| Library / Tipiṭaka / ติปิฎก • Tipiṭaka / มหาวิภงฺค-อฎฺฐกถา • Mahāvibhaṅga-aṭṭhakathā |
๗. มหาเปสการสิกฺขาปทวณฺณนา
7. Mahāpesakārasikkhāpadavaṇṇanā
๖๔๑. เตน สมเยนาติ มหาเปสการสิกฺขาปทํฯ ตตฺถ สุตฺตํ ธารยิตฺวาติ สุตฺตํ ตุเลตฺวา ปลปริเจฺฉทํ กตฺวาฯ อปฺปิตนฺติ ฆนํฯ สุวีตนฺติ สุฎฺฐุ วีตํ, สพฺพฎฺฐาเนสุ สมํ กตฺวา วีตํฯ สุปฺปวายิตนฺติ สุฎฺฐุ ปวายิตํ สพฺพฎฺฐาเนสุ สมํ กตฺวา ตเนฺต ปสาริตํฯ สุวิเลขิตนฺติ เลขนิยา สุฎฺฐุ วิลิขิตํฯ สุวิตจฺฉิตนฺติ โกเจฺฉน สุฎฺฐุ วิตจฺฉิตํ, สุนิโทฺธตนฺติ อโตฺถฯ ปฎิพทฺธนฺติ เวกลฺลํ ฯ ตเนฺตติ ตเนฺต ทีฆโต ปสารเณเยว อุปเนตฺวาติ อโตฺถฯ
641.Tena samayenāti mahāpesakārasikkhāpadaṃ. Tattha suttaṃ dhārayitvāti suttaṃ tuletvā palaparicchedaṃ katvā. Appitanti ghanaṃ. Suvītanti suṭṭhu vītaṃ, sabbaṭṭhānesu samaṃ katvā vītaṃ. Suppavāyitanti suṭṭhu pavāyitaṃ sabbaṭṭhānesu samaṃ katvā tante pasāritaṃ. Suvilekhitanti lekhaniyā suṭṭhu vilikhitaṃ. Suvitacchitanti kocchena suṭṭhu vitacchitaṃ, suniddhotanti attho. Paṭibaddhanti vekallaṃ . Tanteti tante dīghato pasāraṇeyeva upanetvāti attho.
๖๔๒. ตตฺร เจ โส ภิกฺขูติ ยตฺร คาเม วา นิคเม วา เต ตนฺตวายา ตตฺรฯ วิกปฺปํ อาปเชฺชยฺยาติ วิสิฎฺฐํ กปฺปํ อธิกวิธานํ อาปเชฺชยฺยฯ ปาฬิยํ ปน เยนากาเรน วิกปฺปํ อาปโนฺน โหติ, ตํ ทเสฺสตุํ ‘‘อิทํ โข, อาวุโส’’ติอาทิ วุตฺตํฯ
642.Tatra ce so bhikkhūti yatra gāme vā nigame vā te tantavāyā tatra. Vikappaṃ āpajjeyyāti visiṭṭhaṃ kappaṃ adhikavidhānaṃ āpajjeyya. Pāḷiyaṃ pana yenākārena vikappaṃ āpanno hoti, taṃ dassetuṃ ‘‘idaṃ kho, āvuso’’tiādi vuttaṃ.
ธมฺมมฺปิ ภณตีติ ธมฺมกถมฺปิ กเถติ, ‘‘ตสฺส วจเนน อายตํ วา วิตฺถตํ วา อปฺปิตํ วา’’ติ สุตฺตวฑฺฒนอาการเมว ทเสฺสติฯ
Dhammampi bhaṇatīti dhammakathampi katheti, ‘‘tassa vacanena āyataṃ vā vitthataṃ vā appitaṃ vā’’ti suttavaḍḍhanaākārameva dasseti.
ปุเพฺพ อปฺปวาริโตติ จีวรสามิเกหิ ปุเพฺพ อปฺปวาริโต หุตฺวาฯ เสสํ อุตฺตานตฺถเมวาติฯ
Pubbeappavāritoti cīvarasāmikehi pubbe appavārito hutvā. Sesaṃ uttānatthamevāti.
ฉสมุฎฺฐานํ, กิริยํ, โนสญฺญาวิโมกฺขํ, อจิตฺตกํ, ปณฺณตฺติวชฺชํ, กายกมฺมวจีกมฺมํ,
Chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ,
ติจิตฺตํ, ติเวทนนฺติฯ
Ticittaṃ, tivedananti.
มหาเปสการสิกฺขาปทวณฺณนา นิฎฺฐิตาฯ
Mahāpesakārasikkhāpadavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๗. มหาเปสการสิกฺขาปทํ • 7. Mahāpesakārasikkhāpadaṃ
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๗. มหาเปสการสิกฺขาปทวณฺณนา • 7. Mahāpesakārasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ๗. มหาเปสการสิกฺขาปทวณฺณนา • 7. Mahāpesakārasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ๗. มหาเปสการสิกฺขาปทวณฺณนา • 7. Mahāpesakārasikkhāpadavaṇṇanā
