| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༧. མཧཱཔེསཀཱརསིཀྑཱཔདཾ
7. Mahāpesakārasikkhāpadaṃ
༦༤༡. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཉྙཏརོ པུརིསོ པཝཱསཾ གཙྪནྟོ པཛཱཔཏིཾ ཨེཏདཝོཙ – ‘‘སུཏྟཾ དྷཱརཡིཏྭཱ ཨམུཀསྶ ཏནྟཝཱཡསྶ དེཧི, ཙཱིཝརཾ ཝཱཡཱཔེཏྭཱ ནིཀྑིཔ, ཨཱགཏོ ཨཡྻཾ ཨུཔནནྡཾ ཙཱིཝརེན ཨཙྪཱདེསྶཱམཱི’’ཏི། ཨསྶོསི ཁོ ཨཉྙཏརོ པིཎྜཙཱརིཀོ བྷིཀྑུ ཏསྶ པུརིསསྶ ཨིམཾ ཝཱཙཾ བྷཱསམཱནསྶ། ཨཐ ཁོ སོ བྷིཀྑུ ཡེནཱཡསྨཱ ཨུཔནནྡོ སཀྱཔུཏྟོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ ཨུཔནནྡཾ སཀྱཔུཏྟཾ ཨེཏདཝོཙ – ‘‘མཧཱཔུཉྙོསི ཏྭཾ, ཨཱཝུསོ ཨུཔནནྡ, ཨམུཀསྨིཾ ཨོཀཱསེ ཨཉྙཏརོ པུརིསོ པཝཱསཾ གཙྪནྟོ པཛཱཔཏིཾ ཨེཏདཝོཙ – ‘‘སུཏྟཾ དྷཱརཡིཏྭཱ ཨམུཀསྶ ཏནྟཝཱཡསྶ དེཧི, ཙཱིཝརཾ ཝཱཡཱཔེཏྭཱ ནིཀྑིཔ, ཨཱགཏོ ཨཡྻཾ ཨུཔནནྡཾ ཙཱིཝརེན ཨཙྪཱདེསྶཱམཱི’’ཏི། ‘‘ཨཏྠཱཝུསོ, མཾ སོ ཨུཔཊྛཱཀོ’’ཏི། སོཔི ཁོ ཏནྟཝཱཡོ ཨཱཡསྨཏོ ཨུཔནནྡསྶ སཀྱཔུཏྟསྶ ཨུཔཊྛཱཀོ ཧོཏི། ཨཐ ཁོ ཨཱཡསྨཱ ཨུཔནནྡོ སཀྱཔུཏྟོ ཡེན སོ ཏནྟཝཱཡོ ཏེནུཔསངྐམི; ཨུཔསངྐམིཏྭཱ ཏཾ ཏནྟཝཱཡཾ ཨེཏདཝོཙ – ‘‘ཨིདཾ ཁོ, ཨཱཝུསོ, ཙཱིཝརཾ མཾ ཨུདྡིསྶ ཝིཡྻཏི; ཨཱཡཏཉྩ ཀརོཧི ཝིཏྠཏཉྩ། ཨཔྤིཏཉྩ སུཝཱིཏཉྩ སུཔྤཝཱཡིཏཉྩ སུཝིལེཁིཏཉྩ སུཝིཏཙྪིཏཉྩ ཀརོཧཱི’’ཏི། ‘‘ཨེཏེ ཁོ མེ, བྷནྟེ, སུཏྟཾ དྷཱརཡིཏྭཱ ཨདཾསུ; ཨིམིནཱ སུཏྟེན ཙཱིཝརཾ ཝིནཱཧཱི’’ཏི། ‘‘ན, བྷནྟེ, སཀྐཱ ཨཱཡཏཾ ཝཱ ཝིཏྠཏཾ ཝཱ ཨཔྤིཏཾ ཝཱ ཀཱཏུཾ། སཀྐཱ ཙ ཁོ, བྷནྟེ, སུཝཱིཏཉྩ སུཔྤཝཱཡིཏཉྩ སུཝིལེཁིཏཉྩ སུཝིཏཙྪིཏཉྩ ཀཱཏུ’’ནྟི། ‘‘ཨིངྒྷ ཏྭཾ, ཨཱཝུསོ, ཨཱཡཏཉྩ ཀརོཧི ཝིཏྠཏཉྩ ཨཔྤིཏཉྩ། ན ཏེན སུཏྟེན པཊིབདྡྷཾ བྷཝིསྶཏཱི’’ཏི།
641. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro puriso pavāsaṃ gacchanto pajāpatiṃ etadavoca – ‘‘suttaṃ dhārayitvā amukassa tantavāyassa dehi, cīvaraṃ vāyāpetvā nikkhipa, āgato ayyaṃ upanandaṃ cīvarena acchādessāmī’’ti. Assosi kho aññataro piṇḍacāriko bhikkhu tassa purisassa imaṃ vācaṃ bhāsamānassa. Atha kho so bhikkhu yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ etadavoca – ‘‘mahāpuññosi tvaṃ, āvuso upananda, amukasmiṃ okāse aññataro puriso pavāsaṃ gacchanto pajāpatiṃ etadavoca – ‘‘suttaṃ dhārayitvā amukassa tantavāyassa dehi, cīvaraṃ vāyāpetvā nikkhipa, āgato ayyaṃ upanandaṃ cīvarena acchādessāmī’’ti. ‘‘Atthāvuso, maṃ so upaṭṭhāko’’ti. Sopi kho tantavāyo āyasmato upanandassa sakyaputtassa upaṭṭhāko hoti. Atha kho āyasmā upanando sakyaputto yena so tantavāyo tenupasaṅkami; upasaṅkamitvā taṃ tantavāyaṃ etadavoca – ‘‘idaṃ kho, āvuso, cīvaraṃ maṃ uddissa viyyati; āyatañca karohi vitthatañca. Appitañca suvītañca suppavāyitañca suvilekhitañca suvitacchitañca karohī’’ti. ‘‘Ete kho me, bhante, suttaṃ dhārayitvā adaṃsu; iminā suttena cīvaraṃ vināhī’’ti. ‘‘Na, bhante, sakkā āyataṃ vā vitthataṃ vā appitaṃ vā kātuṃ. Sakkā ca kho, bhante, suvītañca suppavāyitañca suvilekhitañca suvitacchitañca kātu’’nti. ‘‘Iṅgha tvaṃ, āvuso, āyatañca karohi vitthatañca appitañca. Na tena suttena paṭibaddhaṃ bhavissatī’’ti.
ཨཐ ཁོ སོ ཏནྟཝཱཡོ ཡཐཱབྷཏཾ སུཏྟཾ ཏནྟེ ཨུཔནེཏྭཱ ཡེན སཱ ཨིཏྠཱི ཏེནུཔསངྐམི; ཨུཔསངྐམིཏྭཱ ཏཾ ཨིཏྠིཾ ཨེཏདཝོཙ – ‘‘སུཏྟེན, ཨཡྻེ, ཨཏྠོ’’ཏི། ‘‘ནནུ ཏྭཾ ཨཡྻོ 1 མཡཱ ཝུཏྟོ – ‘ཨིམིནཱ སུཏྟེན ཙཱིཝརཾ ཝིནཱཧཱི’’’ཏི། ‘‘སཙྩཱཧཾ, ཨཡྻེ, ཏཡཱ ཝུཏྟོ – ‘ཨིམིནཱ སུཏྟེན ཙཱིཝརཾ ཝིནཱཧཱི’ཏི། ཨཔིཙ, མཾ ཨཡྻོ ཨུཔནནྡོ ཨེཝམཱཧ – ‘ཨིངྒྷ ཏྭཾ, ཨཱཝུསོ, ཨཱཡཏཉྩ ཀརོཧི ཝིཏྠཏཉྩ ཨཔྤིཏཉྩ, ན ཏེན སུཏྟེན པཊིབདྡྷཾ བྷཝིསྶཏཱི’’’ཏི། ཨཐ ཁོ སཱ ཨིཏྠཱི ཡཏྟཀཾཡེཝ སུཏྟཾ པཋམཾ ཨདཱསི ཏཏྟཀཾ པཙྪཱ ཨདཱསི། ཨསྶོསི ཁོ ཨཱཡསྨཱ ཨུཔནནྡོ སཀྱཔུཏྟོ – ‘‘སོ ཀིར པུརིསོ པཝཱསཏོ ཨཱགཏོ’’ཏི། ཨཐ ཁོ ཨཱཡསྨཱ ཨུཔནནྡོ སཀྱཔུཏྟོ ཡེན ཏསྶ པུརིསསྶ ནིཝེསནཾ ཏེནུཔསངྐམི; ཨུཔསངྐམིཏྭཱ པཉྙཏྟེ ཨཱསནེ ནིསཱིདི། ཨཐ ཁོ སོ པུརིསོ ཡེནཱཡསྨཱ ཨུཔནནྡོ སཀྱཔུཏྟོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ ཨུཔནནྡཾ སཀྱཔུཏྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོ པུརིསོ པཛཱཔཏིཾ ཨེཏདཝོཙ – ‘‘ཝཱིཏཾ ཏཾ ཙཱིཝར’’ནྟི? ‘‘ཨཱམཱཡྻ, ཝཱིཏཾ ཏཾ ཙཱིཝར’’ནྟི། ‘‘ཨཱཧར, ཨཡྻཾ ཨུཔནནྡཾ ཙཱིཝརེན ཨཙྪཱདེསྶཱམཱི’’ཏི། ཨཐ ཁོ སཱ ཨིཏྠཱི ཏཾ ཙཱིཝརཾ ནཱིཧརིཏྭཱ སཱམིཀསྶ དཏྭཱ ཨེཏམཏྠཾ ཨཱརོཙེསི། ཨཐ ཁོ སོ པུརིསོ ཨཱཡསྨཏོ ཨུཔནནྡསྶ སཀྱཔུཏྟསྶ ཙཱིཝརཾ དཏྭཱ ཨུཛ྄ཛྷཱཡཏི ཁིཡྻཏི ཝིཔཱཙེཏི – ‘‘མཧིཙྪཱ ཨིམེ སམཎཱ སཀྱཔུཏྟིཡཱ ཨསནྟུཊྛཱ། ནཡིམེ སུཀརཱ ཙཱིཝརེན ཨཙྪཱདེཏུཾ། ཀཐཉྷི ནཱམ ཨཡྻོ ཨུཔནནྡོ མཡཱ པུབྦེ ཨཔྤཝཱརིཏོ ཏནྟཝཱཡེ 2 ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫིསྶཏཱི’’ཏི།
Atha kho so tantavāyo yathābhataṃ suttaṃ tante upanetvā yena sā itthī tenupasaṅkami; upasaṅkamitvā taṃ itthiṃ etadavoca – ‘‘suttena, ayye, attho’’ti. ‘‘Nanu tvaṃ ayyo 3 mayā vutto – ‘iminā suttena cīvaraṃ vināhī’’’ti. ‘‘Saccāhaṃ, ayye, tayā vutto – ‘iminā suttena cīvaraṃ vināhī’ti. Apica, maṃ ayyo upanando evamāha – ‘iṅgha tvaṃ, āvuso, āyatañca karohi vitthatañca appitañca, na tena suttena paṭibaddhaṃ bhavissatī’’’ti. Atha kho sā itthī yattakaṃyeva suttaṃ paṭhamaṃ adāsi tattakaṃ pacchā adāsi. Assosi kho āyasmā upanando sakyaputto – ‘‘so kira puriso pavāsato āgato’’ti. Atha kho āyasmā upanando sakyaputto yena tassa purisassa nivesanaṃ tenupasaṅkami; upasaṅkamitvā paññatte āsane nisīdi. Atha kho so puriso yenāyasmā upanando sakyaputto tenupasaṅkami; upasaṅkamitvā āyasmantaṃ upanandaṃ sakyaputtaṃ abhivādetvā ekamantaṃ nisīdi. Ekamantaṃ nisinno kho so puriso pajāpatiṃ etadavoca – ‘‘vītaṃ taṃ cīvara’’nti? ‘‘Āmāyya, vītaṃ taṃ cīvara’’nti. ‘‘Āhara, ayyaṃ upanandaṃ cīvarena acchādessāmī’’ti. Atha kho sā itthī taṃ cīvaraṃ nīharitvā sāmikassa datvā etamatthaṃ ārocesi. Atha kho so puriso āyasmato upanandassa sakyaputtassa cīvaraṃ datvā ujjhāyati khiyyati vipāceti – ‘‘mahicchā ime samaṇā sakyaputtiyā asantuṭṭhā. Nayime sukarā cīvarena acchādetuṃ. Kathañhi nāma ayyo upanando mayā pubbe appavārito tantavāye 4 upasaṅkamitvā cīvare vikappaṃ āpajjissatī’’ti.
