| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༩. མཧཱཔུཎྞམསུཏྟཝཎྞནཱ
9. Mahāpuṇṇamasuttavaṇṇanā
༨༥. ཨེཝཾ མེ སུཏནྟི མཧཱཔུཎྞམསུཏྟཾ། ཏཏྠ ཏདཧཱུཏི ཏསྨིཾ ཨཧུ, ཏསྨིཾ དིཝསེཏི ཨཏྠོ། ཨུཔཝསནྟི ཨེཏྠཱཏི ཨུཔོསཐོ། ཨུཔཝསནྟཱིཏི སཱིལེན ཝཱ ཨནསནེན ཝཱ ཨུཔེཏཱ ཧུཏྭཱ ཝསནྟཱིཏི ཨཏྠོ། ཨཡཾ པནེཏྠ ཨཏྠུདྡྷཱརོ – ‘‘ཨཱཡཱམ, ཨཱཝུསོ, ཀཔྤིན, ཨུཔོསཐཾ གམིསྶཱམཱ’’ཏིཨཱདཱིསུ ཧི པཱཏིམོཀྑུདྡེསོ ཨུཔོསཐོ། ‘‘ཨཊྛངྒསམནྣཱགཏོ ཁོ ཝིསཱཁེ ཨུཔོསཐོ ཨུཔཝུཏྠོ’’ཏིཨཱདཱིསུ (ཨ॰ ནི॰ ༨.༥༣) སཱིལཾ། ‘‘སུདྡྷསྶ ཝེ སདཱ ཕགྒུ, སུདྡྷསྶུཔོསཐོ སདཱ’’ཏིཨཱདཱིསུ (མ॰ ནི॰ ༡.༧༩) ཨུཔཝཱསོ། ‘‘ཨུཔོསཐོ ནཱམ ནཱགརཱཛཱ’’ཏིཨཱདཱིསུ (དཱི॰ ནི॰ ༢.༢༤༦) པཉྙཏྟི། ‘‘ན, བྷིཀྑཝེ, ཏདཧུཔོསཐེ སབྷིཀྑུཀཱ ཨཱཝཱསཱ’’ཏིཨཱདཱིསུ (མཧཱཝ॰ ༡༨༡) ཨུཔཝསིཏབྦདིཝསོ། ཨིདྷཱཔི སོཡེཝ ཨདྷིཔྤེཏོ ། སོ པནེས ཨཊྛམཱིཙཱཏུདྡསཱིཔནྣརསཱིབྷེདེན ཏིཝིདྷོ། ཏསྨཱ སེསདྭཡནིཝཱརཎཏྠཾ པནྣརསེཏི ཝུཏྟཾ། ཏེན ཝུཏྟཾ ‘‘ཨུཔཝསནྟི ཨེཏྠཱཏི ཨུཔོསཐོ’’ཏི། མཱསཔུཎྞཏཱཡ པུཎྞཱ སཾཔུཎྞཱཏི པུཎྞཱ། མཱ-ཨིཏི ཙནྡོ ཝུཙྩཏི, སོ ཨེཏྠ པུཎྞོཏི པུཎྞམཱ། ཨེཝཾ པུཎྞཱཡ པུཎྞམཱཡཱཏི ཨིམསྨིཾ པདདྭཡེ ཨཏྠོ ཝེདིཏབྦོ།
85.Evaṃme sutanti mahāpuṇṇamasuttaṃ. Tattha tadahūti tasmiṃ ahu, tasmiṃ divaseti attho. Upavasanti etthāti uposatho. Upavasantīti sīlena vā anasanena vā upetā hutvā vasantīti attho. Ayaṃ panettha atthuddhāro – ‘‘āyāma, āvuso, kappina, uposathaṃ gamissāmā’’tiādīsu hi pātimokkhuddeso uposatho. ‘‘Aṭṭhaṅgasamannāgato kho visākhe uposatho upavuttho’’tiādīsu (a. ni. 8.53) sīlaṃ. ‘‘Suddhassa ve sadā phaggu, suddhassuposatho sadā’’tiādīsu (ma. ni. 1.79) upavāso. ‘‘Uposatho nāma nāgarājā’’tiādīsu (dī. ni. 2.246) paññatti. ‘‘Na, bhikkhave, tadahuposathe sabhikkhukā āvāsā’’tiādīsu (mahāva. 181) upavasitabbadivaso. Idhāpi soyeva adhippeto . So panesa aṭṭhamīcātuddasīpannarasībhedena tividho. Tasmā sesadvayanivāraṇatthaṃ pannaraseti vuttaṃ. Tena vuttaṃ ‘‘upavasanti etthāti uposatho’’ti. Māsapuṇṇatāya puṇṇā saṃpuṇṇāti puṇṇā. Mā-iti cando vuccati, so ettha puṇṇoti puṇṇamā. Evaṃ puṇṇāya puṇṇamāyāti imasmiṃ padadvaye attho veditabbo.
