| Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၇. မဟာပေသကာရသိက္ခာပဒံ
7. Mahāpesakārasikkhāpadaṃ
၆၄၁. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အညတရော ပုရိသော ပဝာသံ ဂစ္ဆန္တော ပဇာပတိံ ဧတဒဝောစ – ‘‘သုတ္တံ ဓာရယိတ္ဝာ အမုကသ္သ တန္တဝာယသ္သ ဒေဟိ, စီဝရံ ဝာယာပေတ္ဝာ နိက္ခိပ, အာဂတော အယ္ယံ ဥပနန္ဒံ စီဝရေန အစ္ဆာဒေသ္သာမီ’’တိ။ အသ္သောသိ ခော အညတရော ပိဏ္ဍစာရိကော ဘိက္ခု တသ္သ ပုရိသသ္သ ဣမံ ဝာစံ ဘာသမာနသ္သ။ အထ ခော သော ဘိက္ခု ယေနာယသ္မာ ဥပနန္ဒော သက္ယပုတ္တော တေနုပသင္ကမိ; ဥပသင္ကမိတ္ဝာ အာယသ္မန္တံ ဥပနန္ဒံ သက္ယပုတ္တံ ဧတဒဝောစ – ‘‘မဟာပုညောသိ တ္ဝံ, အာဝုသော ဥပနန္ဒ, အမုကသ္မိံ ဩကာသေ အညတရော ပုရိသော ပဝာသံ ဂစ္ဆန္တော ပဇာပတိံ ဧတဒဝောစ – ‘‘သုတ္တံ ဓာရယိတ္ဝာ အမုကသ္သ တန္တဝာယသ္သ ဒေဟိ, စီဝရံ ဝာယာပေတ္ဝာ နိက္ခိပ, အာဂတော အယ္ယံ ဥပနန္ဒံ စီဝရေန အစ္ဆာဒေသ္သာမီ’’တိ။ ‘‘အတ္ထာဝုသော, မံ သော ဥပဋ္ဌာကော’’တိ။ သောပိ ခော တန္တဝာယော အာယသ္မတော ဥပနန္ဒသ္သ သက္ယပုတ္တသ္သ ဥပဋ္ဌာကော ဟောတိ။ အထ ခော အာယသ္မာ ဥပနန္ဒော သက္ယပုတ္တော ယေန သော တန္တဝာယော တေနုပသင္ကမိ; ဥပသင္ကမိတ္ဝာ တံ တန္တဝာယံ ဧတဒဝောစ – ‘‘ဣဒံ ခော, အာဝုသော, စီဝရံ မံ ဥဒ္ဒိသ္သ ဝိယ္ယတိ; အာယတဉ္စ ကရောဟိ ဝိတ္ထတဉ္စ။ အပ္ပိတဉ္စ သုဝီတဉ္စ သုပ္ပဝာယိတဉ္စ သုဝိလေခိတဉ္စ သုဝိတစ္ဆိတဉ္စ ကရောဟီ’’တိ။ ‘‘ဧတေ ခော မေ, ဘန္တေ, သုတ္တံ ဓာရယိတ္ဝာ အဒံသု; ဣမိနာ သုတ္တေန စီဝရံ ဝိနာဟီ’’တိ။ ‘‘န, ဘန္တေ, သက္ကာ အာယတံ ဝာ ဝိတ္ထတံ ဝာ အပ္ပိတံ ဝာ ကာတုံ။ သက္ကာ စ ခော, ဘန္တေ, သုဝီတဉ္စ သုပ္ပဝာယိတဉ္စ သုဝိလေခိတဉ္စ သုဝိတစ္ဆိတဉ္စ ကာတု’’န္တိ။ ‘‘ဣင္ဃ တ္ဝံ, အာဝုသော, အာယတဉ္စ ကရောဟိ ဝိတ္ထတဉ္စ အပ္ပိတဉ္စ။ န တေန သုတ္တေန ပဋိဗဒ္ဓံ ဘဝိသ္သတီ’’တိ။
641. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro puriso pavāsaṃ gacchanto pajāpatiṃ etadavoca – ‘‘suttaṃ dhārayitvā amukassa tantavāyassa dehi, cīvaraṃ vāyāpetvā nikkhipa, āgato ayyaṃ upanandaṃ cīvarena acchādessāmī’’ti. Assosi kho aññataro piṇḍacāriko bhikkhu tassa purisassa imaṃ vācaṃ bhāsamānassa. Atha kho so bhikkhu yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ etadavoca – ‘‘mahāpuññosi tvaṃ, āvuso upananda, amukasmiṃ okāse aññataro puriso pavāsaṃ gacchanto pajāpatiṃ etadavoca – ‘‘suttaṃ dhārayitvā amukassa tantavāyassa dehi, cīvaraṃ vāyāpetvā nikkhipa, āgato ayyaṃ upanandaṃ cīvarena acchādessāmī’’ti. ‘‘Atthāvuso, maṃ so upaṭṭhāko’’ti. Sopi kho tantavāyo āyasmato upanandassa sakyaputtassa upaṭṭhāko hoti. Atha kho āyasmā upanando sakyaputto yena so tantavāyo tenupasaṅkami; upasaṅkamitvā taṃ tantavāyaṃ etadavoca – ‘‘idaṃ kho, āvuso, cīvaraṃ maṃ uddissa viyyati; āyatañca karohi vitthatañca. Appitañca suvītañca suppavāyitañca suvilekhitañca suvitacchitañca karohī’’ti. ‘‘Ete kho me, bhante, suttaṃ dhārayitvā adaṃsu; iminā suttena cīvaraṃ vināhī’’ti. ‘‘Na, bhante, sakkā āyataṃ vā vitthataṃ vā appitaṃ vā kātuṃ. Sakkā ca kho, bhante, suvītañca suppavāyitañca suvilekhitañca suvitacchitañca kātu’’nti. ‘‘Iṅgha tvaṃ, āvuso, āyatañca karohi vitthatañca appitañca. Na tena suttena paṭibaddhaṃ bhavissatī’’ti.
အထ ခော သော တန္တဝာယော ယထာဘတံ သုတ္တံ တန္တေ ဥပနေတ္ဝာ ယေန သာ ဣတ္ထီ တေနုပသင္ကမိ; ဥပသင္ကမိတ္ဝာ တံ ဣတ္ထိံ ဧတဒဝောစ – ‘‘သုတ္တေန, အယ္ယေ, အတ္ထော’’တိ။ ‘‘နနု တ္ဝံ အယ္ယော 1 မယာ ဝုတ္တော – ‘ဣမိနာ သုတ္တေန စီဝရံ ဝိနာဟီ’’’တိ။ ‘‘သစ္စာဟံ, အယ္ယေ, တယာ ဝုတ္တော – ‘ဣမိနာ သုတ္တေန စီဝရံ ဝိနာဟီ’တိ။ အပိစ, မံ အယ္ယော ဥပနန္ဒော ဧဝမာဟ – ‘ဣင္ဃ တ္ဝံ, အာဝုသော, အာယတဉ္စ ကရောဟိ ဝိတ္ထတဉ္စ အပ္ပိတဉ္စ, န တေန သုတ္တေန ပဋိဗဒ္ဓံ ဘဝိသ္သတီ’’’တိ။ အထ ခော သာ ဣတ္ထီ ယတ္တကံယေဝ သုတ္တံ ပဌမံ အဒာသိ တတ္တကံ ပစ္ဆာ အဒာသိ။ အသ္သောသိ ခော အာယသ္မာ ဥပနန္ဒော သက္ယပုတ္တော – ‘‘သော ကိရ ပုရိသော ပဝာသတော အာဂတော’’တိ။ အထ ခော အာယသ္မာ ဥပနန္ဒော သက္ယပုတ္တော ယေန တသ္သ ပုရိသသ္သ နိဝေသနံ တေနုပသင္ကမိ; ဥပသင္ကမိတ္ဝာ ပညတ္တေ အာသနေ နိသီဒိ။ အထ ခော သော ပုရိသော ယေနာယသ္မာ ဥပနန္ဒော သက္ယပုတ္တော တေနုပသင္ကမိ; ဥပသင္ကမိတ္ဝာ အာယသ္မန္တံ ဥပနန္ဒံ သက္ယပုတ္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော သော ပုရိသော ပဇာပတိံ ဧတဒဝောစ – ‘‘ဝီတံ တံ စီဝရ’’န္တိ? ‘‘အာမာယ္ယ, ဝီတံ တံ စီဝရ’’န္တိ။ ‘‘အာဟရ, အယ္ယံ ဥပနန္ဒံ စီဝရေန အစ္ဆာဒေသ္သာမီ’’တိ။ အထ ခော သာ ဣတ္ထီ တံ စီဝရံ နီဟရိတ္ဝာ သာမိကသ္သ ဒတ္ဝာ ဧတမတ္ထံ အာရောစေသိ။ အထ ခော သော ပုရိသော အာယသ္မတော ဥပနန္ဒသ္သ သက္ယပုတ္တသ္သ စီဝရံ ဒတ္ဝာ ဥဇ္ဈာယတိ ခိယ္ယတိ ဝိပာစေတိ – ‘‘မဟိစ္ဆာ ဣမေ သမဏာ သက္ယပုတ္တိယာ အသန္တုဋ္ဌာ။ နယိမေ သုကရာ စီဝရေန အစ္ဆာဒေတုံ။ ကထဉ္ဟိ နာမ အယ္ယော ဥပနန္ဒော မယာ ပုဗ္ဗေ အပ္ပဝာရိတော တန္တဝာယေ 2 ဥပသင္ကမိတ္ဝာ စီဝရေ ဝိကပ္ပံ အာပဇ္ဇိသ္သတီ’’တိ။
Atha kho so tantavāyo yathābhataṃ suttaṃ tante upanetvā yena sā itthī tenupasaṅkami; upasaṅkamitvā taṃ itthiṃ etadavoca – ‘‘suttena, ayye, attho’’ti. ‘‘Nanu tvaṃ ayyo 3 mayā vutto – ‘iminā suttena cīvaraṃ vināhī’’’ti. ‘‘Saccāhaṃ, ayye, tayā vutto – ‘iminā suttena cīvaraṃ vināhī’ti. Apica, maṃ ayyo upanando evamāha – ‘iṅgha tvaṃ, āvuso, āyatañca karohi vitthatañca appitañca, na tena suttena paṭibaddhaṃ bhavissatī’’’ti. Atha kho sā itthī yattakaṃyeva suttaṃ paṭhamaṃ adāsi tattakaṃ pacchā adāsi. Assosi kho āyasmā upanando sakyaputto – ‘‘so kira puriso pavāsato āgato’’ti. Atha kho āyasmā upanando sakyaputto yena tassa purisassa nivesanaṃ tenupasaṅkami; upasaṅkamitvā paññatte āsane nisīdi. Atha kho so puriso yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ abhivādetvā ekamantaṃ nisīdi. Ekamantaṃ nisinno kho so puriso pajāpatiṃ etadavoca – ‘‘vītaṃ taṃ cīvara’’nti? ‘‘Āmāyya, vītaṃ taṃ cīvara’’nti. ‘‘Āhara, ayyaṃ upanandaṃ cīvarena acchādessāmī’’ti. Atha kho sā itthī taṃ cīvaraṃ nīharitvā sāmikassa datvā etamatthaṃ ārocesi. Atha kho so puriso āyasmato upanandassa sakyaputtassa cīvaraṃ datvā ujjhāyati khiyyati vipāceti – ‘‘mahicchā ime samaṇā sakyaputtiyā asantuṭṭhā. Nayime sukarā cīvarena acchādetuṃ. Kathañhi nāma ayyo upanando mayā pubbe appavārito tantavāye 4 upasaṅkamitvā cīvare vikappaṃ āpajjissatī’’ti.
အသ္သောသုံ ခော ဘိက္ခူ တသ္သ ပုရိသသ္သ ဥဇ္ဈာယန္တသ္သ ခိယ္ယန္တသ္သ ဝိပာစေန္တသ္သ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာယသ္မာ ဥပနန္ဒော သက္ယပုတ္တော ပုဗ္ဗေ အပ္ပဝာရိတော ဂဟပတိကသ္သ တန္တဝာယေ ဥပသင္ကမိတ္ဝာ စီဝရေ ဝိကပ္ပံ အာပဇ္ဇိသ္သတီ’’တိ! အထ ခော တေ ဘိက္ခူ အာယသ္မန္တံ ဥပနန္ဒံ သက္ယပုတ္တံ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တ္ဝံ, ဥပနန္ဒ, ပုဗ္ဗေ အပ္ပဝာရိတော ဂဟပတိကသ္သ တန္တဝာယေ ဥပသင္ကမိတ္ဝာ စီဝရေ ဝိကပ္ပံ အာပဇ္ဇီ’’တိ? ‘‘သစ္စံ, ဘဂဝာ’’တိ။ ‘‘ဉာတကော တေ, ဥပနန္ဒ, အညာတကော’’တိ? ‘‘အညာတကော, ဘဂဝာ’’တိ။ ‘‘အညာတကော, မောဃပုရိသ, အညာတကသ္သ န ဇာနာတိ ပတိရူပံ ဝာ အပ္ပတိရူပံ ဝာ သန္တံ ဝာ အသန္တံ ဝာ။ တတ္ထ နာမ တ္ဝံ, မောဃပုရိသ, ပုဗ္ဗေ အပ္ပဝာရိတော အညာတကသ္သ ဂဟပတိကသ္သ တန္တဝာယေ ဥပသင္ကမိတ္ဝာ စီဝရေ ဝိကပ္ပံ အာပဇ္ဇိသ္သသိ! နေတံ, မောဃပုရိသ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
Assosuṃ kho bhikkhū tassa purisassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto pubbe appavārito gahapatikassa tantavāye upasaṅkamitvā cīvare vikappaṃ āpajjissatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, pubbe appavārito gahapatikassa tantavāye upasaṅkamitvā cīvare vikappaṃ āpajjī’’ti? ‘‘Saccaṃ, bhagavā’’ti. ‘‘Ñātako te, upananda, aññātako’’ti? ‘‘Aññātako, bhagavā’’ti. ‘‘Aññātako, moghapurisa, aññātakassa na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, pubbe appavārito aññātakassa gahapatikassa tantavāye upasaṅkamitvā cīvare vikappaṃ āpajjissasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၆၄၂. ‘‘ဘိက္ခုံ ပနေဝ ဥဒ္ဒိသ္သ အညာတကော ဂဟပတိ ဝာ ဂဟပတာနီ ဝာ တန္တဝာယေဟိ စီဝရံ ဝာယာပေယ္ယ, တတ္ရ စေ သော ဘိက္ခု ပုဗ္ဗေ အပ္ပဝာရိတော တန္တဝာယေ ဥပသင္ကမိတ္ဝာ စီဝရေ ဝိကပ္ပံ အာပဇ္ဇေယ္ယ – ‘ဣဒံ ခော, အာဝုသော, စီဝရံ မံ ဥဒ္ဒိသ္သ ဝိယ္ယတိ။ အာယတဉ္စ ကရောထ ဝိတ္ထတဉ္စ။ အပ္ပိတဉ္စ သုဝီတဉ္စ သုပ္ပဝာယိတဉ္စ သုဝိလေခိတဉ္စ သုဝိတစ္ဆိတဉ္စ ကရောထ။ အပ္ပေဝ နာမ မယမ္ပိ အာယသ္မန္တာနံ ကိဉ္စိမတ္တံ အနုပဒဇ္ဇေယ္ယာမာ’တိ။ ဧဝဉ္စ သော ဘိက္ခု ဝတ္ဝာ ကိဉ္စိမတ္တံ အနုပဒဇ္ဇေယ္ယ အန္တမသော ပိဏ္ဍပာတမတ္တမ္ပိ, နိသ္သဂ္ဂိယံ ပာစိတ္တိယ’’န္တိ။
642.‘‘Bhikkhuṃ paneva uddissa aññātako gahapati vā gahapatānī vā tantavāyehi cīvaraṃ vāyāpeyya, tatra ce so bhikkhu pubbe appavārito tantavāye upasaṅkamitvā cīvare vikappaṃ āpajjeyya – ‘idaṃ kho, āvuso, cīvaraṃ maṃ uddissa viyyati. Āyatañca karotha vitthatañca. Appitañca suvītañca suppavāyitañca suvilekhitañca suvitacchitañca karotha. Appeva nāma mayampi āyasmantānaṃ kiñcimattaṃ anupadajjeyyāmā’ti. Evañca so bhikkhu vatvā kiñcimattaṃ anupadajjeyya antamaso piṇḍapātamattampi, nissaggiyaṃ pācittiya’’nti.
၆၄၃. ဘိက္ခုံ ပနေဝ ဥဒ္ဒိသ္သာတိ ဘိက္ခုသ္သတ္ထာယ ဘိက္ခုံ အာရမ္မဏံ ကရိတ္ဝာ ဘိက္ခုံ အစ္ဆာဒေတုကာမော။
643.Bhikkhuṃ paneva uddissāti bhikkhussatthāya bhikkhuṃ ārammaṇaṃ karitvā bhikkhuṃ acchādetukāmo.
အညာတကော နာမ မာတိတော ဝာ ပိတိတော ဝာ ယာဝ သတ္တမာ ပိတာမဟယုဂာ အသမ္ဗဒ္ဓော။
Aññātako nāma mātito vā pitito vā yāva sattamā pitāmahayugā asambaddho.
ဂဟပတိ နာမ ယော ကောစိ အဂာရံ အဇ္ဈာဝသတိ။
Gahapati nāma yo koci agāraṃ ajjhāvasati.
ဂဟပတာနီ နာမ ယာ ကာစိ အဂာရံ အဇ္ဈာဝသတိ။
Gahapatānī nāma yā kāci agāraṃ ajjhāvasati.
တန္တဝာယေဟီတိ ပေသကာရေဟိ။
Tantavāyehīti pesakārehi.
စီဝရံ နာမ ဆန္နံ စီဝရာနံ အညတရံ စီဝရံ ဝိကပ္ပနုပဂံ ပစ္ဆိမံ။
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
ဝာယာပေယ္ယာတိ ဝိနာပေတိ။
Vāyāpeyyāti vināpeti.
တတ္ရ စေ သော ဘိက္ခူတိ ယံ ဘိက္ခုံ ဥဒ္ဒိသ္သ စီဝရံ ဝိယ္ယတိ သော ဘိက္ခု။
Tatra ce so bhikkhūti yaṃ bhikkhuṃ uddissa cīvaraṃ viyyati so bhikkhu.
ပုဗ္ဗေ အပ္ပဝာရိတောတိ ပုဗ္ဗေ အဝုတ္တော ဟောတိ – ‘‘ကီဒိသေန တေ, ဘန္တေ, စီဝရေန အတ္ထော, ကီဒိသံ တေ စီဝရံ ဝာယာပေမီ’’တိ?
