| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
2. மஹாராஹுலோவாத³ஸுத்தவண்ணனா
2. Mahārāhulovādasuttavaṇṇanā
113. இரியாபதா²னுப³ந்த⁴னேனாதி இரியாபத²க³மனானுப³ந்த⁴னேன, ந படிபத்திக³மனானுப³ந்த⁴னேன. அஞ்ஞமேவ ஹி பு³த்³தா⁴னங் படிபத்திக³மனங் அஞ்ஞங் ஸாவகானங். விலாஸிதக³மனேனாதி – ‘‘தூ³ரே பாத³ங் ந உத்³த⁴ரதி, ந அச்சாஸன்னே பாத³ங் நிக்கி²பதி, நாதிஸீக⁴ங் க³ச்ச²தி நாதிஸணிக’’ந்திஆதி³னா (ஸங்॰ நி॰ அட்ட²॰ 3.4.243; உதா³॰ அட்ட²॰ 76; ஸாரத்த²॰ டீ॰ மஹாவக்³க³ 3.285) வுத்தேன ஸபா⁴வஸீலேன பு³த்³தா⁴னங் சாதுரியக³மனேன. ததே³வ ஹி ஸந்தா⁴ய ‘‘பதே³ பத³ங் நிக்கி²பந்தோ’’தி வுத்தங். பதா³னுபதி³கோதி ராஹுலத்தே²ரஸ்ஸபி லக்க²ணபாரிபூரியா தாதி³ஸமேவ க³மனந்தி யத்தகங் பதே³ஸங் அந்தரங் அத³த்வா ப⁴க³வதோ பிட்டி²தோ க³ந்துங் ஆரத்³தோ⁴, ஸப்³ப³த்த² தமேவ க³மனபதா³னுபத³ங் க³ச்ச²தீதி பதா³னுபதி³கோ.
113.Iriyāpathānubandhanenāti iriyāpathagamanānubandhanena, na paṭipattigamanānubandhanena. Aññameva hi buddhānaṃ paṭipattigamanaṃ aññaṃ sāvakānaṃ. Vilāsitagamanenāti – ‘‘dūre pādaṃ na uddharati, na accāsanne pādaṃ nikkhipati, nātisīghaṃ gacchati nātisaṇika’’ntiādinā (saṃ. ni. aṭṭha. 3.4.243; udā. aṭṭha. 76; sārattha. ṭī. mahāvagga 3.285) vuttena sabhāvasīlena buddhānaṃ cāturiyagamanena. Tadeva hi sandhāya ‘‘pade padaṃ nikkhipanto’’ti vuttaṃ. Padānupadikoti rāhulattherassapi lakkhaṇapāripūriyā tādisameva gamananti yattakaṃ padesaṃ antaraṃ adatvā bhagavato piṭṭhito gantuṃ āraddho, sabbattha tameva gamanapadānupadaṃ gacchatīti padānupadiko.
வண்ணனாபூ⁴மி சாயங் தத்த² ப⁴க³வந்தங் தே²ரஞ்ச அனேகரூபாஹி உபமாஹி வண்ணெந்தோ ‘‘தத்த² ப⁴க³வா’’திஆதி³மாஹ. நிக்க²ந்தக³ஜபோதகோ விய விரோசித்தா²தி பத³ங் ஆனெத்வா யோஜனா. ஏவங் தங் கேஸரஸீஹோ வியாதிஆதீ³ஸுபி ஆனெத்வா யோஜேதப்³ப³ங். தாரகராஜா நாம சந்தோ³. த்³வின்னங் சந்த³மண்ட³லானந்திஆதி³ பரிகப்பவசனங், பு³த்³தா⁴வேணிகஸந்தகங் விய பு³த்³தா⁴னங் ஆகப்பஸோபா⁴ அஹோஸி, அஹோ ஸிரீஸம்பத்தீதி யோஜனா.
Vaṇṇanābhūmi cāyaṃ tattha bhagavantaṃ therañca anekarūpāhi upamāhi vaṇṇento ‘‘tattha bhagavā’’tiādimāha. Nikkhantagajapotako viya virocitthāti padaṃ ānetvā yojanā. Evaṃ taṃ kesarasīho viyātiādīsupi ānetvā yojetabbaṃ. Tārakarājā nāma cando. Dvinnaṃ candamaṇḍalānantiādi parikappavacanaṃ, buddhāveṇikasantakaṃ viya buddhānaṃ ākappasobhā ahosi, aho sirīsampattīti yojanā.
ஆதி³யமானாதி க³ண்ஹந்தி. ‘‘பச்சா² ஜானிஸ்ஸாமா’’தி ந அஜ்ஜுபெக்கி²தப்³போ³. இத³ங் ந கத்தப்³ப³ந்தி வுத்தேதி இத³ங் பாணஅதிபாதனங் ந கத்தப்³ப³ந்தி வுத்தே இத³ங் த³ண்டே³ன வா லெட்³டு³னா வா விஹேட²னங் ந கத்தப்³ப³ங், இத³ங் பாணினா த³ண்ட³கதா³னஞ்ச அந்தமஸோ குஜ்ஜி²த்வா ஓலோகனமத்தம்பி ந கத்தப்³ப³மேவாதி நயஸதேனபி நயஸஹஸ்ஸேனபி படிவிஜ்ஜ²தி, ததா² இத⁴ தாவ ஸம்மஜ்ஜனங் கத்தப்³ப³ந்தி வுத்தேபி தத்த² பரிப⁴ண்ட³கரணங் விஹாரங்க³ணஸம்மஜ்ஜனங் கசவரச²ட்³ட³னங் வாலிகாஸமகிரணந்தி ஏவமாதி³னா நயஸதேன நயஸஹஸ்ஸேன படிவிஜ்ஜ²தி. தேனாஹ – ‘‘இத³ங் கத்தப்³ப³ந்தி வுத்தேபி ஏஸேவ நயோ’’தி. பரிபா⁴ஸந்தி தஜ்ஜனங். லபா⁴மீதி பச்சாஸீஸதி.
Ādiyamānāti gaṇhanti. ‘‘Pacchā jānissāmā’’ti na ajjupekkhitabbo. Idaṃ na kattabbanti vutteti idaṃ pāṇaatipātanaṃ na kattabbanti vutte idaṃ daṇḍena vā leḍḍunā vā viheṭhanaṃ na kattabbaṃ, idaṃ pāṇinā daṇḍakadānañca antamaso kujjhitvā olokanamattampi na kattabbamevāti nayasatenapi nayasahassenapi paṭivijjhati, tathā idha tāva sammajjanaṃ kattabbanti vuttepi tattha paribhaṇḍakaraṇaṃ vihāraṅgaṇasammajjanaṃ kacavarachaḍḍanaṃ vālikāsamakiraṇanti evamādinā nayasatena nayasahassena paṭivijjhati. Tenāha – ‘‘idaṃ kattabbanti vuttepi eseva nayo’’ti. Paribhāsanti tajjanaṃ. Labhāmīti paccāsīsati.
ஸப்³ப³மேதந்தி ஸப்³ப³ங் ஏதங் மயி லப்³ப⁴மானங் ஸிக்கா²காமதங். அபி⁴ஞ்ஞாயாதி ஜானித்வா. ஸஹாயோதி ரட்ட²பாலத்தே²ரங் ஸந்தா⁴யாஹ. ஸோ ஹி ப⁴க³வதா ஸத்³தா⁴பப்³ப³ஜிதபா⁴வே ஏதத³க்³கே³ ட²பிதோ. த⁴ம்மாரக்கோ²தி ஸத்து² ஸத்³த⁴ம்மரதனானுபாலகோ த⁴ம்மப⁴ண்டா³கா³ரிகோ. பெத்தியோதி சூளபிதா. ஸப்³ப³ங் மே ஜினஸாஸனந்தி ஸப்³ப³ம்பி பு³த்³த⁴ஸாஸனங் மய்ஹமேவ.
Sabbametanti sabbaṃ etaṃ mayi labbhamānaṃ sikkhākāmataṃ. Abhiññāyāti jānitvā. Sahāyoti raṭṭhapālattheraṃ sandhāyāha. So hi bhagavatā saddhāpabbajitabhāve etadagge ṭhapito. Dhammārakkhoti satthu saddhammaratanānupālako dhammabhaṇḍāgāriko. Pettiyoti cūḷapitā. Sabbaṃ me jinasāsananti sabbampi buddhasāsanaṃ mayhameva.
ச²ந்த³ராக³ங் ஞத்வாதி ச²ந்த³ராக³ங் மம சித்தே உப்பன்னங் ஞத்வா. அஞ்ஞதரஸ்மிங் ருக்க²மூலேதி விஹாரபரியந்தே அஞ்ஞதரஸ்மிங் ருக்க²மூலட்டா²னே அனுச்ச²விகே.
Chandarāgaṃ ñatvāti chandarāgaṃ mama citte uppannaṃ ñatvā. Aññatarasmiṃ rukkhamūleti vihārapariyante aññatarasmiṃ rukkhamūlaṭṭhāne anucchavike.
ததா³தி அக்³க³ஸாவகேஹி பஸாதா³பனகாலே. அஞ்ஞகம்மட்டா²னானி சங்கமனஇரியாபதே²பி பிட்டி²பஸாரணகாலேபி ஸமிஜ்ஜ²ந்தி, ந ஏவமித³ந்தி ஆஹ – ‘‘இத³மஸ்ஸ ஏதிஸ்ஸா நிஸஜ்ஜாய கம்மட்டா²னங் அனுச்ச²விக’’ந்தி. ஆனாபானஸ்ஸதிந்தி ஆனாபானஸ்ஸதிகம்மட்டா²னங்.
Tadāti aggasāvakehi pasādāpanakāle. Aññakammaṭṭhānāni caṅkamanairiyāpathepi piṭṭhipasāraṇakālepi samijjhanti, na evamidanti āha – ‘‘idamassa etissā nisajjāya kammaṭṭhānaṃ anucchavika’’nti. Ānāpānassatinti ānāpānassatikammaṭṭhānaṃ.
ஸமஸீஸீ ஹோதீதி ஸசே ஸமஸீஸீ ஹுத்வா ந பரினிப்³பா³யதி. பச்சேகபோ³தி⁴ங் ஸச்சி²கரோதி நோ சே பச்சேகபோ³தி⁴ங் ஸச்சி²கரோதி. கி²ப்பாபி⁴ஞ்ஞோதி கி²ப்பங் லஹுங்யேவ பத்தப்³ப³ச²ளபி⁴ஞ்ஞோ.
Samasīsī hotīti sace samasīsī hutvā na parinibbāyati. Paccekabodhiṃ sacchikaroti no ce paccekabodhiṃ sacchikaroti. Khippābhiññoti khippaṃ lahuṃyeva pattabbachaḷabhiñño.
பரிபுண்ணாதி ஸோளஸஸு ஆகாரேஸு கஸ்ஸசிபி அதாபனேன ஸப்³ப³ஸோ புண்ணா. ஸுபா⁴விதாதி ஸமத²பா⁴வனாய விபஸ்ஸனாபா⁴வனாய ச அனுபுப்³ப³ஸம்பாத³னேன ஸுபா⁴விதா. க³ணனாவிதா⁴னானுபுப்³பி³யா ஆஸேவிதத்தா அனுபுப்³ப³ங் பரிசிதா.
Paripuṇṇāti soḷasasu ākāresu kassacipi atāpanena sabbaso puṇṇā. Subhāvitāti samathabhāvanāya vipassanābhāvanāya ca anupubbasampādanena subhāvitā. Gaṇanāvidhānānupubbiyā āsevitattā anupubbaṃ paricitā.
ஓமானங் வாதி அவஜானநங் உஞ்ஞாதந்தி ஏவங்வித⁴ங் மானங் வா. அதிமானங் வாதி ‘‘கிங் இமேஹி, மமேவ ஆனுபா⁴வேன ஜீவிஸ்ஸாமீ’’தி ஏவங் அதிமானங் வா குதோ ஜனெஸ்ஸதீதி.
