| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
7. மஹாபேஸகாரஸிக்கா²பத³வண்ணனா
7. Mahāpesakārasikkhāpadavaṇṇanā
642. ஸத்தமே கிஞ்சிமத்தங் அனுபத³ஜ்ஜெய்யாதி இத³ங் தஸ்ஸ கத்தப்³பா³காரமத்தத³ஸ்ஸனங், தா³னங் பனெத்த² அங்க³ங் ந ஹோதி ஸுத்தவட்³ட⁴னவஸேனேவ ஆபஜ்ஜிதப்³ப³த்தா. தேனேவ பத³பா⁴ஜனேபி ‘‘தஸ்ஸ வசனேன ஆயதங் வா வித்த²தங் வா அப்பிதங் வா கரோதி, பயோகே³ து³க்கடங், படிலாபே⁴ன நிஸ்ஸக்³கி³ய’’ந்தி ஸுத்தவட்³ட⁴னாகாரமேவ த³ஸ்ஸெத்வா ஆபத்தி வுத்தா. மாதிகாட்ட²கதா²யம்பி (கங்கா²॰ அட்ட²॰ மஹாபேஸகாரஸிக்கா²பத³வண்ணனா) வுத்தங் ‘‘ந பி⁴க்கு²னோ பிண்ட³பாததா³னமத்தேன தங் நிஸ்ஸக்³கி³யங் ஹோதி. ஸசே பன தே தஸ்ஸ வசனேன சீவரஸாமிகானங் ஹத்த²தோ ஸுத்தங் க³ஹெத்வா ஈஸகம்பி ஆயதங் வா வித்த²தங் வா அப்பிதங் வா கரொந்தி, அத² தேஸங் பயோகே³ பி⁴க்கு²னோ து³க்கடங், படிலாபே⁴ன நிஸ்ஸக்³கி³யங் ஹோதீ’’தி. ஆயதாதீ³ஸு ஸத்தஸு ஆகாரேஸு ஆதி³ம்ஹி தயோ ஆகாரே ஸுத்தவட்³ட⁴னேன வினா ந ஸக்கா காதுந்தி ஆஹ ‘‘ஸுத்தவட்³ட⁴னஆகாரமேவ த³ஸ்ஸேதீ’’தி. ஸுவீதாத³யோ ஹி ஆகாரே வினாபி ஸுத்தவட்³ட⁴னேன ஸக்கா காதுங். ஸேஸமெத்த² உத்தானமேவ. அஞ்ஞாதகஅப்பவாரிதானங் தந்தவாயே உபஸங்கமித்வா விகப்பமாபஜ்ஜனதா, சீவரஸ்ஸ அத்துத்³தே³ஸிகதா, தஸ்ஸ வசனேன ஸுத்தவட்³ட⁴னங், சீவரஸ்ஸ படிலாபோ⁴தி இமானெத்த² சத்தாரி அங்கா³னி.
642. Sattame kiñcimattaṃ anupadajjeyyāti idaṃ tassa kattabbākāramattadassanaṃ, dānaṃ panettha aṅgaṃ na hoti suttavaḍḍhanavaseneva āpajjitabbattā. Teneva padabhājanepi ‘‘tassa vacanena āyataṃ vā vitthataṃ vā appitaṃ vā karoti, payoge dukkaṭaṃ, paṭilābhena nissaggiya’’nti suttavaḍḍhanākārameva dassetvā āpatti vuttā. Mātikāṭṭhakathāyampi (kaṅkhā. aṭṭha. mahāpesakārasikkhāpadavaṇṇanā) vuttaṃ ‘‘na bhikkhuno piṇḍapātadānamattena taṃ nissaggiyaṃ hoti. Sace pana te tassa vacanena cīvarasāmikānaṃ hatthato suttaṃ gahetvā īsakampi āyataṃ vā vitthataṃ vā appitaṃ vā karonti, atha tesaṃ payoge bhikkhuno dukkaṭaṃ, paṭilābhena nissaggiyaṃ hotī’’ti. Āyatādīsu sattasu ākāresu ādimhi tayo ākāre suttavaḍḍhanena vinā na sakkā kātunti āha ‘‘suttavaḍḍhanaākārameva dassetī’’ti. Suvītādayo hi ākāre vināpi suttavaḍḍhanena sakkā kātuṃ. Sesamettha uttānameva. Aññātakaappavāritānaṃ tantavāye upasaṅkamitvā vikappamāpajjanatā, cīvarassa attuddesikatā, tassa vacanena suttavaḍḍhanaṃ, cīvarassa paṭilābhoti imānettha cattāri aṅgāni.
மஹாபேஸகாரஸிக்கா²பத³வண்ணனா நிட்டி²தா.
Mahāpesakārasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. மஹாபேஸகாரஸிக்கா²பத³ங் • 7. Mahāpesakārasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 7. மஹாபேஸகாரஸிக்கா²பத³வண்ணனா • 7. Mahāpesakārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. மஹாபேஸகாரஸிக்கா²பத³வண்ணனா • 7. Mahāpesakārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. மஹாபேஸகாரஸிக்கா²பத³வண்ணனா • 7. Mahāpesakārasikkhāpadavaṇṇanā
