭattā ajjhupekkhanaṃ paṭisaṅkhānaṃ lakkhaṇaṃ etassāti paṭisaṅkhānalakkhaṇo.

    ཙཏཱུཧི ཀཱརཎེཧཱིཏི སཏིསམྤཛཉྙཾ, མུཊྛསྶཏིཔུགྒལཔརིཝཛྫནཱ, ཨུཔཊྛིཏསྶཏིཔུགྒལསེཝནཱ, ཏདདྷིམུཏྟཏཱཏི ཨིམེཧི ཙཏཱུཧི ཀཱརཎེཧི། ཚཧི ཀཱརཎེཧཱིཏི པརིཔུཙྪཀཏཱ, ཝཏྠུཝིསདཀིརིཡཱ, ཨིནྡྲིཡསམཏྟཔཊིཔཱདནཱ, དུཔྤཉྙཔུགྒལཔརིཝཛྫནཱ, པཉྙཝནྟཔུགྒལསེཝནཱ, ཏདདྷིམུཏྟཏཱཏི ཨིམེཧི ཚཧི ཀཱརཎེཧི། མཧཱསཏིཔཊྛཱནཝཎྞནཱཡཾ པན ‘‘སཏྟཧི ཀཱརཎེཧཱི’’ (དཱི॰ ནི॰ ཨཊྛ॰ ༢.༣༨༥; མ॰ ནི॰ ཨཊྛ॰ ༡.༡༡༨) ཝཀྑཏི, ཏཾ གམྦྷཱིརཉཱཎཙརིཡཱཔཙྩཝེཀྑཎཱཏི ཨིམཾ ཀཱརཎཾ པཀྑིཔིཏྭཱ ཝེདིཏབྦཾ། ནཝཧི ཀཱརཎེཧཱིཏི ཨཔཱཡབྷཡཔཙྩཝེཀྑཎཱ, གམནཝཱིཐིཔཙྩཝེཀྑཎཱ, པིཎྜཔཱཏསྶ ཨཔཙཱཡནཏཱ, དཱཡཛྫམཧཏྟཔཙྩཝེཀྑཎཱ, སཏྠུམཧཏྟཔཙྩཝེཀྑཎཱ, སབྲཧྨཙཱརཱིམཧཏྟཔཙྩཝེཀྑཎཱ, ཀུསཱིཏཔུགྒལཔརིཝཛྫནཱ, ཨཱརདྡྷཝཱིརིཡཔུགྒལསེཝནཱ, ཏདདྷིམུཏྟཏཱཏི ཨིམེཧི ནཝཧི ཀཱརཎེཧི། མཧཱསཏིཔཊྛཱནཝཎྞནཱཡཾ (དཱི॰ ནི॰ ཨཊྛ॰ ༢.༣༨༥; མ॰ ནི॰ ཨཊྛ॰ ༡.༡༡༨) པན ཨཱནིསཾསདསྶཱཝིཏཱ, ཛཱཏིམཧཏྟཔཙྩཝེཀྑཎཱཏི ཨིམེཧི སདྡྷིཾ ‘‘ཨེཀཱདསཱ’’ཏི ཝཀྑཏི། དསཧི ཀཱརཎེཧཱིཏི བུདྡྷཱནུསྶཏི, དྷམྨཱནུསྶཏི, སངྒྷསཱིལཙཱགདེཝཏཱཨུཔསམཱནུསྶཏི, ལཱུཁཔུགྒལཔརིཝཛྫནཱ, སིནིདྡྷཔུགྒལསེཝནཱ, ཏདདྷིམུཏྟཏཱཏི ཨིམེཧི དསཧི། མཧཱསཏིཔཊྛཱནཝཎྞནཱཡཾ (དཱི॰ ནི॰ ཨཊྛ॰ ༢.༣༨༥; མ॰ ནི॰ ཨཊྛ॰ ༡.༡༡༨) པན པསཱདནིཡསུཏྟནྟཔཙྩཝེཀྑཎཱཡ སདྡྷིཾ ‘‘ཨེཀཱདསཱ’’ཏི ཝཀྑཏི། སཏྟཧི ཀཱརཎེཧཱིཏི པཎཱིཏབྷོཛནསེཝནཏཱ , ཨུཏུསུཁསེཝནཏཱ, ཨིརིཡཱཔཐསུཁསེཝནཏཱ, མཛ྄ཛྷཏྟཔཡོགཏཱ, སཱརདྡྷཀཱཡཔུགྒལཔརིཝཛྫནཏཱ , པསྶདྡྷཀཱཡཔུགྒལསེཝནཏཱ, ཏདདྷིམུཏྟཏཱཏི ཨིམེཧི སཏྟཧི། དསཧི ཀཱརཎེཧཱིཏི ཝཏྠུཝིསདཀིརིཡཱ, ཨིནྡྲིཡསམཏྟཔཊིཔཱདནཱ, ནིམིཏྟཀུསལཏཱ, སམཡེ ཙིཏྟསྶ པགྒཧཎཾ, སམཡེ ཙིཏྟསྶ ནིགྒཧཎཾ, སམཡེ ཙིཏྟསྶ སམྤཧཾསནཾ, སམཡེ ཙིཏྟསྶ ཨཛ྄ཛྷུཔེཀྑནཾ, ཨསམཱཧིཏཔུགྒལཔརིཝཛྫནཾ, སམཱཧིཏཔུགྒལསེཝནཾ, ཏདདྷིམུཏྟཏཱཏི ཨིམེཧི དསཧི ཀཱརཎེཧི། མཧཱསཏིཔཊྛཱནཝཎྞནཱཡཾ (དཱི॰ ནི॰ ཨཊྛ॰ ༢.༣༨༥; མ॰ ནི॰ ཨཊྛ॰ ༡.༡༡༨) པན ‘‘ཛྷཱནཝིམོཀྑཔཙྩཝེཀྑཎཱ’’ཏི ཨིམིནཱ སདྡྷིཾ ‘‘ཨེཀཱདསཧཱི’’ཏི ཝཀྑཏི། པཉྩཧི ཀཱརཎེཧཱིཏི སཏྟམཛ྄ཛྷཏྟཏཱ, སངྑཱརམཛ྄ཛྷཏྟཏཱ, སཏྟསངྑཱརཀེལཱཡནཔུགྒལཔརིཝཛྫནཱ, སཏྟསངྑཱརམཛ྄ཛྷཏྟཔུགྒལསེཝནཱ, ཏདདྷིམུཏྟཏཱཏི ཨིམེཧི པཉྩཧི ཀཱརཎེཧི། ཡཾ པནེཏྠ ཝཏྟབྦཾ, ཏཾ མཧཱསཏིཔཊྛཱནཝཎྞནཱཡཾ (དཱི॰ ནི॰ ཨཊྛ॰ ༢.༣༨༥; མ॰ ནི॰ ཨཊྛ॰ ༡.༡༡༨) ཨཱགམིསྶཏི། ཀཱམཾ བོདྷིཔཀྑིཡདྷམྨཱ ནཱམ ནིཔྤརིཡཱཡཏོ ཨརིཡམགྒསམྤཡུཏྟཱ ཨེཝ ནིཡྻཱནིཀབྷཱཝཏོ། སུཏྟནྟདེསནཱ ནཱམ པརིཡཱཡཀཐཱཏི ‘‘ཨིམིནཱ ཝིཔསྶནཱ…པེ॰… ཀཐེསཱི’’ཏི ཝུཏྟཾ།

    Catūhi kāraṇehīti satisampajaññaṃ, muṭṭhassatipuggalaparivajjanā, upaṭṭhitassatipuggalasevanā, tadadhimuttatāti imehi catūhi kāraṇehi. Chahi kāraṇehīti paripucchakatā, vatthuvisadakiriyā, indriyasamattapaṭipādanā, duppaññapuggalaparivajjanā, paññavantapuggalasevanā, tadadhimuttatāti imehi chahi kāraṇehi. Mahāsatipaṭṭhānavaṇṇanāyaṃ pana ‘‘sattahi kāraṇehī’’ (dī. ni. aṭṭha. 2.385; ma. ni. aṭṭha. 1.118) vakkhati, taṃ gambhīrañāṇacariyāpaccavekkhaṇāti imaṃ kāraṇaṃ pakkhipitvā veditabbaṃ. Navahi kāraṇehīti apāyabhayapaccavekkhaṇā, gamanavīthipaccavekkhaṇā, piṇḍapātassa apacāyanatā, dāyajjamahattapaccavekkhaṇā, satthumahattapaccavekkhaṇā, sabrahmacārīmahattapaccavekkhaṇā, kusītapuggalaparivajjanā, āraddhavīriyapuggalasevanā, tadadhimuttatāti imehi navahi kāraṇehi. Mahāsatipaṭṭhānavaṇṇanāyaṃ (dī. ni. aṭṭha. 2.385; ma. ni. aṭṭha. 1.118) pana ānisaṃsadassāvitā, jātimahattapaccavekkhaṇāti imehi saddhiṃ ‘‘ekādasā’’ti vakkhati. Dasahi kāraṇehīti buddhānussati, dhammānussati, saṅghasīlacāgadevatāupasamānussati, lūkhapuggalaparivajjanā, siniddhapuggalasevanā, tadadhimuttatāti imehi dasahi. Mahāsatipaṭṭhānavaṇṇanāyaṃ (dī. ni. aṭṭha. 2.385; ma. ni. aṭṭha. 1.118) pana pasādaniyasuttantapaccavekkhaṇāya saddhiṃ ‘‘ekādasā’’ti vakkhati. Sattahi kāraṇehīti paṇītabhojanasevanatā , utusukhasevanatā, iriyāpathasukhasevanatā, majjhattapayogatā, sāraddhakāyapuggalaparivajjanatā , passaddhakāyapuggalasevanatā, tadadhimuttatāti imehi sattahi. Dasahi kāraṇehīti vatthuvisadakiriyā, indriyasamattapaṭipādanā, nimittakusalatā, samaye cittassa paggahaṇaṃ, samaye cittassa niggahaṇaṃ, samaye cittassa sampahaṃsanaṃ, samaye cittassa ajjhupekkhanaṃ, asamāhitapuggalaparivajjanaṃ, samāhitapuggalasevanaṃ, tadadhimuttatāti imehi dasahi kāraṇehi. Mahāsatipaṭṭhānavaṇṇanāyaṃ (dī. ni. aṭṭha. 2.385; ma. ni. aṭṭha. 1.118) pana ‘‘jhānavimokkhapaccavekkhaṇā’’ti iminā saddhiṃ ‘‘ekādasahī’’ti vakkhati. Pañcahi kāraṇehīti sattamajjhattatā, saṅkhāramajjhattatā, sattasaṅkhārakelāyanapuggalaparivajjanā, sattasaṅkhāramajjhattapuggalasevanā, tadadhimuttatāti imehi pañcahi kāraṇehi. Yaṃ panettha vattabbaṃ, taṃ mahāsatipaṭṭhānavaṇṇanāyaṃ (dī. ni. aṭṭha. 2.385; ma. ni. aṭṭha. 1.118) āgamissati. Kāmaṃ bodhipakkhiyadhammā nāma nippariyāyato ariyamaggasampayuttā eva niyyānikabhāvato. Suttantadesanā nāma pariyāyakathāti ‘‘iminā vipassanā…pe… kathesī’’ti vuttaṃ.

    ༡༤༠. ཏེབྷཱུམཀེ སངྑཱརེ ‘‘ཨནིཙྩཱ’’ཏི ཨནུཔསྶཏི ཨེཏཱཡཱཏི ཨནིཙྩཱནུཔསྶནཱ, ཏཐཱ པཝཏྟཱ ཝིཔསྶནཱ, སཱ པན ཡསྨཱ ཨཏྟནཱ སཧགཏསཉྙཱཡ བྷཱཝིཏཱཡ ཝིབྷཱཝིཏཱ ཨེཝ ཧོཏཱིཏི ཝུཏྟཾ ‘‘ཨནིཙྩཱནུཔསྶནཱཡ སདྡྷིཾ ཨུཔྤནྣསཉྙཱ’’ཏི། སཉྙཱསཱིསེན ཝཱཡཾ ཝིཔསྶནཱཡ ཨེཝ ནིདྡེསོ། ཨནཏྟསཉྙཱདཱིསུཔི ཨེསེཝ ནཡོ། ལོཀིཡཝིཔསྶནཱཔི ཧོནྟི, ཡསྨཱ ‘‘ཨནིཙྩ’’ནྟིཨཱདིནཱ ཏཱ པཝཏྟནྟཱིཏི། ལོཀིཡཝིཔསྶནཱཔཱིཏི པི-སདྡེན མིསྶཀཱཔེཏྠ སནྟཱིཏི ཨཏྠཏོ ཨཱཔནྣནྟི ཨཏྠཱཔཏྟིསིདྡྷམཏྠཾ ནིདྡྷཱརེཏྭཱ སརཱུཔཏོ དསྶེཏུཾ ‘‘ཝིརཱགོ’’ཏིཨཱདི ཝུཏྟཾ། ཏཏྠ ཨཱགཏཝསེནཱཏི ཏཐཱ ཨཱགཏཔཱལི༹ཝསེན ‘‘ཝིརཱགོ ནིརོདྷོ’’ཏི ཧི ཏཏྠ ནིབྦཱནཾ ཝུཏྟནྟི ཨིདྷ ‘‘ཝིརཱགསཉྙཱ, ནིརོདྷསཉྙཱ’’ཏི ཝུཏྟསཉྙཱ ནིབྦཱནཱརམྨཎཱཔི སིཡུཾ། ཏེན ཝུཏྟཾ ‘‘དྭེ ལོཀུཏྟརཱཔི ཧོནྟཱི’’ཏི།

    140. Tebhūmake saṅkhāre ‘‘aniccā’’ti anupassati etāyāti aniccānupassanā, tathā pavattā vipassanā, sā pana yasmā attanā sahagatasaññāya bhāvitāya vibhāvitā eva hotīti vuttaṃ ‘‘aniccānupassanāya saddhiṃ uppannasaññā’’ti. Saññāsīsena vāyaṃ vipassanāya eva niddeso. Anattasaññādīsupi eseva nayo. Lokiyavipassanāpi honti, yasmā ‘‘anicca’’ntiādinā tā pavattantīti. Lokiyavipassanāpīti pi-saddena missakāpettha santīti atthato āpannanti atthāpattisiddhamatthaṃ niddhāretvā sarūpato dassetuṃ ‘‘virāgo’’tiādi vuttaṃ. Tattha āgatavasenāti tathā āgatapāḷivasena ‘‘virāgo nirodho’’ti hi tattha nibbānaṃ vuttanti idha ‘‘virāgasaññā, nirodhasaññā’’ti vuttasaññā nibbānārammaṇāpi siyuṃ. Tena vuttaṃ ‘‘dve lokuttarāpi hontī’’ti.

    ༡༤༡. མེཏྟཱ ཨེཏསྶ ཨཏྠཱིཏི མེཏྟཾ, ཙིཏྟཾ། ཏཾསམུཊྛཱནཾ ཀཱཡཀམྨཾ མེཏྟཾ ཀཱཡཀམྨཾ། ཨེས ནཡོ སེསདྭཡེཔི། ཨིམཱནིཔི མེཏྟཱཀཱཡཀམྨཱདཱིནི བྷིཀྑཱུནཾ ཝསེན ཨཱགཏཱནི ཏེསཾ སེཊྛཔརིསབྷཱཝཏོ། ཡཐཱ པན བྷིཀྑཱུསུཔི ལབྦྷནྟི, ཨེཝཾ གིཧཱིསུཔི ལབྦྷནྟི ཙཏུཔརིསསཱདྷཱརཎཏྟཱཏི ཏཾ དསྶེནྟོ ‘‘བྷིཀྑཱུནཉྷཱི’’ཏིཨཱདིམཱཧ། ཀཱམཾ ཨཱདིབྲཧྨཙརིཡཀདྷམྨསྶཝནེནཔི མེཏྟཱཀཱཡཀམྨཱནི ལབྦྷནྟི, ནིཔྤརིཡཱཡཏོ པན ཙཱརིཏྟདྷམྨསྶཝནེན ཨཡམཏྠོ ཨིཙྪིཏོཏི དསྶེནྟོ ‘‘ཨཱབྷིསམཱཙཱརིཀདྷམྨཔཱུརཎ’’ནྟི ཨཱཧ། ཏེཔིཊཀམྤི བུདྡྷཝཙནཾ པརིཔུཙྪནཨཏྠཀཐནཝསེན པཝཏྟིཡམཱནཾ ཧིཏཛ྄ཛྷཱསཡེན པཝཏྟིཏབྦཏོ།

    141. Mettā etassa atthīti mettaṃ, cittaṃ. Taṃsamuṭṭhānaṃ kāyakammaṃ mettaṃ kāyakammaṃ. Esa nayo sesadvayepi. Imānipi mettākāyakammādīni bhikkhūnaṃ vasena āgatāni tesaṃ seṭṭhaparisabhāvato. Yathā pana bhikkhūsupi labbhanti, evaṃ gihīsupi labbhanti catuparisasādhāraṇattāti taṃ dassento ‘‘bhikkhūnañhī’’tiādimāha. Kāmaṃ ādibrahmacariyakadhammassavanenapi mettākāyakammāni labbhanti, nippariyāyato pana cārittadhammassavanena ayamattho icchitoti dassento ‘‘ābhisamācārikadhammapūraṇa’’nti āha. Tepiṭakampi buddhavacanaṃ paripucchanaatthakathanavasena pavattiyamānaṃ hitajjhāsayena pavattitabbato.

    ཨཱཝཱིཏི པཀཱསཾ, པཀཱསབྷཱཝོ ཙེཏྠ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ སམྨུཁབྷཱཝཏོཏི ཨཱཧ ‘‘སམྨུཁཱ’’ཏི། རཧོཏི ཨཔྤཀཱསཾ, ཨཔྤཀཱསཏཱ ཙ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ པཙྩཀྑཱབྷཱཝཏོཏི ཨཱཧ ‘‘པརམྨུཁཱ’’ཏི། སཧཱཡབྷཱཝགམནཾ ཏེསཾ པུརཏོ། ཨུབྷཡེཧཱིཏི ནཝཀེཧི, ཐེརེཧི ཙ།

    Āvīti pakāsaṃ, pakāsabhāvo cettha yaṃ uddissa taṃ kāyakammaṃ karīyati, tassa sammukhabhāvatoti āha ‘‘sammukhā’’ti. Rahoti appakāsaṃ, appakāsatā ca yaṃ uddissa taṃ kāyakammaṃ karīyati, tassa paccakkhābhāvatoti āha ‘‘parammukhā’’ti. Sahāyabhāvagamanaṃ tesaṃ purato. Ubhayehīti navakehi, therehi ca.

    པགྒཡ྄ཧཱཏི པགྒཎྷིཏྭཱ ཨུཙྩཾ ཀཏྭཱ།

    Paggayhāti paggaṇhitvā uccaṃ katvā.

    ཀཱམཾ མེཏྟཱསིནེཧསིནིདྡྷཱནཾ ནཡནཱནཾ ཨུམྨཱིལནཱ, པསནྣེན མུཁེན ཨོལོཀནཉྩ མེཏྟཾ ཀཱཡཀམྨམེཝ, ཡསྶ པན ཙིཏྟསྶ ཝསེན ནཡནཱནཾ མེཏྟཱསིནེཧསིནིདྡྷཏཱ, མུཁསྶ ཙ པསནྣཏཱ, ཏཾ སནྡྷཱཡ ཝུཏྟཾ ‘‘མེཏྟཾ མནོཀམྨཾ ནཱམཱ’’ཏི།

    Kāmaṃ mettāsinehasiniddhānaṃ nayanānaṃ ummīlanā, pasannena mukhena olokanañca mettaṃ kāyakammameva, yassa pana cittassa vasena nayanānaṃ mettāsinehasiniddhatā, mukhassa ca pasannatā, taṃ sandhāya vuttaṃ ‘‘mettaṃ manokammaṃ nāmā’’ti.

    ལཱབྷསདྡོ ཀམྨསཱདྷནོ ‘‘ལཱབྷཱཝཏ, ལཱབྷོ ལདྡྷོ’’ཏིཨཱདཱིསུ ཝིཡ, སོ ཙེཏྠ ‘‘དྷམྨལདྡྷཱ’’ཏི ཝཙནཏོ ཨཏཱིཏཀཱལིཀོཏི ཨཱཧ ‘‘ཙཱིཝརཱདཡོ ལདྡྷཔཙྩཡཱ’’ཏི། དྷམྨཏོ ཨཱགཏཱཏི དྷམྨིཀཱ། ཏེནཱཧ ‘‘དྷམྨལདྡྷཱ’’ཏི། ཨིམམེཝ ཧི ཨཏྠཾ དསྶེཏུཾ ‘‘ཀུཧནཱདཱི’’ཏིཨཱདི ཝུཏྟཾ། ཙིཏྟེན ཝིབྷཛནཔུབྦཀཾ ཀཱཡེན ཝིབྷཛནནྟི མཱུལམེཝ དསྶེཏུཾ ‘‘ཨེཝཾ ཙིཏྟེན ཝིབྷཛན’’ནྟི ཝུཏྟཾ, ཏེན ཙིཏྟུཔྤཱདམཏྟེནཔི པཊིཝིབྷཱགོ ན ཀཱཏབྦོཏི དསྶེཏི། ཨཔྤཊིཝིབྷཏྟནྟི བྷཱཝནཔུཾསཀནིདྡེསོ, ཨཔྤཊིཝིབྷཏྟཾ ཝཱ ལཱབྷཾ བྷུཉྫཏཱིཏི ཀམྨནིདྡེསོ ཨེཝ།

    Lābhasaddo kammasādhano ‘‘lābhāvata, lābho laddho’’tiādīsu viya, so cettha ‘‘dhammaladdhā’’ti vacanato atītakālikoti āha ‘‘cīvarādayo laddhapaccayā’’ti. Dhammato āgatāti dhammikā. Tenāha ‘‘dhammaladdhā’’ti. Imameva hi atthaṃ dassetuṃ ‘‘kuhanādī’’tiādi vuttaṃ. Cittena vibhajanapubbakaṃ kāyena vibhajananti mūlameva dassetuṃ ‘‘evaṃ cittena vibhajana’’nti vuttaṃ, tena cittuppādamattenapi paṭivibhāgo na kātabboti dasseti. Appaṭivibhattanti bhāvanapuṃsakaniddeso, appaṭivibhattaṃ vā lābhaṃ bhuñjatīti kammaniddeso eva.

    ཏཾ ཏཾ ནེཝ གིཧཱིནཾ དེཏི ཨཏྟནོ ཨཱཛཱིཝསོདྷནཏྠཾ། ན ཨཏྟནཱ བྷུཉྫཏཱིཏི ཨཏྟནཱཝ ན པརིབྷུཉྫཏི ‘‘མཡ྄ཧཾ ཨསཱདྷཱརཎབྷོགིཏཱ མཱ ཧོཏཱུ’’ཏི། ‘‘པཊིགྒཎྷནྟོ ཙ…པེ॰… པསྶཏཱི’’ཏི ཨིམིནཱ ཏསྶ ལཱབྷསྶ ཏཱིསུཔི ཀཱལེསུ སཱདྷཱརཎཏོ ཋཔནཾ དསྶིཏཾ། ‘‘པཊིགྒཎྷནྟོ ཙ སངྒྷེན སཱདྷཱརཎཾ ཧོཏཱུ’’ཏི ཨིམིནཱ པཊིགྒཧཎཀཱལོ དསྶིཏོ, ‘‘གཧེཏྭཱ…པེ॰… པསྶཏཱི’’ཏི ཨིམིནཱ པཊིགྒཧིཏཀཱལོ, ཏདུབྷཡཾ པན ཏཱདིསེན པུབྦཱབྷོགེན ཝིནཱ ན ཧོཏཱིཏི ཨཏྠསིདྡྷོ པུརིམཀཱལོ། ཏཡིདཾ པཊིགྒཧཎཏོ པུབྦེ ཝསྶ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཧེསྶཱམཱི’’ཏི། པཊིགྒཎྷནྟསྶ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཎྷཱམཱི’’ཏི། པཊིགྒཧེཏྭཱ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཧིཏཾ མཡཱ’’ཏི ཨེཝཾ ཏིལཀྑཎསམྤནྣཾ ཀཏྭཱ ལདྡྷལཱབྷཾ ཨོསཱནལཀྑཎཾ ཨཝིཀོཔེཏྭཱ པརིབྷུཉྫནྟོ སཱདྷཱརཎབྷོགཱི, ཨཔྤཊིཝིབྷཏྟབྷོགཱི ཙ ཧོཏི།

    Taṃtaṃ neva gihīnaṃ deti attano ājīvasodhanatthaṃ. Na attanā bhuñjatīti attanāva na paribhuñjati ‘‘mayhaṃ asādhāraṇabhogitā mā hotū’’ti. ‘‘Paṭiggaṇhanto ca…pe… passatī’’ti iminā tassa lābhassa tīsupi kālesu sādhāraṇato ṭhapanaṃ dassitaṃ. ‘‘Paṭiggaṇhanto ca saṅghena sādhāraṇaṃ hotū’’ti iminā paṭiggahaṇakālo dassito, ‘‘gahetvā…pe… passatī’’ti iminā paṭiggahitakālo, tadubhayaṃ pana tādisena pubbābhogena vinā na hotīti atthasiddho purimakālo. Tayidaṃ paṭiggahaṇato pubbe vassa hoti ‘‘saṅghena sādhāraṇaṃ hotūti paṭiggahessāmī’’ti. Paṭiggaṇhantassa hoti ‘‘saṅghena sādhāraṇaṃ hotūti paṭiggaṇhāmī’’ti. Paṭiggahetvā hoti ‘‘saṅghena sādhāraṇaṃ hotūti paṭiggahitaṃ mayā’’ti evaṃ tilakkhaṇasampannaṃ katvā laddhalābhaṃ osānalakkhaṇaṃ avikopetvā paribhuñjanto sādhāraṇabhogī, appaṭivibhattabhogī ca hoti.

    ཨིམཾ པན སཱརཎཱིཡདྷམྨནྟི ཨིམཾ ཙཏུཏྠཾ སརིཏབྦཡུཏྟདྷམྨཾ། ན ཧི…པེ॰… གཎྷནྟི, ཏསྨཱ སཱདྷཱརཎབྷོགིཏཱ ཨེཝ དུསྶཱིལསྶ ནཏྠཱིཏི ཨཱརམྦྷོཔི ཏཱཝ ན སམྦྷཝཏི, ཀུཏོ པཱུརཎནྟི ཨདྷིཔྤཱཡོ། ‘‘པརིསུདྡྷསཱིལོ’’ཏི ཨིམིནཱ ལཱབྷསྶ དྷམྨིཀབྷཱཝཾ དསྶེཏི། ‘‘ཝཏྟཾ ཨཁཎྜེནྟོ’’ཏི ཨིམིནཱ ཨཔྤཊིཝིབྷཏྟབྷོགིཏཾ, སཱདྷཱརཎབྷོགིཏཉྩ དསྶེཏི། སཏི པན ཏདུབྷཡེ སཱརཎཱིཡདྷམྨོ པཱུརིཏོ ཨེཝ ཧོཏཱིཏི ཨཱཧ ‘‘པཱུརེཏཱི’’ཏི། ‘‘ཨོདིསྶཀཾ ཀཏྭཱ’’ཏི ཨེཏེན ཨནོདིསྶཀཾ ཀཏྭཱ པིཏུནོ, ཨཱཙརིཡུཔཛ྄ཛྷཱཡཱདཱིནཾ ཝཱ ཐེརཱསནཏོ པཊྛཱཡ དེནྟསྶ སཱརཎཱིཡདྷམྨོཡེཝ ཧོཏཱིཏི། སཱརཎཱིཡདྷམྨོ པནསྶ ན ཧོཏཱིཏི པཊིཛགྒནཊྛཱནེ ཨོདིསྶཀཾ ཀཏྭཱ དིནྣཏྟཱ། ཏེནཱཧ ‘‘པལིབོདྷཛགྒནཾ ནཱམ ཧོཏཱི’’ཏིཨཱདི། ཡདི ཨེཝཾ སབྦེན སབྦཾ སཱརཎཱིཡདྷམྨཔཱུརཀསྶ ཨོདིསྶཀདཱནཾ ན ཝཊྚཏཱིཏི? ནོ ན ཝཊྚཏི ཡུཏྟཊྛཱནེཏི དསྶེནྟོ ‘‘ཏེན པནཱ’’ཏིཨཱདིམཱཧ། གིལཱནཱདཱིནཾ ཨོདིསྶཀཾ ཀཏྭཱ དཱནཾ ཨཔྤཊིཝིབྷཱགཔཀྑིཀཾ ‘‘ཨསུཀསྶ ན དསྶཱམཱི’’ཏི པཊིཀྑེཔསྶ ཨབྷཱཝཏོ། བྱཏིརེཀཔྤདྷཱནོ ཧི པཊིཝིབྷཱགོ། ཏེནཱཧ ‘‘ཨཝསེས’’ནྟིཨཱདི། ཨདཱཏུམྤཱིཏི པི-སདྡེན དཱཏུམྤི ཝཊྚཏཱིཏི དསྶེཏི, ཏཉྩ ཁོ ཀརུཎཱཡནཝསེན, ན ཝཏྟཔཱུརཎཝསེན།

    Imaṃ pana sāraṇīyadhammanti imaṃ catutthaṃ saritabbayuttadhammaṃ. Na hi…pe… gaṇhanti, tasmā sādhāraṇabhogitā eva dussīlassa natthīti ārambhopi tāva na sambhavati, kuto pūraṇanti adhippāyo. ‘‘Parisuddhasīlo’’ti iminā lābhassa dhammikabhāvaṃ dasseti. ‘‘Vattaṃ akhaṇḍento’’ti iminā appaṭivibhattabhogitaṃ, sādhāraṇabhogitañca dasseti. Sati pana tadubhaye sāraṇīyadhammo pūrito eva hotīti āha ‘‘pūretī’’ti. ‘‘Odissakaṃkatvā’’ti etena anodissakaṃ katvā pituno, ācariyupajjhāyādīnaṃ vā therāsanato paṭṭhāya dentassa sāraṇīyadhammoyeva hotīti. Sāraṇīyadhammo panassa na hotīti paṭijagganaṭṭhāne odissakaṃ katvā dinnattā. Tenāha ‘‘palibodhajagganaṃ nāma hotī’’tiādi. Yadi evaṃ sabbena sabbaṃ sāraṇīyadhammapūrakassa odissakadānaṃ na vaṭṭatīti? No na vaṭṭati yuttaṭṭhāneti dassento ‘‘tena panā’’tiādimāha. Gilānādīnaṃ odissakaṃ katvā dānaṃ appaṭivibhāgapakkhikaṃ ‘‘asukassa na dassāmī’’ti paṭikkhepassa abhāvato. Byatirekappadhāno hi paṭivibhāgo. Tenāha ‘‘avasesa’’ntiādi. Adātumpīti pi-saddena dātumpi vaṭṭatīti dasseti, tañca kho karuṇāyanavasena, na vattapūraṇavasena.

    སུསིཀྑིཏཱཡཱཏི སཱརཎཱིཡདྷམྨཔཱུརཎཝིདྷིམྷི སུཊྛུ སིཀྑིཏཱཡ, སུཀུསལཱཡཱཏི ཨཏྠོ། ཨིདཱནི ཏསྶཱ ཀོསལླཾ དསྶེཏུཾ ‘‘སུསིཀྑིཏཱཡ ཧཱི’’ཏིཨཱདི ཝུཏྟཾ། ‘‘དྭཱདསཧི ཝསྶེཧི པཱུརཏི, ན ཏཏོ ཨོར’’ནྟི ཨིམིནཱ ཏསྶ དུཔྤཱུརཎཾ དསྶེཏི། ཏཐཱ ཧི སོ མཧཔྥལོ མཧཱནིསཾསོ, དིཊྛདྷམྨིཀེཧིཔི ཏཱཝ གརུཏརེཧི ཕལཱནིསཾསེཧི ཙ ཨནུགཏོ། ཏཾསམངྒཱི ཙ པུགྒལོ ཝིསེསལཱབྷཱི ཨརིཡཔུགྒལོ ཝིཡ ལོཀེ ཨཙྪརིཡབྦྷུཏདྷམྨསམནྣཱགཏོ ཧོཏི། ཏཐཱ ཧི སོ དུཔྤཛཧཾ དཱནམཡསྶ, སཱིལམཡསྶ ཙ པུཉྙསྶ པཊིཔཀྑདྷམྨཾ སུདཱུརེ ཝིཀྑམྦྷིཏཾ ཀཏྭཱ སུཝིསུདྡྷེན ཙེཏསཱ ལོཀེ པཱཀཊོ པཉྙཱཏོ ཧུཏྭཱ ཝིཧརཏི, ཏསྶིམམཏྠཾ བྱཏིརེཀཏོ, ཨནྭཡཏོ ཙ ཝིབྷཱཝེཏུཾ ‘‘སཙེ ཧཱི’’ཏིཨཱདི ཝུཏྟཾ, ཏཾ སུཝིཉྙེཡྻམེཝ།

    Susikkhitāyāti sāraṇīyadhammapūraṇavidhimhi suṭṭhu sikkhitāya, sukusalāyāti attho. Idāni tassā kosallaṃ dassetuṃ ‘‘susikkhitāya hī’’tiādi vuttaṃ. ‘‘Dvādasahi vassehi pūrati, na tato ora’’nti iminā tassa duppūraṇaṃ dasseti. Tathā hi so mahapphalo mahānisaṃso, diṭṭhadhammikehipi tāva garutarehi phalānisaṃsehi ca anugato. Taṃsamaṅgī ca puggalo visesalābhī ariyapuggalo viya loke acchariyabbhutadhammasamannāgato hoti. Tathā hi so duppajahaṃ dānamayassa, sīlamayassa ca puññassa paṭipakkhadhammaṃ sudūre vikkhambhitaṃ katvā suvisuddhena cetasā loke pākaṭo paññāto hutvā viharati, tassimamatthaṃ byatirekato, anvayato ca vibhāvetuṃ ‘‘sace hī’’tiādi vuttaṃ, taṃ suviññeyyameva.

    ཨིདཱནི ཡེ སམྤརཱཡིཀེ, དིཊྛདྷམྨིཀེ ཙ ཨཱནིསཾསེ དསྶེཏུཾ ‘‘ཨེཝ’’ནྟིཨཱདི ཝུཏྟཾ། ནེཝ ཨིསྶཱ, ན མཙྪརིཡཾ ཧོཏི ཙིརཀཱལབྷཱཝནཱཡ ཝིདྷུཏབྷཱཝཏོ། མནུསྶཱནཾ པིཡོ ཧོཏི པརིཙྩཱགསཱིལཏཱཡ ཝིསུདྡྷཏྟཱ། ཏེནཱཧ ‘‘དདཾ པིཡོ ཧོཏི བྷཛནྟི ནཾ བཧཱུ’’ཏིཨཱདི (ཨ॰ ནི॰ ༥.༣༤)། སུལབྷཔཙྩཡོ ཧོཏི དཱནཝསེན ཨུལཱ༹རཛ྄ཛྷཱསཡཱནཾ པཙྩཡལཱབྷསྶ ཨིདྷཱནིསཾསབྷཱཝཏོ དཱནསྶ། པཏྟགཏཾ ཨསྶ དིཡྻམཱནཾ ན ཁཱིཡཏི པཏྟགཏཝསེན དྭཱདསཝསྶིཀསྶ མཧཱཔཏྟསྶ ཨཝིཙྪེདེན པཱུརིཏཏྟཱ། ཨགྒབྷཎྜཾ ལབྷཏི དེཝསིཀཾ དཀྑིཎེཡྻཱནཾ ཨགྒཏོ པཊྛཱཡ དཱནསྶ དིནྣཏྟཱ། བྷཡེཝཱ…པེ॰… ཨཱཔཛྫནྟི དེཡྻཔཊིགྒཱཧཀཝིཀཔྤཾ ཨཀཏྭཱ ཨཏྟནི ནིརཔེཀྑཙིཏྟེན ཙིརཀཱལཾ དཱནཔཱུརཏཱཡ པསཱདིཏཙིཏྟཏྟཱ།

    Idāni ye samparāyike, diṭṭhadhammike ca ānisaṃse dassetuṃ ‘‘eva’’ntiādi vuttaṃ. Neva issā, na macchariyaṃ hoti cirakālabhāvanāya vidhutabhāvato. Manussānaṃ piyo hoti pariccāgasīlatāya visuddhattā. Tenāha ‘‘dadaṃ piyo hoti bhajanti naṃ bahū’’tiādi (a. ni. 5.34). Sulabhapaccayo hoti dānavasena uḷārajjhāsayānaṃ paccayalābhassa idhānisaṃsabhāvato dānassa. Pattagataṃ assa diyyamānaṃna khīyati pattagatavasena dvādasavassikassa mahāpattassa avicchedena pūritattā. Aggabhaṇḍaṃ labhati devasikaṃ dakkhiṇeyyānaṃ aggato paṭṭhāya dānassa dinnattā. Bhayevā…pe… āpajjanti deyyapaṭiggāhakavikappaṃ akatvā attani nirapekkhacittena cirakālaṃ dānapūratāya pasāditacittattā.

    ཏཏྲཱཏི ཏེསུ ཨཱནིསཾསེསུ ཝིབྷཱཝེཏབྦེསུ། ཨིམཱནི ཏཾ དཱིཔནཱནི ཝཏྠཱུནི ཀཱརཎཱནི། ཨལབྷནྟཱཔཱིཏི ཨམཧཱཔུཉྙཏཱཡ ན ལཱབྷིནོ སམཱནཱཔི། བྷིཀྑཱཙཱརམགྒསབྷཱགནྟི སབྷཱགཾ ཏབྦྷཱགིཡཾ བྷིཀྑཱཙཱརམགྒཾ ཛཱནནྟི།

    Tatrāti tesu ānisaṃsesu vibhāvetabbesu. Imāni taṃ dīpanāni vatthūni kāraṇāni. Alabhantāpīti amahāpuññatāya na lābhino samānāpi. Bhikkhācāramaggasabhāganti sabhāgaṃ tabbhāgiyaṃ bhikkhācāramaggaṃ jānanti.

    ཨནུཏྟརིམནུསྶདྷམྨཏྟཱ, ཐེརཱནཾ སཾསཡཝིནོདནཏྠཉྩ ‘‘སཱརཎཱིཡདྷམྨོ མེ བྷནྟེ པཱུརིཏོ’’ཏི ཨཱཧ། ཏཐཱ ཧི དུཏིཡཝཏྠུསྨིམྤི ཐེརེན ཨཏྟཱ པཀཱསིཏོ། མནུསྶཱནཾ པིཡཏཱཡ, སུལབྷཔཙྩཡཏཱཡཔི ཨིདཾ ཝཏྠུམེཝ། པཏྟགཏཱཁཱིཡནསྶ པན ཝིསེསཾ ཝིབྷཱཝནཏོ ‘‘ཨིདཾ ཏཱཝ…པེ॰… ཨེཏྠ ཝཏྠུ’’ནྟི ཝུཏྟཾ།

    Anuttarimanussadhammattā, therānaṃ saṃsayavinodanatthañca ‘‘sāraṇīyadhammo me bhante pūrito’’ti āha. Tathā hi dutiyavatthusmimpi therena attā pakāsito. Manussānaṃ piyatāya, sulabhapaccayatāyapi idaṃ vatthumeva. Pattagatākhīyanassa pana visesaṃ vibhāvanato ‘‘idaṃ tāva…pe… ettha vatthu’’nti vuttaṃ.

    གིརིབྷཎྜམཧཱཔཱུཛཱཡཱཏི ཙེཏིཡགིརིམྷི སཀལལངྐཱདཱིཔེ, ཡོཛནཔྤམཱཎེ སམུདྡེ ཙ ནཱཝཱསངྒྷཱཊཱདིཀེ ཋཔེཏྭཱ དཱིཔཔུཔྥགནྡྷཱདཱིཧི ཀརིཡམཱནམཧཱཔཱུཛཱཡཾ། པརིཡཱཡེནཔཱིཏི ལེསེནཔི། ཨནུཙྪཝིཀནྟི སཱརཎཱིཡདྷམྨཔཱུརཎཏོཔི ཨིདཾ ཡཐཱབྷཱུཏཔྤཝེདནཾ ཏུམྷཱཀཾ ཨནུཙྪཝིཀནྟི ཨཏྠོ།

    Giribhaṇḍamahāpūjāyāti cetiyagirimhi sakalalaṅkādīpe, yojanappamāṇe samudde ca nāvāsaṅghāṭādike ṭhapetvā dīpapupphagandhādīhi kariyamānamahāpūjāyaṃ. Pariyāyenapīti lesenapi. Anucchavikanti sāraṇīyadhammapūraṇatopi idaṃ yathābhūtappavedanaṃ tumhākaṃ anucchavikanti attho.

    ཨནཱརོཙེཏྭཱཝ པལཱཡིཾསུ ཙོརབྷཡེན། ‘‘ཨཏྟནོ དུཛྫཱིཝིཀཱཡཱ’’ཏི ཙ ཝདནྟི།

    Anārocetvāva palāyiṃsu corabhayena. ‘‘Attano dujjīvikāyā’’ti ca vadanti.

    ཝཊྚིསྶཏཱིཏི ཀཔྤིསྶཏི། ཐེརཱི སཱརཎཱིཡདྷམྨཔཱུརིཀཱ ཨཧོསི, ཐེརསྶ པན སཱིལཏེཛེནེཝ དེཝཏཱ ཨུསྶུཀྐཾ ཨཱཔཛྫི།

    Vaṭṭissatīti kappissati. Therī sāraṇīyadhammapūrikā ahosi, therassa pana sīlatejeneva devatā ussukkaṃ āpajji.

    ནཏྠི ཨེཏེསཾ ཁཎྜནྟི ཨཁཎྜཱནི། ཏཾ པན ནེསཾ ཁཎྜཾ དསྶེཏུཾ ‘‘ཡསྶཱ’’ཏིཨཱདི ཝུཏྟཾ། ཏཏྠ ཨུཔསམྤནྣསཱིལཱནཾ ཨུདྡེསཀྐམེན ཨཱདི ཨནྟཱ ཝེདིཏབྦཱ། ཏེནཱཧ ‘‘སཏྟསཱུ’’ཏིཨཱདི། ཨནུཔསམྤནྣསཱིལཱནཾ པན སམཱདཱནཀྐམེནཔི ཨཱདི ཨནྟཱ ལབྦྷནྟི། པརིཡནྟེ ཚིནྣསཱཊཀོ ཝིཡཱཏི ཝཏྠནྟེ, དསནྟེ ཝཱ ཚིནྣཝཏྠཾ ཝིཡ, ཝིསདིསཱུདཱཧརཎཾ ཙེཏཾ ‘‘ཨཁཎྜཱནཱི’’ཏི ཨིམསྶ ཨདྷིགཏཏྟཱ། ཨེཝཾ སེསཱནིཔི ཨུདཱཧརཎཱནི། ཁཎྜིཏབྷིནྣཏཱ ཁཎྜཾ, ཏཾ ཨེཏསྶ ཨཏྠཱིཏི ཁཎྜཾ, སཱིལཾ། ‘‘ཚིདྡ’’ནྟིཨཱདཱིསུཔི ཨེསེཝ ནཡོ། ཝེམཛ྄ཛྷེ བྷིནྣཾ ཝིནིཝིཛ྄ཛྷནཝསེན ཝིསབྷཱགཝཎྞེན གཱཝཱི ཝིཡཱཏི སམྦནྡྷོ། སབལརཧིཏཱནི ཨསབལཱནི། ཏཐཱ ཨཀམྨཱསཱནི། སཱིལསྶ ཏཎྷཱདཱསབྱཏོ མོཙནཾ ཝིཝཊྚཱུཔནིསྶཡབྷཱཝཱཔཱདནཾ། ཡསྨཱ ཙ ཏཾསམངྒཱིཔུགྒལོ སེརཱི སཡཾཝསཱི བྷུཛིསྶོ ནཱམ ཧོཏི, ཏསྨཱཔི བྷུཛིསྶཱནི། ཏེནེཝཱཧ ‘‘བྷུཛིསྶབྷཱཝཀཱརཎཏོ བྷུཛིསྶཱནཱི’’ཏི། སུཔརིསུདྡྷབྷཱཝེན པཱསཾསཏྟཱ ཝིཉྙུཔསཏྠཱནི། ཨིམིནཱཧཾ སཱིལེན དེཝོ ཝཱ བྷཝེཡྻཾ, དེཝཉྙཏརོ ཝཱ, ཏཏྠ ‘‘ནིཙྩོ དྷུཝོ སསྶཏོ’’ཏི, ‘‘སཱིལེན སུདྡྷཱི’’ཏི ཙ ཨེཝཾ ཨཱདིནཱ ཏཎྷཱདིཊྛཱིཧི ཨཔརཱམཊྛཏྟཱ། ‘‘ཨཡཾ ཏེ སཱིལེསུ དོསོ’’ཏི ཙཏཱུསུཔི ཝིཔཏྟཱིསུ ཡཱཡ ཀཱཡཙི ཝིཔཏྟིཡཱ དསྶནེན པརཱམཊྛུཾ ཨནུདྡྷཾསེཏུཾ། སམཱདྷིསཾཝཏྟནཔྤཡོཛནཱནི སམཱདྷིསཾཝཏྟནིཀཱནི།

    Natthi etesaṃ khaṇḍanti akhaṇḍāni. Taṃ pana nesaṃ khaṇḍaṃ dassetuṃ ‘‘yassā’’tiādi vuttaṃ. Tattha upasampannasīlānaṃ uddesakkamena ādi antā veditabbā. Tenāha ‘‘sattasū’’tiādi. Anupasampannasīlānaṃ pana samādānakkamenapi ādi antā labbhanti. Pariyante chinnasāṭako viyāti vatthante, dasante vā chinnavatthaṃ viya, visadisūdāharaṇaṃ cetaṃ ‘‘akhaṇḍānī’’ti imassa adhigatattā. Evaṃ sesānipi udāharaṇāni. Khaṇḍitabhinnatā khaṇḍaṃ, taṃ etassa atthīti khaṇḍaṃ, sīlaṃ. ‘‘Chidda’’ntiādīsupi eseva nayo. Vemajjhe bhinnaṃ vinivijjhanavasena visabhāgavaṇṇena gāvī viyāti sambandho. Sabalarahitāni asabalāni. Tathā akammāsāni. Sīlassa taṇhādāsabyato mocanaṃ vivaṭṭūpanissayabhāvāpādanaṃ. Yasmā ca taṃsamaṅgīpuggalo serī sayaṃvasī bhujisso nāma hoti, tasmāpi bhujissāni. Tenevāha ‘‘bhujissabhāvakāraṇatobhujissānī’’ti. Suparisuddhabhāvena pāsaṃsattā viññupasatthāni. Imināhaṃ sīlena devo vā bhaveyyaṃ, devaññataro vā, tattha ‘‘nicco dhuvo sassato’’ti, ‘‘sīlena suddhī’’ti ca evaṃ ādinā taṇhādiṭṭhīhi aparāmaṭṭhattā. ‘‘Ayaṃ te sīlesu doso’’ti catūsupi vipattīsu yāya kāyaci vipattiyā dassanena parāmaṭṭhuṃ anuddhaṃsetuṃ. Samādhisaṃvattanappayojanāni samādhisaṃvattanikāni.

    སམཱནབྷཱཝཱུཔགཏསཱིལཱཏི སཱིལསམྤཏྟིཡཱ སམཱནབྷཱཝཾ ཨུཔགཏསཱིལཱ སབྷཱགཝུཏྟིཀཱ། ཀཱམཾ པུཐུཛྫནཱནཉྩ ཙཏུཔཱརིསུདྡྷིསཱིལེ ནཱནཏྟཾ ན སིཡཱ, ཏཾ པན ན ཨེཀནྟིཀཾ, ཨིདཾ ཨེཀནྟིཀཾ ནིཡཏབྷཱཝཏོཏི ཨཱཧ ‘‘ནཏྠི མགྒསཱིལེ ནཱནཏྟ’’ནྟི། ཏཾ སནྡྷཱཡེཏཾ ཝུཏྟནྟི མགྒསཱིལཾ སནྡྷཱཡ ཨེཏཾ ‘‘ཡཱནི ཏཱནི སཱིལཱནཱི’’ཏིཨཱདི ཝུཏྟཾ།

    Samānabhāvūpagatasīlāti sīlasampattiyā samānabhāvaṃ upagatasīlā sabhāgavuttikā. Kāmaṃ puthujjanānañca catupārisuddhisīle nānattaṃ na siyā, taṃ pana na ekantikaṃ, idaṃ ekantikaṃ niyatabhāvatoti āha ‘‘natthi maggasīle nānatta’’nti. Taṃ sandhāyetaṃ vuttanti maggasīlaṃ sandhāya etaṃ ‘‘yāni tāni sīlānī’’tiādi vuttaṃ.

    ཡཱཡནྟི ཡཱ ཨཡཾ མཡ྄ཧཉྩེཝ ཏུམྷཱཀཉྩ པཙྩཀྑབྷཱུཏཱ ། དིཊྛཱིཏི མགྒསམྨཱདིཊྛི། ནིདྡོསཱཏི ནིདྷུཏདོསཱ, སམུཙྪིནྣརཱགཱདིཔཱཔདྷམྨཱཏི ཨཏྠོ། ནིཡྻཱཏཱིཏི ཝཊྚདུཀྑཏོ ནིསྶརཏི ནིགཙྪཏི། སཡཾ ནིཡྻནྟསྶེཝ ཧི ‘‘ཏཾསམངྒཱིཔུགྒལཾ ཝཊྚདུཀྑཏོ ནིཡྻཱཔེཏཱི’’ཏི ཝུཙྩཏི། ཡཱ སཏྠུ ཨནུསིཊྛི, ཏཾ ཀརོཏཱིཏི ཏཀྐརོ, ཏསྶ, ཡཐཱནུསིཊྛཾ པཊིཔཛྫནཀསྶཱཏི ཨཏྠོ། སམཱནདིཊྛིབྷཱཝནྟི སདིསདིཊྛིབྷཱཝཾ སཙྩསམྤཊིཝེདྷེན ཨབྷིནྣདིཊྛིབྷཱཝཾ། ཝུདྡྷིཡེཝཱཏི ཨརིཡཝིནཡེ གུཎེཧི ཝུཌྜྷིཡེཝ, ནོ པརིཧཱནཱིཏི ཨཡཾ ཨཔརིཧཱནིཡདྷམྨདེསནཱ ཨཏྟནོཔི སཱསནསྶ ཨདྡྷནིཡཏཾ ཨཱཀངྑནྟེན བྷགཝཏཱ ཨིདྷ དེསིཏཱ།

    Yāyanti yā ayaṃ mayhañceva tumhākañca paccakkhabhūtā . Diṭṭhīti maggasammādiṭṭhi. Niddosāti nidhutadosā, samucchinnarāgādipāpadhammāti attho. Niyyātīti vaṭṭadukkhato nissarati nigacchati. Sayaṃ niyyantasseva hi ‘‘taṃsamaṅgīpuggalaṃ vaṭṭadukkhato niyyāpetī’’ti vuccati. Yā satthu anusiṭṭhi, taṃ karotīti takkaro, tassa, yathānusiṭṭhaṃ paṭipajjanakassāti attho. Samānadiṭṭhibhāvanti sadisadiṭṭhibhāvaṃ saccasampaṭivedhena abhinnadiṭṭhibhāvaṃ. Vuddhiyevāti ariyavinaye guṇehi vuḍḍhiyeva, no parihānīti ayaṃ aparihāniyadhammadesanā attanopi sāsanassa addhaniyataṃ ākaṅkhantena bhagavatā idha desitā.

    ༡༤༢. ཨཱསནྣཔརིནིབྦཱནཏྟཱཏི ཀཏིཔཡམཱསཱདྷིཀེན སཾཝཙྪརམཏྟེན པརིནིབྦཱནཾ བྷཝིསྶཏཱིཏི ཀཏྭཱ ཝུཏྟཾ། ཨེཏཾཡེཝཱཏི ‘‘ཨིཏི སཱིལ’’ནྟིཨཱདིཀཾཡེཝ ཨིཏི སཱིལནྟི ཨེཏྠ ཨིཏི-སདྡོ པཀཱརཏྠོ, པརིམཱཎཏྠོ ཙ ཨེཀཛ྄ཛྷཾ ཀཏྭཱ གཧིཏོཏི ཨཱཧ ‘‘ཨེཝཾ སཱིལཾ ཨེཏྟཀཾ སཱིལ’’ནྟི། ཨེཝཾ སཱིལནྟི ཨེཝཾ པབྷེདཾ སཱིལཾ། ཨེཏྟཀནྟི ཨེཏཾ པརམཾ, ན ཨིཏོ བྷིཡྻོ། ཙཏུཔཱརིསུདྡྷིསཱིལནྟི མགྒསྶ སམྦྷཱརབྷཱུཏཾ ལོཀིཡཙཏུཔཱརིསུདྡྷིསཱིལཾ། ཙིཏྟེཀགྒཏཱ སམཱདྷཱིཏི ཨེཏྠཱཔི ཨེསེཝ ནཡོ། ཡསྨིཾ སཱིལེ ཋཏྭཱཏི ཡསྨིཾ ལོཀུཏྟརཀུསལསྶ པདཊྛཱནབྷཱུཏེ ‘‘པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏཱི’’ཏི (མ॰ ནི॰ ༣.༤༣༡; ཀཐཱ॰ ༨༧༤) ཨེཝཾ ཝུཏྟསཱིལེ པཏིཊྛཱཡ། ཨེསོཏི མགྒཕལསམཱདྷི། པརིབྷཱཝིཏོཏི ཏེན སཱིལེན སབྦསོ བྷཱཝིཏོ སམྦྷཱཝིཏོ། མཧཔྥལོ ཧོཏི མཧཱནིསཾསོཏི མགྒསམཱདྷི ཏཱཝ སཱམཉྙཕལེཧི མཧཔྥལོ, ཝཊྚདུཀྑཝཱུཔསམེན མཧཱནིསཾསོ། ཨིཏརོ པཊིཔྤསྶདྡྷིཔྤཧཱནེན མཧཔྥལོ, ནིབྦུཏིསུཁུཔྤཏྟིཡཱ མཧཱནིསཾསོ། ཡམྷི སམཱདྷིམྷི ཋཏྭཱཏི ཡསྨིཾ ལོཀུཏྟརཀུསལསྶ པདཊྛཱནབྷཱུཏེ པཱདཀཛ྄ཛྷཱནསམཱདྷིམྷི ཙེཝ ཝུཊྛཱནགཱམིནིསམཱདྷིམྷི ཙ ཋཏྭཱ། སཱཏི མགྒཕལཔཉྙཱ། ཏེན པརིབྷཱཝིཏཱཏི ཏེན ཡཐཱཝུཏྟསམཱདྷིནཱ སབྦསོ བྷཱཝིཏཱ པརིབྷཱཝིཏཱ། མཧཔྥལམཧཱནིསཾསཏཱ སམཱདྷིམྷི ཝུཏྟནཡེན ཝེདིཏབྦཱ། ཨཔི ཙ ཏེ བོཛ྄ཛྷངྒམགྒངྒཛྷཱནངྒཔྤབྷེདཧེཏུཏཱཡ མཧཔྥལཱ སཏྟདཀྑིཎེཡྻཔུགྒལཝིབྷཱགཧེཏུཏཱཡ མཧཱནིསཾསཱཏི ཝེདིཏབྦཱ། ཡཱཡ པཉྙཱཡ ཋཏྭཱཏི ཡཱཡཾ ཝིཔསྶནཱཔཉྙཱཡཾ, སམཱདྷིཝིཔསྶནཱཔཉྙཱཡཾ ཝཱ ཋཏྭཱ། སམཐཡཱནིཀསྶ ཧི སམཱདྷིསཧགཏཱཔི པཉྙཱ མགྒཱདྷིགམཱཡ ཝིསེསཔཙྩཡོ ཧོཏིཡེཝ། སམྨདེཝཱཏི སུཊྛུཡེཝ ཡཐཱ ཨཱསཝཱནཾ ལེསོཔི ནཱཝསིསྶཏི, ཨེཝཾ སབྦསོ ཨཱསཝེཧི ཝིམུཙྩཏི། ཨགྒམགྒཀྑཎཉྷི སནྡྷཱཡེཏཾ ཝུཏྟཾ།

    142.Āsannaparinibbānattāti katipayamāsādhikena saṃvaccharamattena parinibbānaṃ bhavissatīti katvā vuttaṃ. Etaṃyevāti ‘‘iti sīla’’ntiādikaṃyeva iti sīlanti ettha iti-saddo pakārattho, parimāṇattho ca ekajjhaṃ katvā gahitoti āha ‘‘evaṃ sīlaṃ ettakaṃ sīla’’nti. Evaṃ sīlanti evaṃ pabhedaṃ sīlaṃ. Ettakanti etaṃ paramaṃ, na ito bhiyyo. Catupārisuddhisīlanti maggassa sambhārabhūtaṃ lokiyacatupārisuddhisīlaṃ. Cittekaggatā samādhīti etthāpi eseva nayo. Yasmiṃ sīle ṭhatvāti yasmiṃ lokuttarakusalassa padaṭṭhānabhūte ‘‘pubbeva kho panassa kāyakammaṃ vacīkammaṃ ājīvo suparisuddho hotī’’ti (ma. ni. 3.431; kathā. 874) evaṃ vuttasīle patiṭṭhāya. Esoti maggaphalasamādhi. Paribhāvitoti tena sīlena sabbaso bhāvito sambhāvito. Mahapphalo hoti mahānisaṃsoti maggasamādhi tāva sāmaññaphalehi mahapphalo, vaṭṭadukkhavūpasamena mahānisaṃso. Itaro paṭippassaddhippahānena mahapphalo, nibbutisukhuppattiyā mahānisaṃso. Yamhi samādhimhiṭhatvāti yasmiṃ lokuttarakusalassa padaṭṭhānabhūte pādakajjhānasamādhimhi ceva vuṭṭhānagāminisamādhimhi ca ṭhatvā. Sāti maggaphalapaññā. Tena paribhāvitāti tena yathāvuttasamādhinā sabbaso bhāvitā paribhāvitā. Mahapphalamahānisaṃsatā samādhimhi vuttanayena veditabbā. Api ca te bojjhaṅgamaggaṅgajhānaṅgappabhedahetutāya mahapphalā sattadakkhiṇeyyapuggalavibhāgahetutāya mahānisaṃsāti veditabbā. Yāya paññāya ṭhatvāti yāyaṃ vipassanāpaññāyaṃ, samādhivipassanāpaññāyaṃ vā ṭhatvā. Samathayānikassa hi samādhisahagatāpi paññā maggādhigamāya visesapaccayo hotiyeva. Sammadevāti suṭṭhuyeva yathā āsavānaṃ lesopi nāvasissati, evaṃ sabbaso āsavehi vimuccati. Aggamaggakkhaṇañhi sandhāyetaṃ vuttaṃ.

    ༡༤༣. ལོཀིཡཏྠསདྡཱནཾ ཝིཡ ཨབྷིརནྟ-སདྡསྶ སིདྡྷི དཊྛབྦཱ། ཨབྷིརནྟཾ ཨབྷིརཏཾ ཨབྷིརཏཱིཏི ཧི ཨཏྠཏོ ཨེཀཾ། ཨབྷིརནྟ-སདྡོ ཙཱཡཾ ཨབྷིརུཙིཔརིཡཱཡོ, ན ཨསྶཱདཔརིཡཱཡོ། ཨསྶཱདཝསེན ཧི ཀཏྠཙི ཝསནྟསྶ ཨསྶཱདཝཏྠུཝིགམེན སིཡཱ ཏསྶ ཏཏྠ ཨནབྷིརཏི, ཡདིདཾ ཁཱིཎཱསཝཱནཾ ནཏྠི, པགེཝ བུདྡྷཱནནྟི ཨཱཧ ‘‘བུདྡྷཱནཾ…པེ॰… ནཏྠཱི’’ཏི། ཨབྷིརཏིཝསེན ཀཏྠཙི ཝསིཏྭཱ ཏདབྷཱཝཏོ ཨཉྙཏྠ གམནཾ ནཱམ བུདྡྷཱནཾ ནཏྠི། ཝེནེཡྻཝིནཡནཏྠཾ པན ཀཏྠཙི ཝསིཏྭཱ ཏསྨིཾ སིདྡྷེ ཝེནེཡྻཝིནཡནཏྠམེཝ ཏཏོ ཨཉྙཏྠ གཙྪནྟི, ཨཡམེཏྠ ཡཐཱརུཙི། ཨཱཡཱམཱཏི ཨེཏྠ ཨཱ-སདྡོ ‘‘ཨཱགཙྪཱ’’ཏི ཨིམིནཱ སམཱནཏྠོཏི ཨཱཧ ‘‘ཨེཧི ཡཱམཱ’’ཏི། ཨཡཱམཱཏི པན པཱཋེ ཨ-ཀཱརོ ནིཔཱཏམཏྟཾ། སནྟིཀཱཝཙརཏྟཱ ཐེརཾ ཨཱལཔཏི, ན པན ཏདཱ སཏྠུ སནྟིཀེ ཝསནྟཱནཾ བྷིཀྑཱུནཾ ཨབྷཱཝཏོ། ཨཔརིཙྪིནྣགཎནོ ཧི ཏདཱ བྷགཝཏོ སནྟིཀེ བྷིཀྑུསངྒྷོ ། ཏེནཱཧ ‘‘མཧཏཱ བྷིཀྑུསངྒྷེན སདྡྷི’’ནྟི། ཨམྦལཊྛིཀཱགམནནྟི ཨམྦལཊྛིཀཱགམནཔཊིསཾཡུཏྟཔཱཋམཱཧ། པཱཊལིགམནེཏི ཨེཏྠཱཔི ཨེསེཝ ནཡོ། ཨུཏྟཱནམེཝ ཨནནྟརཾ, ཧེཊྛཱ ཙ སཾཝཎྞིཏརཱུཔཏྟཱ།

    143. Lokiyatthasaddānaṃ viya abhiranta-saddassa siddhi daṭṭhabbā. Abhirantaṃ abhirataṃ abhiratīti hi atthato ekaṃ. Abhiranta-saddo cāyaṃ abhirucipariyāyo, na assādapariyāyo. Assādavasena hi katthaci vasantassa assādavatthuvigamena siyā tassa tattha anabhirati, yadidaṃ khīṇāsavānaṃ natthi, pageva buddhānanti āha ‘‘buddhānaṃ…pe… natthī’’ti. Abhirativasena katthaci vasitvā tadabhāvato aññattha gamanaṃ nāma buddhānaṃ natthi. Veneyyavinayanatthaṃ pana katthaci vasitvā tasmiṃ siddhe veneyyavinayanatthameva tato aññattha gacchanti, ayamettha yathāruci. Āyāmāti ettha ā-saddo ‘‘āgacchā’’ti iminā samānatthoti āha ‘‘ehi yāmā’’ti. Ayāmāti pana pāṭhe a-kāro nipātamattaṃ. Santikāvacarattā theraṃ ālapati, na pana tadā satthu santike vasantānaṃ bhikkhūnaṃ abhāvato. Aparicchinnagaṇano hi tadā bhagavato santike bhikkhusaṅgho . Tenāha ‘‘mahatā bhikkhusaṅghena saddhi’’nti. Ambalaṭṭhikāgamananti ambalaṭṭhikāgamanapaṭisaṃyuttapāṭhamāha. Pāṭaligamaneti etthāpi eseva nayo. Uttānameva anantaraṃ, heṭṭhā ca saṃvaṇṇitarūpattā.

    སཱརིཔུཏྟསཱིཧནཱདཝཎྞནཱ

    Sāriputtasīhanādavaṇṇanā

    ༡༤༥. ‘‘ཨཱཡསྨཱ སཱརིཔུཏྟོ’’ཏིཨཱདི པཱཋཛཱཏཾ། སམྤསཱདནཱིཡེཏི སམྤསཱདནཱིཡསུཏྟེ (དཱི॰ ནི॰ ༣.༡༤༡) ཝིཏྠཱརིཏཾ པོརཱཎཊྛཀཐཱཡཾ, ཏསྨཱ མཡམྤི ཏཏྠེཝ ནཾ ཨཏྠཏོ ཝིཏྠཱརཡིསྶཱམཱཏི ཨདྷིཔྤཱཡོ།

    145.‘‘Āyasmā sāriputto’’tiādi pāṭhajātaṃ. Sampasādanīyeti sampasādanīyasutte (dī. ni. 3.141) vitthāritaṃ porāṇaṭṭhakathāyaṃ, tasmā mayampi tattheva naṃ atthato vitthārayissāmāti adhippāyo.

    དུསྶཱིལཨཱདཱིནཝཝཎྞནཱ

    Dussīlaādīnavavaṇṇanā

    ༡༤༨. ཨཱགནྟྭཱ ཝསནྟི ཨེཏྠ ཨཱགནྟུཀཱཏི ཨཱཝསཐོ, ཏདེཝ ཨགཱརནྟི ཨཱཧ ‘‘ཨཱཝསཐཱགཱརནྟི ཨཱགནྟུཀཱནཾ ཨཱཝསཐགེཧ’’ནྟི། དྭིནྣཾ རཱཛཱུནནྟི ལིཙྪཝིརཱཛམགདྷརཱཛཱུནཾ། སཧཱཡཀཱཏི སེཝཀཱ། ཀུལཱནཱིཏི ཀུཊུམྦིཀེ། སནྠཏནྟི སནྠརི, སབྦཾ སནྠརི སབྦསནྠརི, ཏཾ སབྦསནྠརིཾ། བྷཱཝནཔུཾསཀནིདྡེསོ ཙཱཡཾ། ཏེནཱཧ ‘‘ཡཐཱ སབྦཾ སནྠཏཾ ཧོཏི, ཨེཝ’’ནྟི།

    148. Āgantvā vasanti ettha āgantukāti āvasatho, tadeva agāranti āha ‘‘āvasathāgāranti āgantukānaṃ āvasathageha’’nti. Dvinnaṃrājūnanti licchavirājamagadharājūnaṃ. Sahāyakāti sevakā. Kulānīti kuṭumbike. Santhatanti santhari, sabbaṃ santhari sabbasanthari, taṃ sabbasanthariṃ. Bhāvanapuṃsakaniddeso cāyaṃ. Tenāha ‘‘yathā sabbaṃ santhataṃ hoti, eva’’nti.