ཨསྶོསུཾ ཁོ བྷིཀྑཱུ ཏསྶ པུརིསསྶ ཨུཛ྄ཛྷཱཡནྟསྶ ཁིཡྻནྟསྶ ཝིཔཱཙེནྟསྶ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཡསྨཱ ཨུཔནནྡོ སཀྱཔུཏྟོ པུབྦེ ཨཔྤཝཱརིཏོ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫིསྶཏཱི’’ཏི! ཨཐ ཁོ ཏེ བྷིཀྑཱུ ཨཱཡསྨནྟཾ ཨུཔནནྡཾ སཀྱཔུཏྟཾ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏྭཾ, ཨུཔནནྡ, པུབྦེ ཨཔྤཝཱརིཏོ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫཱི’’ཏི? ‘‘སཙྩཾ, བྷགཝཱ’’ཏི། ‘‘ཉཱཏཀོ ཏེ, ཨུཔནནྡ, ཨཉྙཱཏཀོ’’ཏི? ‘‘ཨཉྙཱཏཀོ, བྷགཝཱ’’ཏི། ‘‘ཨཉྙཱཏཀོ, མོགྷཔུརིས, ཨཉྙཱཏཀསྶ ན ཛཱནཱཏི པཏིརཱུཔཾ ཝཱ ཨཔྤཏིརཱུཔཾ ཝཱ སནྟཾ ཝཱ ཨསནྟཾ ཝཱ། ཏཏྠ ནཱམ ཏྭཾ, མོགྷཔུརིས, པུབྦེ ཨཔྤཝཱརིཏོ ཨཉྙཱཏཀསྶ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫིསྶསི! ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Assosuṃ kho bhikkhū tassa purisassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto pubbe appavārito gahapatikassa tantavāye upasaṅkamitvā cīvare vikappaṃ āpajjissatī’’ti! Atha kho te bhikkhū āyasmantaṃ upanandaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, upananda, pubbe appavārito gahapatikassa tantavāye upasaṅkamitvā cīvare vikappaṃ āpajjī’’ti? ‘‘Saccaṃ, bhagavā’’ti. ‘‘Ñātako te, upananda, aññātako’’ti? ‘‘Aññātako, bhagavā’’ti. ‘‘Aññātako, moghapurisa, aññātakassa na jānāti patirūpaṃ vā appatirūpaṃ vā santaṃ vā asantaṃ vā. Tattha nāma tvaṃ, moghapurisa, pubbe appavārito aññātakassa gahapatikassa tantavāye upasaṅkamitvā cīvare vikappaṃ āpajjissasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༦༤༢. ‘‘བྷིཀྑུཾ པནེཝ ཨུདྡིསྶ ཨཉྙཱཏཀོ གཧཔཏི ཝཱ གཧཔཏཱནཱི ཝཱ ཏནྟཝཱཡེཧི ཙཱིཝརཾ ཝཱཡཱཔེཡྻ, ཏཏྲ ཙེ སོ བྷིཀྑུ པུབྦེ ཨཔྤཝཱརིཏོ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫེཡྻ – ‘ཨིདཾ ཁོ, ཨཱཝུསོ, ཙཱིཝརཾ མཾ ཨུདྡིསྶ ཝིཡྻཏི། ཨཱཡཏཉྩ ཀརོཐ ཝིཏྠཏཉྩ། ཨཔྤིཏཉྩ སུཝཱིཏཉྩ སུཔྤཝཱཡིཏཉྩ སུཝིལེཁིཏཉྩ སུཝིཏཙྪིཏཉྩ ཀརོཐ། ཨཔྤེཝ ནཱམ མཡམྤི ཨཱཡསྨནྟཱནཾ ཀིཉྩིམཏྟཾ ཨནུཔདཛྫེཡྻཱམཱ’ཏི། ཨེཝཉྩ སོ བྷིཀྑུ ཝཏྭཱ ཀིཉྩིམཏྟཾ ཨནུཔདཛྫེཡྻ ཨནྟམསོ པིཎྜཔཱཏམཏྟམྤི, ནིསྶགྒིཡཾ པཱཙིཏྟིཡ’’ནྟི།
642.‘‘Bhikkhuṃ paneva uddissa aññātako gahapati vā gahapatānī vā tantavāyehi cīvaraṃ vāyāpeyya, tatra ce so bhikkhu pubbe appavārito tantavāye upasaṅkamitvā cīvare vikappaṃ āpajjeyya – ‘idaṃ kho, āvuso, cīvaraṃ maṃ uddissa viyyati. Āyatañca karotha vitthatañca. Appitañca suvītañca suppavāyitañca suvilekhitañca suvitacchitañca karotha. Appeva nāma mayampi āyasmantānaṃ kiñcimattaṃ anupadajjeyyāmā’ti. Evañca so bhikkhu vatvā kiñcimattaṃ anupadajjeyya antamaso piṇḍapātamattampi, nissaggiyaṃ pācittiya’’nti.
༦༤༣. བྷིཀྑུཾ པནེཝ ཨུདྡིསྶཱཏི བྷིཀྑུསྶཏྠཱཡ བྷིཀྑུཾ ཨཱརམྨཎཾ ཀརིཏྭཱ བྷིཀྑུཾ ཨཙྪཱདེཏུཀཱམོ།
643.Bhikkhuṃ paneva uddissāti bhikkhussatthāya bhikkhuṃ ārammaṇaṃ karitvā bhikkhuṃ acchādetukāmo.
ཨཉྙཱཏཀོ ནཱམ མཱཏིཏོ ཝཱ པིཏིཏོ ཝཱ ཡཱཝ སཏྟམཱ པིཏཱམཧཡུགཱ ཨསམྦདྡྷོ།
Aññātako nāma mātito vā pitito vā yāva sattamā pitāmahayugā asambaddho.
གཧཔཏི ནཱམ ཡོ ཀོཙི ཨགཱརཾ ཨཛ྄ཛྷཱཝསཏི།
Gahapati nāma yo koci agāraṃ ajjhāvasati.
གཧཔཏཱནཱི ནཱམ ཡཱ ཀཱཙི ཨགཱརཾ ཨཛ྄ཛྷཱཝསཏི།
Gahapatānī nāma yā kāci agāraṃ ajjhāvasati.
ཏནྟཝཱཡེཧཱིཏི པེསཀཱརེཧི།
Tantavāyehīti pesakārehi.
ཙཱིཝརཾ ནཱམ ཚནྣཾ ཙཱིཝརཱནཾ ཨཉྙཏརཾ ཙཱིཝརཾ ཝིཀཔྤནུཔགཾ པཙྪིམཾ།
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
ཝཱཡཱཔེཡྻཱཏི ཝིནཱཔེཏི།
Vāyāpeyyāti vināpeti.
