| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༧. མཧཱཔེསཀཱརསིཀྑཱཔདཝཎྞནཱ
7. Mahāpesakārasikkhāpadavaṇṇanā
ཙཱིཝརསཱམིཀེཧི པུབྦེ ཨཔྤཝཱརིཏོ ཧུཏྭཱཏི ‘‘ཀཱིདིསེན ཏེ, བྷནྟེ, ཙཱིཝརེན ཨཏྠོ, ཀཱིདིསཾ ཏེ ཙཱིཝརཾ ཝཱཡཱཔེམི, ཝད, བྷནྟེ, ཡདིཙྪསཱི’’ཏི ཙཱིཝརསཱམིཀེཧི པུབྦེ ཨཝུཏྟོ ཧུཏྭཱ། ཨེཏྠ ཙ ཨཱཡཏཱདཱིཧི ཏཱིཧི སུཏྟཝཌྜྷནཱཀཱརེན སཧ ཝཱཡནཱཀཱརཾ དསྶེཏི, སུཝཱིཏཱདཱིཧི ཙཏཱུཧི ཝཱཡནཱཀཱརམེཝ། ‘‘ཀིཉྩིམཏྟཾ ཨནུཔདཛྫེཡྻཱམཱ’’ཏིཨཱདི ཏསྶ ཀཏྟབྦཱཀཱརམཏྟདསྶནཾ, ན པན ཨངྒདསྶནཾ སུཏྟཝཌྜྷནཝསེནེཝ ཨཱཔཛྫིཏབྦཏྟཱཏི ཨཱཧ ‘‘ན བྷིཀྑུནོ པིཎྜཔཱཏདཱནམཏྟེནཱ’’ཏིཨཱདི། ཨེཏྠ ཙ ‘‘ཨིདཾ མེ, བྷནྟེ, ཙཱིཝརཾ པུབྦེ ཨཔྤཝཱརིཏེན ཨཉྙཱཏཀསྶ གཧཔཏིཀསྶ ཏནྟཝཱཡེ ཨུཔསངྐམིཏྭཱ ཙཱིཝརེ ཝིཀཔྤཾ ཨཱཔནྣཾ ནིསྶགྒིཡ’’ནྟི (པཱརཱ॰ ༦༤༣) ཨིམིནཱ ནཡེན ནིསྶཛྫནཝིདྷཱནཾ ཝེདིཏབྦཾ། ཏིཀཔཱཙིཏྟིཡནྟི ཨཉྙཱཏཀེ ཨཉྙཱཏཀསཉྙིཝེམཏིཀཉཱཏཀསཉྙཱིནཾ ཝསེན ཏཱིཎི པཱཙིཏྟིཡཱནི།
Cīvarasāmikehipubbe appavārito hutvāti ‘‘kīdisena te, bhante, cīvarena attho, kīdisaṃ te cīvaraṃ vāyāpemi, vada, bhante, yadicchasī’’ti cīvarasāmikehi pubbe avutto hutvā. Ettha ca āyatādīhi tīhi suttavaḍḍhanākārena saha vāyanākāraṃ dasseti, suvītādīhi catūhi vāyanākārameva. ‘‘Kiñcimattaṃ anupadajjeyyāmā’’tiādi tassa kattabbākāramattadassanaṃ, na pana aṅgadassanaṃ suttavaḍḍhanavaseneva āpajjitabbattāti āha ‘‘na bhikkhuno piṇḍapātadānamattenā’’tiādi. Ettha ca ‘‘idaṃ me, bhante, cīvaraṃ pubbe appavāritena aññātakassa gahapatikassa tantavāye upasaṅkamitvā cīvare vikappaṃ āpannaṃ nissaggiya’’nti (pārā. 643) iminā nayena nissajjanavidhānaṃ veditabbaṃ. Tikapācittiyanti aññātake aññātakasaññivematikañātakasaññīnaṃ vasena tīṇi pācittiyāni.
མཧཱཔེསཀཱརསིཀྑཱཔདཝཎྞནཱ ནིཊྛིཏཱ།
Mahāpesakārasikkhāpadavaṇṇanā niṭṭhitā.