    ༡༤༩. དུསྶཱིལོཏི ཨེཏྠ དུ-སདྡོ ཨབྷཱཝཏྠོ ‘‘དུཔྤཉྙོ’’ཏིཨཱདཱིསུ (མ॰ ནི॰ ༡.༤༤༩; ཨ॰ ནི॰ ༥.༡༠) ཝིཡ, ན གརཧཏྠོཏི ཨཱཧ ‘‘ཨསཱིལོ ནིསྶཱིལོ’’ཏི། བྷིནྣསཾཝརོཏི ཨེཏྠ ཡོ སམཱདིནྣསཱིལོ ཀེནཙི ཀཱརཎེན སཱིལབྷེདཾ པཏྟོ, སོ ཏཱཝ བྷིནྣསཾཝརོ ཧོཏི། ཡོ པན སབྦེན སབྦཾ ཨསམཱདིནྣསཱིལོ ཨཱཙཱརཧཱིནོ, སོ ཀཐཾ བྷིནྣསཾཝརོ ནཱམ ཧོཏཱིཏི? སོཔི སཱདྷུསམཱཙཱརསྶ པརིཧཱནིཡསྶ བྷེདིཏཏྟཱ བྷིནྣསཾཝརོ ཨེཝ ནཱམ། ཝིསྶཊྛསཾཝརོ སཾཝརརཧིཏོཏི ཧི ཝུཏྟཾ ཧོཏི།

    149.Dussīloti ettha du-saddo abhāvattho ‘‘duppañño’’tiādīsu (ma. ni. 1.449; a. ni. 5.10) viya, na garahatthoti āha ‘‘asīlo nissīlo’’ti. Bhinnasaṃvaroti ettha yo samādinnasīlo kenaci kāraṇena sīlabhedaṃ patto, so tāva bhinnasaṃvaro hoti. Yo pana sabbena sabbaṃ asamādinnasīlo ācārahīno, so kathaṃ bhinnasaṃvaro nāma hotīti? Sopi sādhusamācārassa parihāniyassa bheditattā bhinnasaṃvaro eva nāma. Vissaṭṭhasaṃvaro saṃvararahitoti hi vuttaṃ hoti.

    ཏཾ ཏཾ སིཔྤཊྛཱནཾ། མཱགྷཱཏཀཱལེཏི ‘‘མཱ གྷཱཏེཐ པཱཎིནོ’’ཏི ཨེཝཾ མཱགྷཱཏཱཏི གྷོསནཾ གྷོསིཏདིཝསེ།

    Taṃ taṃ sippaṭṭhānaṃ. Māghātakāleti ‘‘mā ghātetha pāṇino’’ti evaṃ māghātāti ghosanaṃ ghositadivase.

    ཨབྦྷུགྒཙྪཏི པཱཔཀོ ཀིཏྟིསདྡོ།

    Abbhuggacchati pāpako kittisaddo.

    ཨཛ྄ཛྷཱསཡེན མངྐུ ཧོཏིཡེཝ ཝིཔྤཊིསཱརིབྷཱཝཏོ།

    Ajjhāsayena maṅku hotiyeva vippaṭisāribhāvato.

    ཏསྶཱཏི དུསྶཱིལསྶ། སམཱདཱཡ པཝཏྟིཊྛཱནནྟི ཨུཊྛཱཡ སམུཊྛཱཡ ཀཏཀཱརཎཾ། ཨཱཔཱཐཾ ཨཱགཙྪཏཱིཏི ཏཾ མནསོ ཨུཔཊྛཱཏི། ཨུམྨཱིལེཏྭཱ ཨིདྷལོཀནྟི ཨུམྨཱིལནཀཱལེ ཨཏྟནོ པུཏྟདཱརཱདིདསྶནཝསེན ཨིདྷ ལོཀཾ པསྶཏི། ནིམཱིལེཏྭཱ པརལོཀནྟི ནིམཱིལནཀཱལེ གཏིནིམིཏྟུཔཊྛཱནཝསེན པརལོཀཾ པསྶཏི། ཏེནཱཧ ‘‘ཙཏྟཱརོ ཨཔཱཡཱ’’ཏིཨཱདི། པཉྩམཔདནྟི ‘‘ཀཱཡསྶ བྷེདཱ’’ཏིཨཱདིནཱ ཝུཏྟོ པཉྩམོ ཨཱདཱིནཝཀོཊྛཱསོ།

    Tassāti dussīlassa. Samādāya pavattiṭṭhānanti uṭṭhāya samuṭṭhāya katakāraṇaṃ. Āpāthaṃ āgacchatīti taṃ manaso upaṭṭhāti. Ummīletvā idhalokanti ummīlanakāle attano puttadārādidassanavasena idha lokaṃ passati. Nimīletvā paralokanti nimīlanakāle gatinimittupaṭṭhānavasena paralokaṃ passati. Tenāha ‘‘cattāro apāyā’’tiādi. Pañcamapadanti ‘‘kāyassa bhedā’’tiādinā vutto pañcamo ādīnavakoṭṭhāso.

    སཱིལཝནྟཨཱནིསཾསཝཎྞནཱ

    Sīlavantaānisaṃsavaṇṇanā

    ༡༥༠. ཝུཏྟཝིཔརིཡཱཡེནཱཏི ཝུཏྟཱཡ ཨཱདཱིནཝཀཐཱཡ ཝིཔརིཡཱཡེན། ‘‘ཨཔྤམཏྟོ ཏཾ ཏཾ ཀསིཝཱཎིཛྫཱདིཾ ཡཐཱཀཱལཾ སམྤཱདེཏུཾ སཀྐོཏཱི’’ཏིཨཱདིནཱ ‘‘པཱསཾསཾ སཱིལམསྶ ཨཏྠཱིཏི སཱིལཝཱ། སཱིལསམྤནྣོཏི སཱིལེན སམནྣཱགཏོ། སམྤནྣསཱིལོ’’ཏི ཨེཝམཱདིཀཾ པན ཨཏྠཝཙནཾ སུཀརནྟི ཨནཱམཊྛཾ།

    150.Vuttavipariyāyenāti vuttāya ādīnavakathāya vipariyāyena. ‘‘Appamatto taṃ taṃ kasivāṇijjādiṃ yathākālaṃ sampādetuṃ sakkotī’’tiādinā ‘‘pāsaṃsaṃ sīlamassa atthīti sīlavā. Sīlasampannoti sīlena samannāgato. Sampannasīlo’’ti evamādikaṃ pana atthavacanaṃ sukaranti anāmaṭṭhaṃ.

    ༡༥༡. པཱལི༹མུཏྟཀཱཡཱཏི སངྒཱིཏིཨནཱརུལ༹ྷཱཡ དྷམྨིཀཐཱཡ། ཏཏྠེཝཱཏི ཨཱཝསཐཱགཱརེ ཨེཝ།

    151.Pāḷimuttakāyāti saṅgītianāruḷhāya dhammikathāya. Tatthevāti āvasathāgāre eva.

    པཱཊལིཔུཏྟནགརམཱཔནཝཎྞནཱ

    Pāṭaliputtanagaramāpanavaṇṇanā

    ༡༥༢. ཨིསྶརིཡམཏྟཱཡཱཏི ཨིསྶརིཡཔྤམཱཎེན, ཨིསྶརིཡེན ཙེཝ ཝིཏྟཱུཔཀརཎེན ཙཱཏི ཨེཝཾ ཝཱ ཨཏྠོ དཊྛབྦོ། ཨུཔབྷོགཱུཔཀརཎཱནིཔི ཧི ལོཀེ ‘‘མཏྟཱ’’ཏི ཝུཙྩནྟི། པཱཊལིགཱམཾ ནགརཾ ཀཏྭཱཏི པུབྦེ ‘‘པཱཊལིགཱམོ’’ཏི ལདྡྷནཱམཾ ཋཱནཾ ཨིདཱནི ནགརཾ ཀཏྭཱ། མཱཔེནྟཱིཏི པཏིཊྛཱཔེནྟི། ཨཱཡམུཁཔཙྪིནྡནཏྠནྟི ཨཱཡདྭཱརཱནཾ ཨུཔཙྪེདནཱཡ། ‘‘སཧསྶསེཝཱ’’ཏི ཝཱ པཱཋོ, སཧསྶསོ ཨེཝ། ཏེནཱཧ ‘‘ཨེཀེཀཝགྒཝསེན སཧསྶཾ སཧསྶཾ ཧུཏྭཱ’’ཏི། གྷརཝཏྠཱུནཱིཏི གྷརཔཏིཊྛཱཔནཊྛཱནཱནི། ཙིཏྟཱནི ནམནྟཱིཏི ཏཾཏཾདེཝཏཱནུབྷཱཝེན ཏཏྠ ཏཏྠེཝ ཙིཏྟཱནི ནམནྟི ཝཏྠུཝིཛྫཱཔཱཋཀཱནཾ, ཡཏྠ ཡཏྠ ཏཱཧི ཝཏྠཱུནི པརིགྒཧིཏཱནི། སིཔྤཱནུབྷཱཝེནཱཏི སིཔྤཱནུགཏཝིཛྫཱནུབྷཱཝེན། ནཱགགྒཱཧོཏི ནཱགཱནཾ ནིཝཱསཔྤརིགྒཧོ། སེསདྭཡེསུཔི ཨེསེཝ ནཡོ། པཱསཱཎོཏི ཨཔྤལཀྑཎཔཱསཱཎོ། ཁཱཎུཀོཏི ཡོ ཀོཙི ཁཱཎུཀོ ། སིཔྤཾ ཛཔྤིཏྭཱ ཏཱདིསཾ སཱརམྦྷཊྛཱནཾ པརིཧརིཏྭཱ ཨནཱརམྦྷེ ཋཱནེ ཏཱཧི ཝཏྠུཔརིགྒཱཧིཀཱཧི དེཝཏཱཧི སདྡྷིཾ མནྟཡམཱནཱ ཝིཡ ཏཾཏཾགེཧཱནི མཱཔེནྟི ཨུཔདེསདཱནཝསེན། ནེསནྟི ཝཏྠུཝིཛྫཱཔཱཋཀཱནཾ, སབྦཱསཾ དེཝཏཱནཾ། མངྒལཾ ཝཌྜྷཱཔེསྶནྟཱིཏི མངྒལཾ བྲཱུཧེསྶནྟི། པཎྜིཏདསྶནཱདཱིནི ཧི ཨུཏྟམམངྒལཱནི། ཏེནཱཧ ‘‘ཨཐ མཡ’’ནྟིཨཱདི།

    152.Issariyamattāyāti issariyappamāṇena, issariyena ceva vittūpakaraṇena cāti evaṃ vā attho daṭṭhabbo. Upabhogūpakaraṇānipi hi loke ‘‘mattā’’ti vuccanti. Pāṭaligāmaṃ nagaraṃ katvāti pubbe ‘‘pāṭaligāmo’’ti laddhanāmaṃ ṭhānaṃ idāni nagaraṃ katvā. Māpentīti patiṭṭhāpenti. Āyamukhapacchindanatthanti āyadvārānaṃ upacchedanāya. ‘‘Sahassasevā’’ti vā pāṭho, sahassaso eva. Tenāha ‘‘ekekavaggavasena sahassaṃ sahassaṃ hutvā’’ti. Gharavatthūnīti gharapatiṭṭhāpanaṭṭhānāni. Cittāni namantīti taṃtaṃdevatānubhāvena tattha tattheva cittāni namanti vatthuvijjāpāṭhakānaṃ, yattha yattha tāhi vatthūni pariggahitāni. Sippānubhāvenāti sippānugatavijjānubhāvena. Nāgaggāhoti nāgānaṃ nivāsappariggaho. Sesadvayesupi eseva nayo. Pāsāṇoti appalakkhaṇapāsāṇo. Khāṇukoti yo koci khāṇuko . Sippaṃ jappitvā tādisaṃ sārambhaṭṭhānaṃ pariharitvā anārambhe ṭhāne tāhi vatthupariggāhikāhi devatāhi saddhiṃ mantayamānāviya taṃtaṃgehāni māpenti upadesadānavasena. Nesanti vatthuvijjāpāṭhakānaṃ, sabbāsaṃ devatānaṃ. Maṅgalaṃ vaḍḍhāpessantīti maṅgalaṃ brūhessanti. Paṇḍitadassanādīni hi uttamamaṅgalāni. Tenāha ‘‘atha maya’’ntiādi.

    སདྡོ ཨབྦྷུགྒཙྪཏི ཨཝཡཝདྷམྨེན སམུདཱཡསྶ ཨཔདིསིཏབྦཏོ ཡཐཱ ‘‘ཨལངྐཏོ དེཝདཏྟོ’’ཏི།

    Saddo abbhuggacchati avayavadhammena samudāyassa apadisitabbato yathā ‘‘alaṅkato devadatto’’ti.

    ཨརིཡཀམནུསྶཱནནྟི ཨརིཡདེསཝཱསིམནུསྶཱནཾ། རཱསིཝསེནེཝཱཏི ‘‘སཧསྶཾ སཏསཧསྶ’’ནྟིཨཱདིནཱ རཱསིཝསེནེཝ, ཨཔྤཀསྶ པན བྷཎྜསྶ ཀཡཝིཀྐཡོ ཨཉྙཏྠཱཔི ལབྦྷཏེཝཱཏི ‘‘རཱསིཝསེནེཝཱ’’ཏི ཝུཏྟཾ། ཝཱཎིཛཱཡ པཐོ པཝཏྟིཊྛཱནནྟི ཝཎིཔྤཐོཏི པུརིམཝིཀཔྤེ ཨཏྠོ དུཏིཡཝིཀཔྤེ པན ཝཱཎིཛཱནཾ པཐོ པཝཏྟིཊྛཱནནྟི, ཝཎིཔྤཐོཏི ཨིམམཏྠཾ དསྶེནྟོ ‘‘ཝཱཎིཛཱནཾ ཝསནཊྛཱན’’ནྟི ཨཱཧ། བྷཎྜཔུཊེ བྷིནྡནྟི མོཙེནྟི ཨེཏྠཱཏི པུཊབྷེདནནྟི ཨཡམེཏྠ ཨཏྠོཏི ཨཱཧ ‘‘བྷཎྜཔུཊེ…པེ॰… ཝུཏྟཾ ཧོཏཱི’’ཏི།

    Ariyakamanussānanti ariyadesavāsimanussānaṃ. Rāsivasenevāti ‘‘sahassaṃ satasahassa’’ntiādinā rāsivaseneva, appakassa pana bhaṇḍassa kayavikkayo aññatthāpi labbhatevāti ‘‘rāsivasenevā’’ti vuttaṃ. Vāṇijāya patho pavattiṭṭhānanti vaṇippathoti purimavikappe attho dutiyavikappe pana vāṇijānaṃ patho pavattiṭṭhānanti, vaṇippathoti imamatthaṃ dassento ‘‘vāṇijānaṃ vasanaṭṭhāna’’nti āha. Bhaṇḍapuṭe bhindanti mocenti etthāti puṭabhedananti ayamettha atthoti āha ‘‘bhaṇḍapuṭe…pe… vuttaṃ hotī’’ti.

    ཙ-ཀཱརཏྠོ སམུཙྩཡཏྠོ ཝཱ-སདྡོ།

    Ca-kārattho samuccayattho vā-saddo.

    ༡༥༣. ཀཱལ༹ཀཎྞཱི སཏྟཱཏི ཨཏྟནཱ ཀཎྷདྷམྨབཧུལཏཱཡ པརེསཉྩ ཀཎྷཝིཔཱཀཱནཏྠནིབྦཏྟིནིམིཏྟཏཱཡ ‘‘ཀཱལ༹ཀཎྞཱི’’ཏི ལདྡྷནཱམཱ པརཱུཔདྡཝཀརཱ ཨཔྤེསཀྑསཏྟཱ། ཏནྟི བྷགཝནྟཾ། པུབྦཎྷསམཡནྟི པུབྦཎྷེ ཨེཀཾ སམཡཾ། གཱམཔྤཝིསནནཱིཧཱརེནཱཏི གཱམཔྤཝེསན ནིཝསནཱཀཱརེན། ཀཱཡཔཊིབདྡྷཾ ཀཏྭཱཏི ཙཱིཝརཾ པཱརུཔིཏྭཱ, པཏྟཾ ཧཏྠེན གཧེཏྭཱཏི ཨཏྠོ།

    153.Kāḷakaṇṇī sattāti attanā kaṇhadhammabahulatāya paresañca kaṇhavipākānatthanibbattinimittatāya ‘‘kāḷakaṇṇī’’ti laddhanāmā parūpaddavakarā appesakkhasattā. Tanti bhagavantaṃ. Pubbaṇhasamayanti pubbaṇhe ekaṃ samayaṃ. Gāmappavisananīhārenāti gāmappavesana nivasanākārena. Kāyapaṭibaddhaṃ katvāti cīvaraṃ pārupitvā, pattaṃ hatthena gahetvāti attho.

    ཨེཏྠཱཏི ཨེཏསྨིཾ ཝཱ སཀཔྤིཏཔྤདེསེ། སཉྙཏེཏི སམྨདེཝ སཉྙཏེ སུསཾཝུཏཀཱཡཝཱཙཱཙིཏྟེ།

    Etthāti etasmiṃ vā sakappitappadese. Saññateti sammadeva saññate susaṃvutakāyavācācitte.

    པཏྟིཾ དདེཡྻཱཏི ཨཏྟནཱ པསུཏཾ པུཉྙཾ ཏཱསཾ དེཝཏཱནཾ ཨནུཔྤདཛྫེཡྻ། ‘‘པཱུཛིཏཱ’’ཏིཨཱདཱིསུ ཏདེཝ པཏྟིདཱནཾ པཱུཛཱ, ཨནཱགཏེ ཨེཝ ཨུཔདྡཝེ ཨཱརཀྑསཾཝིདྷཱནཾ པཊིཔཱུཛཱ། ‘‘ཡེབྷུཡྻེན ཉཱཏིམནུསྶཱ ཉཱཏིཔེཏཱནཾ པཏྟིདཱནཱདིནཱ པཱུཛནམཱནནཱདཱིནི ཀརོནྟི ཨིམེ པན ཨཉྙཱཏཀཱཔི སམཱནཱ ཏཐཱ ཀརོནྟི, ཏསྨཱ ནེསཾ སཀྐཙྩཾ ཨཱརཀྑཱ སཾཝིདྷཱཏབྦཱ’’ཏི ཨཉྙམཉྙཾ སམྤཝཱརེཏྭཱ དེཝཏཱ ཏཏྠ ཨུསྶུཀྐཾ ཨཱཔཛྫནྟཱིཏི དསྶེནྟོ ‘‘ཨིམེ’’ཏིཨཱདིམཱཧ། བལིཀམྨཀརཎཾ མཱནནཾ, སམྤཏི ཨུཔྤནྣཔརིསྶཡཧརཎཾ པཊིམཱནནྟི དསྶེཏུཾ ‘‘ཨེཏེ’’ཏིཨཱདི ཝུཏྟཾ།

    Pattiṃ dadeyyāti attanā pasutaṃ puññaṃ tāsaṃ devatānaṃ anuppadajjeyya. ‘‘Pūjitā’’tiādīsu tadeva pattidānaṃ pūjā, anāgate eva upaddave ārakkhasaṃvidhānaṃ paṭipūjā. ‘‘Yebhuyyena ñātimanussā ñātipetānaṃ pattidānādinā pūjanamānanādīni karonti ime pana aññātakāpi samānā tathā karonti, tasmā nesaṃ sakkaccaṃ ārakkhā saṃvidhātabbā’’ti aññamaññaṃ sampavāretvā devatā tattha ussukkaṃ āpajjantīti dassento ‘‘ime’’tiādimāha. Balikammakaraṇaṃ mānanaṃ, sampati uppannaparissayaharaṇaṃ paṭimānanti dassetuṃ ‘‘ete’’tiādi vuttaṃ.

    སུནྡརཱནི པསྶཏཱིཏི སུནྡརཱནི ཨིཊྛཱནི ཨེཝ པསྶཏི, ན ཨནིཊྛཱནི།

    Sundarāni passatīti sundarāni iṭṭhāni eva passati, na aniṭṭhāni.

    ༡༥༤. ཨཱཎིཡོ ཀོཊྚེཏྭཱཏི ལཧུཀེ དཱརུདཎྜེ གཧེཏྭཱ ཀཝཱཊཕལཀེ ཝིཡ ཨཉྙམཉྙཾ སམྦནྡྷེ ཀཱཏུཾ ཨཱཎིཡོ ཀོཊྚེཏྭཱ། ནཱཝཱསངྑེཔེན ཀཏཾ ཨུལུ༹མྤཾ, ཝེལུ༹ནལཱ༹དིཀེ སངྒྷརིཏྭཱ ཝལླིཨཱདཱིཧི ཀལཱཔཝསེན བནྡྷིཏྭཱ ཀཏྟབྦཾ ཀུལླཾ།

    154.Āṇiyo koṭṭetvāti lahuke dārudaṇḍe gahetvā kavāṭaphalake viya aññamaññaṃ sambandhe kātuṃ āṇiyo koṭṭetvā. Nāvāsaṅkhepena kataṃ uḷumpaṃ, veḷunaḷādike saṅgharitvā valliādīhi kalāpavasena bandhitvā kattabbaṃ kullaṃ.

    ཨུདཀཊྛཱནསྶེཏཾ ཨདྷིཝཙནནྟི ཡཐཱཝུཏྟསྶ ཡསྶ ཀསྶཙི ཨུདཀཊྛཱནསྶ ཨེཏཾ ‘‘ཨཎྞཝ’’ནྟི ཨདྷིཝཙནཾ, སམུདྡསྶེཝཱཏི ཨདྷིཔྤཱཡོ། སརནྟི ཨིདྷ ནདཱི ཨདྷིཔྤེཏཱ སརཏི སནྡཏཱིཏི ཀཏྭཱ། གམྦྷཱིརཝིཏྠཏནྟི ཨགཱདྷཊྛེན གམྦྷཱིརཾ, སཀལལོཀཏྟཡབྱཱཔིཏཱཡ ཝིཏྠཏཾ། ཝིསཛྫཱཏི ཨནཱསཛྫ ཨཔྤཏྭཱ། པལླལཱནི ཏེསཾ ཨཏརཎཏོ། ཝིནཱཡེཝ ཀུལླེནཱཏི ཨཱིདིསཾ ཨུདཀཾ ཀུལླེན ཨཱིདིསེན ཝིནཱ ཨེཝ ཏིཎྞཱ མེདྷཱཝིནོ ཛནཱ, ཏཎྷཱསརཾ པན ཨརིཡམགྒསངྑཱཏཾ སེཏུཾ ཀཏྭཱ ནིཏྟིཎྞཱཏི ཡོཛནཱ།

    Udakaṭṭhānassetaṃ adhivacananti yathāvuttassa yassa kassaci udakaṭṭhānassa etaṃ ‘‘aṇṇava’’nti adhivacanaṃ, samuddassevāti adhippāyo. Saranti idha nadī adhippetā sarati sandatīti katvā. Gambhīravitthatanti agādhaṭṭhena gambhīraṃ, sakalalokattayabyāpitāya vitthataṃ. Visajjāti anāsajja appatvā. Pallalāni tesaṃ ataraṇato. Vināyeva kullenāti īdisaṃ udakaṃ kullena īdisena vinā eva tiṇṇā medhāvino janā, taṇhāsaraṃ pana ariyamaggasaṅkhātaṃ setuṃ katvā nittiṇṇāti yojanā.

    པཋམབྷཱཎཝཱརཝཎྞནཱ ནིཊྛིཏཱ།

    Paṭhamabhāṇavāravaṇṇanā niṭṭhitā.

    ཨརིཡསཙྩཀཐཱཝཎྞནཱ

    Ariyasaccakathāvaṇṇanā

    ༡༥༥. མཧཱཔནཱདསྶ རཉྙོ། པཱསཱདཀོཊིཡཾ ཀཏགཱམོཏི པཱསཱདསྶ པཏིཏཐུཔིཀཱཡ པཏིཊྛིཏཊྛཱནེ ནིཝིཊྛགཱམོ། ཨརིཡབྷཱཝཀརཱནནྟི ཡེ པཊིཝིཛ྄ཛྷནྟི, ཏེསཾ ཨརིཡབྷཱཝཀརཱནཾ ནིམིཏྟསྶ ཀཏྟུབྷཱཝཱུཔཙཱརཝསེནེཝ ཝུཏྟཾ། ཏཙྪཱཝིཔལླཱསབྷཱུཏབྷཱཝེན སཙྩཱནཾ། ཨནུབོདྷོ པུབྦབྷཱགིཡཾ ཉཱཎཾ, པཊིཝེདྷོ མགྒཉཱཎེན ཨབྷིསམཡོ, ཏཏྠ ཡསྨཱ ཨནུབོདྷཔུབྦཀོ པཊིཝེདྷོ ཨནུབོདྷེན ཝིནཱ ན ཧོཏི, ཨནུབོདྷོཔི ཨེཀཙྩོ པཊིཝེདྷེན སམྦནྡྷོ, ཏདུབྷཡཱབྷཱཝཧེཏུཀཉྩ ཝཊྚེཝ སཾསརཎཾ, ཏསྨཱ ཝུཏྟཾ པཱལི༹ཡཾ ‘‘ཨནནུབོདྷཱ…པེ॰… ཏུམྷཱཀཉྩཱ’’ཏི། པཊིསནྡྷིགྒཧཎཝསེན བྷཝཏོ བྷཝནྟརཱུཔགམནཾ སནྡྷཱཝནཾ, ཨཔརཱཔརཾ ཙཝནུཔཔཛྫནཝསེན སཉྩརཎཾ སཾསརཎནྟི ཨཱཧ ‘‘བྷཝཏོ’’ཏིཨཱདི། སནྡྷཱཝིཏསཾསརིཏཔདཱནཾ ཀམྨསཱདྷནཏཾ སནྡྷཱཡཱཧ ‘‘མཡཱ ཙ ཏུམྷེཧི ཙཱ’’ཏི པཋམཝིཀཔྤེ། དུཏིཡཝིཀཔྤེ པན བྷཱཝསཱདྷནཏཾ ཧདཡེ ཀཏྭཱ ‘‘མམཉྩེཝ ཏུམྷཱཀཉྩཱ’’ཏི ཡཐཱརུཏཝསེནེཝ ཝུཏྟཾ། ནཡནསམཏྠཱཏི པཱཔནསམཏྠཱ, དཱིགྷརཛྫུནཱ བདྡྷསཀུཎཾ ཝིཡ རཛྫུཧཏྠོ པུརིསོ དེསནྟརཾ ཏཎྷཱརཛྫུནཱ བདྡྷཾ སཏྟསནྟཱནཾ ཨབྷིསངྑཱརོ བྷཝནྟརཾ ནེཏི ཨེཏཱཡཱཏི བྷཝནེཏྟི, ཏཎྷཱ, སཱ ཨརིཡམགྒསཏྠེན སུཊྛུ ཧཏཱ ཚིནྣཱཏི བྷཝནེཏྟིསམཱུཧཏཱ།

    155.Mahāpanādassa rañño. Pāsādakoṭiyaṃkatagāmoti pāsādassa patitathupikāya patiṭṭhitaṭṭhāne niviṭṭhagāmo. Ariyabhāvakarānanti ye paṭivijjhanti, tesaṃ ariyabhāvakarānaṃ nimittassa kattubhāvūpacāravaseneva vuttaṃ. Tacchāvipallāsabhūtabhāvena saccānaṃ. Anubodho pubbabhāgiyaṃ ñāṇaṃ, paṭivedho maggañāṇena abhisamayo, tattha yasmā anubodhapubbako paṭivedho anubodhena vinā na hoti, anubodhopi ekacco paṭivedhena sambandho, tadubhayābhāvahetukañca vaṭṭeva saṃsaraṇaṃ, tasmā vuttaṃ pāḷiyaṃ ‘‘ananubodhā…pe… tumhākañcā’’ti. Paṭisandhiggahaṇavasena bhavato bhavantarūpagamanaṃ sandhāvanaṃ, aparāparaṃ cavanupapajjanavasena sañcaraṇaṃ saṃsaraṇanti āha ‘‘bhavato’’tiādi. Sandhāvitasaṃsaritapadānaṃ kammasādhanataṃ sandhāyāha ‘‘mayā ca tumhehi cā’’ti paṭhamavikappe. Dutiyavikappe pana bhāvasādhanataṃ hadaye katvā ‘‘mamañceva tumhākañcā’’ti yathārutavaseneva vuttaṃ. Nayanasamatthāti pāpanasamatthā, dīgharajjunā baddhasakuṇaṃ viya rajjuhattho puriso desantaraṃ taṇhārajjunā baddhaṃ sattasantānaṃ abhisaṅkhāro bhavantaraṃ neti etāyāti bhavanetti, taṇhā, sā ariyamaggasatthena suṭṭhu hatā chinnāti bhavanettisamūhatā.

    ཨནཱཝཏྟིདྷམྨསམྦོདྷིཔརཱཡཎཝཎྞནཱ

    Anāvattidhammasambodhiparāyaṇavaṇṇanā

    ༡༥༦. དྭེ གཱམཱ ‘‘ནཱཏིཀཱ’’ཏི ཨེཝཾ ལདྡྷནཱམོ, ཉ-ཀཱརསྶ ཙཱཡཾ ན-ཀཱརཱདེསེན ནིདྡེསོ ‘‘ཨནིམིཏྟཱ ན ནཱཡརེ’’ཏིཨཱདཱིསུ (ཝིསུདྡྷི॰ ༡.༡༧༤; ཛཱ॰ ཨཊྛ॰ ༢.༢.༣༤) ཝིཡ། ཏེནཱཧ ‘‘ཉཱཏིགཱམཀེ’’ཏི ། གིཉྫཀཱ ཝུཙྩནྟི ཨིཊྛཀཱ, གིཉྫཀཱཧི ཨེཝ ཀཏོ ཨཱཝསཐོཏི གིཉྫཀཱཝསཐོ ། སོ ཀིར ཨཱཝཱསོ ཡཐཱ སུདྷཱཔརིཀམྨེན སམྤཡོཛནཾ ནཏྠི, ཨེཝཾ ཨིཊྛཀཱཧི ཨེཝ ཙིནིཏྭཱ ཚཱདེཏྭཱ ཀཏོ། ཏེན ཝུཏྟཾ ‘‘ཨིཊྛཀཱམཡེ ཨཱཝསཐེ’’ཏི། ཏུལཱདཎྜཀཝཱཊཕལཀཱནི པན དཱརུམཡཱནེཝ།

    156.Dve gāmā ‘‘nātikā’’ti evaṃ laddhanāmo, ña-kārassa cāyaṃ na-kārādesena niddeso ‘‘animittā na nāyare’’tiādīsu (visuddhi. 1.174; jā. aṭṭha. 2.2.34) viya. Tenāha ‘‘ñātigāmake’’ti . Giñjakā vuccanti iṭṭhakā, giñjakāhi eva kato āvasathoti giñjakāvasatho. So kira āvāso yathā sudhāparikammena sampayojanaṃ natthi, evaṃ iṭṭhakāhi eva cinitvā chādetvā kato. Tena vuttaṃ ‘‘iṭṭhakāmaye āvasathe’’ti. Tulādaṇḍakavāṭaphalakāni pana dārumayāneva.

    ༡༥༧. ཨོརཾ ཝུཙྩཏི ཀཱམདྷཱཏུ, པཙྩཡབྷཱཝེན ཏཾ ཨོརཾ བྷཛནྟཱིཏི ཨོརམྦྷཱགིཡཱནི, ཨོརམྦྷཱགསྶ ཝཱ ཧིཏཱནི ཨོརམྦྷཱགིཡཱནི། ཏེནཱཧ ‘‘ཧེཊྛཱབྷཱགིཡཱན’’ནྟིཨཱདི། ཏཱིཧི མགྒེཧཱིཏི ཧེཊྛིམེཧི ཏཱིཧི མགྒེཧི། ཏེཧི པཧཱཏབྦཏཱཡ ཧི ནེསཾ སཾཡོཛནཱནཾ ཨོརམྦྷཱགིཡཏཱ། ཨོརམྦྷཉྫིཡཱནི ཝཱ ཨོརམྦྷཱགིཡཱནི ཝུཏྟཱནི ནིརུཏྟིནཡེན། ཨིདཱནི བྱཏིརེཀམུཁེན ནེསཾ ཨོརམྦྷཱགིཡབྷཱཝཾ ཝིབྷཱཝེཏུཾ ‘‘ཏཏྠཱ’’ཏིཨཱདི ཝུཏྟཾ། ཝིཀྑམྦྷིཏཱནི སམཏྠཏཱཝིགྷཱཏེན པུཐུཛྫནཱནཾ, སམུཙྪིནྣཱནི སབྦསོ ཨབྷཱཝེན ཨརིཡཱནཾ རཱུཔཱརཱུཔབྷཝཱུཔཔཏྟིཡཱ ཝིབནྡྷཱཡ ན ཧོནྟཱིཏི ཝུཏྟཾ ‘‘ཨཝིཀྑམྦྷིཏཱནི ཨསམུཙྪིནྣཱནཱི’’ཏི། ནིབྦཏྟཝསེནཱཏི པཊིསནྡྷིགྒཧཎཝསེན། གནྟུཾ ན དེནྟི མཧགྒཏགཱམིཀམྨཱཡཱུཧནསྶ ཝིནིབནྡྷནཏོ། སཀྐཱཡདིཊྛིཨཱདཱིནི ཏཱིཎི སཾཡོཛནཱནི ཀཱམཙྪནྡབྱཱཔཱདཱ ཝིཡ མཧགྒཏཱུཔཔཏྟིཡཱ ཨཝིནིབནྡྷབྷཱུཏཱནིཔི ཀཱམབྷཝཱུཔཔཏྟིཡཱ ཝིསེསཔཙྩཡཏྟཱ ཏཏྠ མཧགྒཏབྷཝེ ནིབྦཏྟམྤི ཏནྣིབྦཏྟིཧེཏུཀམྨཔརིཀྑཡེ ཀཱམབྷཝཱུཔཔཏྟིཔཙྩཡཏཱཡ མཧགྒཏབྷཝཏོ ཨཱནེཏྭཱ པུན ཨིདྷེཝ ཀཱམབྷཝེ ཨེཝ ནིབྦཏྟཱཔེནྟི, ཏསྨཱ སབྦཱནིཔི པཉྩཔི སཾཡོཛནཱནི ཨོརམྦྷཱགིཡཱནི ཨེཝ། པཊིསནྡྷིཝསེན ཨནཱགམནསབྷཱཝཱཏི པཊིསནྡྷིགྒཧཎཝསེན ཏསྨཱ ལོཀཱ ཨིདྷ ན ཨཱགམནསབྷཱཝཱ། བུདྡྷདསྶནཐེརདསྶནདྷམྨསྶཝནཱནཾ པནཏྠཱཡསྶ ཨཱགམནཾ ཨནིཝཱརིཏཾ།

    157.Oraṃ vuccati kāmadhātu, paccayabhāvena taṃ oraṃ bhajantīti orambhāgiyāni, orambhāgassa vā hitāni orambhāgiyāni. Tenāha ‘‘heṭṭhābhāgiyāna’’ntiādi. Tīhi maggehīti heṭṭhimehi tīhi maggehi. Tehi pahātabbatāya hi nesaṃ saṃyojanānaṃ orambhāgiyatā. Orambhañjiyāni vā orambhāgiyāni vuttāni niruttinayena. Idāni byatirekamukhena nesaṃ orambhāgiyabhāvaṃ vibhāvetuṃ ‘‘tatthā’’tiādi vuttaṃ. Vikkhambhitāni samatthatāvighātena puthujjanānaṃ, samucchinnāni sabbaso abhāvena ariyānaṃ rūpārūpabhavūpapattiyā vibandhāya na hontīti vuttaṃ ‘‘avikkhambhitāni asamucchinnānī’’ti. Nibbattavasenāti paṭisandhiggahaṇavasena. Gantuṃ na denti mahaggatagāmikammāyūhanassa vinibandhanato. Sakkāyadiṭṭhiādīni tīṇi saṃyojanāni kāmacchandabyāpādā viya mahaggatūpapattiyā avinibandhabhūtānipi kāmabhavūpapattiyā visesapaccayattā tattha mahaggatabhave nibbattampi tannibbattihetukammaparikkhaye kāmabhavūpapattipaccayatāya mahaggatabhavato ānetvā puna idheva kāmabhave eva nibbattāpenti, tasmā sabbānipi pañcapi saṃyojanāni orambhāgiyāni eva. Paṭisandhivasena anāgamanasabhāvāti paṭisandhiggahaṇavasena tasmā lokā idha na āgamanasabhāvā. Buddhadassanatheradassanadhammassavanānaṃ panatthāyassa āgamanaṃ anivāritaṃ.

    ཀདཱཙི ཀརཧཙི ཨུཔྤཏྟིཡཱ སཝིརལཱ༹ཀཱརཏཱ པརིཡུཊྛཱནམནྡཏཱཡ ཨབཧལཏཱཏི དྭེདྷཱཔི ཏནུབྷཱཝོ། ཨབྷིཎྷནྟི བཧུསོ། བཧལབཧལཱཏི ཏིབྦཏིབྦཱ། ཡཏྠ ཨུཔྤཛྫནྟི, ཏཾ སནྟཱནཾ མདྡནྟཱ, ཕརནྟཱ, སཱདྷེནྟཱ, ཨནྡྷཀཱརཾ ཀརོནྟཱ ཨུཔྤཛྫནྟི, དྭཱིཧི པན མགྒེཧི པཧཱིནཏྟཱ ཏནུཀཏནུཀཱ མནྡམནྡཱ ཨུཔྤཛྫནྟི། ‘‘པུཏྟདྷཱིཏརོ ཧོནྟཱི’’ཏི ཨིདཾ ཨཀཱརཎཾ། ཏཐཱ ཧི ཨངྒཔཙྩངྒཔརཱམསནམཏྟེནཔི ཏེ ཧོནྟི། ཨིདནྟི ‘‘རཱགདོསམོཧཱནཾ ཏནུཏྟཱ’’ཏི ཨིདཾ ཝཙནཾ། བྷཝཏནུཀཝསེནཱཏི ཨཔྤཀབྷཝཝསེན། ཏནྟི མཧཱསིཝཏྠེརསྶ ཝཙནཾ པཊིཀྑིཏྟནྟི སམྦནྡྷོ། ཡེ བྷཝཱ ཨརིཡཱནཾ ལབྦྷནྟི, ཏེ པརིཔུཎྞལཀྑཎབྷཝཱ ཨེཝ། ཡེ ན ལབྦྷནྟི, ཏཏྠ ཀཱིདིསཾ ཏཾ བྷཝཏནུཀཾ, ཏསྨཱ ཨུབྷཡཐཱཔི བྷཝཏནུཀསྶ ཨསམྦྷཝོ ཨེཝཱཏི དསྶེཏུཾ ‘‘སོཏཱཔནྣསྶཱ’’ཏིཨཱདི ཝུཏྟཾ། ཨཊྛམེ བྷཝེ བྷཝཏནུཀཾ ནཏྠི ཨཊྛམསྶེཝ བྷཝསྶ སབྦསྶེཝ ཨབྷཱཝཏོ། སེསེསུཔི ཨེསེཝ ནཡོ།

    Kadāci karahaci uppattiyā saviraḷākāratā pariyuṭṭhānamandatāya abahalatāti dvedhāpi tanubhāvo. Abhiṇhanti bahuso. Bahalabahalāti tibbatibbā. Yattha uppajjanti, taṃ santānaṃ maddantā, pharantā, sādhentā, andhakāraṃ karontā uppajjanti, dvīhi pana maggehi pahīnattā tanukatanukā mandamandā uppajjanti. ‘‘Puttadhītaro hontī’’ti idaṃ akāraṇaṃ. Tathā hi aṅgapaccaṅgaparāmasanamattenapi te honti. Idanti ‘‘rāgadosamohānaṃ tanuttā’’ti idaṃ vacanaṃ. Bhavatanukavasenāti appakabhavavasena. Tanti mahāsivattherassa vacanaṃ paṭikkhittanti sambandho. Ye bhavā ariyānaṃ labbhanti, te paripuṇṇalakkhaṇabhavā eva. Ye na labbhanti, tattha kīdisaṃ taṃ bhavatanukaṃ, tasmā ubhayathāpi bhavatanukassa asambhavo evāti dassetuṃ ‘‘sotāpannassā’’tiādi vuttaṃ. Aṭṭhame bhave bhavatanukaṃ natthi aṭṭhamasseva bhavassa sabbasseva abhāvato. Sesesupi eseva nayo.

    ཀཱམཱཝཙརལོཀཾ སནྡྷཱཡ ཝུཏྟཾ ཨིཏརསྶ ལོཀསྶ ཝསེན ཏཐཱ ཝཏྟུཾ ཨསཀྐུཎེཡྻཏྟཱ། ཡོ ཧི སཀདཱགཱམཱི དེཝམནུསྶལོཀེསུ ཝོམིསྶཀཝསེན ནིབྦཏྟཏི, སོཔི ཀཱམབྷཝཝསེནེཝ པརིཙྪིནྡིཏབྦོ། བྷགཝཏཱ ཙ ཀཱམལོཀེ ཋཏྭཱ ‘‘སཀིདེཝ ཨིམཾ ལོཀཾ ཨཱགནྟྭཱ’’ཏི ཝུཏྟཾ, ‘‘ཨིམཾ ལོཀཾ ཨཱགནྟྭཱ’’ཏི ཙ ཨིམིནཱ པཉྩསུ སཀདཱགཱམཱིསུ ཙཏྟཱརོ ཝཛྫེཏྭཱ ཨེཀོཝ གཧིཏོ། ཨེཀཙྩོ ཧི ཨིདྷ སཀདཱགཱམིཕལཾ པཏྭཱ ཨིདྷེཝ པརིནིབྦཱཡཏི, ཨེཀཙྩོ ཨིདྷ པཏྭཱ དེཝལོཀེ པརིནིབྦཱཡཏི, ཨེཀཙྩོ དེཝལོཀེ པཏྭཱ ཏཏྠེཝ པརིནིབྦཱཡཏི, ཨེཀཙྩོ དེཝལོཀེ པཏྭཱ ཨིདྷཱུཔཔཛྫིཏྭཱ པརིནིབྦཱཡཏི, ཨིམེ ཙཏྟཱརོ ཨིདྷ ན ལབྦྷནྟི། ཡོ པན ཨིདྷ པཏྭཱ དེཝལོཀེ ཡཱཝཏཱཡུཀཾ ཝསིཏྭཱ པུན ཨིདྷཱུཔཔཛྫིཏྭཱ པརིནིབྦཱཡཏི, ཨཡཾ ཨིདྷ ཨདྷིཔྤེཏོ། ཨཊྛཀཐཱཡཾ པན ཨིམཾ ལོཀནྟི ཀཱམབྷཝོ ཨདྷིཔྤེཏོཏི ཨིམམཏྠཾ ཝིབྷཱཝེཏུཾ ‘‘སཙེ ཧཱི’’ཏིཨཱདིནཱ ཨཉྙཾཡེཝ ཙཏུཀྐཾ དསྶིཏཾ།

    Kāmāvacaralokaṃsandhāya vuttaṃ itarassa lokassa vasena tathā vattuṃ asakkuṇeyyattā. Yo hi sakadāgāmī devamanussalokesu vomissakavasena nibbattati, sopi kāmabhavavaseneva paricchinditabbo. Bhagavatā ca kāmaloke ṭhatvā ‘‘sakideva imaṃ lokaṃ āgantvā’’ti vuttaṃ, ‘‘imaṃ lokaṃ āgantvā’’ti ca iminā pañcasu sakadāgāmīsu cattāro vajjetvā ekova gahito. Ekacco hi idha sakadāgāmiphalaṃ patvā idheva parinibbāyati, ekacco idha patvā devaloke parinibbāyati, ekacco devaloke patvā tattheva parinibbāyati, ekacco devaloke patvā idhūpapajjitvā parinibbāyati, ime cattāro idha na labbhanti. Yo pana idha patvā devaloke yāvatāyukaṃ vasitvā puna idhūpapajjitvā parinibbāyati, ayaṃ idha adhippeto. Aṭṭhakathāyaṃ pana imaṃ lokanti kāmabhavo adhippetoti imamatthaṃ vibhāvetuṃ ‘‘sace hī’’tiādinā aññaṃyeva catukkaṃ dassitaṃ.

    ཙཏཱུསུ …པེ॰… སབྷཱཝོཏི ཨཏྠོ ཨཔཱཡགམནཱིཡཱནཾ པཱཔདྷམྨཱནཾ སབྦསོ པཧཱིནཏྟཱ། དྷམྨནིཡཱམེནཱཏི མགྒདྷམྨནིཡཱམེན། ནིཡཏོ ཨུཔརིམགྒཱདྷིགམསྶ ཨཝསྶཾབྷཱཝིབྷཱཝཏོ། ཏེནཱཧ ‘‘སམྦོདྷིཔརཱཡཎོ’’ཏི།

    Catūsu…pe… sabhāvoti attho apāyagamanīyānaṃ pāpadhammānaṃ sabbaso pahīnattā. Dhammaniyāmenāti maggadhammaniyāmena. Niyato uparimaggādhigamassa avassaṃbhāvibhāvato. Tenāha ‘‘sambodhiparāyaṇo’’ti.

    དྷམྨཱདཱསདྷམྨཔརིཡཱཡཝཎྞནཱ

    Dhammādāsadhammapariyāyavaṇṇanā

    ༡༥༨. ཏེསཾ ཏེསཾ ཉཱཎགཏིནྟི ཏེསཾ ཏེསཾ སཏྟཱནཾ ‘‘ཨསུཀོ སོཏཱཔནྣོ, ཨསུཀོ སཀདཱགཱམཱི’’ཏིཨཱདིནཱ ཏཾཏཾཉཱཎཱདྷིགམནཾ། ཉཱཎཱུཔཔཏྟིཾ ཉཱཎཱབྷིསམྤརཱཡནྟི ཏཏོ པརམྤི ‘‘ནིཡཏོ སམྦོདྷིཔརཱཡཎོ, སཀིདེཝ ཨིམཾ ལོཀཾ ཨཱགནྟྭཱ དུཀྑསྶནྟཾ ཀརིསྶཏཱི’’ཏིཨཱདིནཱ ཙ ཉཱཎསཧིཏཾ ཨུཔྤཏྟིཔཙྩཡབྷཱཝཾ། ཨོལོཀེནྟསྶ ཉཱཎཙཀྑུནཱ པེཀྑནྟསྶ ཀཱཡཀིལམཐོཝ, ན ཏེན ཀཱཙི ཝེནེཡྻཱནཾ ཨཏྠསིདྡྷཱིཏི ཨདྷིཔྤཱཡོ། ཙིཏྟཝིཧེསཱཏི ཙིཏྟཁེདོ, སཱ ཀིལེསཱུཔསཾཧིཏཏྟཱ བུདྡྷཱནཾ ནཏྠི། ཨཱདཱིཡཏི ཨཱལོཀཱིཡཏི ཨཏྟཱ ཨེཏེནཱཏི ཨཱདཱསཾ, དྷམྨབྷཱུཏཾ ཨཱདཱསཾ དྷམྨཱདཱསཾ, ཨརིཡམགྒཉཱཎསྶེཏཾ ཨདྷིཝཙནཾ, ཏེན ཨརིཡསཱཝཀཱ ཙཏཱུསུ ཨརིཡསཙྩེསུ ཝིདྡྷསྟསམྨོཧཏྟཱ ཨཏྟཱནམྤི ཡཱཐཱཝཏོ ཉཏྭཱ ཡཱཐཱཝཏོ བྱཱཀརེཡྻ, ཏཔྤཀཱསནཏོ པན དྷམྨཔརིཡཱཡསྶ སུཏྟསྶ དྷམྨཱདཱསཏཱ ཝེདིཏབྦཱ། ཡེན དྷམྨཱདཱསེནཱཏི ཨིདྷ པན མགྒདྷམྨམེཝ ཝདཏི།

    158.Tesaṃ tesaṃ ñāṇagatinti tesaṃ tesaṃ sattānaṃ ‘‘asuko sotāpanno, asuko sakadāgāmī’’tiādinā taṃtaṃñāṇādhigamanaṃ. Ñāṇūpapattiṃ ñāṇābhisamparāyanti tato parampi ‘‘niyato sambodhiparāyaṇo, sakideva imaṃ lokaṃ āgantvā dukkhassantaṃ karissatī’’tiādinā ca ñāṇasahitaṃ uppattipaccayabhāvaṃ. Olokentassa ñāṇacakkhunā pekkhantassa kāyakilamathova, na tena kāci veneyyānaṃ atthasiddhīti adhippāyo. Cittavihesāti cittakhedo, sā kilesūpasaṃhitattā buddhānaṃ natthi. Ādīyati ālokīyati attā etenāti ādāsaṃ, dhammabhūtaṃ ādāsaṃ dhammādāsaṃ, ariyamaggañāṇassetaṃ adhivacanaṃ, tena ariyasāvakā catūsu ariyasaccesu viddhastasammohattā attānampi yāthāvato ñatvā yāthāvato byākareyya, tappakāsanato pana dhammapariyāyassa suttassa dhammādāsatā veditabbā. Yena dhammādāsenāti idha pana maggadhammameva vadati.

    ཨཝེཙྩ ཡཱཐཱཝཏོ ཛཱནིཏྭཱ ཏནྣིམིཏྟཨུཔྤནྣཔསཱདོ ཨཝེཙྩཔསཱདོ, མགྒཱདྷིགམེན ཨུཔྤནྣཔསཱདོ , སོ པན ཡསྨཱ པཱསཱཎཔབྦཏོ ཝིཡ ནིཙྩལོ, ན ཙ ཀེནཙི ཀཱརཎེན ཝིགཙྪཏི, ཏསྨཱ ཝུཏྟཾ ‘‘ཨཙལེན ཨཙྩུཏེནཱ’’ཏི།

    Avecca yāthāvato jānitvā tannimittauppannapasādo aveccapasādo, maggādhigamena uppannapasādo , so pana yasmā pāsāṇapabbato viya niccalo, na ca kenaci kāraṇena vigacchati, tasmā vuttaṃ ‘‘acalena accutenā’’ti.

    ‘‘པཉྩསཱིལཱནཱི’’ཏི གཧཊྛཝསེནེཏཾ ཝུཏྟཾ ཏེཧི ཨེཀནྟཔརིཧརཎཱིཡཏོ། ཨརིཡཱནཾ པན སབྦཱནི སཱིལཱནི ཀནྟཱནེཝ། ཏེནཱཧ ‘‘སབྦོཔི པནེཏྠ སཾཝརོ ལབྦྷཏིཡེཝཱ’’ཏི།

    ‘‘Pañcasīlānī’’ti gahaṭṭhavasenetaṃ vuttaṃ tehi ekantapariharaṇīyato. Ariyānaṃ pana sabbāni sīlāni kantāneva. Tenāha ‘‘sabbopi panettha saṃvaro labbhatiyevā’’ti.

    སབྦེསནྟི སབྦེསཾ ཨརིཡཱནཾ། སིཀྑཱཔདཱཝིརོདྷེནཱཏི ཡཐཱ བྷཱུཏརོཙནཱཔཏྟི ན ཧོཏི, ཨེཝཾ། ཡུཏྟཊྛཱནེཏི ཀཱཏུཾ ཡུཏྟཊྛཱནེ།

    Sabbesanti sabbesaṃ ariyānaṃ. Sikkhāpadāvirodhenāti yathā bhūtarocanāpatti na hoti, evaṃ. Yuttaṭṭhāneti kātuṃ yuttaṭṭhāne.

    ཨམྦཔཱལཱིགཎིཀཱཝཏྠུཝཎྞནཱ

    Ambapālīgaṇikāvatthuvaṇṇanā

    ༡༦༡. ཏདཱ ཀིར ཝེསཱལཱི ཨིདྡྷཱ ཕཱིཏཱ སབྦངྒསམྤནྣཱ ཨཧོསི ཝེཔུལླཔྤཏྟཱ, ཏཾ སནྡྷཱཡཱཧ ‘‘ཁནྡྷཀེ ཝུཏྟནཡེན ཝེསཱལིཡཱ སམྤནྣབྷཱཝོ ཝེདིཏབྦོ’’ཏི། ཏསྨིཾ ཀིར བྷིཀྑུསངྒྷེ པཉྩསཏམཏྟཱ བྷིཀྑཱུ ནཝཱ ཨཙིརཔབྦཛིཏཱ ཨཧེསུཾ ཨོསནྣཝཱིརིཡཱ ཙ། ཏཐཱ ཧི ཝཀྑཏི ‘‘ཏཏྠ ཀིར ཨེཀཙྩེ བྷིཀྑཱུ ཨོསནྣཝཱིརིཡཱ’’ཏིཨཱདི (དཱི॰ ནི॰ ཨཊྛ॰ ༢.༡༦༥)། སཏིཔཙྩུཔཊྛཱནཏྠནྟི ཏེསཾ སཏིཔཙྩུཔཊྛཱཔནཏྠཾ། སརཏཱིཏི ཀཱཡཱདིཀེ ཡཐཱསབྷཱཝཏོ ཉཱཎསམྤཡུཏྟཱཡ སཏིཡཱ ཨནུསྶརཏི ཨུཔདྷཱརེཏི། སམྤཛཱནཱཏཱིཏི སམཾ པཀཱརེཧི ཛཱནཱཏི ཨཝབུཛ྄ཛྷཏི། ཨཡམེཏྠ སངྑེཔོ, ཝིཏྠཱརོ པན པརཏོ སཏིཔཊྛཱནཝཎྞནཱཡཾ (དཱི॰ ནི॰ ཨཊྛ॰ ༢.༣༧༣; མ॰ ནི॰ ཨཊྛ॰ ༡.༡༠༦) ཨཱགམིསྶཏི།

    161. Tadā kira vesālī iddhā phītā sabbaṅgasampannā ahosi vepullappattā, taṃ sandhāyāha ‘‘khandhake vuttanayena vesāliyā sampannabhāvo veditabbo’’ti. Tasmiṃ kira bhikkhusaṅghe pañcasatamattā bhikkhū navā acirapabbajitā ahesuṃ osannavīriyā ca. Tathā hi vakkhati ‘‘tattha kira ekacce bhikkhū osannavīriyā’’tiādi (dī. ni. aṭṭha. 2.165). Satipaccupaṭṭhānatthanti tesaṃ satipaccupaṭṭhāpanatthaṃ. Saratīti kāyādike yathāsabhāvato ñāṇasampayuttāya satiyā anussarati upadhāreti. Sampajānātīti samaṃ pakārehi jānāti avabujjhati. Ayamettha saṅkhepo, vitthāro pana parato satipaṭṭhānavaṇṇanāyaṃ (dī. ni. aṭṭha. 2.373; ma. ni. aṭṭha. 1.106) āgamissati.

    སབྦསངྒཱཧཀནྟི སརཱིརགཏསྶ ཙེཝ ཝཏྠཱལངྐཱརགཏསྶ ཙཱཏི སབྦསྶ ནཱིལབྷཱཝསྶ སངྒཱཧཀཾ ཝཙནཾ། ཏསྶེཝཱཏི ནཱིལཱཏི སབྦསངྒཱཧཀཝསེན ཝུཏྟཨཏྠསྶེཝ། ཝིབྷཱགདསྶནནྟི པབྷེདདསྶནཾ། ཡཐཱ ཏེ ལིཙྪཝིརཱཛཱནོ ཨཔཱིཏཱདིཝཎྞཱ ཨེཝ ཀེཙི ཝིལེཔནཝསེན པཱིཏཱདིཝཎྞཱ ཁཱཡིཾསུ, ཨེཝཾ ཨནཱིལཱདིཝཎྞཱ ཨེཝ ཀེཙི ཝིལེཔནཝསེན ནཱིལཱདིཝཎྞཱ ཁཱཡིཾསཱུཏི ཝུཏྟཾ ‘‘ན ཏེསཾ པཀཏིཝཎྞོ ནཱིལོ’’ཏིཨཱདི། ནཱིལོ མཎི ཨེཏེསཱུཏི ནཱིལམཎི, ཨིནྡནཱིལམཧཱནཱིལཱདིནཱིལརཏནཝིནདྡྷཱ ཨལངྐཱརཱ། ཏེ ཀིར སུཝཎྞཝིརཙིཏེ ཧི མཎིཨོབྷཱསེཧི ཨེཀནཱིལཱ ཝིཡ ཁཱཡནྟི། ནཱིལམཎིཁཙིཏཱཏི ནཱིལརཏནཔརིཀྑིཏྟཱ། ནཱིལཝཏྠཔརིཀྑིཏྟཱཏི ནཱིལཝཏྠནཱིལཀམྤལཔརིཀྑེཔཱ། ནཱིལཝམྨིཀེཧཱིཏི ནཱིལཀགྷཊཔརིཀྑིཏྟེཧི། སབྦཔདེསཱུཏི ‘‘པཱིཏཱ ཧོནྟཱི’’ཏིཨཱདིསབྦཔདེསུ། པརིཝཊྚེསཱིཏི པཊིགྷཊྚེསི། ཨཱཧརནྟི ཨིམསྨཱ རཱཛཔུརིསཱ བལིནྟི ཨཱཧཱརོ, ཏཔྤཏྟཛནཔདོཏི ཨཱཧ ‘‘སཱཧཱརནྟི སཛནཔད’’ནྟི། ཨངྒུལིཕོཊོཔི ཨངྒུལིཡཱ ཙཱལནཝསེནེཝ ཧོཏཱིཏི ཝུཏྟཾ ‘‘ཨངྒུལིཾ ཙཱལེསུ’’ནྟི། ཨམྦཀཱཡཱཏི མཱཏུགཱམེན། ཨུཔཙཱརཝཙནཾ ཧེཏཾ ཨིཏྠཱིསུ, ཡདིདཾ ‘‘ཨམྦཀཱ མཱཏུགཱམོ ཛནནིཀཱ’’ཏི།

    Sabbasaṅgāhakanti sarīragatassa ceva vatthālaṅkāragatassa cāti sabbassa nīlabhāvassa saṅgāhakaṃ vacanaṃ. Tassevāti nīlāti sabbasaṅgāhakavasena vuttaatthasseva. Vibhāgadassananti pabhedadassanaṃ. Yathā te licchavirājāno apītādivaṇṇā eva keci vilepanavasena pītādivaṇṇā khāyiṃsu, evaṃ anīlādivaṇṇā eva keci vilepanavasena nīlādivaṇṇā khāyiṃsūti vuttaṃ ‘‘na tesaṃ pakativaṇṇo nīlo’’tiādi. Nīlo maṇi etesūti nīlamaṇi, indanīlamahānīlādinīlaratanavinaddhā alaṅkārā. Te kira suvaṇṇaviracite hi maṇiobhāsehi ekanīlā viya khāyanti. Nīlamaṇikhacitāti nīlaratanaparikkhittā. Nīlavatthaparikkhittāti nīlavatthanīlakampalaparikkhepā. Nīlavammikehīti nīlakaghaṭaparikkhittehi. Sabbapadesūti ‘‘pītā hontī’’tiādisabbapadesu. Parivaṭṭesīti paṭighaṭṭesi. Āharanti imasmā rājapurisā balinti āhāro, tappattajanapadoti āha ‘‘sāhāranti sajanapada’’nti. Aṅguliphoṭopi aṅguliyā cālanavaseneva hotīti vuttaṃ ‘‘aṅguliṃ cālesu’’nti. Ambakāyāti mātugāmena. Upacāravacanaṃ hetaṃ itthīsu, yadidaṃ ‘‘ambakā mātugāmo jananikā’’ti.

    ཨཝལོཀེཐཱཏི ཨཔཝཏྟིཏྭཱ ཨོལོཀནཾ ཨོལོཀེཐ། ཏཾ པན ཨཔཝཏྟིཏྭཱ ཨོལོཀནཾ ཨནུ ཨནུ དསྶནཾ ཧོཏཱིཏི ཨཱཧ ‘‘པུནཔྤུནཾ པསྶཐཱ’’ཏི། ཨུཔནེཐཱཏི ‘‘ཡཐཱཡཾ ལིཙྪཝིརཱཛཔརིསཱ སོབྷཱཏིསཡེན ཡུཏྟཱ, ཨེཝཾ ཏཱཝཏིཾསཔརིསཱ’’ཏི ཨུཔནཡཾ ཀརོཐ། ཏེནཱཧ ‘‘ཏཱཝཏིཾསེཧི སམཀེ ཀཏྭཱ པསྶཐཱ’’ཏི།

    Avalokethāti apavattitvā olokanaṃ oloketha. Taṃ pana apavattitvā olokanaṃ anu anu dassanaṃ hotīti āha ‘‘punappunaṃ passathā’’ti. Upanethāti ‘‘yathāyaṃ licchavirājaparisā sobhātisayena yuttā, evaṃ tāvatiṃsaparisā’’ti upanayaṃ karotha. Tenāha ‘‘tāvatiṃsehi samake katvā passathā’’ti.

    ‘‘ཨུཔསཾཧརཐ བྷིཀྑཝེ ལིཙྪཝིཔརིསཾ ཏཱཝཏིཾསསདིས’’ནྟི ནཡིདཾ ནིམིཏྟགྒཱཧེ ནིཡོཛནཾ, ཀེཝལཾ པན དིབྦསམྤཏྟིསདིསཱ ཨེཏེསཾ རཱཛཱུནཾ ཨིསྶརིཡསམྤཏྟཱིཏི ཨནུཔུབྦིཀཐཱཡ སགྒསམྤཏྟིཀཐནཾ ཝིཡ དཊྛབྦཾ། ཏེསུ པན བྷིཀྑཱུསུ ཨེཀཙྩཱནཾ ཏཏྠ ནིམིཏྟགྒཱཧོཔི སིཡཱ, ཏཾ སནྡྷཱཡ ཝུཏྟཾ ‘‘ནིམིཏྟགྒཱཧེ ཨུཡྻོཛེཏཱི’’ཏི། ཧིཏཀཱམཏཱཡ ཏེསཾ བྷིཀྑཱུནཾ ཡཐཱ ཨཱཡསྨཏོ ནནྡསྶ ཧིཏཀཱམཏཱཡ སགྒསམྤཏྟིདསྶནཾ། ཏེནཱཧ ‘‘ཏཏྲ ཀིརཱ’’ཏིཨཱདི། ཨོསནྣཝཱིརིཡཱཏི སམྨཱཔཊིཔཏྟིཡཾ ཨཝསནྣཝཱིརིཡཱ, ཨོསྶཊྛཝཱིརིཡཱ ཝཱཏི ཨཏྠོ། ཨནིཙྩལཀྑཎཝིབྷཱཝནཏྠནྟི ཏེསཾ རཱཛཱུནཾ ཝསེན བྷིཀྑཱུནཾ ཨནིཙྩལཀྑཎཝིབྷཱུཏབྷཱཝཏྠཾ།

    ‘‘Upasaṃharatha bhikkhave licchaviparisaṃ tāvatiṃsasadisa’’nti nayidaṃ nimittaggāhe niyojanaṃ, kevalaṃ pana dibbasampattisadisā etesaṃ rājūnaṃ issariyasampattīti anupubbikathāya saggasampattikathanaṃ viya daṭṭhabbaṃ. Tesu pana bhikkhūsu ekaccānaṃ tattha nimittaggāhopi siyā, taṃ sandhāya vuttaṃ ‘‘nimittaggāhe uyyojetī’’ti. Hitakāmatāya tesaṃ bhikkhūnaṃ yathā āyasmato nandassa hitakāmatāya saggasampattidassanaṃ. Tenāha ‘‘tatra kirā’’tiādi. Osannavīriyāti sammāpaṭipattiyaṃ avasannavīriyā, ossaṭṭhavīriyā vāti attho. Aniccalakkhaṇavibhāvanatthanti tesaṃ rājūnaṃ vasena bhikkhūnaṃ aniccalakkhaṇavibhūtabhāvatthaṃ.

    ཝེལུ༹ཝགཱམཝསྶཱུཔགམནཝཎྞནཱ

    Veḷuvagāmavassūpagamanavaṇṇanā

    ༡༦༣. སམཱིཔེ ཝེལུ༹ཝགཱམོཏི པུབྦཎྷཾ ཝཱ སཱཡནྷཾ ཝཱ གནྟྭཱ ནིཝཏྟནཡོགྱེ ཨཱསནྣཊྛཱནེ ནིཝིཊྛཱ པརིཝཱརགཱམོ། སངྒམྨཱཏི སམྨཱ གནྟྭཱ། ཨསྶཱཏི བྷགཝཏོ།

    163.Samīpe veḷuvagāmoti pubbaṇhaṃ vā sāyanhaṃ vā gantvā nivattanayogye āsannaṭṭhāne niviṭṭhā parivāragāmo. Saṅgammāti sammā gantvā. Assāti bhagavato.

