Library / Tipiṭaka / ติปิฎก • Tipiṭaka / อปทานปาฬิ • Apadānapāḷi

    ๑๒. มหาปริวารวโคฺค

    12. Mahāparivāravaggo

    ๑. มหาปริวารกเตฺถรอปทานํ

    1. Mahāparivārakattheraapadānaṃ

    ๑.

    1.

    ‘‘วิปสฺสี นาม ภควา, โลกเชโฎฺฐ นราสโภ;

    ‘‘Vipassī nāma bhagavā, lokajeṭṭho narāsabho;

    อฎฺฐสฎฺฐิสหเสฺสหิ, ปาวิสิ พนฺธุมํ ตทาฯ

    Aṭṭhasaṭṭhisahassehi, pāvisi bandhumaṃ tadā.

    ๒.

    2.

    ‘‘นครา อภินิกฺขมฺม, อคมํ ทีปเจติยํ;

    ‘‘Nagarā abhinikkhamma, agamaṃ dīpacetiyaṃ;

    อทฺทสํ วิรชํ พุทฺธํ, อาหุตีนํ ปฎิคฺคหํฯ

    Addasaṃ virajaṃ buddhaṃ, āhutīnaṃ paṭiggahaṃ.

    ๓.

    3.

    ‘‘จุลฺลาสีติสหสฺสานิ, ยกฺขา มยฺหํ อุปนฺติเก;

    ‘‘Cullāsītisahassāni, yakkhā mayhaṃ upantike;

    อุปฎฺฐหนฺติ สกฺกจฺจํ 1, อินฺทํว ติทสา คณาฯ

    Upaṭṭhahanti sakkaccaṃ 2, indaṃva tidasā gaṇā.

    ๔.

    4.

    ‘‘ภวนา อภินิกฺขมฺม, ทุสฺสํ ปคฺคยฺหหํ ตทา;

    ‘‘Bhavanā abhinikkhamma, dussaṃ paggayhahaṃ tadā;

    สิรสา อภิวาเทสิํ, ตญฺจาทาสิํ มเหสิโนฯ

    Sirasā abhivādesiṃ, tañcādāsiṃ mahesino.

    ๕.

    5.

    ‘‘อโห พุโทฺธ อโห ธโมฺม, อโห โน สตฺถุ สมฺปทา;

    ‘‘Aho buddho aho dhammo, aho no satthu sampadā;

    พุทฺธสฺส อานุภาเวน, วสุธายํ ปกมฺปถฯ

    Buddhassa ānubhāvena, vasudhāyaṃ pakampatha.

    ๖.

    6.

    ‘‘ตญฺจ อจฺฉริยํ ทิสฺวา, อพฺภุตํ โลมหํสนํ;

    ‘‘Tañca acchariyaṃ disvā, abbhutaṃ lomahaṃsanaṃ;

    พุเทฺธ จิตฺตํ ปสาเทมิ, ทฺวิปทินฺทมฺหิ ตาทิเนฯ

    Buddhe cittaṃ pasādemi, dvipadindamhi tādine.

    ๗.

    7.

    ‘‘โสหํ จิตฺตํ ปสาเทตฺวา, ทุสฺสํ ทตฺวาน สตฺถุโน;

    ‘‘Sohaṃ cittaṃ pasādetvā, dussaṃ datvāna satthuno;

    สรณญฺจ อุปาคจฺฉิํ, สามโจฺจ สปริชฺชโนฯ

    Saraṇañca upāgacchiṃ, sāmacco saparijjano.

    ๘.

    8.

    ‘‘เอกนวุติโต กเปฺป, ยํ กมฺมมกริํ ตทา;

    ‘‘Ekanavutito kappe, yaṃ kammamakariṃ tadā;

    ทุคฺคติํ นาภิชานามิ, พุทฺธปูชายิทํ ผลํฯ

    Duggatiṃ nābhijānāmi, buddhapūjāyidaṃ phalaṃ.

    ๙.

    9.

    ‘‘อิโต ปนฺนรเส กเปฺป, โสฬสาสุํ สุวาหนา 3;

    ‘‘Ito pannarase kappe, soḷasāsuṃ suvāhanā 4;

    สตฺตรตนสมฺปนฺนา, จกฺกวตฺตี มหพฺพลาฯ

    Sattaratanasampannā, cakkavattī mahabbalā.

    ๑๐.

    10.

    ‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;

    ‘‘Paṭisambhidā catasso, vimokkhāpi ca aṭṭhime;

    ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

    Chaḷabhiññā sacchikatā, kataṃ buddhassa sāsanaṃ’’.

    อิตฺถํ สุทํ อายสฺมา มหาปริวารโก เถโร อิมา คาถาโย อภาสิตฺถาติฯ

    Itthaṃ sudaṃ āyasmā mahāparivārako thero imā gāthāyo abhāsitthāti.

    มหาปริวารกเตฺถรสฺสาปทานํ ปฐมํฯ

    Mahāparivārakattherassāpadānaṃ paṭhamaṃ.




    Next: ๒. สุมงฺคลเตฺถรอปทานํ • 2. Sumaṅgalattheraapadānaṃ




    Footnotes:
    1. มํ นิจฺจํ (ก.)
    2. maṃ niccaṃ (ka.)
    3. โสฬสาสิํสุ วาหโน (สฺยา.)
    4. soḷasāsiṃsu vāhano (syā.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑. มหาปริวารกเตฺถรอปทานวณฺณนา • 1. Mahāparivārakattheraapadānavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact