| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১২. মহাপরিৰারৰগ্গো
12. Mahāparivāravaggo
১. মহাপরিৰারকত্থেরঅপদানৰণ্ণনা
1. Mahāparivārakattheraapadānavaṇṇanā
ৰিপস্সী নাম ভগৰাতিআদিকং আযস্মতো মহাপরিৰারকত্থেরস্স অপদানং। অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো উপ্পন্নসমযে যক্খযোনিযং নিব্বত্তো অনেকযক্খসতসহস্সপরিৰারো একস্মিং খুদ্দকদীপে দিব্বসুখমনুভৰন্তো ৰিহরতি। তস্মিঞ্চ দীপে চেতিযাভিসোভিতো ৰিহারো অত্থি, তত্থ ভগৰা অগমাসি। অথ সো যক্খসেনাধিপতি তং ভগৰন্তং তত্থ গতভাৰং দিস্ৰা দিব্বৰত্থানি গহেত্ৰা গন্ত্ৰা ভগৰন্তং ৰন্দিত্ৰা দিব্বৰত্থেহি পূজেসি, সপরিৰারো সরণমগমাসি। সো তেন পুঞ্ঞকম্মেন ততো চুতো দেৰলোকে নিব্বত্তিত্ৰা তত্থ ছ কামাৰচরসুখমনুভৰিত্ৰা ততো চুতো মনুস্সেসু অগ্গচক্কৰত্তিআদিসুখমনুভৰিত্ৰা অপরভাগে ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা পব্বজিতো নচিরস্সেৰ অরহা অহোসি।
Vipassīnāma bhagavātiādikaṃ āyasmato mahāparivārakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato uppannasamaye yakkhayoniyaṃ nibbatto anekayakkhasatasahassaparivāro ekasmiṃ khuddakadīpe dibbasukhamanubhavanto viharati. Tasmiñca dīpe cetiyābhisobhito vihāro atthi, tattha bhagavā agamāsi. Atha so yakkhasenādhipati taṃ bhagavantaṃ tattha gatabhāvaṃ disvā dibbavatthāni gahetvā gantvā bhagavantaṃ vanditvā dibbavatthehi pūjesi, saparivāro saraṇamagamāsi. So tena puññakammena tato cuto devaloke nibbattitvā tattha cha kāmāvacarasukhamanubhavitvā tato cuto manussesu aggacakkavattiādisukhamanubhavitvā aparabhāge imasmiṃ buddhuppāde kulagehe nibbatto viññutaṃ patto satthari pasīditvā pabbajito nacirasseva arahā ahosi.
১-২. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিপস্সী নাম ভগৰাতিআদিমাহ। তত্থ ৰিসেসং পরমত্থং নিব্বানং পস্সতীতি ৰিপস্সী, ৰিৰিধে সতিপট্ঠানাদযো সত্ততিংসবোধিপক্খিযধম্মে পস্সতীতি ৰা ৰিপস্সী, ৰিৰিধে অনেকপ্পকারে বোধনেয্যসত্তে ৰিসুং ৰিসুং পস্সতীতি ৰা ৰিপস্সী, সো ৰিপস্সী ভগৰা দীপচেতিযং দীপে পূজনীযট্ঠানং ৰিহারমগমাসীতি অত্থো। সেসং সব্বত্থ উত্তানমেৰাতি।
1-2. So aparabhāge attano pubbakammaṃ saritvā somanassajāto pubbacaritāpadānaṃ pakāsento vipassī nāma bhagavātiādimāha. Tattha visesaṃ paramatthaṃ nibbānaṃ passatīti vipassī, vividhe satipaṭṭhānādayo sattatiṃsabodhipakkhiyadhamme passatīti vā vipassī, vividhe anekappakāre bodhaneyyasatte visuṃ visuṃ passatīti vā vipassī, so vipassī bhagavā dīpacetiyaṃ dīpe pūjanīyaṭṭhānaṃ vihāramagamāsīti attho. Sesaṃ sabbattha uttānamevāti.
মহাপরিৰারকত্থেরঅপদানৰণ্ণনা সমত্তা।
Mahāparivārakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১. মহাপরিৰারকত্থেরঅপদানং • 1. Mahāparivārakattheraapadānaṃ