ཏཏྲ ཙེ སོ བྷིཀྑཱུཏི ཡཾ བྷིཀྑུཾ ཨུདྡིསྶ ཙཱིཝརཾ ཝིཡྻཏི སོ བྷིཀྑུ།
Tatra ce so bhikkhūti yaṃ bhikkhuṃ uddissa cīvaraṃ viyyati so bhikkhu.
པུབྦེ ཨཔྤཝཱརིཏོཏི པུབྦེ ཨཝུཏྟོ ཧོཏི – ‘‘ཀཱིདིསེན ཏེ, བྷནྟེ, ཙཱིཝརེན ཨཏྠོ, ཀཱིདིསཾ ཏེ ཙཱིཝརཾ ཝཱཡཱཔེམཱི’’ཏི?
Pubbe appavāritoti pubbe avutto hoti – ‘‘kīdisena te, bhante, cīvarena attho, kīdisaṃ te cīvaraṃ vāyāpemī’’ti?
ཏནྟཝཱཡེ ཨུཔསངྐམིཏྭཱཏི གྷརཾ གནྟྭཱ ཡཏྠ ཀཏྠཙི ཨུཔསངྐམིཏྭཱ།
Tantavāye upasaṅkamitvāti gharaṃ gantvā yattha katthaci upasaṅkamitvā.
ཙཱིཝརེ ཝིཀཔྤཾ ཨཱཔཛྫེཡྻཱཏི – ‘‘ཨིདཾ ཁོ, ཨཱཝུསོ, ཙཱིཝརཾ མཾ ཨུདྡིསྶ ཝིཡྻཏི, ཨཱཡཏཉྩ ཀརོཐ ཝིཏྠཏཉྩ། ཨཔྤིཏཉྩ སུཝཱིཏཉྩ སུཔྤཝཱཡིཏཉྩ སུཝིལེཁིཏཉྩ སུཝིཏཙྪིཏཉྩ ཀརོཐ། ཨཔྤེཝ ནཱམ མཡམྤི ཨཱཡསྨནྟཱནཾ ཀིཉྩིམཏྟཾ ཨནུཔདཛྫེཡྻཱམཱ’’ཏི།
Cīvare vikappaṃ āpajjeyyāti – ‘‘idaṃ kho, āvuso, cīvaraṃ maṃ uddissa viyyati, āyatañca karotha vitthatañca. Appitañca suvītañca suppavāyitañca suvilekhitañca suvitacchitañca karotha. Appeva nāma mayampi āyasmantānaṃ kiñcimattaṃ anupadajjeyyāmā’’ti.
ཨེཝཉྩ སོ བྷིཀྑུ ཝཏྭཱ ཀིཉྩིམཏྟཾ ཨནུཔདཛྫེཡྻ ཨནྟམསོ པིཎྜཔཱཏམཏྟམྤཱིཏི། པིཎྜཔཱཏོ ནཱམ ཡཱགུཔི བྷཏྟམྤི ཁཱདནཱིཡམྤི ཙུཎྞཔིཎྜོཔི དནྟཀཊྛམྤི དསིཀསུཏྟམྤི, ཨནྟམསོ དྷམྨམྤི བྷཎཏི།
Evañca so bhikkhu vatvā kiñcimattaṃ anupadajjeyya antamaso piṇḍapātamattampīti. Piṇḍapāto nāma yāgupi bhattampi khādanīyampi cuṇṇapiṇḍopi dantakaṭṭhampi dasikasuttampi, antamaso dhammampi bhaṇati.