Omānaṃ vāti avajānanaṃ uññātanti evaṃvidhaṃ mānaṃ vā. Atimānaṃ vāti ‘‘kiṃ imehi, mameva ānubhāvena jīvissāmī’’ti evaṃ atimānaṃ vā kuto janessatīti.
114. விஸங்க²ரித்வாதி விஸங்யுத்தே கத்வா, யதா² ஸங்கா³காரேன க³ஹணங் ந க³ச்ச²தி, ஏவங் வினிபு⁴ஞ்ஜித்வாதி அத்தோ². மஹாபூ⁴தானி தாவ வித்தா²ரேது, ஸம்மஸனூபக³த்தா, அஸம்மஸனூபக³ங் ஆகாஸதா⁴துங் அத² கஸ்மா வித்தா²ரேஸீதி ஆஹ ‘‘உபாதா³ரூபத³ஸ்ஸனத்த²’’ந்தி. ஆபோதா⁴து ஸுகு²மரூபங். இதராஸு ஓளாரிகஸுகு²மதாபி லப்³ப⁴தீதி ஆஹ ‘‘உபாதா³ரூபத³ஸ்ஸனத்த²’’ந்தி. ஹெட்டா² சத்தாரி மஹாபூ⁴தானேவ கதி²தானி, ந உபாதா³ரூபந்தி தஸ்ஸ பனெத்த² லக்க²ணஹாரனயேன ஆகாஸத³ஸ்ஸனேன த³ஸ்ஸிததா வேதி³தப்³பா³. தேனாஹ ‘‘இமினா முகே²ன தங் த³ஸ்ஸேது’’ந்தி. ந கேவலங் உபாதா³ரூபக்³க³ஹணத³ஸ்ஸனத்த²மேவ ஆகாஸதா⁴து வித்தா²ரிதா, அத² கோ² பரிக்³க³ஹஸுக²தாயபீதி த³ஸ்ஸெந்தோ ‘‘அபிசா’’திஆதி³மாஹ. தத்த² பரிச்சி²ந்தி³தப்³ப³ஸ்ஸ ரூபஸ்ஸ நிரவஸேஸபரியாதா³னத்த²ங் ‘‘அஜ்ஜ²த்திகேனா’’தி விஸேஸனமாஹ. ஆகாஸேனாதி ஆகாஸதா⁴துயா க³ஹிதாய. பரிச்சி²ன்னரூபந்தி தாய பரிச்சி²ந்தி³தகலாபக³தம்பி பாகடங் ஹோதி விபூ⁴தங் ஹுத்வா உபட்டா²தி.
114.Visaṅkharitvāti visaṃyutte katvā, yathā saṅgākārena gahaṇaṃ na gacchati, evaṃ vinibhuñjitvāti attho. Mahābhūtāni tāva vitthāretu, sammasanūpagattā, asammasanūpagaṃ ākāsadhātuṃ atha kasmā vitthāresīti āha ‘‘upādārūpadassanattha’’nti. Āpodhātu sukhumarūpaṃ. Itarāsu oḷārikasukhumatāpi labbhatīti āha ‘‘upādārūpadassanattha’’nti. Heṭṭhā cattāri mahābhūtāneva kathitāni, na upādārūpanti tassa panettha lakkhaṇahāranayena ākāsadassanena dassitatā veditabbā. Tenāha ‘‘iminā mukhena taṃ dassetu’’nti. Na kevalaṃ upādārūpaggahaṇadassanatthameva ākāsadhātu vitthāritā, atha kho pariggahasukhatāyapīti dassento ‘‘apicā’’tiādimāha. Tattha paricchinditabbassa rūpassa niravasesapariyādānatthaṃ ‘‘ajjhattikenā’’ti visesanamāha. Ākāsenāti ākāsadhātuyā gahitāya. Paricchinnarūpanti tāya paricchinditakalāpagatampi pākaṭaṃ hoti vibhūtaṃ hutvā upaṭṭhāti.
