| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. மஹப்ப²லஸுத்தங்
2. Mahapphalasuttaṃ
824. ‘‘சத்தாரோமே , பி⁴க்க²வே, இத்³தி⁴பாதா³ பா⁴விதா ப³ஹுலீகதா மஹப்ப²லா ஹொந்தி மஹானிஸங்ஸா. கத²ங் பா⁴விதா ச, பி⁴க்க²வே, சத்தாரோ இத்³தி⁴பாதா³ கத²ங் ப³ஹுலீகதா மஹப்ப²லா ஹொந்தி மஹானிஸங்ஸா? இத⁴, பி⁴க்க²வே, பி⁴க்கு² ச²ந்த³ஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி – ‘இதி மே ச²ந்தோ³ ந ச அதிலீனோ ப⁴விஸ்ஸதி, ந ச அதிப்பக்³க³ஹிதோ ப⁴விஸ்ஸதி, ந ச அஜ்ஜ²த்தங் ஸங்கி²த்தோ ப⁴விஸ்ஸதி, ந ச ப³ஹித்³தா⁴ விக்கி²த்தோ ப⁴விஸ்ஸதி’. பச்சா²புரேஸஞ்ஞீ ச விஹரதி – யதா² புரே ததா² பச்சா², யதா² பச்சா² ததா² புரே; யதா² அதோ⁴ ததா² உத்³த⁴ங், யதா² உத்³த⁴ங் ததா² அதோ⁴; யதா² தி³வா ததா² ரத்திங், யதா² ரத்திங் ததா² தி³வா. இதி விவடேன சேதஸா அபரியோனத்³தே⁴ன ஸப்பபா⁴ஸங் சித்தங் பா⁴வேதி.
824. ‘‘Cattārome , bhikkhave, iddhipādā bhāvitā bahulīkatā mahapphalā honti mahānisaṃsā. Kathaṃ bhāvitā ca, bhikkhave, cattāro iddhipādā kathaṃ bahulīkatā mahapphalā honti mahānisaṃsā? Idha, bhikkhave, bhikkhu chandasamādhippadhānasaṅkhārasamannāgataṃ iddhipādaṃ bhāveti – ‘iti me chando na ca atilīno bhavissati, na ca atippaggahito bhavissati, na ca ajjhattaṃ saṃkhitto bhavissati, na ca bahiddhā vikkhitto bhavissati’. Pacchāpuresaññī ca viharati – yathā pure tathā pacchā, yathā pacchā tathā pure; yathā adho tathā uddhaṃ, yathā uddhaṃ tathā adho; yathā divā tathā rattiṃ, yathā rattiṃ tathā divā. Iti vivaṭena cetasā apariyonaddhena sappabhāsaṃ cittaṃ bhāveti.
‘‘வீரியஸமாதி⁴…பே॰… சித்தஸமாதி⁴…பே॰… வீமங்ஸாஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி – ‘இதி மே வீமங்ஸா ந ச அதிலீனா ப⁴விஸ்ஸதி, ந ச அதிப்பக்³க³ஹிதா ப⁴விஸ்ஸதி, ந ச அஜ்ஜ²த்தங் ஸங்கி²த்தா ப⁴விஸ்ஸதி, ந ச ப³ஹித்³தா⁴ விக்கி²த்தா ப⁴விஸ்ஸதி’. பச்சா²புரேஸஞ்ஞீ ச விஹரதி – யதா² புரே ததா² பச்சா², யதா² பச்சா² ததா² புரே; யதா² அதோ⁴ ததா² உத்³த⁴ங், யதா² உத்³த⁴ங் ததா² அதோ⁴; யதா² தி³வா ததா² ரத்திங், யதா² ரத்திங் ததா² தி³வா. இதி விவடேன சேதஸா அபரியோனத்³தே⁴ன ஸப்பபா⁴ஸங் சித்தங் பா⁴வேதி. ஏவங் பா⁴விதா கோ², பி⁴க்க²வே, சத்தாரோ இத்³தி⁴பாதா³ ஏவங் ப³ஹுலீகதா மஹப்ப²லா ஹொந்தி மஹானிஸங்ஸா.
‘‘Vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti – ‘iti me vīmaṃsā na ca atilīnā bhavissati, na ca atippaggahitā bhavissati, na ca ajjhattaṃ saṃkhittā bhavissati, na ca bahiddhā vikkhittā bhavissati’. Pacchāpuresaññī ca viharati – yathā pure tathā pacchā, yathā pacchā tathā pure; yathā adho tathā uddhaṃ, yathā uddhaṃ tathā adho; yathā divā tathā rattiṃ, yathā rattiṃ tathā divā. Iti vivaṭena cetasā apariyonaddhena sappabhāsaṃ cittaṃ bhāveti. Evaṃ bhāvitā kho, bhikkhave, cattāro iddhipādā evaṃ bahulīkatā mahapphalā honti mahānisaṃsā.
‘‘ஏவங் பா⁴விதேஸு கோ², பி⁴க்க²வே, பி⁴க்கு² சதூஸு இத்³தி⁴பாதே³ஸு ஏவங் ப³ஹுலீகதேஸு அனேகவிஹிதங் இத்³தி⁴வித⁴ங் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி…பே॰… யாவ ப்³ரஹ்மலோகாபி காயேன வஸங் வத்தேதி…பே॰….
‘‘Evaṃ bhāvitesu kho, bhikkhave, bhikkhu catūsu iddhipādesu evaṃ bahulīkatesu anekavihitaṃ iddhividhaṃ paccanubhoti – ekopi hutvā bahudhā hoti…pe… yāva brahmalokāpi kāyena vasaṃ vatteti…pe….
‘‘ஏவங் பா⁴விதேஸு கோ², பி⁴க்க²வே, பி⁴க்கு² சதூஸு இத்³தி⁴பாதே³ஸு ஏவங் ப³ஹுலீகதேஸு, ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி. து³தியங்.
‘‘Evaṃ bhāvitesu kho, bhikkhave, bhikkhu catūsu iddhipādesu evaṃ bahulīkatesu, āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatī’’ti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-2. புப்³ப³ஸுத்தாதி³வண்ணனா • 1-2. Pubbasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-2. புப்³ப³ஸுத்தாதி³வண்ணனா • 1-2. Pubbasuttādivaṇṇanā