    ༡༦༤. ཕརུསོཏི ཀཀྑལོ༹, གརུཏརོཏི ཨཏྠོ། ཝིསབྷཱགརོགོཏི དྷཱཏུཝིསབྷཱགཏཱཡ སམུཊྛིཏོ བཧལཏརརོགོ, ན ཨཱབཱདྷམཏྟཾ། ཉཱཎེན པརིཙྪིནྡིཏྭཱཏི ཝེདནཱནཾ ཁཎིཀཏཾ, དུཀྑཏཾ, ཨཏྟསུཉྙཏཉྩ ཡཱཐཱཝཏོ ཉཱཎེན པརིཙྪིཛྫ པརིཏུལེཏྭཱ། ཨདྷིཝཱསེསཱིཏི ཏཱ ཨབྷིབྷཝནྟོ ཡཐཱཔརིམདྡིཏཱཀཱརསལླཀྑཎེན ཨཏྟནི ཨཱརོཔེཏྭཱ ཝཱསེསི, ན ཏཱཧི ཨབྷིབྷུཡྻམཱནོ། ཏེནཱཧ ‘‘ཨཝིཧཉྙམཱནོ’’ཏིཨཱདི། ཨདུཀྑིཡམཱནོཏི ཙེཏོདུཀྑཝསེན ཨདུཀྑིཡམཱནོ , ཀཱཡདུཀྑཾ པན ‘‘ནཏྠཱི’’ཏི ན སཀྐཱ ཝཏྟུཾ། ཨསཏི ཧི ཏསྨིཾ ཨདྷིཝཱསནཱཡ ཨེཝ ཨསམྦྷཝོཏི། ཨནཱམནྟེཏྭཱཏི ཨནཱལཔིཏྭཱ། ཨནཔལོཀེཏྭཱཏི ཨཝིསྶཛྫིཏྭཱ། ཏེནཱཧ ‘‘ཨོཝཱདཱནུསཱསནིཾ ཨདཏྭཱཏི ཝུཏྟཾ ཧོཏཱི’’ཏི། པུབྦབྷཱགཝཱིརིཡེནཱཏི ཕལསམཱཔཏྟིཡཱ པརིཀམྨཝཱིརིཡེན། ཕལསམཱཔཏྟིཝཱིརིཡེནཱཏི ཕལསམཱཔཏྟིསམྤཡུཏྟཝཱིརིཡེན། ཝིཀྑམྦྷེཏྭཱཏི ཝིནོདེཏྭཱ། ཡཐཱ ནཱམ པུཔྥནསམཡེ ཙམྤཀཱདིརུཀྑེ ཝེཁེ དིནྣེ ཡཱཝ སོ ཝེཁོ ནཱཔནཱིཡཏི, ཏཱཝསྶ པུཔྥནསམཏྠཏཱ ཝིཀྑམྦྷིཏཱ ཝིནོདིཏཱ ཧོཏི, ཨེཝམེཝ ཡཐཱཝུཏྟཝཱིརིཡཝེཁདཱནེན ཏཱ ཝེདནཱ སཏྠུ སརཱིརེ ཡཐཱཔརིཙྪིནྣཾ ཀཱལཾ ཝིཀྑམྦྷིཏཱ ཝིནོདིཏཱ ཨཧེསུཾ། ཏེན ཝུཏྟཾ ‘‘ཝིཀྑམྦྷེཏྭཱཏི ཝིནོདེཏྭཱ’’ཏི། ཛཱིཝིཏམྤི ཛཱིཝིཏསངྑཱརོ ཀམྨུནཱ སངྑརཱིཡཏཱིཏི ཀཏྭཱ། ཚིཛྫམཱནཾ ཝིརོདྷིཔཙྩཡསམཱཡོགེན པཡོགསམྤཏྟིཡཱ གྷཊེཏྭཱ ཋཔཱིཡཏི། ཨདྷིཊྛཱཡཱཏི ཨདྷིཊྛཱནཾ ཀཏྭཱ། ཏེནཱཧ ‘‘དསམཱསེ མཱ ཨུཔྤཛྫིཏྠཱཏི སམཱཔཏྟིཾ སམཱཔཛྫཱི’’ཏི། ཏཾ པན ‘‘ཨདྷིཊྛཱནཾ, པཝཏྟན’’ནྟི ཙ ཝཏྟབྦཏཾ ཨརཧཏཱིཏི ཝུཏྟཾ ‘‘ཨདྷིཊྛཧིཏྭཱ པཝཏྟེཏྭཱ’’ཏི།

    164.Pharusoti kakkhaḷo, garutaroti attho. Visabhāgarogoti dhātuvisabhāgatāya samuṭṭhito bahalatararogo, na ābādhamattaṃ. Ñāṇena paricchinditvāti vedanānaṃ khaṇikataṃ, dukkhataṃ, attasuññatañca yāthāvato ñāṇena paricchijja parituletvā. Adhivāsesīti tā abhibhavanto yathāparimadditākārasallakkhaṇena attani āropetvā vāsesi, na tāhi abhibhuyyamāno. Tenāha ‘‘avihaññamāno’’tiādi. Adukkhiyamānoti cetodukkhavasena adukkhiyamāno , kāyadukkhaṃ pana ‘‘natthī’’ti na sakkā vattuṃ. Asati hi tasmiṃ adhivāsanāya eva asambhavoti. Anāmantetvāti anālapitvā. Anapaloketvāti avissajjitvā. Tenāha ‘‘ovādānusāsaniṃ adatvāti vuttaṃ hotī’’ti. Pubbabhāgavīriyenāti phalasamāpattiyā parikammavīriyena. Phalasamāpattivīriyenāti phalasamāpattisampayuttavīriyena. Vikkhambhetvāti vinodetvā. Yathā nāma pupphanasamaye campakādirukkhe vekhe dinne yāva so vekho nāpanīyati, tāvassa pupphanasamatthatā vikkhambhitā vinoditā hoti, evameva yathāvuttavīriyavekhadānena tā vedanā satthu sarīre yathāparicchinnaṃ kālaṃ vikkhambhitā vinoditā ahesuṃ. Tena vuttaṃ ‘‘vikkhambhetvāti vinodetvā’’ti. Jīvitampi jīvitasaṅkhāro kammunā saṅkharīyatīti katvā. Chijjamānaṃ virodhipaccayasamāyogena payogasampattiyā ghaṭetvā ṭhapīyati. Adhiṭṭhāyāti adhiṭṭhānaṃ katvā. Tenāha ‘‘dasamāse mā uppajjitthāti samāpattiṃ samāpajjī’’ti. Taṃ pana ‘‘adhiṭṭhānaṃ, pavattana’’nti ca vattabbataṃ arahatīti vuttaṃ ‘‘adhiṭṭhahitvā pavattetvā’’ti.

    ཁཎིཀསམཱཔཏྟཱིཏི ཏཱདིསཾ པུབྦཱབྷིསངྑཱརཾ ཨཀཏྭཱ ཋཱནསོ སམཱཔཛྫིཏབྦསམཱཔཏྟི། པུན སརཱིརཾ ཝེདནཱ ཨཛ྄ཛྷོཏྠརཏི སཝིསེསཔུབྦཱབྷིསངྑཱརསྶ ཨཀཏཏྟཱ། རཱུཔསཏྟཀཨརཱུཔསཏྟཀཱནི ཝིསུདྡྷིམགྒསཾཝཎྞནཱསུ (ཝིསུདྡྷི॰ ཊཱི॰ ༢.༧༠༦, ༧༡༧) ཝིཏྠཱརིཏནཡེན ཝེདིཏབྦཱནི། སུཊྛུ ཝིཀྑམྦྷེཏི པུབྦཱབྷིསངྑཱརསྶ སཱཏིསཡཏྟཱ། ཨིདཱནི ཏམཏྠཾ ཨུཔམཱཡ ཝིབྷཱཝེཏུཾ ‘‘ཡཐཱ ནཱམཱ’’ཏིཨཱདི ཝུཏྟཾ། ཨཔབྱཱུལ༹ྷོཏི ཨཔནཱིཏོ། ཙུདྡསཧཱཀཱརེཧི སནྣེཏྭཱཏི ཏེསཾཡེཝ རཱུཔསཏྟཀཨརཱུཔསཏྟཀཱནཾ ཝསེན ཙུདྡསཧི པཀཱརེཧི ཝིཔསྶནཱཙིཏྟཾ, སཀལམེཝ ཝཱ ཨཏྟབྷཱཝཾ ཝིསབྷཱགརོགསཉྫནིཏལཱུཁབྷཱཝནིརོགཀརཎཱཡ སིནེཧེཏྭཱ ན ཨུཔྤཛྫིཡེཝ སམྨཱསམྦུདྡྷེན སཱཏིསཡསམཱཔཏྟིཝེགེན སུཝིཀྑམྦྷིཏཏྟཱ།

    Khaṇikasamāpattīti tādisaṃ pubbābhisaṅkhāraṃ akatvā ṭhānaso samāpajjitabbasamāpatti. Puna sarīraṃ vedanā ajjhottharati savisesapubbābhisaṅkhārassa akatattā. Rūpasattakaarūpasattakāni visuddhimaggasaṃvaṇṇanāsu (visuddhi. ṭī. 2.706, 717) vitthāritanayena veditabbāni. Suṭṭhu vikkhambheti pubbābhisaṅkhārassa sātisayattā. Idāni tamatthaṃ upamāya vibhāvetuṃ ‘‘yathā nāmā’’tiādi vuttaṃ. Apabyūḷhoti apanīto. Cuddasahākārehi sannetvāti tesaṃyeva rūpasattakaarūpasattakānaṃ vasena cuddasahi pakārehi vipassanācittaṃ, sakalameva vā attabhāvaṃ visabhāgarogasañjanitalūkhabhāvanirogakaraṇāya sinehetvā na uppajjiyeva sammāsambuddhena sātisayasamāpattivegena suvikkhambhitattā.

    གིལཱནོ ཧུཏྭཱ པུན ཝུཊྛིཏོཏི པུབྦེ གིལཱནོ ཧུཏྭཱ པུན ཏཏོ གིལཱནབྷཱཝཏོ ཝུཊྛིཏོ། མདྷུརཀབྷཱཝོ ནཱམ སརཱིརསྶ ཐམྦྷིཏཏྟཾ, ཏཾ པན གརུབྷཱཝཔུབྦཀནྟི ཨཱཧ ‘‘སཉྫཱཏགརུབྷཱཝོ སཉྫཱཏཐདྡྷབྷཱཝོ’’ཏི། ‘‘ནཱནཱཀཱརཏོ ན ཨུཔཊྛཧནྟཱི’’ཏི ཨིམིནཱ དིསཱསམྨོཧོཔི མེ ཨཧོསི སོཀབལེནཱཏི དསྶེཏི། སཏིཔཊྛཱནཱདིདྷམྨཱཏི ཀཱཡཱནུཔསྶནཱདཡོ ཨནུཔསྶནཱདྷམྨཱ པུབྦེ ཝིབྷཱུཏཱ ཧུཏྭཱ ཨུཔཊྛཧནྟཱཔི ཨིདཱནི མཡ྄ཧཾ པཱཀཊཱ ན ཧོནྟི།

    Gilāno hutvā puna vuṭṭhitoti pubbe gilāno hutvā puna tato gilānabhāvato vuṭṭhito. Madhurakabhāvo nāma sarīrassa thambhitattaṃ, taṃ pana garubhāvapubbakanti āha ‘‘sañjātagarubhāvo sañjātathaddhabhāvo’’ti. ‘‘Nānākārato na upaṭṭhahantī’’ti iminā disāsammohopi me ahosi sokabalenāti dasseti. Satipaṭṭhānādidhammāti kāyānupassanādayo anupassanādhammā pubbe vibhūtā hutvā upaṭṭhahantāpi idāni mayhaṃ pākaṭā na honti.

    ༡༦༥. ཨབྦྷནྟརཾ ཀརོཏི ནཱམ ཨཏྟནིཡེཝ ཋཔནཏོ། པུགྒལཾ ཨབྦྷནྟརཾ ཀརོཏི ནཱམ སམཱནཏྟཏཱཝསེན དྷམྨེན པུབྦེ ཏསྶ སངྒཎྷཏོ། དཧརཀཱལེཏི ཨཏྟནོ དཧརཀཱལེ། ཀསྶཙི ཨཀཐེཏྭཱཏི ཀསྶཙི ཨཏྟནོ ཨནྟེཝཱསིཀསྶ ཨུཔནིགཱུཧབྷཱུཏཾ གནྠཾ ཨཀཐེཏྭཱ། མུཊྛིཾ ཀཏྭཱཏི མུཊྛིགཏཾ ཝིཡ རཧསིབྷཱུཏཾ ཀཏྭཱ། ཡསྨིཾ ཝཱ ནཊྛེ སབྦོ ཏཾམཱུལཀོ དྷམྨོ ཝིནསྶཏི, སོ ཨཱདིཏོ མཱུལབྷཱུཏོ དྷམྨོ, མུསྶཏི ཝིནསྶཏི དྷམྨོ ཨེཏེན ནཊྛེནཱཏི མུཊྛི, ཏཾ ཏཐཱརཱུཔཾ མུཊྛིཾ ཀཏྭཱ པརིཧརིཏྭཱ ཋཔིཏཾ ཀིཉྩི ནཏྠཱིཏི དསྶེཏི།

    165.Abbhantaraṃ karoti nāma attaniyeva ṭhapanato. Puggalaṃ abbhantaraṃ karoti nāma samānattatāvasena dhammena pubbe tassa saṅgaṇhato. Daharakāleti attano daharakāle. Kassaci akathetvāti kassaci attano antevāsikassa upanigūhabhūtaṃ ganthaṃ akathetvā. Muṭṭhiṃ katvāti muṭṭhigataṃ viya rahasibhūtaṃ katvā. Yasmiṃ vā naṭṭhe sabbo taṃmūlako dhammo vinassati, so ādito mūlabhūto dhammo, mussati vinassati dhammo etena naṭṭhenāti muṭṭhi, taṃ tathārūpaṃ muṭṭhiṃ katvā pariharitvā ṭhapitaṃ kiñci natthīti dasseti.

    ཨཧམེཝཱཏི ཨཝདྷཱརཎཾ བྷིཀྑུསངྒྷཔརིཧརཎསྶ ཨཉྙསཱདྷཱརཎིཙྪཱདསྶནཏྠཾ, ཨཝདྷཱརཎེན པན ཝིནཱ ‘‘ཨཧཾ བྷིཀྑུསངྒྷ’’ནྟིཨཱདི བྷིཀྑུསངྒྷཔརིཧརཎེ ཨཧཾཀཱརམམཾཀཱརཱབྷཱཝདསྶནནྟི དཊྛབྦཾ། ཨུདྡིསིཏབྦཊྛེནཱཏི ‘‘སཏྠཱ’’ཏི ཨུདྡིསིཏབྦཊྛེན། མཱ ཝཱ ཨཧེསུཾ བྷིཀྑཱུཏི ཨདྷིཔྤཱཡོ། ‘‘མཱ ཝཱ ཨཧོསཱི’’ཏི ཝཱ པཱཋོ། ཨེཝཾ ན ཧོཏཱིཏི ‘‘ཨཧཾ བྷིཀྑུསངྒྷཾ པརིཧརིསྶཱམཱི’’ཏིཨཱདི ཨཱཀཱརེན ཙིཏྟཔྤཝཏྟི ན ཧོཏི། ‘‘པཙྪིམཝཡཨནུཔྤཏྟབྷཱཝདཱིཔནཏྠཾ ཝུཏྟ’’ནྟི ཨིམིནཱ ཝཡོ ཝིཡ བུདྡྷཀིཙྩམྤི པརིཡོསིཏཀམྨནྟི དཱིཔེཏི། སཀཊསྶ བཱཧཔྤདེསེ དལ༹ྷཱིབྷཱཝཱཡ ཝེཋདཱནཾ བཱཧབནྡྷོ། ཙཀྐནེམིསནྡྷཱིནཾ དལ༹ྷཱིབྷཱཝཱཡ ཝེཋདཱནཾ ཙཀྐབནྡྷོ།

    Ahamevāti avadhāraṇaṃ bhikkhusaṅghapariharaṇassa aññasādhāraṇicchādassanatthaṃ, avadhāraṇena pana vinā ‘‘ahaṃ bhikkhusaṅgha’’ntiādi bhikkhusaṅghapariharaṇe ahaṃkāramamaṃkārābhāvadassananti daṭṭhabbaṃ. Uddisitabbaṭṭhenāti ‘‘satthā’’ti uddisitabbaṭṭhena. Mā vāahesuṃ bhikkhūti adhippāyo. ‘‘Mā vā ahosī’’ti vā pāṭho. Evaṃ na hotīti ‘‘ahaṃ bhikkhusaṅghaṃ pariharissāmī’’tiādi ākārena cittappavatti na hoti. ‘‘Pacchimavayaanuppattabhāvadīpanatthaṃ vutta’’nti iminā vayo viya buddhakiccampi pariyositakammanti dīpeti. Sakaṭassa bāhappadese daḷhībhāvāya veṭhadānaṃ bāhabandho. Cakkanemisandhīnaṃ daḷhībhāvāya veṭhadānaṃ cakkabandho.

    ཏམཏྠནྟི ཝེཋམིསྶཀེན མཉྙེཏི ཝུཏྟམཏྠཾ། རཱུཔཱདཡོ ཨེཝ དྷམྨཱ སཝིགྒཧོ ཝིཡ ཨུཔཊྛཱནཏོ རཱུཔནིམིཏྟཱདཡོ, ཏེསཾ རཱུཔནིམིཏྟཱདཱིནཾ། ལོཀིཡཱནཾ ཝེདནཱནནྟི ཡཱསཾ ནིརོདྷནེན ཕལསམཱཔཏྟི སམཱཔཛྫིཏབྦཱ, ཏཱསཾ ནིརོདྷཱ ཕཱསུ ཧོཏི, ཏཐཱ བཱལ༹ྷཝེདནཱབྷིཏུནྣསརཱིརསྶཱཔི། ཏདཏྠཱཡཱཏི ཕལསམཱཔཏྟིཝིཧཱརཏྠཱཡ། དྭཱིཧི བྷཱགེཧི ཨཱཔོ གཏོ ཨེཏྠཱཏི དཱིཔོ, ཨོགྷེན པརིགཏོ ཧུཏྭཱ ཨནཛ྄ཛྷོཏྠཊོ བྷཱུམིབྷཱགོ, ཨིདྷ པན ཙཏཱུཧིཔི ཨོགྷེཧི, སཾསཱརམཧོགྷེནེཝ ཝཱ ཨནཛ྄ཛྷོཏྠཊོ ཨཏྟཱ ‘‘དཱིཔོ’’ཏི ཨདྷིཔྤེཏོ། ཏེནཱཧ ‘‘མཧཱསམུདྡགཏཱ’’ཏིཨཱདི། ཨཏྟསྶརཎཱཏི ཨཏྟཔྤཊིསརཎཱ། ཨཏྟགཏིཀཱ ཝཱཏི ཨཏྟཔརཱཡཎཱཝ ། མཱ ཨཉྙགཏིཀཱཏི ཨཉྙཾ ཀིཉྩི གཏིཾ པཊིསརཎཾ པརཱཡཎཾ མཱ ཙིནྟཡིཏྠ། ཀསྨཱ? ཨཏྟཱ ནཱམེཏྠ པརམཏྠཏོ དྷམྨོ ཨབྦྷནྟརཊྛེན, སོ ཨེཝཾ སམྤཱདིཏོ ཏུམྷཱཀཾ དཱིཔཾ ཏཱཎཾ གཏི པརཱཡཎནྟི། ཏེན ཝུཏྟཾ ‘‘དྷམྨདཱིཔཱ’’ཏིཨཱདི། ཏཐཱ ཙཱཧ ‘‘ཨཏྟཱ ཧི ཨཏྟནོ ནཱཐོ, ཀོ ཧི ནཱཐོ པརོ སིཡཱ’’ཏི (དྷ॰ པ॰ ༡༦༠, ༣༨༠) ཨུཔདེསམཏྟམེཝ ཧི པརསྨིཾ པཊིབདྡྷཾ, ཨཉྙཱ སབྦཱ སམྤཏྟི པུརིསསྶ ཨཏྟཱདྷཱིནཱ ཨེཝ། ཏེནཱཧ བྷགཝཱ ‘‘ཏུམྷེཧི ཀིཙྩཾ ཨཱཏཔྤཾ, ཨཀྑཱཏཱརོ ཏཐཱགཏཱ’’ཏི (དྷ॰ པ॰ ༢༧༦)། ཏམགྒེཏི ཏམཡོགསྶ ཨགྒེ ཏསྶ ཨཏིཀྐནྟཱབྷཱཝཏོ། ཏེནེཝཱཧ ‘‘ཨིམེ ཨགྒཏམཱ’’ཏིཨཱདི། མམཱཏི མམ སཱསནེ། སབྦེཔི ཏེ ཙཏུསཏིཔཊྛཱནགོཙརཱ ཝཱཏི ཙཏུབྦིདྷཾ སཏིཔཊྛཱནཾ བྷཱཝེཏྭཱ བྲཱུཧེཏྭཱ ཏདེཝ གོཙརཾ ཨཏྟནོ པཝཏྟིཊྛཱནཾ ཀཏྭཱ ཋིཏཱ ཨེཝ བྷིཀྑཱུ ཨགྒེ བྷཝིསྶནྟི།

    Tamatthanti veṭhamissakena maññeti vuttamatthaṃ. Rūpādayo eva dhammā saviggaho viya upaṭṭhānato rūpanimittādayo, tesaṃ rūpanimittādīnaṃ. Lokiyānaṃ vedanānanti yāsaṃ nirodhanena phalasamāpatti samāpajjitabbā, tāsaṃ nirodhā phāsu hoti, tathā bāḷhavedanābhitunnasarīrassāpi. Tadatthāyāti phalasamāpattivihāratthāya. Dvīhi bhāgehi āpo gato etthāti dīpo, oghena parigato hutvā anajjhotthaṭo bhūmibhāgo, idha pana catūhipi oghehi, saṃsāramahogheneva vā anajjhotthaṭo attā ‘‘dīpo’’ti adhippeto. Tenāha ‘‘mahāsamuddagatā’’tiādi. Attassaraṇāti attappaṭisaraṇā. Attagatikā vāti attaparāyaṇāva . Mā aññagatikāti aññaṃ kiñci gatiṃ paṭisaraṇaṃ parāyaṇaṃ mā cintayittha. Kasmā? Attā nāmettha paramatthato dhammo abbhantaraṭṭhena, so evaṃ sampādito tumhākaṃ dīpaṃ tāṇaṃ gati parāyaṇanti. Tena vuttaṃ ‘‘dhammadīpā’’tiādi. Tathā cāha ‘‘attā hi attano nātho, ko hi nātho paro siyā’’ti (dha. pa. 160, 380) upadesamattameva hi parasmiṃ paṭibaddhaṃ, aññā sabbā sampatti purisassa attādhīnā eva. Tenāha bhagavā ‘‘tumhehi kiccaṃ ātappaṃ, akkhātāro tathāgatā’’ti (dha. pa. 276). Tamaggeti tamayogassa agge tassa atikkantābhāvato. Tenevāha ‘‘ime aggatamā’’tiādi. Mamāti mama sāsane. Sabbepi te catusatipaṭṭhānagocarā vāti catubbidhaṃ satipaṭṭhānaṃ bhāvetvā brūhetvā tadeva gocaraṃ attano pavattiṭṭhānaṃ katvā ṭhitā eva bhikkhū agge bhavissanti.

    དུཏིཡབྷཱཎཝཱརཝཎྞནཱ ནིཊྛིཏཱ།

    Dutiyabhāṇavāravaṇṇanā niṭṭhitā.

    ནིམིཏྟོབྷཱསཀཐཱཝཎྞནཱ

    Nimittobhāsakathāvaṇṇanā

    ༡༦༦. ཨནེཀཝཱརཾ བྷགཝཱ ཝེསཱལིཡཾ ཝིཧརཏི, ཏསྨཱ ཨིམཾ ཝེསཱལིཔྤཝེསནཾ ནིཡམེཏྭཱ དསྶེཏུཾ ‘‘ཀདཱ པཱཝིསཱི’’ཏི པུཙྪིཏྭཱ ཨཱགམནཏོ པཊྛཱཡ ཏཾ དསྶེནྟོ ‘‘བྷགཝཱ ཀིརཱ’’ཏིཨཱདིམཱཧ། ཨཱགཏམགྒེནེཝཱཏི པུབྦེ ཡཱཝ ཝེལུ༹ཝགཱམཀཱ ཨཱགཏམགྒེནེཝ པཊིནིཝཏྟེནྟོ། ཡཐཱཔརིཙྪེདེནཱཏི ཡཐཱཔརིཙྪིནྣཀཱལེན། ཏཏོཏི ཕལསམཱཔཏྟིཏོ། ཨཡནྟི ཨིདཱནི ཝུཙྩམཱནཱཀཱརོ། དིཝཱཊྛཱནོལོཀནཱདི པརིནིབྦཱནསྶ ཨེཀནྟིཀབྷཱཝདསྶནཾ། ཨོསྶཊྛོཏི ཝིསྶཊྛོ ཨཱཡུསངྑཱརོ ‘‘སཏྟཱཧམེཝ མཡཱ ཛཱིཝིཏབྦ’’ནྟི།

    166. Anekavāraṃ bhagavā vesāliyaṃ viharati, tasmā imaṃ vesālippavesanaṃ niyametvā dassetuṃ ‘‘kadā pāvisī’’ti pucchitvā āgamanato paṭṭhāya taṃ dassento ‘‘bhagavā kirā’’tiādimāha. Āgatamaggenevāti pubbe yāva veḷuvagāmakā āgatamaggeneva paṭinivattento. Yathāparicchedenāti yathāparicchinnakālena. Tatoti phalasamāpattito. Ayanti idāni vuccamānākāro. Divāṭṭhānolokanādi parinibbānassa ekantikabhāvadassanaṃ. Ossaṭṭhoti vissaṭṭho āyusaṅkhāro ‘‘sattāhameva mayā jīvitabba’’nti.

    ཛེཊྛཀནིཊྛབྷཱཏིཀཱནནྟི སབྦེཝ སབྲཧྨཙཱརིནོ སནྡྷཱཡ ཝདཏི།

    Jeṭṭhakaniṭṭhabhātikānanti sabbeva sabrahmacārino sandhāya vadati.

    པཊིཔཱདེསྶཱམཱིཏི མགྒཔཊིཔཏྟིཡཱ ནིཡོཛེསྶཱམི། མཎིཕལཀེཏི མཎིཁཙིཏེ པམུཁེ ཨཏྠཏཕལཀེ། ཏཾ པཋམཾ དསྶནནྟི ཡཾ ཝེལུ༹ཝནེ པརིབྦཱཛཀརཱུཔེན ཨཱགཏསྶ སིདྡྷཾ དསྶནཾ, ཏཾ པཋམདསྶནཾ། ཡཾ ཝཱ ཨནོམདསྶིསྶ བྷགཝཏོ ཝཙནཾ སདྡཧནྟེན ཏདཱ ཨབྷིནཱིཧཱརཀཱལེ པཙྩཀྑཏོ ཝིཡ ཏུམྷཱཀཾ དསྶནཾ སིདྡྷཾ, ཏཾ པཋམདསྶནཾ། པཙྩཱགམནཙཱརིཀནྟི པཙྩཱགམནཏྠཾ ཙཱརིཀཾ།

    Paṭipādessāmīti maggapaṭipattiyā niyojessāmi. Maṇiphalaketi maṇikhacite pamukhe atthataphalake. Taṃ paṭhamaṃdassananti yaṃ veḷuvane paribbājakarūpena āgatassa siddhaṃ dassanaṃ, taṃ paṭhamadassanaṃ. Yaṃ vā anomadassissa bhagavato vacanaṃ saddahantena tadā abhinīhārakāle paccakkhato viya tumhākaṃ dassanaṃ siddhaṃ, taṃ paṭhamadassanaṃ. Paccāgamanacārikanti paccāgamanatthaṃ cārikaṃ.

    སཏྟཱཧནྟི ཨཙྩནྟསཾཡོགེ ཨུཔཡོགཝཙནཾ། ཐེརསྶ ཛཱཏོཝརཀགེཧཾ ཀིར ཨིཏརགེཧཏོ ཝིཝེཀཊྛཾ, ཝིཝཊངྒཎཉྩ, ཏསྨཱ དེཝབྲཧྨཱནཾ ཨུཔསངྐམནཡོགྱནྟི ‘‘ཛཱཏོཝརཀཾ པཊིཛགྒཐཱ’’ཏི ཝུཏྟཾ། སོཏི ཨུཔརེཝཏོ། ཏཾ པཝཏྟིནྟི ཏཏྠ ཝསིཏུཀཱམཏཱཡ ཝུཏྟཾ ཏཾ།

    Sattāhanti accantasaṃyoge upayogavacanaṃ. Therassa jātovarakagehaṃ kira itaragehato vivekaṭṭhaṃ, vivaṭaṅgaṇañca, tasmā devabrahmānaṃ upasaṅkamanayogyanti ‘‘jātovarakaṃ paṭijaggathā’’ti vuttaṃ. Soti uparevato. Taṃ pavattinti tattha vasitukāmatāya vuttaṃ taṃ.

    ‘‘ཛཱནནྟཱཔི ཏཐཱགཏཱ པུཙྪནྟཱི’’ཏི (པཱརཱ॰ ༡༦, ༡༦༥) ཨིམིནཱ ནཱིཧཱརེན ཐེརོ ‘‘ཀེ ཏུམྷེ’’ཏི པུཙྪི། ‘‘ཏྭཾ ཙཏཱུཧི མཧཱརཱཛེཧི མཧནྟཏརོ’’ཏི པུཊྛོ ཨཏྟནོ མཧཏྟཾ སཏྠུ ཨུཔརི པཀྑིཔནྟོ ‘‘ཨཱརཱམིཀསདིསཱ ཨེཏེ ཨུཔཱསིཀེ ཨམྷཱཀཾ སཏྠུནོ’’ཏི ཨཱཧ། སཱཝཀསམྤཏྟིཀིཏྟནམྤི ཧི ཨཏྠཏོ སཏྠུ སམྤཏྟིཾཡེཝ ཝིབྷཱཝེཏི།

    ‘‘Jānantāpi tathāgatā pucchantī’’ti (pārā. 16, 165) iminā nīhārena thero ‘‘ke tumhe’’ti pucchi. ‘‘Tvaṃ catūhi mahārājehi mahantataro’’ti puṭṭho attano mahattaṃ satthu upari pakkhipanto ‘‘ārāmikasadisā ete upāsike amhākaṃ satthuno’’ti āha. Sāvakasampattikittanampi hi atthato satthu sampattiṃyeva vibhāveti.

    སོཏཱཔཏྟིཕལེ པཏིཊྛཱཡཱཏི ཐེརསྶ དེསནཱནུབྷཱཝེན, ཨཏྟནོ ཙ ཨུཔནིསྶཡསམྤཏྟིཡཱ ཉཱཎསྶ པརིཔཀྐཏྟཱ སོཏཱཔཏྟིཕལེ པཏིཊྛཧིཏྭཱ།

    Sotāpattiphale patiṭṭhāyāti therassa desanānubhāvena, attano ca upanissayasampattiyā ñāṇassa paripakkattā sotāpattiphale patiṭṭhahitvā.

    ཨཡནྟི ཡཐཱཝུཏྟཱ། ཨེཏྠཱཏི ‘‘ཝེསཱལིཾ པིཎྜཱཡ པཱཝིསཱི’’ཏི ཨེཏསྨིཾ ཝེསཱལཱིཔཝེསེ། ཨནུཔུབྦཱིཀཐཱཏི ཨནུཔུབྦདཱིཔནཱི ཀཐཱ།

    Ayanti yathāvuttā. Etthāti ‘‘vesāliṃ piṇḍāya pāvisī’’ti etasmiṃ vesālīpavese. Anupubbīkathāti anupubbadīpanī kathā.

    ༡༦༧. ཨུདེནཡཀྑསྶ ཙེཏིཡཊྛཱནེཏི ཨུདེནསྶ ནཱམ ཡཀྑསྶ ཨཱཡཏནབྷཱཝེན ཨིཊྛཀཱཧི ཙིཏེ མཧཱཛནསྶ ཙིཏྟཱིཀཏཊྛཱནེ། ཀཏཝིཧཱརོཏི བྷགཝནྟཾ ཨུདྡིསྶ ཀཏཝིཧཱརོ། ཝུཙྩཏཱིཏི པུརིམཝོཧཱརེན ‘‘ཨུདེནཙེཏིཡ’’ནྟི ཝུཙྩཏི། གོཏམཀཱདཱིསུཔཱིཏི ‘‘གོཏམཀཙེཏིཡ’’ནྟི ཨེཝཾ ཨཱདཱིསུཔི། ཨེསེཝ ནཡོཏི ཙེཏིཡཊྛཱནེ ཀཏཝིཧཱརབྷཱཝཾ ཨཏིདིསཏི། ཝཌྜྷིཏཱཏི བྷཱཝནཱཔཱརིཔཱུརིཝསེན པརིབྲཱུཧིཏཱ། པུནཔྤུནཾ ཀཏཱཏི བྷཱཝནཱཡ བཧུལཱིཀརཎེན ཨཔརཱཔརཾ པཝཏྟིཏཱ། ཡུཏྟཡཱནཾ ཝིཡ ཀཏཱཏི ཡཐཱ ཡུཏྟཾ ཨཱཛཉྙཡཱནཾ ཚེཀེན སཱརཐིནཱ ཨདྷིཊྛིཏཾ ཡཐཱརུཙི པཝཏྟཏི, ཨེཝཾ ཡཐཱརུཙིཔཝཏྟིརཧཏཾ གམིཏཱ། པཏིཊྛཱནཊྛེནཱཏི ཨདྷིཊྛཱནཊྛེན། ཝཏྠུ ཝིཡ ཀཏཱཏི སབྦསོ ཨུཔཀྐིལེསཝིསོདྷནེན ཨིདྡྷིཝིསཡཏཱཡ པཝཏྟིཊྛཱནབྷཱཝཏོ སུཝིསོདྷིཏཔརིསྶཡཝཏྠུ ཝིཡ ཀཏཱ། ཨདྷིཊྛིཏཱཏི པཊིཔཀྑདཱུརཱིབྷཱཝཏོ སུབྷཱཝིཏབྷཱཝེན ཏཾཏཾཨདྷིཊྛཱནཡོགྱཏཱཡ ཋཔིཏཱ ། སམནྟཏོ ཙིཏཱཏི སབྦབྷཱགེན བྷཱཝནུཔཙཡཾ གམིཏཱ། ཏེནཱཧ ‘‘སུཝཌྜྷིཏཱ’’ཏི། སུཊྛུ སམཱརདྡྷཱཏི ཨིདྡྷིབྷཱཝནཱཡ སིཁཱཔྤཏྟིཡཱ སམྨདེཝ སཾསེཝིཏཱ།

    167.Udenayakkhassa cetiyaṭṭhāneti udenassa nāma yakkhassa āyatanabhāvena iṭṭhakāhi cite mahājanassa cittīkataṭṭhāne. Katavihāroti bhagavantaṃ uddissa katavihāro. Vuccatīti purimavohārena ‘‘udenacetiya’’nti vuccati. Gotamakādīsupīti ‘‘gotamakacetiya’’nti evaṃ ādīsupi. Eseva nayoti cetiyaṭṭhāne katavihārabhāvaṃ atidisati. Vaḍḍhitāti bhāvanāpāripūrivasena paribrūhitā. Punappunaṃ katāti bhāvanāya bahulīkaraṇena aparāparaṃ pavattitā. Yuttayānaṃ viya katāti yathā yuttaṃ ājaññayānaṃ chekena sārathinā adhiṭṭhitaṃ yathāruci pavattati, evaṃ yathārucipavattirahataṃ gamitā. Patiṭṭhānaṭṭhenāti adhiṭṭhānaṭṭhena. Vatthu viya katāti sabbaso upakkilesavisodhanena iddhivisayatāya pavattiṭṭhānabhāvato suvisodhitaparissayavatthu viya katā. Adhiṭṭhitāti paṭipakkhadūrībhāvato subhāvitabhāvena taṃtaṃadhiṭṭhānayogyatāya ṭhapitā . Samantato citāti sabbabhāgena bhāvanupacayaṃ gamitā. Tenāha ‘‘suvaḍḍhitā’’ti. Suṭṭhu samāraddhāti iddhibhāvanāya sikhāppattiyā sammadeva saṃsevitā.

    ཨནིཡམེནཱཏི ‘‘ཡསྶ ཀསྶཙཱི’’ཏི ཨནིཡམཝཙནེན། ནིཡམེཏྭཱཏི ‘‘ཏཐཱགཏསྶཱ’’ཏི སརཱུཔདསྶནེན ནིཡམེཏྭཱ། ཨཱཡུཔྤམཱཎནྟི པརམཱཡུཔྤམཱཎཾ ཝདཏི, ཏསྶེཝ གཧཎེ ཀཱརཎཾ བྲཧྨཛཱལསུཏྟཝཎྞནཱཡཾ (དཱི॰ ནི॰ ཨཊྛ॰ ༡.༤༠; དཱི॰ ནི॰ ཊཱི॰ ༡.༤༠) ཝུཏྟནཡེནེཝ ཝེདིཏབྦཾ། མཧཱསིཝཏྠེརོ པན ‘‘མཧཱབོདྷིསཏྟཱནཾ ཙརིམབྷཝེ པཊིསནྡྷིདཱཡིནོ ཀམྨསྶ ཨསངྑྱེཡྻཱཡུཀཏཱསཾཝཏྟནསམཏྠཏཾ ཧདཡེ ཋཔེཏྭཱ བུདྡྷཱནཾ ཨཱཡུསངྑཱརསྶ པརིསྶཡཝིཀྑམྦྷནསམཏྠཏཱ པཱལི༹ཡཾ ཨཱགཏཱ ཨེཝཱཏི ཨིམཾ བྷདྡཀཔྤམེཝ ཏིཊྛེཡྻཱ’’ཏི ཨཝོཙ། ‘‘ཁཎྜིཙྩཱདཱིཧི ཨབྷིབྷུཡྻཏཱི’’ཏི ཨེཏེན ཡཐཱ ཨིདྡྷིབལེན ཛརཱཡ ན པཊིགྷཱཏོ, ཨེཝཾ ཏེན མརཎསྶཔི ན པཊིགྷཱཏོཏི ཨཏྠཏོ ཨཱཔནྣམེཝཱཏི། ‘‘ཀྭ སརོ ཁིཏྟོ, ཀྭ ཙ ནིཔཏིཏོ’’ཏི ཨཉྙཐཱ ཝུཊྛིཏེནཱཔི ཐེརཝཱདེན ཨཊྛཀཐཱཝཙནམེཝ སམཏྠིཏནྟི དཊྛབྦཾ ། ཏེནཱཧ ‘‘སོ ན རུཙྩཏི…པེ॰… ནིཡམིཏ’’ནྟི།

    Aniyamenāti ‘‘yassa kassacī’’ti aniyamavacanena. Niyametvāti ‘‘tathāgatassā’’ti sarūpadassanena niyametvā. Āyuppamāṇanti paramāyuppamāṇaṃ vadati, tasseva gahaṇe kāraṇaṃ brahmajālasuttavaṇṇanāyaṃ (dī. ni. aṭṭha. 1.40; dī. ni. ṭī. 1.40) vuttanayeneva veditabbaṃ. Mahāsivatthero pana ‘‘mahābodhisattānaṃ carimabhave paṭisandhidāyino kammassa asaṅkhyeyyāyukatāsaṃvattanasamatthataṃ hadaye ṭhapetvā buddhānaṃ āyusaṅkhārassa parissayavikkhambhanasamatthatā pāḷiyaṃ āgatā evāti imaṃ bhaddakappameva tiṭṭheyyā’’ti avoca. ‘‘Khaṇḍiccādīhi abhibhuyyatī’’ti etena yathā iddhibalena jarāya na paṭighāto, evaṃ tena maraṇassapi na paṭighātoti atthato āpannamevāti. ‘‘Kva saro khitto, kva ca nipatito’’ti aññathā vuṭṭhitenāpi theravādena aṭṭhakathāvacanameva samatthitanti daṭṭhabbaṃ . Tenāha ‘‘so na ruccati…pe… niyamita’’nti.

    པརིཡུཊྛིཏཙིཏྟོཏི ཡཐཱ ཀིཉྩི ཨཏྠཱནཏྠཾ སལླཀྑེཏུཾ ན སཀྐཱ, ཨེཝཾ ཨབྷིབྷཱུཏཙིཏྟོ། སོ པན ཨབྷིབྷཝོ མཧཏཱ ཨུདཀོགྷེན ཨཔྤཀསྶ ཨུདཀསྶ ཨཛ྄ཛྷོཏྠརཎཾ ཝིཡ ཨཧོསཱིཏི ཝུཏྟཾ ‘‘ཨཛ྄ཛྷོཏྠཊཙིཏྟོ’’ཏི། ཨཉྙོཔཱིཏི ཐེརཏོ, ཨརིཡེཧི ཝཱ ཨཉྙོཔི ཡོ ཀོཙི པུཐུཛྫནོ། པུཐུཛྫནགྒཧཎཉྩེཏྠ ཡཐཱ སབྦེན སབྦཾ ཨཔྤཧཱིནཝིཔལླཱསོ མཱརེན པརིཡུཊྛིཏཙིཏྟོ ཀིཉྩི ཨཏྠཾ སལླཀྑེཏུཾ ན སཀྐོཏི, ཨེཝཾ ཐེརོ བྷགཝཏཱ ཀཏཾ ནིམིཏྟོབྷཱསཾ སབྦསོ ན སལླཀྑེསཱིཏི དསྶནཏྠཾ། ཏེནཱཧ ‘‘མཱརོ ཧཱི’’ཏིཨཱདི། ཙཏྟཱརོ ཝིཔལླཱསཱཏི ཨསུབྷེ ‘‘སུབྷ’’ནྟི སཉྙཱཝིཔལླཱསོ, ཙིཏྟཝིཔལླཱསོ, དུཀྑེ ‘‘སུཁ’’ནྟི སཉྙཱཝིཔལླཱསོ, ཙིཏྟཝིཔལླཱསོཏི ཨིམེ ཙཏྟཱརོ ཝིཔལླཱསཱ། ཏེནཱཏི ཡདིཔི ཨིཏརེ ཨཊྛ ཝིཔལླཱསཱ པཧཱིནཱ, ཏཐཱཔི ཡཐཱཝུཏྟཱནཾ ཙཏུནྣཾ ཝིཔལླཱསཱནཾ ཨཔྤཧཱིནབྷཱཝེན། ཨསྶཱཏི ཐེརསྶ། མདྡཏཱིཏི ཕུསནམཏྟེན མདྡནྟོ ཝིཡ ཧོཏི, ཨཉྙཐཱ ཏེན མདྡིཏེ སཏྟཱནཾ མརཎམེཝ སིཡཱ། ཀིཾ སཀྑིསྶཏི, ན སཀྑིསྶཏཱིཏི ཨདྷིཔྤཱཡོ། ཀསྨཱ ན སཀྑིསྶཏི, ནནུ ཨེས ཨགྒསཱཝཀསྶ ཀུཙྪིཾ པཝིཊྛོཏི? སཙྩཾ པཝིཊྛོ, ཏཉྩ ཁོ ཨཏྟནོ ཨཱནུབྷཱཝདསྶནཏྠཾ, ན ཝིབཱདྷནཱདྷིཔྤཱཡེན། ཝིབཱདྷནཱདྷིཔྤཱཡེན པན ཨིདྷ ‘‘ཀིཾ སཀྑིསྶཏཱི’’ཏི ཝུཏྟཾ ཧདཡམདྡནསྶ ཨདྷིགཏཏྟཱ། ནིམིཏྟོབྷཱསནྟི ཨེཏྠ ‘‘ཏིཊྛཏུ བྷགཝཱ ཀཔྤ’’ནྟི སཀལཀཔྤཾ ཨཝཊྛཱནཡཱཙནཱཡ ‘‘ཡསྶ ཀསྶཙི ཨཱནནྡ ཙཏྟཱརོ ཨིདྡྷིཔཱདཱ བྷཱཝིཏཱ’’ཏིཨཱདིནཱ ཨཉྙཱཔདེསེན ཨཏྟནོ ཙཏུརིདྡྷིཔཱདབྷཱཝནཱནུབྷཱཝེན ཀཔྤཾ ཨཝཊྛཱནསམཏྠཏཱཝསེན སཉྙུཔྤཱདནཾ ནིམིཏྟཾ, ཏཐཱ པན པརིཡཱཡཾ མུཉྩིཏྭཱ ཨུཛུཀཾཡེཝ ཨཏྟནོ ཨདྷིཔྤཱཡཝིབྷཱཝནཾ ཨོབྷཱསོ། ཛཱནནྟོཡེཝ ཝཱཏི མཱརེན པརིཡུཊྛིཏབྷཱཝཾ ཛཱནནྟོ ཨེཝ། ཨཏྟནོ ཨཔརཱདྷཧེཏུཏོ སཏྟཱནཾ སོཀོ ཏནུཀོ ཧོཏི, ན བལཝཱཏི ཨཱཧ ‘‘དོསཱརོཔནེན སོཀཏནུཀརཎཏྠ’’ནྟི། ཀིཾ པན ཐེརོ མཱརེན པརིཡུཊྛིཏཙིཏྟཀཱལེ པཝཏྟིཾ པཙྪཱ ཛཱནཱཏཱིཏི? ན ཛཱནཱཏི སབྷཱཝེན, བུདྡྷཱནུབྷཱཝེན པན ཨནུཛཱནཱཏི།

    Pariyuṭṭhitacittoti yathā kiñci atthānatthaṃ sallakkhetuṃ na sakkā, evaṃ abhibhūtacitto. So pana abhibhavo mahatā udakoghena appakassa udakassa ajjhottharaṇaṃ viya ahosīti vuttaṃ ‘‘ajjhotthaṭacitto’’ti. Aññopīti therato, ariyehi vā aññopi yo koci puthujjano. Puthujjanaggahaṇañcettha yathā sabbena sabbaṃ appahīnavipallāso mārena pariyuṭṭhitacitto kiñci atthaṃ sallakkhetuṃ na sakkoti, evaṃ thero bhagavatā kataṃ nimittobhāsaṃ sabbaso na sallakkhesīti dassanatthaṃ. Tenāha ‘‘māro hī’’tiādi. Cattāro vipallāsāti asubhe ‘‘subha’’nti saññāvipallāso, cittavipallāso, dukkhe ‘‘sukha’’nti saññāvipallāso, cittavipallāsoti ime cattāro vipallāsā. Tenāti yadipi itare aṭṭha vipallāsā pahīnā, tathāpi yathāvuttānaṃ catunnaṃ vipallāsānaṃ appahīnabhāvena. Assāti therassa. Maddatīti phusanamattena maddanto viya hoti, aññathā tena maddite sattānaṃ maraṇameva siyā. Kiṃ sakkhissati, na sakkhissatīti adhippāyo. Kasmā na sakkhissati, nanu esa aggasāvakassa kucchiṃ paviṭṭhoti? Saccaṃ paviṭṭho, tañca kho attano ānubhāvadassanatthaṃ, na vibādhanādhippāyena. Vibādhanādhippāyena pana idha ‘‘kiṃ sakkhissatī’’ti vuttaṃ hadayamaddanassa adhigatattā. Nimittobhāsanti ettha ‘‘tiṭṭhatu bhagavā kappa’’nti sakalakappaṃ avaṭṭhānayācanāya ‘‘yassa kassaci ānanda cattāro iddhipādā bhāvitā’’tiādinā aññāpadesena attano caturiddhipādabhāvanānubhāvena kappaṃ avaṭṭhānasamatthatāvasena saññuppādanaṃ nimittaṃ, tathā pana pariyāyaṃ muñcitvā ujukaṃyeva attano adhippāyavibhāvanaṃ obhāso. Jānantoyeva vāti mārena pariyuṭṭhitabhāvaṃ jānanto eva. Attano aparādhahetuto sattānaṃ soko tanuko hoti, na balavāti āha ‘‘dosāropanena sokatanukaraṇattha’’nti. Kiṃ pana thero mārena pariyuṭṭhitacittakāle pavattiṃ pacchā jānātīti? Na jānāti sabhāvena, buddhānubhāvena pana anujānāti.

    མཱརཡཱཙནཀཐཱཝཎྞནཱ

    Mārayācanakathāvaṇṇanā

    ༡༦༨. ཨནཏྠེ ནིཡོཛེནྟོ གུཎམཱརཎེན མཱརེཏི, ཝིརཱགཝིབནྡྷནེན ཝཱ ཛཱཏིནིམིཏྟཏཱཡ ཏཏྠ ཏཏྠ ཛཱཏཾ ཛཱཏཾ མཱརེནྟོ ཝིཡ ཧོཏཱིཏི ‘‘མཱརེཏཱིཏི མཱརོ’’ཏི ཝུཏྟཾ། ཨཏིཝིཡ པཱཔཏཱཡ པཱཔིམཱ། ཀཎྷདྷམྨེཧི སམནྣཱགཏོ ཀཎྷོ། ཝིརཱགཱདིགུཎཱནཾ ཨནྟཀརཎཏོ ཨནྟཀོ། སཏྟཱནཾ ཨནཏྠཱཝཧཔཊིཔཏྟིཾ ན མུཙྩཏཱིཏི ནམུཙི། ཨཏྟནོ མཱརཔཱསེན པམཏྟེ བནྡྷཏི, པམཏྟཱ ཝཱ བནྡྷཱུ ཨེཏསྶཱཏི པམཏྟབནྡྷུ། སཏྟམསཏྟཱཧཏོ པརཾ སཏྟ ཨཧཱནི སནྡྷཱཡཱཧ ‘‘ཨཊྛམེ སཏྟཱཧེ’’ཏི ན པན པལླངྐསཏྟཱཧཱདི ཝིཡ ནིཡཏཀིཙྩསྶ ཨཊྛམསཏྟཱཧསྶ ནཱམ ལབྦྷནཏོ། སཏྟམསཏྟཱཧསྶ ཧི པརཏོ ཨཛཔཱལནིགྲོདྷམཱུལེ མཧཱབྲཧྨུནོ, སཀྐསྶ ཙ དེཝརཉྙོ པཊིཉྙཱཏདྷམྨདེསནཾ བྷགཝནྟཾ ཉཏྭཱ ‘‘ཨིདཱནི སཏྟེ དྷམྨདེསནཱཡ མམ ཝིསཡཾ ཨཏིཀྐམཱཔེསྶཏཱི’’ཏི སཉྫཱཏདོམནསྶོ ཧུཏྭཱ ཋིཏོ ཙིནྟེསི ‘‘ཧནྡ དཱནཱཧཾ ནཾ ཨུཔཱཡེན པརིནིབྦཱཔེསྶཱམི, ཨེཝམསྶ མནོརཐོ ཨཉྙཐཏྟཾ གམིསྶཏི, མམ ཙ མནོརཐོ ཨིཛ྄ཛྷིསྶཏཱི’’ཏི ། ཨེཝཾ པན ཙིནྟེཏྭཱ བྷགཝནྟཾ ཨུཔསངྐམིཏྭཱ ཨེཀཾ ཨནྟཾ ཋིཏོ ‘‘པརིནིབྦཱཏུ དཱནི བྷནྟེ བྷགཝཱ’’ཏིཨཱདིནཱ པརིནིབྦཱནཾ ཡཱཙི, ཏཾ སནྡྷཱཡ ཝུཏྟཾ ‘‘ཨཊྛམེ སཏྟཱཧེ’’ཏིཨཱདི། ཏཏྠ ཨཛྫཱཏི ཨཱཡུསངྑཱརོསྶཛྫནདིཝསཾ སནྡྷཱཡཱཧ། བྷགཝཱ ཙསྶ ཨབྷིསནྡྷིཾ ཛཱནནྟོཔི ཏཾ ཨནཱཝིཀཏྭཱ པརིནིབྦཱནསྶ ཨཀཱལབྷཱཝམེཝ པཀཱསེནྟོ ཡཱཙནཾ པཊིཀྑིཔི། ཏེནཱཧ ‘‘ན ཏཱཝཱཧ’’ནྟིཨཱདི།

    168.Anatthe niyojento guṇamāraṇena māreti, virāgavibandhanena vā jātinimittatāya tattha tattha jātaṃ jātaṃ mārento viya hotīti ‘‘māretīti māro’’ti vuttaṃ. Ativiya pāpatāya pāpimā. Kaṇhadhammehi samannāgato kaṇho. Virāgādiguṇānaṃ antakaraṇato antako. Sattānaṃ anatthāvahapaṭipattiṃ na muccatīti namuci. Attano mārapāsena pamatte bandhati, pamattā vā bandhū etassāti pamattabandhu. Sattamasattāhato paraṃ satta ahāni sandhāyāha ‘‘aṭṭhame sattāhe’’ti na pana pallaṅkasattāhādi viya niyatakiccassa aṭṭhamasattāhassa nāma labbhanato. Sattamasattāhassa hi parato ajapālanigrodhamūle mahābrahmuno, sakkassa ca devarañño paṭiññātadhammadesanaṃ bhagavantaṃ ñatvā ‘‘idāni satte dhammadesanāya mama visayaṃ atikkamāpessatī’’ti sañjātadomanasso hutvā ṭhito cintesi ‘‘handa dānāhaṃ naṃ upāyena parinibbāpessāmi, evamassa manoratho aññathattaṃ gamissati, mama ca manoratho ijjhissatī’’ti . Evaṃ pana cintetvā bhagavantaṃ upasaṅkamitvā ekaṃ antaṃ ṭhito ‘‘parinibbātu dāni bhante bhagavā’’tiādinā parinibbānaṃ yāci, taṃ sandhāya vuttaṃ ‘‘aṭṭhame sattāhe’’tiādi. Tattha ajjāti āyusaṅkhārossajjanadivasaṃ sandhāyāha. Bhagavā cassa abhisandhiṃ jānantopi taṃ anāvikatvā parinibbānassa akālabhāvameva pakāsento yācanaṃ paṭikkhipi. Tenāha ‘‘na tāvāha’’ntiādi.

    མགྒཝསེན ཝིཡཏྟཱཏི སཙྩསམྤཊིཝེདྷཝེཡྻཏྟིཡེན བྱཏྟཱ། ཏཐེཝ ཝིནཱིཏཱཏི མགྒཝསེན ཀིལེསཱནཾ སམུཙྪེདཝིནཡནེན ཝིནཱིཏཱ། ཏཐཱ ཝིསཱརདཱཏི ཨརིཡམགྒཱདྷིགམེནེཝ སཏྠུསཱསནེ ཝེསཱརཛྫཔྤཏྟིཡཱ ཝིསཱརདཱ , སཱརཛྫཀརཱནཾ དིཊྛིཝིཙིཀིཙྪཱདིཔཱཔདྷམྨཱནཾ ཝིགམེན ཝིསཱརདབྷཱཝཾ པཏྟཱཏི ཨཏྠོ། ཡསྶ སུཏསྶ ཝསེན ཝཊྚདུཀྑཏོ ནིསྶརཎཾ སམྦྷཝཏི, ཏཾ ཨིདྷ ཨུཀྐཊྛནིདྡེསེན ‘‘སུཏ’’ནྟི ཨདྷིཔྤེཏནྟི ཨཱཧ ‘‘ཏེཔིཊཀཝསེནཱ’’ཏི། ཏིཎྞཾ པིཊཀཱནཾ སམཱུཧོ ཏེཔིཊཀཾ, ཏཱིཎི ཝཱ པིཊཀཱནི ཏིཔིཊཀཾ, ཏིཔིཊཀམེཝ ཏེཔིཊཀཾ, ཏསྶ ཝསེན། ཏམེཝཱཏི ཡཾ ཏཾ ཏེཔིཊཀཾ སོཏབྦབྷཱཝེན ‘‘སུཏ’’ནྟི ཝུཏྟཾ, ཏམེཝ། དྷམྨནྟི པརིཡཏྟིདྷམྨཾ། དྷཱརེནྟཱིཏི སུཝཎྞབྷཱཛནེ པཀྑིཏྟསཱིཧཝསཾ ཝིཡ ཨཝིནསྶནྟཾ ཀཏྭཱ སུཔྤགུཎསུཔྤཝཏྟིབྷཱཝེན དྷཱརེནྟི ཧདཡེ ཋཔེནྟི། ཨིཏི པརིཡཏྟིདྷམྨཝསེན བཧུསྶུཏདྷམྨདྷརབྷཱཝཾ དསྶེཏྭཱ ཨིདཱནི པཊིཝེདྷདྷམྨཝསེནཔི ཏཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ། ཨརིཡདྷམྨསྶཱཏི མགྒཕལདྷམྨསྶ, ནཝཝིདྷསྶཱཔི ཝཱ ལོཀུཏྟརདྷམྨསྶ། ཨནུདྷམྨབྷཱུཏནྟི ཨདྷིགམཱཡ ཨནུརཱུཔདྷམྨབྷཱུཏཾ། ཨནུཙྪཝིཀཔཊིཔདནྟི ཙ ཏམེཝ ཝིཔསྶནཱདྷམྨམཱཧ, ཚབྦིདྷཱ ཝིསུདྡྷིཡོ ཝཱ། ཨནུདྷམྨནྟི ཏསྶཱ ཡཐཱཝུཏྟཔཊིཔདཱཡ ཨནུརཱུཔཾ ཨབྷིསལླེཁིཏཾ ཨཔྤིཙྪཏཱདིདྷམྨཾ། ཙརཎསཱིལཱཏི སམཱདཱཡ པཝཏྟནསཱིལཱ། ཨནུ མགྒཕལདྷམྨོ ཨེཏིསྶཱཏི ཝཱ ཨནུདྷམྨཱ, ཝུཊྛཱནགཱམིནིཝིཔསྶནཱ, ཏསྶཱ ཙརཎསཱིལཱ། ཨཏྟནོ ཨཱཙརིཡཝཱདནྟི ཨཏྟནོ ཨཱཙརིཡསྶ སམྨཱསམྦུདྡྷསྶ ཝཱདཾ། སདེཝཀསྶ ལོཀསྶ ཨཱཙཱརསིཀྑཱཔནེན ཨཱཙརིཡོ, བྷགཝཱ། ཏསྶ ཝཱདོ, ཙཏུསཙྩདེསནཱ།

    Maggavasena viyattāti saccasampaṭivedhaveyyattiyena byattā. Tatheva vinītāti maggavasena kilesānaṃ samucchedavinayanena vinītā. Tathā visāradāti ariyamaggādhigameneva satthusāsane vesārajjappattiyā visāradā , sārajjakarānaṃ diṭṭhivicikicchādipāpadhammānaṃ vigamena visāradabhāvaṃ pattāti attho. Yassa sutassa vasena vaṭṭadukkhato nissaraṇaṃ sambhavati, taṃ idha ukkaṭṭhaniddesena ‘‘suta’’nti adhippetanti āha ‘‘tepiṭakavasenā’’ti. Tiṇṇaṃ piṭakānaṃ samūho tepiṭakaṃ, tīṇi vā piṭakāni tipiṭakaṃ, tipiṭakameva tepiṭakaṃ, tassa vasena. Tamevāti yaṃ taṃ tepiṭakaṃ sotabbabhāvena ‘‘suta’’nti vuttaṃ, tameva. Dhammanti pariyattidhammaṃ. Dhārentīti suvaṇṇabhājane pakkhittasīhavasaṃ viya avinassantaṃ katvā suppaguṇasuppavattibhāvena dhārenti hadaye ṭhapenti. Iti pariyattidhammavasena bahussutadhammadharabhāvaṃ dassetvā idāni paṭivedhadhammavasenapi taṃ dassetuṃ ‘‘atha vā’’tiādi vuttaṃ. Ariyadhammassāti maggaphaladhammassa, navavidhassāpi vā lokuttaradhammassa. Anudhammabhūtanti adhigamāya anurūpadhammabhūtaṃ. Anucchavikapaṭipadanti ca tameva vipassanādhammamāha, chabbidhā visuddhiyo vā. Anudhammanti tassā yathāvuttapaṭipadāya anurūpaṃ abhisallekhitaṃ appicchatādidhammaṃ. Caraṇasīlāti samādāya pavattanasīlā. Anu maggaphaladhammo etissāti vā anudhammā, vuṭṭhānagāminivipassanā, tassā caraṇasīlā. Attano ācariyavādanti attano ācariyassa sammāsambuddhassa vādaṃ. Sadevakassa lokassa ācārasikkhāpanena ācariyo, bhagavā. Tassa vādo, catusaccadesanā.

    ཨཱཙིཀྑིསྶནྟཱིཏི ཨཱདིཏོ ཀཐེསྶནྟི, ཨཏྟནཱ ཨུགྒཧིཏནིཡཱམེན པརེ ཨུགྒཎྷཱཔེསྶནྟཱིཏི ཨཏྠོ། དེསེསྶནྟཱིཏི ཝཱཙེསྶནྟི, པཱལི༹ཾ སམྨཱ པབོདྷེསྶནྟཱིཏི ཨཏྠོ། པཉྙཱཔེསྶནྟཱིཏི པཛཱནཱཔེསྶནྟི, སངྐཱཔེསྶནྟཱིཏི ཨཏྠོ། པཊྛཔེསྶནྟཱིཏི པཀཱརེཧི ཋཔེསྶནྟི, པཀཱསེསྶནྟཱིཏི ཨཏྠོ། ཝིཝརིསྶནྟཱིཏི ཝིཝཊཾ ཀརིསྶནྟི། ཝིབྷཛིསྶནྟཱིཏི ཝིབྷཏྟཾ ཀརིསྶནྟི། ཨུཏྟཱནིཾ ཀརིསྶནྟཱིཏི ཨནུཏྟཱནཾ གམྦྷཱིརཾ ཨུཏྟཱནཾ པཱཀཊཾ ཀརིསྶནྟི། སཧ དྷམྨེནཱཏི ཨེཏྠ དྷམྨ-སདྡོ ཀཱརཎཔརིཡཱཡོ ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏིཨཱདཱིསུ (ཝིབྷ॰ ༢༧༠) ཝིཡཱཏི ཨཱཧ ‘‘སཧེཏུཀེན སཀཱརཎེན ཝཙནེནཱ’’ཏི། སཔྤཱཊིཧཱརིཡནྟི སནིསྶརཎཾ , ཡཐཱ པརཝཱདཾ བྷཉྫིཏྭཱ སཀཝཱདོ པཏིཊྛཧཏི, ཨེཝཾ ཧེཏུདཱཧརཎེཧི ཡཐཱདྷིགཏམཏྠཾ སམྤཱདེཏྭཱ དྷམྨཾ ཀཐེསྶནྟི། ཏེནཱཧ ‘‘ནིཡྻཱནིཀཾ ཀཏྭཱ དྷམྨཾ དེསེསྶནྟཱི’’ཏི, ནཝཝིདྷཾ ལོཀུཏྟརདྷམྨཾ པབོདྷེསྶནྟཱིཏི ཨཏྠོ། ཨེཏྠ ཙ ‘‘པཉྙཱཔེསྶནྟཱི’’ཏིཨཱདཱིཧི ཚཧི པདེཧི ཚ ཨཏྠཔདཱནི དསྶིཏཱནི, ཨཱདིཏོ པན དྭཱིཧི པདེཧི ཚ བྱཉྫནཔདཱནི། ཨེཏྟཱཝཏཱ ཏེཔིཊཀཾ བུདྡྷཝཙནཾ སཾཝཎྞནཱནཡེན སངྒཧེཏྭཱ དསྶིཏཾ ཧོཏི། ཝུཏྟཉྷེཏཾ ནེཏྟིཡཾ ‘‘དྭཱདསཔདཱནི སུཏྟཾ, ཏཾ སབྦཾ བྱཉྫནཉྩ ཨཏྠོ ཙཱ’’ཏི (ནེཏྟི॰ སངྑཱརེ)།

    Ācikkhissantīti ādito kathessanti, attanā uggahitaniyāmena pare uggaṇhāpessantīti attho. Desessantīti vācessanti, pāḷiṃ sammā pabodhessantīti attho. Paññāpessantīti pajānāpessanti, saṅkāpessantīti attho. Paṭṭhapessantīti pakārehi ṭhapessanti, pakāsessantīti attho. Vivarissantīti vivaṭaṃ karissanti. Vibhajissantīti vibhattaṃ karissanti. Uttāniṃ karissantīti anuttānaṃ gambhīraṃ uttānaṃ pākaṭaṃ karissanti. Saha dhammenāti ettha dhamma-saddo kāraṇapariyāyo ‘‘hetumhi ñāṇaṃ dhammapaṭisambhidā’’tiādīsu (vibha. 270) viyāti āha ‘‘sahetukena sakāraṇena vacanenā’’ti. Sappāṭihāriyanti sanissaraṇaṃ , yathā paravādaṃ bhañjitvā sakavādo patiṭṭhahati, evaṃ hetudāharaṇehi yathādhigatamatthaṃ sampādetvā dhammaṃ kathessanti. Tenāha ‘‘niyyānikaṃ katvā dhammaṃ desessantī’’ti, navavidhaṃ lokuttaradhammaṃ pabodhessantīti attho. Ettha ca ‘‘paññāpessantī’’tiādīhi chahi padehi cha atthapadāni dassitāni, ādito pana dvīhi padehi cha byañjanapadāni. Ettāvatā tepiṭakaṃ buddhavacanaṃ saṃvaṇṇanānayena saṅgahetvā dassitaṃ hoti. Vuttañhetaṃ nettiyaṃ ‘‘dvādasapadāni suttaṃ, taṃ sabbaṃ byañjanañca attho cā’’ti (netti. saṅkhāre).

    སིཀྑཏྟཡསངྒཧིཏནྟི ཨདྷིསཱིལསིཀྑཱདིསིཀྑཏྟཡསངྒཧཎཾ། སཀལཾ སཱསནབྲཧྨཙརིཡནྟི ཨནཝསེསཾ སཏྠུསཱསནབྷཱུཏཾ སེཊྛཙརིཡཾ། སམིདྡྷནྟི སམྨདེཝ ཝཌྜྷིཏཾ། ཛྷཱནསྶཱདཝསེནཱཏི ཏེཧི ཏེཧི བྷིཀྑཱུཧི སམདྷིགཏཛྷཱནསུཁཝསེན། ཝུདྡྷིཔྤཏྟནྟི ཨུལཱ༹རཔཎཱིཏབྷཱཝགམནེན སབྦསོ པརིཝུདྡྷིཾ ཨུཔགཏཾ། སབྦཔཱལིཕུལླཾ ཝིཡ ཨབྷིཉྙཱསམྤཏྟིཝསེན ཨབྷིཉྙཱསམྤདཱཧི སཱསནཱབྷིཝུདྡྷིཡཱ མཏྠཀཔྤཏྟིཏོ། པཏིཊྛིཏཝསེནཱཏི པཏིཊྛཱནཝསེན, པཏིཊྛཔྤཏྟིཡཱཏི ཨཏྠོ། པཊིཝེདྷཝསེན བཧུནོ ཛནསྶ ཧིཏནྟི བཱཧུཛཉྙཾ། ཏེནཱཧ ‘‘བཧུཛནཱབྷིསམཡཝསེནཱ’’ཏི། པུཐུ པུཐུལཾ བྷཱུཏཾ ཛཱཏཾ, པུཐུ ཝཱ པུཐུཏྟཾ བྷཱུཏཾ པཏྟནྟི པུཐུབྷཱུཏཾ། ཏེནཱཧ ‘‘སབྦཱཀཱར…པེ॰… པཏྟ’’ནྟི། སུཊྛུ པཀཱསིཏནྟི སུཊྛུ སམྨདེཝ ཨཱདིཀལྱཱཎཱདིབྷཱཝེན པཝེདིཏཾ།

    Sikkhattayasaṅgahitanti adhisīlasikkhādisikkhattayasaṅgahaṇaṃ. Sakalaṃ sāsanabrahmacariyanti anavasesaṃ satthusāsanabhūtaṃ seṭṭhacariyaṃ. Samiddhanti sammadeva vaḍḍhitaṃ. Jhānassādavasenāti tehi tehi bhikkhūhi samadhigatajhānasukhavasena. Vuddhippattanti uḷārapaṇītabhāvagamanena sabbaso parivuddhiṃ upagataṃ. Sabbapāliphullaṃ viya abhiññāsampattivasena abhiññāsampadāhi sāsanābhivuddhiyā matthakappattito. Patiṭṭhitavasenāti patiṭṭhānavasena, patiṭṭhappattiyāti attho. Paṭivedhavasena bahuno janassa hitanti bāhujaññaṃ. Tenāha ‘‘bahujanābhisamayavasenā’’ti. Puthu puthulaṃ bhūtaṃ jātaṃ, puthu vā puthuttaṃ bhūtaṃ pattanti puthubhūtaṃ. Tenāha ‘‘sabbākāra…pe… patta’’nti. Suṭṭhu pakāsitanti suṭṭhu sammadeva ādikalyāṇādibhāvena paveditaṃ.