དེསནྟི ཀཱརཎཾ། ཏེན ཧི ཏྭཾ བྷིཀྑུ སཀེ ཨཱསནེ ནིསཱིདིཏྭཱ པུཙྪཱཏི ཀསྨཱ བྷགཝཱ ཋིཏསྶ ཨཀཐེཏྭཱ ནིསཱིདཱཔེསཱིཏི། ཨཡཾ ཀིར བྷིཀྑུ སཊྛིམཏྟཱནཾ པདྷཱནིཡབྷིཀྑཱུནཾ སངྒྷཏྠེརོ སཊྛི བྷིཀྑཱུ གཧེཏྭཱ ཨརཉྙེ ཝསཏི, ཏེ ཏསྶ སནྟིཀེ ཀམྨཊྛཱནཾ གཧེཏྭཱ གྷཊེནྟི ཝཱཡམནྟི། མཧཱབྷཱུཏཱནི པརིགྒཎྷནྟི ཨུཔཱདཱརཱུཔཱནི, ནཱམརཱུཔཔཙྩཡལཀྑཎཱརམྨཎིཀཝིཔསྶནཾ པརིགྒཎྷནྟི། ཨཐ ནེ ཨཱཙརིཡུཔཊྛཱནཾ ཨཱགནྟྭཱ ཝནྡིཏྭཱ ནིསིནྣེ ཐེརོ མཧཱབྷཱུཏཔརིགྒཧཱདཱིནི པུཙྪཏི། ཏེ སབྦཾ ཀཐེནྟི, མགྒཕལཔཉྷཾ པུཙྪིཏཱ པན ཀཐེཏུཾ ན སཀྐོནྟི། ཨཐ ཐེརོ ཙིནྟེསི – ‘‘མམ སནྟིཀེ ཨེཏེསཾ ཨོཝཱདསྶ པརིཧཱནི ནཏྠི, ཨིམེ ཙ ཨཱརདྡྷཝཱིརིཡཱ ཝིཧརནྟི། ཀུཀྐུཊསྶ པཱནཱིཡཔིཝནཀཱལམཏྟམྤི ནེསཾ པམཱདཀིརིཡཱ ནཏྠི། ཨེཝཾ སནྟེཔི མགྒཕལཱནི ནིབྦཏྟེཏུཾ ན སཀྐོནྟི། ཨཧཾ ཨིམེསཾ ཨཛ྄ཛྷཱསཡཾ ན ཛཱནཱམི, བུདྡྷཝེནེཡྻཱ ཨེཏེ བྷཝིསྶནྟི , གཧེཏྭཱ ནེ སཏྠུ སནྟིཀཾ གཙྪཱམི, ཨཐ ནེསཾ སཏྠཱ ཙརིཡཝསེན དྷམྨཾ དེསེསྶཏཱི’’ཏི, ཏེ བྷིཀྑཱུ གཧེཏྭཱ སཏྠུ སནྟིཀཾ ཨཱགཏོ།
Desanti kāraṇaṃ. Tena hi tvaṃ bhikkhu sake āsane nisīditvā pucchāti kasmā bhagavā ṭhitassa akathetvā nisīdāpesīti. Ayaṃ kira bhikkhu saṭṭhimattānaṃ padhāniyabhikkhūnaṃ saṅghatthero saṭṭhi bhikkhū gahetvā araññe vasati, te tassa santike kammaṭṭhānaṃ gahetvā ghaṭenti vāyamanti. Mahābhūtāni pariggaṇhanti upādārūpāni, nāmarūpapaccayalakkhaṇārammaṇikavipassanaṃ pariggaṇhanti. Atha ne ācariyupaṭṭhānaṃ āgantvā vanditvā nisinne thero mahābhūtapariggahādīni