ཏསྶ ཝཙནེན ཨཱཡཏཾ ཝཱ ཝིཏྠཏཾ ཝཱ ཨཔྤིཏཾ ཝཱ ཀརོཏི, པཡོགེ དུཀྐཊཾ། པཊིལཱབྷེན ནིསྶགྒིཡཾ ཧོཏི། ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ། ཨེཝཉྩ པན, བྷིཀྑཝེ, ནིསྶཛྫིཏབྦཾ…པེ॰… ཨིདཾ མེ, བྷནྟེ, ཙཱིཝརཾ པུབྦེ ཨཔྤཝཱརིཏོ ཨཉྙཱཏཀསྶ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔནྣཾ ནིསྶགྒིཡཾ། ཨིམཱཧཾ སངྒྷསྶ ནིསྶཛྫཱམཱིཏི…པེ॰… དདེཡྻཱཏི…པེ॰… དདེཡྻུནྟི…པེ॰… ཨཱཡསྨཏོ དམྨཱིཏི།
Tassa vacanena āyataṃ vā vitthataṃ vā appitaṃ vā karoti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, cīvaraṃ pubbe appavārito aññātakassa gahapatikassa tantavāye upasaṅkamitvā cīvare vikappaṃ āpannaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
༦༤༤. ཨཉྙཱཏཀེ ཨཉྙཱཏཀསཉྙཱི པུབྦེ ཨཔྤཝཱརིཏོ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫཏི, ནིསྶགྒིཡཾ པཱཙིཏྟིཡཾ། ཨཉྙཱཏཀེ ཝེམཏིཀོ པུབྦེ ཨཔྤཝཱརིཏོ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫཏི, ནིསྶགྒིཡཾ པཱཙིཏྟིཡཾ། ཨཉྙཱཏཀེ ཉཱཏཀསཉྙཱི པུབྦེ ཨཔྤཝཱརིཏོ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔཛྫཏི, ནིསྶགྒིཡཾ པཱཙིཏྟིཡཾ།
644. Aññātake aññātakasaññī pubbe appavārito gahapatikassa tantavāye upasaṅkamitvā cīvare vikappaṃ āpajjati, nissaggiyaṃ pācittiyaṃ. Aññātake vematiko pubbe appavārito gahapatikassa tantavāye upasaṅkamitvā cīvare vikappaṃ āpajjati, nissaggiyaṃ pācittiyaṃ. Aññātake ñātakasaññī pubbe appavārito gahapatikassa tantavāye upasaṅkamitvā cīvare vikappaṃ āpajjati, nissaggiyaṃ pācittiyaṃ.
ཉཱཏཀེ ཨཉཱཏཀསཉྙཱི, ཨཱཔཏྟི དུཀྐཊསྶ། ཉཱཏཀེ ཝེམཏིཀོ, ཨཱཔཏྟི དུཀྐཊསྶ། ཉཱཏཀེ ཉཱཏཀསཉྙཱི, ཨནཱཔཏྟི།
Ñātake añātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti.
༦༤༥. ཨནཱཔཏྟི – ཉཱཏཀཱནཾ, པཝཱརིཏཱནཾ, ཨཉྙསྶཏྠཱཡ, ཨཏྟནོ དྷནེན, མཧགྒྷཾ ཝཱཡཱཔེཏུཀཱམསྶ ཨཔྤགྒྷཾ ཝཱཡཱཔེཏི, ཨུམྨཏྟཀསྶ, ཨཱདིཀམྨིཀསྶཱཏི།
645. Anāpatti – ñātakānaṃ, pavāritānaṃ, aññassatthāya, attano dhanena, mahagghaṃ vāyāpetukāmassa appagghaṃ vāyāpeti, ummattakassa, ādikammikassāti.
མཧཱཔེསཀཱརསིཀྑཱཔདཾ ནིཊྛིཏཾ སཏྟམཾ།
Mahāpesakārasikkhāpadaṃ niṭṭhitaṃ sattamaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༧. མཧཱཔེསཀཱརསིཀྑཱཔདཝཎྞནཱ • 7. Mahāpesakārasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༧. མཧཱཔེསཀཱརསིཀྑཱཔདཝཎྞནཱ • 7. Mahāpesakārasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༧. མཧཱཔེསཀཱརསིཀྑཱཔདཝཎྞནཱ • 7. Mahāpesakārasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༧. མཧཱཔེསཀཱརསིཀྑཱཔདཝཎྞནཱ • 7. Mahāpesakārasikkhāpadavaṇṇanā