    ཨཱཡུསངྑཱརཨོསྶཛྫནཝཎྞནཱ

    Āyusaṅkhāraossajjanavaṇṇanā

    ༡༦༩. སཏིཾ སཱུཔཊྛིཏཾ ཀཏྭཱཏི ཨཡཾ ཀཱཡཱདིཝིབྷཱགོ ཨཏྟབྷཱཝསཉྙིཏོ དུཀྑབྷཱརོ མཡཱ ཨེཏྟཀཾ ཀཱལཾ ཝཧིཏོ, ཨིདཱནི པན ན ཝཧིཏབྦོ, ཨེཏསྶ ཨཝཧནཏྠཾ ཙིརཏརཾ ཀཱལཾ ཨརིཡམགྒསམྦྷཱརོ སམྦྷཏོ, སྭཱཡཾ ཨརིཡམགྒོ པཊིཝིདྡྷོ, ཡཏོ ཨིམེ ཀཱཡཱདཡོ ཨསུབྷཱདིཏོ སམྨདེཝ པརིཉྙཱཏཱ, ཙཏུབྦིདྷམྤི སམྨཱསཏིཾ ཡཐཱཏཐཾ ཝིསཡེ སུཊྛུ ཨུཔཊྛིཏཾ ཀཏྭཱ། ཉཱཎེན པརིཙྪིནྡིཏྭཱཏི ཡསྨཱ ཨིམསྶ ཨཏྟབྷཱཝསཉྙིཏསྶ དུཀྑབྷཱརསྶ ཝཧནེ པཡོཛནབྷཱུཏཾ ཨཏྟཧིཏཾ ཏཱཝ མཧཱབོདྷིམཱུལེ ཨེཝ པརིསམཱཔིཏཾ, པརཧིཏཾ པན བུདྡྷཝེནེཡྻཝིནཡནཾ པརིསམཱཔིཏབྦཾ, ཏཾ ཨིདཱནི མཱསཏྟཡེནེཝ པརིསམཱཔནཾ པཱཔུཎིསྶཏི, ཏསྨཱ ཨབྷཱསི ‘‘ཝིསཱཁཔུཎྞམཱཡཾ པརིནིབྦཱཡིསྶཱམཱི’’ཏི, ཨེཝཾ བུདྡྷཉཱཎེན པརིཙྪིནྡིཏྭཱ སབྦབྷཱགེན ནིཙྪཡཾ ཀཏྭཱ། ཨཱཡུསངྑཱརཾ ཝིསྶཛྫཱིཏི ཨཱཡུནོ ཛཱིཝིཏསྶ ཨབྷིསངྑཱརཀཾ ཕལསམཱཔཏྟིདྷམྨཾ ‘‘ན སམཱཔཛྫིསྶཱམཱི’’ཏི ཝིསྶཛྫི ཏཾཝིསྶཛྫནེནེཝ ཏེན ཨབྷིསངྑརིཡམཱནཾ ཛཱིཝིཏསངྑཱརཾ ‘‘ནཔྤཝཏྟེསྶཱམཱི’’ཏི ཝིསྶཛྫི། ཏེནཱཧ ‘‘ཏཏྠཱ’’ཏིཨཱདི། ཋཱནམཧནྟཏཱཡཔི པཝཏྟིཨཱཀཱརམཧནྟཏཱཡཔི མཧནྟོ པཐཝཱིཀམྤོ། ཏཏྠ ཋཱནམཧནྟཏཱཡ བྷཱུམིཙཱལསྶ མཧཏྟཾ དསྶེཏུཾ ‘‘ཏདཱ ཀིར…པེ॰… ཀམྤིཏྠཱ’’ཏི ཝུཏྟཾ། སཱ པན ཛཱཏིཀྑེཏྟབྷཱུཏཱ དསསཧསྶཱི ལོཀདྷཱཏུ ཨེཝ, ན ཡཱ ཀཱཙི, ཡཱ མཧཱབྷིནཱིཧཱརམཧཱཛཱཏིཨཱདཱིསུཔི ཀམྤིཏྠ། ཏདཱཔི ཏཏྟིཀཱཡ ཨེཝ ཀམྤནེ ཀིཾ ཀཱརཎཾ ? ཛཱཏིཀྑེཏྟབྷཱཝེན ཏསྶེཝ ཨཱདིཏོ པརིགྒཧསྶ ཀཏཏྟཱ། པརིགྒཧཀརཎཾ ཙསྶ དྷམྨཏཱཝསེན ཝེདིཏབྦཾ། ཏཐཱ ཧི པུརིམབུདྡྷཱནམྤི ཏཱཝཏཀམེཝ ཛཱཏིཀྑེཏྟཾ ཨཧོསི། ཏཐཱ ཧི ཝུཏྟཾ ‘‘དསསཧསྶཱི ལོཀདྷཱཏཱུ, ནིསྶདྡཱ ཧོནྟི ནིརཱཀུལཱ…པེ॰… མཧཱསམུདྡོ ཨཱབྷུཛཏི, དསསཧསྶཱི པཀམྤཏཱི’’ཏི ཙ ཨཱདི (བུ॰ ཝཾ॰ ༨༤-༩༡)། ཨུདཀཔརིཡནྟཾ ཀཏྭཱ ཚཔྤཀཱརཔཝེདྷནེན ཨཝཱིཏརཱགེ བྷིཾསེཏཱིཏི བྷིཾསནོ, སོ ཨེཝ བྷིཾསནཀོཏི ཨཱཧ ‘‘བྷཡཛནཀོ’’ཏི། དེཝབྷེརིཡོཏི དེཝདུནྡུབྷིསདྡསྶ པརིཡཱཡཝཙནམཏྟཾ། ན ཙེཏྠ ཀཱཙི བྷེརཱི ‘‘དེཝདུནྡུབྷཱི’’ཏི ཨདྷིཔྤེཏཱ, ཨཐ ཁོ ཨུཔྤཱཏབྷཱཝེན ལབྦྷམཱནོ ཨཱཀཱསགཏོ ནིགྒྷོསསདྡོ། ཏེནཱཧ ‘‘དེཝོ’’ཏིཨཱདི། དེཝོཏི མེགྷོ། ཏསྶ ཧི ཨཙྪབྷཱཝེན ཨཱཀཱསསྶ ཝསྶཱབྷཱཝེན སུཀྑགཛྫིཏསཉྙིཏེ སདྡེ ནིཙྪརནྟེ དེཝདུནྡུབྷིསམཉྙཱ། ཏེནཱཧ ‘‘དེཝོ སུཀྑགཛྫིཏཾ གཛྫཱི’’ཏི།

    169.Satiṃ sūpaṭṭhitaṃ katvāti ayaṃ kāyādivibhāgo attabhāvasaññito dukkhabhāro mayā ettakaṃ kālaṃ vahito, idāni pana na vahitabbo, etassa avahanatthaṃ cirataraṃ kālaṃ ariyamaggasambhāro sambhato, svāyaṃ ariyamaggo paṭividdho, yato ime kāyādayo asubhādito sammadeva pariññātā, catubbidhampi sammāsatiṃ yathātathaṃ visaye suṭṭhu upaṭṭhitaṃ katvā. Ñāṇena paricchinditvāti yasmā imassa attabhāvasaññitassa dukkhabhārassa vahane payojanabhūtaṃ attahitaṃ tāva mahābodhimūle eva parisamāpitaṃ, parahitaṃ pana buddhaveneyyavinayanaṃ parisamāpitabbaṃ, taṃ idāni māsattayeneva parisamāpanaṃ pāpuṇissati, tasmā abhāsi ‘‘visākhapuṇṇamāyaṃ parinibbāyissāmī’’ti, evaṃ buddhañāṇena paricchinditvā sabbabhāgena nicchayaṃ katvā. Āyusaṅkhāraṃ vissajjīti āyuno jīvitassa abhisaṅkhārakaṃ phalasamāpattidhammaṃ ‘‘na samāpajjissāmī’’ti vissajji taṃvissajjaneneva tena abhisaṅkhariyamānaṃ jīvitasaṅkhāraṃ ‘‘nappavattessāmī’’ti vissajji. Tenāha ‘‘tatthā’’tiādi. Ṭhānamahantatāyapi pavattiākāramahantatāyapi mahanto pathavīkampo. Tattha ṭhānamahantatāya bhūmicālassa mahattaṃ dassetuṃ ‘‘tadā kira…pe… kampitthā’’ti vuttaṃ. Sā pana jātikkhettabhūtā dasasahassī lokadhātu eva, na yā kāci, yā mahābhinīhāramahājātiādīsupi kampittha. Tadāpi tattikāya eva kampane kiṃ kāraṇaṃ ? Jātikkhettabhāvena tasseva ādito pariggahassa katattā. Pariggahakaraṇaṃ cassa dhammatāvasena veditabbaṃ. Tathā hi purimabuddhānampi tāvatakameva jātikkhettaṃ ahosi. Tathā hi vuttaṃ ‘‘dasasahassī lokadhātū, nissaddā honti nirākulā…pe… mahāsamuddo ābhujati, dasasahassī pakampatī’’ti ca ādi (bu. vaṃ. 84-91). Udakapariyantaṃ katvā chappakārapavedhanena avītarāge bhiṃsetīti bhiṃsano, so eva bhiṃsanakoti āha ‘‘bhayajanako’’ti. Devabheriyoti devadundubhisaddassa pariyāyavacanamattaṃ. Na cettha kāci bherī ‘‘devadundubhī’’ti adhippetā, atha kho uppātabhāvena labbhamāno ākāsagato nigghosasaddo. Tenāha ‘‘devo’’tiādi. Devoti megho. Tassa hi acchabhāvena ākāsassa vassābhāvena sukkhagajjitasaññite sadde niccharante devadundubhisamaññā. Tenāha ‘‘devo sukkhagajjitaṃ gajjī’’ti.

    པཱིཏིཝེགཝིསྶཊྛནྟི ‘‘ཨེཝཾ ཙིརཏརཾ ཀཱལཾ ཝཧིཏོ ཨཡཾ ཨཏྟབྷཱཝསཉྙིཏོ དུཀྑབྷཱརོ, ཨིདཱནི ན ཙིརསྶེཝ ནིཀྑིཔིསྶཏཱི’’ཏི སཉྫཱཏསོམནསྶོ བྷགཝཱ སབྷཱཝེནེཝ པཱིཏིཝེགཝིསྶཊྛཾ ཨུདཱནཾ ཨུདཱནེསི། ཨེཝཾ པན ཨུདཱནེནྟེན ཨཡམྤི ཨཏྠོ སཱདྷིཏོ ཧོཏཱིཏི དསྶནཏྠཾ ཨཊྛཀཐཱཡཾ ‘‘ཀསྨཱ’’ཏིཨཱདི ཝུཏྟཾ།

    Pītivegavissaṭṭhanti ‘‘evaṃ cirataraṃ kālaṃ vahito ayaṃ attabhāvasaññito dukkhabhāro, idāni na cirasseva nikkhipissatī’’ti sañjātasomanasso bhagavā sabhāveneva pītivegavissaṭṭhaṃ udānaṃ udānesi. Evaṃ pana udānentena ayampi attho sādhito hotīti dassanatthaṃ aṭṭhakathāyaṃ ‘‘kasmā’’tiādi vuttaṃ.

    ཏུལཱིཡཏཱིཏི ཏུལནྟི ཏུལ-སདྡོ ཀམྨསཱདྷནོཏི དསྶེཏུཾ ‘‘ཏུལིཏ’’ནྟི ཝུཏྟཾ། ཨཔྤཱནུབྷཱཝཏཱཡ པརིཙྪིནྣཾ། ཏཐཱ ཧི ཏཾ པརིཏོ ཁཎྜིཏབྷཱཝེན ‘‘པརིཏྟ’’ནྟི ཝུཙྩཏི། པཊིཔཀྑཝིཀྑམྦྷནཏོ དཱིགྷསནྟཱནཏཱཡ, ཝིཔུལཕལཏཱཡ ཙ ན ཏུལཾ ན པརིཙྪིནྣཾ། ཡེཧི ཀཱརཎེཧི པུབྦེ ཨཝིསེསཏོ མཧགྒཏཾ ‘‘ཨཏུལ’’ནྟི ཝུཏྟཾ, ཏཱནི ཀཱརཎཱནི རཱུཔཱཝཙརཏོ ཨཱརུཔྤསྶ སཱཏིསཡཱནི ཝིཛྫནྟཱིཏི ‘‘ཨརཱུཔཱཝཙརཾ ཨཏུལ’’ནྟི ཝུཏྟཾ, ཨིཏརཉྩ ‘‘ཏུལ’’ནྟི, ཨཔྤཝིཔཱཀཾ ཏཱིསུཔི ཀམྨེསུ ཡཾ ཏནུཝིཔཱཀཾ ཧཱིནཾ, ཏཾ ཏུལཾ། བཧུཝིཔཱཀནྟི ཡཾ མཧཱཝིཔཱཀཾ པཎཱིཏཾ, ཏཾ ཨཏུལཾ། ཡཾ པནེཏྠ མཛ྄ཛྷིམཾ, ཏཾ ཧཱིནཾ, ཨུཀྐཊྛནྟི དྭིདྷཱ བྷིནྡིཏྭཱ དྭཱིསུ བྷཱགེསུ པཀྑིཔིཏབྦཾ། ཧཱིནཏྟིཀཝཎྞནཱཡཾ ཝུཏྟནཡེནེཝ ཨཔྤབཧུཝིཔཱཀཏཾ ནིདྡྷཱརེཏྭཱ ཏསྶ ཝསེན ཏུལཱཏུལབྷཱཝོ ཝེདིཏབྦོ། སམྦྷཝཏི ཨེཏསྨཱཏི སམྦྷཝོཏི ཨཱཧ ‘‘སམྦྷཝསྶ ཧེཏུབྷཱུཏ’’ནྟི། ནིཡཀཛ྄ཛྷཏྟརཏོཏི སསནྟཱནདྷམྨེསུ ཝིཔསྶནཱཝསེན, གོཙརཱསེཝནཱཡ ཙ ནིརཏོ། སཝིཔཱཀཾ སམཱནཾ པཝཏྟིཝིཔཱཀམཏྟདཱཡིཀམྨཾ སཝིཔཱཀཊྛེན སམྦྷཝཾ། ན ཙ ཏཾ ཀཱམཱདིབྷཝཱབྷིསངྑཱརཀནྟི ཏཏོ ཝིསེསནཏྠཾ ‘‘སམྦྷཝ’’ནྟི ཝཏྭཱ ‘‘བྷཝསངྑཱར’’ནྟི ཝུཏྟཾ། ཨོསྶཛྫཱིཏི ཨརིཡམགྒེན ཨཝསྶཛྫི ། ཀཝཙཾ ཝིཡ ཨཏྟབྷཱཝཾ པརིཡོནནྡྷིཏྭཱ ཋིཏཾ ཨཏྟནི སམྦྷཱུཏཏྟཱ ཨཏྟསམྦྷཝཾ ཀིལེསཉྩ ཨབྷིནྡཱིཏི ཀིལེསབྷེདསཧབྷཱཝིཀམྨོསྶཛྫནཾ དསྶེནྟོ ཏདུབྷཡསྶ ཀཱརཎཾ ཨཝོཙ ‘‘ཨཛ྄ཛྷཏྟརཏོ སམཱཧིཏོ’’ཏི།

    Tulīyatīti tulanti tula-saddo kammasādhanoti dassetuṃ ‘‘tulita’’nti vuttaṃ. Appānubhāvatāya paricchinnaṃ. Tathā hi taṃ parito khaṇḍitabhāvena ‘‘paritta’’nti vuccati. Paṭipakkhavikkhambhanato dīghasantānatāya, vipulaphalatāya ca na tulaṃ na paricchinnaṃ. Yehi kāraṇehi pubbe avisesato mahaggataṃ ‘‘atula’’nti vuttaṃ, tāni kāraṇāni rūpāvacarato āruppassa sātisayāni vijjantīti ‘‘arūpāvacaraṃ atula’’nti vuttaṃ, itarañca ‘‘tula’’nti, appavipākaṃ tīsupi kammesu yaṃ tanuvipākaṃ hīnaṃ, taṃ tulaṃ. Bahuvipākanti yaṃ mahāvipākaṃ paṇītaṃ, taṃ atulaṃ. Yaṃ panettha majjhimaṃ, taṃ hīnaṃ, ukkaṭṭhanti dvidhā bhinditvā dvīsu bhāgesu pakkhipitabbaṃ. Hīnattikavaṇṇanāyaṃ vuttanayeneva appabahuvipākataṃ niddhāretvā tassa vasena tulātulabhāvo veditabbo. Sambhavati etasmāti sambhavoti āha ‘‘sambhavassa hetubhūta’’nti. Niyakajjhattaratoti sasantānadhammesu vipassanāvasena, gocarāsevanāya ca nirato. Savipākaṃ samānaṃ pavattivipākamattadāyikammaṃ savipākaṭṭhena sambhavaṃ. Na ca taṃ kāmādibhavābhisaṅkhārakanti tato visesanatthaṃ ‘‘sambhava’’nti vatvā ‘‘bhavasaṅkhāra’’nti vuttaṃ. Ossajjīti ariyamaggena avassajji . Kavacaṃ viya attabhāvaṃ pariyonandhitvā ṭhitaṃ attani sambhūtattā attasambhavaṃ kilesañca abhindīti kilesabhedasahabhāvikammossajjanaṃ dassento tadubhayassa kāraṇaṃ avoca ‘‘ajjhattarato samāhito’’ti.

    ཏཱིརེནྟོཏི ‘‘ཨུཔྤཱདོ བྷཡཾ, ཨནུཔྤཱདོ ཁེམ’’ནྟིཨཱདིནཱ ཝཱིམཾསནྟོ། ‘‘ཏུལེནྟོ ཏཱིརེནྟོ’’ཏིཨཱདིནཱ སངྑེཔཏོ ཝུཏྟམཏྠཾ ཝིཏྠཱརཏོ དསྶེཏུཾ ‘‘པཉྩཀྑནྡྷཱ’’ཏི ཨཱདིཾ ཝཏྭཱ བྷཝསངྑཱརསྶ ཨཝསྶཛྫནཱཀཱརཾ སརཱུཔཏོ དསྶེསི། ‘‘ཨེཝ’’ནྟིཨཱདིནཱ པན ཨུདཱནཝཎྞནཱཡཾ ཨཱདིཏོ ཝུཏྟམཏྠཾ ནིགམནཝསེན དསྶེསི།

    Tīrentoti ‘‘uppādo bhayaṃ, anuppādo khema’’ntiādinā vīmaṃsanto. ‘‘Tulento tīrento’’tiādinā saṅkhepato vuttamatthaṃ vitthārato dassetuṃ ‘‘pañcakkhandhā’’ti ādiṃ vatvā bhavasaṅkhārassa avassajjanākāraṃ sarūpato dassesi. ‘‘Eva’’ntiādinā pana udānavaṇṇanāyaṃ ādito vuttamatthaṃ nigamanavasena dassesi.

    མཧཱབྷཱུམིཙཱལཝཎྞནཱ

    Mahābhūmicālavaṇṇanā

    ༡༧༡. ཡནྟི ཀརཎེ ཝཱ ཨདྷིཀརཎེ ཝཱ པཙྩཏྟཝཙནནྟི ཨདྷིཔྤཱཡེན ཨཱཧ ‘‘ཡེན སམཡེན, ཡསྨིཾ ཝཱ སམཡེ’’ཏི། ཨུཀྑེཔཀཝཱཏཱཏི ཨུདཀསནྡྷཱརཀཝཱཏཾ ཨུཔཙྪིནྡིཏྭཱ ཋིཏཊྛཱནཏོ ཁེཔཀཝཱཏཱ། ‘‘སཊྛི…པེ॰… བཧལ’’ནྟི ཨིདཾ ཏསྶ ཝཱཏསྶ ཨུབྦེདྷཔྤམཱཎམེཝ གཧེཏྭཱ ཝུཏྟཾ, ཨཱཡཱམཝིཏྠཱརཏོ པན དསསཧསྶཙཀྐཝཱལ༹པྤམཱཎམྤི ཨུདཀསནྡྷཱརཀཝཱཏཾ ཨུཔཙྪིནྡཏིཡེཝ། ཨཱཀཱསེཏི པུབྦེ ཝཱཏེན པཏིཊྛིཏོཀཱསེ། པུན ཝཱཏོཏི ཨུཀྑེཔཀཝཱཏེ ཏཐཱཀཏྭཱ ཝིགཏེ ཨུདཀསནྡྷཱརཀཝཱཏོ པུན ཨཱབནྡྷིཏྭཱ གཎྷཱཏི ཡཐཱ ཏཾ ཨུདཀཾ ན བྷསྶཏི, ཨེཝཾ ཨུཏྠམྦྷེནྟཾ ཨཱབནྡྷནཝིཏཱནཝསེན བནྡྷིཏྭཱ གཎྷཱཏི། ཏཏོ ཨུདཀཾ ཨུགྒཙྪཏཱིཏི ཏཏོ ཨཱབནྡྷིཏྭཱ གཧཎཏོ ཏེན ཝཱཏེན ཨུཏྠམྦྷིཏཾ ཨུདཀཾ ཨུགྒཙྪཏི ཨུཔརི གཙྪཏི། ཧོཏིཡེཝཱཏི ཨནྟརནྟརཱ ཧོཏིཡེཝ། བཧལབྷཱཝེནཱཏི མཧཱཔཐཝིཡཱ མཧནྟབྷཱཝེན། སཀལཱ ཧི མཧཱཔཐཝཱི ཏདཱ ཨོགྒཙྪཏི, ཨུགྒཙྪཏི ཙ, ཏསྨཱ ཀམྤནཾ ན པཉྙཱཡཏི།

    171. Yanti karaṇe vā adhikaraṇe vā paccattavacananti adhippāyena āha ‘‘yena samayena, yasmiṃ vā samaye’’ti. Ukkhepakavātāti udakasandhārakavātaṃ upacchinditvā ṭhitaṭṭhānato khepakavātā. ‘‘Saṭṭhi…pe… bahala’’nti idaṃ tassa vātassa ubbedhappamāṇameva gahetvā vuttaṃ, āyāmavitthārato pana dasasahassacakkavāḷappamāṇampi udakasandhārakavātaṃ upacchindatiyeva. Ākāseti pubbe vātena patiṭṭhitokāse. Puna vātoti ukkhepakavāte tathākatvā vigate udakasandhārakavāto puna ābandhitvāgaṇhāti yathā taṃ udakaṃ na bhassati, evaṃ utthambhentaṃ ābandhanavitānavasena bandhitvā gaṇhāti. Tato udakaṃ uggacchatīti tato ābandhitvā gahaṇato tena vātena utthambhitaṃ udakaṃ uggacchati upari gacchati. Hotiyevāti antarantarā hotiyeva. Bahalabhāvenāti mahāpathaviyā mahantabhāvena. Sakalā hi mahāpathavī tadā oggacchati, uggacchati ca, tasmā kampanaṃ na paññāyati.

    ཨིཛ྄ཛྷནསྶཱཏི ཨིཙྪིཏཏྠསིཛ྄ཛྷནསྶ། ཨནུབྷཝིཏབྦསྶཨིསྶརིཡསམྤཏྟིཨཱདིཀསྶ། པརིཏྟཱཏི པཊིལདྡྷམཏྟཱ ནཱཏིསུབྷཱཝིཏཱ། ཏཐཱ ཙ བྷཱཝནཱ བལཝཏཱི ན ཧོཏཱིཏི ཨཱཧ ‘‘དུབྦལཱ’’ཏི། སཉྙཱསཱིསེན ཧི བྷཱཝནཱ ཝུཏྟཱ། ཨཔྤམཱཎཱཏི པགུཎཱ སུབྷཱཝིཏཱ། སཱ ཧི ཐིརཱ དལ༹ྷཏརཱ ཧོཏཱིཏི ཨཱཧ ‘‘བལཝཱ’’ཏི། ‘‘པརིཏྟཱ པཐཝཱིསཉྙཱ, ཨཔྤམཱཎཱ ཨཱཔོསཉྙཱ’’ཏི དེསནཱམཏྟམེཝ, ཨཱཔོསཉྙཱཡ པན སུབྷཱཝིཏཱཡ པཐཝཱིཀམྤོ སུཁེནེཝ ཨིཛ྄ཛྷཏཱིཏི ཨཡམེཏྠ ཨདྷིཔྤཱཡོ ཝེདིཏབྦོ། སཾཝེཛེནྟོ དིབྦསམྤཏྟིཡཱ པམཏྟཾ སཀྐཾ དེཝརཱཛཱནཾ། ཝཱིམཾསནྟོ ཝཱ ཏཱཝདེཝ སམདྷིགཏཾ ཨཏྟནོ ཨིདྡྷིབལཾ། མཧཱམོགྒལླཱནཏྠེརསྶ པཱསཱདཀམྤནཾ པཱཀཊནྟི ཏཾ ཨནཱམསིཏྭཱ སངྒྷརཀྑིཏསཱམཎེརསྶ པཱསཱདཀམྤནཾ དསྶེཏུཾ ‘‘སོ ཀིརཱཡསྨཱ’’ཏིཨཱདི ཝུཏྟཾ། པཱུཏིམིསྶོ གནྡྷོ ཨེཏསྶཱཏི པཱུཏིགནྡྷོ, ཏེན པཱུཏིགནྡྷེནེཝ ཨདྷིགཏམཱཏུཀུཙྪིསམྦྷཝཾ ཝིཡ གནྡྷེནེཝ སཱིསེན, ཨཏིཝིཡ དཱརཀོ ཨེཝཱཏི ཨཏྠོ།

    Ijjhanassāti icchitatthasijjhanassa. Anubhavitabbassaissariyasampattiādikassa. Parittāti paṭiladdhamattā nātisubhāvitā. Tathā ca bhāvanā balavatī na hotīti āha ‘‘dubbalā’’ti. Saññāsīsena hi bhāvanā vuttā. Appamāṇāti paguṇā subhāvitā. Sā hi thirā daḷhatarā hotīti āha ‘‘balavā’’ti. ‘‘Parittā pathavīsaññā, appamāṇā āposaññā’’ti desanāmattameva, āposaññāya pana subhāvitāya pathavīkampo sukheneva ijjhatīti ayamettha adhippāyo veditabbo. Saṃvejento dibbasampattiyā pamattaṃ sakkaṃ devarājānaṃ. Vīmaṃsanto vā tāvadeva samadhigataṃ attano iddhibalaṃ. Mahāmoggallānattherassa pāsādakampanaṃ pākaṭanti taṃ anāmasitvā saṅgharakkhitasāmaṇerassa pāsādakampanaṃ dassetuṃ ‘‘so kirāyasmā’’tiādi vuttaṃ. Pūtimisso gandho etassāti pūtigandho, tena pūtigandheneva adhigatamātukucchisambhavaṃ viya gandheneva sīsena, ativiya dārako evāti attho.

    ཨཱཙརིཡནྟི ཨཱཙརིཡཱུཔདེསཾ། ཨིདྡྷཱབྷིསངྑཱརོ ནཱམ ཨིདྡྷིཝིདྷཔྤཊིཔཀྑཱདཱིབྷཱཝེན ཨིཙྪིཏབྦོ, སོ ཙ ཨུཔཱཡེ ཀོསལླསྶ ཨཏྟནཱ ན སམྨཱ ཨུགྒཧིཏཏྟཱ ན ཏཱཝ སིཀྑིཏོཏི ཨཱཧ ‘‘ཨསིཀྑིཏྭཱཝ ཡུདྡྷཾ པཝིཊྛོསཱི’’ཏི། ‘‘པིལཝནྟ’’ནྟི ཨིམིནཱ སཀལམེཝ པཱསཱདཝཏྠུཾ ཨུདཀཾ ཀཏྭཱ ཨདྷིཊྛཱཏབྦཔཱསཱདོཝ ཏཏྠ པིལཝཏཱིཏི དསྶེཏི། ཨདྷིཊྛཱནཀྐམཾ པན ཨུཔམཱཡ དསྶེནྟོ ‘‘ཏཱཏ…པེ॰… ཛཱནཱཧཱི’’ཏི ཨཱཧ། ཏཏྠ ཀཔལླཀཔཱུཝནྟི ཨཱསིཏྟཀཔཱུཝཾ, ཏཾ པཙནྟཱ ཀཔཱལེ པཋམཾ ཀིཉྩི པིཊྛཾ ཋཔེཏྭཱ ཨནུཀྐམེན ཝཌྜྷེཏྭཱ ཨནྟནྟེན པརིཙྪིནྡནྟི པཱུཝཾ སམནྟཏོ པརིཙྪིནྣཾ ཀཏྭཱ ཋཔེནྟི, ཨེཝཾ ‘‘ཨཱཔོཀསིཎཝསེན ‘པཱསཱདེན པཏིཊྛིཏཊྛཱནཾ ཨུདཀཾ ཧོཏཱུ’ཏི ཨདྷིཊྛཧནྟོ སམནྟཏོ པཱསཱདསྶ ཡཱཝ པརིཡནྟཱ ཡཐཱ ཨུདཀཾ ཧོཏི, ཏཐཱ ཨདྷིཊྛཱཏབྦ’’ནྟི ཨུཔམཱཡ ཨུཔདིསཏི།

    Ācariyanti ācariyūpadesaṃ. Iddhābhisaṅkhāro nāma iddhividhappaṭipakkhādībhāvena icchitabbo, so ca upāye kosallassa attanā na sammā uggahitattā na tāva sikkhitoti āha ‘‘asikkhitvāva yuddhaṃ paviṭṭhosī’’ti. ‘‘Pilavanta’’nti iminā sakalameva pāsādavatthuṃ udakaṃ katvā adhiṭṭhātabbapāsādova tattha pilavatīti dasseti. Adhiṭṭhānakkamaṃ pana upamāya dassento ‘‘tāta…pe… jānāhī’’ti āha. Tattha kapallakapūvanti āsittakapūvaṃ, taṃ pacantā kapāle paṭhamaṃ kiñci piṭṭhaṃ ṭhapetvā anukkamena vaḍḍhetvā antantena paricchindanti pūvaṃ samantato paricchinnaṃ katvā ṭhapenti, evaṃ ‘‘āpokasiṇavasena ‘pāsādena patiṭṭhitaṭṭhānaṃ udakaṃ hotū’ti adhiṭṭhahanto samantato pāsādassa yāva pariyantā yathā udakaṃ hoti, tathā adhiṭṭhātabba’’nti upamāya upadisati.

    མཧཱཔདཱནེ ཝུཏྟམེཝཱཏི ‘‘དྷམྨཏཱ ཨེསཱ, བྷིཀྑཝེ, ཡདཱ བོདྷིསཏྟོ ཏུསིཏཱ ཀཱཡཱ ཙཝིཏྭཱ མཱཏུཀུཙྪིཾ ཨོཀྐམཏཱི’’ཏི (དཱི॰ ནི॰ ༢.༡༨) ཝཏྭཱ ‘‘ཨཡཉྩ དསསཧསྶཱི ལོཀདྷཱཏུ སངྐམྤཏི སམྤཀམྤཏི སམྤཝེདྷཏཱི’’ཏི (དཱི॰ ནི॰ ༢.༡༨), ཏཐཱ ‘‘དྷམྨཏཱ ཨེསཱ, བྷིཀྑཝེ, ཡདཱ བོདྷིསཏྟོ མཱཏུཀུཙྪིམྷཱ ནིཀྑམཏཱི’’ཏི (དཱི॰ ནི॰ ༢.༣༠) ཝཏྭཱ ‘‘ཨཡཉྩ དསསཧསྶཱི ལོཀདྷཱཏུ སངྐམྤཏི སམྤཀམྤཏི སམྤཝེདྷཏཱི’’ཏི (དཱི॰ ནི॰ ༢.༣༢) ཙ མཧཱབོདྷིསཏྟསྶ གབྦྷོཀྐནྟིཡཾ, ཨབྷིཛཱཏིཡཉྩ དྷམྨཏཱཝསེན མཧཱཔདཱནེཔཐཝཱིཀམྤསྶ ཝུཏྟཏྟཱ ཨིཏརེསུཔི ཙཏཱུསུ ཋཱནེསུ པཐཝཱིཀམྤོ དྷམྨཏཱཝསེནེཝཱཏི མཧཱཔདཱནེཨཏྠཏོ ཝུཏྟཾ ཨེཝཱཏི ཨདྷིཔྤཱཡོ།

    Mahāpadānevuttamevāti ‘‘dhammatā esā, bhikkhave, yadā bodhisatto tusitā kāyā cavitvā mātukucchiṃ okkamatī’’ti (dī. ni. 2.18) vatvā ‘‘ayañca dasasahassī lokadhātu saṅkampati sampakampati sampavedhatī’’ti (dī. ni. 2.18), tathā ‘‘dhammatā esā, bhikkhave, yadā bodhisatto mātukucchimhā nikkhamatī’’ti (dī. ni. 2.30) vatvā ‘‘ayañca dasasahassī lokadhātu saṅkampati sampakampati sampavedhatī’’ti (dī. ni. 2.32) ca mahābodhisattassa gabbhokkantiyaṃ, abhijātiyañca dhammatāvasena mahāpadānepathavīkampassa vuttattā itaresupi catūsu ṭhānesu pathavīkampo dhammatāvasenevāti mahāpadāneatthato vuttaṃ evāti adhippāyo.

    ཨིདཱནི ནེསཾ པཐཝཱིཀམྤནཾ ཀཱརཎཏོ, པཝཏྟིཨཱཀཱརཏོ ཙ ཝིབྷཱགཾ དསྶེཏུཾ ‘‘ཨིཏི ཨིམེསཱུ’’ཏིཨཱདི ཝུཏྟཾ། དྷཱཏུཀོཔེནཱཏི ཨུཀྑེཔཀདྷཱཏུསངྑཱཏཱཡ ཝཱཡོདྷཱཏུཡཱ པཀོཔེན། ཨིདྡྷཱནུབྷཱཝེནཱཏི ཉཱཎིདྡྷིཡཱ ཝཱ ཀམྨཝིཔཱཀཛིདྡྷིཡཱ ཝཱ པབྷཱཝེན, ཏེཛེནཱཏི ཨཏྠོ། པུཉྙཏེཛེནཱཏི པུཉྙཱནུབྷཱཝེན, མཧཱབོདྷིསཏྟསྶ པུཉྙབལེནཱཏི ཨཏྠོ། ཉཱཎཏེཛེནཱཏི པཊིཝེདྷཉཱཎཱནུབྷཱཝེན། སཱདྷུཀཱརདཱནཝསེནཱཏི ཡཐཱ ཨནཉྙསཱདྷཱརཎེན པཊིཝེདྷཉཱཎཱནུབྷཱཝེན ཨབྷིཧཏཱ མཧཱཔཐཝཱི ཨབྷིསམྦོདྷིཡཾ ཨཀམྤིཏྠ, ཨེཝཾ ཨནཉྙསཱདྷཱརཎེན དེསནཱཉཱཎཱནུབྷཱཝེན ཨབྷིཧཏཱ མཧཱཔཐཝཱི ཨཀམྤིཏྠ, ཏཾ པནསྶཱ སཱདྷུཀཱརདཱནཾ ཝིཡ ཧོཏཱིཏི ‘‘སཱདྷུཀཱརདཱནཝསེནཱ’’ཏི ཝུཏྟཾ།

    Idāni nesaṃ pathavīkampanaṃ kāraṇato, pavattiākārato ca vibhāgaṃ dassetuṃ ‘‘iti imesū’’tiādi vuttaṃ. Dhātukopenāti ukkhepakadhātusaṅkhātāya vāyodhātuyā pakopena. Iddhānubhāvenāti ñāṇiddhiyā vā kammavipākajiddhiyā vā pabhāvena, tejenāti attho. Puññatejenāti puññānubhāvena, mahābodhisattassa puññabalenāti attho. Ñāṇatejenāti paṭivedhañāṇānubhāvena. Sādhukāradānavasenāti yathā anaññasādhāraṇena paṭivedhañāṇānubhāvena abhihatā mahāpathavī abhisambodhiyaṃ akampittha, evaṃ anaññasādhāraṇena desanāñāṇānubhāvena abhihatā mahāpathavī akampittha, taṃ panassā sādhukāradānaṃ viya hotīti ‘‘sādhukāradānavasenā’’ti vuttaṃ.

    ཡེན པན བྷགཝཱ ཨསཱིཏིཨནུབྱཉྫནཔཊིམཎྜིཏདྭཏྟིཾསམཧཱཔུརིསལཀྑཎ- (དཱི॰ ནི॰ ༢.༣༣; ༣.༡༩༨; མ॰ ནི॰ ༢.༣༨༥) ཝིཙིཏྲརཱུཔཀཱཡོ སབྦཱཀཱརཔརིསུདྡྷསཱིལཀྑནྡྷཱདིགུཎརཏནསམིདྡྷིདྷམྨཀཱཡོ པུཉྙམཧཏྟཐཱམམཧཏྟཡསམཧཨཱཨིདྡྷིམཧཏྟཔཉྙཱམཧཏྟཱནཾ པརམུཀྐཾསགཏོ ཨསམོ ཨསམསམོ ཨཔྤཊིཔུགྒལོ ཨརཧཾ སམྨཱསམྦུདྡྷོ ཨཏྟནོ ཨཏྟབྷཱཝསཉྙིཏཾ ཁནྡྷཔཉྩཀཾ ཀཔྤཾ ཝཱ ཀཔྤཱཝསེསཾ ཝཱ ཋཔེཏུཾ སམཏྠོཔི སངྑཏདྷམྨཾ པཊིཛིགུཙྪནཱཀཱརཔྤཝཏྟེན ཉཱཎཝིསེསེན ཏིཎཱཡཔི ཨམཉྙམཱནོ ཨཱཡུསངྑཱརོསྶཛྫནཝིདྷིནཱ ནིརཔེཀྑོ ཨོསྶཛྫི། ཏདནུབྷཱཝཱབྷིཧཏཱ མཧཱཔཐཝཱི ཨཱཡུསངྑཱརོསྶཛྫནེ ཨཀམྤིཏྠ, ཏཾ པནསྶཱ ཀཱརུཉྙསབྷཱཝསཎྛིཏཱ ཝིཡ ཧོཏཱིཏི ཝུཏྟཾ ‘‘ཀཱརུཉྙསབྷཱཝེནཱ’’ཏི ། ཡསྨཱ བྷགཝཱ པརིནིབྦཱནསམཡེ ཙཏུཝཱིསཏིཀོཊིསཏསཧསྶསངྑྱཱ སམཱཔཏྟིཡོ སམཱཔཛྫི ཨནྟརནྟརཱ ཕལསམཱཔཏྟིསམཱཔཛྫནེན, ཏསྶ པུབྦབྷཱགེ སཱཏིསཡཾ ཏིཀྑཾ སཱུརཾ ཝིཔསྶནཱཉཱཎཉྩ པཝཏྟེསི, ‘‘ཡདཏྠཉྩ མཡཱ ཨེཝཾ སུཙིརཀཱལཾ ཨནཉྙསཱདྷཱརཎོ པརམུཀྐཾསགཏོ ཉཱཎསམྦྷཱརོ སམྦྷཏོ, ཨནུཏྟརོ ཙ ཝིམོཀྑོ སམདྷིགཏོ, ཏསྶ ཝཏ མེ སིཁཱཔྤཏྟཕལབྷཱུཏཱ ཨཙྩནྟནིཊྛཱ ཨནུཔཱདིསེསནིབྦཱནདྷཱཏུ ཨཛྫ སམིཛ྄ཛྷཏཱི’’ཏི བྷིཡྻོ ཨཏིཝིཡ སོམནསྶཔྤཏྟསྶ བྷགཝཏོ པཱིཏིཝིཔྥཱརཱདིགུཎཝིཔུལཏརཱནུབྷཱཝོ པརེཧི ཨསཱདྷཱརཎཉཱཎཱཏིསཡོ ཨུདཔཱདི, ཡསྶ སམཱཔཏྟིབལསམུཔབྲཱུཧིཏསྶ ཉཱཎཱཏིསཡསྶ ཨཱནུབྷཱཝཾ སནྡྷཱཡ ཨིདཾ ཝུཏྟཾ ‘‘དྭེམེ པིཎྜཔཱཏཱ སམསམཕལཱ སམསམཝིཔཱཀཱ’’ཏིཨཱདི (ཨུདཱ॰ ༧༥), ཏསྨཱ ཏསྶ ཨཱནུབྷཱཝེན སམབྷིཧཏཱ མཧཱཔཐཝཱི ཨཀམྤིཏྠ། ཏཾ པནསྶཱ ཏསྶཾ ཝེལཱཡཾ ཨཱརོདནཱཀཱརཔྤཏྟི ཝིཡ ཧོཏཱིཏི ‘‘ཨཊྛམོ ཨཱརོདནེནཱ’’ཏི ཝུཏྟཾ།

    Yena pana bhagavā asītianubyañjanapaṭimaṇḍitadvattiṃsamahāpurisalakkhaṇa- (dī. ni. 2.33; 3.198; ma. ni. 2.385) vicitrarūpakāyo sabbākāraparisuddhasīlakkhandhādiguṇaratanasamiddhidhammakāyo puññamahattathāmamahattayasamahaāiddhimahattapaññāmahattānaṃ paramukkaṃsagato asamo asamasamo appaṭipuggalo arahaṃ sammāsambuddho attano attabhāvasaññitaṃ khandhapañcakaṃ kappaṃ vā kappāvasesaṃ vā ṭhapetuṃ samatthopi saṅkhatadhammaṃ paṭijigucchanākārappavattena ñāṇavisesena tiṇāyapi amaññamāno āyusaṅkhārossajjanavidhinā nirapekkho ossajji. Tadanubhāvābhihatā mahāpathavī āyusaṅkhārossajjane akampittha, taṃ panassā kāruññasabhāvasaṇṭhitā viya hotīti vuttaṃ ‘‘kāruññasabhāvenā’’ti . Yasmā bhagavā parinibbānasamaye catuvīsatikoṭisatasahassasaṅkhyā samāpattiyo samāpajji antarantarā phalasamāpattisamāpajjanena, tassa pubbabhāge sātisayaṃ tikkhaṃ sūraṃ vipassanāñāṇañca pavattesi, ‘‘yadatthañca mayā evaṃ sucirakālaṃ anaññasādhāraṇo paramukkaṃsagato ñāṇasambhāro sambhato, anuttaro ca vimokkho samadhigato, tassa vata me sikhāppattaphalabhūtā accantaniṭṭhā anupādisesanibbānadhātu ajja samijjhatī’’ti bhiyyo ativiya somanassappattassa bhagavato pītivipphārādiguṇavipulatarānubhāvo parehi asādhāraṇañāṇātisayo udapādi, yassa samāpattibalasamupabrūhitassa ñāṇātisayassa ānubhāvaṃ sandhāya idaṃ vuttaṃ ‘‘dveme piṇḍapātā samasamaphalā samasamavipākā’’tiādi (udā. 75), tasmā tassa ānubhāvena samabhihatā mahāpathavī akampittha. Taṃ panassā tassaṃ velāyaṃ ārodanākārappatti viya hotīti ‘‘aṭṭhamo ārodanenā’’ti vuttaṃ.

    ཨིདཱནི སངྑེཔཏོ ཝུཏྟམཏྠཾ ཝིཝརནྟོ ‘‘མཱཏུཀུཙྪིཾ ཨོཀྐམནྟེ’’ཏིཨཱདིམཱཧ། ཨཡཾ པནཏྠོཏི ‘‘སཱདྷུཀཱརདཱནཝསེནཱ’’ཏིཨཱདིནཱ ཝུཏྟོ ཨཏྠོ། པཐཝཱིདེཝཏཱཡ ཝསེནཱཏི ཨེཏྠ སམུདྡདེཝཏཱ ཝིཡ མཧཱཔཐཝིཡཱ ཨདྷིདེཝཏཱ ཀིར ནཱམ ཨཏྠི། ཏཱདིསེ ཀཱརཎེ སཏི ཏསྶཱ ཙིཏྟཝསེན ཨཡཾ མཧཱཔཐཝཱི སངྐམྤཏི སམྤཀམྤཏི སམྤཝེདྷཏི, ཡཐཱ ཝཱཏཝལཱཧཀདེཝཏཱནཾ ཙིཏྟཝསེན ཝཱཏཱ ཝཱཡནྟི, སཱིཏུཎྷཨབྦྷཝསྶཝལཱཧཀདེཝཏཱནཾ ཙིཏྟཝསེན སཱིཏཱདཡོ བྷཝནྟི། ཏཐཱ ཧི ཝིསཱཁཔུཎྞམཱཡཾ ཨབྷིསམྦོདྷིཨཏྠཾ བོདྷིརུཀྑམཱུལེ ནིསིནྣསྶ ལོཀནཱཐསྶ ཨནྟརཱཡཀརཎཏྠཾ ཨུཔཊྛིཏཾ མཱརབལཾ ཝིདྷམིཏུཾ –

    Idāni saṅkhepato vuttamatthaṃ vivaranto ‘‘mātukucchiṃ okkamante’’tiādimāha. Ayaṃ panatthoti ‘‘sādhukāradānavasenā’’tiādinā vutto attho. Pathavīdevatāya vasenāti ettha samuddadevatā viya mahāpathaviyā adhidevatā kira nāma atthi. Tādise kāraṇe sati tassā cittavasena ayaṃ mahāpathavī saṅkampati sampakampati sampavedhati, yathā vātavalāhakadevatānaṃ cittavasena vātā vāyanti, sītuṇhaabbhavassavalāhakadevatānaṃ cittavasena sītādayo bhavanti. Tathā hi visākhapuṇṇamāyaṃ abhisambodhiatthaṃ bodhirukkhamūle nisinnassa lokanāthassa antarāyakaraṇatthaṃ upaṭṭhitaṃ mārabalaṃ vidhamituṃ –

    ‘‘ཨཙེཏནཱཡཾ པཐཝཱི, ཨཝིཉྙཱཡ སུཁཾ དུཁཾ།

    ‘‘Acetanāyaṃ pathavī, aviññāya sukhaṃ dukhaṃ;

    སཱཔི དཱནབལཱ མཡ྄ཧཾ, སཏྟཀྑཏྟུཾ པཀམྤཐཱ’’ཏི༎ (ཙརིཡཱ॰ ༡.༡༢༤) –

    Sāpi dānabalā mayhaṃ, sattakkhattuṃ pakampathā’’ti. (cariyā. 1.124) –

    ཝཙནསམནནྟརཾ མཧཱཔཐཝཱི བྷིཛྫིཏྭཱ སཔརིསཾ མཱརཾ པརིཝཏྟེསི། ཨེཏནྟི སཱདྷུཀཱརདཱནཱདི། ཡདིཔི ནཏྠི ཨཙེཏནཏྟཱ, དྷམྨཏཱཝསེན པན ཝུཏྟནཡེན སིཡཱཏི སཀྐཱ ཝཏྟུཾ། དྷམྨཏཱ པན ཨཏྠཏོ དྷམྨསབྷཱཝོ, སོ པུཉྙདྷམྨསྶ ཝཱ ཉཱཎདྷམྨསྶ ཝཱ ཨཱནུབྷཱཝསབྷཱཝོཏི། ཏཡིདཾ སབྦཾ ཝིཙཱརིཏམེཝ, ཨེཝཉྩ ཀཏྭཱ –

    Vacanasamanantaraṃ mahāpathavī bhijjitvā saparisaṃ māraṃ parivattesi. Etanti sādhukāradānādi. Yadipi natthi acetanattā, dhammatāvasena pana vuttanayena siyāti sakkā vattuṃ. Dhammatā pana atthato dhammasabhāvo, so puññadhammassa vā ñāṇadhammassa vā ānubhāvasabhāvoti. Tayidaṃ sabbaṃ vicāritameva, evañca katvā –

    ‘‘ཨིམེ དྷམྨེ སམྨསཏོ, སབྷཱཝསརསལཀྑཎེ།

    ‘‘Ime dhamme sammasato, sabhāvasarasalakkhaṇe;

    དྷམྨཏེཛེན ཝསུདྷཱ, དསསཧསྶཱི པཀམྤཐཱ’’ཏི༎ (བུ॰ ཝཾ॰ ༡.༡༦༦)།

    Dhammatejena vasudhā, dasasahassī pakampathā’’ti. (bu. vaṃ. 1.166);

    ཨཱདི ཝཙནཉྩ སམཏྠིཏཾ ཧོཏི།

    Ādi vacanañca samatthitaṃ hoti.

    ནིདྡིཊྛནིདསྶནནྟི ནིདྡིཊྛསྶ ཨཏྠསྶ ནིཡྻཱཏནཾ, ནིགམནནྟི ཨཏྠོ། ཨེཏྟཱཝཏཱཏི པཐཝཱིཀམྤཱདིཨུཔྤཱདཛནནེན ཙེཝ པཐཝཱིཀམྤསྶ བྷགཝཏོ ཧེཏུནིདསྶནེན ཙ། ‘‘ཨདྡྷཱ ཨཛྫ བྷགཝཏཱ ཨཱཡུསངྑཱརོ ཨོསྶཊྛོ’’ཏི སལླཀྑེསི པཱརིསེསཉཱཡེན། ཨེཝཉྷི ཏདཱ ཐེརོ ཏམཏྠཾ ཝཱིམཾསེཡྻ ནཱཡཾ བྷཱུམིཀམྤོ དྷཱཏུཔྤཀོཔཧེཏུཀོ ཏསྶ ཨཔཉྙཱཡམཱནརཱུཔཏྟཱ, བཱཧིརཀོཔི ཨིསི ཨེཝཾ མཧཱནུབྷཱཝོ བུདྡྷཀཱལེ ནཏྠི, སཱསནིཀོཔི སཏྠུ ཨནཱརོཙེཏྭཱ ཨེཝཾ ཀརོནྟོ ནཱམ ནཏྠི, སེསཱནཾ པཉྩནྣཾ ཨིདཱནི ཨསམྦྷཝོ, ཨེཝཾ བྷཱུམིཀམྤོ ཙཱཡཾ མཧཱབྷིཾསནཀོ སལོམཧཾསོ ཨཧོསི, ཏསྨཱ པཱརིསེསཏོ ཨཱཧ ‘‘ཨཛྫ བྷགཝཏཱ ཨཱཡུསངྑཱརོ ཨོསྶཊྛོཏི སལླཀྑེསཱི’’ཏི།

    Niddiṭṭhanidassananti niddiṭṭhassa atthassa niyyātanaṃ, nigamananti attho. Ettāvatāti pathavīkampādiuppādajananena ceva pathavīkampassa bhagavato hetunidassanena ca. ‘‘Addhā ajja bhagavatā āyusaṅkhāro ossaṭṭho’’ti sallakkhesi pārisesañāyena. Evañhi tadā thero tamatthaṃ vīmaṃseyya nāyaṃ bhūmikampo dhātuppakopahetuko tassa apaññāyamānarūpattā, bāhirakopi isi evaṃ mahānubhāvo buddhakāle natthi, sāsanikopi satthu anārocetvā evaṃ karonto nāma natthi, sesānaṃ pañcannaṃ idāni asambhavo, evaṃ bhūmikampo cāyaṃ mahābhiṃsanako salomahaṃso ahosi, tasmā pārisesato āha ‘‘ajja bhagavatā āyusaṅkhāro ossaṭṭhoti sallakkhesī’’ti.

    ཨཊྛཔརིསཝཎྞནཱ

    Aṭṭhaparisavaṇṇanā

    ༡༧༢. ཨོཀཱསཾ ཨདཏྭཱཏི ‘‘ཏིཊྛཏུ བྷནྟེ བྷགཝཱ ཀཔྤ’’ནྟིཨཱདི (དཱི॰ ནི॰ ༢.༡༧༨) ནཡཔྤཝཏྟཱཡ ཐེརསྶ ཨཱཡཱཙནཱཡ ཨཝསརཾ ཨདཏྭཱ། ཨཉྙཱནིཔི ཨཊྛཀཱནི སམྤིཎྜེནྟོ ཧེཏུཨཊྛཀཏོ ཨཉྙཱནི པརིསཱབྷིབྷཱཡཏནཝིམོཀྑཝསེན ཏཱིཎི ཨཊྛཀཱནི སངྒཧེཏྭཱ དསྶེནྟོ ‘‘ཨཊྛ ཁོ ཨིམཱ’’ཏིཨཱདིམཱཧ། ‘‘ཨཱཡསྨཏོ ཨཱནནྡསྶ སོཀུཔྤཏྟིཾ པརིཧརནྟོ ཝིཀྑེཔཾ ཀརོནྟོ’’ཏི ཀེཙི སཧསཱ བྷཎིཏེ བལཝསོཀོ ཨུཔྤཛྫེཡྻཱཏི།

    172.Okāsaṃ adatvāti ‘‘tiṭṭhatu bhante bhagavā kappa’’ntiādi (dī. ni. 2.178) nayappavattāya therassa āyācanāya avasaraṃ adatvā. Aññānipi aṭṭhakāni sampiṇḍento hetuaṭṭhakato aññāni parisābhibhāyatanavimokkhavasena tīṇi aṭṭhakāni saṅgahetvā dassento ‘‘aṭṭha kho imā’’tiādimāha. ‘‘Āyasmato ānandassa sokuppattiṃ pariharanto vikkhepaṃ karonto’’ti keci sahasā bhaṇite balavasoko uppajjeyyāti.

    སམཱགནྟབྦཏོ, སམཱགཙྪཏཱིཏི ཝཱ སམཱགམོ, པརིསཱ། བིམྦིསཱརཔམུཁོ སམཱགམོ བིམྦིསཱརསམཱགམོ། སེསདྭཡེཔི ཨེསེཝ ནཡོ། བིམྦིསཱར…པེ॰… སམཱགམཱདིསདིསཾ ཁཏྟིཡཔརིསནྟི ཡོཛནཱ། ཨཉྙེསུ ཙཀྐཝཱལེ༹སུཔི ལབྦྷཏེཡེཝ སཏྠུ ཁཏྟིཡཔརིསཱདིཨུཔསངྐམནཾ། ཨཱདིཏོ ཏེཧི སདྡྷིཾ སཏྠུ བྷཱསནཾ ཨཱལཱཔོ། ཀཐནཔཊིཀཐནཾ སལླཱཔོ། དྷམྨུཔསཉྷིཏཱ པུཙྪཱ པཊིཔུཙྪཱ དྷམྨསཱཀཙྪཱ། སཎྛཱནཾ པཊིཙྩ ཀཐནཾ སཎྛཱནཔརིཡཱཡཏྟཱ ཝཎྞ-སདྡསྶ ‘‘མཧནྟཾ ཧཏྠིརཱཛཝཎྞཾ ཨབྷིནིམྨིནིཏྭཱ’’ཏིཨཱདཱིསུ (སཾ॰ ནི॰ ༡.༡༣༨) ཝིཡ། ‘‘ཏེས’’ནྟི པདཾ ཨུབྷཡཔདཱཔེཀྑཾ ‘‘ཏེསམྤི ལཀྑཎསཎྛཱནཾ ཝིཡ སཏྠུ སརཱིརསཎྛཱནཾ, ཏེསཾ ཀེཝལཾ པཉྙཱཡཏི ཨེཝཱ’’ཏི། ནཱཔི ཨཱམུཀྐམཎིཀུཎྜལོ བྷགཝཱ ཧོཏཱིཏི ཡོཛནཱ། ཚིནྣསྶརཱཏི དྭིདྷཱབྷཱུཏསྶརཱ། གགྒརསྶརཱཏི ཛཛྫརིཏསྶརཱ། བྷཱསནྟརནྟི ཏེསཾ སཏྟཱནཾ བྷཱསཏོ ཨཉྙཾ བྷཱསཾ། ཝཱིམཾསཱཏི ཙིནྟནཱ། ‘‘ཀིམཏྠཾ…པེ॰… དེསེཏཱི’’ཏི ཨིདཾ ནནུ ཨཏྟཱནཾ ཛཱནཱཔེཏྭཱ དྷམྨེ ཀཐིཏེ ཏེསཾ སཱཏིསཡོ པསཱདོ ཧོཏཱིཏི ཨིམིནཱ ཨདྷིཔྤཱཡེན ཝུཏྟཾ? ཡེསཾ ཨཏྟཱནཾ ཨཛཱནཱཔེཏྭཱཝ དྷམྨེ ཀཐིཏེ པསཱདོ ཧོཏི, ན ཛཱནཱཔེཏྭཱ, ཏཱདིསེ སནྡྷཱཡ སཏྠཱ ཏཐཱ ཀརོཏི། ཏཏྠ པཡོཛནམཱཧ ‘‘ཝཱསནཏྠཱཡཱ’’ཏི། ཨེཝཾ སུཏོཔཱིཏི ཨེཝཾ ཨཝིཉྙཱཏདེསཀོ ཨཝིཉྙཱཏཱགམནོཔི སུཏོ དྷམྨོ ཨཏྟནོ དྷམྨསུདྷམྨཏཱཡེཝ ཨནཱགཏེ པཙྩཡོ ཧོཏི སུཎནྟསྶ།

    Samāgantabbato, samāgacchatīti vā samāgamo, parisā. Bimbisārapamukho samāgamo bimbisārasamāgamo. Sesadvayepi eseva nayo. Bimbisāra…pe… samāgamādisadisaṃ khattiyaparisanti yojanā. Aññesu cakkavāḷesupi labbhateyeva satthu khattiyaparisādiupasaṅkamanaṃ. Ādito tehi saddhiṃ satthu bhāsanaṃ ālāpo. Kathanapaṭikathanaṃ sallāpo. Dhammupasañhitā pucchā paṭipucchā dhammasākacchā. Saṇṭhānaṃ paṭicca kathanaṃ saṇṭhānapariyāyattā vaṇṇa-saddassa ‘‘mahantaṃ hatthirājavaṇṇaṃ abhinimminitvā’’tiādīsu (saṃ. ni. 1.138) viya. ‘‘Tesa’’nti padaṃ ubhayapadāpekkhaṃ ‘‘tesampi lakkhaṇasaṇṭhānaṃ viya satthu sarīrasaṇṭhānaṃ, tesaṃ kevalaṃ paññāyati evā’’ti. Nāpi āmukkamaṇikuṇḍalo bhagavā hotīti yojanā. Chinnassarāti dvidhābhūtassarā. Gaggarassarāti jajjaritassarā. Bhāsantaranti tesaṃ sattānaṃ bhāsato aññaṃ bhāsaṃ. Vīmaṃsāti cintanā. ‘‘Kimatthaṃ…pe… desetī’’ti idaṃ nanu attānaṃ jānāpetvā dhamme kathite tesaṃ sātisayo pasādo hotīti iminā adhippāyena vuttaṃ? Yesaṃ attānaṃ ajānāpetvāva dhamme kathite pasādo hoti, na jānāpetvā, tādise sandhāya satthā tathā karoti. Tattha payojanamāha ‘‘vāsanatthāyā’’ti. Evaṃ sutopīti evaṃ aviññātadesako aviññātāgamanopi suto dhammo attano dhammasudhammatāyeva anāgate paccayo hoti suṇantassa.

    ‘‘ཨཱནནྡཱ’’ཏིཨཱདིཀོ སངྒཱིཏིཨནཱརུལ༹ྷོ པཱལི༹དྷམྨོ ཨེཝ ཏཐཱ དསྶིཏོ། ཨེས ནཡོ ཨིཏོ པརེསུཔི ཨེཝརཱུཔེསུ ཋཱནེསུ།

    ‘‘Ānandā’’tiādiko saṅgītianāruḷho pāḷidhammo eva tathā dassito. Esa nayo ito paresupi evarūpesu ṭhānesu.

    ཨཊྛཨབྷིབྷཱཡཏནཝཎྞནཱ

    Aṭṭhaabhibhāyatanavaṇṇanā

    ༡༧༣. ཨབྷིབྷཝཏཱིཏི ཨབྷིབྷུ, པརིཀམྨཾ, ཉཱཎཾ ཝཱ། ཨབྷིབྷུ ཨཱཡཏནཾ ཨེཏསྶཱཏི ཨབྷིབྷཱཡཏནཾ, ཛྷཱནཾ། ཨབྷིབྷཝིཏབྦཾ ཝཱ ཨཱརམྨཎསངྑཱཏཾ ཨཱཡཏནཾ ཨེཏསྶཱཏི ཨབྷིབྷཱཡཏནཾ། ཨཱརམྨཎཱབྷིབྷཝནཏོ ཨབྷིབྷུ ཙ ཏཾ ཨཱཡཏནཉྩ ཡོགིནོ སུཁཝིསེསཱནཾ ཨདྷིཊྛཱནབྷཱཝཏོ, མནཱཡཏནདྷམྨཱཡཏནབྷཱཝཏོ ཝཱཏིཔི སསམྤཡུཏྟཾ ཛྷཱནཾ ཨབྷིབྷཱཡཏནཾ། ཏེནཱཧ ‘‘ཨབྷིབྷཝནཀཱརཎཱནཱི’’ཏིཨཱདི། ཏཱནི ཧཱིཏི ཨབྷིབྷཱཡཏནསཉྙིཏཱནི ཛྷཱནཱནི། ‘‘པུགྒལསྶ ཉཱཎུཏྟརིཡཏཱཡཱ’’ཏི ཨིདཾ ཨུབྷཡཏྠཱཔི ཡོཛེཏབྦཾ། ཀཐཾ? པཊིཔཀྑབྷཱཝེན པཙྩནཱིཀདྷམྨེ ཨབྷིབྷཝནྟི པུགྒལསྶ ཉཱཎུཏྟརིཡཏཱཡ ཨཱརམྨཎཱནི ཨབྷིབྷཝནྟི། ཉཱཎབལེནེཝ ཧི ཨཱརམྨཎཱབྷིབྷཝནཾ ཝིཡ པཊིཔཀྑཱབྷིབྷཝོ པཱིཏི།

    173. Abhibhavatīti abhibhu, parikammaṃ, ñāṇaṃ vā. Abhibhu āyatanaṃ etassāti abhibhāyatanaṃ, jhānaṃ. Abhibhavitabbaṃ vā ārammaṇasaṅkhātaṃ āyatanaṃ etassāti abhibhāyatanaṃ. Ārammaṇābhibhavanato abhibhu ca taṃ āyatanañca yogino sukhavisesānaṃ adhiṭṭhānabhāvato, manāyatanadhammāyatanabhāvato vātipi sasampayuttaṃ jhānaṃ abhibhāyatanaṃ. Tenāha ‘‘abhibhavanakāraṇānī’’tiādi. Tāni hīti abhibhāyatanasaññitāni jhānāni. ‘‘Puggalassa ñāṇuttariyatāyā’’ti idaṃ ubhayatthāpi yojetabbaṃ. Kathaṃ? Paṭipakkhabhāvena paccanīkadhamme abhibhavanti puggalassa ñāṇuttariyatāya ārammaṇāni abhibhavanti. Ñāṇabaleneva hi ārammaṇābhibhavanaṃ viya paṭipakkhābhibhavo pīti.

    པརིཀམྨཝསེན ཨཛ྄ཛྷཏྟཾ རཱུཔསཉྙཱི, ན ཨཔྤནཱཝསེན། ན ཧི པཊིབྷཱགནིམིཏྟཱརམྨཎཱ ཨཔྤནཱ ཨཛ྄ཛྷཏྟཝིསཡཱ སམྦྷཝཏི, ཏཾ པན ཨཛ྄ཛྷཏྟཔརིཀམྨཝསེན ལདྡྷཾ ཀསིཎནིམིཏྟཾ ཨཝིསུདྡྷམེཝ ཧོཏི, ན བཧིདྡྷཱཔརིཀམྨཝསེན ལདྡྷཾ ཝིཡ ཝིསུདྡྷཾ།

    Parikammavasena ajjhattaṃ rūpasaññī, na appanāvasena. Na hi paṭibhāganimittārammaṇā appanā ajjhattavisayā sambhavati, taṃ pana ajjhattaparikammavasena laddhaṃ kasiṇanimittaṃ avisuddhameva hoti, na bahiddhāparikammavasena laddhaṃ viya visuddhaṃ.

    པརིཏྟཱནཱིཏི ཡཐཱལདྡྷཱནི སུཔྤསརཱཝམཏྟཱནི། ཏེནཱཧ ‘‘ཨཝཌྜྷིཏཱནཱི’’ཏི། པརིཏྟཝསེནེཝཱཏི ཝཎྞཝསེན ཨཱབྷོགེ ཝིཛྫམཱནེཔི པརིཏྟཝསེནེཝ ཨིདཾ ཨབྷིབྷཱཡཏནཾ ཝུཏྟཾ། པརིཏྟཏཱ ཧེཏྠ ཨབྷིབྷཝནསྶ ཀཱརཎཾ། ཝཎྞཱབྷོགེ སཏིཔི ཨསཏིཔི ཨབྷིབྷཱཡཏནབྷཱཝནཱ ནཱམ ཏིཀྑཔཉྙསྶེཝ སམྦྷཝཏི, ན ཨིཏརསྶཱཏི ཨཱཧ ‘‘ཉཱཎུཏྟརིཀོ པུགྒལོ’’ཏི། ཨབྷིབྷཝིཏྭཱ སམཱཔཛྫཏཱིཏི ཨེཏྠ ཨབྷིབྷཝནཾ, སམཱཔཛྫནཉྩ ཨུཔཙཱརཛ྄ཛྷཱནཱདྷིགམསམནནྟརམེཝ ཨཔྤནཱཛྷཱནུཔྤཱདནནྟི ཨཱཧ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི། སཧ ནིམིཏྟུཔྤཱདེནཱཏི ཙ ཨཔྤནཱཔརིཝཱསཱབྷཱཝསྶ ལཀྑཎཾ ཝཙནམེཏཾ། ཡོ ‘‘ཁིཔྤཱབྷིཉྙོ’’ཏི ཝུཙྩཏི, ཏཏོཔི ཉཱཎུཏྟརསྶེཝ ཨབྷིབྷཱཡཏནབྷཱཝནཱ། ཨེཏྠཱཏི ཨེཏསྨིཾ ནིམིཏྟེ། ཨཔྤནཾ པཱཔེཏཱིཏི བྷཱཝནཾ ཨཔྤནཾ ནེཏི།

    Parittānīti yathāladdhāni suppasarāvamattāni. Tenāha ‘‘avaḍḍhitānī’’ti. Parittavasenevāti vaṇṇavasena ābhoge vijjamānepi parittavaseneva idaṃ abhibhāyatanaṃ vuttaṃ. Parittatā hettha abhibhavanassa kāraṇaṃ. Vaṇṇābhoge satipi asatipi abhibhāyatanabhāvanā nāma tikkhapaññasseva sambhavati, na itarassāti āha ‘‘ñāṇuttariko puggalo’’ti. Abhibhavitvā samāpajjatīti ettha abhibhavanaṃ, samāpajjanañca upacārajjhānādhigamasamanantarameva appanājhānuppādananti āha ‘‘saha nimittuppādenevettha appanaṃ pāpetī’’ti. Saha nimittuppādenāti ca appanāparivāsābhāvassa lakkhaṇaṃ vacanametaṃ. Yo ‘‘khippābhiñño’’ti vuccati, tatopi ñāṇuttarasseva abhibhāyatanabhāvanā. Etthāti etasmiṃ nimitte. Appanaṃ pāpetīti bhāvanaṃ appanaṃ neti.

