| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੩. ਮਹਾਪੁਰਿਸਲਕ੍ਖਣਪਞ੍ਹੋ
3. Mahāpurisalakkhaṇapañho
੩. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਬੁਦ੍ਧੋ ਦ੍વਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤੋ ਸੁવਣ੍ਣવਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ਬ੍ਯਾਮਪ੍ਪਭੋ’’ਤਿ? ‘‘ਆਮ, ਮਹਾਰਾਜ, ਭਗવਾ ਦ੍વਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤੋ ਸੁવਣ੍ਣવਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ਬ੍ਯਾਮਪ੍ਪਭੋ’’ਤਿ।
3. Rājā āha ‘‘bhante nāgasena, buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti? ‘‘Āma, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho’’ti.
‘‘ਕਿਂ ਪਨਸ੍ਸ, ਭਨ੍ਤੇ, ਮਾਤਾਪਿਤਰੋਪਿ ਦ੍વਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤਾ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤਾ ਸੁવਣ੍ਣવਣ੍ਣਾ ਕਞ੍ਚਨਸਨ੍ਨਿਭਤ੍ਤਚਾ ਬ੍ਯਾਮਪ੍ਪਭਾ’’ਤਿ? ‘‘ਨੋ ਚਸ੍ਸ, ਮਹਾਰਾਜ, ਮਾਤਾਪਿਤਰੋ ਦ੍વਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤਾ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤਾ ਸੁવਣ੍ਣવਣ੍ਣਾ ਕਞ੍ਚਨਸਨ੍ਨਿਭਤ੍ਤਚਾ ਬ੍ਯਾਮਪ੍ਪਭਾ’’ਤਿ।
‘‘Kiṃ panassa, bhante, mātāpitaropi dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti? ‘‘No cassa, mahārāja, mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘ਏવਂ ਸਨ੍ਤੇ ਖੋ, ਭਨ੍ਤੇ ਨਾਗਸੇਨ, ਨ ਉਪ੍ਪਜ੍ਜਤਿ ਬੁਦ੍ਧੋ ਦ੍વਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤੋ ਸੁવਣ੍ਣવਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ਬ੍ਯਾਮਪ੍ਪਭੋਤਿ, ਅਪਿ ਚ ਮਾਤੁਸਦਿਸੋ વਾ ਪੁਤ੍ਤੋ ਹੋਤਿ ਮਾਤੁਪਕ੍ਖੋ વਾ, ਪਿਤੁਸਦਿਸੋ વਾ ਪੁਤ੍ਤੋ ਹੋਤਿ ਪਿਤੁਪਕ੍ਖੋ વਾ’’ਤਿ। ਥੇਰੋ ਆਹ ‘‘ਅਤ੍ਥਿ ਪਨ, ਮਹਾਰਾਜ, ਕਿਞ੍ਚਿ ਪਦੁਮਂ ਸਤਪਤ੍ਤ’’ਨ੍ਤਿ? ‘‘ਆਮ, ਭਨ੍ਤੇ, ਅਤ੍ਥੀ’’ਤਿ। ‘‘ਤਸ੍ਸ ਪਨ ਕੁਹਿਂ ਸਮ੍ਭવੋ’’ਤਿ? ‘‘ਕਦ੍ਦਮੇ ਜਾਯਤਿ ਉਦਕੇ ਆਸੀਯਤੀ’’ਤਿ । ‘‘ਕਿਂਨੁ ਖੋ, ਮਹਾਰਾਜ, ਪਦੁਮਂ ਕਦ੍ਦਮੇਨ ਸਦਿਸਂ વਣ੍ਣੇਨ વਾ ਗਨ੍ਧੇਨ વਾ ਰਸੇਨ વਾ’’ਤਿ? ‘‘ਨ ਹਿ, ਭਨ੍ਤੇ’’ਤਿ। ‘‘ਅਥ ਉਦਕੇਨ વਾ ਗਨ੍ਧੇਨ વਾ ਰਸੇਨ વਾ’’ਤਿ? ‘‘ਨ ਹਿ, ਭਨ੍ਤੇ’’ਤਿ। ‘‘ਏવਮੇવ ਖੋ, ਮਹਾਰਾਜ, ਭਗવਾ ਦ੍વਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤੋ ਸੁવਣ੍ਣવਣ੍ਣੋ ਕਞ੍ਚਨਸਨ੍ਨਿਭਤ੍ਤਚੋ ਬ੍ਯਾਮਪ੍ਪਭੋ, ਨੋ ਚਸ੍ਸ ਮਾਤਾਪਿਤਰੋ ਦ੍વਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤਾ ਅਸੀਤਿਯਾ ਚ ਅਨੁਬ੍ਯਞ੍ਜਨੇਹਿ ਪਰਿਰਞ੍ਜਿਤਾ ਸੁવਣ੍ਣવਣ੍ਣਾ ਕਞ੍ਚਨਸਨ੍ਨਿਭਤ੍ਤਚਾ ਬ੍ਯਾਮਪ੍ਪਭਾ’’ਤਿ।
‘‘Evaṃ sante kho, bhante nāgasena, na uppajjati buddho dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabhoti, api ca mātusadiso vā putto hoti mātupakkho vā, pitusadiso vā putto hoti pitupakkho vā’’ti. Thero āha ‘‘atthi pana, mahārāja, kiñci padumaṃ satapatta’’nti? ‘‘Āma, bhante, atthī’’ti. ‘‘Tassa pana kuhiṃ sambhavo’’ti? ‘‘Kaddame jāyati udake āsīyatī’’ti . ‘‘Kiṃnu kho, mahārāja, padumaṃ kaddamena sadisaṃ vaṇṇena vā gandhena vā rasena vā’’ti? ‘‘Na hi, bhante’’ti. ‘‘Atha udakena vā gandhena vā rasena vā’’ti? ‘‘Na hi, bhante’’ti. ‘‘Evameva kho, mahārāja, bhagavā dvattiṃsamahāpurisalakkhaṇehi samannāgato asītiyā ca anubyañjanehi parirañjito suvaṇṇavaṇṇo kañcanasannibhattaco byāmappabho, no cassa mātāpitaro dvattiṃsamahāpurisalakkhaṇehi samannāgatā asītiyā ca anubyañjanehi parirañjitā suvaṇṇavaṇṇā kañcanasannibhattacā byāmappabhā’’ti.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ।
‘‘Kallosi, bhante nāgasenā’’ti.
ਮਹਾਪੁਰਿਸਲਕ੍ਖਣਪਞ੍ਹੋ ਤਤਿਯੋ।
Mahāpurisalakkhaṇapañho tatiyo.
