| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༣. མཧཱཔུརིསལཀྑཎཔཉྷོ
3. Mahāpurisalakkhaṇapañho
༣. རཱཛཱ ཨཱཧ ‘‘བྷནྟེ ནཱགསེན, བུདྡྷོ དྭཏྟིཾསམཧཱཔུརིསལཀྑཎེཧི སམནྣཱགཏོ ཨསཱིཏིཡཱ ཙ ཨནུབྱཉྫནེཧི པརིརཉྫིཏོ སུཝཎྞཝཎྞོ ཀཉྩནསནྣིབྷཏྟཙོ བྱཱམཔྤབྷོ’’ཏི? ‘‘ཨཱམ, མཧཱརཱཛ, བྷགཝཱ དྭཏྟིཾསམཧཱཔུརིསལཀྑཎེཧི སམནྣཱགཏོ ཨསཱིཏིཡཱ ཙ ཨནུབྱཉྫནེཧི པརིརཉྫིཏོ སུཝཎྞཝཎྞོ ཀཉྩནསནྣིབྷཏྟཙོ བྱཱམཔྤབྷོ’’ཏི།
3. Rājā āha ‘‘bhante nāgasena, buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti? ‘‘Āma, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti.
‘‘ཀིཾ པནསྶ, བྷནྟེ, མཱཏཱཔིཏརོཔི དྭཏྟིཾསམཧཱཔུརིསལཀྑཎེཧི སམནྣཱགཏཱ ཨསཱིཏིཡཱ ཙ ཨནུབྱཉྫནེཧི པརིརཉྫིཏཱ སུཝཎྞཝཎྞཱ ཀཉྩནསནྣིབྷཏྟཙཱ བྱཱམཔྤབྷཱ’’ཏི? ‘‘ནོ ཙསྶ, མཧཱརཱཛ, མཱཏཱཔིཏརོ དྭཏྟིཾསམཧཱཔུརིསལཀྑཎེཧི སམནྣཱགཏཱ ཨསཱིཏིཡཱ ཙ ཨནུབྱཉྫནེཧི པརིརཉྫིཏཱ སུཝཎྞཝཎྞཱ ཀཉྩནསནྣིབྷཏྟཙཱ བྱཱམཔྤབྷཱ’’ཏི།
‘‘Kiṃ panassa, bhante, mātāpitaropi dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti? ‘‘No cassa, mahārāja, mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘ཨེཝཾ སནྟེ ཁོ, བྷནྟེ ནཱགསེན, ན ཨུཔྤཛྫཏི བུདྡྷོ དྭཏྟིཾསམཧཱཔུརིསལཀྑཎེཧི སམནྣཱགཏོ ཨསཱིཏིཡཱ ཙ ཨནུབྱཉྫནེཧི པརིརཉྫིཏོ སུཝཎྞཝཎྞོ ཀཉྩནསནྣིབྷཏྟཙོ བྱཱམཔྤབྷོཏི, ཨཔི ཙ མཱཏུསདིསོ ཝཱ པུཏྟོ ཧོཏི མཱཏུཔཀྑོ ཝཱ, པིཏུསདིསོ ཝཱ པུཏྟོ ཧོཏི པིཏུཔཀྑོ ཝཱ’’ཏི། ཐེརོ ཨཱཧ ‘‘ཨཏྠི པན, མཧཱརཱཛ, ཀིཉྩི པདུམཾ སཏཔཏྟ’’ནྟི? ‘‘ཨཱམ, བྷནྟེ, ཨཏྠཱི’’ཏི། ‘‘ཏསྶ པན ཀུཧིཾ སམྦྷཝོ’’ཏི? ‘‘ཀདྡམེ ཛཱཡཏི ཨུདཀེ ཨཱསཱིཡཏཱི’’ཏི ། ‘‘ཀིཾནུ ཁོ, མཧཱརཱཛ, པདུམཾ ཀདྡམེན སདིསཾ ཝཎྞེན ཝཱ གནྡྷེན ཝཱ རསེན ཝཱ’’ཏི? ‘‘ན ཧི, བྷནྟེ’’ཏི། ‘‘ཨཐ ཨུདཀེན ཝཱ གནྡྷེན ཝཱ རསེན ཝཱ’’ཏི? ‘‘ན ཧི, བྷནྟེ’’ཏི། ‘‘ཨེཝམེཝ ཁོ, མཧཱརཱཛ, བྷགཝཱ དྭཏྟིཾསམཧཱཔུརིསལཀྑཎེཧི སམནྣཱགཏོ ཨསཱིཏིཡཱ ཙ ཨནུབྱཉྫནེཧི པརིརཉྫིཏོ སུཝཎྞཝཎྞོ ཀཉྩནསནྣིབྷཏྟཙོ བྱཱམཔྤབྷོ, ནོ ཙསྶ མཱཏཱཔིཏརོ དྭཏྟིཾསམཧཱཔུརིསལཀྑཎེཧི སམནྣཱགཏཱ ཨསཱིཏིཡཱ ཙ ཨནུབྱཉྫནེཧི པརིརཉྫིཏཱ སུཝཎྞཝཎྞཱ ཀཉྩནསནྣིབྷཏྟཙཱ བྱཱམཔྤབྷཱ’’ཏི།
‘‘Evaṃ sante kho, bhante nāgasena, na uppajjati buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabhoti, api ca mātusadiso vā putto hoti mātupakkho vā, pitusadiso vā putto hoti pitupakkho vā’’ti. Thero āha ‘‘atthi pana, mahārāja, kiñci padumaṃ satapatta’’nti? ‘‘Āma, bhante, atthī’’ti. ‘‘Tassa pana kuhiṃ sambhavo’’ti? ‘‘Kaddame jāyati udake āsīyatī’’ti . ‘‘Kiṃnu kho, mahārāja, padumaṃ kaddamena sadisaṃ vaṇṇena vā gandhena vā rasena vā’’ti? ‘‘Na hi, bhante’’ti. ‘‘Atha udakena vā gandhena vā rasena vā’’ti? ‘‘Na hi, bhante’’ti. ‘‘Evameva kho, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho, no cassa mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
མཧཱཔུརིསལཀྑཎཔཉྷོ ཏཏིཡོ།
Mahāpurisalakkhaṇapañho tatiyo.