    ཨེཏྠ ཙ ཀེཙི ‘‘ཨུཔྤནྣེ ཨུཔཙཱརཛ྄ཛྷཱནེ ཏཾ ཨཱརབྦྷ ཡེ ཧེཊྛིམནྟེན དྭེ ཏཡོ ཛཝནཝཱརཱ པཝཏྟནྟི, ཏེ ཨུཔཙཱརཛ྄ཛྷཱནཔཀྑིཀཱ ཨེཝ, ཏདནནྟརཉྩ བྷཝངྒཔརིཝཱསེན, ཨུཔཙཱརཱསེཝནཱཡ ཙ ཝིནཱ ཨཔྤནཱ ཧོཏི, སཧ ནིམིཏྟུཔྤཱདེནེཝ ཨཔྤནཾ པཱཔེཏཱི’’ཏི ཝདནྟི, ཏཾ ཏེསཾ མཏིམཏྟཾ། ན ཧི པརིཝཱསིཏཔརིཀམྨེན ཨཔྤནཱཝཱརོ ཨིཙྪིཏོ, ནཱཔི མཧགྒཏཔྤམཱཎཛ྄ཛྷཱནེསུ ཝིཡ ཨུཔཙཱརཛ྄ཛྷཱནེ ཨེཀནྟཏོ པཙྩཝེཀྑཎཱ ཨིཙྪིཏབྦཱ, ཏསྨཱ ཨུཔཙཱརཛ྄ཛྷཱནཱདྷིགམནཏོ པརཾ ཀཏིཔཡབྷཝངྒཙིཏྟཱཝསཱནེ ཨཔྤནཾ པཱཔུཎནྟོ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི ཝུཏྟོ། སཧ ནིམིཏྟུཔྤཱདེནེཝཱཏི ཙ ཨདྷིཔྤཱཡིཀམིདཾ ཝཙནཾ, ན ནཱིཏཏྠཾ, ཨདྷིཔྤཱཡོ ཝུཏྟནཡེནེཝ ཝེདིཏབྦོ, ན ཨནྟོསམཱཔཏྟིཡཾ ཏདཱ ཏཐཱརཱུཔསྶ ཨཱབྷོགསྶ ཨསམྦྷཝཏོ། སམཱཔཏྟིཏོ ཝུཊྛིཏསྶ ཨཱབྷོགོ པུབྦབྷཱགབྷཱཝནཱཡཝསེན ཛྷཱནཀྑཎེ པཝཏྟཾ ཨབྷིབྷཝནཱཀཱརཾ གཧེཏྭཱ པཝཏྟོཏི དཊྛབྦཾ། ཨབྷིདྷམྨཊྛཀཐཱཡཾ པན ‘‘ཨིམིནཱ ཏསྶ པུབྦཱབྷོགོ ཀཐིཏོ’’ཏི (དྷ॰ ས॰ ཨཊྛ॰ ༢༠༤) ཝུཏྟཾ། ཨནྟོསམཱཔཏྟིཡཾ ཏཐཱ ཨཱབྷོགཱབྷཱཝེ ཀསྨཱ ‘‘ཛྷཱནསཉྙཱཡཔཱི’’ཏི ཝུཏྟནྟི ཨཱཧ ‘‘ཨབྷིབྷཝན…པེ॰… ཨཏྠཱི’’ཏི།

    Ettha ca keci ‘‘uppanne upacārajjhāne taṃ ārabbha ye heṭṭhimantena dve tayo javanavārā pavattanti, te upacārajjhānapakkhikā eva, tadanantarañca bhavaṅgaparivāsena, upacārāsevanāya ca vinā appanā hoti, saha nimittuppādeneva appanaṃ pāpetī’’ti vadanti, taṃ tesaṃ matimattaṃ. Na hi parivāsitaparikammena appanāvāro icchito, nāpi mahaggatappamāṇajjhānesu viya upacārajjhāne ekantato paccavekkhaṇā icchitabbā, tasmā upacārajjhānādhigamanato paraṃ katipayabhavaṅgacittāvasāne appanaṃ pāpuṇanto ‘‘saha nimittuppādenevettha appanaṃ pāpetī’’ti vutto. Saha nimittuppādenevāti ca adhippāyikamidaṃ vacanaṃ, na nītatthaṃ, adhippāyo vuttanayeneva veditabbo, na antosamāpattiyaṃ tadā tathārūpassa ābhogassa asambhavato. Samāpattito vuṭṭhitassa ābhogo pubbabhāgabhāvanāyavasena jhānakkhaṇe pavattaṃ abhibhavanākāraṃ gahetvā pavattoti daṭṭhabbaṃ. Abhidhammaṭṭhakathāyaṃ pana ‘‘iminā tassa pubbābhogo kathito’’ti (dha. sa. aṭṭha. 204) vuttaṃ. Antosamāpattiyaṃ tathā ābhogābhāve kasmā ‘‘jhānasaññāyapī’’ti vuttanti āha ‘‘abhibhavana…pe… atthī’’ti.

    ཝཌྜྷིཏཔྤམཱཎཱནཱིཏི ཝིཔུལཔྤམཱཎཱནཱིཏི ཨཏྠོ, ན ཨེཀངྒུལདྭངྒུལཱདིཝསེན ཝཌྜྷིཾ པཱཔིཏཱནཱིཏི ཏཐཱ ཝཌྜྷནསྶེཝེཏྠ ཨསམྦྷཝཏོ། ཏེནཱཧ ‘‘མཧནྟཱནཱི’’ཏི། བྷཏྟཝཌྜྷིཏཀནྟི བྷུཉྫནབྷཱཛནཾ ཝཌྜྷེཏྭཱ དིནྣབྷཏྟཾ, ཨེཀཱསནེ པུརིསེན བྷུཉྫིཏབྦབྷཏྟཏོ ཨུཔཌྜྷབྷཏྟནྟི ཨཏྠོ།

    Vaḍḍhitappamāṇānīti vipulappamāṇānīti attho, na ekaṅguladvaṅgulādivasena vaḍḍhiṃ pāpitānīti tathā vaḍḍhanassevettha asambhavato. Tenāha ‘‘mahantānī’’ti. Bhattavaḍḍhitakanti bhuñjanabhājanaṃ vaḍḍhetvā dinnabhattaṃ, ekāsane purisena bhuñjitabbabhattato upaḍḍhabhattanti attho.

    རཱུཔེ སཉྙཱ རཱུཔསཉྙཱ, སཱ ཨསྶ ཨཏྠཱིཏི རཱུཔསཉྙཱི, ན རཱུཔསཉྙཱི ཨརཱུཔསཉྙཱི, སཉྙཱསཱིསེན ཛྷཱནཾ ཝདཏི། རཱུཔསཉྙཱཡ ཨནུཔྤཱདནཾ ཨེཝེཏྠ ཨལཱབྷིཏཱ།

    Rūpe saññā rūpasaññā, sā assa atthīti rūpasaññī, na rūpasaññī arūpasaññī, saññāsīsena jhānaṃ vadati. Rūpasaññāya anuppādanaṃ evettha alābhitā.

    བཧིདྡྷཱཝ ཨུཔྤནྣནྟི བཧིདྡྷཱ ཝཏྠུསྨིཾཡེཝ ཨུཔྤནྣཾ། ཨབྷིདྷམྨེ པན ‘‘ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི…པེ॰… ཨཔྤམཱཎཱནི སུཝཎྞདུབྦཎྞཱནཱི’’ཏི (དྷ॰ ས॰ ༢༢༠) ཨེཝཾ ཙཏུནྣཾ ཨབྷིབྷཱཡཏནཱནཾ ཨཱགཏཏྟཱ ཨབྷིདྷམྨཊྛཀཐཱཡཾ (དྷ॰ ས॰ ཨཊྛ॰ ༢༠༤) ‘‘ཀསྨཱ པན ‘ཡཐཱ སུཏྟནྟེ ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནཱིཏིཨཱདི ཝུཏྟཾ, ཨེཝཾ ཨཝཏྭཱ ཨིདྷ ཙཏཱུསུཔི ཨབྷིབྷཱཡཏནེསུ ཨཛ྄ཛྷཏྟཾ ཨརཱུཔསཉྙིཏཱཝ ཝུཏྟཱ’ཏི ཙོདནཾ ཀཏྭཱ ‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’ཏི ཀཱརཎཾ ཝཏྭཱ, ཏཏྠ ཝཱ ཧི ཨིདྷ ཝཱ བཧིདྡྷཱ རཱུཔཱནེཝ ཨབྷིབྷཝིཏབྦཱནི, ཏསྨཱ ཏཱནི ནིཡམཏོ ཝཏྟབྦཱནཱིཏི ཏཏྲཱཔི ཨིདྷཱཔི ཝུཏྟཱནི། ‘ཨཛ྄ཛྷཏྟཾ རཱུཔསཉྙཱི’ཏི ཨིདཾ པན སཏྠུ དེསནཱཝིལཱསམཏྟམེཝཱ’’ཏི ཝུཏྟཾ། ཨེཏྠ ཙ ཝཎྞཱབྷོགརཧིཏཱནི, སཧིཏཱནི ཙ སབྦཱནི པརིཏྟཱནི ‘‘པརིཏྟཱནི སུཝཎྞདུབྦཎྞཱནཱི’’ཏི ཝུཏྟཱནི, ཏཐཱ ཨཔྤམཱཎཱནི ‘‘ཨཔྤམཱཎཱནི སུཝཎྞདུབྦཎྞཱནཱི’’ཏི། ཨཏྠི ཧི སོ པརིཡཱཡོ པརིཏྟཱནི ཨབྷིབྷུཡྻ ཏཱནི ཙེ ཀདཱཙི ཝཎྞཝསེན ཨཱབྷུཛིཏཱནི ཧོནྟི, སུཝཎྞདུབྦཎྞཱནི ཨབྷིབྷུཡྻཱཏི། པརིཡཱཡཀཐཱ ཧི སུཏྟནྟདེསནཱཏི། ཨབྷིདྷམྨེ (དྷ॰ ས॰ ༢༢༢) པན ནིཔྤརིཡཱཡདེསནཏྟཱ ཝཎྞཱབྷོགརཧིཏཱནི ཝིསུཾ ཝུཏྟཱནི, ཏཐཱ སཧིཏཱནི། ཨཏྠི ཧི ཨུབྷཡཏྠ ཨབྷིབྷཝནཝིསེསོཏི། ཏཐཱ ཨིདྷ པརིཡཱཡདེསནཏྟཱ ཝིམོཀྑཱནམྤི ཨབྷིབྷཝནཔརིཡཱཡོ ཨཏྠཱིཏི ‘‘ཨཛ྄ཛྷཏྟཾ རཱུཔསཉྙཱི’’ཏིཨཱདིནཱ པཋམདུཏིཡཨབྷིབྷཱཡཏནེསུ པཋམཝིམོཀྑོ, ཏཏིཡཙཏུཏྠཨབྷིབྷཱཡཏནེསུ དུཏིཡཝིམོཀྑོ, ཝཎྞཱབྷིབྷཱཡཏནེསུ ཏཏིཡཝིམོཀྑོ ཙ ཨབྷིབྷཝནཔྤཝཏྟིཏོ སངྒཧིཏོ། ཨབྷིདྷམྨེ པན ནིཔྤརིཡཱཡདེསནཏྟཱ ཝིམོཀྑཱབྷིབྷཱཡཏནཱནི ཨསངྐརཏོ དསྶེཏུཾ ཝིམོཀྑེ ཝཛྫེཏྭཱ ཨབྷིབྷཱཡཏནཱནི ཀཐིཏཱནི ; སབྦཱནི ཙ ཝིམོཀྑཀིཙྩཱནི ཛྷཱནཱནི ཝིམོཀྑདེསནཱཡཾ ཝུཏྟཱནི། ཏདེཏཾ ‘‘ཨཛ྄ཛྷཏྟཾ རཱུཔསཉྙཱི’’ཏི ཨཱགཏསྶ ཨབྷིབྷཱཡཏནདྭཡསྶ ཨབྷིདྷམྨེ ཨབྷིབྷཱཡཏནེསུ ཨཝཙནཏོ ‘‘རཱུཔཱི རཱུཔཱནི པསྶཏཱི’’ཏིཨཱདཱིནཉྩ སབྦཝིམོཀྑཀིཙྩསཱདྷཱརཎཝཙནབྷཱཝཏོ ཝཝཏྠཱནཾ ཀཏནྟི ཝིཉྙཱཡཏི། ‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཨིདཾ ཀཏྠཙིཔི ‘‘ཨཛ྄ཛྷཏྟཾ རཱུཔཱནི པསྶཏཱི’’ཏི ཨཝཏྭཱ སབྦཏྠ ཡཾ ཝུཏྟཾ ‘‘བཧིདྡྷཱ རཱུཔཱནི པསྶཏཱི’’ཏི, ཏསྶ ཀཱརཎཝཙནཾ, ཏེན ཡཾ ཨཉྙཧེཏུཀཾ, ཏཾ ཏེན ཧེཏུནཱ ཝུཏྟཾ། ཡཾ པན དེསནཱཝིལཱསཧེཏུཀཾ ཨཛ྄ཛྷཏྟཾ ཨརཱུཔསཉྙིཏཱཡ ཨེཝ ཨབྷིདྷམྨེ (དྷ॰ ས॰ ༢༢༣) ཝཙནཾ, ན ཏསྶ ཨཉྙཾ ཀཱརཎཾ མགྒིཏབྦནྟི དསྶེཏི། ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏཱ ཙ ཏེསཾ བཧིདྡྷཱ རཱུཔཱནཾ ཝིཡ ཨབྷཱུཏཏྟཱ། དེསནཱཝིལཱསོ ཙ ཡཐཱཝུཏྟཝཝཏྠཱནཝསེན ཝེདིཏབྦོ ཝེནེཡྻཛ྄ཛྷཱསཡཝསེན ཝིཛྫམཱནཔརིཡཱཡཀཐཱབྷཱཝཏོ། ‘‘སུཝཎྞདུབྦཎྞཱནཱི’’ཏི ཨེཏེནེཝ སིདྡྷཏྟཱ ན ནཱིལཱདི ཨབྷིབྷཱཡཏནཱནི ཝཏྟབྦཱནཱིཏི ཙེ? ཏཾ ན, ནཱིལཱདཱིསུ ཀཏཱདྷིཀཱརཱནཾ ནཱིལཱདིབྷཱཝསྶེཝ ཨབྷིབྷཝནཀཱརཎཏྟཱ། ན ཧི ཏེསཾ པརིསུདྡྷཱཔརིསུདྡྷཝཎྞཱནཾ པརིཏྟཏཱ, ཨཔྤམཱཎཏཱ ཝཱ ཨབྷིབྷཝནཀཱརཎཾ, ཨཐ ཁོ ནཱིལཱདིབྷཱཝོ ཨེཝཱཏི། ཨེཏེསུ ཙ པརིཏྟཱདིཀསིཎརཱུཔེསུ ཡཾ ཡཾ ཙརིཏསྶ ཨིམཱནི ཨབྷིབྷཱཡཏནཱནི ཨིཛ྄ཛྷནྟི, ཏཾ དསྶེཏུཾ ‘‘ཨིམེསུ པནཱ’’ཏིཨཱདི ཝུཏྟཾ།

    Bahiddhāvauppannanti bahiddhā vatthusmiṃyeva uppannaṃ. Abhidhamme pana ‘‘ajjhattaṃ arūpasaññī bahiddhā rūpāni passati parittāni suvaṇṇadubbaṇṇāni…pe… appamāṇāni suvaṇṇadubbaṇṇānī’’ti (dha. sa. 220) evaṃ catunnaṃ abhibhāyatanānaṃ āgatattā abhidhammaṭṭhakathāyaṃ (dha. sa. aṭṭha. 204) ‘‘kasmā pana ‘yathā suttante ajjhattaṃ rūpasaññī eko bahiddhā rūpāni passati parittānītiādi vuttaṃ, evaṃ avatvā idha catūsupi abhibhāyatanesu ajjhattaṃ arūpasaññitāva vuttā’ti codanaṃ katvā ‘ajjhattarūpānaṃ anabhibhavanīyato’ti kāraṇaṃ vatvā, tattha vā hi idha vā bahiddhā rūpāneva abhibhavitabbāni, tasmā tāni niyamato vattabbānīti tatrāpi idhāpi vuttāni. ‘Ajjhattaṃ rūpasaññī’ti idaṃ pana satthu desanāvilāsamattamevā’’ti vuttaṃ. Ettha ca vaṇṇābhogarahitāni, sahitāni ca sabbāni parittāni ‘‘parittāni suvaṇṇadubbaṇṇānī’’ti vuttāni, tathā appamāṇāni ‘‘appamāṇāni suvaṇṇadubbaṇṇānī’’ti. Atthi hi so pariyāyo parittāni abhibhuyya tāni ce kadāci vaṇṇavasena ābhujitāni honti, suvaṇṇadubbaṇṇāni abhibhuyyāti. Pariyāyakathā hi suttantadesanāti. Abhidhamme (dha. sa. 222) pana nippariyāyadesanattā vaṇṇābhogarahitāni visuṃ vuttāni, tathā sahitāni. Atthi hi ubhayattha abhibhavanavisesoti. Tathā idha pariyāyadesanattā vimokkhānampi abhibhavanapariyāyo atthīti ‘‘ajjhattaṃ rūpasaññī’’tiādinā paṭhamadutiyaabhibhāyatanesu paṭhamavimokkho, tatiyacatutthaabhibhāyatanesu dutiyavimokkho, vaṇṇābhibhāyatanesu tatiyavimokkho ca abhibhavanappavattito saṅgahito. Abhidhamme pana nippariyāyadesanattā vimokkhābhibhāyatanāni asaṅkarato dassetuṃ vimokkhe vajjetvā abhibhāyatanāni kathitāni ; sabbāni ca vimokkhakiccāni jhānāni vimokkhadesanāyaṃ vuttāni. Tadetaṃ ‘‘ajjhattaṃ rūpasaññī’’ti āgatassa abhibhāyatanadvayassa abhidhamme abhibhāyatanesu avacanato ‘‘rūpī rūpāni passatī’’tiādīnañca sabbavimokkhakiccasādhāraṇavacanabhāvato vavatthānaṃ katanti viññāyati. ‘‘Ajjhattarūpānaṃ anabhibhavanīyato’’ti idaṃ katthacipi ‘‘ajjhattaṃ rūpāni passatī’’ti avatvā sabbattha yaṃ vuttaṃ ‘‘bahiddhā rūpāni passatī’’ti, tassa kāraṇavacanaṃ, tena yaṃ aññahetukaṃ, taṃ tena hetunā vuttaṃ. Yaṃ pana desanāvilāsahetukaṃ ajjhattaṃ arūpasaññitāya eva abhidhamme (dha. sa. 223) vacanaṃ, na tassa aññaṃ kāraṇaṃ maggitabbanti dasseti. Ajjhattarūpānaṃ anabhibhavanīyatā ca tesaṃ bahiddhā rūpānaṃ viya abhūtattā. Desanāvilāso ca yathāvuttavavatthānavasena veditabbo veneyyajjhāsayavasena vijjamānapariyāyakathābhāvato. ‘‘Suvaṇṇadubbaṇṇānī’’ti eteneva siddhattā na nīlādi abhibhāyatanāni vattabbānīti ce? Taṃ na, nīlādīsu katādhikārānaṃ nīlādibhāvasseva abhibhavanakāraṇattā. Na hi tesaṃ parisuddhāparisuddhavaṇṇānaṃ parittatā, appamāṇatā vā abhibhavanakāraṇaṃ, atha kho nīlādibhāvo evāti. Etesu ca parittādikasiṇarūpesu yaṃ yaṃ caritassa imāni abhibhāyatanāni ijjhanti, taṃ dassetuṃ ‘‘imesu panā’’tiādi vuttaṃ.

    སབྦསངྒཱཧཀཝསེནཱཏི སཀལནཱིལཝཎྞནཱིལནིདསྶནནཱིལནིབྷཱསཱནཾ སཱདྷཱརཎཝསེན། ཝཎྞཝསེནཱཏི སབྷཱཝཝཎྞཝསེན། ནིདསྶནཝསེནཱཏི པསྶིཏབྦཏཱཝསེན ཙཀྑུཝིཉྙཱཎཱདིཝིཉྙཱཎཝཱིཐིཡཱ གཧེཏབྦཏཱཝསེན། ཨོབྷཱསཝསེནཱཏི སཔྤབྷཱསཏཱཡ ཨཝབྷཱསནཝསེན། ཨུམཱཔུཔྥནྟི ཨཏསིཔུཔྥཾ། ནཱིལམེཝ ཧོཏི ཝཎྞསངྐརཱབྷཱཝཏོ། བཱརཱཎསིསམྦྷཝནྟི བཱརཱཎསིཡཾ སམུཊྛིཏཾ།

    Sabbasaṅgāhakavasenāti sakalanīlavaṇṇanīlanidassananīlanibhāsānaṃ sādhāraṇavasena. Vaṇṇavasenāti sabhāvavaṇṇavasena. Nidassanavasenāti passitabbatāvasena cakkhuviññāṇādiviññāṇavīthiyā gahetabbatāvasena. Obhāsavasenāti sappabhāsatāya avabhāsanavasena. Umāpupphanti atasipupphaṃ. Nīlameva hoti vaṇṇasaṅkarābhāvato. Bārāṇasisambhavanti bārāṇasiyaṃ samuṭṭhitaṃ.

    ཨེཀཙྩསྶ ཨིཏོ བཱཧིརཀསྶ ཨཔྤམཱཎཾ ཨཏིཝིཏྠཱརིཏཾ ཀསིཎནིམིཏྟཾ ཨོལོཀེནྟསྶ བྷཡཾ ཨུཔྤཛྫེཡྻ ‘‘ཀིཾ ནུ ཁོ ཨིདཾ སཀལཾ ལོཀཾ ཨབྷིབྷཝིཏྭཱ ཨཛ྄ཛྷོཏྠརིཏྭཱ གཎྷཱཏཱི’’ཏི, ཏཐཱགཏསྶ པན ཏཱདིསཾ བྷཡཾ ཝཱ སཱརཛྫཾ ཝཱ ནཏྠཱིཏི ཨབྷཱིཏབྷཱཝདསྶནཏྠམེཝ ཨཱནཱིཏཱནི།

    Ekaccassa ito bāhirakassa appamāṇaṃ ativitthāritaṃ kasiṇanimittaṃ olokentassa bhayaṃ uppajjeyya ‘‘kiṃ nu kho idaṃ sakalaṃ lokaṃ abhibhavitvā ajjhottharitvā gaṇhātī’’ti, tathāgatassa pana tādisaṃ bhayaṃ vā sārajjaṃ vā natthīti abhītabhāvadassanatthameva ānītāni.

    ཨཊྛཝིམོཀྑཝཎྞནཱ

    Aṭṭhavimokkhavaṇṇanā

    ༡༧༤. ཨུཏྟཱནཏྠཱཡེཝ ཧེཊྛཱ ཨཏྠཏོ ཝིབྷཏྟཏྟཱ། ཨེཀཙྩསྶ ཝིམོཀྑོཏི གྷོསོཔི བྷཡཱཝཧོ ཝཊྚཱབྷིརཏབྷཱཝཏོ, ཏཐཱགཏསྶ པན ཝིམོཀྑེ ཨུཔསམྤཛྫ ཝིཧརཏོཔི ཏཾ ནཏྠཱིཏི ཨབྷཱིཏབྷཱཝདསྶནཏྠམེཝ ཨཱནཱིཏཱནི།

    174.Uttānatthāyeva heṭṭhā atthato vibhattattā. Ekaccassa vimokkhoti ghosopi bhayāvaho vaṭṭābhiratabhāvato, tathāgatassa pana vimokkhe upasampajja viharatopi taṃ natthīti abhītabhāvadassanatthameva ānītāni.

    ཨཱནནྡཡཱཙནཀཐཱཝཎྞནཱ

    Ānandayācanakathāvaṇṇanā

    ༡༧༨. བོདྷཱིཏི སབྦཉྙུཏཉྙཱཎཾ། ཏཉྷི ‘‘ཙཏུམགྒཉཱཎཔཊིཝེདྷ’’ནྟྭེཝ ཝུཏྟཾ སབྦཉྙུཏཉྙཱཎཔྤཊིཝེདྷསྶ ཏཾམཱུལཀཏྟཱ། ཨེཝཾ ཝུཏྟབྷཱཝནྟི ‘‘ཨཱཀངྑམཱནོ ཨཱནནྡ ཏཐཱགཏོ ཀཔྤཾ ཝཱ ཏིཊྛེཡྻཱ’’ཏི (དཱི॰ ནི॰ ༢.༡༦༦) ཨེཝཾ ཝུཏྟབྷཱཝཾ།

    178.Bodhīti sabbaññutaññāṇaṃ. Tañhi ‘‘catumaggañāṇapaṭivedha’’ntveva vuttaṃ sabbaññutaññāṇappaṭivedhassa taṃmūlakattā. Evaṃ vuttabhāvanti ‘‘ākaṅkhamāno ānanda tathāgato kappaṃ vā tiṭṭheyyā’’ti (dī. ni. 2.166) evaṃ vuttabhāvaṃ.

    ༡༧༩. ཏམྤི ཨོལཱ༹རིཀནིམིཏྟཾ ཀཏཾ ཏསྶ མཱརེན པརིཡུཊྛིཏཙེཏསོ ན པཊིཝིདྡྷཾ ན སལླཀྑིཏཾ།

    179.Tampi oḷārikanimittaṃ kataṃ tassa mārena pariyuṭṭhitacetaso na paṭividdhaṃ na sallakkhitaṃ.

    ༡༨༣. ཨཱདིཀེཧཱིཏི ཨེཝམཱདཱིཧི མིཏྟཱམཙྩསུཧཛྫཱཧི། པིཡཱཡིཏབྦཏོ པིཡེཧི། མནཝཌྜྷནཏོ མནཱཔེཧི། ཛཱཏིཡཱཏི ཛཱཏིཨནུརཱུཔགམནེན། ནཱནཱབྷཱཝོ ཝིསུཾབྷཱཝོ ཨསམྦདྡྷབྷཱཝོ། མརཎེན ཝིནཱབྷཱཝོཏི ཙུཏིཡཱ ཏེནཏྟབྷཱཝེན ཨཔུནརཱཝཏྟནཏོ ཝིཔྤཡོགོ། བྷཝེན ཨཉྙཐཱབྷཱཝོཏི བྷཝནྟརགྒཧཎེན པུརིམཱཀཱརཏོ ཨཉྙཱཀཱརཏཱ ‘‘ཀཱམཱཝཙརསཏྟོ རཱུཔཱཝཙརོ ཧོཏཱི’’ཏིཨཱདིནཱ, ཏཏྠཱཔི ‘‘མནུསྶོ དེཝོ ཧོཏཱི’’ཏིཨཱདིནཱཔི ཡོཛེཏབྦོ། ཀུཏེཏྠ ལབྦྷཱཏི ཀུཏོ ཀུཧིཾ ཀིསྨིཾ ནཱམ ཋཱནེ ཨེཏྠ ཨེཏསྨིཾ ཁནྡྷཔྤཝཏྟེ ‘‘ཡཾ ཏཾ ཛཱཏཾ…པེ॰… མཱ པལུཛྫཱི’’ཏི ལདྡྷུཾ སཀྐཱ། ན སཀྐཱ ཨེཝ ཏཱདིསསྶ ཀཱརཎསྶ ཨབྷཱཝཏོཏི ཨཱཧ ‘‘ནེཏཾ ཋཱནཾ ཝིཛྫཏཱི’’ཏི། ཨེཝཾ ཨཙྪརིཡབྦྷུཏདྷམྨཾ ཏཐཱགཏསྶཱཔི སརཱིརཾ, ཀིམངྒཾ པན ཨཉྙེསནྟི ཨདྷིཔྤཱཡོ། ‘‘པཙྩཱཝམིསྶཏཱི’’ཏི ནེཏཾ ཋཱནཾ ཝིཛྫཏི སཏིཾ སཱུཔཊྛིཏཾ ཀཏྭཱ ཉཱཎེན པརིཙྪིནྡིཏྭཱ ཨཱཡུསངྑཱརཱནཾ ཨོསྶཊྛཏྟཱ, བུདྡྷཀིཙྩསྶ ཙ པརིཡོསཱཔིཏཏྟཱ། ན ཧེཏྠ མཱསཏྟཡཏོ པརཾ བུདྡྷཝེནེཡྻཱ ལབྦྷནྟཱིཏི།

    183.Ādikehīti evamādīhi mittāmaccasuhajjāhi. Piyāyitabbato piyehi. Manavaḍḍhanato manāpehi. Jātiyāti jātianurūpagamanena. Nānābhāvo visuṃbhāvo asambaddhabhāvo. Maraṇena vinābhāvoti cutiyā tenattabhāvena apunarāvattanato vippayogo. Bhavena aññathābhāvoti bhavantaraggahaṇena purimākārato aññākāratā ‘‘kāmāvacarasatto rūpāvacaro hotī’’tiādinā, tatthāpi ‘‘manusso devo hotī’’tiādināpi yojetabbo. Kutettha labbhāti kuto kuhiṃ kismiṃ nāma ṭhāne ettha etasmiṃ khandhappavatte ‘‘yaṃ taṃ jātaṃ…pe… mā palujjī’’ti laddhuṃ sakkā. Na sakkā eva tādisassa kāraṇassa abhāvatoti āha ‘‘netaṃ ṭhānaṃ vijjatī’’ti. Evaṃ acchariyabbhutadhammaṃ tathāgatassāpi sarīraṃ, kimaṅgaṃ pana aññesanti adhippāyo. ‘‘Paccāvamissatī’’ti netaṃ ṭhānaṃ vijjati satiṃ sūpaṭṭhitaṃ katvā ñāṇena paricchinditvā āyusaṅkhārānaṃ ossaṭṭhattā, buddhakiccassa ca pariyosāpitattā. Na hettha māsattayato paraṃ buddhaveneyyā labbhantīti.

    ༡༨༤. སཱསནསྶ ཙིརཊྛིཏི ནཱམ སསམྦྷཱརེཧི ཨརིཡམགྒདྷམྨེཧི ཀེཝལེཧཱིཏི ཨཱཧ ‘‘སབྦཾ ལོཀིཡལོཀུཏྟརཝསེནེཝ ཀཐིཏ’’ནྟི ལོཀིཡཱཧི སཱིལསམཱདྷིཔཉྙཱཧི ཝིནཱ ལོཀུཏྟརདྷམྨསམདྷིགམསྶ ཨསམྦྷཝཏོ།

    184. Sāsanassa ciraṭṭhiti nāma sasambhārehi ariyamaggadhammehi kevalehīti āha ‘‘sabbaṃ lokiyalokuttaravaseneva kathita’’nti lokiyāhi sīlasamādhipaññāhi vinā lokuttaradhammasamadhigamassa asambhavato.

    ཏཏིཡབྷཱཎཝཱརཝཎྞནཱ ནིཊྛིཏཱ།

    Tatiyabhāṇavāravaṇṇanā niṭṭhitā.

    ནཱགཱཔལོཀིཏཝཎྞནཱ

    Nāgāpalokitavaṇṇanā

    ༡༨༦. ནཱགཱཔལོཀིཏནྟི ནཱགསྶ ཝིཡ ཨཔལོཀིཏཾ, ཧཏྠིནཱགསྶ ཨཔལོཀནསདིསཾ ཨཔལོཀནནྟི ཨཏྠོ། ཨཱཧཙྩཱཏི ཕུསིཏྭཱ། ཨངྐུསཀལགྒཱནི ཝིཡཱཏི ཨངྐུསཀཱནི ཝིཡ ཨཉྙམཉྙསྨིཾ ལགྒཱནི ཨཱསཏྟཱནི ཧུཏྭཱ ཋིཏཱནི། ཨེཀཱབདྡྷཱནཱིཏི ཨཉྙམཉྙཾ ཨེཀཏོ ཨཱབདྡྷཱནི། ཏསྨཱཏི གཱིཝཊྛཱིནཾ ཨེཀགྒྷནཱནཾ ཝིཡ ཨེཀཱབདྡྷབྷཱཝེན, ན ཀེཝལཾ གཱིཝཊྛཱིནཾཡེཝ, ཨཐ ཁོ སབྦཱནིཔི ཏཱནི བུདྡྷཱནཾ ཋཔེཏྭཱ བཱཧུསནྡྷིཨཱདིཀཱ དྭཱདས མཧཱསནྡྷིཡོ, ཨངྒུལིསནྡྷིཡོ ཙ ཨིཏརསནྡྷཱིསུ ཨེཀཱབདྡྷཱནི ཧུཏྭཱ ཋིཏཱནི, ཡཏོ ནེསཾ པཀཏིཧཏྠཱིནཾ ཀོཊིསཧསྶབལཔྤམཱཎཾ ཀཱཡབལཾ ཧོཏི། ཝེསཱལིནགརཱབྷིམུཁཾ ཨཀཱསི ཀཎྚཀཔརིཝཏྟནེ ཝིཡ ཀཔིལནགརཱབྷིམུཁཾ། ཡདི ཨེཝཾ ཀཐཾ ཏཾ ནཱགཱཔལོཀིཏཾ ནཱམ ཛཱཏཾ? ཏདཛ྄ཛྷཱསཡཾ ཨུཔཱདཱཡ། བྷགཝཱ ཧི ནཱགཱཔལོཀིཏཝསེནེཝ ཨཔལོཀེཏུཀཱམོ ཛཱཏོ, པུཉྙཱནུབྷཱཝེན པནསྶ པཏིཊྛིཏཊྛཱནཾ པརིཝཏྟི, ཏེན ཏཾ ‘‘ནཱགཱཔལོཀིཏཾ’’ ཏྭེཝ ཝུཙྩཏི།

    186.Nāgāpalokitanti nāgassa viya apalokitaṃ, hatthināgassa apalokanasadisaṃ apalokananti attho. Āhaccāti phusitvā. Aṅkusakalaggāni viyāti aṅkusakāni viya aññamaññasmiṃ laggāni āsattāni hutvā ṭhitāni. Ekābaddhānīti aññamaññaṃ ekato ābaddhāni. Tasmāti gīvaṭṭhīnaṃ ekagghanānaṃ viya ekābaddhabhāvena, na kevalaṃ gīvaṭṭhīnaṃyeva, atha kho sabbānipi tāni buddhānaṃ ṭhapetvā bāhusandhiādikā dvādasa mahāsandhiyo, aṅgulisandhiyo ca itarasandhīsu ekābaddhāni hutvā ṭhitāni, yato nesaṃ pakatihatthīnaṃ koṭisahassabalappamāṇaṃ kāyabalaṃ hoti. Vesālinagarābhimukhaṃ akāsi kaṇṭakaparivattane viya kapilanagarābhimukhaṃ. Yadi evaṃ kathaṃ taṃ nāgāpalokitaṃ nāma jātaṃ? Tadajjhāsayaṃ upādāya. Bhagavā hi nāgāpalokitavaseneva apaloketukāmo jāto, puññānubhāvena panassa patiṭṭhitaṭṭhānaṃ parivatti, tena taṃ ‘‘nāgāpalokitaṃ’’ tveva vuccati.

    ‘‘ཨིདཾ པཙྪིམཀཾ ཨཱནནྡ ཏཐཱགཏསྶ ཝེསཱལིཡཱ དསྶན’’ནྟི ནཡིདཾ ཝེསཱལིཡཱ ཨཔལོཀནསྶ ཀཱརཎཝཙནཾ ཨནེཀནྟིཀཏྟཱ, བྷཱུཏཀཐནམཏྟཾ པནེཏཾ། མགྒསོདྷནཝསེན ཏཾ དསྶེཏྭཱ ཨཉྙདེཝེཏྠ ཨཔལོཀནཀཱརཎཾ དསྶེཏུཀཱམོ ‘‘ནནུ ཙཱ’’ཏིཨཱདིམཱཧ། ཏཾ ཏཾ སབྦཾ པཙྪིམདསྶནམེཝ ཨནུཀྐམེན ཀུསིནཱརཾ གནྟྭཱ པརིནིབྦཱཏུཀཱམཏཱཡ ཏཏོ ཏཏོ ནིཀྑནྟཏྟཱ། ‘‘ཨནཙྪརིཡཏྟཱ’’ཏི ཨིམིནཱ ཡཐཱཝུཏྟཾ ཨནེཀནྟིཀཏྟཾ པརིཧརཏི, ཏཡིདཾ སོདྷནམཏྟཾ། ཨིདཾ པནེཏྠ ཨཝིཔརཱིཏཾ ཀཱརཎནྟི དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ། ན ཧི བྷགཝཱ སཱཔེཀྑོ ཝེསཱལིཾ ཨཔལོཀེསི, ‘‘ཨིདཾ པན མེ གམནཾ ཨཔུནརཱགམན’’ནྟི དསྶནམུཁེན བཧུཛནཧིཏཱཡ བཧུཛནསུཁཱཡ ལོཀཱནུཀམྤཱཡ ཨཔལོཀེསི། ཏེནཱཧ ‘‘ཨཔིཙ ཝེསཱལིརཱཛཱནོ’’ཏིཨཱདི།

    ‘‘Idaṃ pacchimakaṃ ānanda tathāgatassa vesāliyā dassana’’nti nayidaṃ vesāliyā apalokanassa kāraṇavacanaṃ anekantikattā, bhūtakathanamattaṃ panetaṃ. Maggasodhanavasena taṃ dassetvā aññadevettha apalokanakāraṇaṃ dassetukāmo ‘‘nanu cā’’tiādimāha. Taṃ taṃ sabbaṃ pacchimadassanameva anukkamena kusināraṃ gantvā parinibbātukāmatāya tato tato nikkhantattā. ‘‘Anacchariyattā’’ti iminā yathāvuttaṃ anekantikattaṃ pariharati, tayidaṃ sodhanamattaṃ. Idaṃ panettha aviparītaṃ kāraṇanti dassetuṃ ‘‘apicā’’tiādi vuttaṃ. Na hi bhagavā sāpekkho vesāliṃ apalokesi, ‘‘idaṃ pana me gamanaṃ apunarāgamana’’nti dassanamukhena bahujanahitāya bahujanasukhāya lokānukampāya apalokesi. Tenāha ‘‘apica vesālirājāno’’tiādi.

    ཨནྟཀརོཏི སཀལཝཊྚདུཀྑསྶ སཀསནྟཱནེ, པརསནྟཱནེ ཙ ཝིནཱསཀརོ ཨབྷཱཝཀརོ། བུདྡྷཙཀྑུདྷམྨཙཀྑུདིབྦཙཀྑུམཾསཙཀྑུསམནྟཙཀྑུསངྑཱཏེཧི པཉྩཧི ཙཀྑཱུཧི ཙཀྑུམཱ། སཝཱསནཱནཾ ཀིལེསཱནཾ སམུཙྪིནྣཏྟཱ སཱཏིསཡཾ ཀིལེསཔརིནིབྦཱནེན པརིནིབྦུཏོ།

    Antakaroti sakalavaṭṭadukkhassa sakasantāne, parasantāne ca vināsakaro abhāvakaro. Buddhacakkhudhammacakkhudibbacakkhumaṃsacakkhusamantacakkhusaṅkhātehi pañcahi cakkhūhi cakkhumā. Savāsanānaṃ kilesānaṃ samucchinnattā sātisayaṃ kilesaparinibbānena parinibbuto.

    ཙཏུམཧཱཔདེསཝཎྞནཱ

    Catumahāpadesavaṇṇanā

    ༡༨༧. མཧཱཨོཀཱསེཏི མཧནྟེ ཨོཀཱསེ། མཧནྟཱནི དྷམྨསྶ པཏིཊྛཱཔནཊྛཱནཱནི། ཡེསུ པཏིཊྛཱཔིཏོ དྷམྨོ ནིཙྪཱིཡཏི ཨསནྡེཧཏོ, ཀཱནི པན ཏཱནི? ཨཱགམནཝིསིཊྛཱནི སུཏྟོཏརཎཱདཱིནི། དུཏིཡཝིཀཔྤེ ཨཔདིསནྟཱིཏི ཨཔདེསཱ, ‘‘སམྨུཁཱ མེཏཾ ཨཱཝུསོ བྷགཝཏོ སུཏ’’ནྟིཨཱདིནཱ ཀེནཙི ཨཱབྷཏསྶ ‘‘དྷམྨོ’’ཏི ཝིནིཙྪིནནེ ཀཱརཎཾ། ཀིཾ པན ཏནྟི? ཏསྶ ཡཐཱབྷཏསྶ སུཏྟོཏརཎཱདི ཨེཝ། ཡདི ཨེཝཾ ཀཐཾ ཙཏྟཱརོཏི? ཡསྨཱ དྷམྨསྶ དྭེ སམྤརཱཡཱ སཏྠཱ, སཱཝཀཱ ཙ, ཏེསུ ཙ སཱཝཀཱ སངྒྷགཎཔུགྒལཝསེན ཏིཝིདྷཱ , ཨེཝཾ ‘‘ཏུམྷཱཀཾ མཡཱ ཡཾ དྷམྨོ པཊིགྒཧིཏོ’’ཏི ཨཔདིསིཏབྦཱནཾ བྷེདེན ཙཏྟཱརོ། ཏེནཱཧ ‘‘སམྨུཁཱ མེ ཏཾ ཨཱཝུསོ བྷགཝཏོ སུཏ’’ནྟིཨཱདི། ཏཐཱ ཙ ཝུཏྟཾ ནེཏྟིཡཾ ‘‘ཙཏྟཱརོ མཧཱཔདེསཱ བུདྡྷཱཔདེསོ སངྒྷཱཔདེསོ སམྦཧུལཏྠེརཱཔདེསོ ཨེཀཏྠེརཱཔདེསོ། ཨིམེ ཙཏྟཱརོ མཧཱཔདེསཱ’’ཏི (ནེཏྟི॰ ༡༨) བུདྡྷོ ཨཔདེསོ ཨེཏསྶཱཏི བུདྡྷཱཔདེསོ། ཨེས ནཡོ སེསེསུཔི། ཏེནཱཧ ‘‘བུདྡྷཱདཡོ…པེ॰… མཧཱཀཱརཎཱནཱི’’ཏི།

    187.Mahāokāseti mahante okāse. Mahantāni dhammassa patiṭṭhāpanaṭṭhānāni. Yesu patiṭṭhāpito dhammo nicchīyati asandehato, kāni pana tāni? Āgamanavisiṭṭhāni suttotaraṇādīni. Dutiyavikappe apadisantīti apadesā, ‘‘sammukhā metaṃ āvuso bhagavato suta’’ntiādinā kenaci ābhatassa ‘‘dhammo’’ti vinicchinane kāraṇaṃ. Kiṃ pana tanti? Tassa yathābhatassa suttotaraṇādi eva. Yadi evaṃ kathaṃ cattāroti? Yasmā dhammassa dve samparāyā satthā, sāvakā ca, tesu ca sāvakā saṅghagaṇapuggalavasena tividhā , evaṃ ‘‘tumhākaṃ mayā yaṃ dhammo paṭiggahito’’ti apadisitabbānaṃ bhedena cattāro. Tenāha ‘‘sammukhā me taṃ āvuso bhagavato suta’’ntiādi. Tathā ca vuttaṃ nettiyaṃ ‘‘cattāro mahāpadesā buddhāpadeso saṅghāpadeso sambahulattherāpadeso ekattherāpadeso. Ime cattāro mahāpadesā’’ti (netti. 18) buddho apadeso etassāti buddhāpadeso. Esa nayo sesesupi. Tenāha ‘‘buddhādayo…pe… mahākāraṇānī’’ti.

    ༡༨༨. ནེཝ ཨབྷིནནྡིཏབྦནྟི ན སམྤཊིཙྪིཏབྦཾ། གནྠསྶ སམྤཊིཙྪནཾ ནཱམ སཝནནྟི ཨཱཧ ‘‘ན སོཏབྦ’’ནྟི། པདབྱཉྫནཱནཱིཏི པདཱནི ཙ བྱཉྫནཱནི ཙ, ཨཏྠཔདཱནི, བྱཉྫནཔདཱནི ཙཱཏི ཨཏྠོ། པཛྫཏི ཨཏྠོ ཨེཏེཧཱིཏི པདཱནི, ཨཀྑརཱདཱིནི བྱཉྫནཔདཱནི། པཛྫིཏབྦཏོ པདཱནི, སངྐཱསནཱདཱིནི ཨཏྠཔདཱནི། ཨཊྛཀཐཱཡཾཔན ‘‘‘པདསངྑཱཏཱནི བྱཉྫནཱནཱི’ཏི བྱཉྫནཔདཱནེཝ ཝུཏྟཱནཱི’’ཏི ཀེཙི, ཏཾ ན, ཨཏྠཾ བྱཉྫེནྟཱིཏི བྱཉྫནཱནི, བྱཉྫནཔདཱནི, ཏེཧི བྱཉྫིཏབྦཏོ བྱཉྫནཱནི, ཨཏྠཔདཱནཱིཏི ཨུབྷཡསངྒཧཏོ། ཨིམསྨིཾ ཋཱནེཏི ཏེནཱབྷཏསུཏྟསྶ ཨིམསྨིཾ པདེསེ། པཱལི༹ ཝུཏྟཱཏི ཀེཝལོ པཱལི༹དྷམྨོ པཝཏྟོ། ཨཏྠོ ཝུཏྟོཏི པཱལི༹ཡཱ ཨཏྠོ པཝཏྟོ ནིདྡིཊྛོ། ཨནུསནྡྷི ཀཐིཏོཏི ཡཐཱརདྡྷདེསནཱཡ, ཨུཔརི དེསནཱཡ ཙ ཨནུསནྡྷཱནཾ ཀཐིཏཾ སམྦནྡྷོ ཀཐིཏོ ། པུབྦཱཔརཾ ཀཐིཏནྟི པུབྦེནཱཔརཾ ཨཝིརུཛ྄ཛྷནཉྩེཝ ཝིསེསཱདྷཱནཉྩ ཀཐིཏཾ པཀཱསིཏཾ། ཨེཝཾ པཱལི༹དྷམྨཱདཱིནི སམྨདེཝ སལླཀྑེཏྭཱ གཧཎཾ སཱདྷུཀཾ ཨུགྒཧཎནྟི ཨཱཧ ‘‘སུཊྛུ གཧེཏྭཱ’’ཏི། སུཏྟེ ཨོཏཱརེཏབྦཱནཱིཏི ཉཱཎེན སུཏྟེ ཨོགཱཧེཏྭཱ ཏཱརེཏབྦཱནི, ཏཾ པན ཨོགཱཧེཏྭཱ ཏརཎཾ ཏཏྠ ཨོཏརཎཾ ཨནུཔྤཝེསནཾ ཧོཏཱིཏི ཝུཏྟཾ ‘‘སུཏྟེ ཨོཏཱརེཏབྦཱནཱི’’ཏི། སཾསནྡེཏྭཱ དསྶནཾ སནྡསྶནནྟི ཨཱཧ ‘‘ཝིནཡེ སཾསནྡེཏབྦཱནཱི’’ཏི།

    188.Nevaabhinanditabbanti na sampaṭicchitabbaṃ. Ganthassa sampaṭicchanaṃ nāma savananti āha ‘‘na sotabba’’nti. Padabyañjanānīti padāni ca byañjanāni ca, atthapadāni, byañjanapadāni cāti attho. Pajjati attho etehīti padāni, akkharādīni byañjanapadāni. Pajjitabbato padāni, saṅkāsanādīni atthapadāni. Aṭṭhakathāyaṃpana ‘‘‘padasaṅkhātāni byañjanānī’ti byañjanapadāneva vuttānī’’ti keci, taṃ na, atthaṃ byañjentīti byañjanāni, byañjanapadāni, tehi byañjitabbato byañjanāni, atthapadānīti ubhayasaṅgahato. Imasmiṃ ṭhāneti tenābhatasuttassa imasmiṃ padese. Pāḷi vuttāti kevalo pāḷidhammo pavatto. Attho vuttoti pāḷiyā attho pavatto niddiṭṭho. Anusandhi kathitoti yathāraddhadesanāya, upari desanāya ca anusandhānaṃ kathitaṃ sambandho kathito . Pubbāparaṃ kathitanti pubbenāparaṃ avirujjhanañceva visesādhānañca kathitaṃ pakāsitaṃ. Evaṃ pāḷidhammādīni sammadeva sallakkhetvā gahaṇaṃ sādhukaṃ uggahaṇanti āha ‘‘suṭṭhu gahetvā’’ti. Sutte otāretabbānīti ñāṇena sutte ogāhetvā tāretabbāni, taṃ pana ogāhetvā taraṇaṃ tattha otaraṇaṃ anuppavesanaṃ hotīti vuttaṃ ‘‘sutte otāretabbānī’’ti. Saṃsandetvā dassanaṃ sandassananti āha ‘‘vinaye saṃsandetabbānī’’ti.

    ཀིཾ པན ཏཾ སུཏྟཾ, ཀོ ཝཱ ཝིནཡོཏི ཝིཙཱརཎཱཡ ཨཱཙརིཡཱནཾ མཏིབྷེདམུཁེན ཏམཏྠཾ དསྶེཏུཾ ‘‘ཨེཏྠ ཙཱ’’ཏིཨཱདི ཝུཏྟཾ། ཝིནཡོཏི ཝིབྷངྒཔཱཋམཱཧ། སོ ཧི མཱཏིཀཱསཉྙིཏསྶ སུཏྟསྶ ཨཏྠསཱུཙནཏོ ‘‘སུཏྟ’’ནྟི ཝཏྟབྦཏཾ ཨརཧཏི། ཝིཝིདྷནཡཏྟཱ, ཝིསིཊྛནཡཏྟཱ ཙ ཝིནཡོ, ཁནྡྷཀཔཱཋོ། ཨེཝནྟི ཨེཝཾ སུཏྟཝིནཡེསུ པརིགྒཡ྄ཧམཱནེསུ ཝིནཡཔིཊཀམྤི ན པརིཡཱདཱིཡཏི པརིཝཱརཔཱལི༹ཡཱ ཨསངྒཧིཏཏྟཱ། སུཏྟནྟཱབྷིདྷམྨཔིཊཀཱནི ཝཱ སུཏྟཾ ཨཏྠསཱུཙནཱདིཨཏྠསམྦྷཝཏོ། ཨེཝམྤཱིཏི ‘‘སུཏྟནྟཱབྷིདྷམྨཔིཊཀཱནི སུཏྟཾ, ཝིནཡཔིཊཀཾ ཝིནཡོ’’ཏི ཨེཝཾ སུཏྟཝིནཡཝིབྷཱགེ ཝུཙྩམཱནེཔི། ན ཏཱཝ པརིཡཱདཱིཡནྟཱིཏི ན ཏཱཝ ཨནཝསེསཏོ པརིགྒཡ྄ཧནྟི, ཀསྨཱཏི ཨཱཧ ‘‘ཨསུཏྟནཱམཀཉྷཱི’’ཏིཨཱདི། ཡསྨཱ ‘‘སུཏྟ’’ནྟི ཨིམཾ ནཱམཾ ཨནཱརོཔེཏྭཱ སངྒཱིཏམྤི ཛཱཏཀཱདིབུདྡྷཝཙནཾ ཨཏྠི, ཏསྨཱ ཝུཏྟནཡེན ཏཱིཎི པིཊཀཱནི ན པརིཡཱདིཎྞཱནཱིཏི། སུཏྟནིཔཱཏཨུདཱནཨིཏིཝུཏྟཀཱདཱིནི དཱིགྷནིཀཱཡཱདཡོ ཝིཡ སུཏྟནཱམཾ ཨཱརོཔེཏྭཱ ཨསངྒཱིཏཱནཱིཏི ཨདྷིཔྤཱཡེ པནེཏྠ ཛཱཏཀཱདཱིཧི སདྡྷིཾ ཏཱནིཔི གཧིཏཱནི། བུདྡྷཝཾསཙརིཡཱཔིཊཀཱནཾ པནེཏྠ ཨགྒཧཎེ ཀཱརཎཾ མགྒིཏབྦཾ, ཀིཾ ཝཱ ཏེན མགྒནེན? སབྦོཔཱཡཾ ཝཎྞནཱནཡོ ཐེརཝཱདཾ དསྶནམུཁེན པཊིཀྑིཏྟོ ཨེཝཱཏི།

    Kiṃ pana taṃ suttaṃ, ko vā vinayoti vicāraṇāya ācariyānaṃ matibhedamukhena tamatthaṃ dassetuṃ ‘‘ettha cā’’tiādi vuttaṃ. Vinayoti vibhaṅgapāṭhamāha. So hi mātikāsaññitassa suttassa atthasūcanato ‘‘sutta’’nti vattabbataṃ arahati. Vividhanayattā, visiṭṭhanayattā ca vinayo, khandhakapāṭho. Evanti evaṃ suttavinayesu pariggayhamānesu vinayapiṭakampi na pariyādīyati parivārapāḷiyā asaṅgahitattā. Suttantābhidhammapiṭakāni vā suttaṃ atthasūcanādiatthasambhavato. Evampīti ‘‘suttantābhidhammapiṭakāni suttaṃ, vinayapiṭakaṃ vinayo’’ti evaṃ suttavinayavibhāge vuccamānepi. Na tāva pariyādīyantīti na tāva anavasesato pariggayhanti, kasmāti āha ‘‘asuttanāmakañhī’’tiādi. Yasmā ‘‘sutta’’nti imaṃ nāmaṃ anāropetvā saṅgītampi jātakādibuddhavacanaṃ atthi, tasmā vuttanayena tīṇi piṭakāni na pariyādiṇṇānīti. Suttanipātaudānaitivuttakādīni dīghanikāyādayo viya suttanāmaṃ āropetvā asaṅgītānīti adhippāye panettha jātakādīhi saddhiṃ tānipi gahitāni. Buddhavaṃsacariyāpiṭakānaṃ panettha aggahaṇe kāraṇaṃ maggitabbaṃ, kiṃ vā tena magganena? Sabbopāyaṃ vaṇṇanānayo theravādaṃ dassanamukhena paṭikkhitto evāti.

    ཨཏྠཱིཏི ཀིཾ ཨཏྠི, ཨསུཏྟནཱམཀཾ བུདྡྷཝཙནཾ ནཏྠི ཨེཝཱཏི དསྶེཏི། ཏཐཱ ཧི ནིདཱནཝཎྞནཱཡཾ (དཱི॰ ནི॰ ཊཱི॰ ༡.པཋམམཧཱསངྒཱིཏིཀཐཱཝཎྞནཱ; སཱརཏྠ॰ ཊཱི॰ ༡.པཋམམཧཱསངྒཱིཏིཀཐཱཝཎྞནཱ) ཨམྷེཧི ཝུཏྟཾ ‘‘སུཏྟནྟི སཱམཉྙཝིདྷི, ཝིསེསཝིདྷཡོ པརེ’’ཏི། ཏཾ སབྦཾ པཊིཀྑིཔིཏྭཱ ‘‘སུཏྟནྟི ཝིནཡོ’’ཏིཨཱདིནཱ ཝུཏྟཾ སཾཝཎྞནཱནཡཾ ‘‘ནཱཡམཏྠོ ཨིདྷཱདྷིཔྤེཏོ’’ཏི པཊིསོདྷེཏྭཱ། ཝིནེཏི ཨེཏེན ཀིལེསེཏི ཝིནཡོ, ཀིལེསཝིནཡནཱུཔཱཡོ, སོ ཨེཝ ཙ ནཾ ཀརོཏཱིཏི ཀཱརཎནྟི ཨཱཧ ‘‘ཝིནཡོ པན ཀཱརཎ’’ནྟི།

    Atthīti kiṃ atthi, asuttanāmakaṃ buddhavacanaṃ natthi evāti dasseti. Tathā hi nidānavaṇṇanāyaṃ (dī. ni. ṭī. 1.paṭhamamahāsaṅgītikathāvaṇṇanā; sārattha. ṭī. 1.paṭhamamahāsaṅgītikathāvaṇṇanā) amhehi vuttaṃ ‘‘suttanti sāmaññavidhi, visesavidhayo pare’’ti. Taṃ sabbaṃ paṭikkhipitvā ‘‘suttanti vinayo’’tiādinā vuttaṃ saṃvaṇṇanānayaṃ ‘‘nāyamattho idhādhippeto’’ti paṭisodhetvā. Vineti etena kileseti vinayo, kilesavinayanūpāyo, so eva ca naṃ karotīti kāraṇanti āha ‘‘vinayo pana kāraṇa’’nti.

    དྷམྨེཏི པརིཡཏྟིདྷམྨེ། སརཱགཱཡཱཏི སརཱགབྷཱཝཱཡ ཀཱམརཱགབྷཝརཱགཔརིབྲཱུཧནཱཡ། སཉྙོགཱཡཱཏི བྷཝསཾཡོཛནཱཡ། ཨཱཙཡཱཡཱཏི ཝཊྚསྶ ཝཌྜྷནཏྠཱཡ། མཧིཙྪཏཱཡཱཏི མཧིཙྪབྷཱཝཱཡ། ཨསནྟུཊྛིཡཱཏི ཨསནྟུཊྛིབྷཱཝཱཡ། སངྒཎིཀཱཡཱཏི ཀིལེསསངྒཎགཎསངྒཎཝིཧཱརཱཡ། ཀོསཛྫཱཡཱཏི ཀུསཱིཏབྷཱཝཱཡ། དུབྦྷརཏཱཡཱཏི དུཔྤོསཏཱཡ། ཝིརཱགཱཡཱཏི སཀལཝཊྚཏོ ཝིརཛྫནཏྠཱཡ། ཝིསཉྙོགཱཡཱཏི ཀཱམབྷཝཱདཱིཧི ཝིསཾཡུཛྫནཏྠཱཡ། ཨཔཙཡཱཡཱཏི སབྦསྶཱཔི ཝཊྚསྶ ཨཔཙཡནཱཡ, ནིབྦཱནཱཡཱཏི ཨཏྠོ། ཨཔྤིཙྪཏཱཡཱཏི པཙྩཡཔྤིཙྪཏཱདིཝསེན སབྦསོ ཨིཙྪཱཔགམཱཡ། སནྟུཊྛིཡཱཏི དྭཱདསཝིདྷསནྟུཊྛིབྷཱཝཱཡ། པཝིཝེཀཱཡཱཏི པཝིཝིཏྟབྷཱཝཱཡ, ཀཱཡཝིཝེཀཱདིཏདངྒཝིཝེཀཱདིཝིཝེཀསིདྡྷིཡཱ། ཝཱིརིཡཱརམྦྷཱཡཱཏི ཀཱཡིཀསྶ ཙེཝ, ཙེཏསིཀསྶ ཙ ཝཱིརིཡསྶ པགྒཧཎཏྠཱཡ། སུབྷརཏཱཡཱཏི སུཁཔོསནཏྠཱཡ། ཨེཝཾ ཡོ པརིཡཏྟིདྷམྨོ ཨུགྒཧཎདྷཱརཎཔརིཔུཙྪཱམནསིཀཱརཝསེན ཡོནིསོ པཊིཔཛྫནྟསྶ སརཱགཱདིབྷཱཝཔརིཝཛྫནསྶ ཀཱརཎཾ ཧུཏྭཱ ཝིརཱགཱདིབྷཱཝཱཡ སཾཝཏྟཏི, ཨེཀཾསཏོ ཨེསོ དྷམྨོ། ཨེསོ ཝིནཡོ, སམྨདེཝ ཨཔཱཡཱདཱིསུ ཨཔཏནཝསེན དྷཱརཎཏོ, ཀིལེསཱནཾ ཝིནཡནཏོ, སཏྠུ སམྨཱསམྦུདྡྷསྶ ཨོཝཱདཱནུསིཊྛིབྷཱཝཏོ ཨེཏཾ སཏྠུསཱསནནྟི དྷཱརེཡྻཱསི ཛཱནེཡྻཱསི, ཨཝབུཛ྄ཛྷེཡྻཱསཱིཏི ཨཏྠོ། ཙཏུསཙྩསྶ སཱུཙནཾ སུཏྟནྟི ཨཱཧ ‘‘སུཏྟེཏི ཏེཔིཊཀེ བུདྡྷཝཙནེ’’ཏི། ཏེཔིཊཀཉྷི བུདྡྷཝཙནཾ སཙྩཝིནིམུཏྟཾ ནཏྠི། རཱགཱདིཝིནཡནཀཱརཎཾ ཏཐཱགཏེན སུཏྟཔདེན པཀཱསིཏནྟི ཨཱཧ ‘‘ཝིནཡེཏི ཨེཏསྨིཾ རཱགཱདིཝིནཡཀཱརཎེ’’ཏི།

    Dhammeti pariyattidhamme. Sarāgāyāti sarāgabhāvāya kāmarāgabhavarāgaparibrūhanāya. Saññogāyāti bhavasaṃyojanāya. Ācayāyāti vaṭṭassa vaḍḍhanatthāya. Mahicchatāyāti mahicchabhāvāya. Asantuṭṭhiyāti asantuṭṭhibhāvāya. Saṅgaṇikāyāti kilesasaṅgaṇagaṇasaṅgaṇavihārāya. Kosajjāyāti kusītabhāvāya. Dubbharatāyāti dupposatāya. Virāgāyāti sakalavaṭṭato virajjanatthāya. Visaññogāyāti kāmabhavādīhi visaṃyujjanatthāya. Apacayāyāti sabbassāpi vaṭṭassa apacayanāya, nibbānāyāti attho. Appicchatāyāti paccayappicchatādivasena sabbaso icchāpagamāya. Santuṭṭhiyāti dvādasavidhasantuṭṭhibhāvāya. Pavivekāyāti pavivittabhāvāya, kāyavivekāditadaṅgavivekādivivekasiddhiyā. Vīriyārambhāyāti kāyikassa ceva, cetasikassa ca vīriyassa paggahaṇatthāya. Subharatāyāti sukhaposanatthāya. Evaṃ yo pariyattidhammo uggahaṇadhāraṇaparipucchāmanasikāravasena yoniso paṭipajjantassa sarāgādibhāvaparivajjanassa kāraṇaṃ hutvā virāgādibhāvāya saṃvattati, ekaṃsato eso dhammo. Eso vinayo, sammadeva apāyādīsu apatanavasena dhāraṇato, kilesānaṃ vinayanato, satthu sammāsambuddhassa ovādānusiṭṭhibhāvato etaṃ satthusāsananti dhāreyyāsi jāneyyāsi, avabujjheyyāsīti attho. Catusaccassa sūcanaṃ suttanti āha ‘‘sutteti tepiṭake buddhavacane’’ti. Tepiṭakañhi buddhavacanaṃ saccavinimuttaṃ natthi. Rāgādivinayanakāraṇaṃ tathāgatena suttapadena pakāsitanti āha ‘‘vinayeti etasmiṃ rāgādivinayakāraṇe’’ti.

    སུཏྟེ ཨོསརཎཉྩེཏྠ ཏེཔིཊཀེ བུདྡྷཝཙནེ པརིཡཱཔནྣཏཱཝསེནེཝ ཝེདིཏབྦཾ, ན ཨཉྙཐཱཏི ཨཱཧ ‘‘སུཏྟཔཊིཔཱཊིཡཱ ཀཏྠཙི ཨནཱགནྟྭཱ’’ཏི། ཚལླིཾ ཨུཊྛཔེཏྭཱཏི ཨརོགསྶ མཧཏོ རུཀྑསྶ ཏིཊྛཏོ ཨུཔཀྐམེན ཚལླིཡཱ སཀལིཀཱཡ, པཔཊིཀཱཡ ཝཱ ཨུཊྛཔནཾ ཝིཡ ཨརོགསྶ སཱསནདྷམྨསྶ ཏིཊྛཏོ བྱཉྫནམཏྟེན ཏཔྤརིཡཱཔནྣཾ ཝིཡ ཧུཏྭཱ ཚལླིསདིསཾ པུབྦཱཔརཝིརུདྡྷཏཱདིདོསཾ ཨུཊྛཔེཏྭཱ པརིདཱིཔེཏྭཱ, ཏཱདིསཱནི པན ཨེཀཾསཏོ གུལ༹ྷཝེསྶནྟརཱདིཔརིཡཱཔནྣཱནི ཧོནྟཱིཏི ཨཱཧ ‘‘གུལ༹ྷཝེསྶནྟར…པེ॰…པཉྙཱཡནྟཱིཏི ཨཏྠོ’’ཏི ། རཱགཱདིཝིནཡེཏི རཱགཱདཱིནཾ ཝིནཡནཏྠེ། ཏདཱཀཱརཏཱཡ ན པཉྙཱཡམཱནཱནི ན དིསྶམཱནཱནི ཚཌྜེཏབྦཱནི ཝཛྫིཏབྦཱནི ན གཧེཏབྦཱནི། སབྦཏྠཱཏི སབྦཝཱརེསུ།

    Sutte osaraṇañcettha tepiṭake buddhavacane pariyāpannatāvaseneva veditabbaṃ, na aññathāti āha ‘‘suttapaṭipāṭiyā katthaci anāgantvā’’ti. Challiṃ uṭṭhapetvāti arogassa mahato rukkhassa tiṭṭhato upakkamena challiyā sakalikāya, papaṭikāya vā uṭṭhapanaṃ viya arogassa sāsanadhammassa tiṭṭhato byañjanamattena tappariyāpannaṃ viya hutvā challisadisaṃ pubbāparaviruddhatādidosaṃ uṭṭhapetvā paridīpetvā, tādisāni pana ekaṃsato guḷhavessantarādipariyāpannāni hontīti āha ‘‘guḷhavessantara…pe…paññāyantīti attho’’ti . Rāgādivinayeti rāgādīnaṃ vinayanatthe. Tadākāratāya na paññāyamānāni na dissamānāni chaḍḍetabbāni vajjitabbāni na gahetabbāni. Sabbatthāti sabbavāresu.

    ཨིམསྨིཾ པན ཋཱནེཏི ཨིམསྨིཾ མཧཱཔདེསནིདྡེསཊྛཱནེ། ‘‘སུཏྟེ ཙཏྟཱརོ མཧཱཔདེསཱ’’ཏིཨཱདིནཱ ཝུཏྟམྤི ཨཝུཏྟེན སདྡྷིཾ གཧེཏྭཱ པཀིཎྞཀཀཐཱཡ མཱཏིཀཾ ཨུདྡིསཏི། ཉཱཏུཾ ཨིཙྪིཏོ ཨཏྠོ པཉྷོ, ཏསྶ ཝིསྶཛྫནཱནི པཉྷཱབྱཱཀརཎཱནི, ཨཏྠསཱུཙནཱདིཨཏྠེན སུཏྟཾ, པཱལི༹, ཏཾ སུཏྟཾ ཨནུལོམེཏི ཨནུཀཱུལེཏཱིཏི སུཏྟཱནུལོམཾ, མཧཱཔདེསོ། ཨཱཙརིཡཱ ཝདནྟི སཾཝཎྞེནྟི པཱལི༹ཾ ཨེཏེནཱཏི ཨཱཙརིཡཝཱདོ ཨཊྛཀཐཱ། ཏསྶ ཏསྶ ཐེརསྶ ཨཏྟནོ ཨེཝ མཏི ཨདྷིཔྤཱཡོཏི ཨཏྟནོམཏི། དྷམྨཝིནིཙྪཡེ པཏྟེཏི དྷམྨེ ཝིནིཙྪིནིཏབྦེ ཨུཔཊྛིཏེ། ཨིམེཏི ཨནནྟརཾ ཝུཏྟཱ ཙཏྟཱརོ མཧཱཔདེསཱ། པམཱིཡཏི དྷམྨོ པརིཙྪིཛྫཏི ཝིནིཙྪཱིཡཏི ཨེཏེནཱཏི པམཱཎཾ། ཏེནཱཧ ‘‘ཡཾ ཨེཏྠ སམེཏཱི’’ཏིཨཱདི། ཨིཏརནྟི མཧཱཔདེསེསུ ཨསམེནྟཾ། པུན ཨིཏརནྟི ཨཀཔྤིཡཾ ཨནུལོམེནྟཾ ཀཔྤིཡཾ པཊིབཱཧནྟཾ སནྡྷཱཡཱཧ།

    Imasmiṃpana ṭhāneti imasmiṃ mahāpadesaniddesaṭṭhāne. ‘‘Sutte cattāro mahāpadesā’’tiādinā vuttampi avuttena saddhiṃ gahetvā pakiṇṇakakathāya mātikaṃ uddisati. Ñātuṃ icchito attho pañho, tassa vissajjanāni pañhābyākaraṇāni, atthasūcanādiatthena suttaṃ, pāḷi, taṃ suttaṃ anulometi anukūletīti suttānulomaṃ, mahāpadeso. Ācariyā vadanti saṃvaṇṇenti pāḷiṃ etenāti ācariyavādo aṭṭhakathā. Tassa tassa therassa attano eva mati adhippāyoti attanomati. Dhammavinicchaye patteti dhamme vinicchinitabbe upaṭṭhite. Imeti anantaraṃ vuttā cattāro mahāpadesā. Pamīyati dhammo paricchijjati vinicchīyati etenāti pamāṇaṃ. Tenāha ‘‘yaṃ ettha sametī’’tiādi. Itaranti mahāpadesesu asamentaṃ. Puna itaranti akappiyaṃ anulomentaṃ kappiyaṃ paṭibāhantaṃ sandhāyāha.