இதா³னி வுத்தமேவத்த²ங் ஸுக²க்³க³ஹணத்த²ங் கா³தா²ய த³ஸ்ஸேதி. தஸ்ஸாதி உபாதா³யரூபஸ்ஸ. ஏவங் ஆவிபா⁴வத்த²ந்தி ஏவங் பரிச்சி²ன்னதாய ஆகாஸஸ்ஸ வஸேன விபூ⁴தபா⁴வத்த²ங். தந்தி ஆகாஸதா⁴துங்.
Idāni vuttamevatthaṃ sukhaggahaṇatthaṃ gāthāya dasseti. Tassāti upādāyarūpassa. Evaṃ āvibhāvatthanti evaṃ paricchinnatāya ākāsassa vasena vibhūtabhāvatthaṃ. Tanti ākāsadhātuṃ.
118. ஆகாஸபா⁴வங் க³தந்தி சதூஹி மஹாபூ⁴தேஹி அஸம்பு²ட்டா²னங் தேஸங் பரிச்சே²த³கபா⁴வேன ஆகாஸந்தி க³ஹேதப்³ப³தங் க³தங், ஆகாஸமேவ வா ஆகாஸக³தங் யதா² ‘‘தி³ட்டி²க³தங் (த⁴॰ ஸ॰ 381; மஹானி॰ 12), அத்த²ங்க³த’’ந்தி (அ॰ நி॰ அட்ட²॰ 1.1.130) ச. ஆதி³ன்னந்தி இமந்தி தண்ஹாதி³ட்டீ²ஹி ஆதி³ன்னங். தேனாஹ ‘‘க³ஹிதங் பராமட்ட²’’ந்தி. அஞ்ஞத்த² கம்மஜங் ‘‘உபாதி³ன்ன’’ந்தி வுச்சதி, ந ததா² இதா⁴தி ஆஹ ‘‘ஸரீரட்ட²கந்தி அத்தோ²’’தி. பத²வீதா⁴துஆதீ³ஸு வுத்தனயேனேவாதி மஹாஹத்தி²பதோ³பமே (ம॰ நி॰ 1.300 ஆத³யோ) வுத்தனயத³ஸ்ஸனங் ஸந்தா⁴ய வத³தி.
118.Ākāsabhāvaṃ gatanti catūhi mahābhūtehi asamphuṭṭhānaṃ tesaṃ paricchedakabhāvena ākāsanti gahetabbataṃ gataṃ, ākāsameva vā ākāsagataṃ yathā ‘‘diṭṭhigataṃ (dha. sa. 381; mahāni. 12), atthaṅgata’’nti (a. ni. aṭṭha. 1.1.130) ca. Ādinnanti imanti taṇhādiṭṭhīhi ādinnaṃ. Tenāha ‘‘gahitaṃ parāmaṭṭha’’nti. Aññattha kammajaṃ ‘‘upādinna’’nti vuccati, na tathā idhāti āha ‘‘sarīraṭṭhakanti attho’’ti. Pathavīdhātuādīsuvuttanayenevāti mahāhatthipadopame (ma. ni. 1.300 ādayo) vuttanayadassanaṃ sandhāya vadati.
119. தாதி³பா⁴வோ நாம நிட்டி²தகிச்சஸ்ஸ ஹோதி, அயஞ்ச விபஸ்ஸனங் அனுயுஞ்ஜதி, அத² கிமத்த²ங் தாதி³பா⁴வதா வுத்தாதி? பத²வீஸமதாதி³லக்க²ணாசிக்க²ணாஹி விபஸ்ஸனாய ஸுக²ப்பவத்திஅத்த²ங். தேனாஹ ‘‘இட்டா²னிட்டே²ஸூ’’திஆதி³. க³ஹெத்வாதி குஸலப்பவத்தியா ஓகாஸதா³னவஸேன பரிக்³க³ஹெத்வா. ந பதிட்டி²தோதி ந நிஸ்ஸிதோ ந லக்³கோ³.
119.Tādibhāvo nāma niṭṭhitakiccassa hoti, ayañca vipassanaṃ anuyuñjati, atha kimatthaṃ tādibhāvatā vuttāti? Pathavīsamatādilakkhaṇācikkhaṇāhi vipassanāya sukhappavattiatthaṃ. Tenāha ‘‘iṭṭhāniṭṭhesū’’tiādi. Gahetvāti kusalappavattiyā okāsadānavasena pariggahetvā. Na patiṭṭhitoti na nissito na laggo.