Pubbe appavāritoti pubbe avutto hoti – ‘‘kīdisena te, bhante, cīvarena attho, kīdisaṃ te cīvaraṃ vāyāpemī’’ti?
တန္တဝာယေ ဥပသင္ကမိတ္ဝာတိ ဃရံ ဂန္တ္ဝာ ယတ္ထ ကတ္ထစိ ဥပသင္ကမိတ္ဝာ။
Tantavāye upasaṅkamitvāti gharaṃ gantvā yattha katthaci upasaṅkamitvā.
စီဝရေ ဝိကပ္ပံ အာပဇ္ဇေယ္ယာတိ – ‘‘ဣဒံ ခော, အာဝုသော, စီဝရံ မံ ဥဒ္ဒိသ္သ ဝိယ္ယတိ, အာယတဉ္စ ကရောထ ဝိတ္ထတဉ္စ။ အပ္ပိတဉ္စ သုဝီတဉ္စ သုပ္ပဝာယိတဉ္စ သုဝိလေခိတဉ္စ သုဝိတစ္ဆိတဉ္စ ကရောထ။ အပ္ပေဝ နာမ မယမ္ပိ အာယသ္မန္တာနံ ကိဉ္စိမတ္တံ အနုပဒဇ္ဇေယ္ယာမာ’’တိ။
Cīvare vikappaṃ āpajjeyyāti – ‘‘idaṃ kho, āvuso, cīvaraṃ maṃ uddissa viyyati, āyatañca karotha vitthatañca. Appitañca suvītañca suppavāyitañca suvilekhitañca suvitacchitañca karotha. Appeva nāma mayampi āyasmantānaṃ kiñcimattaṃ anupadajjeyyāmā’’ti.
ဧဝဉ္စ သော ဘိက္ခု ဝတ္ဝာ ကိဉ္စိမတ္တံ အနုပဒဇ္ဇေယ္ယ အန္တမသော ပိဏ္ဍပာတမတ္တမ္ပီတိ။ ပိဏ္ဍပာတော နာမ ယာဂုပိ ဘတ္တမ္ပိ ခာဒနီယမ္ပိ စုဏ္ဏပိဏ္ဍောပိ ဒန္တကဋ္ဌမ္ပိ ဒသိကသုတ္တမ္ပိ, အန္တမသော ဓမ္မမ္ပိ ဘဏတိ။
Evañca so bhikkhu vatvā kiñcimattaṃ anupadajjeyya antamaso piṇḍapātamattampīti. Piṇḍapāto nāma yāgupi bhattampi khādanīyampi cuṇṇapiṇḍopi dantakaṭṭhampi dasikasuttampi, antamaso dhammampi bhaṇati.