    ཨེཀཾསེནེཝ བྱཱཀཱཏབྦོ ཝིསྶཛྫེཏབྦོཏི ཨེཀཾསབྱཱཀརཎཱིཡོ། ཝིབྷཛྫཱཏི པུཙྪིཏམཏྠཾ ཨཝདྷཱརཎཱདིབྷེདེན ཝིབྷཛིཏྭཱ། པཊིཔུཙྪཱཏི པུཙྪནྟཾ པུགྒལཾ པཊིཔུཙྪིཏྭཱ། ཋཔནཱིཡོཏི ཏིདྷཱཔི ཨཝིསྶཛྫནཱིཡཏྟཱ ཋཔནཱིཡོ བྱཱཀརཎཾ ཨཀཏྭཱ ཋཔེཏབྦོ། ‘‘ཙཀྑུཾ ཨནིཙྩ’’ནྟི པཉྷེ ཨུཏྟརཔདཱཝདྷཱརཎཾ སནྡྷཱཡ ‘‘ཨེཀཾསེནེཝ བྱཱཀཱཏབྦ’’ནྟི ཝུཏྟཾ ནིཙྩཏཱཡ ལེསསྶཱཔི ཏཏྠ ཨབྷཱཝཏོ། པུརིམཔདཱཝདྷཱརཎེ པན ཝིབྷཛྫབྱཱཀརཎཱིཡཏཱ ཙཀྑུསོཏེསུ ཝིསེསཏྠསཱམཉྙཏྠཱནཾ ཨསཱདྷཱརཎབྷཱཝཏོ། དྭིནྣཾ ཏེསཾ སདིསཏཱཙོདནཱ པཊིཔུཙྪནམུཁེནེཝ བྱཱཀརཎཱིཡཱ པཊིཀྑེཔཝསེན, ཨནུཉྙཱཏཝསེན ཙ ཝིསྶཛྫིཏབྦཏོཏི ཨཱཧ ‘‘ཡཐཱ ཙཀྑུ, ཏཐཱ སོཏཾ…པེ॰… ཨཡཾ པཊིཔུཙྪཱབྱཱཀརཎཱིཡོ པཉྷོ’’ཏི། ཏཾ ཛཱིཝཾ ཏཾ སརཱིརནྟི ཛཱིཝསརཱིརཱནཾ ཨནཉྙཏཱཔཉྷོ། ཡསྶ ཡེན ཨནཉྙཏཱཙོདིཏཱ, སོ ཨེཝ པརམཏྠཏོ ནུཔལབྦྷཏཱིཏི ཝཉྫྷཱཏནཡསྶ མཏྟེཡྻཏཱཀིཏྟནསདིསོཏི ཨབྱཱཀཱཏབྦཏཱཡ ཋཔནཱིཡོ ཝུཏྟོཏི། ཨིམཱནི ཙཏྟཱརི པཉྷབྱཱཀརཎཱནི པམཱཎཾ ཏེནེཝ ནཡེན ཏེསཾ པཉྷཱནཾ བྱཱཀཱཏབྦཏོ།

    Ekaṃseneva byākātabbo vissajjetabboti ekaṃsabyākaraṇīyo. Vibhajjāti pucchitamatthaṃ avadhāraṇādibhedena vibhajitvā. Paṭipucchāti pucchantaṃ puggalaṃ paṭipucchitvā. Ṭhapanīyoti tidhāpi avissajjanīyattā ṭhapanīyo byākaraṇaṃ akatvā ṭhapetabbo. ‘‘Cakkhuṃ anicca’’nti pañhe uttarapadāvadhāraṇaṃ sandhāya ‘‘ekaṃseneva byākātabba’’nti vuttaṃ niccatāya lesassāpi tattha abhāvato. Purimapadāvadhāraṇe pana vibhajjabyākaraṇīyatā cakkhusotesu visesatthasāmaññatthānaṃ asādhāraṇabhāvato. Dvinnaṃ tesaṃ sadisatācodanā paṭipucchanamukheneva byākaraṇīyā paṭikkhepavasena, anuññātavasena ca vissajjitabbatoti āha ‘‘yathā cakkhu, tathā sotaṃ…pe… ayaṃ paṭipucchābyākaraṇīyo pañho’’ti. Taṃ jīvaṃ taṃ sarīranti jīvasarīrānaṃ anaññatāpañho. Yassa yena anaññatācoditā, so eva paramatthato nupalabbhatīti vañjhātanayassa matteyyatākittanasadisoti abyākātabbatāya ṭhapanīyo vuttoti. Imāni cattāri pañhabyākaraṇāni pamāṇaṃ teneva nayena tesaṃ pañhānaṃ byākātabbato.

    ཝིནཡམཧཱཔདེསོ ཀཔྤིཡཱནུལོམཝིདྷཱནཏོ ནིཔྤརིཡཱཡཏོ ཨནུལོམཀཔྤིཡཾ ནཱམ, མཧཱཔདེསབྷཱཝེན པན ཏཾསདིསཏཱཡ སུཏྟནྟམཧཱཔདེསེསུཔི ‘‘ཨནུལོམཀཔྤིཡ’’ནྟི ཨཡཾ ཨཊྛཀཐཱཝོཧཱརོ། ཡདིཔི ཏཏྠ ཏཏྠ བྷགཝཏཱ པཝཏྟིཏཔཀིཎྞཀདེསནཱཝ ཨཊྛཀཐཱ, སཱ པན དྷམྨསངྒཱཧཀེཧི པཋམཾ ཏཱིཎི པིཊཀཱནི སངྒཱཡིཏྭཱ ཏསྶ ཨཏྠཝཎྞནཱནུརཱུཔེནེཝ ཝཱཙནཱམགྒཾ ཨཱརོཔིཏཏྟཱ ‘‘ཨཱཙརིཡཝཱདོ’’ཏི ཝུཙྩཏི ཨཱཙརིཡཱ ཝདནྟི སཾཝཎྞེནྟི པཱལི༹ཾ ཨེཏེནཱཏི། ཏེནཱཧ ‘‘ཨཱཙརིཡཝཱདོ ནཱམ ཨཊྛཀཐཱ’’ཏི། ཏིསྶོ སངྒཱིཏིཡོ ཨཱརུལ༹ྷོ ཨེཝ ཙ བུདྡྷཝཙནསྶ ཨཏྠསཾཝཎྞནཱབྷཱུཏོ ཀཐཱམགྒོ མཧིནྡཏྠེརེན ཏམྦཔཎྞིདཱིཔཾ ཨཱབྷཏོ པཙྪཱ ཏམྦཔཎྞིཡེཧི མཧཱཐེརེཧི སཱིཧལ༹བྷཱསཱཡ ཋཔིཏོ ནིཀཱཡནྟརལདྡྷིསངྐརཔརིཧརཎཏྠཾ། ཨཏྟནོམཏི ནཱམ ཐེརཝཱདོ། ནཡགྒཱཧེནཱཏི སུཏྟཱདིཏོ ལབྦྷམཱནནཡགྒཧཎེན། ཨནུབུདྡྷིཡཱཏི སུཏྟཱདཱིནིཡེཝ ཨནུགཏབུདྡྷིཡཱ། ཨཏྟནོ པཊིབྷཱནནྟི ཨཏྟནོ ཨེཝ ཏསྶ ཨཏྠསྶ ཝུཏྟནཡེན ཨུཔཊྛཱནཾ, ཡཐཱཨུཔཊྛིཏཱ ཨཏྠཱ ཨེཝ ཏཐཱ ཝུཏྟཱ། སམེནྟམེཝ གཧེཏབྦནྟི ཡཐཱ སུཏྟེན སཾསནྡཏི, ཨེཝཾ མཧཱཔདེསཏོ ཨཏྠཱ ཨུདྡྷརིཏབྦཱཏི དསྶེཏི། པམཱདཔཱཋཝསེན ཨཱཙརིཡཝཱདསྶ ཀདཱཙི པཱལི༹ཡཱ ཨསཾསནྡནཱཔི སིཡཱ, སོ ན གཧེཏབྦོཏི དསྶེནྟོ ཨཱཧ ‘‘ཨཱཙརིཡཝཱདོཔི སུཏྟེན སམེནྟོཡེཝ གཧེཏབྦོ’’ཏི། སབྦདུབྦལཱ པུགྒལསྶ སཡཾ པཊིབྷཱནབྷཱཝཏོ། ཏཐཱ ཙ སཱཔི གཧེཏབྦཱ, ཀཱིདིསཱི? སུཏྟེན སམེནྟཱ ཡེཝཱཏི ཡོཛནཱ། ཏཱསཱུཏི ཏཱིསུ སངྒཱིཏཱིསུ། ‘‘ཨཱགཏམེཝ པམཱཎ’’ནྟི ཨིམིནཱ མཧཱཀསྶཔཱདཱིཧི སངྒཱིཏམེཝ ‘‘སུཏྟ’’ནྟི ཨིདྷཱདྷིཔྤེཏནྟི ཏདཉྙསྶ སུཏྟབྷཱཝམེཝ པཊིཀྑིཔཏི། ཏདཏྠཱ ཨེཝ ཧི ཏིསྶོ སངྒཱིཏིཡོ། ཏཏྠཱཏི གཱརཡ྄ཧསུཏྟེ། ན ཙེཝ སུཏྟེ ཨོསརནྟི, ན ཙ ཝིནཡེ སནྡིསྶནྟཱིཏི ཝེདིཏབྦཱནི ཏསྶ ཨསུཏྟབྷཱཝཏོ ཏེན ‘‘ཨནུལོམཀཔྤིཡཾ སུཏྟེན སམེནྟམེཝ གཧེཏབྦ’’ནྟི ཝུཏྟཾ ཨེཝཏྠཾ ནིགམནཝསེན ནིདསྶེཏི། སབྦཏྠ ‘‘ན ཨིཏར’’ནྟི ཝཙནཾ ཏཏྠ ཏཏྠ གཧིཏཱཝདྷཱརཎཕལདསྶནཾ དཊྛབྦཾ།

    Vinayamahāpadeso kappiyānulomavidhānato nippariyāyato anulomakappiyaṃ nāma, mahāpadesabhāvena pana taṃsadisatāya suttantamahāpadesesupi ‘‘anulomakappiya’’nti ayaṃ aṭṭhakathāvohāro. Yadipi tattha tattha bhagavatā pavattitapakiṇṇakadesanāva aṭṭhakathā, sā pana dhammasaṅgāhakehi paṭhamaṃ tīṇi piṭakāni saṅgāyitvā tassa atthavaṇṇanānurūpeneva vācanāmaggaṃ āropitattā ‘‘ācariyavādo’’ti vuccati ācariyā vadanti saṃvaṇṇenti pāḷiṃ etenāti. Tenāha ‘‘ācariyavādo nāma aṭṭhakathā’’ti. Tisso saṅgītiyo āruḷho eva ca buddhavacanassa atthasaṃvaṇṇanābhūto kathāmaggo mahindattherena tambapaṇṇidīpaṃ ābhato pacchā tambapaṇṇiyehi mahātherehi sīhaḷabhāsāya ṭhapito nikāyantaraladdhisaṅkarapariharaṇatthaṃ. Attanomati nāma theravādo. Nayaggāhenāti suttādito labbhamānanayaggahaṇena. Anubuddhiyāti suttādīniyeva anugatabuddhiyā. Attano paṭibhānanti attano eva tassa atthassa vuttanayena upaṭṭhānaṃ, yathāupaṭṭhitā atthā eva tathā vuttā. Samentameva gahetabbanti yathā suttena saṃsandati, evaṃ mahāpadesato atthā uddharitabbāti dasseti. Pamādapāṭhavasena ācariyavādassa kadāci pāḷiyā asaṃsandanāpi siyā, so na gahetabboti dassento āha ‘‘ācariyavādopi suttena samentoyevagahetabbo’’ti. Sabbadubbalā puggalassa sayaṃ paṭibhānabhāvato. Tathā ca sāpi gahetabbā, kīdisī? Suttena samentā yevāti yojanā. Tāsūti tīsu saṅgītīsu. ‘‘Āgatameva pamāṇa’’nti iminā mahākassapādīhi saṅgītameva ‘‘sutta’’nti idhādhippetanti tadaññassa suttabhāvameva paṭikkhipati. Tadatthā eva hi tisso saṅgītiyo. Tatthāti gārayhasutte. Na ceva sutte osaranti, na ca vinaye sandissantīti veditabbāni tassa asuttabhāvato tena ‘‘anulomakappiyaṃ suttena samentameva gahetabba’’nti vuttaṃ evatthaṃ nigamanavasena nidasseti. Sabbattha ‘‘na itara’’nti vacanaṃ tattha tattha gahitāvadhāraṇaphaladassanaṃ daṭṭhabbaṃ.

    ཀམྨཱརཔུཏྟཙུནྡཝཏྠུཝཎྞནཱ

    Kammāraputtacundavatthuvaṇṇanā

    ༡༨༩. སཱུཀརམདྡཝནྟི ཝནཝརཱཧསྶ མུདུམཾསཾ། ཡསྨཱ ཙུནྡོ ཨརིཡསཱཝཀོ སོཏཱཔནྣོ, ཨཉྙེ ཙ བྷགཝཏོ, བྷིཀྑུསངྒྷསྶ ཙ ཨཱཧཱརཾ པཊིཡཱདེནྟཱ ཨནཝཛྫམེཝ པཊིཡཱདེནྟི, ཏསྨཱ ཝུཏྟཾ ‘‘པཝཏྟམཾས’’ནྟི། ཏཾ ཀིརཱཏི ‘‘ནཱཏིཏརུཎསྶཱ’’ཏིཨཱདིནཱ ཝུཏྟཝིསེསཾ། ཏཐཱ ཧི ཏཾ ‘‘མུདུ ཙེཝ སིནིདྡྷཉྩཱ’’ཏི ཝུཏྟཾ། མུདུམཾསབྷཱཝཏོ ཧི ཨབྷིསངྑརཎཝིསེསེན ཙ ‘‘མདྡཝ’’ནྟི ཝུཏྟཾ། ཨོཛཾ པཀྑིཔིཾསུ ‘‘ཨཡཾ བྷགཝཏོ པཙྪིམཀོ ཨཱཧཱརོ’’ཏི པུཉྙཝིསེསཱཔེཀྑཱཡ, ཏཾ པན ཏཐཱཔཀྑིཏྟདིབྦོཛཏཱཡ གརུཏརཾ ཛཱཏཾ།

    189.Sūkaramaddavanti vanavarāhassa mudumaṃsaṃ. Yasmā cundo ariyasāvako sotāpanno, aññe ca bhagavato, bhikkhusaṅghassa ca āhāraṃ paṭiyādentā anavajjameva paṭiyādenti, tasmā vuttaṃ ‘‘pavattamaṃsa’’nti. Taṃ kirāti ‘‘nātitaruṇassā’’tiādinā vuttavisesaṃ. Tathā hi taṃ ‘‘mudu ceva siniddhañcā’’ti vuttaṃ. Mudumaṃsabhāvato hi abhisaṅkharaṇavisesena ca ‘‘maddava’’nti vuttaṃ. Ojaṃ pakkhipiṃsu ‘‘ayaṃ bhagavato pacchimako āhāro’’ti puññavisesāpekkhāya, taṃ pana tathāpakkhittadibbojatāya garutaraṃ jātaṃ.

    ཨཉྙེ ཡཾ དུཛྫཱིརཾ, ཏཾ ཨཛཱནནྟཱ ‘‘ཀསྶཙི ཨདཏྭཱ ཝིནཱསིཏ’’ནྟི ཨུཔཝདེཡྻུནྟི པརཱུཔཝཱདམོཙནཏྠཾ བྷགཝཱ ‘‘ནཱཧཾ ཏ’’ནྟིཨཱདིནཱ སཱིཧནཱདཾ ནདཏི།

    Aññe yaṃ dujjīraṃ, taṃ ajānantā ‘‘kassaci adatvā vināsita’’nti upavadeyyunti parūpavādamocanatthaṃ bhagavā ‘‘nāhaṃ ta’’ntiādinā sīhanādaṃ nadati.

    ༡༩༠. ཀཐཾ པནཱཡཾ སཱིཧནཱདོ ནནུ ཏཾ བྷགཝཏོཔི སམྨཱཔརིཎཱམཾ ན གཏནྟི? ནཡིདཾ ཨེཝཾ དཊྛབྦཾ, ཡསྨཱ ‘‘སམྨདེཝ ཏཾ བྷགཝཏོ པརིཎཱམཾ གཏ’’ནྟི ཝཏྟུཾ ཨརཧཏི ཏཔྤཙྩཡཱ ཨུཔྤནྣསྶ ཝིཀཱརསྶ ཨབྷཱཝཏོ, ཨཉྙཔཙྩཡསྶ ཙ ཝིཀཱརསྶ མུདུབྷཱཝཾ ཨཱཔཱདིཏཏྟཱ། ཏེནཱཧ ‘‘ན པན བྷུཏྟཔྤཙྩཡཱ’’ཏིཨཱདི། ན ཧི བྷགཝཱ, ཨཉྙེ ཝཱ པན ཁཱིཎཱསཝཱ ནཝཝེདནུཔྤཱདནཝསེན ཨཱཧཱརཾ པརིབྷུཉྫནྟི ཨཊྛངྒསམནྣཱགཏམེཝ ཀཏྭཱ ཨཱཧཱརསྶ ཨུཔབྷུཉྫནཏོ། ཡདི ཨེཝཾ ཀསྨཱ པཱལི༹ཡཾ ‘‘བྷཏྟཾ བྷུཏྟཱཝིསྶ ཁརོ ཨཱབཱདྷོ ཨུཔྤཛྫཱི’’ཏིཨཱདི ཝུཏྟཾ? ཏཾ བྷོཛནུཏྟརཀཱལཾ ཨུཔྤནྣཏྟཱ ཝུཏྟཾ། ‘‘ན པན བྷུཏྟཔཙྩཡཱ’’ཏི ཝུཏྟོ ཝཱཡམཏྠོ ཨཊྛཀཐཱཡཾ། ཀཏུཔཙིཏསྶ ལདྡྷོཀཱསསྶ ཀམྨསྶ ཝསེན བལཝཏིཔི རོགེ ཨུཔྤནྣེ གརུསིནིདྡྷབྷོཛནཔྤཙྩཡཱ ཝེདནཱནིགྒཧོ ཛཱཏོ, ཏེནཱཧ ‘‘ཡདི ཧཱི’’ཏིཨཱདི། པཏྠིཏཊྛཱནེཏི ཨིཙྪིཏཊྛཱནེ, ཨིཙྪཱ ཙསྶ ཏཏྠ གནྟྭཱ ཝིནེཏབྦཝེནེཡྻཱཔེཀྑཱ དཊྛབྦཱ། གཱཐཱཡམྤི ‘‘སུཏ’’ནྟི ཨིམིནཱ སུཏམཏྟཾ, པརེསཾ ཝཙནམཏྟམེཏཾ, ན པན བྷོཛནཔྤཙྩཡཱ ཨཱབཱདྷཾ ཕུསི དྷཱིརོཏི དསྶེཏི།

    190. Kathaṃ panāyaṃ sīhanādo nanu taṃ bhagavatopi sammāpariṇāmaṃ na gatanti? Nayidaṃ evaṃ daṭṭhabbaṃ, yasmā ‘‘sammadeva taṃ bhagavato pariṇāmaṃ gata’’nti vattuṃ arahati tappaccayā uppannassa vikārassa abhāvato, aññapaccayassa ca vikārassa mudubhāvaṃ āpāditattā. Tenāha ‘‘na pana bhuttappaccayā’’tiādi. Na hi bhagavā, aññe vā pana khīṇāsavā navavedanuppādanavasena āhāraṃ paribhuñjanti aṭṭhaṅgasamannāgatameva katvā āhārassa upabhuñjanato. Yadi evaṃ kasmā pāḷiyaṃ ‘‘bhattaṃ bhuttāvissa kharo ābādho uppajjī’’tiādi vuttaṃ? Taṃ bhojanuttarakālaṃ uppannattā vuttaṃ. ‘‘Na pana bhuttapaccayā’’ti vutto vāyamattho aṭṭhakathāyaṃ. Katupacitassa laddhokāsassa kammassa vasena balavatipi roge uppanne garusiniddhabhojanappaccayā vedanāniggaho jāto, tenāha ‘‘yadi hī’’tiādi. Patthitaṭṭhāneti icchitaṭṭhāne, icchā cassa tattha gantvā vinetabbaveneyyāpekkhā daṭṭhabbā. Gāthāyampi ‘‘suta’’nti iminā sutamattaṃ, paresaṃ vacanamattametaṃ, na pana bhojanappaccayā ābādhaṃ phusi dhīroti dasseti.

    པཱནཱིཡཱཧརཎཝཎྞནཱ

    Pānīyāharaṇavaṇṇanā

    ༡༩༡. པསནྣབྷཱཝེན ཨུདཀསྶ ཨཙྪབྷཱཝོ ཝེདིཏབྦོཏི ཨཱཧ ‘‘ཨཙྪོདཀཱཏི པསནྣོདཀཱ’’ཏི། སཱདུརསཏྟཱ སཱཏཏཱཏི ཨཱཧ ‘‘མདྷུརོདཀཱ’’ཏི། ཏནུཀམེཝ སལིལཾ ཝིསེསཏོ སཱིཏལཾ, ན བཧལནྟི ཨཱཧ ‘‘ཏནུསཱིཏལསལིལཱ’’ཏི། ནིཀྐདྡམཱཏི སེཏབྷཱཝསྶ ཀཱརཎམཱཧ། པངྐཙིཀྑལླཱདིཝསེན ཧི ཨུདཀསྶ ཝིཝཎྞཏཱ, སབྷཱཝཏོ པན ཏཾ སེཏཝཎྞཾ ཨེཝཱཏི།

    191. Pasannabhāvena udakassa acchabhāvo veditabboti āha ‘‘acchodakāti pasannodakā’’ti. Sādurasattā sātatāti āha ‘‘madhurodakā’’ti. Tanukameva salilaṃ visesato sītalaṃ, na bahalanti āha ‘‘tanusītalasalilā’’ti. Nikkaddamāti setabhāvassa kāraṇamāha. Paṅkacikkhallādivasena hi udakassa vivaṇṇatā, sabhāvato pana taṃ setavaṇṇaṃ evāti.

    པུཀྐུསམལླཔུཏྟཝཏྠུཝཎྞནཱ

    Pukkusamallaputtavatthuvaṇṇanā

    ༡༩༢. དྷུརཝཱཏེཏི པཊིམུཁཝཱཏེ། དཱིགྷཔིངྒལོཏི དཱིགྷོ ཧུཏྭཱ པིངྒལཙཀྑུཀོ། པིངྒལཀྑིཀོ ཧི སོ ‘‘ཨཱལཱ༹རོ’’ཏི པཉྙཱཡིཏྠ། ཨེཝརཱུཔནྟི དཀྑཏི ཀརིསྶཏི བྷཝིསྶཏཱིཏི ཨཱིདིསཾ། ཨཱིདིསེསཱུཏི ཡཏྲ ཡཾཙཱཏི ཨེཝརཱུཔནིཔཱཏསདྡཡུཏྟཊྛཱནེསུ།

    192.Dhuravāteti paṭimukhavāte. Dīghapiṅgaloti dīgho hutvā piṅgalacakkhuko. Piṅgalakkhiko hi so ‘‘āḷāro’’ti paññāyittha. Evarūpanti dakkhati karissati bhavissatīti īdisaṃ. Īdisesūti yatra yaṃcāti evarūpanipātasaddayuttaṭṭhānesu.

    ༡༩༣. ཝིཙརནྟིཡོ མེགྷགབྦྷཏོ ནིཙྪརནྟིཡོ ཝིཡ ཧོནྟཱིཏི ཝུཏྟཾ ‘‘ནིཙྪརནྟཱིསཱུཏི ཝིཙརནྟཱིསཱུ’’ཏི། ནཝཝིདྷཱཡཱཏི ནཝཔྤཀཱརཱཡ། ནཝསུ ཧི པཀཱརེསུ ཨེཀཝིདྷཱཔི ཨསནི ཏཔྤརིཡཱཔནྣཏཱཡ ‘‘ནཝཝིདྷཱ’’ ཏྭེཝ ཝུཙྩཏི། ཨཱིདིསཱི ཧི ཨེསཱ རུལ༹ྷི ཨཊྛཝིམོཀྑཔཏྟིཔི སམཉྙཱ ཝིཡ། ཨསཉྙཾ ཀརོཏི, ཡོ ཏསྶཱ སདྡེན , ཏེཛསཱ ཙ ཨཛ྄ཛྷོཏྠཊོ། ཨེཀཾ ཙཀྐནྟི ཨེཀཾ མཎྜལཾ། སངྐཱརཾ ཏཱིརེནྟཱི པརིཙྪིཛྫནྟཱི ཝིཡ དསྶེཏཱིཏི སཏེརཱ། གགྒརཱཡམཱནཱཏི གགྒརཱཏིསདྡཾ ཀརོནྟཱི, ཨནུརཝདསྶནཉྷེཏཾ། ཀཔིསཱིསཱཏི ཀཔིསཱིསཱཀཱརཝཏཱི། མཙྪཝིལོལིཀཱཏི ཨུདཀེ པརིཔྥནྡམཱནམཙྪོ ཝིཡ ཝིལུལི༹ཏཱཀཱརཱ། ཀུཀྐུཊསདིསཱཏི པསཱརིཏཔཀྑཀུཀྐུཊཱཀཱརཱ། ནངྒལསྶ ཀསྶནཀཱལེ ཀསྶཀཱནཾ ཧཏྠེན གཧེཏབྦཊྛཱནེ མཎིཀཱ ཧོཏི, ཏཾ ཨུཔཱདཱཡ ནངྒལཾ ‘‘དཎྜམཎིཀཱ’’ཏི ཝུཙྩཏི, ཏསྨཱ དཎྜམཎིཀཱཀཱརཱ དཎྜམཎིཀཱ། ཏེནཱཧ ‘‘ནངྒལསདིསཱ’’ཏི། དེཝེ ཝསྶནྟེཔི སཛོཏིབྷཱུཏཏཱཡ ཨུདཀེན ཨཏེམེཏབྦཏོ མཧཱསནི ‘‘སུཀྑཱསནཱི’’ཏི ཝུཏྟཱ། ཏེནཱཧ ‘‘པཏིཏཊྛཱནཾ སམུགྒྷཱཊེཏཱི’’ཏི།

    193. Vicarantiyo meghagabbhato niccharantiyo viya hontīti vuttaṃ ‘‘niccharantīsūti vicarantīsū’’ti. Navavidhāyāti navappakārāya. Navasu hi pakāresu ekavidhāpi asani tappariyāpannatāya ‘‘navavidhā’’ tveva vuccati. Īdisī hi esā ruḷhi aṭṭhavimokkhapattipi samaññā viya. Asaññaṃ karoti, yo tassā saddena , tejasā ca ajjhotthaṭo. Ekaṃ cakkanti ekaṃ maṇḍalaṃ. Saṅkāraṃ tīrentī paricchijjantī viya dassetīti saterā. Gaggarāyamānāti gaggarātisaddaṃ karontī, anuravadassanañhetaṃ. Kapisīsāti kapisīsākāravatī. Macchavilolikāti udake paripphandamānamaccho viya viluḷitākārā. Kukkuṭasadisāti pasāritapakkhakukkuṭākārā. Naṅgalassa kassanakāle kassakānaṃ hatthena gahetabbaṭṭhāne maṇikā hoti, taṃ upādāya naṅgalaṃ ‘‘daṇḍamaṇikā’’ti vuccati, tasmā daṇḍamaṇikākārā daṇḍamaṇikā. Tenāha ‘‘naṅgalasadisā’’ti. Deve vassantepi sajotibhūtatāya udakena atemetabbato mahāsani ‘‘sukkhāsanī’’ti vuttā. Tenāha ‘‘patitaṭṭhānaṃ samugghāṭetī’’ti.

    བྷུསཱགཱརཀེཏི བྷུསམཡེ ཨགཱརཀེ། ཏཏྠ ཀིར མཧནྟཾ པལཱལཔུཉྫཾ ཨབྦྷནྟརཏོ པལཱལཾ ནིཀྐཌྜྷིཏྭཱ སཱལཱསདིསཾ པབྦཛིཏཱནཾ ཝསནཡོགྒཊྛཱནཾ ཀཏཾ, ཏདཱ བྷགཝཱ ཏཏྠ ཝསི, ཏཾ པན ཁལམཎྜལཾ སཱལཱསདིསནྟི ཨཱཧ ‘‘ཁལསཱལཱཡ’’ནྟི། ཨེཏྠཱཏི ཧེཏུམྷི བྷུམྨཝཙནནྟི ཨཱཧ ‘‘ཨེཏསྨིཾ ཀཱརཎེ’’ཏི, ཨསནིཔཱཏེན ཚནྣཾ ཛནཱནཾ ཧཏཀཱརཎེཏི ཨཏྠོ། སོ ཏྭཾ བྷནྟེཏི ཨཡམེཝ ཝཱ པཱཋོ།

    Bhusāgāraketi bhusamaye agārake. Tattha kira mahantaṃ palālapuñjaṃ abbhantarato palālaṃ nikkaḍḍhitvā sālāsadisaṃ pabbajitānaṃ vasanayoggaṭṭhānaṃ kataṃ, tadā bhagavā tattha vasi, taṃ pana khalamaṇḍalaṃ sālāsadisanti āha ‘‘khalasālāya’’nti. Etthāti hetumhi bhummavacananti āha ‘‘etasmiṃ kāraṇe’’ti, asanipātena channaṃ janānaṃ hatakāraṇeti attho. So tvaṃ bhanteti ayameva vā pāṭho.

    ༡༩༤. སིངྒཱི ནཱམ ཀིར ཨུཏྟམཾ ཨཏིཝིཡ པབྷསྶརཾ བུདྡྷཱནཾ ཚཝིཝཎྞོབྷཱསཾ དེཝལོཀཏོ ཨཱགཏསུཝཎྞཾ། ཏེནེཝཱཧ ‘‘སིངྒཱིསུཝཎྞཝཎྞ’’ནྟི། ‘‘ཀིཾ པན ཐེརོ ཏཾ གཎྷཱི’’ཏི སཡམེཝ པུཙྪཾ སམུཊྛཱཔེཏྭཱ ཏཏྠ ཀཱརཎཾ དསྶེནྟོ ‘‘ཀིཉྩཱཔཱི’’ཏིཨཱདིམཱཧ། ཏེནེཝ ཀཱརཎེནཱཏི ཨུཔཊྛཱཀཊྛཱནསྶ མཏྠཀཔྤཏྟི, པརེསཾ ཝཙནོཀཱསཔཙྪེདནཾ, ཏེན ཝཏྠེན སཏྠུ པཱུཛནཾ, སཏྠུ ཨཛ྄ཛྷཱསཡཱནུཝཏྟནནྟི ཨིམིནཱ ཏེནེཝ ཡཐཱཝུཏྟེན ཙཏུབྦིདྷེན ཀཱརཎེན།

    194. Siṅgī nāma kira uttamaṃ ativiya pabhassaraṃ buddhānaṃ chavivaṇṇobhāsaṃ devalokato āgatasuvaṇṇaṃ. Tenevāha ‘‘siṅgīsuvaṇṇavaṇṇa’’nti. ‘‘Kiṃ pana thero taṃ gaṇhī’’ti sayameva pucchaṃ samuṭṭhāpetvā tattha kāraṇaṃ dassento ‘‘kiñcāpī’’tiādimāha. Teneva kāraṇenāti upaṭṭhākaṭṭhānassa matthakappatti, paresaṃ vacanokāsapacchedanaṃ, tena vatthena satthu pūjanaṃ, satthu ajjhāsayānuvattananti iminā teneva yathāvuttena catubbidhena kāraṇena.

    ༡༩༥. ཐེརོ ཙ ཏཱཝདེཝ ཏཾ སིངྒཱིཝཎྞཾ མཊྛདུསྶཾ བྷགཝཏོ ཨུཔནཱམེསི ‘‘པཊིགྒཎྷཏུ མེ བྷནྟེ བྷགཝཱ ཨིམཾ མཊྛདུསྶཾ, ཏཾ མམསྶ དཱིགྷརཏྟཾ ཧིཏཱཡ སུཁཱཡཱ’’ཏི། པཊིགྒཧེསི བྷགཝཱ, པཊིགྒཧེཏྭཱཝ ནཾ པརིབྷུཉྫི ། ཏེན ཝུཏྟཾ ‘‘བྷགཝཱཔི ཏཏོ ཨེཀཾ ནིཝཱསེསི, ཨེཀཾ པཱརུཔཱི’’ཏི། ཏཱཝདེཝ ཀིར ཏཾ བྷིཀྑཱུ ཨོཝཊྚིཀརཎམཏྟེན ཏུནྣཀམྨཾ ནིཊྛཱཔེཏྭཱ ཐེརསྶ ཨུཔནེསུཾ, ཐེརོ བྷགཝཏོ ཨུཔནཱམེསི། ཧཏཙྩིཀཾ ཝིཡཱཏི པཊིཧཏཔྤབྷཾ, ཝིཡ-སདྡོ ནིཔཱཏམཏྟཾ། བྷགཝཏོ ཧི སརཱིརཔྤབྷཱཧི ཨབྷིབྷུཡྻམཱནཱ ཏསྶ ཝཏྠཡུགསྶ པབྷསྶརཏཱ ནཱཧོསི། ཨནྟནྟེནེཝཱཏི ཨནྟོ ཨནྟོ ཨེཝ, ཨབྦྷནྟརཏོ ཨེཝཱཏི ཨཏྠོ། ཏེནཱཧ ‘‘བཧིཔནསྶ པབྷཱ ནཏྠཱི’’ཏི།

    195. Thero ca tāvadeva taṃ siṅgīvaṇṇaṃ maṭṭhadussaṃ bhagavato upanāmesi ‘‘paṭiggaṇhatu me bhante bhagavā imaṃ maṭṭhadussaṃ, taṃ mamassa dīgharattaṃ hitāya sukhāyā’’ti. Paṭiggahesi bhagavā, paṭiggahetvāva naṃ paribhuñji . Tena vuttaṃ ‘‘bhagavāpi tato ekaṃ nivāsesi, ekaṃ pārupī’’ti. Tāvadeva kira taṃ bhikkhū ovaṭṭikaraṇamattena tunnakammaṃ niṭṭhāpetvā therassa upanesuṃ, thero bhagavato upanāmesi. Hataccikaṃ viyāti paṭihatappabhaṃ, viya-saddo nipātamattaṃ. Bhagavato hi sarīrappabhāhi abhibhuyyamānā tassa vatthayugassa pabhassaratā nāhosi. Antantenevāti anto anto eva, abbhantarato evāti attho. Tenāha ‘‘bahipanassa pabhā natthī’’ti.

    ‘‘པསནྣརཱུཔཾ སམུཊྛཱཔེཏཱི’’ཏི ཨེཏེནེཏསྶ ཨཱཧཱརསྶ བྷུཏྟཔྤཙྩཡཱ ན སོ རོགོཏི ཨཡམཏྠོ དཱིཔིཏོ། དྭཱིསུ ཀཱལེསུ ཨེཝཾ ཧོཏི དྭིནྣཾ ནིབྦཱནདྷཱཏཱུནཾ སམདྷིགམསམཡབྷཱཝཏོ། ཨུཔཝཏྟནེ ཨནྟརེན ཡམཀསཱལཱནནྟི ཨེཏྠ ཝཏྟབྦཾ པརཏོ ཨཱགམིསྶཏི།

    ‘‘Pasannarūpaṃ samuṭṭhāpetī’’ti etenetassa āhārassa bhuttappaccayā na so rogoti ayamattho dīpito. Dvīsu kālesu evaṃ hoti dvinnaṃ nibbānadhātūnaṃ samadhigamasamayabhāvato. Upavattane antarena yamakasālānanti ettha vattabbaṃ parato āgamissati.

    ༡༩༦. སབྦཾ སུཝཎྞཝཎྞམེཝ ཨཧོསི ཨཏིཝིཡ པརིསུདྡྷཱཡ པབྷསྶརཱཡ ཨེཀགྒྷནཱཡ བྷགཝཏོ སརཱིརཔྤབྷཱཡ ནིརནྟརཾ ཨབྷིབྷཱུཏཏྟཱ།

    196.Sabbaṃsuvaṇṇavaṇṇameva ahosi ativiya parisuddhāya pabhassarāya ekagghanāya bhagavato sarīrappabhāya nirantaraṃ abhibhūtattā.

    དྷམྨེཏི པརིཡཏྟིདྷམྨེ། པཝཏྟཱཏི པཱཝཙནབྷཱཝེན དེསེཏཱ། པུརཏོཝ ནིསཱིདི ཨོཝཱདཔྤཊིཀརཎབྷཱཝཏོ།

    Dhammeti pariyattidhamme. Pavattāti pāvacanabhāvena desetā. Puratova nisīdi ovādappaṭikaraṇabhāvato.

    ༡༩༧. དཱནཱནིསཾསསངྑཱཏཱ ལཱབྷཱཏི ཝཎྞདཱནབལདཱནཱདིབྷེདཱ དཱནསྶ ཨཱནིསཾསསཉྙིཏཱ དིཊྛདྷམྨིཀཱ, སམྤརཱཡིཀཱ ཙ ལཱབྷཱ ཨིཙྪིཏབྦཱ། ཏེ ཨལཱབྷཱཏི ཏེ སབྦེ ཏུཡ྄ཧཾ ཨལཱབྷཱ, ལཱབྷཱ ཨེཝ ན ཧོནྟི། དིཊྛེཝ དྷམྨེ པཙྩཀྑབྷཱུཏེ ཨིམསྨིཾཡེཝ ཨཏྟབྷཱཝེ བྷཝཱ དིཊྛདྷམྨིཀཱ། སམྤརེཏབྦཏོ པེཙྩ གནྟབྦཏོ ‘‘སམྤརཱཡོ’’ཏི ལདྡྷནཱམེ པརལོཀེ བྷཝཱ སམྤརཱཡིཀཱ། དིཊྛདྷམྨིཀཱ ཙ སམྤརཱཡིཀཱ ཙ དིཊྛདྷམྨིཀསམྤརཱཡིཀཱ། དཱནཱནིསཾསསངྑཱཏཱ ལཱབྷཱཏི དཱནཱནིསཾསབྷཱུཏཱ ལཱབྷཱ། སབྦཐཱ སམམེཝ ཧུཏྭཱ སམཾ ཕལཾ ཨེཏེསཾ ན ཨེཀདེསེནཱཏི སམསམཕལཱ། པིཎྜཔཱཏཱཏི ཏབྦིསཡཾ དཱནམཡཾ པུཉྙམཱཧ།

    197.Dānānisaṃsasaṅkhātālābhāti vaṇṇadānabaladānādibhedā dānassa ānisaṃsasaññitā diṭṭhadhammikā, samparāyikā ca lābhā icchitabbā. Te alābhāti te sabbe tuyhaṃ alābhā, lābhā eva na honti. Diṭṭheva dhamme paccakkhabhūte imasmiṃyeva attabhāve bhavā diṭṭhadhammikā. Samparetabbato pecca gantabbato ‘‘samparāyo’’ti laddhanāme paraloke bhavā samparāyikā. Diṭṭhadhammikā ca samparāyikā ca diṭṭhadhammikasamparāyikā. Dānānisaṃsasaṅkhātā lābhāti dānānisaṃsabhūtā lābhā. Sabbathā samameva hutvā samaṃ phalaṃ etesaṃ na ekadesenāti samasamaphalā. Piṇḍapātāti tabbisayaṃ dānamayaṃ puññamāha.

    ཡདི ཁེཏྟཝསེན ནེསཾ སམཕལཏཱ ཨདྷིཔྤེཏཱ, སཏིཔི ཨེཀསནྟཱནབྷཱཝེ པུཐུཛྫནཨརཧནྟབྷཱཝསིདྡྷཾ ནནུ ཏེསཾ ཁེཏྟཾ ཝིསིཊྛནྟི དསྶེཏུཾ ‘‘ནནུ ཙཱ’’ཏིཨཱདིམཱཧ། པརིནིབྦཱནསམཏཱཡཱཏི ཀིལེསཔརིནིབྦཱནཁནྡྷཔརིནིབྦཱནབྷཱཝེན པརིནིབྦཱནསམཏཱཡ། ‘‘པརིབྷུཉྫིཏྭཱ པརིནིབྦུཏོ’’ཏི ཨེཏེན ཡཐཱ པཎཱིཏཔིཎྜཔཱཏཔརིབྷོགཱུཔཏྠམྦྷིཏརཱུཔཀཱཡསནྣིསྶཡོ དྷམྨཀཱཡོ སུཁེནེཝ ཀིལེསེ པརིཙྩཛི, བྷོཛནསཔྤཱཡསཾསིདྡྷིཡཱ ཨེཝཾ སུཁེནེཝ ཁནྡྷེ པརིཙྩཛཱིཏི ཨེཝཾ ཀིལེསཔརིཙྩཱགསྶ, ཁནྡྷཔརིཙྩཱགསྶ ཙ སུཁསིདྡྷིནིམིཏྟཏཱཡ ཨུབྷིནྣཾ པིཎྜཔཱཏཱནཾ སམཕལཏཱ ཛོཏིཏཱ། ‘‘པིཎྜཔཱཏསཱིསེན ཙ པིཎྜཔཱཏདཱནཾ ཛོཏིཏ’’ནྟི ཝུཏྟོ ཝཱཡམཏྠོ། ཡཐཱ ཧི སུཛཱཏཱཡ ‘‘ཨིམཾ ཨཱཧཱརཾ ནིསྶཱཡ མཡ྄ཧཾ དེཝཏཱཡ ཝཎྞསུཁབལཱདིགུཎཱ སམྨདེཝ སམྤཛྫེཡྻུ’’ནྟི ཨུལཱ༹རོ ཨཛ྄ཛྷཱསཡོ ཏདཱ ཨཧོསི, ཨེཝཾ ཙུནྡསྶཔི ཀམྨཱརཔུཏྟསྶ ‘‘ཨིམཾ ཨཱཧཱརཾ ནིསྶཱཡ བྷགཝཏོ ཝཎྞསུཁབལཱདིགུཎཱ སམྨདེཝ སམྤཛྫེཡྻུ’’ནྟི ཨུལཱ༹རོ ཨཛ྄ཛྷཱསཡོཏི ཨེཝམྤི ནེསཾ ཨུབྷིནྣཾ སམཕལཏཱ ཝེདིཏབྦཱ། སཏིཔི ཙཏུཝཱིསཏིཀོཊིསཏསཧསྶསམཱཔཏྟཱིནཾ དེཝསིཀཾ ཝལ༹ཉྫནསམཱཔཏྟིབྷཱཝེ ཡཐཱ པན ཨབྷིསམྦུཛ྄ཛྷནདིཝསེ ཨབྷིནཝཝིཔསྶནཾ པཊྛཔེནྟོ རཱུཔསཏྟཀཱདི (ཝིསུདྡྷི॰ ཊཱི॰ ༢.༧༠༧ ཝིཏྠཱརོ) ཝསེན ཙུདྡསཧཱཀཱརེཧི སནྣེཏྭཱ མཧཱཝིཔསྶནཱམུཁེན ཏཱ སམཱཔཏྟིཡོ སམཱཔཛྫི, ཨེཝཾ པརིནིབྦཱནདིཝསེཔི སབྦཱ ཏཱ སམཱཔཛྫཱིཏི ཨེཝཾ སམཱཔཏྟིསམཏཱཡཔི ཏེསཾ སམཕལཏཱ། ཙུནྡསྶ ཏཱཝ ཨནུསྶརཎཾ ཨུལཱ༹རཏརཾ ཧོཏུ བྷགཝཏོ དིནྣབྷཱཝེན ཨཉྙཐཏྟཱབྷཱཝཏོ, སུཛཱཏཱཡ པན ཀཐཾ དེཝཏཱཡ དིནྣནྟི? ཨེཝཾསཉྙིབྷཱཝཏོཏི ཨཱཧ ‘‘སུཛཱཏཱ ཙཱ’’ཏིཨཱདི། ཨཔརབྷཱགེཏི ཨབྷིསམྦོདྷིཏོ ཨཔརབྷཱགེ། པུན ཨཔརབྷཱགེཏི པརིནིབྦཱནཏོ པརཏོ། དྷམྨསཱིསནྟི དྷམྨཱནཾ མཏྠཀབྷཱུཏཾ ནིབྦཱནཾ། མེ གཧིཏནྟི མམ ཝསེན གཧིཏཾ། ཏེནཱཧ ‘‘མཡ྄ཧཾ ཀིརཱ’’ཏིཨཱདི།

    Yadi khettavasena nesaṃ samaphalatā adhippetā, satipi ekasantānabhāve puthujjanaarahantabhāvasiddhaṃ nanu tesaṃ khettaṃ visiṭṭhanti dassetuṃ ‘‘nanu cā’’tiādimāha. Parinibbānasamatāyāti kilesaparinibbānakhandhaparinibbānabhāvena parinibbānasamatāya. ‘‘Paribhuñjitvā parinibbuto’’ti etena yathā paṇītapiṇḍapātaparibhogūpatthambhitarūpakāyasannissayo dhammakāyo sukheneva kilese pariccaji, bhojanasappāyasaṃsiddhiyā evaṃ sukheneva khandhe pariccajīti evaṃ kilesapariccāgassa, khandhapariccāgassa ca sukhasiddhinimittatāya ubhinnaṃ piṇḍapātānaṃ samaphalatā jotitā. ‘‘Piṇḍapātasīsena ca piṇḍapātadānaṃ jotita’’nti vutto vāyamattho. Yathā hi sujātāya ‘‘imaṃ āhāraṃ nissāya mayhaṃ devatāya vaṇṇasukhabalādiguṇā sammadeva sampajjeyyu’’nti uḷāro ajjhāsayo tadā ahosi, evaṃ cundassapi kammāraputtassa ‘‘imaṃ āhāraṃ nissāya bhagavato vaṇṇasukhabalādiguṇā sammadeva sampajjeyyu’’nti uḷāro ajjhāsayoti evampi nesaṃ ubhinnaṃ samaphalatā veditabbā. Satipi catuvīsatikoṭisatasahassasamāpattīnaṃ devasikaṃ vaḷañjanasamāpattibhāve yathā pana abhisambujjhanadivase abhinavavipassanaṃ paṭṭhapento rūpasattakādi (visuddhi. ṭī. 2.707 vitthāro) vasena cuddasahākārehi sannetvā mahāvipassanāmukhena tā samāpattiyo samāpajji, evaṃ parinibbānadivasepi sabbā tā samāpajjīti evaṃ samāpattisamatāyapi tesaṃ samaphalatā. Cundassa tāva anussaraṇaṃ uḷārataraṃ hotu bhagavato dinnabhāvena aññathattābhāvato, sujātāya pana kathaṃ devatāya dinnanti? Evaṃsaññibhāvatoti āha ‘‘sujātā cā’’tiādi. Aparabhāgeti abhisambodhito aparabhāge. Puna aparabhāgeti parinibbānato parato. Dhammasīsanti dhammānaṃ matthakabhūtaṃ nibbānaṃ. Me gahitanti mama vasena gahitaṃ. Tenāha ‘‘mayhaṃ kirā’’tiādi.

    ཨདྷིཔཏིབྷཱཝོ ཨཱདྷིཔཏེཡྻནྟི ཨཱཧ ‘‘ཛེཊྛབྷཱཝསཾཝཏྟནིཡཀ’’ནྟི།

    Adhipatibhāvo ādhipateyyanti āha ‘‘jeṭṭhabhāvasaṃvattaniyaka’’nti.

    སཾཝརེཏི སཱིལསཾཝརེ། ཝེརནྟི པཱཎཱཏིཔཱཏཱདིཔཉྩཝིདྷཾ ཝེརཾ། ཏཉྷི ཝེརིདྷམྨབྷཱཝཏོ, ཝེརཧེཏུཏཱཡ ཙ ‘‘ཝེར’’ནྟི ཝུཙྩཏི། ཀོསལླཾ ཝུཙྩཏི ཉཱཎཾ, ཏེན ཡུཏྟོ ཀུསལོཏི ཨཱཧ ‘‘ཀུསལོ པན ཉཱཎསམྤནྣོ’’ཏི། ཉཱཎསམྤདཱ ནཱམ ཉཱཎཔཱརིཔཱུརཱི, སཱ ཙ ཨགྒམགྒཝསེན ཝེདིཏབྦཱ, ཨགྒམགྒོ ཙ ནིརཝསེསཏོ ཀིལེསེ པཛཧཏཱིཏི ཨཱཧ ‘‘ཨརིཡམགྒེན…པེ॰… ཛཧཱཏཱི’’ཏི། ཨིམཾ པཱཔཀཾ ཛཧིཏྭཱཏི དཱནེན ཏཱཝ ལོབྷམཙྪརིཡཱདིཔཱཔཀཾ, སཱིལེན པཱཎཱཏིཔཱཏཱདིཔཱཔཀཾ ཛཧིཏྭཱ ཏདངྒཝསེན པཧཱཡ ཏཏོ སམཐཝིཔསྶནཱདྷམྨེཧི ཝིཀྑམྦྷནཝསེན, ཏཏོ མགྒཔཊིཔཱཊིཡཱ སམུཙྪེདཝསེན ཨནཝསེསཾ པཱཔཀཾ པཧཱཡ། ཏཐཱ པཧཱིནཏྟཱ ཨེཝ རཱགཱདཱིནཾ ཁཡཱ ཀིལེསནིབྦཱནེན སབྦསོ ཀིལེསཝཱུཔསམེན ནིབྦུཏོ པརིནིབྦུཏོཏི སཨུཔཱདིསེསཱཡ ནིབྦཱནདྷཱཏུཡཱ དེསནཱཡ ཀཱུཊཾ གཎྷནྟོ ‘‘ཨིཏི ཙུནྡསྶ…པེ॰… སམྤསྶམཱནོ ཨུདཱནཾ ཨུདཱནེསཱི’’ཏི།

    Saṃvareti sīlasaṃvare. Veranti pāṇātipātādipañcavidhaṃ veraṃ. Tañhi veridhammabhāvato, verahetutāya ca ‘‘vera’’nti vuccati. Kosallaṃ vuccati ñāṇaṃ, tena yutto kusaloti āha ‘‘kusalo pana ñāṇasampanno’’ti. Ñāṇasampadā nāma ñāṇapāripūrī, sā ca aggamaggavasena veditabbā, aggamaggo ca niravasesato kilese pajahatīti āha ‘‘ariyamaggena…pe… jahātī’’ti. Imaṃ pāpakaṃ jahitvāti dānena tāva lobhamacchariyādipāpakaṃ, sīlena pāṇātipātādipāpakaṃ jahitvā tadaṅgavasena pahāya tato samathavipassanādhammehi vikkhambhanavasena, tato maggapaṭipāṭiyā samucchedavasena anavasesaṃ pāpakaṃ pahāya. Tathā pahīnattā eva rāgādīnaṃ khayā kilesanibbānena sabbaso kilesavūpasamena nibbuto parinibbutoti saupādisesāya nibbānadhātuyā desanāya kūṭaṃ gaṇhanto ‘‘iti cundassa…pe… sampassamāno udānaṃ udānesī’’ti.

    ཙཏུཏྠབྷཱཎཝཱརཝཎྞནཱ ནིཊྛིཏཱ།

    Catutthabhāṇavāravaṇṇanā niṭṭhitā.

    ཡམཀསཱལཝཎྞནཱ

    Yamakasālavaṇṇanā

    ༡༩༨. ཨེཝཾ ཏཾ ཀུསིནཱརཱཡཾ ཧོཏཱིཏི ཡཐཱ ཨནུརཱདྷཔུརསྶ ཐཱུཔཱརཱམོ དཀྑིཎཔཙྪིམདིསཱཡཾ, ཨེཝཾ ཏཾ ཨུཡྻཱནཾ ཀུསིནཱརཱཡ དཀྑིཎཔཙྪིམདིསཱཡཾ ཧོཏི། ཏསྨཱཏི ཡསྨཱ ནགརཾ པཝིསིཏུཀཱམཱ ཨུཡྻཱནཏོ ཨུཔེཙྩ ཝཏྟནྟི གཙྪནྟི ཨེཏེནཱཏི ‘‘ཨུཔཝཏྟན’’ནྟི ཝུཙྩཏི, ཏཾ སཱལཔནྟིབྷཱཝེན ཋིཏཾ སཱལཝནཾ། ཨནྟརེནཱཏི ཝེམཛ྄ཛྷེ། ཏསྶ ཀིར མཉྩཀསྶཱཏི ཏཏྠ པཉྙཔིཡམཱནསྶ ཏསྶ མཉྩཀསྶ། ཏཏྲཱཔི…པེ॰… ཨེཀོ པཱདབྷཱགསྶ, ཏསྨཱ ‘‘ཨནྟརེན ཡམཀསཱལཱན’’ནྟི ཝུཏྟཾ། སཾསིབྦིཏྭཱཏི ཨཉྙམཉྙཨཱསཏྟཝིཊཔསཱཁཏཱཡ སཾསིབྦིཏྭཱ ཝིཡ། ‘‘ཋིཏསཱཁཱ’’ཏིཔི ཝུཏྟཾ ཨཊྛཀཐཱཡཾ། ཡཾ པན པཱལི༹ཡཾ ‘‘ཨུཏྟརསཱིསཀཾ མཉྩཀཾ པཉྙཔེཧཱི’’ཏི ཝུཏྟཾ, ཏཾ པཙྪིམདསྶནཾ དཊྛུཾ ཨཱགཏཱནཾ དེཝཏཱནཾ དཊྛུཾ ཡོགྱཏཱཝསེན ཝུཏྟཾ། ཀེཙི པན ‘‘ཨུཏྟརདིསཱཝིལོཀནམུཁཾ པུབྦདིསཱསཱིསཀཾ ཀཏྭཱ མཉྩཀཾ པཉྙཔེཧཱིཏི ཨཏྠོ’’ཏི ཝདནྟི, ཏཾ ཏེསཾ མཏིམཏྟཾ།

    198.Evaṃtaṃ kusinārāyaṃ hotīti yathā anurādhapurassa thūpārāmo dakkhiṇapacchimadisāyaṃ, evaṃ taṃ uyyānaṃ kusinārāya dakkhiṇapacchimadisāyaṃ hoti. Tasmāti yasmā nagaraṃ pavisitukāmā uyyānato upecca vattanti gacchanti etenāti ‘‘upavattana’’nti vuccati, taṃ sālapantibhāvena ṭhitaṃ sālavanaṃ. Antarenāti vemajjhe. Tassa kira mañcakassāti tattha paññapiyamānassa tassa mañcakassa. Tatrāpi…pe… eko pādabhāgassa, tasmā ‘‘antarena yamakasālāna’’nti vuttaṃ. Saṃsibbitvāti aññamaññaāsattaviṭapasākhatāya saṃsibbitvā viya. ‘‘Ṭhitasākhā’’tipi vuttaṃ aṭṭhakathāyaṃ. Yaṃ pana pāḷiyaṃ ‘‘uttarasīsakaṃ mañcakaṃ paññapehī’’ti vuttaṃ, taṃ pacchimadassanaṃ daṭṭhuṃ āgatānaṃ devatānaṃ daṭṭhuṃ yogyatāvasena vuttaṃ. Keci pana ‘‘uttaradisāvilokanamukhaṃ pubbadisāsīsakaṃ katvā mañcakaṃ paññapehīti attho’’ti vadanti, taṃ tesaṃ matimattaṃ.

    ཨེཏེ ནཱགཱནམུཏྟམཱཏི ཨེཏེ གོཏྟཏོ གོཙརིཨཱདིནཱམཀཱ ཧཏྠིནཱགེསུ བལེན སེཊྛཏམཱ། མཛ྄ཛྷིམཊྛཀཐཱཡཾ (མ॰ ནི॰ ཨཊྛ॰ ༡.༡༤༨) པན ཀེཙི ཧཏྠིནོ ཨིཏོ ཨཉྙཐཱ ཨཱགཏཱ, སོ པན ནེསཾ ནཱམམཏྟཀཏོ བྷེདོ དཊྛབྦོ།

    Ete nāgānamuttamāti ete gottato gocariādināmakā hatthināgesu balena seṭṭhatamā. Majjhimaṭṭhakathāyaṃ (ma. ni. aṭṭha. 1.148) pana keci hatthino ito aññathā āgatā, so pana nesaṃ nāmamattakato bhedo daṭṭhabbo.

    པརིབྷུཏྟཀཱལཏོ པཊྛཱཡ…པེ॰… པརིཀྑཡཾ གཏཾ, ‘‘ན པན པརིབྷུཏྟཔྤཙྩཡཱ’’ཏི ཧེཊྛཱ ཝུཏྟནཡེནེཝ ཨཏྠོ དཊྛབྦོ། ཙངྒཝཱརེཏི ཨཱུམིཡཾ། ཀཏོཀཱསསྶ ཀམྨསྶ ཝསེན ཡཐཱསམུཊྛིཏོ རོགོ ཨཱརོགྱཾ ཨབྷིམདྡཏཱིཏི ཀཏྭཱ ཨེཏམཏྠཾ དསྶེནྟོ ‘‘ཝིཡཱ’’ཏི ཝུཏྟཾ། ཡསྨཱ བྷགཝཱ ཧེཊྛཱ ཝུཏྟནཡེན ཀཔྤཾ, ཀཔྤཱཝསེསཾ ཝཱ ཋཱཏུཾ སམཏྠོ ཨེཝ, ཏཏྟཀཾ ཀཱལཾ ཋཱནེ པཡོཛནཱབྷཱཝཏོ ཨཱཡུསངྑཱརེ ཨོསྶཛྫིཏྭཱ ཏཱདིསསྶ ཀམྨསྶ ཨོཀཱསཾ ཨདཱསི, ཏསྨཱ ཨེཏམཏྠཾ དསྶེནྟོ ‘‘ཝིཡཱ’’ཏིཔི ཝཏྟུཾ ཡུཛྫཏིཡེཝ།

    Paribhuttakālato paṭṭhāya…pe… parikkhayaṃ gataṃ, ‘‘na pana paribhuttappaccayā’’ti heṭṭhā vuttanayeneva attho daṭṭhabbo. Caṅgavāreti ūmiyaṃ. Katokāsassa kammassa vasena yathāsamuṭṭhito rogo ārogyaṃ abhimaddatīti katvā etamatthaṃ dassento ‘‘viyā’’ti vuttaṃ. Yasmā bhagavā heṭṭhā vuttanayena kappaṃ, kappāvasesaṃ vā ṭhātuṃ samattho eva, tattakaṃ kālaṃ ṭhāne payojanābhāvato āyusaṅkhāre ossajjitvā tādisassa kammassa okāsaṃ adāsi, tasmā etamatthaṃ dassento ‘‘viyā’’tipi vattuṃ yujjatiyeva.

    ཀུསལཾ ཀཱཏབྦཾ མཉྙིསྶནྟི ‘‘ཨེཝཾ མཧཔྥལཾ, ཨེཝཾ མཧཱནིསཾསཾ, མཧཱནུབྷཱཝཉྩ ཏཾ ཀུསལ’’ནྟི།

    Kusalaṃ kātabbaṃ maññissanti ‘‘evaṃ mahapphalaṃ, evaṃ mahānisaṃsaṃ, mahānubhāvañca taṃ kusala’’nti.

    ཨེཀསྶཱཔི སཏྟསྶ ཝཊྚདུཀྑཝཱུཔསམོ བུདྡྷཱནཾ གརུཏརོ ཧུཏྭཱ ཨུཔཊྛཱཏི ཨཏིདུལླབྷབྷཱཝཏོ, ཏསྨཱ ‘‘ཨཔརམྤི པསྶཏཱི’’ཏིཨཱདི ཝུཏྟཾ, སྭཱཡམཏྠོ མཱགཎྜིཡསུཏྟེན (སུ॰ ནི॰ ༨༤༡) དཱིཔེཏབྦོ།

    Ekassāpi sattassa vaṭṭadukkhavūpasamo buddhānaṃ garutaro hutvā upaṭṭhāti atidullabhabhāvato, tasmā ‘‘aparampi passatī’’tiādi vuttaṃ, svāyamattho māgaṇḍiyasuttena (su. ni. 841) dīpetabbo.

    ཏཏིཡཾ པན ཀཱརཎཾ སཏྟཱནཾ ཨུཔྤཛྫནཀཨནཏྠཔརིཧརཎནྟི ཏཾ དསྶེནྟོ པུན ‘‘ཨཔརམྤི པསྶཏཱི’’ཏིཨཱདིམཱཧ།

    Tatiyaṃ pana kāraṇaṃ sattānaṃ uppajjanakaanatthapariharaṇanti taṃ dassento puna ‘‘aparampi passatī’’tiādimāha.

    སཱིཧསེཡྻནྟི། ཨེཏྠ སཡནཾ སེཡྻཱ, སཱིཧསྶ ཝིཡ སེཡྻཱ སཱིཧསེཡྻཱ, ཏཾ སཱིཧསེཡྻཾ། ཨཐ ཝཱ སཱིཧསེཡྻནྟི སེཊྛསེཡྻཾ, ཡདིདཾ ཨཏྠདྭཡཾ པརཏོ ཨཱགམིསྶཏི།

    Sīhaseyyanti. Ettha sayanaṃ seyyā, sīhassa viya seyyā sīhaseyyā, taṃ sīhaseyyaṃ. Atha vā sīhaseyyanti seṭṭhaseyyaṃ, yadidaṃ atthadvayaṃ parato āgamissati.

    ‘‘ཝཱམེན པསྶེན སེནྟཱི’’ཏི ཨེཝཾ ཝུཏྟཱ ཀཱམབྷོགིསེཡྻཱ, དཀྑིཎཔསྶེན སཡཱནོ ནཱམ ནཏྠི དཀྑིཎཧཏྠསྶ སརཱིརགྒཧཎཱདིཡོགཀྑམཏོ, པུརིསཝསེན ཙེཏཾ ཝུཏྟཾ།

    ‘‘Vāmena passena sentī’’ti evaṃ vuttā kāmabhogiseyyā,dakkhiṇapassena sayāno nāma natthi dakkhiṇahatthassa sarīraggahaṇādiyogakkhamato, purisavasena cetaṃ vuttaṃ.

    ཨེཀེན པསྶེན སཡིཏུཾ ན སཀྐོནྟི དུཀྑུཔྤཏྟིཏོ།

    Ekenapassena sayituṃ na sakkonti dukkhuppattito.

    ཨཡཾ སཱིཧསེཡྻཱཏི ཨཡཾ ཨེཝཾ ཝུཏྟཱ སཱིཧསེཡྻཱ། ‘‘ཏེཛུསྶདཏྟཱ’’ཏི ཨིམིནཱ སཱིཧསྶ ཨབྷཱིརུབྷཱཝཾ དསྶེཏི། བྷཱིརུཀཱ ཧི སེསམིགཱ ཨཏྟནོ ཨཱསཡཾ པཝིསིཏྭཱ སནྟཱསཔུབྦཀཾ ཡཐཱ ཏཐཱ སཡནྟི, སཱིཧོ པན ཨབྷཱིརུབྷཱཝཏོ སཏོཀཱརཱི བྷིཀྑུ ཝིཡ སཏིཾ ཨུཔཊྛཱཔེཏྭཱཝ སཡཏི། ཏེནཱཧ ‘‘པུརིམཔཱདེ’’ཏིཨཱདི། དཀྑིཎེ པུརིམཔཱདེ ཝཱམསྶ པུརིམཔཱདསྶ ཋཔནཝསེན དྭེ པུརིམཔཱདེ ཨེཀསྨིཾ ཋཱནེ ཋཔེཏྭཱ། པཙྪིམཔཱདེཏི དྭེ པཙྪིམཔཱདེ། ཝུཏྟནཡེནེཝ ཨིདྷཱཔི ཨེཀསྨིཾ ཋཱནེ པཱདཊྛཔནཾ ཝེདིཏབྦཾ, ཋིཏོཀཱསསལླཀྑཎཾ ཨབྷཱིརུབྷཱཝེནེཝ། ‘‘སཱིསཾ པན ཨུཀྑིཔིཏྭཱ’’ཏིཨཱདིནཱ ཝུཏྟཱ སཱིཧཀིརིཡཱ ཨནུཏྲཱསཔབུཛ྄ཛྷནཾ ཝིཡ ཨབྷཱིརུབྷཱཝསིདྡྷཱ དྷམྨཏཱཝསེནེཝཱཏི ཝེདིཏབྦཱ། སཱིཧཝིཛམྦྷིཏཝིཛམྦྷནཾ ཨཏིཝེལཾ ཨེཀཱཀཱརེན ཋཔིཏཱནཾ སརཱིརཱཝཡཝཱནཾ གམནཱདིཀིརིཡཱསུ ཡོགྱབྷཱཝཱཔཱདནཏྠཾ། ཏིཀྑཏྟུཾ སཱིཧནཱདནདནཾ ཨཔྤེསཀྑམིགཛཱཏཔརིཧརཎཏྠཾ།

    Ayaṃ sīhaseyyāti ayaṃ evaṃ vuttā sīhaseyyā. ‘‘Tejussadattā’’ti iminā sīhassa abhīrubhāvaṃ dasseti. Bhīrukā hi sesamigā attano āsayaṃ pavisitvā santāsapubbakaṃ yathā tathā sayanti, sīho pana abhīrubhāvato satokārī bhikkhu viya satiṃ upaṭṭhāpetvāva sayati. Tenāha ‘‘purimapāde’’tiādi. Dakkhiṇe purimapāde vāmassa purimapādassa ṭhapanavasena dve purimapāde ekasmiṃ ṭhāne ṭhapetvā. Pacchimapādeti dve pacchimapāde. Vuttanayeneva idhāpi ekasmiṃ ṭhāne pādaṭṭhapanaṃ veditabbaṃ, ṭhitokāsasallakkhaṇaṃ abhīrubhāveneva. ‘‘Sīsaṃ pana ukkhipitvā’’tiādinā vuttā sīhakiriyā anutrāsapabujjhanaṃ viya abhīrubhāvasiddhā dhammatāvasenevāti veditabbā. Sīhavijambhitavijambhanaṃ ativelaṃ ekākārena ṭhapitānaṃ sarīrāvayavānaṃ gamanādikiriyāsu yogyabhāvāpādanatthaṃ. Tikkhattuṃ sīhanādanadanaṃ appesakkhamigajātapariharaṇatthaṃ.