120. ப்³ரஹ்மவிஹாரபா⁴வனா அஸுப⁴பா⁴வனா ஆனாபானஸ்ஸதிபா⁴வனா ச உபசாரங் வா அப்பனங் வா பாபெந்தோ விபஸ்ஸனாய பாத³கபா⁴வாய அனிச்சாதி³ஸஞ்ஞாய விபஸ்ஸனாபா⁴வேன உஸ்ஸக்கித்வா மக்³க³படிபாடியா அரஹத்தாதி⁴க³மாய ஹோதீதி ‘‘மெத்தாதி³பா⁴வனாய பன ஹோதீ’’தி வுத்தங். யத்த² கத்த²சி ஸத்தேஸு ஸங்கா²ரேஸு ச படிஹஞ்ஞனகிலேஸோதி ஆகா⁴தபா⁴வமேவ வத³தி ஞாயபா⁴வதோ அஞ்ஞேஸம்பி. அஸ்மிமானோதி ரூபாதி³கே பச்சேகங் ஏகஜ்ஜ²ங் க³ஹெத்வா ‘‘அயமஹமஸ்மீ’’தி ஏவங் பவத்தமானோ.
120. Brahmavihārabhāvanā asubhabhāvanā ānāpānassatibhāvanā ca upacāraṃ vā appanaṃ vā pāpento vipassanāya pādakabhāvāya aniccādisaññāya vipassanābhāvena ussakkitvā maggapaṭipāṭiyā arahattādhigamāya hotīti ‘‘mettādibhāvanāya pana hotī’’ti vuttaṃ. Yattha katthaci sattesu saṅkhāresu ca paṭihaññanakilesoti āghātabhāvameva vadati ñāyabhāvato aññesampi. Asmimānoti rūpādike paccekaṃ ekajjhaṃ gahetvā ‘‘ayamahamasmī’’ti evaṃ pavattamāno.
121. இத³ங் கம்மட்டா²னந்தி எத்த² க³ணனாதி³வஸேன ஆஸேவியமானா அஸ்ஸாஸபஸ்ஸாஸா யோக³கம்மஸ்ஸ பதிட்டா²னதாய கம்மட்டா²னங். தத்த² பன ததா²பவத்தோ மனஸிகாரோ பா⁴வனா. எத்த² ச தஸ்ஸேவ தே²ரஸ்ஸ ப⁴க³வதா ப³ஹூனங் கம்மட்டா²னானங் தே³ஸிதத்தா சரிதங் அனாதி³யித்வா கம்மட்டா²னானி ஸப்³பே³ஸங் புக்³க³லானங் ஸப்பாயானீதி அயமத்தோ² ஸித்³தோ⁴, அதிஸப்பாயவஸேன பன கம்மட்டா²னேஸு விபா⁴க³கதா² கதி²தாதி வேதி³தப்³பா³.
121.Idaṃ kammaṭṭhānanti ettha gaṇanādivasena āseviyamānā assāsapassāsā yogakammassa patiṭṭhānatāya kammaṭṭhānaṃ. Tattha pana tathāpavatto manasikāro bhāvanā. Ettha ca tasseva therassa bhagavatā bahūnaṃ kammaṭṭhānānaṃ desitattā caritaṃ anādiyitvā kammaṭṭhānāni sabbesaṃ puggalānaṃ sappāyānīti ayamattho siddho, atisappāyavasena pana kammaṭṭhānesu vibhāgakathā kathitāti veditabbā.
மஹாராஹுலோவாத³ஸுத்தவண்ணனாய லீனத்த²ப்பகாஸனா ஸமத்தா.
Mahārāhulovādasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 2. மஹாராஹுலோவாத³ஸுத்தங் • 2. Mahārāhulovādasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 2. மஹாராஹுலோவாத³ஸுத்தவண்ணனா • 2. Mahārāhulovādasuttavaṇṇanā
