| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
12. மஹாபரிவாரவக்³கோ³
12. Mahāparivāravaggo
1. மஹாபரிவாரகத்தே²ரஅபதா³னவண்ணனா
1. Mahāparivārakattheraapadānavaṇṇanā
விபஸ்ஸீ நாம ப⁴க³வாதிஆதி³கங் ஆயஸ்மதோ மஹாபரிவாரகத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ உப்பன்னஸமயே யக்க²யோனியங் நிப்³ப³த்தோ அனேகயக்க²ஸதஸஹஸ்ஸபரிவாரோ ஏகஸ்மிங் கு²த்³த³கதீ³பே தி³ப்³ப³ஸுக²மனுப⁴வந்தோ விஹரதி. தஸ்மிஞ்ச தீ³பே சேதியாபி⁴ஸோபி⁴தோ விஹாரோ அத்தி², தத்த² ப⁴க³வா அக³மாஸி. அத² ஸோ யக்க²ஸேனாதி⁴பதி தங் ப⁴க³வந்தங் தத்த² க³தபா⁴வங் தி³ஸ்வா தி³ப்³ப³வத்தா²னி க³ஹெத்வா க³ந்த்வா ப⁴க³வந்தங் வந்தி³த்வா தி³ப்³ப³வத்தே²ஹி பூஜேஸி, ஸபரிவாரோ ஸரணமக³மாஸி. ஸோ தேன புஞ்ஞகம்மேன ததோ சுதோ தே³வலோகே நிப்³ப³த்தித்வா தத்த² ச² காமாவசரஸுக²மனுப⁴வித்வா ததோ சுதோ மனுஸ்ஸேஸு அக்³க³சக்கவத்திஆதி³ஸுக²மனுப⁴வித்வா அபரபா⁴கே³ இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Vipassīnāma bhagavātiādikaṃ āyasmato mahāparivārakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato uppannasamaye yakkhayoniyaṃ nibbatto anekayakkhasatasahassaparivāro ekasmiṃ khuddakadīpe dibbasukhamanubhavanto viharati. Tasmiñca dīpe cetiyābhisobhito vihāro atthi, tattha bhagavā agamāsi. Atha so yakkhasenādhipati taṃ bhagavantaṃ tattha gatabhāvaṃ disvā dibbavatthāni gahetvā gantvā bhagavantaṃ vanditvā dibbavatthehi pūjesi, saparivāro saraṇamagamāsi. So tena puññakammena tato cuto devaloke nibbattitvā tattha cha kāmāvacarasukhamanubhavitvā tato cuto manussesu aggacakkavattiādisukhamanubhavitvā aparabhāge imasmiṃ buddhuppāde kulagehe nibbatto viññutaṃ patto satthari pasīditvā pabbajito nacirasseva arahā ahosi.
1-2. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ விபஸ்ஸீ நாம ப⁴க³வாதிஆதி³மாஹ. தத்த² விஸேஸங் பரமத்த²ங் நிப்³பா³னங் பஸ்ஸதீதி விபஸ்ஸீ, விவிதே⁴ ஸதிபட்டா²னாத³யோ ஸத்ததிங்ஸபோ³தி⁴பக்கி²யத⁴ம்மே பஸ்ஸதீதி வா விபஸ்ஸீ, விவிதே⁴ அனேகப்பகாரே போ³த⁴னெய்யஸத்தே விஸுங் விஸுங் பஸ்ஸதீதி வா விபஸ்ஸீ, ஸோ விபஸ்ஸீ ப⁴க³வா தீ³பசேதியங் தீ³பே பூஜனீயட்டா²னங் விஹாரமக³மாஸீதி அத்தோ². ஸேஸங் ஸப்³ப³த்த² உத்தானமேவாதி.
1-2. So aparabhāge attano pubbakammaṃ saritvā somanassajāto pubbacaritāpadānaṃ pakāsento vipassī nāma bhagavātiādimāha. Tattha visesaṃ paramatthaṃ nibbānaṃ passatīti vipassī, vividhe satipaṭṭhānādayo sattatiṃsabodhipakkhiyadhamme passatīti vā vipassī, vividhe anekappakāre bodhaneyyasatte visuṃ visuṃ passatīti vā vipassī, so vipassī bhagavā dīpacetiyaṃ dīpe pūjanīyaṭṭhānaṃ vihāramagamāsīti attho. Sesaṃ sabbattha uttānamevāti.
மஹாபரிவாரகத்தே²ரஅபதா³னவண்ணனா ஸமத்தா.
Mahāparivārakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. மஹாபரிவாரகத்தே²ரஅபதா³னங் • 1. Mahāparivārakattheraapadānaṃ