    སེཏི ཨབྱཱཝཊབྷཱཝེན པཝཏྟཏི ཨེཏྠཱཏི སེཡྻཱ, ཙཏུཏྠཛ྄ཛྷཱནམེཝ སེཡྻཱ ཙཏུཏྠཛ྄ཛྷཱནསེཡྻཱ། ཀིཾ པན ཏཾ ཙཏུཏྠཛ྄ཛྷཱནནྟི? ཨཱནཱཔཱནཙཏུཏྠཛ྄ཛྷཱནཾ, ཏཏོ ཧི ཝུཊྛཧིཏྭཱ ཝིཔསྶནཾ ཝཌྜྷེཏྭཱ བྷགཝཱ ཨནུཀྐམེན ཨགྒམགྒཾ ཨདྷིགནྟྭཱ ཏཐཱགཏོ ཛཱཏོཏི། ‘‘ཏཡིདཾ པདཊྛཱནཾ ནཱམ, ན སེཡྻཱ, ཏཐཱཔི ཡསྨཱ ‘ཙཏུཏྠཛ྄ཛྷཱནཱ ཝུཊྛཧིཏྭཱ སམནནྟརཱ བྷགཝཱ པརིནིབྦཱཡཱི’ཏི (དཱི॰ ནི॰ ༢.༢༡༩) ཝཀྑཏི, ཏསྨཱ ལོཀིཡཙཏུཏྠཛ྄ཛྷཱནསམཱཔཏྟི ཨེཝ ཏཐཱགཏསེཡྻཱ’’ཏི ཀེཙི, ཨེཝཾ སཏི པརིནིབྦཱནཀཱལིཀཱཝ ཏཐཱགཏསེཡྻཱཏི ཨཱཔཛྫཏི, ན ཙ བྷགཝཱ ལོཀིཡཙཏུཏྠཛ྄ཛྷཱནསམཱཔཛྫནབཧུལོ ཝིཧཱསི། ཨགྒཕལཝསེན པཝཏྟཾ པནེཏྠ ཙཏུཏྠཛ྄ཛྷཱནཾ ཝེདིཏབྦཾ། ཏཏྠ ཡཐཱ སཏྟཱནཾ ནིདྡུཔགམནལཀྑཎཱ སེཡྻཱ བྷཝངྒཙིཏྟཝསེན ཧོཏི, སཱ ཙ ནེསཾ པཋམཛཱཏིསམནྭཡཱ ཡེབྷུཡྻཝུཏྟིཀཱ, ཨེཝཾ བྷགཝཏོ ཨརིཡཛཱཏིསམནྭཡཾ ཡེབྷུཡྻཝུཏྟིཀཾ ཨགྒཕལབྷཱུཏཾ ཙཏུཏྠཛ྄ཛྷཱནཾ ‘‘ཏཐཱགཏསེཡྻཱ’’ཏི ཝེདིཏབྦཾ། སཱིཧསེཡྻཱ ནཱམ སེཊྛསེཡྻཱཏི ཨཱཧ ‘‘ཨུཏྟམསེཡྻཱ’’ཏི།

    Seti abyāvaṭabhāvena pavattati etthāti seyyā, catutthajjhānameva seyyā catutthajjhānaseyyā. Kiṃ pana taṃ catutthajjhānanti? Ānāpānacatutthajjhānaṃ, tato hi vuṭṭhahitvā vipassanaṃ vaḍḍhetvā bhagavā anukkamena aggamaggaṃ adhigantvā tathāgato jātoti. ‘‘Tayidaṃ padaṭṭhānaṃ nāma, na seyyā, tathāpi yasmā ‘catutthajjhānā vuṭṭhahitvā samanantarā bhagavā parinibbāyī’ti (dī. ni. 2.219) vakkhati, tasmā lokiyacatutthajjhānasamāpatti eva tathāgataseyyā’’ti keci, evaṃ sati parinibbānakālikāva tathāgataseyyāti āpajjati, na ca bhagavā lokiyacatutthajjhānasamāpajjanabahulo vihāsi. Aggaphalavasena pavattaṃ panettha catutthajjhānaṃ veditabbaṃ. Tattha yathā sattānaṃ niddupagamanalakkhaṇā seyyā bhavaṅgacittavasena hoti, sā ca nesaṃ paṭhamajātisamanvayā yebhuyyavuttikā, evaṃ bhagavato ariyajātisamanvayaṃ yebhuyyavuttikaṃ aggaphalabhūtaṃ catutthajjhānaṃ ‘‘tathāgataseyyā’’ti veditabbaṃ. Sīhaseyyā nāma seṭṭhaseyyāti āha ‘‘uttamaseyyā’’ti.

    ནཏྠི ཨེཏིསྶཱ ཨུཊྛཱནནྟི ཨནུཊྛཱནཱ, སེཡྻཱ, ཏཾ ཨནུཊྛཱནསེཡྻཾ། ‘‘ཨིཏོ ཨུཊྛཧིསྶཱམཱི’’ཏི མནསིཀཱརསྶ ཨབྷཱཝཏོ ‘‘ཨུཊྛཱནསཉྙཾ མནསི ཀརིཏྭཱ’’ཏི ན ཝུཏྟཾ། ཨེཏྠཱཏི ཨེཏསྨིཾ ཨནུཊྛཱནསེཡྻུཔགམནེ། ཀཱཡཝསེན ཨནུཊྛཱནཾ, ན ཙིཏྟཝསེན, ཙིཏྟཝསེན ཙ ཨནུཊྛཱནཾ ནཱམ ནིདྡུཔགམནནྟི ཏདབྷཱཝཾ དསྶེཏུཾ ‘‘ནིདྡཱཝསེནཱ’’ཏིཨཱདི ཝུཏྟཾ། བྷཝངྒསྶཱཏི ནིདྡུཔགམནལཀྑཎསྶ བྷཝངྒསྶ།

    Natthi etissā uṭṭhānanti anuṭṭhānā, seyyā, taṃ anuṭṭhānaseyyaṃ. ‘‘Ito uṭṭhahissāmī’’ti manasikārassa abhāvato ‘‘uṭṭhānasaññaṃ manasi karitvā’’ti na vuttaṃ.Etthāti etasmiṃ anuṭṭhānaseyyupagamane. Kāyavasena anuṭṭhānaṃ, na cittavasena, cittavasena ca anuṭṭhānaṃ nāma niddupagamananti tadabhāvaṃ dassetuṃ ‘‘niddāvasenā’’tiādi vuttaṃ. Bhavaṅgassāti niddupagamanalakkhaṇassa bhavaṅgassa.

    སབྦཔཱལིཕུལླཱཏི སབྦཏྠཀམེཝ ཝིཀསནཝསེན ཕུལླཱ, ན ཨེཀདེསཝིཀསནཝསེན། ཏེནཱཧ ‘‘སབྦེ སམནྟཏོ པུཔྥིཏཱ’’ཏི། ཨེཀཙྪནྣཱཏི སམྥུལླཔུཔྥེཧི ཨེཀཱཀཱརེན སབྦཏྠེཝ ཚཱདིཏཱ། ཨུལློཀཔདུམཱནཱིཏི ཧེཊྛཱ ཨོལོཀེནྟཱནི ཝིཡ ཏིཊྛནཔདུམཱནི། མོརཔིཉྪཀལཱཔོ ཝིཡ པཉྩཝཎྞཔུཔྥསཉྪཱདིཏཏྟཱ།

    Sabbapāliphullāti sabbatthakameva vikasanavasena phullā, na ekadesavikasanavasena. Tenāha ‘‘sabbe samantato pupphitā’’ti. Ekacchannāti samphullapupphehi ekākārena sabbattheva chāditā. Ullokapadumānīti heṭṭhā olokentāni viya tiṭṭhanapadumāni. Morapiñchakalāpo viya pañcavaṇṇapupphasañchāditattā.

    ནནྡཔོཀྑརཎཱིསམྦྷཝཱནཱིཏི ནནྡཔོཀྑརཎཱིཏཱིརསམྦྷཝཱནི། མཧཱཏུམྦམཏྟནྟི ཨཱལ༹ྷཀམཏྟཾ། པཝིཊྛཱནཱིཏི ཁིཏྟཱནི། སརཱིརམེཝ ཨོཀིརནྟཱིཏི སརཱིརམེཝ ཨཛ྄ཛྷོཀིརནྟི།

    Nandapokkharaṇīsambhavānīti nandapokkharaṇītīrasambhavāni. Mahātumbamattanti āḷhakamattaṃ. Paviṭṭhānīti khittāni. Sarīrameva okirantīti sarīrameva ajjhokiranti.

    དེཝཏཱནཾ ཨུཔཀཔྤནཙནྡནཙུཎྞཱནཱིཏི སཊྛིཔི པཉྙཱསམྤི ཡོཛནཱནི ཝཱཡནཀསེཏཝཎྞཙནྡནཙུཎྞཱནི། དིབྦགནྡྷཛཱལཙུཎྞཱནཱིཏི དིབྦགནྡྷདིབྦཙུཎྞཱནི། ཧརིཏཱལཨཉྫནཙུཎྞཱདཱིནིཔི དིབྦཱནི པརམསུགནྡྷཱནི ཨེཝཱཏི ཝེདིཏབྦཱནི། ཏེནེཝཱཧ ‘‘སབྦདིབྦགནྡྷཝཱསཝིཀཏིཡོ’’ཏི།

    Devatānaṃupakappanacandanacuṇṇānīti saṭṭhipi paññāsampi yojanāni vāyanakasetavaṇṇacandanacuṇṇāni. Dibbagandhajālacuṇṇānīti dibbagandhadibbacuṇṇāni. Haritālaañjanacuṇṇādīnipi dibbāni paramasugandhāni evāti veditabbāni. Tenevāha ‘‘sabbadibbagandhavāsavikatiyo’’ti.

    ཨེཀཙཀྐཝཱལེ༹ སནྣིཔཏིཏྭཱ ཨནྟལིཀྑེ ཝཛྫནྟི མཧཱབྷིནིཀྑམནཀཱལེ ཝིཡ།

    Ekacakkavāḷe sannipatitvā antalikkhe vajjanti mahābhinikkhamanakāle viya.

    ཏཱཏི དེཝཏཱ། གནྠམཱནཱ ཝཱཏི མཱལཾ རཙནྟིཡོ ཨེཝ། ཨཔརིནིཊྛིཏཱ ཝཱཏི ཡཐཱདྷིཔྤཱཡཾ པརིཡོསིཏཱ ཨེཝ། ཧཏྠེན ཧཏྠནྟི ཨཏྟནོ ཧཏྠེན པརསྶ ཧཏྠཾ། གཱིཝཱཡ གཱིཝནྟི ཀཎྛགཱཧཝསེན ཨཏྟནོ གཱིཝཱཡ པརསྶ གཱིཝཾ། གཧེཏྭཱཏི ཨཱམསིཏྭཱ། མཧཱཡསོ མཧཱཡསོཏི ཨཱམེཌིཏཝསེན ཨཉྙམཉྙཾ ཨཱལཱཔཝཙནཾ།

    Tāti devatā. Ganthamānā vāti mālaṃ racantiyo eva. Apariniṭṭhitā vāti yathādhippāyaṃ pariyositā eva. Hatthena hatthanti attano hatthena parassa hatthaṃ. Gīvāya gīvanti kaṇṭhagāhavasena attano gīvāya parassa gīvaṃ. Gahetvāti āmasitvā. Mahāyaso mahāyasoti āmeḍitavasena aññamaññaṃ ālāpavacanaṃ.

    ༡༩༩. མཧནྟཾ ཨུསྶཱཧནྟི ཏཐཱགཏསྶ པཱུཛཱསཀྐཱརཝསེན པཝཏྟིཡམཱནཾ མཧནྟཾ ཨུསྶཱཧཾ དིསྭཱ།

    199.Mahantaṃ ussāhanti tathāgatassa pūjāsakkāravasena pavattiyamānaṃ mahantaṃ ussāhaṃ disvā.

    སཱཡེཝ པན པཊིཔདཱཏི པུབྦབྷཱགཔཊིཔདཱ ཨེཝ། ཨནུཙྪཝིཀཏྟཱཏི ཨདྷིགནྟབྦསྶ ནཝཝིདྷལོཀུཏྟརདྷམྨསྶ ཨནུརཱུཔཏྟཱ།

    Sāyevapana paṭipadāti pubbabhāgapaṭipadā eva. Anucchavikattāti adhigantabbassa navavidhalokuttaradhammassa anurūpattā.

    སཱིལནྟི ཙཱརིཏྟསཱིལམཱཧ། ཨཱཙཱརཔཉྙཏྟཱིཏི ཙཱརིཏྟསཱིལཾ། ཡཱཝ གོཏྲབྷུཏོཏི ཡཱཝ གོཏྲབྷུཉཱཎཾ, ཏཱཝ པཝཏྟེཏབྦཱ སམཐཝིཔསྶནཱ སམྨཱཔཊིཔདཱ། ཨིདཱནི ཏཾ སམྨཱཔཊིཔདཾ བྱཏིརེཀཏོ, ཨནྭཡཏོ ཙ ཝིབྷཱཝེཏུཾ ‘‘ཏསྨཱ’’ཏིཨཱདི ཝུཏྟཾ། ཛིནཀཱལ༹སུཏྟནྟི ཛིནམཧཱཝཌྜྷཀིནཱ ཋཔིཏཾ ཝཛྫེཏབྦགཧེཏབྦདྷམྨསནྡསྶནཀཱལ༹སུཏྟཾ སིཀྑཱཔདམརིཡཱདཾ, ཨུཔཱསཀོཔཱསིཀཱཝཱརེསུ ‘‘གནྡྷཔཱུཛཾ མཱལཱཔཱུཛཾ ཀརོཏཱི’’ཏི ཝཙནཾ ཙཱརིཏྟསཱིལཔཀྑེ ཋཔེཏྭཱ ཀརཎཾ སནྡྷཱཡ ཝུཏྟཾ, ཏེན བྷིཀྑུབྷིཀྑུནཱིནམྤི ཏཐཱཀརཎཾ ཨནུཉྙཱཏམེཝཱཏི དཊྛབྦཾ།

    Sīlanti cārittasīlamāha. Ācārapaññattīti cārittasīlaṃ. Yāva gotrabhutoti yāva gotrabhuñāṇaṃ, tāva pavattetabbā samathavipassanā sammāpaṭipadā. Idāni taṃ sammāpaṭipadaṃ byatirekato, anvayato ca vibhāvetuṃ ‘‘tasmā’’tiādi vuttaṃ. Jinakāḷasuttanti jinamahāvaḍḍhakinā ṭhapitaṃ vajjetabbagahetabbadhammasandassanakāḷasuttaṃ sikkhāpadamariyādaṃ, upāsakopāsikāvāresu ‘‘gandhapūjaṃ mālāpūjaṃ karotī’’ti vacanaṃ cārittasīlapakkhe ṭhapetvā karaṇaṃ sandhāya vuttaṃ, tena bhikkhubhikkhunīnampi tathākaraṇaṃ anuññātamevāti daṭṭhabbaṃ.

    ཨཡཉྷཱིཏི དྷམྨཱནུདྷམྨཔཊིཔདཾ སནྡྷཱཡ ཝདཏི།

    Ayañhīti dhammānudhammapaṭipadaṃ sandhāya vadati.

    ཨུཔཝཱཎཏྠེརཝཎྞནཱ

    Upavāṇattheravaṇṇanā

    ༢༠༠. ཨཔནེསཱིཏི ཋིཏཔྤདེསཏོ ཡཐཱ ཨཔགཙྪཏི, ཨེཝམཀཱསི, ན པན ནིབྦྷཙྪི། ཏེནཱཧ ‘‘ཨཱནནྡོ’’ཏིཨཱདི། ཝུཏྟསདིསཱ ཝཱཏི སམཙིཏྟཔརིཡཱཡདེསནཱཡཾ (ཨ॰ ནི॰ ༢.༣༧) ཝུཏྟསདིསཱ ཨེཝ། ཨཱཝཱརེནྟོཏི ཚཱདེནྟོ།

    200.Apanesīti ṭhitappadesato yathā apagacchati, evamakāsi, na pana nibbhacchi. Tenāha ‘‘ānando’’tiādi. Vuttasadisā vāti samacittapariyāyadesanāyaṃ (a. ni. 2.37) vuttasadisā eva. Āvārentoti chādento.

    ཡསྨཱ ཀསྶཔསྶབུདྡྷསྶ ཙེཏིཡེ ཨཱརཀྑདེཝཏཱ ཨཧོསི, ཏསྨཱ ཐེརོཝ ཏེཛུསྶདོ, ན ཨཉྙེ ཨརཧནྟོཏི ཨཱནེཏྭཱ ཡོཛནཱ།

    Yasmā kassapassabuddhassa cetiye ārakkhadevatā ahosi, tasmā therova tejussado, na aññe arahantoti ānetvā yojanā.

    ཨིདཱནི ཨཱགམནཏོ པཊྛཱཡ ཏམཏྠཾ ཝིཏྠཱརཏོ དསྶེཏུཾ ‘‘ཝིཔསྶིམྷི ཀིར སམྨཱསམྦུདྡྷེ’’ཏིཨཱདི ཨཱརདྡྷཾ། ‘‘ཙཱཏུམཧཱརཱཛིཀཱ དེཝཏཱ’’ཏི ཨིདཾ གོབལཱིབདྡཉཱཡེན གཧེཏབྦཾ བྷུམྨདེཝཏཱདཱིནམྤི ཏཔྤརིཡཱཔནྣཏྟཱ། ཏེསཾ མནུསྶཱནཾ།

    Idāni āgamanato paṭṭhāya tamatthaṃ vitthārato dassetuṃ ‘‘vipassimhi kira sammāsambuddhe’’tiādi āraddhaṃ. ‘‘Cātumahārājikā devatā’’ti idaṃ gobalībaddañāyena gahetabbaṃ bhummadevatādīnampi tappariyāpannattā. Tesaṃ manussānaṃ.

    ཏཏྠཱཏི ཀསྶཔསྶ བྷགཝཏོ ཙེཏིཡེ།

    Tatthāti kassapassa bhagavato cetiye.

    ༢༠༡. ཨདྷིཝཱསེནྟཱིཏི རོཙེནྟི།

    201.Adhivāsentīti rocenti.

    ཚིནྣཔཱཏོ ཝིཡ ཚིནྣཔཱཏོ, ཏཾ ཚིནྣཔཱཏཾ, བྷཱཝནཔུཾསཀནིདྡེསོ ཡཾ། ཨཱཝཊྚནྟཱིཏི ཨབྷིམུཁབྷཱཝེན ཝཊྚནྟི། ཡཏྠ པཏིཏཱ, ཏཏོ ཀཏིཔཡརཏནཊྛཱནཾ ཝཊྚནཝསེནེཝ གནྟྭཱ པུན ཡཐཱཔཏིཏམེཝ ཋཱནཾ ཝཊྚནཝསེན ཨཱགཙྪནྟི། ཏེནཱཧ ‘‘ཨཱཝཊྚནྟིཡོ པཏིཏཊྛཱནམེཝ ཨཱགཙྪནྟཱི’’ཏི། ཝིཝཊྚནྟཱིཏི ཡཏྠ པཏིཏཱ, ཏཏོ ཝིནིཝཊྚནྟི། ཏེནཱཧ ‘‘པཏིཏཊྛཱནཏོ པརབྷཱགཾ ཝཊྚམཱནཱ གཙྪནྟཱི’’ཏི། པུརཏོ ཝཊྚནཾ ཨཱཝཊྚནཾ, ཨིཏརཾ ཏིཝིདྷམྤི ཝིཝཊྚནནྟི དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ། དེཝཏཱ དྷཱརེཏུཾ ན སཀྐོཏི ཨུདཀཾ ཝིཡ ཨོསཱིདནཏོ། ཏེནཱཧ ‘‘ཏཏྠཱ’’ཏིཨཱདི། ཏཏྠཱཏི པཀཏིཔཐཝིཡཾ། དེཝཏཱ ཨོསཱིདནྟི དྷཱཏཱུནཾ སཎྷསུཁུམཱལབྷཱཝཏོ། པཐཝིཡཾ པཐཝིཾ མཱཔེསུནྟི པཀཏིཔཐཝིཡཾ ཨཏྟནོ སརཱིརཾ དྷཱརེཏུཾ སམཏྠཾ ཨིདྡྷཱནུབྷཱཝེན པཐཝིཾ མཱཔེསུཾ།

    Chinnapāto viya chinnapāto, taṃ chinnapātaṃ, bhāvanapuṃsakaniddeso yaṃ. Āvaṭṭantīti abhimukhabhāvena vaṭṭanti. Yattha patitā, tato katipayaratanaṭṭhānaṃ vaṭṭanavaseneva gantvā puna yathāpatitameva ṭhānaṃ vaṭṭanavasena āgacchanti. Tenāha ‘‘āvaṭṭantiyopatitaṭṭhānameva āgacchantī’’ti. Vivaṭṭantīti yattha patitā, tato vinivaṭṭanti. Tenāha ‘‘patitaṭṭhānato parabhāgaṃ vaṭṭamānā gacchantī’’ti. Purato vaṭṭanaṃ āvaṭṭanaṃ, itaraṃ tividhampi vivaṭṭananti dassetuṃ ‘‘apicā’’tiādi vuttaṃ. Devatā dhāretuṃ na sakkoti udakaṃ viya osīdanato. Tenāha ‘‘tatthā’’tiādi. Tatthāti pakatipathaviyaṃ. Devatā osīdanti dhātūnaṃ saṇhasukhumālabhāvato. Pathaviyaṃpathaviṃ māpesunti pakatipathaviyaṃ attano sarīraṃ dhāretuṃ samatthaṃ iddhānubhāvena pathaviṃ māpesuṃ.

    ཀཱམཾ དོམནསྶེ ཨསཏིཔི ཨེཀཙྩོ རཱགོ ཧོཏིཡེཝ, རཱགེ པན ཨསཏི དོམནསྶསྶ ཨསམྦྷཝོ ཨེཝཱཏི ཏདེཀཊྛབྷཱཝཏོཏི ཨཱཧ ‘‘ཝཱིཏརཱགཱཏི པཧཱིནདོམནསྶཱ’’ཏི། སིལཱཐམྦྷསདིསཱ ཨིཊྛཱནིཊྛེསུ ནིབྦིཀཱརཏཱཡ།

    Kāmaṃ domanasse asatipi ekacco rāgo hotiyeva, rāge pana asati domanassassa asambhavo evāti tadekaṭṭhabhāvatoti āha ‘‘vītarāgāti pahīnadomanassā’’ti. Silāthambhasadisā iṭṭhāniṭṭhesu nibbikāratāya.

    ཙཏུསཾཝེཛནཱིཡཊྛཱནཝཎྞནཱ

    Catusaṃvejanīyaṭṭhānavaṇṇanā

    ༢༠༢. ཨཔཱརགངྒཱཡཱཏི གངྒཱཡ ཨོརམྦྷཱགེ། ‘‘སངྐཱརཚཌྜཀསམྨཛྫནིཡོ གཧེཏྭཱ’’ཏིཨཱདི ཨཏྟནོ ཨཏྟནོ ཝསནཊྛཱནེ ཝཏྟཀརཎཱཀཱརདསྶནཾ། ‘‘ཨེཝཾ དྭཱིསུ ཀཱལེསཱུ’’ཏིཨཱདི ནིདསྶནཏྠཾ པཙྩཱམསནཾ, ཏཾ ཧེཊྛཱ ཨདྷིགཏཾ།

    202.Apāragaṅgāyāti gaṅgāya orambhāge. ‘‘Saṅkārachaḍḍakasammajjaniyo gahetvā’’tiādi attano attano vasanaṭṭhāne vattakaraṇākāradassanaṃ. ‘‘Evaṃ dvīsu kālesū’’tiādi nidassanatthaṃ paccāmasanaṃ, taṃ heṭṭhā adhigataṃ.

    ཀམྨསཱདྷནོ སམྦྷཱཝནཏྠོ བྷཱཝནཱིཡ-སདྡོཏི ཨཱཧ ‘‘མནསཱ བྷཱཝིཏེ སམྦྷཱཝིཏེ’’ཏི། དུཏིཡཝིཀཔྤེ པན བྷཱཝནཾ, ཝཌྜྷནཉྩ པཊིཔཀྑཔཧཱནཏོཏི ཨཱཧ ‘‘ཡེ ཝཱ’’ཏིཨཱདི།

    Kammasādhano sambhāvanattho bhāvanīya-saddoti āha ‘‘manasā bhāvite sambhāvite’’ti. Dutiyavikappe pana bhāvanaṃ, vaḍḍhanañca paṭipakkhapahānatoti āha ‘‘ye vā’’tiādi.

    བུདྡྷཱདཱིསུ ཏཱིསུ ཝཏྠཱུསུ པསནྣཙིཏྟསྶ, ན ཀམྨཕལསདྡྷཱམཏྟེན། སཱ ཙསྶ སདྡྷཱསམྤདཱ ཨེཝཾ ཝེདིཏབྦཱཏི ཕལེན ཧེཏུཾ དསྶེནྟོ ‘‘ཝཏྟསམྤནྣསྶཱ’’ཏི ཨཱཧ། སཾཝེགོ ནཱམ སཧོཏྟཔྤཉཱཎཾ, ཨབྷིཛཱཏིཊྛཱནཱདཱིནིཔི ཏསྶ ཨུཔྤཏྟིཧེཏཱུནི བྷཝནྟཱིཏི ཨཱཧ ‘‘སཾཝེགཛནཀཱནཱི’’ཏི།

    Buddhādīsu tīsu vatthūsu pasannacittassa, na kammaphalasaddhāmattena. Sā cassa saddhāsampadā evaṃ veditabbāti phalena hetuṃ dassento ‘‘vattasampannassā’’ti āha. Saṃvego nāma sahottappañāṇaṃ, abhijātiṭṭhānādīnipi tassa uppattihetūni bhavantīti āha ‘‘saṃvegajanakānī’’ti.

    ཙེཏིཡཔཱུཛནཏྠཾ ཙཱརིཀཱ ཙེཏིཡཙཱརིཀཱ། སགྒེ པཏིཊྛཧིསྶནྟིཡེཝ བུདྡྷགུཎཱརམྨཎཱཡ ཀུསལཙེཏནཱཡ སགྒསཾཝཏྟནིཡབྷཱཝཏོ།

    Cetiyapūjanatthaṃ cārikā cetiyacārikā. Sagge patiṭṭhahissantiyeva buddhaguṇārammaṇāya kusalacetanāya saggasaṃvattaniyabhāvato.

    ཨཱནནྡཔུཙྪཱཀཐཱཝཎྞནཱ

    Ānandapucchākathāvaṇṇanā

    ༢༠༣. ཨེཏྠཱཏི མཱཏུགཱམེ། ཨཡཾ ཨུཏྟམཱ པཊིཔཏྟི, ཡདིདཾ ཨདསྶནཾ, དསྶནམཱུལཀཏྟཱ ཏཔྤཙྩཡཱནཾ སབྦཱནཏྠཱནཾ། ལོབྷོཏི ཀཱམརཱགོ། ཙིཏྟཙལནཱ པཊིཔཏྟིཨནྟརཱཡཀརོ ཙིཏྟཀྑོབྷོ། མུརུམུརཱཔེཏྭཱཏི སཨཊྛིཀཾ ཀཏྭཱ ཁཱདནེ ཨནུརཝདསྶནཾ། ཨཔརིམིཏཾ ཀཱལཾ དུཀྑཱནུབྷཝནཾ ཨཔརིཙྪིནྣདུཀྑཱནུབྷཝནཾ། ཝིསྶཱསོཏི ཝིསངྒོ གྷཊྚནཱབྷཱཝོ། ཨོཏཱརོཏི ཏཏྠ ཙིཏྟསྶ ཨནུཔྤཝེསོ། ཨསིཧཏྠེན ཝེརཱིཔུརིསེན, པིསཱཙེནཱཔི ཁཱདིཏུཀཱམེན། ཨཱསཱིདེཏི ཨཀྐམནཱདིཝསེན བཱདྷེཡྻ། ཨསྶཱཏི མཱཏུགཱམསྶ། པབྦཛིཏེཧི ཀཏྟབྦཀམྨནྟི ཨཱམིསཔཊིགྒཧཎཱདི པབྦཛིཏེཧི ཀཱཏབྦཾ ཀམྨཾ། སཏཱིཏི ཝཱ ཀཱཡགཏཱསཏི ཨུཔཊྛཱཔེཏབྦཱ།

    203.Etthāti mātugāme. Ayaṃ uttamā paṭipatti,yadidaṃ adassanaṃ, dassanamūlakattā tappaccayānaṃ sabbānatthānaṃ. Lobhoti kāmarāgo. Cittacalanā paṭipattiantarāyakaro cittakkhobho. Murumurāpetvāti saaṭṭhikaṃ katvā khādane anuravadassanaṃ. Aparimitaṃ kālaṃ dukkhānubhavanaṃ aparicchinnadukkhānubhavanaṃ. Vissāsoti visaṅgo ghaṭṭanābhāvo. Otāroti tattha cittassa anuppaveso. Asihatthena verīpurisena, pisācenāpi khāditukāmena. Āsīdeti akkamanādivasena bādheyya. Assāti mātugāmassa. Pabbajitehi kattabbakammanti āmisapaṭiggahaṇādi pabbajitehi kātabbaṃ kammaṃ. Satīti vā kāyagatāsati upaṭṭhāpetabbā.

    ༢༠༤. ཨཏནྟིབདྡྷཱཏི ཨབྷཱརཝཧཱ། པེསིཏཙིཏྟཱཏི ནིབྦཱནཾ པཏི པེསིཏཙིཏྟཱ།

    204.Atantibaddhāti abhāravahā. Pesitacittāti nibbānaṃ pati pesitacittā.

    ༢༠༥. ཝིཧཏེནཱཏི ཀཔྤཱསཝིཧནནདྷནུནཱ པབྦཛཊཱནཾ ཝིཛཊནཝསེན ཧཏེན། ཏེནཱཧ ‘‘སུཔོཐིཏེནཱ’’ཏི, ཨསངྐརཎཝསེན སུཊྛུ པོཐིཏེནཱཏི ཨཏྠོ, དསྶནཱིཡསཾཝེཛནཱིཡཊྛཱནཀིཏྟནེན ཙ ཝསནཊྛཱནཾ ཀཐིཏཾ།

    205.Vihatenāti kappāsavihananadhanunā pabbajaṭānaṃ vijaṭanavasena hatena. Tenāha ‘‘supothitenā’’ti, asaṅkaraṇavasena suṭṭhu pothitenāti attho, dassanīyasaṃvejanīyaṭṭhānakittanena ca vasanaṭṭhānaṃ kathitaṃ.

    ཨཱནནྡཨཙྪརིཡདྷམྨཝཎྞནཱ

    Ānandaacchariyadhammavaṇṇanā

    ༢༠༧. ཐེརཾ ཨདིསྭཱ ཨཱམནྟེསཱིཏི ཏཏྠ ཨདིསྭཱ ཨཱཝཛྫནྟོ ཐེརསྶ ཋིཏཊྛཱནཾ, པཝཏྟིཉྩ ཉཏྭཱ ཨཱམནྟེསི།

    207.Theraṃ adisvā āmantesīti tattha adisvā āvajjanto therassa ṭhitaṭṭhānaṃ, pavattiñca ñatvā āmantesi.

    ཀཱཡཀམྨསྶ ཧིཏབྷཱཝོ ཧིཏཛ྄ཛྷཱསཡེན པཝཏྟིཏཏྟཱཏི ཨཱཧ ‘‘ཧིཏཝུདྡྷིཡཱ ཀཏེནཱ’’ཏི། སུཁབྷཱཝོ ཀཱཡིཀདུཀྑཱབྷཱཝོ, ཙེཏསིཀསུཁབྷཱཝོ ཙེཏསིཀསུཁསམུཊྛིཏཏྟཱ ཙཱཏི ཝུཏྟཾ ‘‘སུཁསོམནསྶེནེཝ ཀཏེནཱ’’ཏི། ཨཱཝིརཧོཝིབྷཱགཏོ ཨདྭཡབྷཱཝཏོ ཨདྭཡེནཱཏི ཨིམམཏྠཾ དསྶེཏུཾ ‘‘ཡཐཱ’’ཏིཨཱདི ཝུཏྟཾ། སཏྠུ ཁེཏྟབྷཱཝསམྤཏྟིཡཱ, ཐེརསྶ ཨཛ྄ཛྷཱསཡསམྤཏྟིཡཱ ཙ ‘‘ཨེཏྟཀམིད’’ནྟི པམཱཎཾ གཧེཏུཾ ཨསཀྐུཎེཡྻཏཱཡ པམཱཎཝིརཧིཏཏྟཱ ཏསྶ ཀམྨསྶཱཏི ཨཱཧ ‘‘ཙཀྐཝཱལ༹མྤཱི’’ཏིཨཱདི།

    Kāyakammassa hitabhāvo hitajjhāsayena pavattitattāti āha ‘‘hitavuddhiyā katenā’’ti. Sukhabhāvo kāyikadukkhābhāvo, cetasikasukhabhāvo cetasikasukhasamuṭṭhitattā cāti vuttaṃ ‘‘sukhasomanasseneva katenā’’ti. Āvirahovibhāgato advayabhāvato advayenāti imamatthaṃ dassetuṃ ‘‘yathā’’tiādi vuttaṃ. Satthu khettabhāvasampattiyā, therassa ajjhāsayasampattiyā ca ‘‘ettakamida’’nti pamāṇaṃ gahetuṃ asakkuṇeyyatāya pamāṇavirahitattā tassa kammassāti āha ‘‘cakkavāḷampī’’tiādi.

    ཨེཝཾ པཝཏྟིཏེནཱཏི ཨེཝཾ ཨོདིསྶཀམེཏྟཱབྷཱཝནཱཡ ཝསེན པཝཏྟིཏེན། ཝིཝཊྚཱུཔནིསྶཡབྷཱུཏཾ ཀཏཾ ཨུཔཙིཏཾ པུཉྙཾ ཨེཏེནཱཏི ཀཏཔུཉྙོ, ཨརཧཏྟཱདྷིགམཱཡ ཀཏཱདྷིཀཱརོཏི ཨཏྠོ། ཏེནཱཧ ‘‘ཨབྷིནཱིཧཱརསམྤནྣོསཱིཏི དསྶེཏཱི’’ཏི།

    Evaṃ pavattitenāti evaṃ odissakamettābhāvanāya vasena pavattitena. Vivaṭṭūpanissayabhūtaṃ kataṃ upacitaṃ puññaṃ etenāti katapuñño, arahattādhigamāya katādhikāroti attho. Tenāha ‘‘abhinīhārasampannosīti dassetī’’ti.

    ༢༠༨. ཀཏྠཙི སངྐུཙིཏཾ ཧུཏྭཱ ཋིཏཾ མཧཱཔཐཝིཾ པཏྠརནྟོ ཝིཡ, པཊིསཾཧཊཾ ཧུཏྭཱ ཋིཏཾ ཨཱཀཱསཾ ཝིཏྠཱརེནྟོ ཝིཡ, ཙཏུསཊྛཱདྷིཀཡོཛནསཏསཧསྶུབྦེདྷཾ ཙཀྐཝཱལ༹གིརིཾ ཨདྷོ ཨོསཱརེནྟོ ཝིཡ, ཨཊྛསཊྛཱདྷིཀསཧསྶཡོཛནསཏསཧསྶུབྦེདྷཾ སིནེརུཾ ཨུཀྑིཔེནྟོ ཝིཡ, སཏཡོཛནཱཡཱམཝིཏྠཱརཾ མཧཱཛམྦུཾ ཁནྡྷེ གཧེཏྭཱ ཙཱལེནྟོ ཝིཡཱཏི པཉྩ ཧི ཨུཔམཱ ཧི ཐེརསྶ གུཎཀཐཱ མཧནྟབྷཱཝདསྶནཏྠཉྩེཝ ཨཉྙེསཾ དུཀྐཊབྷཱཝདསྶནཏྠཉྩ ཨཱགཏཱཝ། ཨེཏེནེཝ ཙཱཏི ཙ-སདྡེན ‘‘ཨཧཾ ཨེཏརཧི ཨརཧཾ སམྨཱསམྦུདྡྷོ’’ (དཱི॰ ནི॰ ༢.༤), ‘‘སདེཝཀསྨིཾ ལོཀསྨིཾ ནཏྠི མེ པཊིཔུགྒལོ’’ཏི (མ॰ ནི॰ ༡.༢༨༥; ༢.༣༤༡; མཧཱཝ॰ ༡༡; ཀཐཱ॰ ༤༠༥; མི॰ པ॰ ༥.༡༡) ཙ ཨེཝཾ ཨཱདཱིནཾ སངྒཧོ དཊྛབྦོ། བྱཏྟོཏི ཁནྡྷཀོསལླཱདིསངྑཱཏེན ཝེཡྻཏྟིཡེན སམནྣཱགཏོ། མེདྷཱཝཱིཏི མེདྷཱསངྑཱཏཱཡ སམྨཱབྷཱཝིཏཱཡ པཉྙཱཡ སམནྣཱགཏོ།

    208. Katthaci saṅkucitaṃ hutvā ṭhitaṃ mahāpathaviṃ pattharanto viya, paṭisaṃhaṭaṃ hutvā ṭhitaṃ ākāsaṃ vitthārento viya, catusaṭṭhādhikayojanasatasahassubbedhaṃ cakkavāḷagiriṃ adho osārento viya, aṭṭhasaṭṭhādhikasahassayojanasatasahassubbedhaṃ sineruṃ ukkhipento viya, satayojanāyāmavitthāraṃ mahājambuṃ khandhe gahetvā cālento viyāti pañca hi upamā hi therassa guṇakathā mahantabhāvadassanatthañceva aññesaṃ dukkaṭabhāvadassanatthañca āgatāva. Eteneva cāti ca-saddena ‘‘ahaṃ etarahi arahaṃ sammāsambuddho’’ (dī. ni. 2.4), ‘‘sadevakasmiṃ lokasmiṃ natthi me paṭipuggalo’’ti (ma. ni. 1.285; 2.341; mahāva. 11; kathā. 405; mi. pa. 5.11) ca evaṃ ādīnaṃ saṅgaho daṭṭhabbo. Byattoti khandhakosallādisaṅkhātena veyyattiyena samannāgato. Medhāvīti medhāsaṅkhātāya sammābhāvitāya paññāya samannāgato.

    ༢༠༩. པཊིསནྠཱརདྷམྨནྟི པཀཏིཙཱརིཏྟཝསེན ཝུཏྟཾ, ཨུཔགཏཱནཾ པན བྷིཀྑཱུནཾ བྷིཀྑུནཱིནཉྩ པུཙྪཱཝིསྶཛྫནཝསེན ཙེཝ ཙིཏྟརུཙིཝསེན ཙ ཡཐཱཀཱལཾ དྷམྨཾ དེསེཏིཡེཝ, ཨུཔཱསཀོཔཱསིཀཱནཾ པན ཨུཔནིསིནྣཀཐཱཝསེན།

    209.Paṭisanthāradhammanti pakaticārittavasena vuttaṃ, upagatānaṃ pana bhikkhūnaṃ bhikkhunīnañca pucchāvissajjanavasena ceva cittarucivasena ca yathākālaṃ dhammaṃ desetiyeva, upāsakopāsikānaṃ pana upanisinnakathāvasena.

    མཧཱསུདསྶནསུཏྟདེསནཱཝཎྞནཱ

    Mahāsudassanasuttadesanāvaṇṇanā

    ༢༡༠. ཁུདྡཀ-སདྡོ པཏིརཱུཔཝཱཙཱི, ཀ-སདྡོ ཨཔྤཏྠོཏི ཨཱཧ ‘‘ཁུདྡཀནགརཀེཏི ནགརཔཏིརཱུཔཀེ སམྦཱདྷེ ཁུདྡཀནགརཀེ’’ཏི། དྷུཔརཝིསཱལསཎྛཱནཏཱཡ ཏཾ ‘‘ཨུཛྫངྒལནགརཀ’’ནྟི ཝུཏྟནྟི ཨཱཧ ‘‘ཝིསམནགརཀེ’’ཏི། ཨཉྙེསཾ མཧཱནགརཱནཾ ཨེཀདེསཔྤམཱཎཏཱཡ སཱཁཱསདིསེ། ཨེཏྠ ཙ ‘‘ཁུདྡཀནགརཀེ’’ཏི ཨིམིནཱ ཏསྶ ནགརསྶ ཨཔྤཀབྷཱཝོ ཝུཏྟོ, ‘‘ཨུཛྫངྒལནགརཀེ’’ཏི ཨིམིནཱ བྷཱུམིཝིཔཏྟིཡཱ ནིཧཱིནབྷཱཝོ, ‘‘སཱཁཱནགརཀེ’’ཏི ཨིམིནཱ ཨཔྤདྷཱནབྷཱཝོ། སཱརཔྤཏྟཱཏི ཝིབྷཝསཱརཱདིནཱ སཱརམཧཏྟཾ པཏྟཱ།

    210.Khuddaka-saddo patirūpavācī, ka-saddo appatthoti āha ‘‘khuddakanagaraketi nagarapatirūpake sambādhe khuddakanagarake’’ti. Dhuparavisālasaṇṭhānatāya taṃ ‘‘ujjaṅgalanagaraka’’nti vuttanti āha ‘‘visamanagarake’’ti. Aññesaṃ mahānagarānaṃ ekadesappamāṇatāya sākhāsadise. Ettha ca ‘‘khuddakanagarake’’ti iminā tassa nagarassa appakabhāvo vutto, ‘‘ujjaṅgalanagarake’’ti iminā bhūmivipattiyā nihīnabhāvo, ‘‘sākhānagarake’’ti iminā appadhānabhāvo. Sārappattāti vibhavasārādinā sāramahattaṃ pattā.

    ཀཧཱཔཎསཀཊནྟི ཨེཏྠ ‘‘དྭིཀུམྦྷཾ སཀཊཾ། ཀུམྦྷོ པན དསམྦཎོ’’ཏི ཝདནྟི། དྭེ པཝིསནྟཱིཏི དྭེ ཀཧཱཔཎསཀཊཱནི དྭེ ཨཱཡཝསེན པཝིསནྟི།

    Kahāpaṇasakaṭanti ettha ‘‘dvikumbhaṃ sakaṭaṃ. Kumbho pana dasambaṇo’’ti vadanti. Dve pavisantīti dve kahāpaṇasakaṭāni dve āyavasena pavisanti.

    སུབྷིཀྑཱཏི སུལབྷཱཧཱརཱ, སུནྡརཱཧཱརཱ ཙ། ཏེནཱཧ ‘‘ཁཛྫབྷོཛྫསམྤནྣཱ’’ཏི། སདྡཾ ཀརོནྟེཏི རཝསཱརིནཱ ཏུཊྛབྷཱཝེན ཀོཉྩནཱདཾ ཀརོནྟེ། ཨཝིཝིཏྟཱཏི ཨསུཉྙཱ, ཀདཱཙི རཐོ པཋམཾ གཙྪཏི, ཏཾ ཨཉྙོ ཨནུབནྡྷནྟོ གཙྪཏི, ཀདཱཙི དུཏིཡཾ ཝུཏྟརཐོ པཋམཾ གཙྪཏི, ཨིཏརོ ཏཾ ཨནུབནྡྷཏི ཨེཝཾ ཨཉྙམཉྙཾ ཨནུབནྡྷམཱནཱ། ཨེཏྠཱཏི ཀུསཱཝཏཱིནགརེ། ཏསྶ མཧནྟབྷཱཝཏོ ཙེཝ ཨིདྡྷཱདིབྷཱཝཏོ ཙ ནིཙྩཾ པཡོཛིཏཱནེཝ བྷེརིཨཱདཱིནི ཏཱུརིཡཱནི, སམྨ སམྨཱཏི ཝཱ ཨཉྙམཉྙཾ པིཡཱལཱཔསདྡོ སམྨ-སདྡོ། ཀཾསཏཱལཱ༹དིསབྦཏཱལཱ༹ཝཙརསདྡོ ཏཱལ༹-སདྡོ, ཀཱུཊབྷེརི-སདྡོ ཀུམྦྷཐཱུཎསདྡོ།

    Subhikkhāti sulabhāhārā, sundarāhārā ca. Tenāha ‘‘khajjabhojjasampannā’’ti. Saddaṃ karonteti ravasārinā tuṭṭhabhāvena koñcanādaṃ karonte. Avivittāti asuññā, kadāci ratho paṭhamaṃ gacchati, taṃ añño anubandhanto gacchati, kadāci dutiyaṃ vuttaratho paṭhamaṃ gacchati, itaro taṃ anubandhati evaṃ aññamaññaṃ anubandhamānā. Etthāti kusāvatīnagare. Tassa mahantabhāvato ceva iddhādibhāvato ca niccaṃ payojitāneva bheriādīni tūriyāni, samma sammāti vā aññamaññaṃ piyālāpasaddo samma-saddo. Kaṃsatāḷādisabbatāḷāvacarasaddo tāḷa-saddo, kūṭabheri-saddo kumbhathūṇasaddo.

    ཨེཝརཱུཔཱ སདྡཱ ཧོནྟི ཀཙཝརཱཀིཎྞཝཱིཐིཏཱཡ, ཨརཉྙེ ཀནྡམཱུལཔཎྞཱདིགྒཧཎཱཡ, ཏཏྠ དུཀྑཛཱིཝིཀཏཱཡ ཙཱཏི ཡཐཱཀྐམཾ ཡོཛེཏབྦཾ། ཨིདྷ ན ཨེཝཾ ཨཧོསི དེཝལོཀེ ཝིཡ སབྦསོ པརིཔུཎྞསམྤཏྟིཀཏཱཡ།

    Evarūpāsaddā honti kacavarākiṇṇavīthitāya, araññe kandamūlapaṇṇādiggahaṇāya, tattha dukkhajīvikatāya cāti yathākkamaṃ yojetabbaṃ. Idha na evaṃ ahosi devaloke viya sabbaso paripuṇṇasampattikatāya.

    མཧནྟཾ ཀོལཱཧལནྟི སདྡྷཱསམྤནྣཱནཾ དེཝཏཱནཾ, ཨུཔཱསཀཱནཉྩ ཝསེན པུརཏོ པུརཏོ མཧཏཱི ཨུགྒྷོསནཱ ཧོཏི། ཏཏྠ བྷགཝནྟཾ ཨུདྡིསྶ ཀཏསྶ ཝིཧཱརསྶ ཨབྷཱཝཏོ, བྷིཀྑུསངྒྷསྶ ཙ མཧནྟབྷཱཝཏོ ཏེ ཨཱགནྟྭཱ…པེ॰… པེསེསི། པེསེནྟོ ཙ ‘‘ཀཐཉྷི ནཱམ བྷགཝཱ པཙྪིམེ ཀཱལེ ཨཏྟནོ པཝཏྟིཾ ཨམྷཱཀཾ ནཱརོཙེསི, ནེསཾ དོམནསྶཾ མཱ ཨཧོསཱི’’ཏི ‘‘ཨཛྫ ཁོ ཝཱསེཊྛཱ’’ཏིཨཱདིནཱ སཱསནཾ པེསེསི།

    Mahantaṃ kolāhalanti saddhāsampannānaṃ devatānaṃ, upāsakānañca vasena purato purato mahatī ugghosanā hoti. Tattha bhagavantaṃ uddissa katassa vihārassa abhāvato, bhikkhusaṅghassa ca mahantabhāvato te āgantvā…pe… pesesi. Pesento ca ‘‘kathañhi nāma bhagavā pacchime kāle attano pavattiṃ amhākaṃ nārocesi, nesaṃ domanassaṃ mā ahosī’’ti ‘‘ajja kho vāseṭṭhā’’tiādinā sāsanaṃ pesesi.

    མལླཱནཾ ཝནྡནཱཝཎྞནཱ

    Mallānaṃ vandanāvaṇṇanā

    ༢༡༡. ཨགྷཾ དུཀྑཾ ཨཱཝེནྟི པཀཱསེནྟཱིཏི ཨགྷཱཝིནོ, པཱཀཊཱིབྷཱུཏདུཀྑཱཏི ཨཱཧ ‘‘ཨུཔྤནྣདུཀྑཱ’’ཏི། ཉཱཏིསཱལོཧིཏབྷཱཝེན ཀུལཾ པརིཝཏྟཏི ཨེཏྠཱཏི ཀུལཔརིཝཏྟཾ། ཏཾ ཏཾཀུལཱིནབྷཱགེན ཋིཏོ སཏྟནིཀཱཡོ ‘‘ཀུལཔརིཝཏྟསོ’’ཏི ཝུཏྟནྟི ཨཱཧ ‘‘ཀུལཔརིཝཏྟ’’ནྟི། ཏེ པན ཏཾཏཾཀུལཔརིཝཏྟཔརིཙྪིནྣཱ མལླརཱཛཱནོ ཏསྨིཾ ནགརེ ཝཱིཐིཨཱདིསབྷཱགེན ཝསནྟཱིཏི ཝུཏྟཾ ‘‘ཝཱིཐིསབྷཱགེན ཙེཝ རཙྪཱསབྷཱགེན ཙཱ’’ཏི།

    211. Aghaṃ dukkhaṃ āventi pakāsentīti aghāvino, pākaṭībhūtadukkhāti āha ‘‘uppannadukkhā’’ti. Ñātisālohitabhāvena kulaṃ parivattati etthāti kulaparivattaṃ. Taṃ taṃkulīnabhāgena ṭhito sattanikāyo ‘‘kulaparivattaso’’ti vuttanti āha ‘‘kulaparivatta’’nti. Te pana taṃtaṃkulaparivattaparicchinnā mallarājāno tasmiṃ nagare vīthiādisabhāgena vasantīti vuttaṃ ‘‘vīthisabhāgena ceva racchāsabhāgena cā’’ti.

    སུབྷདྡཔརིབྦཱཛཀཝཏྠུཝཎྞནཱ

    Subhaddaparibbājakavatthuvaṇṇanā

    ༢༡༢. ཀངྑཱ ཨེཝ ཀངྑཱདྷམྨོ། ཨེཀཏོ ཝཱཏི བྷཱུམིཾ ཨཝིབྷཛིཏྭཱ སཱདྷཱརཎཏོཝ། བཱིཛཏོ ཙ ཨགྒཾ གཧེཏྭཱ ཨཱཧཱརཾ སམྤཱདེཏྭཱ དཱནཾ བཱིཛགྒཾ། གབྦྷཀཱལེཏི གབྦྷདྷཱརཎཏོ པརཾ ཁཱིརགྒཧཎཀཱལེ། ཏེནཱཧ ‘‘གབྦྷཾ ཕཱལེཏྭཱ ཁཱིརཾ ནིཧརིཏྭཱ’’ཏིཨཱདི། པུཐུཀཀཱལེཏི སསྶཱནཾ ནཱཏིཔཀྐེ པུཐུཀཡོགྱཕལཀཱལེ། ལཱཡནགྒནྟི པཀྐསྶ སསྶསྶ ལཝནེ ལཝནཱརམྦྷེ དཱནཾ ཨདཱསི། ལུནསྶ སསྶསྶ ཝེཎིཝསེན བནྡྷིཏྭཱ ཋཔནཾ ཝེཎིཀརཎཾ། ཏསྶ ཨཱརམྦྷེ དཱནཾ ཝེཎགྒཾ། ཝེཎིཡོ པན ཨེཀཏོ ཀཏྭཱ རཱསིཀརཎཾ ཀལཱཔོ། ཏཏྠ ཨགྒདཱནཾ ཀལཱཔགྒཾ། ཀལཱཔཏོ ནཱིཧརིཏྭཱ མདྡནེ ཨགྒདཱནཾ ཁལགྒཾ། མདྡིཏཾ ཨོཕུཎིཏྭཱ དྷཉྙསྶ རཱསིཀརཎེ ཨགྒདཱནཾ ཁལབྷཎྜགྒཾ། དྷཉྙསྶ ཁལཏོ ཀོཊྛེ པཀྑིཔནེ ཨགྒདཱནཾ ཀོཊྛགྒཾ། ཨུདྡྷརིཏྭཱཏི ཀོཊྛཏོ ཨུདྡྷརིཏྭཱ།

    212. Kaṅkhā eva kaṅkhādhammo. Ekato vāti bhūmiṃ avibhajitvā sādhāraṇatova. Bījato ca aggaṃ gahetvā āhāraṃ sampādetvā dānaṃ bījaggaṃ. Gabbhakāleti gabbhadhāraṇato paraṃ khīraggahaṇakāle. Tenāha ‘‘gabbhaṃ phāletvā khīraṃ niharitvā’’tiādi. Puthukakāleti sassānaṃ nātipakke puthukayogyaphalakāle. Lāyanagganti pakkassa sassassa lavane lavanārambhe dānaṃ adāsi. Lunassa sassassa veṇivasena bandhitvā ṭhapanaṃ veṇikaraṇaṃ. Tassa ārambhe dānaṃ veṇaggaṃ. Veṇiyo pana ekato katvā rāsikaraṇaṃ kalāpo. Tattha aggadānaṃ kalāpaggaṃ. Kalāpato nīharitvā maddane aggadānaṃ khalaggaṃ. Madditaṃ ophuṇitvā dhaññassa rāsikaraṇe aggadānaṃ khalabhaṇḍaggaṃ. Dhaññassa khalato koṭṭhe pakkhipane aggadānaṃ koṭṭhaggaṃ. Uddharitvāti koṭṭhato uddharitvā.

    ‘‘ནཝ ཨགྒདཱནཱནི ཨདཱསཱི’’ཏི ཨིམིནཱ ‘‘ཀཐཾ ནུ ཁོ ཨཧཾ སཏྠུ སནྟིཀེ ཨགྒཏོཝ མུཙྩེཡྻ’’ནྟི ཨགྒགྒདཱནཝསེན ཝིཝཊྚཱུཔནིསྶཡསྶ ཀུསལསྶ ཀཏཱུཔཙིཏཏྟཱ, ཉཱཎསྶ ཙ ཏཐཱ པརིཔཱཀཾ གཏཏྟཱ ཨགྒདྷམྨདེསནཱཡ ཏསྶ བྷཱཛནབྷཱཝཾ དསྶེཏི། ཏེནཱཧ ‘‘ཨིམཾ ཨགྒདྷམྨཾ ཏསྶ དེསེསྶཱམཱི’’ཏིཨཱདི། ཨོཧཱིཡིཏྭཱ སངྐོཙཾ ཨཱཔཛྫིཏྭཱ།

    ‘‘Navaaggadānāni adāsī’’ti iminā ‘‘kathaṃ nu kho ahaṃ satthu santike aggatova mucceyya’’nti aggaggadānavasena vivaṭṭūpanissayassa kusalassa katūpacitattā, ñāṇassa ca tathā paripākaṃ gatattā aggadhammadesanāya tassa bhājanabhāvaṃ dasseti. Tenāha ‘‘imaṃ aggadhammaṃ tassa desessāmī’’tiādi. Ohīyitvā saṅkocaṃ āpajjitvā.

    ༢༡༣. ཨཉྙཱཏུཀཱམོཝ ན སནྡིཊྛིཾ པརཱམཱསཱི། ཨབྦྷཉྙིཾསཱུཏི སནྡེཧཛཱཏསྶ པུཙྪཱཝཙནནྟི ཀཏྭཱ ཛཱནིཾསཱུཏི ཨཏྠམཱཧ། ཏེནཱཧ པཱལི༹ཡཾ ‘‘སབྦེཝ ན ཨབྦྷཉྙིཾསཱུ’’ཏི། ནེསནྟི པཱུརཎཱདཱིནཾ། སཱ པཊིཉྙཱཏི ‘‘ཀརོཏོ ཁོ མཧཱརཱཛ ཀཱརཡཏོ’’ཏིཨཱདིནཱ (དཱི॰ ནི॰ ༡.༡༦༦) པཊིཉྙཱཏཱ, སབྦཉྙུཔཊིཉྙཱ ཨེཝ ཝཱ། ནིཡྻཱནིཀཱཏི སཔྤཱཊིཧཱརིཡཱ, ཏེསཾ ཝཱ སིདྡྷནྟསངྑཱཏཱ པཊིཉྙཱ ཝཊྚཏོ ནིསྶརཎཊྛེན ནིཡྻཱནིཀཱཏི། སཱསནསྶ སམྤཏྟིཡཱ ཏེསཾ སབྦཉྙུཏཾ, ཏབྦིཔརིཡཱཡཏོ ཙ ཨསབྦཉྙུཏཾ གཙྪཏཱིཏི དཊྛབྦཾ། ཏེནཱཧ ‘‘ཏསྨཱ’’ཏིཨཱདི། ཨཏྠཱབྷཱཝཏོཏི སུབྷདྡསྶ སཱདྷེཏབྦཨཏྠཱབྷཱཝཏོ། ཨོཀཱསཱབྷཱཝཏོཏི ཏཐཱ ཝིཏྠཱརིཏཾ ཀཏྭཱ དྷམྨཾ དེསེཏུཾ ཨཝསརཱབྷཱཝཏོ། ཨིདཱནི ཏམེཝ ཨོཀཱསཱབྷཱཝཾ དསྶེཏུཾ ‘‘པཋམཡཱམསྨི’’ནྟིཨཱདི ཝུཏྟཾ།

    213.Aññātukāmova na sandiṭṭhiṃ parāmāsī. Abbhaññiṃsūti sandehajātassa pucchāvacananti katvā jāniṃsūti atthamāha. Tenāha pāḷiyaṃ ‘‘sabbeva na abbhaññiṃsū’’ti. Nesanti pūraṇādīnaṃ. Sā paṭiññāti ‘‘karoto kho mahārāja kārayato’’tiādinā (dī. ni. 1.166) paṭiññātā, sabbaññupaṭiññā eva vā. Niyyānikāti sappāṭihāriyā, tesaṃ vā siddhantasaṅkhātā paṭiññā vaṭṭato nissaraṇaṭṭhena niyyānikāti. Sāsanassa sampattiyā tesaṃ sabbaññutaṃ, tabbipariyāyato ca asabbaññutaṃ gacchatīti daṭṭhabbaṃ. Tenāha ‘‘tasmā’’tiādi. Atthābhāvatoti subhaddassa sādhetabbaatthābhāvato. Okāsābhāvatoti tathā vitthāritaṃ katvā dhammaṃ desetuṃ avasarābhāvato. Idāni tameva okāsābhāvaṃ dassetuṃ ‘‘paṭhamayāmasmi’’ntiādi vuttaṃ.

    ༢༡༤. ཡེསཾ སམཎབྷཱཝཀརཱནཾ དྷམྨཱནཾ སམྤཱདནེན སམཎོ, ཏེ པན ཨུཀྐཊྛནིདྡེསེན ཨརིཡམགྒདྷམྨཱཏི ཙཏུམགྒསཾསིདྡྷིཡཱ པཱལི༹ཡཾ ཙཏྟཱརོ སམཎཱ ཝུཏྟཱཏི ཏེ བཱཧིརསམཡེ སབྦེན སབྦཾ ནཏྠཱིཏི དསྶེནྟོ ‘‘པཋམོ སོཏཱཔནྣསམཎོ’’ཏིཨཱདིམཱཧ། པུརིམདེསནཱཡཱཏི ‘‘ཡསྨིཉྩ ཁོ, སུབྷདྡ, དྷམྨཝིནཡེ’’ཏིཨཱདིནཱ ཝུཏྟཱཡ དེསནཱཡ། བྱཏིརེཀཏོ, ཨནྭཡཏོ ཙ ཨདྷིཔྤེཏོ ཨཏྠོ ཝིབྷཱཝཱིཡཏཱིཏི པཋམནཡོཔེཏྠ ‘‘པུརིམདེསནཱཡཱ’’ཏི པདེན སངྒཧིཏོ ཝཱཏི དཊྛབྦོ། ཨཏྟནོ སཱསནཾ ནིཡམེནྟོ ཨཱཧ ‘‘ཨིམསྨིཾ ཁོ’’ཏི ཡོཛནཱ། ཨཱརདྡྷཝིཔསྶཀེཧཱིཏི སམཱདྷིཀམྨིཀཝིཔསྶཀེཧི, སིཁཱཔྤཏྟཝིཔསྶཀེ སནྡྷཱཡ ཝུཏྟཾ, ན པཊྛཔིཏཝིཔསྶནེ། ཨཔརེ པན ‘‘བཱཧིརཀསམཡེ ཝིཔསྶནཱརམྦྷསྶ གནྠོཔི ནཏྠེཝཱཏི ཨཝིསེསཝཙནམེཏ’’ནྟི ཝདནྟི། ཨདྷིགཏཊྛཱནནྟི ཨདྷིགཏསྶ ཀཱརཎཾ, ཏདཏྠཾ པུབྦབྷཱགཔཊིཔདནྟི ཨཏྠོ, ཡེན སོཏཱཔཏྟིམགྒོ ཨདྷིགཏོ, ན ཨུཔརིམགྒོ, སོ སོཏཱཔཏྟིམགྒེ ཋིཏོ ཨཀུཔྤདྷམྨཏཱཡ ཏསྶ, ཏཏྠ ཝཱ སིདྡྷིཏོ ཋིཏཔུབྦོ བྷཱུཏཔུབྦགཏིཡཱཏི སོཏཱཔཏྟིམགྒཊྛོ སོཏཱཔནྣོ, ན སེསཨརིཡཱ བྷཱུམནྟརུཔྤཏྟིཏོ། སོཏཱཔནྣོ ཧི ཨཏྟནཱ ཨདྷིགཏཊྛཱནཾ སོཏཱཔཏྟིམགྒཾ ཨཉྙསྶ ཀཐེཏྭཱ སོཏཱཔཏྟིམགྒཊྛཾ ཀརེཡྻ, ན ཨཊྛམཀོ ཨསམྦྷཝཏོ། ཨེས ནཡོ སེསམགྒཊྛེསཱུཏི ཨེཏྠཱཔི ཨིམིནཱཝ ནཡེན ཨཏྠོ ཝེདིཏབྦོ། པགུཎཾ ཀམྨཊྛཱནནྟི ཨཏྟནོ པགུཎཾ ཝིཔསྶནཱཀམྨཊྛཱནཾ, ཨེཏེནེཝ ‘‘ཨཝིསེསཝཙན’’ནྟི ཝཱདོ པཊིཀྑིཏྟོཏི དཊྛབྦོ།

    214. Yesaṃ samaṇabhāvakarānaṃ dhammānaṃ sampādanena samaṇo, te pana ukkaṭṭhaniddesena ariyamaggadhammāti catumaggasaṃsiddhiyā pāḷiyaṃ cattāro samaṇā vuttāti te bāhirasamaye sabbena sabbaṃ natthīti dassento ‘‘paṭhamo sotāpannasamaṇo’’tiādimāha. Purimadesanāyāti ‘‘yasmiñca kho, subhadda, dhammavinaye’’tiādinā vuttāya desanāya. Byatirekato, anvayato ca adhippeto attho vibhāvīyatīti paṭhamanayopettha ‘‘purimadesanāyā’’ti padena saṅgahito vāti daṭṭhabbo. Attano sāsanaṃ niyamento āha ‘‘imasmiṃ kho’’ti yojanā. Āraddhavipassakehīti samādhikammikavipassakehi, sikhāppattavipassake sandhāya vuttaṃ, na paṭṭhapitavipassane. Apare pana ‘‘bāhirakasamaye vipassanārambhassa ganthopi natthevāti avisesavacanameta’’nti vadanti. Adhigataṭṭhānanti adhigatassa kāraṇaṃ, tadatthaṃ pubbabhāgapaṭipadanti attho, yena sotāpattimaggo adhigato, na uparimaggo, so sotāpattimagge ṭhito akuppadhammatāya tassa, tattha vā siddhito ṭhitapubbo bhūtapubbagatiyāti sotāpattimaggaṭṭho sotāpanno, na sesaariyā bhūmantaruppattito. Sotāpanno hi attanā adhigataṭṭhānaṃ sotāpattimaggaṃ aññassa kathetvā sotāpattimaggaṭṭhaṃ kareyya, na aṭṭhamako asambhavato. Esa nayo sesamaggaṭṭhesūti etthāpi imināva nayena attho veditabbo. Paguṇaṃ kammaṭṭhānanti attano paguṇaṃ vipassanākammaṭṭhānaṃ, eteneva ‘‘avisesavacana’’nti vādo paṭikkhittoti daṭṭhabbo.

    སབྦཉྙུཏཉྙཱཎཾ ཨདྷིཔྤེཏཾ། ཏཉྷི སབྦཉེཡྻདྷམྨཱཝབོདྷནེ ‘‘ཀུསལཾ ཚེཀཾ ནིཔུཎ’’ནྟི ཝུཙྩཏི ཏཏྠ ཨསངྒཨཔྤཊིཧཏཾ པཝཏྟཏཱིཏི ཀཏྭཱ། སམདྷིཀཱནི ཨེཀེན ཝསྶེན། ཉཱཡནྟི ཨེཏེན ཙཏུསཙྩདྷམྨཾ ཡཱཐཱཝཏོ པཊིཝིཛ྄ཛྷནྟཱིཏི ཉཱཡོ, ལོཀུཏྟརམགྒོཏི ཨཱཧ ‘‘ཨརིཡམགྒདྷམྨསྶཱ’’ཏི། པདིསྶཏི ཨེཏེན ཨརིཡམགྒོ པཙྩཀྑཏོ དིསྶཏཱིཏི པདེསོ, ཝིཔསྶནཱཏི ཝུཏྟཾ ‘‘པདེསེ ཝིཔསྶནཱམགྒེ’’ཏི། སམཎོཔཱིཏི ཨེཏྠ པི-སདྡོ ‘‘པདེསཝཏྟཱི’’ཏི ཨེཏྠཱཔི ཨཱནེཏྭཱ སམྦནྡྷིཏབྦོཏི ཨཱཧ ‘‘པདེསཝཏྟི…པེ॰… ནཏྠཱིཏི ཝུཏྟཾ ཧོཏཱི’’ཏི།

    Sabbaññutaññāṇaṃadhippetaṃ. Tañhi sabbañeyyadhammāvabodhane ‘‘kusalaṃ chekaṃ nipuṇa’’nti vuccati tattha asaṅgaappaṭihataṃ pavattatīti katvā. Samadhikāni ekena vassena. Ñāyanti etena catusaccadhammaṃ yāthāvato paṭivijjhantīti ñāyo, lokuttaramaggoti āha ‘‘ariyamaggadhammassā’’ti. Padissati etena ariyamaggo paccakkhato dissatīti padeso, vipassanāti vuttaṃ ‘‘padese vipassanāmagge’’ti. Samaṇopīti ettha pi-saddo ‘‘padesavattī’’ti etthāpi ānetvā sambandhitabboti āha ‘‘padesavatti…pe… natthīti vuttaṃ hotī’’ti.

