| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. நாலந்த³வக்³கோ³
2. Nālandavaggo
1. மஹாபுரிஸஸுத்தங்
1. Mahāpurisasuttaṃ
377. ஸாவத்தி²னிதா³னங் . அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸாரிபுத்தோ ப⁴க³வந்தங் ஏதத³வோச – ‘‘‘மஹாபுரிஸோ, மஹாபுரிஸோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, மஹாபுரிஸோ ஹோதீ’’தி? ‘‘விமுத்தசித்தத்தா க்²வாஹங், ஸாரிபுத்த, ‘மஹாபுரிஸோ’தி வதா³மி. அவிமுத்தசித்தத்தா ‘நோ மஹாபுரிஸோ’தி வதா³மி’’.
377. Sāvatthinidānaṃ . Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhagavantaṃ etadavoca – ‘‘‘mahāpuriso, mahāpuriso’ti, bhante, vuccati. Kittāvatā nu kho, bhante, mahāpuriso hotī’’ti? ‘‘Vimuttacittattā khvāhaṃ, sāriputta, ‘mahāpuriso’ti vadāmi. Avimuttacittattā ‘no mahāpuriso’ti vadāmi’’.
‘‘கத²ஞ்ச, ஸாரிபுத்த, விமுத்தசித்தோ ஹோதி? இத⁴, ஸாரிபுத்த, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். தஸ்ஸ காயே காயானுபஸ்ஸினோ விஹரதோ சித்தங் விரஜ்ஜதி, விமுச்சதி அனுபாதா³ய ஆஸவேஹி. வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். தஸ்ஸ த⁴ம்மேஸு த⁴ம்மானுபஸ்ஸினோ விஹரதோ சித்தங் விரஜ்ஜதி, விமுச்சதி அனுபாதா³ய ஆஸவேஹி. ஏவங் கோ², ஸாரிபுத்த, விமுத்தசித்தோ ஹோதி. விமுத்தசித்தத்தா க்²வாஹங், ஸாரிபுத்த, ‘மஹாபுரிஸோ’தி வதா³மி. அவிமுத்தசித்தத்தா ‘நோ மஹாபுரிஸோ’தி வதா³மீ’’தி. பட²மங்.
‘‘Kathañca, sāriputta, vimuttacitto hoti? Idha, sāriputta, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ. Tassa kāye kāyānupassino viharato cittaṃ virajjati, vimuccati anupādāya āsavehi. Vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Tassa dhammesu dhammānupassino viharato cittaṃ virajjati, vimuccati anupādāya āsavehi. Evaṃ kho, sāriputta, vimuttacitto hoti. Vimuttacittattā khvāhaṃ, sāriputta, ‘mahāpuriso’ti vadāmi. Avimuttacittattā ‘no mahāpuriso’ti vadāmī’’ti. Paṭhamaṃ.
