| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. ནཱལནྡཝགྒོ
2. Nālandavaggo
༡. མཧཱཔུརིསསུཏྟཾ
1. Mahāpurisasuttaṃ
༣༧༧. སཱཝཏྠིནིདཱནཾ ། ཨཐ ཁོ ཨཱཡསྨཱ སཱརིཔུཏྟོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ སཱརིཔུཏྟོ བྷགཝནྟཾ ཨེཏདཝོཙ – ‘‘‘མཧཱཔུརིསོ, མཧཱཔུརིསོ’ཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ, མཧཱཔུརིསོ ཧོཏཱི’’ཏི? ‘‘ཝིམུཏྟཙིཏྟཏྟཱ ཁྭཱཧཾ, སཱརིཔུཏྟ, ‘མཧཱཔུརིསོ’ཏི ཝདཱམི། ཨཝིམུཏྟཙིཏྟཏྟཱ ‘ནོ མཧཱཔུརིསོ’ཏི ཝདཱམི’’།
377. Sāvatthinidānaṃ . Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhagavantaṃ etadavoca – ‘‘‘mahāpuriso, mahāpuriso’ti, bhante, vuccati. Kittāvatā nu kho, bhante, mahāpuriso hotī’’ti? ‘‘Vimuttacittattā khvāhaṃ, sāriputta, ‘mahāpuriso’ti vadāmi. Avimuttacittattā ‘no mahāpuriso’ti vadāmi’’.
‘‘ཀཐཉྩ, སཱརིཔུཏྟ, ཝིམུཏྟཙིཏྟོ ཧོཏི? ཨིདྷ, སཱརིཔུཏྟ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ, ཝིནེཡྻ ལོཀེ ཨབྷིཛ྄ཛྷཱདོམནསྶཾ། ཏསྶ ཀཱཡེ ཀཱཡཱནུཔསྶིནོ ཝིཧརཏོ ཙིཏྟཾ ཝིརཛྫཏི, ཝིམུཙྩཏི ཨནུཔཱདཱཡ ཨཱསཝེཧི། ཝེདནཱསུ…པེ॰… ཙིཏྟེ…པེ॰… དྷམྨེསུ དྷམྨཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ, ཝིནེཡྻ ལོཀེ ཨབྷིཛ྄ཛྷཱདོམནསྶཾ། ཏསྶ དྷམྨེསུ དྷམྨཱནུཔསྶིནོ ཝིཧརཏོ ཙིཏྟཾ ཝིརཛྫཏི, ཝིམུཙྩཏི ཨནུཔཱདཱཡ ཨཱསཝེཧི། ཨེཝཾ ཁོ, སཱརིཔུཏྟ, ཝིམུཏྟཙིཏྟོ ཧོཏི། ཝིམུཏྟཙིཏྟཏྟཱ ཁྭཱཧཾ, སཱརིཔུཏྟ, ‘མཧཱཔུརིསོ’ཏི ཝདཱམི། ཨཝིམུཏྟཙིཏྟཏྟཱ ‘ནོ མཧཱཔུརིསོ’ཏི ཝདཱམཱི’’ཏི། པཋམཾ།
‘‘Kathañca, sāriputta, vimuttacitto hoti? Idha, sāriputta, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ. Tassa kāye kāyānupassino viharato cittaṃ virajjati, vimuccati anupādāya āsavehi. Vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Tassa dhammesu dhammānupassino viharato cittaṃ virajjati, vimuccati anupādāya āsavehi. Evaṃ kho, sāriputta, vimuttacitto hoti. Vimuttacittattā khvāhaṃ, sāriputta, ‘mahāpuriso’ti vadāmi. Avimuttacittattā ‘no mahāpuriso’ti vadāmī’’ti. Paṭhamaṃ.