pucchati. Te sabbaṃ kathenti, maggaphalapañhaṃ pucchitā pana kathetuṃ na sakkonti. Atha thero cintesi – ‘‘mama santike etesaṃ ovādassa parihāni natthi, ime ca āraddhavīriyā viharanti. Kukkuṭassa pānīyapivanakālamattampi nesaṃ pamādakiriyā natthi. Evaṃ santepi maggaphalāni nibbattetuṃ na sakkonti. Ahaṃ imesaṃ ajjhāsayaṃ na jānāmi, buddhaveneyyā ete bhavissanti , gahetvā ne satthu santikaṃ gacchāmi, atha nesaṃ satthā cariyavasena dhammaṃ desessatī’’ti, te bhikkhū gahetvā satthu santikaṃ āgato.
སཏྠཱཔི སཱཡནྷསམཡེ ཨཱནནྡཏྠེརེན ཨུཔནཱིཏཾ ཨུདཀཾ ཨཱདཱཡ སརཱིརཾ ཨུཏུཾ གཎྷཱཔེཏྭཱ མིགཱརམཱཏུཔཱསཱདཔརིཝེཎེ པཉྙཏྟཝརབུདྡྷཱསནེ ནིསཱིདི, བྷིཀྑུསངྒྷོཔི ནཾ པརིཝཱརེཏྭཱ ནིསཱིདི།
Satthāpi sāyanhasamaye ānandattherena upanītaṃ udakaṃ ādāya sarīraṃ utuṃ gaṇhāpetvā migāramātupāsādapariveṇe paññattavarabuddhāsane nisīdi, bhikkhusaṅghopi naṃ parivāretvā nisīdi.
ཏསྨིཾ སམཡེ སཱུརིཡོ ཨཏྠངྒམེཏི, ཙནྡོ ཨུགྒཙྪཏི, མཛ྄ཛྷཊྛཱནེ ཙ བྷགཝཱ ནིསིནྣོ། ཙནྡསྶ པབྷཱ ནཏྠི, སཱུརིཡསྶ པབྷཱ ནཏྠི, ཙནྡིམསཱུརིཡཱནཾ པབྷཾ མཀྑེཏྭཱ ཚབྦཎྞཱ ཡམཀབུདྡྷརསྨིཡོ ཝིཛྫོཏམཱནཱ པུཉྫཱ པུཉྫཱ ཧུཏྭཱ དིསཱཝིདིསཱསུ དྷཱཝནྟཱིཏི སབྦཾ ཧེཊྛཱ ཝུཏྟནཡེན ཝིཏྠཱརེཏབྦཾ། ཝཎྞབྷཱུམི ནཱམེསཱ, དྷམྨཀཐིཀསྶེཝེཏྠ ཐཱམོ པམཱཎཾ, ཡཏྟཀཾ སཀྐོཏི, ཏཏྟཀཾ ཀཐེཏབྦཾ། དུཀྐཐིཏནྟི ན ཝཏྟབྦཾ། ཨེཝཾ སནྣིསིནྣཱཡ པརིསཱཡ ཐེརོ ཨུཊྛཧིཏྭཱ སཏྠཱརཾ པཉྷསྶ ཨོཀཱསཾ ཀཱརེསི། ཏཏོ བྷགཝཱ – ‘‘སཙེ ཨིམསྨིཾ ཋིཏཀེ པུཙྪནྟེ ‘ཨཱཙརིཡོ ནོ ཨུཊྛིཏོ’ཏི སེསབྷིཀྑཱུ ཨུཊྛཧིསྶནྟི, ཨེཝཾ ཏཐཱགཏེ ཨགཱརཝོ ཀཏོ བྷཝིསྶཏི། ཨཐ ནིསིནྣཱཝ པུཙྪིསྶནྟི, ཨཱཙརིཡེ ཨགཱརཝོ ཀཏོ བྷཝིསྶཏི, ཨེཀགྒཱ ཧུཏྭཱ དྷམྨདེསནཾ པཊིཙྪིཏུཾ ན སཀྐུཎིསྶནྟི། ཨཱཙརིཡེ པན ནིསིནྣེ ཏེཔི ནིསཱིདིསྶནྟི། ཏཏོ ཨེཀགྒཱ དྷམྨདེསནཾ པཊིཙྪིཏུཾ སཀྐུཎིསྶནྟཱི’’ཏི ཨིམིནཱ ཀཱརཎེན བྷགཝཱ ཋིཏསྶ ཨཀཐེཏྭཱ ནིསཱིདཱཔེཏཱིཏི།
Tasmiṃ samaye sūriyo atthaṅgameti, cando uggacchati, majjhaṭṭhāne ca bhagavā nisinno. Candassa pabhā natthi, sūriyassa pabhā natthi, candimasūriyānaṃ pabhaṃ makkhetvā chabbaṇṇā yamakabuddharasmiyo vijjotamānā puñjā puñjā hutvā disāvidisāsu dhāvantīti sabbaṃ heṭṭhā vuttanayena vitthāretabbaṃ. Vaṇṇabhūmi nāmesā, dhammakathikassevettha thāmo pamāṇaṃ, yattakaṃ sakkoti, tattakaṃ kathetabbaṃ. Dukkathitanti na vattabbaṃ. Evaṃ sannisinnāya parisāya thero uṭṭhahitvā satthāraṃ pañhassa okāsaṃ kāresi. Tato bhagavā – ‘‘sace imasmiṃ ṭhitake pucchante ‘ācariyo no uṭṭhito’ti sesabhikkhū uṭṭhahissanti, evaṃ tathāgate agāravo kato bhavissati. Atha nisinnāva pucchissanti, ācariye agāravo kato bhavissati, ekaggā hutvā dhammadesanaṃ paṭicchituṃ na sakkuṇissanti. Ācariye pana nisinne tepi nisīdissanti. Tato ekaggā dhammadesanaṃ paṭicchituṃ sakkuṇissantī’’ti iminā kāraṇena bhagavā ṭhitassa akathetvā nisīdāpetīti.