    ༢༡༥. སོཏི ཏཐཱཝུཏྟོ ཨནྟེཝཱསཱི། ཏེནཱཏི ཨཱཙརིཡེན། ཨཏྟནོ ཋཱནེ ཋཔིཏོ ཧོཏི པརཔབྦཱཛནཱདཱིསུ ནིཡུཏྟཏྟཱ།

    215.Soti tathāvutto antevāsī. Tenāti ācariyena. Attano ṭhāne ṭhapito hoti parapabbājanādīsu niyuttattā.

    སཀྑིསཱཝཀོཏི པཙྩཀྑསཱཝཀོ, སམྨུཁསཱཝཀོཏི ཨཏྠོ། བྷགཝཏི དྷརམཱནེཏི དྷརམཱནསྶ བྷགཝཏོ སནྟིཀེ། སེསདྭཡེཔི ཨེསེཝ ནཡོ། སབྦོཔི སོཏི སབྦོ སོ ཏིཝིདྷོཔི། ཨཡཾ པན ཨརཧཏྟཾ པཏྟོ, ཏསྨཱ པརིཔུཎྞགཏཱཡ མཏྠཀཔྤཏྟོ པཙྪིམོ སཀྑིསཱཝཀོཏི།

    Sakkhisāvakoti paccakkhasāvako, sammukhasāvakoti attho. Bhagavati dharamāneti dharamānassa bhagavato santike. Sesadvayepi eseva nayo. Sabbopi soti sabbo so tividhopi. Ayaṃ pana arahattaṃ patto, tasmā paripuṇṇagatāya matthakappatto pacchimo sakkhisāvakoti.

    པཉྩམབྷཱཎཝཱརཝཎྞནཱ ནིཊྛིཏཱ།

    Pañcamabhāṇavāravaṇṇanā niṭṭhitā.

    ཏཐཱགཏཔཙྪིམཝཱཙཱཝཎྞནཱ

    Tathāgatapacchimavācāvaṇṇanā

    ༢༡༦. ཏནྟི བྷིཀྑུསངྒྷསྶ ཨོཝཱདཀངྒཾ དསྶེཏུཾ…པེ॰… ཝུཏྟཾ དྷམྨསངྒཱཧཀེཧཱིཏི ཨདྷིཔྤཱཡོ། སུཏྟཱབྷིདྷམྨསངྒཧིཏསྶ དྷམྨསྶ ཨཏིསཛྫནཾ སམྦོདྷནཾ དེསནཱ, ཏསྶེཝ པཀཱརཏོ ཉཱཔནཾ ཝེནེཡྻསནྟཱནེ ཋཔནཾ པཉྙཱཔནནྟི ‘‘དྷམྨོཔི དེསིཏོ ཙེཝ པཉྙཏྟོ ཙཱ’’ཏི ཝུཏྟཾ། ཏཐཱ ཝིནཡཏནྟིསངྒཧིཏསྶ ཀཱཡཝཱཙཱནཾ ཝིནཡནཏོ ‘‘ཝིནཡོ’’ཏི ལདྡྷཱདྷིཝཙནསྶ ཨཏྠསྶ ཨཏིསཛྫནཾ སམྦོདྷནཾ དེསནཱ, ཏསྶེཝ པཀཱརཏོ ཉཱཔནཾ ཨསངྐརཏོ ཋཔནཾ པཉྙཱཔནནྟི ‘‘ཝིནཡོཔི དེསིཏོ ཙེཝ པཉྙཏྟོ ཙཱ’’ཏི ཝུཏྟཾ། ཨདྷིསཱིལསིཀྑཱནིདྡེསབྷཱཝེན སཱསནསྶ མཱུལབྷཱུཏཏྟཱ ཝིནཡོ པཋམཾ སིཀྑིཏབྦོཏི ཏཾ ཏཱཝ ཨཡམུདྡེསཾ སརཱུཔཏོ དསྶེནྟོ ‘‘མཡཱ ཧི ཝོ’’ཏིཨཱདིམཱཧ། ཏཏྠ སཏྟཱཔཏྟིཀྑནྡྷཝསེནཱཏི སཏྟནྣཾ ཨཱཔཏྟིཀྑནྡྷཱནཾ ཨཝཱིཏིཀྐམནཱིཡཏཱཝསེན ། སཏྠུཀིཙྩཾ སཱདྷེསྶཏི ‘‘ཨིདཾ ཝོ ཀཏྟབྦཾ, ཨིདཾ ཝོ ན ཀཏྟབྦ’’ནྟི ཀཏྟབྦཱཀཏྟབྦསྶ ཝིབྷཱགེན ཨནུསཱསནཏོ།

    216.Tanti bhikkhusaṅghassa ovādakaṅgaṃ dassetuṃ…pe… vuttaṃ dhammasaṅgāhakehīti adhippāyo. Suttābhidhammasaṅgahitassa dhammassa atisajjanaṃ sambodhanaṃ desanā, tasseva pakārato ñāpanaṃ veneyyasantāne ṭhapanaṃ paññāpananti ‘‘dhammopi desito cevapaññatto cā’’ti vuttaṃ. Tathā vinayatantisaṅgahitassa kāyavācānaṃ vinayanato ‘‘vinayo’’ti laddhādhivacanassa atthassa atisajjanaṃ sambodhanaṃ desanā, tasseva pakārato ñāpanaṃ asaṅkarato ṭhapanaṃ paññāpananti ‘‘vinayopi desito ceva paññatto cā’’ti vuttaṃ. Adhisīlasikkhāniddesabhāvena sāsanassa mūlabhūtattā vinayo paṭhamaṃ sikkhitabboti taṃ tāva ayamuddesaṃ sarūpato dassento ‘‘mayā hi vo’’tiādimāha. Tattha sattāpattikkhandhavasenāti sattannaṃ āpattikkhandhānaṃ avītikkamanīyatāvasena . Satthukiccaṃ sādhessati ‘‘idaṃ vo kattabbaṃ, idaṃ vo na kattabba’’nti kattabbākattabbassa vibhāgena anusāsanato.

    ཏེན ཏེནཱཀཱརེནཱཏི ཏེན ཏེན ཝེནེཡྻཱནཾ ཨཛ྄ཛྷཱསཡཱནུརཱུཔེན པཀཱརེན། ཨིམེ དྷམྨེཏི ཨིམེ སཏྟཏིཾསབོདྷིཔཀྑིཡདྷམྨེ། ཏཔྤདྷཱནཏྟཱ སུཏྟནྟདེསནཱཡ ‘‘སུཏྟནྟཔིཊཀཾ དེསིཏ’’ནྟི ཝུཏྟཾ། སཏྠུཀིཙྩཾ སཱདྷེསྶཏི ཏཾཏཾཙརིཡཱནུརཱུཔཾ སམྨཱཔཊིཔཏྟིཡཱ ཨནུསཱསནཏོ། ཀུསལཱཀུསལཱབྱཱཀཏཝསེན ནཝ ཧེཏཱུ། ‘‘སཏྟ ཕསྶཱ’’ཏིཨཱདི སཏྟཝིཉྙཱཎདྷཱཏུསམྤཡོགཝསེན ཝུཏྟཾ། དྷམྨཱནུལོམེ ཏིཀཔཊྛཱནཱདཡོ ཚ, ཏཐཱ དྷམྨཔཙྩནཱིཡེ, དྷམྨཱནུལོམཔཙྩནཱིཡེ, དྷམྨཔཙྩནཱིཡཱནུལོམེཏི ཙཏུཝཱིསཏི སམནྟཔཊྛཱནཱནི ཨེཏསྶཱཏི ཙཏུཝཱིསཏིསམནྟཔཊྛཱནཾ, ཏཾ པན པཙྩཡཱནུལོམཱདིཝསེན ཝིབྷཛིཡམཱནཾ ཨཔརིམཱཎནཡཾ ཨེཝཱཏི ཨཱཧ ‘‘ཨནནྟནཡམཧཱཔཊྛཱནཔཊིམཎྜིཏ’’ནྟི། སཏྠུཀིཙྩཾ སཱདྷེསྶཏཱིཏི ཁནྡྷཱདིཝིབྷཱགེན ཉཱཡམཱནཾ ཙཏུསཙྩསམྦོདྷཱཝཧཏྟཱ སཏྠཱརཱ སམྨཱསམྦུདྡྷེན ཀཱཏབྦཀིཙྩཾ ནིཔྥཱདེསྶཏི།

    Tenatenākārenāti tena tena veneyyānaṃ ajjhāsayānurūpena pakārena. Ime dhammeti ime sattatiṃsabodhipakkhiyadhamme. Tappadhānattā suttantadesanāya ‘‘suttantapiṭakaṃ desita’’nti vuttaṃ. Satthukiccaṃ sādhessati taṃtaṃcariyānurūpaṃ sammāpaṭipattiyā anusāsanato. Kusalākusalābyākatavasena nava hetū. ‘‘Satta phassā’’tiādi sattaviññāṇadhātusampayogavasena vuttaṃ. Dhammānulome tikapaṭṭhānādayo cha, tathā dhammapaccanīye, dhammānulomapaccanīye, dhammapaccanīyānulometi catuvīsati samantapaṭṭhānāni etassāti catuvīsatisamantapaṭṭhānaṃ, taṃ pana paccayānulomādivasena vibhajiyamānaṃ aparimāṇanayaṃ evāti āha ‘‘anantanayamahāpaṭṭhānapaṭimaṇḍita’’nti. Satthukiccaṃ sādhessatīti khandhādivibhāgena ñāyamānaṃ catusaccasambodhāvahattā satthārā sammāsambuddhena kātabbakiccaṃ nipphādessati.

    ཨོཝདིསྶནྟི ཨནུསཱསིསྶནྟི ཨོཝཱདཱནུསཱསནཱིཀིཙྩནིཔྥཱདནཏོ།

    Ovadissanti anusāsissanti ovādānusāsanīkiccanipphādanato.

    ཙཱརིཏྟནྟི སམུདཱཙཱརཱ, ནཝེསུ པིཡཱལཱཔཾ ཝུཌྜྷེསུ གཱརཝཱལཱཔནྟི ཨཏྠོ། ཏེནཱཧ ‘‘བྷནྟེཏི ཝཱ ཨཱཡསྨཱཏི ཝཱ’’ཏི། གཱརཝཝཙནཾ ཧེཏཾ ཡདིདཾ བྷནྟེཏི ཝཱ ཨཱཡསྨཱཏི ཝཱ, ལོཀེ པན ‘‘ཏཏྲ བྷཝ’’ནྟི, ‘‘དེཝཱནཾ པིཡཱ’’ཏི ཙ གཱརཝཝཙནམེཝ།

    Cārittanti samudācārā, navesu piyālāpaṃ vuḍḍhesu gāravālāpanti attho. Tenāha ‘‘bhanteti vā āyasmāti vā’’ti. Gāravavacanaṃ hetaṃ yadidaṃ bhanteti vā āyasmāti vā, loke pana ‘‘tatra bhava’’nti, ‘‘devānaṃ piyā’’ti ca gāravavacanameva.

    ‘‘ཨཱཀངྑམཱནོ སམཱུཧནཏཱུ’’ཏི ཝུཏྟེ ‘‘ན ཨཱཀངྑམཱནོ ན སམཱུཧནཏཱུ’’ཏིཔི ཝུཏྟམེཝ ཧོཏཱིཏི ཨཱཧ ‘‘ཝིཀཔྤཝཙནེནེཝ ཋཔེསཱི’’ཏི། བལནྟི ཉཱཎབལཾ། ཡདི ཨསམཱུཧནནཾ དིཊྛཾ, ཏདེཝ ཙ ཨིཙྪིཏཾ, ཨཐ ཀསྨཱ བྷགཝཱ ‘‘ཨཱཀངྑམཱནོ སམཱུཧནཏཱུ’’ཏི ཨཝོཙཱཏི? ཏཐཱརཱུཔཔུགྒལཛ྄ཛྷཱསཡཝསེན། སནྟི ཧི ཀེཙི ཁུདྡཱནུཁུདྡཀཱནི སིཀྑཱཔདཱནི སམཱདཱཡ སཾཝཏྟིཏུཾ ཨནིཙྪནྟཱ, ཏེསཾ ཏཐཱ ཨཝུཙྩམཱནེ བྷགཝཏི ཝིགྷཱཏོ ཨུཔྤཛྫེཡྻ, ཏཾ ཏེསཾ བྷཝིསྶཏི དཱིགྷརཏྟཾ ཨཧིཏཱཡ དུཀྑཱཡ, ཏཐཱ པན ཝུཏྟེ ཏེསཾ ཝིགྷཱཏོ ན ཨུཔྤཛྫེཡྻ ‘‘ཨམྷཱཀཾ ཨེཝཱཡཾ དོསོ, ཡཏོ ཨམྷེསུ ཨེཝ ཀེཙི སམཱུཧནནཾ ན ཨིཙྪནྟཱི’’ཏི། ཀེཙི ‘‘སཀལསྶ པན སཱསནསྶ སངྒྷཱཡཏྟབྷཱཝཀརཎཏྠཾ ཏཐཱ ཝུཏྟ’’ནྟི ཝདནྟི། ཡཉྩ ཀིཉྩི སཏྠཱརཱ སིཀྑཱཔདཾ པཉྙཏྟཾ, ཏཾ སམཎཱ སཀྱཔུཏྟིཡཱ སིརསཱ སམྤཊིཙྪིཏྭཱ ཛཱིཝིཏཾ ཝིཡ རཀྑནྟི། ཏཐཱ ཧི ཏེ ‘‘ཁུདྡཱནུཁུདྡཀཱནི སིཀྑཱཔདཱནི ཨཱཀངྑམཱནོ སངྒྷོ སམཱུཧནཏཱུ’’ཏི ཝུཏྟེཔི ན སམཱུཧནིཾསུ, ཨཉྙདཏྠུ ‘‘པུརཏོ ཝིཡ ཏསྶ ཨཙྩཡེཔི རཀྑིཾསུ ཨེཝཱ’’ཏི སཏྠུསཱསནསྶ , སངྒྷསྶ ཙ མཧནྟབྷཱཝདསྶནཏྠམྤི ཏཐཱ ཝུཏྟནྟི དཊྛབྦཾ། ཏཐཱ ཧི ཨཱཡསྨཱ ཨཱནནྡོ, ཨཉྙེཔི ཝཱ བྷིཀྑཱུ ‘‘ཀཏམཾ པན བྷནྟེ ཁུདྡཀཾ, ཀཏམཾ ཨནུཁུདྡཀ’’ནྟི ན པུཙྪིཾསུ སམཱུཧནཛ྄ཛྷཱསཡསྶེཝ ཨབྷཱཝཏོ།

    ‘‘Ākaṅkhamāno samūhanatū’’ti vutte ‘‘na ākaṅkhamāno na samūhanatū’’tipi vuttameva hotīti āha ‘‘vikappavacaneneva ṭhapesī’’ti. Balanti ñāṇabalaṃ. Yadi asamūhananaṃ diṭṭhaṃ, tadeva ca icchitaṃ, atha kasmā bhagavā ‘‘ākaṅkhamāno samūhanatū’’ti avocāti? Tathārūpapuggalajjhāsayavasena. Santi hi keci khuddānukhuddakāni sikkhāpadāni samādāya saṃvattituṃ anicchantā, tesaṃ tathā avuccamāne bhagavati vighāto uppajjeyya, taṃ tesaṃ bhavissati dīgharattaṃ ahitāya dukkhāya, tathā pana vutte tesaṃ vighāto na uppajjeyya ‘‘amhākaṃ evāyaṃ doso, yato amhesu eva keci samūhananaṃ na icchantī’’ti. Keci ‘‘sakalassa pana sāsanassa saṅghāyattabhāvakaraṇatthaṃ tathā vutta’’nti vadanti. Yañca kiñci satthārā sikkhāpadaṃ paññattaṃ, taṃ samaṇā sakyaputtiyā sirasā sampaṭicchitvā jīvitaṃ viya rakkhanti. Tathā hi te ‘‘khuddānukhuddakāni sikkhāpadāni ākaṅkhamāno saṅgho samūhanatū’’ti vuttepi na samūhaniṃsu, aññadatthu ‘‘purato viya tassa accayepi rakkhiṃsu evā’’ti satthusāsanassa , saṅghassa ca mahantabhāvadassanatthampi tathā vuttanti daṭṭhabbaṃ. Tathā hi āyasmā ānando, aññepi vā bhikkhū ‘‘katamaṃ pana bhante khuddakaṃ, katamaṃ anukhuddaka’’nti na pucchiṃsu samūhanajjhāsayasseva abhāvato.

    ན ཏཾ ཨེཝཾ གཧེཏབྦནྟི ‘‘ནཱགསེནཏྠེརོ ཁུདྡཱནུཁུདྡཀཾ ཛཱནཱཏཱི’’ཏིཨཱདིནཱ ཝུཏྟཾ ཏཾ ནེསཾ ཝཙནཾ ཨིམིནཱ ཝུཏྟཱཀཱརེན ན གཧེཏབྦཾ ཨདྷིཔྤཱཡསྶ ཨཝིདིཏཏྟཱ། ཨིདཱནི ཏཾ ཨདྷིཔྤཱཡཾ ཝིབྷཱཝེཏུཾ ‘‘ནཱགསེནཏྠེརོ ཧཱི’’ཏིཨཱདི ཝུཏྟཾ། ཡསྨཱ ནཱགསེནཏྠེརོ (མིལིནྡཔཉྷེ ཨབྷེཛྫཝགྒེ ཝིཏྠཱརོ) པརེསཾ ཝཱདཔཐོཔཙྪེདནཏྠཾ སངྒཱིཏིཀཱལེ དྷམྨསངྒཱཧཀམཧཱཐེརེཧི གཧིཏཀོཊྛཱསེསུ ཙ ཨནྟིམཀོཊྛཱསམེཝ གཧེཏྭཱ མིལིནྡརཱཛཱནཾ པཉྙཱཔེསི། མཧཱཀསྶཔཏྠེརོ པན ཨེཀསིཀྑཱཔདམྤི ཨསམཱུཧནིཏུཀཱམཏཱཡ ཏཐཱ ཀམྨཝཱཙཾ སཱཝེཏི, ཏསྨཱ ཏཾ ཏེསཾ ཝཙནཾ ཏཐཱ ན གཧེཏབྦཾ།

    Na taṃ evaṃ gahetabbanti ‘‘nāgasenatthero khuddānukhuddakaṃ jānātī’’tiādinā vuttaṃ taṃ nesaṃ vacanaṃ iminā vuttākārena na gahetabbaṃ adhippāyassa aviditattā. Idāni taṃ adhippāyaṃ vibhāvetuṃ ‘‘nāgasenattherohī’’tiādi vuttaṃ. Yasmā nāgasenatthero (milindapañhe abhejjavagge vitthāro) paresaṃ vādapathopacchedanatthaṃ saṅgītikāle dhammasaṅgāhakamahātherehi gahitakoṭṭhāsesu ca antimakoṭṭhāsameva gahetvā milindarājānaṃ paññāpesi. Mahākassapatthero pana ekasikkhāpadampi asamūhanitukāmatāya tathā kammavācaṃ sāveti, tasmā taṃ tesaṃ vacanaṃ tathā na gahetabbaṃ.

    ༢༡༧. དྭེལ༹ྷཀནྟི དྭིདྷཱགཱཧོ, ཨནེཀཾསགྒཱཧོཏི ཨཏྠོ། ཝིམཏཱིཏི སཾསཡཱཔཏྟི། ཏེནཱཧ ‘‘ཝིནིཙྪིཏུཾ ཨསམཏྠཏཱ’’ཏི། ཏཾ ཝོ ཝདཱམཱིཏི ཏཾ སཾསཡཝནྟཾ བྷིཀྑུཾ སནྡྷཱཡ ཝོ ཏུམྷེ ཝདཱམི།

    217.Dveḷhakanti dvidhāgāho, anekaṃsaggāhoti attho. Vimatīti saṃsayāpatti. Tenāha ‘‘vinicchituṃ asamatthatā’’ti. Taṃ vo vadāmīti taṃ saṃsayavantaṃ bhikkhuṃ sandhāya vo tumhe vadāmi.

    ནིཀྐངྑབྷཱཝཔཙྩཀྑཀརཎཉཱཎཾ ཡེཝཱཏི བུདྡྷཱདཱིསུ ཏེསཾ བྷིཀྑཱུནཾ ནིཀྐངྑབྷཱཝསྶ པཙྩཀྑཀཱརིཡཱབྷཱཝཏོ ཏམཏྠཾ པཊིཝིཛ྄ཛྷིཏྭཱ ཋིཏཾ སབྦཉྙུཏཉྙཱཎམེཝ། ཨེཏྠ ཨེཏསྨིཾ ཨཏྠེ།

    Nikkaṅkhabhāvapaccakkhakaraṇañāṇaṃ yevāti buddhādīsu tesaṃ bhikkhūnaṃ nikkaṅkhabhāvassa paccakkhakāriyābhāvato tamatthaṃ paṭivijjhitvā ṭhitaṃ sabbaññutaññāṇameva. Ettha etasmiṃ atthe.

    ༢༡༨. ཨཔྤམཛྫནཾ ཨཔྤམཱདོ, སོ པན ཨཏྠཏོ ཉཱཎཱུཔསཉྷིཏཱ སཏི། ཡསྨཱ ཏཏྠ སཏིཡཱ བྱཱཔཱརོ སཱཏིསཡོ, ཏསྨཱ ‘‘སཏིཨཝིཔྤཝཱསེནཱ’’ཏི ཝུཏྟཾ། ཨཔྤམཱདཔདེཡེཝ པཀྑིཔིཏྭཱ ཨདཱསི ཏཾ ཨཏྠཏོ, ཏསྶ སཀལསྶ བུདྡྷཝཙནསྶ སངྒཎྷནཏོ ཙ།

    218. Appamajjanaṃ appamādo, so pana atthato ñāṇūpasañhitā sati. Yasmā tattha satiyā byāpāro sātisayo, tasmā ‘‘satiavippavāsenā’’ti vuttaṃ. Appamādapadeyeva pakkhipitvā adāsi taṃ atthato, tassa sakalassa buddhavacanassa saṅgaṇhanato ca.

    པརིནིབྦུཏཀཐཱཝཎྞནཱ

    Parinibbutakathāvaṇṇanā

    ༢༡༩. ཛྷཱནཱདཱིསུ, ཙིཏྟེ ཙ པརམུཀྐཾསགཏཝསཱིབྷཱཝཏཱཡ ‘‘ཨེཏྟཀེ ཀཱལེ ཨེཏྟཀཱ སམཱཔཏྟིཡོ སམཱཔཛྫིཏྭཱ པརིནིབྦཱཡིསྶཱམཱི’’ཏི ཀཱལཔརིཙྪེདཾ ཀཏྭཱ སམཱཔཏྟི སམཱཔཛྫནཾ ‘‘པརིནིབྦཱནཔརིཀམྨ’’ནྟི ཨདྷིཔྤེཏཾ། ཐེརོཏི ཨནུརུདྡྷཏྠེརོ།

    219. Jhānādīsu, citte ca paramukkaṃsagatavasībhāvatāya ‘‘ettake kāle ettakā samāpattiyo samāpajjitvā parinibbāyissāmī’’ti kālaparicchedaṃ katvā samāpatti samāpajjanaṃ ‘‘parinibbānaparikamma’’nti adhippetaṃ. Theroti anuruddhatthero.

    ཨཡམྤི ཙཱཏི ཡཐཱཝུཏྟཔཉྩསཊྛིཡཱ ཛྷཱནཱནཾ སམཱཔནྣབྷཱཝཀཐཱཔི སངྑེཔཀཐཱ ཨེཝ, ཀསྨཱ ? ཡསྨཱ བྷགཝཱ ཏདཱཔི དེཝསིཀཾ ཝལ༹ཉྫནསམཱཔཏྟིཡོ སབྦཱཔི ཨཔརིཧཱཔེཏྭཱ སམཱཔཛྫི ཨེཝཱཏི དསྶེནྟོ ‘‘ནིབྦཱནཔུརཾ པཝིསནྟོ’’ཏིཨཱདིམཱཧ།

    Ayampicāti yathāvuttapañcasaṭṭhiyā jhānānaṃ samāpannabhāvakathāpi saṅkhepakathā eva, kasmā ? Yasmā bhagavā tadāpi devasikaṃ vaḷañjanasamāpattiyo sabbāpi aparihāpetvā samāpajji evāti dassento ‘‘nibbānapuraṃ pavisanto’’tiādimāha.

    ཨིམཱནི དྭེཔི སམནནྟརཱནེཝ པཙྩཝེཀྑཎཱཡཔི ཡེབྷུཡྻེནཱནནྟརིཡཀཏཱཡ ཛྷཱནཔཀྑིཀབྷཱཝཏོ, ཡསྨཱ བྷཝངྒཙིཏྟཾ སབྦཔཙྪིམཾ, ཏཏོ བྷཝཏོ ཙཝནཏོ ‘‘ཙུཏཱི’’ཏི ཝུཙྩཏི, ཏསྨཱ ན ཀེཝལཾ ཨཡམེཝ བྷགཝཱ, ཨཐ ཁོ སབྦེཔི སཏྟཱ བྷཝངྒཙིཏྟེནེཝ ཙཝནྟཱིཏི དསྶེཏུཾ ‘‘ཡེ ཧི ཀེཙཱི’’ཏིཨཱདི ཝུཏྟཾ།

    Imāni dvepi samanantarāneva paccavekkhaṇāyapi yebhuyyenānantariyakatāya jhānapakkhikabhāvato, yasmā bhavaṅgacittaṃ sabbapacchimaṃ, tato bhavato cavanato ‘‘cutī’’ti vuccati, tasmā na kevalaṃ ayameva bhagavā, atha kho sabbepi sattā bhavaṅgacitteneva cavantīti dassetuṃ ‘‘ye hi kecī’’tiādi vuttaṃ.

    ༢༢༠. པཊིབྷཱགཔུགྒལཝིརཧིཏོཏི སཱིལཱདིགུཎེཧི ཨསདིསཏཱཡ སདིསཔུགྒལརཧིཏོ།

    220.Paṭibhāgapuggalavirahitoti sīlādiguṇehi asadisatāya sadisapuggalarahito.

    ༢༢༡. སངྑཱརཱ ཝཱུཔསམནྟི ཨེཏྠཱཏི ཝཱུཔསམོཏི ཨེཝཾསངྑཱཏཾ ཉཱཏཾ ཀཐིཏཾ ནིབྦཱནཾ།

    221. Saṅkhārā vūpasamanti etthāti vūpasamoti evaṃsaṅkhātaṃ ñātaṃ kathitaṃ nibbānaṃ.

    ༢༢༢. ཡནྟི པཙྩཏྟེ ཨུཔཡོགཝཙནནྟི ཨཱཧ ‘‘ཡོ ཀཱལཾ ཨཀརཱི’’ཏི།

    222.Yanti paccatte upayogavacananti āha ‘‘yo kālaṃ akarī’’ti.

    སུཝིཀསིཏེནེཝཱཏི པཱིཏིསོམནསྶཡོགཏོ སུཊྛུ ཝིཀསིཏེན མུདིཏེན། ཝེདནཾ ཨདྷིཝཱསེསི ཨབྷཱཝསམུདཡོ ཀཏོ སུཊྛུ པརིཉྙཱཏཏྟཱ། ཨནཱཝརཎཝིམོཀྑོ སབྦསོ ནིབྦུཏབྷཱཝཏོ།

    Suvikasitenevāti pītisomanassayogato suṭṭhu vikasitena muditena. Vedanaṃ adhivāsesi abhāvasamudayo kato suṭṭhu pariññātattā. Anāvaraṇavimokkho sabbaso nibbutabhāvato.

    ༢༢༣. ཨཱཀརོནྟི ཨཏྟནོ ཕལཱནི སམཱནཱཀཱརེ ཀརོནྟཱིཏི ཨཱཀཱརཱ, ཀཱརཎཱནི། སབྦཱཀཱརཝརཱུཔེཏེཏི སབྦེཧི ཨཱཀཱརཝརེཧི ཨུཏྟམཀཱརཎེཧི སཱིལཱདིགུཎེཧི སམནྣཱགཏེཏི ཨཏྠོ།

    223. Ākaronti attano phalāni samānākāre karontīti ākārā, kāraṇāni. Sabbākāravarūpeteti sabbehi ākāravarehi uttamakāraṇehi sīlādiguṇehi samannāgateti attho.

    ༢༢༥. ཀཐཾབྷཱུཏཱཏི ཀཱིདིསཱབྷཱུཏཱ།

    225.Kathaṃbhūtāti kīdisābhūtā.

    ཙུལླཀདྡྷཱནནྟི པརིཏྟཾ ཀཱལཾ དྭཏྟིནཱཌིཀཱམཏྟཾ ཝེལཾ།

    Cullakaddhānanti parittaṃ kālaṃ dvattināḍikāmattaṃ velaṃ.

    བུདྡྷསརཱིརཔཱུཛཱཝཎྞནཱ

    Buddhasarīrapūjāvaṇṇanā

    ༢༢༧. ཀཾསཏཱལཱ༹དི ཏཱལ༹ཾ ཨཝཙརཏི ཨེཏྠཱཏི ‘‘ཏཱལཱ༹ཝཙར’’ནྟི ཝུཙྩཏི ཨཱཏཏཱདིཏཱུརིཡབྷཎྜཾ། ཏེནཱཧ ‘‘སབྦཾ ཏཱུརིཡབྷཎྜ’’ནྟི།

    227. Kaṃsatāḷādi tāḷaṃ avacarati etthāti ‘‘tāḷāvacara’’nti vuccati ātatāditūriyabhaṇḍaṃ. Tenāha ‘‘sabbaṃ tūriyabhaṇḍa’’nti.

    དཀྑིཎདིསཱབྷཱགེནེཝཱཏི ཨཉྙེན དིསཱབྷཱགེན ཨནཱཧརིཏྭཱ ཡམཀསཱལཱནཾ ཋཱནཏོ དཀྑིཎདིསཱབྷཱགེནེཝ, ཏཏོཔི དཀྑིཎདིསཱབྷཱགཾ ཧརིཏྭཱ ནེཏྭཱ།

    Dakkhiṇadisābhāgenevāti aññena disābhāgena anāharitvā yamakasālānaṃ ṭhānato dakkhiṇadisābhāgeneva, tatopi dakkhiṇadisābhāgaṃ haritvā netvā.

    ཛེཏཝནསདིསེཏི སཱཝཏྠིཡཱ ཛེཏཝནསདིསེ ཋཱནེ, ‘‘ཛེཏཝནསདིསེ ཋཱནེ’’ཏིཔི པཱཋོ།

    Jetavanasadiseti sāvatthiyā jetavanasadise ṭhāne, ‘‘jetavanasadise ṭhāne’’tipi pāṭho.

    ༢༢༨. པསཱདྷནམངྒལསཱལཱཡཱཏི ཨབྷིསེཀཀཱལེ ཨལངྐརཎམངྒལསཱལཱཡ།

    228.Pasādhanamaṅgalasālāyāti abhisekakāle alaṅkaraṇamaṅgalasālāya.

    ༢༢༩. དེཝདཱནིཡོཏི ཏསྶ ཙོརསྶ ནཱམཾ།

    229.Devadāniyoti tassa corassa nāmaṃ.

    མཧཱཀསྶཔཏྠེརཝཏྠུཝཎྞནཱ

    Mahākassapattheravatthuvaṇṇanā

    ༢༣༡. པཱཝཱཡཱཏི པཱཝཱ ནགརཏོ། ཨཱཝཛྫནཔཊིབདྡྷཏྟཱ ཛཱནནསྶ ཨནཱཝཛྫིཏཏྟཱ སཏྠུ པརིནིབྦཱནཾ ཨཛཱནནྟོ ‘‘དསབལཾ པསྶིསྶཱམཱི’’ཏི ཐེརོ ཙིནྟེསི, སཏྠུ སརཱིརེ ཝཱ སཏྠུསཉྙཾ ཨུཔྤཱདེནྟོ ཏཐཱ ཙིནྟེསི། ཏེནེཝཱཧ ‘‘ཨཐ བྷགཝནྟཾ ཨུཀྑིཔིཏྭཱ’’ཏི། ‘‘དྷུཝཾ པརིནིབྦུཏོ བྷཝིསྶཏཱི’’ཏི ཙིནྟེསི པཱརིསེསཉཱཡེན། ཛཱནནྟོཔི ཐེརོ ཨཱཛཱིཝཀཾ པུཙྪིཡེཝ, པུཙྪནེ པན ཀཱརཎཾ སཡམེཝ པཀཱསེཏུཾ ‘‘ཀིཾ པནཱ’’ཏིཨཱདི ཨཱརདྡྷཾ།

    231.Pāvāyāti pāvā nagarato. Āvajjanapaṭibaddhattā jānanassa anāvajjitattā satthu parinibbānaṃ ajānanto ‘‘dasabalaṃ passissāmī’’ti thero cintesi, satthu sarīre vā satthusaññaṃ uppādento tathā cintesi. Tenevāha ‘‘atha bhagavantaṃ ukkhipitvā’’ti. ‘‘Dhuvaṃ parinibbuto bhavissatī’’ti cintesi pārisesañāyena. Jānantopi thero ājīvakaṃ pucchiyeva, pucchane pana kāraṇaṃ sayameva pakāsetuṃ ‘‘kiṃ panā’’tiādi āraddhaṃ.

    ཨཛྫ སཏྟཱཧཔརིནིབྦུཏོཏི ཨཛྫ དིཝསཏོ པཊིལོམཏོ སཏྟམེ ཨཧནི པརིནིབྦུཏོ།

    Ajja sattāhaparinibbutoti ajja divasato paṭilomato sattame ahani parinibbuto.

    ༢༣༢. ནཱལི༹ཡཱ ཝཱཔཀེནཱཏི ནཱལི༹ཡཱ ཙེཝ ཐཝིཀཱཡ ཙ།

    232.Nāḷiyā vāpakenāti nāḷiyā ceva thavikāya ca.

    མཉྫུཀེཏི མཉྫུབྷཱཎིནེ མདྷུརསྶརེ། པཊིབྷཱནེཡྻཀེཏི པཊིབྷཱནཝནྟེ། བྷུཉྫིཏྭཱ པཱཏབྦཡཱགཱུཏི པཋམཾ བྷུཉྫིཏྭཱ པིཝིཏབྦཡཱགུ།

    Mañjuketi mañjubhāṇine madhurassare. Paṭibhāneyyaketi paṭibhānavante. Bhuñjitvā pātabbayāgūti paṭhamaṃ bhuñjitvā pivitabbayāgu.

    ཏསྶཱཏི སུབྷདྡསྶ ཝུཌྜྷཔབྦཛིཏསྶ།

    Tassāti subhaddassa vuḍḍhapabbajitassa.

    ཨཱརཱདྷིཏསཱསནེཏི སམཱཧིཏསཱསནེ། ཨལནྟི སམཏྠོ། པཱཔོཏི པཱཔཔུགྒལོ། ཨོསཀྐཱཔེཏུནྟི ཧཱཔེཏུཾ ཨནྟརདྷཱཔེཏུཾ།

    Ārādhitasāsaneti samāhitasāsane. Alanti samattho. Pāpoti pāpapuggalo. Osakkāpetunti hāpetuṃ antaradhāpetuṃ.

    པཉྷཝཱརཱཏི པཉྷཱ ཝིཡ ཝིསྶཛྫནཱནི ‘‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏཱི’’ཏིཨཱདིནཱ, (དྷ॰ ས॰ ༡.༡) ‘‘ཡསྨིཾ སམཡེ རཱུཔཱུཔཔཏྟིཡཱ མགྒཾ བྷཱཝེཏཱི’’ཏིཨཱདིནཱ (དྷ॰ ས॰ ༡.༢༥༡) ཙ པཝཏྟཱནི ཨེཀཾ དྭེ བྷཱུམནྟརཱནི། མཱུལེ ནཊྛེ པིསཱཙསདིསཱ བྷཝིསྶཱམཱཏི ཡཐཱ རུཀྑེ ཨདྷིཝཏྠོ པིསཱཙོ ཏསྶ སཱཁཱཔརིཝཱརེ ནཊྛེ ཁནྡྷཾ ནིསྶཱཡ ཝསཏི, ཁནྡྷེ ནཊྛེ མཱུལཾ ནིསྶཱཡ ཝསཏི, མཱུལེ པན ནཊྛེ ཨནིསྶཡོཝ ཧོཏི, ཏཐཱ བྷཝིསྶཱམཱཏི ཨཏྠོ། ཨཐ ཝཱ མཱུལེ ནཊྛེཏི པིསཱཙེན ཀིར རུཀྑགཙྪཱདཱིནཾ ཀཉྩིདེཝ མཱུལཾ ཚིནྡིཏྭཱ ཨཏྟནོ པུཏྟསྶ དིནྣཾ, ཡཱཝ ཏཾ ཏསྶ ཧཏྠཏོ ན ཝིགཙྪཏི, ཏཱཝ སོ ཏཾ པདེསཾ ཨདིསྶམཱནརཱུཔོ ཝིཙརཏི། ཡདཱ པན ཏསྨིཾ ཀེནཙི ཨཙྪིནྣབྷཱཝེན ཝཱ སཏིཝིཔྤཝཱསཝསེན ཝཱ ནཊྛེ མནུསྶཱནམྤི དིསྶམཱནརཱུཔོ ཝིཙརཏི, ཏཾ སནྡྷཱཡཱཧ ‘‘མཱུལེ ནཊྛེ པིསཱཙསདིསཱ བྷཝིསྶཱམཱ’’ཏི།

    Pañhavārāti pañhā viya vissajjanāni ‘‘yasmiṃ samaye kāmāvacaraṃ kusalaṃ cittaṃ uppannaṃ hotī’’tiādinā, (dha. sa. 1.1) ‘‘yasmiṃ samaye rūpūpapattiyā maggaṃ bhāvetī’’tiādinā (dha. sa. 1.251) ca pavattāni ekaṃ dve bhūmantarāni.Mūle naṭṭhe pisācasadisā bhavissāmāti yathā rukkhe adhivattho pisāco tassa sākhāparivāre naṭṭhe khandhaṃ nissāya vasati, khandhe naṭṭhe mūlaṃ nissāya vasati, mūle pana naṭṭhe anissayova hoti, tathā bhavissāmāti attho. Atha vā mūle naṭṭheti pisācena kira rukkhagacchādīnaṃ kañcideva mūlaṃ chinditvā attano puttassa dinnaṃ, yāva taṃ tassa hatthato na vigacchati, tāva so taṃ padesaṃ adissamānarūpo vicarati. Yadā pana tasmiṃ kenaci acchinnabhāvena vā sativippavāsavasena vā naṭṭhe manussānampi dissamānarūpo vicarati, taṃ sandhāyāha ‘‘mūle naṭṭhe pisācasadisā bhavissāmā’’ti.

    མཾ ཀཱཡསཀྑིཾ ཀཏྭཱཏི ཏཾ པཊིཔདཾ ཀཱཡེན སཙྪིཀཏཝནྟཾ ཏསྨཱ ཏསྶཱ དེསནཱཡ སཀྑིབྷཱུཏཾ མཾ ཀཏྭཱ། པཊིཙྪཱཔེསི ཏཾ པཊིཙྪཱཔནཾ ཀསྶཔསུཏྟེན དཱིཔེཏབྦཾ།

    Maṃ kāyasakkhiṃ katvāti taṃ paṭipadaṃ kāyena sacchikatavantaṃ tasmā tassā desanāya sakkhibhūtaṃ maṃ katvā. Paṭicchāpesi taṃ paṭicchāpanaṃ kassapasuttena dīpetabbaṃ.

    ༢༣༣. ཙནྡནགྷཊིཀཱབཱཧུལླཏོ ཙནྡནཙིཏཀཱ།

    233. Candanaghaṭikābāhullato candanacitakā.

    ཏཾ སུཏྭཱཏི ཏཾ ཨཱཡསྨཏཱ ཨནུརུདྡྷཏྠེརེན ཝུཏྟཾ དེཝཏཱནཾ ཨདྷིཔྤཱཡཾ སུཏྭཱ།

    Taṃ sutvāti taṃ āyasmatā anuruddhattherena vuttaṃ devatānaṃ adhippāyaṃ sutvā.

    ༢༣༤. དསིཀཏནྟཾ ཝཱཏི པལིཝེཋིཏཨཧཏཀཱསིཀཝཏྠཱནཾ དསཋཱནེན ཏནྟུམཏྟམྤི ཝཱ། དཱརུཀྑནྡྷཾ ཝཱཏི ཙནྡནཱདིཙིཏཀདཱརུཀྑནྡྷཾ ཝཱ།

    234.Dasikatantaṃ vāti paliveṭhitaahatakāsikavatthānaṃ dasaṭhānena tantumattampi vā. Dārukkhandhaṃ vāti candanādicitakadārukkhandhaṃ vā.

    ༢༣༥. སམུདཱཡེསུ པཝཏྟཝོཧཱརཱནཾ ཨཝཡཝེསུ དིསྶནཏོ སརཱིརསྶ ཨཝཡཝབྷཱུཏཱནི ཨཊྛཱིནི ‘‘སརཱིརཱནཱི’’ཏི ཝུཏྟཱནི།

    235. Samudāyesu pavattavohārānaṃ avayavesu dissanato sarīrassa avayavabhūtāni aṭṭhīni ‘‘sarīrānī’’ti vuttāni.

    ན ཝིཔྤཀིརིཾསཱུཏི སརཱུཔེནེཝ ཋིཏཱཏི ཨཏྠོ། ‘‘སེསཱ ཝིཔྤཀིརིཾསཱུ’’ཏི ཝཏྭཱ ཡཐཱ པན ཏཱ ཝིཔྤཀིཎྞཱ ཨཧེསུཾ, ཏཾ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ།

    Na vippakiriṃsūti sarūpeneva ṭhitāti attho. ‘‘Sesā vippakiriṃsū’’ti vatvā yathā pana tā vippakiṇṇā ahesuṃ, taṃ dassetuṃ ‘‘tatthā’’tiādi vuttaṃ.

    ཨུདཀདྷཱརཱ ནིཀྑམིཏྭཱ ནིབྦཱཔེསུནྟི དེཝཏཱནུབྷཱཝེན། ཨེཝཾ མཧཏིཡོ བཧཱུ ཨུདཀདྷཱརཱ ཀིམཏྠཱཡཱཏི ཨཱཧ ‘‘བྷགཝཏོ ཙིཏཀོ མཧནྟོ’’ཏི། མཧཱ ཧི སོ ཝཱིསརཏནསཏིཀོ། ཨཊྛདནྟཀེཧཱིཏི ནངྒལེཧི ཨཊྛེཝ ཧི ནེསཾ དནྟསདིསཱནི པོཏྠཱནི ཧོནྟི, ཏསྨཱ ‘‘ཨཊྛདནྟཀཱནཱི’’ཏི ཝུཙྩཏི།

    Udakadhārā nikkhamitvā nibbāpesunti devatānubhāvena. Evaṃ mahatiyo bahū udakadhārā kimatthāyāti āha ‘‘bhagavato citako mahanto’’ti. Mahā hi so vīsaratanasatiko. Aṭṭhadantakehīti naṅgalehi aṭṭheva hi nesaṃ dantasadisāni potthāni honti, tasmā ‘‘aṭṭhadantakānī’’ti vuccati.

    དྷམྨཀཐཱཝ པམཱཎནྟི ཨཏིཝིཡ ཨཙྪརིཡབྦྷུཏབྷཱཝཏོ པསྶནྟཱནཾ, སུཎནྟཱནཉྩ སཱཏིསཡཾ པསཱདཱཝཧབྷཱཝཏོ, སཝིསེསཾ བུདྡྷཱནུབྷཱཝདཱིཔནཏོ། པརིནིབྦུཏསྶ ཧི བུདྡྷསྶ བྷགཝཏོ ཨེཝརཱུཔོ ཨཱནུབྷཱཝོཏི ཏཾ པཝཏྟིཾ ཀཐེནྟཱནཾ དྷམྨཀཐིཀཱནཾ ཨཏྟནོ ཉཱཎབལཱནུརཱུཔཾ པཝཏྟིཡམཱནཱ དྷམྨཀཐཱ ཨེཝེཏྠ པམཱཎཾ ཝཎྞེཏབྦསྶ ཨཏྠསྶ མཧཱཝིསཡཏྟཱ, ཏསྨཱ ཝཎྞནཱབྷཱུམི ནཱམེསཱཏི ཨདྷིཔྤཱཡོ། ཙཏུཛྫཱཏིཡགནྡྷཔརིབྷཎྜཾ ཀཱརེཏྭཱཏི ཏགརཀུངྐུམཡཝནཔུཔྥཏམཱལཔཏྟཱནི པིསིཏྭཱ ཀཏགནྡྷེན པརིབྷཎྜཾ ཀཱརེཏྭཱ། ཁཙིཏྭཱཏི ཏཏྠ ཏཏྠ ཨོལམྦནཝསེན རཙེཏྭཱ, གནྡྷཝཏྠཱུནི གཧེཏྭཱ གནྠིཏམཱལཱ གནྡྷདཱམཱནི རཏནཱཝལི༹ཡོ རཏནདཱམཱནི། བཧིཀིལཉྫཔརིཀྑེཔསྶ, ཨནྟོསཱཎིཔརིཀྑེཔསྶ ཀརཎེན སཱཎིཀིལཉྫཔརིཀྑེཔཾ ཀཱརེཏྭཱ། ཝཱཏགྒཱཧིནིཡོ པཊཱཀཱ ཝཱཏཔཊཱཀཱ། སརབྷརཱུཔཔཱདཀོ པལླངྐོ སརབྷམཡཔལླངྐོ, ཏསྨིཾ སརབྷམཡཔལླངྐེ།

    Dhammakathāvapamāṇanti ativiya acchariyabbhutabhāvato passantānaṃ, suṇantānañca sātisayaṃ pasādāvahabhāvato, savisesaṃ buddhānubhāvadīpanato. Parinibbutassa hi buddhassa bhagavato evarūpo ānubhāvoti taṃ pavattiṃ kathentānaṃ dhammakathikānaṃ attano ñāṇabalānurūpaṃ pavattiyamānā dhammakathā evettha pamāṇaṃ vaṇṇetabbassa atthassa mahāvisayattā, tasmā vaṇṇanābhūmi nāmesāti adhippāyo. Catujjātiyagandhaparibhaṇḍaṃ kāretvāti tagarakuṅkumayavanapupphatamālapattāni pisitvā katagandhena paribhaṇḍaṃ kāretvā. Khacitvāti tattha tattha olambanavasena racetvā, gandhavatthūni gahetvā ganthitamālā gandhadāmāni ratanāvaḷiyo ratanadāmāni. Bahikilañjaparikkhepassa, antosāṇiparikkhepassa karaṇena sāṇikilañjaparikkhepaṃ kāretvā. Vātaggāhiniyo paṭākā vātapaṭākā. Sarabharūpapādako pallaṅko sarabhamayapallaṅko, tasmiṃ sarabhamayapallaṅke.

    སཏྟིཧཏྠཱ པུརིསཱ སཏྟིཡོ ཏཾསཧཙརཎཏོ ཡཐཱ ‘‘ཀུནྟཱ པཙརནྟཱི’’ཏི, ཏེཧི སམནྟཏོ རཀྑཱཔནཾ པཉྩཀརཎནྟི ཨཱཧ ‘‘སཏྟིཧཏྠེཧི པུརིསེཧི པརིཀྑིཔཱཔེཏྭཱ’’ཏི། དྷནཱུཧཱིཏི ཨེཏྠཱཔི ཨེསེཝ ནཡོ། སནྣཱཧགཝཙྪིཀཾ ཝིཡ ཀཏྭཱ ནིརནྟརཱཝཊྛིཏཨཱརཀྑསནྣཱཧེན གཝཙྪིཛཱལཾ ཝིཡ ཀཏྭཱ།

    Sattihatthā purisā sattiyo taṃsahacaraṇato yathā ‘‘kuntā pacarantī’’ti, tehi samantato rakkhāpanaṃ pañcakaraṇanti āha ‘‘sattihatthehi purisehi parikkhipāpetvā’’ti. Dhanūhīti etthāpi eseva nayo. Sannāhagavacchikaṃviya katvā nirantarāvaṭṭhitaārakkhasannāhena gavacchijālaṃ viya katvā.

    སཱདྷུཀཱིལི༹ཏནྟི སཔརཧིཏཾ སཱདྷནཊྛེན སཱདྷཱུ, ཏེསཾ ཀཱིལི༹ཏཾ ཨུལཱ༹རཔུཉྙཔསཝནཏོ, སམྤརཱཡིཀཏྠཱཝིརོདྷིཀཾ ཀཱིལཱ༹ཝིཧཱརནྟི ཨཏྠོ།

    Sādhukīḷitanti saparahitaṃ sādhanaṭṭhena sādhū, tesaṃ kīḷitaṃ uḷārapuññapasavanato, samparāyikatthāvirodhikaṃ kīḷāvihāranti attho.

    སརཱིརདྷཱཏུཝིབྷཛནཝཎྞནཱ

    Sarīradhātuvibhajanavaṇṇanā

    ༢༣༦. ཨིམིནཱཝ ནིཡཱམེནཱཏི ཡེན ནཱིཧཱརེན མཧཱཏལེ ནིསིནྣོ ཀཉྩི པརིཧཱརཾ ཨཀཏྭཱ ཀེཝལཾ ཨིམིནཱ ནིཡཱམེནེཝ། སུཔིནཀོཏི དུསྶུཔིནཀོ། དུཀཱུལདུཔཊྚཾ ནིཝཱསེཏྭཱཏི དྭེ དུཀཱུལཝཏྠཱནི ཨེཀཛ྄ཛྷཾ ཀཏྭཱ ནིཝཱསེཏྭཱ། ཨེཝཉྷི ཏཱནི སོཀསམཔྤིཏསྶཱཔི ཨབྷསྶིཏྭཱ ཏིཊྛནྟི།

    236.Imināva niyāmenāti yena nīhārena mahātale nisinno kañci parihāraṃ akatvā kevalaṃ iminā niyāmeneva. Supinakoti dussupinako. Dukūladupaṭṭaṃ nivāsetvāti dve dukūlavatthāni ekajjhaṃ katvā nivāsetvā. Evañhi tāni sokasamappitassāpi abhassitvā tiṭṭhanti.

    ཨབྷིསེཀསིཉྩཀོཏི རཛྫཱབྷིསེཀེ ཨབྷིསེཀམངྒལསིཉྩཀོ ཨུཏྟམམངྒལབྷཱཝཏོ། ཝིསཉྙཱི ཛཱཏོ ཡཐཱ ཏཾ བྷགཝཏོ གུཎཝིསེསཱམཏརསཉྙུཏཱཡ ཨཝཊྛིཏཔེམོ པོཐུཛྫནིཀསདྡྷཱཡ པཏིཊྛིཏཔསཱདོ ཀཏཱུཔཀཱརཏཱཡ སཉྫནིཏཙིཏྟམདྡཝོ།

    Abhisekasiñcakoti rajjābhiseke abhisekamaṅgalasiñcako uttamamaṅgalabhāvato. Visaññī jāto yathā taṃ bhagavato guṇavisesāmatarasaññutāya avaṭṭhitapemo pothujjanikasaddhāya patiṭṭhitapasādo katūpakāratāya sañjanitacittamaddavo.

    སུཝཎྞབིམྦིསཀཝཎྞནྟི སུཝིརཙིཏ ཨཔསྶེནསདིསཾ།

    Suvaṇṇabimbisakavaṇṇanti suviracita apassenasadisaṃ.

    ཀསྨཱ པནེཏྠ པཱཝེཡྻཀཱ པཱལི༹ཡཾ སབྦཔཙྪཏོ གཧིཏཱ, ཀིཾ ཏེ ཀུསིནཱརཱཡ ཨཱསནྣཏརཱཔི སབྦཔཙྪཏོ ཨུཊྛིཏཱ? ཨཱམ, སབྦཔཙྪཏོ ཨུཊྛིཏཱཏི དསྶེཏུཾ ‘‘ཏཏྠ པཱཝེཡྻཀཱ’’ཏིཨཱདི ཝུཏྟཾ།

    Kasmā panettha pāveyyakā pāḷiyaṃ sabbapacchato gahitā, kiṃ te kusinārāya āsannatarāpi sabbapacchato uṭṭhitā? Āma, sabbapacchato uṭṭhitāti dassetuṃ ‘‘tattha pāveyyakā’’tiādi vuttaṃ.

    དྷཱཏུཔཱསནཏྠནྟི སཏྠུ དྷཱཏཱུནཾ པཡིརུཔཱསནཱཡ། ནེསཾ པཀྑཱ ཨཧེསུཾ ‘‘ཉཱཡེན ཏེསཾ སནྟཀཱ དྷཱཏུཡོ’’ཏི།

    Dhātupāsanatthanti satthu dhātūnaṃ payirupāsanāya. Nesaṃ pakkhā ahesuṃ ‘‘ñāyena tesaṃ santakā dhātuyo’’ti.

    ༢༣༧. དོཎགཛྫིཏཾ ནཱམ ཨཝོཙ སཏྠུ ཨཝཏྠཏྟཡཱུཔསཾཧིཏཾ། ཨེཏདཏྠམེཝ ཧི བྷགཝཱ མགྒཾ གཙྪནྟོ ‘‘པཙྪཏོ ཨཱགཙྪནྟོ དོཎོ བྲཱཧྨཎོ ཡཱཝ མེ པདཝལ༹ཉྫཾ པསྶཏི, ཏཱཝ མཱ ཝིགཙྪཏཱུ’’ཏི ཨདྷིཊྛཱཡ ཨཉྙཏརསྨིཾ རུཀྑམཱུལེ ནིསཱིདི། དོཎོཔི ཁོ བྲཱཧྨཎོ ‘‘ཨིམཱནི སདེཝཀེ ལོཀེ ཨགྒཔུགྒལསྶ པདཱནཱི’’ཏི སལླཀྑེནྟོ པདཱནུསཱརེན སཏྠུ སནྟིཀཾ ཨུཔགཙྪི, སཏྠཱཔིསྶ དྷམྨཾ དེསེསི, ཏེནཔི སོ བྷགཝཏི ནིཝིཊྛསདྡྷོ ཨཧོསི། ཨེཏདཝོཙ, ཀིཾ ཨཝོཙཱཏི ཨཱཧ ‘‘སུཎནྟུ…པེ॰… ཨཝོཙཱ’’ཏི།

    237.Doṇagajjitaṃ nāma avoca satthu avatthattayūpasaṃhitaṃ. Etadatthameva hi bhagavā maggaṃ gacchanto ‘‘pacchato āgacchanto doṇo brāhmaṇo yāva me padavaḷañjaṃ passati, tāva mā vigacchatū’’ti adhiṭṭhāya aññatarasmiṃ rukkhamūle nisīdi. Doṇopi kho brāhmaṇo ‘‘imāni sadevake loke aggapuggalassa padānī’’ti sallakkhento padānusārena satthu santikaṃ upagacchi, satthāpissa dhammaṃ desesi, tenapi so bhagavati niviṭṭhasaddho ahosi. Etadavoca, kiṃ avocāti āha ‘‘suṇantu…pe… avocā’’ti.

    ཀཱཡེན ཨེཀསནྣིཔཱཏཱ ཝཱཙཱཡ ཨེཀཝཙནཱ ཨབྷིནྣཝཙནཱ ཨེཝཾ སམགྒཱ ཧོཐ། ཏསྶ པནིདཾ ཀཱརཎནྟི ཨཱཧ ‘‘སམྨོདམཱནཱ’’ཏི། ཏེནཱཧ ‘‘ཙིཏྟེནཱཔི ཨཉྙམཉྙཾ སམྨོདམཱནཱ ཧོཐཱ’’ཏི།

    Kāyena ekasannipātā vācāya ekavacanā abhinnavacanā evaṃ samaggā hotha. Tassa panidaṃ kāraṇanti āha ‘‘sammodamānā’’ti. Tenāha ‘‘cittenāpi aññamaññaṃ sammodamānā hothā’’ti.

    ༢༣༨. ཏཏོ ཏཏོ སམཱགཏསངྒྷཱནནྟི ཏཏོ ཏཏོ ཨཏྟནོ ཝསནཊྛཱནཏོ སམཱགནྟྭཱ སནྣིཔཏིཏབྷཱཝེན སམཱགཏསངྒྷཱནཾ། ཏཐཱ སམཱཔཏིཏསམཱུཧབྷཱཝེན སམཱགཏགཎཱནཾ། ཝཙནསམྤཊིཙྪནེན པཊིསྶུཎིཏྭཱ།

    238.Tato tato samāgatasaṅghānanti tato tato attano vasanaṭṭhānato samāgantvā sannipatitabhāvena samāgatasaṅghānaṃ. Tathā samāpatitasamūhabhāvena samāgatagaṇānaṃ. Vacanasampaṭicchanena paṭissuṇitvā.

    དྷཱཏུཐཱུཔཔཱུཛཱཝཎྞནཱ

    Dhātuthūpapūjāvaṇṇanā

    ༢༣༩. ཡཀྑགྒཱཧོ དེཝཏཱཝེསོ། ཁིཔིཏཀཾ དྷཱཏུཀྑོབྷཾ ཨུཔྤཱདེཏྭཱ ཁིཔིཏཀརོགོ། ཨརོཙཀོ ཨཱཧཱརསྶ ཨརུཙྩནརོགོ།

    239.Yakkhaggāho devatāveso. Khipitakaṃ dhātukkhobhaṃ uppādetvā khipitakarogo. Arocako āhārassa aruccanarogo.

    སཏྟམདིཝསེཏི སཏྟཝསྶསཏྟམཱསཏོ པརཏོ སཏྟམེ དིཝསེ། བལཱནུརཱུཔེནཱཏི ཝིབྷཝབལཱནུརཱུཔེན།

    Sattamadivaseti sattavassasattamāsato parato sattame divase. Balānurūpenāti vibhavabalānurūpena.

    པཙྪཱ སངྒཱིཏིཀཱརཀཱཏི དུཏིཡཾ ཏཏིཡཾ སངྒཱིཏིཀཱརཀཱ། དྷཱཏཱུནཾ ཨནྟརཱཡཾ དིསྭཱཏི ཏཏྠ ཏཏྠ ཙེཏིཡེ ཡཐཱཔཏིཊྛཱཔིཏབྷཱཝེནེཝ ཋིཏཱནཾ དྷཱཏཱུནཾ མིཙྪཱདིཊྛིཀཱནཾ ཝསེན ཨནྟརཱཡཾ དིསྭཱ, མཧཱདྷཱཏུནིདྷཱནེན སམྨདེཝ རཀྑིཏཱནཾ ཨནཱགཏེ ཨསོཀེན དྷམྨརཉྙཱ ཏཏོ ཨུདྡྷརིཏྭཱ ཝིཏྠཱརིཏབྷཱཝེ ཀཏེ སདེཝཀསྶ ལོཀསྶ ཧིཏསུཁཱཝཧབྷཱཝཉྩ དིསྭཱཏི ཨདྷིཔྤཱཡོ། པརིཙརཎམཏྟམེཝཱཏི གཧེཏྭཱ པརིཙརིཏབྦདྷཱཏུམཏྟམེཝ། རཱཛཱུནཾ ཧཏྠེ ཋཔེཏྭཱ, ན ཙེཏིཡེསུ། ཏཐཱ ཧི པཙྪཱ ཨསོཀམཧཱརཱཛཱ ཙེཏིཡེསུ དྷཱཏཱུནཾ ན ལབྷཏི།

    Pacchā saṅgītikārakāti dutiyaṃ tatiyaṃ saṅgītikārakā. Dhātūnaṃ antarāyaṃ disvāti tattha tattha cetiye yathāpatiṭṭhāpitabhāveneva ṭhitānaṃ dhātūnaṃ micchādiṭṭhikānaṃ vasena antarāyaṃ disvā, mahādhātunidhānena sammadeva rakkhitānaṃ anāgate asokena dhammaraññā tato uddharitvā vitthāritabhāve kate sadevakassa lokassa hitasukhāvahabhāvañca disvāti adhippāyo. Paricaraṇamattamevāti gahetvā paricaritabbadhātumattameva. Rājūnaṃ hatthe ṭhapetvā, na cetiyesu. Tathā hi pacchā asokamahārājā cetiyesu dhātūnaṃ na labhati.

    པུརིམཾ པུརིམཾ ཀཏསྶ གཎྷནཡོགྱཾ པཙྪིམཾ པཙྪིམཾ ཀཱརེནྟོ ཨཊྛ ཨཊྛ ཧརིཙནྡནཱདིམཡེ ཀརཎྜེ ཙ ཐཱུཔེ ཙ ཀཱརེསི། ལོཧིཏཙནྡནམཡཱདཱིསུཔི ཨེསེཝ ནཡོ། མཎིཀརཎྜེསཱུཏི ལོཧིཏངྐམསཱརགལླཕལིཀམཡེ ཋཔེཏྭཱ ཨཝསེསམཎིཝིཙིཏྟཀེསུ ཀརཎྜེསུ།

    Purimaṃ purimaṃ katassa gaṇhanayogyaṃ pacchimaṃ pacchimaṃ kārento aṭṭha aṭṭha haricandanādimaye karaṇḍe ca thūpe ca kāresi. Lohitacandanamayādīsupi eseva nayo. Maṇikaraṇḍesūti lohitaṅkamasāragallaphalikamaye ṭhapetvā avasesamaṇivicittakesu karaṇḍesu.

    ཐཱུཔཱརཱམཙེཏིཡཔྤམཱཎནྟི དེཝཱནཾཔིཡཏིསྶམཧཱརཱཛེན ཀཱརིཏཙེཏིཡཔྤམཱཎཾ།

    Thūpārāmacetiyappamāṇanti devānaṃpiyatissamahārājena kāritacetiyappamāṇaṃ.

    མཱལཱ མཱ མིལཱཡནྟཱུཏི ‘‘ཡཱཝ ཨསོཀོ དྷམྨརཱཛཱ བཧི ཙེཏིཡཱནི ཀཱརེཏུཾ ཨིཏོ དྷཱཏུཡོ ཨུདྡྷརིསྶཏི, ཏཱཝ མཱལཱ མཱ མིལཱཡནྟཱུ’’ཏི ཨདྷིཊྛཧིཏྭཱ། ཨཱཝིཉྪནརཛྫུཡནྟི ཨགྒལཱ༹ཝིཉྪནརཛྫུཡཾ། ཀུཉྩིཀམུདྡིཀནྟི དྭཱརཝིཝརཎཏྠཾ ཀུཉྩིཀཉྩེཝ མུདྡིཀཉྩ།

    Mālā mā milāyantūti ‘‘yāva asoko dhammarājā bahi cetiyāni kāretuṃ ito dhātuyo uddharissati, tāva mālā mā milāyantū’’ti adhiṭṭhahitvā. Āviñchanarajjuyanti aggaḷāviñchanarajjuyaṃ. Kuñcikamuddikanti dvāravivaraṇatthaṃ kuñcikañceva muddikañca.

    ཝཱལ༹སངྒྷཱཏཡནྟནྟི ཀུཀྐུལཾ པཊིབྷཡདསྶནཾ ཨཉྙམཉྙཔཊིབདྡྷགམནཱདིཏཱཡ སངྒྷཱཊིཏརཱུཔཀཡནྟཾ ཡོཛེསི། ཏེནཱཧ ‘‘ཀཊྛརཱུཔཀཱནཱི’’ཏིཨཱདི། ཨཱཎིཡཱ བནྡྷིཏྭཱཏི ཨནེཀཀཊྛརཱུཔཝིཙིཏྟཡནྟཾ ཨཏྟནོ དེཝཱནུབྷཱཝེན ཨེཀཱཡ ཨེཝ ཨཱཎིཡཱ བནྡྷིཏྭཱ ཝིསྶཀམྨོ དེཝལོཀམེཝ གཏོ། ‘‘སམནྟཏོ’’ཏིཨཱདི པན ཏསྨིཾ དྷཱཏུནིདཱནེ ཨཛཱཏསཏྟུནོ ཀིཙྩཝིསེསཱནུཊྛཱནདསྶནཾ།

    Vāḷasaṅghātayantanti kukkulaṃ paṭibhayadassanaṃ aññamaññapaṭibaddhagamanāditāya saṅghāṭitarūpakayantaṃ yojesi. Tenāha ‘‘kaṭṭharūpakānī’’tiādi. Āṇiyā bandhitvāti anekakaṭṭharūpavicittayantaṃ attano devānubhāvena ekāya eva āṇiyā bandhitvā vissakammo devalokameva gato. ‘‘Samantato’’tiādi pana tasmiṃ dhātunidāne ajātasattuno kiccavisesānuṭṭhānadassanaṃ.

    ‘‘ཨསུཀཊྛཱནེ ནཱམ དྷཱཏུནིདྷཱན’’ནྟི རཉྙཱ པུཙྪིཏེ ‘‘ཏསྨིཾ སནྣིཔཱཏེ ཝིསེསལཱབྷིནོ ནཱཧེསུ’’ནྟི ཀེཙི། ‘‘ཨཏྟཱནཾ ནིགཱུཧིཏྭཱ ཏསྶ ཝུཌྜྷཏརསྶ ཝཙནཾ ནིསྶཱཡ ཝཱིམཾསནྟོ ཛཱནིསྶཏཱིཏི ན ཀཐེསུ’’ནྟི ཨཔརེ། ཡཀྑདཱསཀེཏི ཨུཔཧཱརཱདིཝིདྷིནཱ དེཝཏཱཝེསནཀེ བྷཱུཏཱཝིགྒཱཧཀེ།

    ‘‘Asukaṭṭhāne nāma dhātunidhāna’’nti raññā pucchite ‘‘tasmiṃ sannipāte visesalābhino nāhesu’’nti keci. ‘‘Attānaṃ nigūhitvā tassa vuḍḍhatarassa vacanaṃ nissāya vīmaṃsanto jānissatīti na kathesu’’nti apare. Yakkhadāsaketi upahārādividhinā devatāvesanake bhūtāviggāhake.

    ཨིམཾ པདནྟི ‘‘ཨེཝམེཏཾ བྷཱུཏཔུབྦ’’ནྟི དུཏིཡསངྒཱིཏིཀཱརེཧི ཋཔིཏཾ ཨིམཾ པདཾ། མཧཱདྷཱཏུནིདྷཱནམྤི ཏསྶ ཨཏྠཾ ཀཏྭཱ ཏཏིཡསངྒཱིཏིཀཱརཱཔི ཋཔཡིཾསུ།

    Imaṃpadanti ‘‘evametaṃ bhūtapubba’’nti dutiyasaṅgītikārehi ṭhapitaṃ imaṃ padaṃ. Mahādhātunidhānampi tassa atthaṃ katvā tatiyasaṅgītikārāpi ṭhapayiṃsu.

    མཧཱཔརིནིབྦཱནསུཏྟཝཎྞནཱཡ ལཱིནཏྠཔྤཀཱསནཱ།

    Mahāparinibbānasuttavaṇṇanāya līnatthappakāsanā.




    Next: ༤. མཧཱསུདསྶནསུཏྟཝཎྞནཱ • 4. Mahāsudassanasuttavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༣. མཧཱཔརིནིབྦཱནསུཏྟཾ • 3. Mahāparinibbānasuttaṃ

    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༣. མཧཱཔརིནིབྦཱནསུཏྟཝཎྞནཱ • 3. Mahāparinibbānasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact