| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
7. මහාපෙසකාරසික්‌ඛාපදවණ්‌ණනා
7. Mahāpesakārasikkhāpadavaṇṇanā
641. තෙන සමයෙනාති මහාපෙසකාරසික්‌ඛාපදං. තත්‌ථ සුත්‌තං ධාරයිත්‌වාති සුත්‌තං තුලෙත්‌වා පලපරිච්‌ඡෙදං කත්‌වා. අප්‌පිතන්‌ති ඝනං. සුවීතන්‌ති සුට්‌ඨු වීතං, සබ්‌බට්‌ඨානෙසු සමං කත්‌වා වීතං. සුප්‌පවායිතන්‌ති සුට්‌ඨු පවායිතං සබ්‌බට්‌ඨානෙසු සමං කත්‌වා තන්‌තෙ පසාරිතං. සුවිලෙඛිතන්‌ති ලෙඛනියා සුට්‌ඨු විලිඛිතං. සුවිතච්‌ඡිතන්‌ති කොච්‌ඡෙන සුට්‌ඨු විතච්‌ඡිතං, සුනිද්‌ධොතන්‌ති අත්‌ථො. පටිබද්‌ධන්‌ති වෙකල්‌ලං . තන්‌තෙති තන්‌තෙ දීඝතො පසාරණෙයෙව උපනෙත්‌වාති අත්‌ථො.
641.Tena samayenāti mahāpesakārasikkhāpadaṃ. Tattha suttaṃ dhārayitvāti suttaṃ tuletvā palaparicchedaṃ katvā. Appitanti ghanaṃ. Suvītanti suṭṭhu vītaṃ, sabbaṭṭhānesu samaṃ katvā vītaṃ. Suppavāyitanti suṭṭhu pavāyitaṃ sabbaṭṭhānesu samaṃ katvā tante pasāritaṃ. Suvilekhitanti lekhaniyā suṭṭhu vilikhitaṃ. Suvitacchitanti kocchena suṭṭhu vitacchitaṃ, suniddhotanti attho. Paṭibaddhanti vekallaṃ . Tanteti tante dīghato pasāraṇeyeva upanetvāti attho.
642. තත්‍ර චෙ සො භික්‌ඛූති යත්‍ර ගාමෙ වා නිගමෙ වා තෙ තන්‌තවායා තත්‍ර. විකප්‌පං ආපජ්‌ජෙය්‍යාති විසිට්‌ඨං කප්‌පං අධිකවිධානං ආපජ්‌ජෙය්‍ය. පාළියං පන යෙනාකාරෙන විකප්‌පං ආපන්‌නො හොති, තං දස්‌සෙතුං ‘‘ඉදං ඛො, ආවුසො’’තිආදි වුත්‌තං.
642.Tatra ce so bhikkhūti yatra gāme vā nigame vā te tantavāyā tatra. Vikappaṃ āpajjeyyāti visiṭṭhaṃ kappaṃ adhikavidhānaṃ āpajjeyya. Pāḷiyaṃ pana yenākārena vikappaṃ āpanno hoti, taṃ dassetuṃ ‘‘idaṃ kho, āvuso’’tiādi vuttaṃ.
ධම්‌මම්‌පි භණතීති ධම්‌මකථම්‌පි කථෙති, ‘‘තස්‌ස වචනෙන ආයතං වා විත්‌ථතං වා අප්‌පිතං වා’’ති සුත්‌තවඩ්‌ඪනආකාරමෙව දස්‌සෙති.
Dhammampi bhaṇatīti dhammakathampi katheti, ‘‘tassa vacanena āyataṃ vā vitthataṃ vā appitaṃ vā’’ti suttavaḍḍhanaākārameva dasseti.
පුබ්‌බෙ අප්‌පවාරිතොති චීවරසාමිකෙහි පුබ්‌බෙ අප්‌පවාරිතො හුත්‌වා. සෙසං උත්‌තානත්‌ථමෙවාති.
Pubbeappavāritoti cīvarasāmikehi pubbe appavārito hutvā. Sesaṃ uttānatthamevāti.
ඡසමුට්‌ඨානං, කිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මවචීකම්‌මං,
Chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ,
තිචිත්‌තං, තිවෙදනන්‌ති.
Ticittaṃ, tivedananti.
මහාපෙසකාරසික්‌ඛාපදවණ්‌ණනා නිට්‌ඨිතා.
Mahāpesakārasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 7. මහාපෙසකාරසික්‌ඛාපදං • 7. Mahāpesakārasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 7. මහාපෙසකාරසික්‌ඛාපදවණ්‌ණනා • 7. Mahāpesakārasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 7. මහාපෙසකාරසික්‌ඛාපදවණ්‌ණනා • 7. Mahāpesakārasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 7. මහාපෙසකාරසික්‌ඛාපදවණ්‌ණනා • 7. Mahāpesakārasikkhāpadavaṇṇanā
