| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
3. மஹாபுரிஸலக்க²ணபஞ்ஹோ
3. Mahāpurisalakkhaṇapañho
3. ராஜா ஆஹ ‘‘ப⁴ந்தே நாக³ஸேன, பு³த்³தோ⁴ த்³வத்திங்ஸமஹாபுரிஸலக்க²ணேஹி ஸமன்னாக³தோ அஸீதியா ச அனுப்³யஞ்ஜனேஹி பரிரஞ்ஜிதோ ஸுவண்ணவண்ணோ கஞ்சனஸன்னிப⁴த்தசோ ப்³யாமப்பபோ⁴’’தி? ‘‘ஆம, மஹாராஜ, ப⁴க³வா த்³வத்திங்ஸமஹாபுரிஸலக்க²ணேஹி ஸமன்னாக³தோ அஸீதியா ச அனுப்³யஞ்ஜனேஹி பரிரஞ்ஜிதோ ஸுவண்ணவண்ணோ கஞ்சனஸன்னிப⁴த்தசோ ப்³யாமப்பபோ⁴’’தி.
3. Rājā āha ‘‘bhante nāgasena, buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti? ‘‘Āma, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti.
‘‘கிங் பனஸ்ஸ, ப⁴ந்தே, மாதாபிதரோபி த்³வத்திங்ஸமஹாபுரிஸலக்க²ணேஹி ஸமன்னாக³தா அஸீதியா ச அனுப்³யஞ்ஜனேஹி பரிரஞ்ஜிதா ஸுவண்ணவண்ணா கஞ்சனஸன்னிப⁴த்தசா ப்³யாமப்பபா⁴’’தி? ‘‘நோ சஸ்ஸ, மஹாராஜ, மாதாபிதரோ த்³வத்திங்ஸமஹாபுரிஸலக்க²ணேஹி ஸமன்னாக³தா அஸீதியா ச அனுப்³யஞ்ஜனேஹி பரிரஞ்ஜிதா ஸுவண்ணவண்ணா கஞ்சனஸன்னிப⁴த்தசா ப்³யாமப்பபா⁴’’தி.
‘‘Kiṃ panassa, bhante, mātāpitaropi dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti? ‘‘No cassa, mahārāja, mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘ஏவங் ஸந்தே கோ², ப⁴ந்தே நாக³ஸேன, ந உப்பஜ்ஜதி பு³த்³தோ⁴ த்³வத்திங்ஸமஹாபுரிஸலக்க²ணேஹி ஸமன்னாக³தோ அஸீதியா ச அனுப்³யஞ்ஜனேஹி பரிரஞ்ஜிதோ ஸுவண்ணவண்ணோ கஞ்சனஸன்னிப⁴த்தசோ ப்³யாமப்பபோ⁴தி, அபி ச மாதுஸதி³ஸோ வா புத்தோ ஹோதி மாதுபக்கோ² வா, பிதுஸதி³ஸோ வா புத்தோ ஹோதி பிதுபக்கோ² வா’’தி. தே²ரோ ஆஹ ‘‘அத்தி² பன, மஹாராஜ, கிஞ்சி பது³மங் ஸதபத்த’’ந்தி? ‘‘ஆம, ப⁴ந்தே, அத்தீ²’’தி. ‘‘தஸ்ஸ பன குஹிங் ஸம்ப⁴வோ’’தி? ‘‘கத்³த³மே ஜாயதி உத³கே ஆஸீயதீ’’தி . ‘‘கிங்னு கோ², மஹாராஜ, பது³மங் கத்³த³மேன ஸதி³ஸங் வண்ணேன வா க³ந்தே⁴ன வா ரஸேன வா’’தி? ‘‘ந ஹி, ப⁴ந்தே’’தி. ‘‘அத² உத³கேன வா க³ந்தே⁴ன வா ரஸேன வா’’தி? ‘‘ந ஹி, ப⁴ந்தே’’தி. ‘‘ஏவமேவ கோ², மஹாராஜ, ப⁴க³வா த்³வத்திங்ஸமஹாபுரிஸலக்க²ணேஹி ஸமன்னாக³தோ அஸீதியா ச அனுப்³யஞ்ஜனேஹி பரிரஞ்ஜிதோ ஸுவண்ணவண்ணோ கஞ்சனஸன்னிப⁴த்தசோ ப்³யாமப்பபோ⁴, நோ சஸ்ஸ மாதாபிதரோ த்³வத்திங்ஸமஹாபுரிஸலக்க²ணேஹி ஸமன்னாக³தா அஸீதியா ச அனுப்³யஞ்ஜனேஹி பரிரஞ்ஜிதா ஸுவண்ணவண்ணா கஞ்சனஸன்னிப⁴த்தசா ப்³யாமப்பபா⁴’’தி.
‘‘Evaṃ sante kho, bhante nāgasena, na uppajjati buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabhoti, api ca mātusadiso vā putto hoti mātupakkho vā, pitusadiso vā putto hoti pitupakkho vā’’ti. Thero āha ‘‘atthi pana, mahārāja, kiñci padumaṃ satapatta’’nti? ‘‘Āma, bhante, atthī’’ti. ‘‘Tassa pana kuhiṃ sambhavo’’ti? ‘‘Kaddame jāyati udake āsīyatī’’ti . ‘‘Kiṃnu kho, mahārāja, padumaṃ kaddamena sadisaṃ vaṇṇena vā gandhena vā rasena vā’’ti? ‘‘Na hi, bhante’’ti. ‘‘Atha udakena vā gandhena vā rasena vā’’ti? ‘‘Na hi, bhante’’ti. ‘‘Evameva kho, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho, no cassa mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
மஹாபுரிஸலக்க²ணபஞ்ஹோ ததியோ.
Mahāpurisalakkhaṇapañho tatiyo.
