| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. මහප්‌ඵලසුත්‌තං
2. Mahapphalasuttaṃ
824. ‘‘චත්‌තාරොමෙ , භික්‌ඛවෙ, ඉද්‌ධිපාදා භාවිතා බහුලීකතා මහප්‌ඵලා හොන්‌ති මහානිසංසා. කථං භාවිතා ච, භික්‌ඛවෙ, චත්‌තාරො ඉද්‌ධිපාදා කථං බහුලීකතා මහප්‌ඵලා හොන්‌ති මහානිසංසා? ඉධ, භික්‌ඛවෙ, භික්‌ඛු ඡන්‌දසමාධිප්‌පධානසඞ්‌ඛාරසමන්‌නාගතං ඉද්‌ධිපාදං භාවෙති – ‘ඉති මෙ ඡන්‌දො න ච අතිලීනො භවිස්‌සති, න ච අතිප්‌පග්‌ගහිතො භවිස්‌සති, න ච අජ්‌ඣත්‌තං සංඛිත්‌තො භවිස්‌සති, න ච බහිද්‌ධා වික්‌ඛිත්‌තො භවිස්‌සති’. පච්‌ඡාපුරෙසඤ්‌ඤී ච විහරති – යථා පුරෙ තථා පච්‌ඡා, යථා පච්‌ඡා තථා පුරෙ; යථා අධො තථා උද්‌ධං, යථා උද්‌ධං තථා අධො; යථා දිවා තථා රත්‌තිං, යථා රත්‌තිං තථා දිවා. ඉති විවටෙන චෙතසා අපරියොනද්‌ධෙන සප්‌පභාසං චිත්‌තං භාවෙති.
824. ‘‘Cattārome , bhikkhave, iddhipādā bhāvitā bahulīkatā mahapphalā honti mahānisaṃsā. Kathaṃ bhāvitā ca, bhikkhave, cattāro iddhipādā kathaṃ bahulīkatā mahapphalā honti mahānisaṃsā? Idha, bhikkhave, bhikkhu chandasamādhippadhānasaṅkhārasamannāgataṃ iddhipādaṃ bhāveti – ‘iti me chando na ca atilīno bhavissati, na ca atippaggahito bhavissati, na ca ajjhattaṃ saṃkhitto bhavissati, na ca bahiddhā vikkhitto bhavissati’. Pacchāpuresaññī ca viharati – yathā pure tathā pacchā, yathā pacchā tathā pure; yathā adho tathā uddhaṃ, yathā uddhaṃ tathā adho; yathā divā tathā rattiṃ, yathā rattiṃ tathā divā. Iti vivaṭena cetasā apariyonaddhena sappabhāsaṃ cittaṃ bhāveti.
‘‘වීරියසමාධි…පෙ.… චිත්‌තසමාධි…පෙ.… වීමංසාසමාධිප්‌පධානසඞ්‌ඛාරසමන්‌නාගතං ඉද්‌ධිපාදං භාවෙති – ‘ඉති මෙ වීමංසා න ච අතිලීනා භවිස්‌සති, න ච අතිප්‌පග්‌ගහිතා භවිස්‌සති, න ච අජ්‌ඣත්‌තං සංඛිත්‌තා භවිස්‌සති, න ච බහිද්‌ධා වික්‌ඛිත්‌තා භවිස්‌සති’. පච්‌ඡාපුරෙසඤ්‌ඤී ච විහරති – යථා පුරෙ තථා පච්‌ඡා, යථා පච්‌ඡා තථා පුරෙ; යථා අධො තථා උද්‌ධං, යථා උද්‌ධං තථා අධො; යථා දිවා තථා රත්‌තිං, යථා රත්‌තිං තථා දිවා. ඉති විවටෙන චෙතසා අපරියොනද්‌ධෙන සප්‌පභාසං චිත්‌තං භාවෙති. එවං භාවිතා ඛො, භික්‌ඛවෙ, චත්‌තාරො ඉද්‌ධිපාදා එවං බහුලීකතා මහප්‌ඵලා හොන්‌ති මහානිසංසා.
‘‘Vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti – ‘iti me vīmaṃsā na ca atilīnā bhavissati, na ca atippaggahitā bhavissati, na ca ajjhattaṃ saṃkhittā bhavissati, na ca bahiddhā vikkhittā bhavissati’. Pacchāpuresaññī ca viharati – yathā pure tathā pacchā, yathā pacchā tathā pure; yathā adho tathā uddhaṃ, yathā uddhaṃ tathā adho; yathā divā tathā rattiṃ, yathā rattiṃ tathā divā. Iti vivaṭena cetasā apariyonaddhena sappabhāsaṃ cittaṃ bhāveti. Evaṃ bhāvitā kho, bhikkhave, cattāro iddhipādā evaṃ bahulīkatā mahapphalā honti mahānisaṃsā.
‘‘එවං භාවිතෙසු ඛො, භික්‌ඛවෙ, භික්‌ඛු චතූසු ඉද්‌ධිපාදෙසු එවං බහුලීකතෙසු අනෙකවිහිතං ඉද්‌ධිවිධං පච්‌චනුභොති – එකොපි හුත්‌වා බහුධා හොති…පෙ.… යාව බ්‍රහ්‌මලොකාපි කායෙන වසං වත්‌තෙති…පෙ.….
‘‘Evaṃ bhāvitesu kho, bhikkhave, bhikkhu catūsu iddhipādesu evaṃ bahulīkatesu anekavihitaṃ iddhividhaṃ paccanubhoti – ekopi hutvā bahudhā hoti…pe… yāva brahmalokāpi kāyena vasaṃ vatteti…pe….
‘‘එවං භාවිතෙසු ඛො, භික්‌ඛවෙ, භික්‌ඛු චතූසු ඉද්‌ධිපාදෙසු එවං බහුලීකතෙසු, ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරතී’’ති. දුතියං.
‘‘Evaṃ bhāvitesu kho, bhikkhave, bhikkhu catūsu iddhipādesu evaṃ bahulīkatesu, āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatī’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-2. පුබ්‌බසුත්‌තාදිවණ්‌ණනා • 1-2. Pubbasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-2. පුබ්‌බසුත්‌තාදිවණ්‌ණනා • 1-2. Pubbasuttādivaṇṇanā