ཨིམེ ནུ ཁོ, བྷནྟེཏི ཝིམཏིཔུཙྪཱ ཝིཡ ཀཐིཏཱ། ཐེརོ པན པཉྩཀྑནྡྷཱནཾ ཨུདཡབྦཡཾ པརིགྒཎྷིཏྭཱ ཨརཧཏྟཾ པཏྟོ མཧཱཁཱིཎཱསཝོ, ནཏྠི ཨེཏསྶ ཝིམཏི། ཛཱནནྟེནཔི པན ཨཛཱནནྟེན ཝིཡ ཧུཏྭཱ པུཙྪིཏུཾ ཝཊྚཏི། སཙེ ཧི ཛཱནནྟོ ཝིཡ པུཙྪཏི, ‘‘ཛཱནཱཏི ཨཡ’’ནྟི ཏསྶ ཏསྶ ཝིསྶཛྫེནྟོ ཨེཀདེསམེཝ ཀཐེཏི། ཨཛཱནནྟེན ཝིཡ པུཙྪིཏེ པན ཀཐེནྟོ ཨིཏོ ཙ ཨེཏྟོ ཙ ཀཱརཎཾ ཨཱཧརིཏྭཱ པཱཀཊཾ ཀཏྭཱ ཀཐེཏི། ཀོཙི པན ཨཛཱནནྟོཔི ཛཱནནྟོ ཝིཡ པུཙྪཏི། ཐེརོ ཨེཝརཱུཔཾ ཝཙནཾ ཀིཾ ཀརིསྶཏི, ཛཱནནྟོཡེཝ པན ཨཛཱནནྟོ ཝིཡ པུཙྪཏཱིཏི ཝེདིཏབྦོ།
Ime nu kho, bhanteti vimatipucchā viya kathitā. Thero pana pañcakkhandhānaṃ udayabbayaṃ pariggaṇhitvā arahattaṃ patto mahākhīṇāsavo, natthi etassa vimati. Jānantenapi pana ajānantena viya hutvā pucchituṃ vaṭṭati. Sace hi jānanto viya pucchati, ‘‘jānāti aya’’nti tassa tassa vissajjento ekadesameva katheti. Ajānantena viya pucchite pana kathento ito ca etto ca kāraṇaṃ āharitvā pākaṭaṃ katvā katheti. Koci pana ajānantopi jānanto viya pucchati. Thero evarūpaṃ vacanaṃ kiṃ karissati, jānantoyeva pana ajānanto viya pucchatīti veditabbo.
ཚནྡམཱུལཀཱཏི ཏཎྷཱམཱུལཀཱ། ཨེཝཾརཱུཔོ སིཡནྟི སཙེ ཨོདཱཏོ ཧོཏུཀཱམོ, ཧརིཏཱལཝཎྞོ ཝཱ མནོསིལཱཝཎྞོ ཝཱ སིཡནྟི པཏྠེཏི ། སཙེ ཀཱལོ༹ ཧོཏུཀཱམོ, ནཱིལུཔྤལཝཎྞོ ཝཱ ཨཉྫནཝཎྞོ ཝཱ ཨཏསཱིཔུཔྥཝཎྞོ ཝཱ སིཡནྟི པཏྠེཏི། ཨེཝཾཝེདནོཏི ཀུསལཝེདནོ ཝཱ སུཁཝེདནོ ཝཱ སིཡནྟི པཏྠེཏི། སཉྙཱདཱིསུཔི ཨེསེཝ ནཡོ། ཡསྨཱ པན ཨཏཱིཏེ པཏྠནཱ ནཱམ ནཏྠི, པཏྠེནྟེནཱཔི ཙ ན སཀྐཱ ཏཾ ལདྡྷུཾ, པཙྩུཔྤནྣེཔི ན ཧོཏི, ན ཧི ཨོདཱཏོ ཀཱལ༹བྷཱཝཾ པཏྠེཏྭཱ པཙྩུཔྤནྣེ ཀཱལོ༹ ཧོཏི, ན ཀཱལོ༹ ཝཱ ཨོདཱཏོ, དཱིགྷོ ཝཱ རསྶོ, རསྶོ ཝཱ དཱིགྷོ, དཱནཾ པན དཏྭཱ སཱིལཾ ཝཱ སམཱདིཡིཏྭཱ ‘‘ཨནཱགཏེ ཁཏྟིཡོ ཝཱ ཧོམི བྲཱཧྨཎོ ཝཱ’’ཏི པཏྠེནྟསྶ པཏྠནཱ སམིཛ྄ཛྷཏི། ཏསྨཱ ཨནཱགཏམེཝ གཧིཏཾ།
Chandamūlakāti taṇhāmūlakā. Evaṃrūpo siyanti sace odāto hotukāmo, haritālavaṇṇo vā manosilāvaṇṇo vā siyanti pattheti . Sace kāḷo hotukāmo, nīluppalavaṇṇo vā añjanavaṇṇo vā atasīpupphavaṇṇo vā siyanti pattheti. Evaṃvedanoti kusalavedano vā sukhavedano vā siyanti pattheti. Saññādīsupi eseva nayo. Yasmā pana atīte patthanā nāma natthi, patthentenāpi ca na sakkā taṃ laddhuṃ, paccuppannepi na hoti, na hi odāto kāḷabhāvaṃ patthetvā paccuppanne kāḷo hoti, na kāḷo vā odāto, dīgho vā rasso, rasso vā dīgho, dānaṃ pana datvā sīlaṃ vā samādiyitvā ‘‘anāgate khattiyo vā homi brāhmaṇo vā’’ti patthentassa patthanā samijjhati. Tasmā anāgatameva gahitaṃ.