တသ္သ ဝစနေန အာယတံ ဝာ ဝိတ္ထတံ ဝာ အပ္ပိတံ ဝာ ကရောတိ, ပယောဂေ ဒုက္ကဋံ။ ပဋိလာဘေန နိသ္သဂ္ဂိယံ ဟောတိ။ နိသ္သဇ္ဇိတဗ္ဗံ သင္ဃသ္သ ဝာ ဂဏသ္သ ဝာ ပုဂ္ဂလသ္သ ဝာ။ ဧဝဉ္စ ပန, ဘိက္ခဝေ, နိသ္သဇ္ဇိတဗ္ဗံ။ပေ.။ ဣဒံ မေ, ဘန္တေ, စီဝရံ ပုဗ္ဗေ အပ္ပဝာရိတော အညာတကသ္သ ဂဟပတိကသ္သ တန္တဝာယေ ဥပသင္ကမိတ္ဝာ စီဝရေ ဝိကပ္ပံ အာပန္နံ နိသ္သဂ္ဂိယံ။ ဣမာဟံ သင္ဃသ္သ နိသ္သဇ္ဇာမီတိ။ပေ.။ ဒဒေယ္ယာတိ။ပေ.။ ဒဒေယ္ယုန္တိ။ပေ.။ အာယသ္မတော ဒမ္မီတိ။
Tassa vacanena āyataṃ vā vitthataṃ vā appitaṃ vā karoti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ pubbe appavārito aññātakassa gahapatikassa tantavāye upasaṅkamitvā cīvare vikappaṃ āpannaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
၆၄၄. အညာတကေ အညာတကသညီ ပုဗ္ဗေ အပ္ပဝာရိတော ဂဟပတိကသ္သ တန္တဝာယေ ဥပသင္ကမိတ္ဝာ စီဝရေ ဝိကပ္ပံ အာပဇ္ဇတိ, နိသ္သဂ္ဂိယံ ပာစိတ္တိယံ။ အညာတကေ ဝေမတိကော ပုဗ္ဗေ အပ္ပဝာရိတော ဂဟပတိကသ္သ တန္တဝာယေ ဥပသင္ကမိတ္ဝာ စီဝရေ ဝိကပ္ပံ အာပဇ္ဇတိ, နိသ္သဂ္ဂိယံ ပာစိတ္တိယံ။ အညာတကေ ဉာတကသညီ ပုဗ္ဗေ အပ္ပဝာရိတော ဂဟပတိကသ္သ တန္တဝာယေ ဥပသင္ကမိတ္ဝာ စီဝရေ ဝိကပ္ပံ အာပဇ္ဇတိ, နိသ္သဂ္ဂိယံ ပာစိတ္တိယံ။
644. Aññātake aññātakasaññī pubbe appavārito gahapatikassa tantavāye upasaṅkamitvā cīvare vikappaṃ āpajjati, nissaggiyaṃ pācittiyaṃ. Aññātake vematiko pubbe appavārito gahapatikassa tantavāye upasaṅkamitvā cīvare vikappaṃ āpajjati, nissaggiyaṃ pācittiyaṃ. Aññātake ñātakasaññī pubbe appavārito gahapatikassa tantavāye upasaṅkamitvā cīvare vikappaṃ āpajjati, nissaggiyaṃ pācittiyaṃ.
ဉာတကေ အဉာတကသညီ, အာပတ္တိ ဒုက္ကဋသ္သ။ ဉာတကေ ဝေမတိကော, အာပတ္တိ ဒုက္ကဋသ္သ။ ဉာတကေ ဉာတကသညီ, အနာပတ္တိ။
Ñātake añātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti.
၆၄၅. အနာပတ္တိ – ဉာတကာနံ, ပဝာရိတာနံ, အညသ္သတ္ထာယ, အတ္တနော ဓနေန, မဟဂ္ဃံ ဝာယာပေတုကာမသ္သ အပ္ပဂ္ဃံ ဝာယာပေတိ, ဥမ္မတ္တကသ္သ, အာဒိကမ္မိကသ္သာတိ။
645. Anāpatti – ñātakānaṃ, pavāritānaṃ, aññassatthāya, attano dhanena, mahagghaṃ vāyāpetukāmassa appagghaṃ vāyāpeti, ummattakassa, ādikammikassāti.
မဟာပေသကာရသိက္ခာပဒံ နိဋ္ဌိတံ သတ္တမံ။
Mahāpesakārasikkhāpadaṃ niṭṭhitaṃ sattamaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၇. မဟာပေသကာရသိက္ခာပဒဝဏ္ဏနာ • 7. Mahāpesakārasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၇. မဟာပေသကာရသိက္ခာပဒဝဏ္ဏနာ • 7. Mahāpesakārasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၇. မဟာပေသကာရသိက္ခာပဒဝဏ္ဏနာ • 7. Mahāpesakārasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၇. မဟာပေသကာရသိက္ခာပဒဝဏ္ဏနာ • 7. Mahāpesakārasikkhāpadavaṇṇanā
