| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၃. မဟာပုရိသလက္ခဏပဉ္ဟော
3. Mahāpurisalakkhaṇapañho
၃. ရာဇာ အာဟ ‘‘ဘန္တေ နာဂသေန, ဗုဒ္ဓော ဒ္ဝတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗ္ယဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗ္ယာမပ္ပဘော’’တိ? ‘‘အာမ, မဟာရာဇ, ဘဂဝာ ဒ္ဝတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗ္ယဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗ္ယာမပ္ပဘော’’တိ။
3. Rājā āha ‘‘bhante nāgasena, buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti? ‘‘Āma, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti.
‘‘ကိံ ပနသ္သ, ဘန္တေ, မာတာပိတရောပိ ဒ္ဝတ္တိံသမဟာပုရိသလက္ခဏေဟိ သမန္နာဂတာ အသီတိယာ စ အနုဗ္ယဉ္ဇနေဟိ ပရိရဉ္ဇိတာ သုဝဏ္ဏဝဏ္ဏာ ကဉ္စနသန္နိဘတ္တစာ ဗ္ယာမပ္ပဘာ’’တိ? ‘‘နော စသ္သ, မဟာရာဇ, မာတာပိတရော ဒ္ဝတ္တိံသမဟာပုရိသလက္ခဏေဟိ သမန္နာဂတာ အသီတိယာ စ အနုဗ္ယဉ္ဇနေဟိ ပရိရဉ္ဇိတာ သုဝဏ္ဏဝဏ္ဏာ ကဉ္စနသန္နိဘတ္တစာ ဗ္ယာမပ္ပဘာ’’တိ။
‘‘Kiṃ panassa, bhante, mātāpitaropi dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti? ‘‘No cassa, mahārāja, mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘ဧဝံ သန္တေ ခော, ဘန္တေ နာဂသေန, န ဥပ္ပဇ္ဇတိ ဗုဒ္ဓော ဒ္ဝတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗ္ယဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗ္ယာမပ္ပဘောတိ, အပိ စ မာတုသဒိသော ဝာ ပုတ္တော ဟောတိ မာတုပက္ခော ဝာ, ပိတုသဒိသော ဝာ ပုတ္တော ဟောတိ ပိတုပက္ခော ဝာ’’တိ။ ထေရော အာဟ ‘‘အတ္ထိ ပန, မဟာရာဇ, ကိဉ္စိ ပဒုမံ သတပတ္တ’’န္တိ? ‘‘အာမ, ဘန္တေ, အတ္ထီ’’တိ။ ‘‘တသ္သ ပန ကုဟိံ သမ္ဘဝော’’တိ? ‘‘ကဒ္ဒမေ ဇာယတိ ဥဒကေ အာသီယတီ’’တိ ။ ‘‘ကိံနု ခော, မဟာရာဇ, ပဒုမံ ကဒ္ဒမေန သဒိသံ ဝဏ္ဏေန ဝာ ဂန္ဓေန ဝာ ရသေန ဝာ’’တိ? ‘‘န ဟိ, ဘန္တေ’’တိ။ ‘‘အထ ဥဒကေန ဝာ ဂန္ဓေန ဝာ ရသေန ဝာ’’တိ? ‘‘န ဟိ, ဘန္တေ’’တိ။ ‘‘ဧဝမေဝ ခော, မဟာရာဇ, ဘဂဝာ ဒ္ဝတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗ္ယဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗ္ယာမပ္ပဘော, နော စသ္သ မာတာပိတရော ဒ္ဝတ္တိံသမဟာပုရိသလက္ခဏေဟိ သမန္နာဂတာ အသီတိယာ စ အနုဗ္ယဉ္ဇနေဟိ ပရိရဉ္ဇိတာ သုဝဏ္ဏဝဏ္ဏာ ကဉ္စနသန္နိဘတ္တစာ ဗ္ယာမပ္ပဘာ’’တိ။
‘‘Evaṃ sante kho, bhante nāgasena, na uppajjati buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabhoti, api ca mātusadiso vā putto hoti mātupakkho vā, pitusadiso vā putto hoti pitupakkho vā’’ti. Thero āha ‘‘atthi pana, mahārāja, kiñci padumaṃ satapatta’’nti? ‘‘Āma, bhante, atthī’’ti. ‘‘Tassa pana kuhiṃ sambhavo’’ti? ‘‘Kaddame jāyati udake āsīyatī’’ti . ‘‘Kiṃnu kho, mahārāja, padumaṃ kaddamena sadisaṃ vaṇṇena vā gandhena vā rasena vā’’ti? ‘‘Na hi, bhante’’ti. ‘‘Atha udakena vā gandhena vā rasena vā’’ti? ‘‘Na hi, bhante’’ti. ‘‘Evameva kho, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho, no cassa mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
မဟာပုရိသလက္ခဏပဉ္ဟော တတိယော။
Mahāpurisalakkhaṇapañho tatiyo.