ཁནྡྷཱདྷིཝཙནནྟི ཁནྡྷཱནཾ ཁནྡྷཔཎྞཏྟི ཀིཏྟཀེན ཧོཏཱིཏི པུཙྪཏི།
Khandhādhivacananti khandhānaṃ khandhapaṇṇatti kittakena hotīti pucchati.
མཧཱབྷཱུཏཱ ཧེཏཱུཏི ‘‘ཏཡོ ཀུསལཧེཏཱུ’’ཏིཨཱདཱིསུ (དྷ॰ ས॰ ༡༤༤༡) ཧི ཧེཏུཧེཏུ ཝུཏྟོ། ཨཝིཛྫཱ པུཉྙཱབྷིསངྑཱརཱདཱིནཾ སཱདྷཱརཎཏྟཱ སཱདྷཱརཎཧེཏུ། ཀུསལཱཀུསལཾ ཨཏྟནོ ཨཏྟནོ ཝིཔཱཀདཱནེ ཨུཏྟམཧེཏུ། ཨིདྷ པཙྩཡཧེཏུ ཨདྷིཔྤེཏོ། ཏཏྠ པཐཝཱིདྷཱཏུ མཧཱབྷཱུཏཾ ཨིཏརེསཾ ཏིཎྞཾ བྷཱུཏཱནཾ ཨུཔཱདཱརཱུཔསྶ ཙ པཉྙཱཔནཱཡ དསྶནཏྠཱཡ ཧེཏུ ཙེཝ པཙྩཡོ ཙ། ཨེཝཾ སེསེསུཔི ཡོཛནཱ ཝེདིཏབྦཱ།
Mahābhūtā hetūti ‘‘tayo kusalahetū’’tiādīsu (dha. sa. 1441) hi hetuhetu vutto. Avijjā puññābhisaṅkhārādīnaṃ sādhāraṇattā sādhāraṇahetu. Kusalākusalaṃ attano attano vipākadāne uttamahetu. Idha paccayahetu adhippeto. Tattha pathavīdhātu mahābhūtaṃ itaresaṃ tiṇṇaṃ bhūtānaṃ upādārūpassa ca paññāpanāya dassanatthāya hetu ceva paccayo ca. Evaṃ sesesupi yojanā veditabbā.
