| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৭. মহাপেসকারসিক্খাপদৰণ্ণনা
7. Mahāpesakārasikkhāpadavaṇṇanā
৬৪১. তেন সমযেনাতি মহাপেসকারসিক্খাপদং। তত্থ সুত্তং ধারযিত্ৰাতি সুত্তং তুলেত্ৰা পলপরিচ্ছেদং কত্ৰা। অপ্পিতন্তি ঘনং। সুৰীতন্তি সুট্ঠু ৰীতং, সব্বট্ঠানেসু সমং কত্ৰা ৰীতং। সুপ্পৰাযিতন্তি সুট্ঠু পৰাযিতং সব্বট্ঠানেসু সমং কত্ৰা তন্তে পসারিতং। সুৰিলেখিতন্তি লেখনিযা সুট্ঠু ৰিলিখিতং। সুৰিতচ্ছিতন্তি কোচ্ছেন সুট্ঠু ৰিতচ্ছিতং, সুনিদ্ধোতন্তি অত্থো। পটিবদ্ধন্তি ৰেকল্লং । তন্তেতি তন্তে দীঘতো পসারণেযেৰ উপনেত্ৰাতি অত্থো।
641.Tena samayenāti mahāpesakārasikkhāpadaṃ. Tattha suttaṃ dhārayitvāti suttaṃ tuletvā palaparicchedaṃ katvā. Appitanti ghanaṃ. Suvītanti suṭṭhu vītaṃ, sabbaṭṭhānesu samaṃ katvā vītaṃ. Suppavāyitanti suṭṭhu pavāyitaṃ sabbaṭṭhānesu samaṃ katvā tante pasāritaṃ. Suvilekhitanti lekhaniyā suṭṭhu vilikhitaṃ. Suvitacchitanti kocchena suṭṭhu vitacchitaṃ, suniddhotanti attho. Paṭibaddhanti vekallaṃ . Tanteti tante dīghato pasāraṇeyeva upanetvāti attho.
৬৪২. তত্র চে সো ভিক্খূতি যত্র গামে ৰা নিগমে ৰা তে তন্তৰাযা তত্র। ৰিকপ্পং আপজ্জেয্যাতি ৰিসিট্ঠং কপ্পং অধিকৰিধানং আপজ্জেয্য। পাল়িযং পন যেনাকারেন ৰিকপ্পং আপন্নো হোতি, তং দস্সেতুং ‘‘ইদং খো, আৰুসো’’তিআদি ৰুত্তং।
642.Tatra ce so bhikkhūti yatra gāme vā nigame vā te tantavāyā tatra. Vikappaṃ āpajjeyyāti visiṭṭhaṃ kappaṃ adhikavidhānaṃ āpajjeyya. Pāḷiyaṃ pana yenākārena vikappaṃ āpanno hoti, taṃ dassetuṃ ‘‘idaṃ kho, āvuso’’tiādi vuttaṃ.
ধম্মম্পি ভণতীতি ধম্মকথম্পি কথেতি, ‘‘তস্স ৰচনেন আযতং ৰা ৰিত্থতং ৰা অপ্পিতং ৰা’’তি সুত্তৰড্ঢনআকারমেৰ দস্সেতি।
Dhammampi bhaṇatīti dhammakathampi katheti, ‘‘tassa vacanena āyataṃ vā vitthataṃ vā appitaṃ vā’’ti suttavaḍḍhanaākārameva dasseti.
পুব্বে অপ্পৰারিতোতি চীৰরসামিকেহি পুব্বে অপ্পৰারিতো হুত্ৰা। সেসং উত্তানত্থমেৰাতি।
Pubbeappavāritoti cīvarasāmikehi pubbe appavārito hutvā. Sesaṃ uttānatthamevāti.
ছসমুট্ঠানং, কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মৰচীকম্মং,
Chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ,
তিচিত্তং, তিৰেদনন্তি।
Ticittaṃ, tivedananti.
মহাপেসকারসিক্খাপদৰণ্ণনা নিট্ঠিতা।
Mahāpesakārasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৭. মহাপেসকারসিক্খাপদং • 7. Mahāpesakārasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৭. মহাপেসকারসিক্খাপদৰণ্ণনা • 7. Mahāpesakārasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৭. মহাপেসকারসিক্খাপদৰণ্ণনা • 7. Mahāpesakārasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৭. মহাপেসকারসিক্খাপদৰণ্ণনা • 7. Mahāpesakārasikkhāpadavaṇṇanā
