| Library / Tipiṭaka / तिपिटक • Tipiṭaka / महाविभङ्ग-अट्ठकथा • Mahāvibhaṅga-aṭṭhakathā |
७. महापेसकारसिक्खापदवण्णना
7. Mahāpesakārasikkhāpadavaṇṇanā
६४१. तेन समयेनाति महापेसकारसिक्खापदं। तत्थ सुत्तं धारयित्वाति सुत्तं तुलेत्वा पलपरिच्छेदं कत्वा। अप्पितन्ति घनं। सुवीतन्ति सुट्ठु वीतं, सब्बट्ठानेसु समं कत्वा वीतं। सुप्पवायितन्ति सुट्ठु पवायितं सब्बट्ठानेसु समं कत्वा तन्ते पसारितं। सुविलेखितन्ति लेखनिया सुट्ठु विलिखितं। सुवितच्छितन्ति कोच्छेन सुट्ठु वितच्छितं, सुनिद्धोतन्ति अत्थो। पटिबद्धन्ति वेकल्लं । तन्तेति तन्ते दीघतो पसारणेयेव उपनेत्वाति अत्थो।
641.Tena samayenāti mahāpesakārasikkhāpadaṃ. Tattha suttaṃ dhārayitvāti suttaṃ tuletvā palaparicchedaṃ katvā. Appitanti ghanaṃ. Suvītanti suṭṭhu vītaṃ, sabbaṭṭhānesu samaṃ katvā vītaṃ. Suppavāyitanti suṭṭhu pavāyitaṃ sabbaṭṭhānesu samaṃ katvā tante pasāritaṃ. Suvilekhitanti lekhaniyā suṭṭhu vilikhitaṃ. Suvitacchitanti kocchena suṭṭhu vitacchitaṃ, suniddhotanti attho. Paṭibaddhanti vekallaṃ . Tanteti tante dīghato pasāraṇeyeva upanetvāti attho.
६४२. तत्र चे सो भिक्खूति यत्र गामे वा निगमे वा ते तन्तवाया तत्र। विकप्पं आपज्जेय्याति विसिट्ठं कप्पं अधिकविधानं आपज्जेय्य। पाळियं पन येनाकारेन विकप्पं आपन्नो होति, तं दस्सेतुं ‘‘इदं खो, आवुसो’’तिआदि वुत्तं।
642.Tatra ce so bhikkhūti yatra gāme vā nigame vā te tantavāyā tatra. Vikappaṃ āpajjeyyāti visiṭṭhaṃ kappaṃ adhikavidhānaṃ āpajjeyya. Pāḷiyaṃ pana yenākārena vikappaṃ āpanno hoti, taṃ dassetuṃ ‘‘idaṃ kho, āvuso’’tiādi vuttaṃ.
धम्मम्पि भणतीति धम्मकथम्पि कथेति, ‘‘तस्स वचनेन आयतं वा वित्थतं वा अप्पितं वा’’ति सुत्तवड्ढनआकारमेव दस्सेति।
Dhammampi bhaṇatīti dhammakathampi katheti, ‘‘tassa vacanena āyataṃ vā vitthataṃ vā appitaṃ vā’’ti suttavaḍḍhanaākārameva dasseti.
पुब्बे अप्पवारितोति चीवरसामिकेहि पुब्बे अप्पवारितो हुत्वा। सेसं उत्तानत्थमेवाति।
Pubbeappavāritoti cīvarasāmikehi pubbe appavārito hutvā. Sesaṃ uttānatthamevāti.
छसमुट्ठानं, किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मवचीकम्मं,
Chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ,
तिचित्तं, तिवेदनन्ति।
Ticittaṃ, tivedananti.
महापेसकारसिक्खापदवण्णना निट्ठिता।
Mahāpesakārasikkhāpadavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ७. महापेसकारसिक्खापदं • 7. Mahāpesakārasikkhāpadaṃ
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / ७. महापेसकारसिक्खापदवण्णना • 7. Mahāpesakārasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / ७. महापेसकारसिक्खापदवण्णना • 7. Mahāpesakārasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / ७. महापेसकारसिक्खापदवण्णना • 7. Mahāpesakārasikkhāpadavaṇṇanā