ཕསྶོཏི ‘‘ཕུཊྛོ, བྷིཀྑཝེ, ཝེདེཏི, ཕུཊྛོ སཉྫཱནཱཏི, ཕུཊྛོ ཙེཏེཏཱི’’ཏི (སཾ॰ ནི॰ ༤.༩༣) ཝཙནཏོ ཕསྶོ ཏིཎྞཾ ཁནྡྷཱནཾ པཉྙཱཔནཱཡ ཧེཏུ ཙེཝ པཙྩཡོ ཙ། ཝིཉྙཱཎཀྑནྡྷསྶཱཏི ཨེཏྠ པཊིསནྡྷིཝིཉྙཱཎེན ཏཱཝ སདྡྷིཾ གབྦྷསེཡྻཀཱནཾ ཨུཔརིམཔརིཙྪེདེན སམཏིཾས རཱུཔཱནི སམྤཡུཏྟཱ ཙ ཏཡོ ཁནྡྷཱ ཨུཔྤཛྫནྟི, ཏཾ ནཱམརཱུཔཾ པཊིསནྡྷིཝིཉྙཱཎསྶ པཉྙཱཔནཱཡ ཧེཏུ ཙེཝ པཙྩཡོ ཙ། ཙཀྑུདྭཱརེ ཙཀྑུཔསཱདོ ཙེཝ རཱུཔཱརམྨཎཉྩ རཱུཔཾ, སམྤཡུཏྟཱ ཏཡོ ཁནྡྷཱ ནཱམཾ། ཏཾ ནཱམརཱུཔཾ ཙཀྑུཝིཉྙཱཎསྶ པཉྙཱཔནཱཡ ཧེཏུ ཙེཝ པཙྩཡོ ཙ། ཨེསེཝ ནཡོ སེསཝིཉྙཱཎེསུ།
Phassoti ‘‘phuṭṭho, bhikkhave, vedeti, phuṭṭho sañjānāti, phuṭṭho cetetī’’ti (saṃ. ni. 4.93) vacanato phasso tiṇṇaṃ khandhānaṃ paññāpanāya hetu ceva paccayo ca. Viññāṇakkhandhassāti ettha paṭisandhiviññāṇena tāva saddhiṃ gabbhaseyyakānaṃ uparimaparicchedena samatiṃsa rūpāni sampayuttā ca tayo khandhā uppajjanti, taṃ nāmarūpaṃ paṭisandhiviññāṇassa paññāpanāya hetu ceva paccayo ca. Cakkhudvāre cakkhupasādo ceva rūpārammaṇañca rūpaṃ, sampayuttā tayo khandhā nāmaṃ. Taṃ nāmarūpaṃ cakkhuviññāṇassa paññāpanāya hetu ceva paccayo ca. Eseva nayo sesaviññāṇesu.
༨༧. ཀཐཾ པན, བྷནྟེཏི ཨིདཾ ཀིཏྟཀེན ནུ ཁོཏི ཝཊྚཾ པུཙྪནྟོ ཨེཝམཱཧ། སཀྐཱཡདིཊྛི ན ཧོཏཱིཏི ཨིདཾ ཝིཝཊྚཾ པུཙྪནྟོ ཨེཝམཱཧ།
87.Kathaṃ pana, bhanteti idaṃ kittakena nu khoti vaṭṭaṃ pucchanto evamāha. Sakkāyadiṭṭhi na hotīti idaṃ vivaṭṭaṃ pucchanto evamāha.
༨༨. ཨཡཾ རཱུཔེ ཨསྶཱདོཏི ཨིམིནཱ པརིཉྙཱཔཊིཝེདྷོ ཙེཝ དུཀྑསཙྩཉྩ ཀཐིཏཾ། ཨཡཾ རཱུཔེ ཨཱདཱིནཝོཏི ཨིམིནཱ པཧཱནཔཊིཝེདྷོ ཙེཝ སམུདཡསཙྩཉྩ། ཨིདཾ རཱུཔེ ནིསྶརཎནྟི ཨིམིནཱ སཙྪིཀིརིཡཱཔཊིཝེདྷོ ཙེཝ ནིརོདྷསཙྩཉྩ། ཡེ ཨིམེསུ ཏཱིསུ ཋཱནེསུ སམྨཱདིཊྛིཨཱདཡོ དྷམྨཱ, ཨཡཾ བྷཱཝནཱཔཊིཝེདྷོ མགྒསཙྩཾ། སེསཔདེསུཔི ཨེསེཝ ནཡོ།
88.Ayaṃrūpe assādoti iminā pariññāpaṭivedho ceva dukkhasaccañca kathitaṃ. Ayaṃ rūpe ādīnavoti iminā pahānapaṭivedho ceva samudayasaccañca. Idaṃ rūpe nissaraṇanti iminā sacchikiriyāpaṭivedho ceva nirodhasaccañca. Ye imesu tīsu ṭhānesu sammādiṭṭhiādayo dhammā, ayaṃ bhāvanāpaṭivedho maggasaccaṃ. Sesapadesupi eseva nayo.
༨༩. བཧིདྡྷཱཏི པརསྶ སཝིཉྙཱཎཀེ ཀཱཡེ། སབྦནིམིཏྟེསཱུཏི ཨིམིནཱ པན ཨནིནྡྲིཡབདྡྷམྤི སངྒཎྷཱཏི། ‘‘སཝིཉྙཱཎཀེ ཀཱཡེ’’ཏི ཝཙནེན ཝཱ ཨཏྟནོ ཙ པརསྶ ཙ ཀཱཡོ གཧིཏོཝ, བཧིདྡྷཱ ཙ སབྦནིམིཏྟགྒཧཎེན ཨནིནྡྲིཡབདྡྷཾ གཎྷཱཏི།
89.Bahiddhāti parassa saviññāṇake kāye. Sabbanimittesūti iminā pana anindriyabaddhampi saṅgaṇhāti. ‘‘Saviññāṇake kāye’’ti vacanena vā attano ca parassa ca kāyo gahitova, bahiddhā ca sabbanimittaggahaṇena anindriyabaddhaṃ gaṇhāti.
༩༠. ཨནཏྟཀཏཱནཱིཏི ཨནཏྟནི ཋཏྭཱ ཀཏཱནི། ཀམཏྟཱནཾ ཕུསིསྶནྟཱིཏི ཀཏརསྨིཾ ཨཏྟནི ཋཏྭཱ ཝིཔཱཀཾ དསྶེནྟཱིཏི སསྶཏདསྶནཾ ཨོཀྐམནྟོ ཨེཝམཱཧ། ཏཎྷཱདྷིཔཏེཡྻེནཱཏི ཏཎྷཱཛེཊྛཀེན། ཏཏྲ ཏཏྲཱཏི ཏེསུ ཏེསུ དྷམྨེསུ། སཊྛིམཏྟཱནནྟི ཨིམེ བྷིཀྑཱུ པཀཏིཀམྨཊྛཱནཾ ཛཧིཏྭཱ ཨཉྙཾ ནཝཀམྨཊྛཱནཾ སམྨསནྟཱ པལླངྐཾ ཨབྷིནྡིཏྭཱ ཏསྨིཾཡེཝ ཨཱསནེ ཨརཧཏྟཾ པཱཔུཎིཾསུ། སེསཾ སབྦཏྠ ཨུཏྟཱནམེཝཱཏི།
90.Anattakatānīti anattani ṭhatvā katāni. Kamattānaṃ phusissantīti katarasmiṃ attani ṭhatvā vipākaṃ dassentīti sassatadassanaṃ okkamanto evamāha. Taṇhādhipateyyenāti taṇhājeṭṭhakena. Tatra tatrāti tesu tesu dhammesu. Saṭṭhimattānanti ime bhikkhū pakatikammaṭṭhānaṃ jahitvā aññaṃ navakammaṭṭhānaṃ sammasantā pallaṅkaṃ abhinditvā tasmiṃyeva āsane arahattaṃ pāpuṇiṃsu. Sesaṃ sabbattha uttānamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
མཧཱཔུཎྞམསུཏྟཝཎྞནཱ ནིཊྛིཏཱ།
Mahāpuṇṇamasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༩. མཧཱཔུཎྞམསུཏྟཾ • 9. Mahāpuṇṇamasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༩. མཧཱཔུཎྞམསུཏྟཝཎྞནཱ • 9. Mahāpuṇṇamasuttavaṇṇanā
