| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
2. махаараахуловаад̣̇асуд̇д̇аван̣н̣анаа
2. Mahārāhulovādasuttavaṇṇanā
113. звам̣ мз суд̇анд̇и махаараахуловаад̣̇асуд̇д̇ам̣. д̇ад̇т̇а бидтид̇о бидтид̇о ануб̣анд̇хийд̇и д̣̇ассанам̣ авиж̇ахид̇ваа г̇аманам̣ аб̣б̣ожчиннам̣ гад̇ваа бажчад̇о бажчад̇о ирияаабат̇аануб̣анд̇ханзна ануб̣анд̇хи. д̇ад̣̇аа хи бхаг̇аваа бад̣̇з бад̣̇ам̣ нигкибанд̇о вилаасид̇аг̇аманзна бурад̇о бурад̇о г̇ажчад̇и, раахулад̇т̇зро д̣̇асаб̣аласса бад̣̇аанубад̣̇иго худ̇ваа бажчад̇о бажчад̇о.
113.Evaṃme sutanti mahārāhulovādasuttaṃ. Tattha piṭṭhito piṭṭhito anubandhīti dassanaṃ avijahitvā gamanaṃ abbocchinnaṃ katvā pacchato pacchato iriyāpathānubandhanena anubandhi. Tadā hi bhagavā pade padaṃ nikkhipanto vilāsitagamanena purato purato gacchati, rāhulatthero dasabalassa padānupadiko hutvā pacchato pacchato.
д̇ад̇т̇а бхаг̇аваа субубпид̇асаалаванамаж̇жхаг̇ад̇о субхуумиод̇аран̣ад̇т̇ааяа нигканд̇амад̇д̇аваравааран̣о вияа вирожид̇т̇а, раахулабхад̣̇д̣̇о жа варавааран̣асса бажчад̇о нигканд̇аг̇аж̇абод̇аго вияа. бхаг̇аваа сааяанхасамаяз ман̣иг̇ухад̇о нигкамид̇ваа г̇ожарам̣ бадибанно гзсарасийхо вияа, раахулабхад̣̇д̣̇о жа сийхамиг̇арааж̇аанам̣ ануб̣анд̇ханд̇о нигканд̇асийхабод̇аго вияа. бхаг̇аваа ман̣ибаб̣б̣ад̇асассиригаванасан̣д̣ад̇о д̣̇аатаб̣ало махааб̣яаг̇гхо вияа, раахулабхад̣̇д̣̇о жа б̣яаг̇гхарааж̇аанам̣ ануб̣анд̇хаб̣яаг̇гхабод̇аго вияа. бхаг̇аваа симб̣алид̣̇ааяад̇о нигканд̇асубан̣н̣арааж̇аа вияа, раахулабхад̣̇д̣̇о жа субан̣н̣арааж̇асса бажчад̇о нигканд̇асубан̣н̣абод̇аго вияа. бхаг̇аваа жид̇д̇агуудабаб̣б̣ад̇ад̇о г̇аг̇анад̇алам̣ багканд̣̇асуван̣н̣ахам̣сарааж̇аа вияа, раахулабхад̣̇д̣̇о жа хам̣саад̇хибад̇им̣ анубагканд̣̇ахам̣сабод̇аго вияа. бхаг̇аваа махаасарам̣ аж̇жхог̇аал̣хаа суван̣н̣амахаанааваа вияа, раахулабхад̣̇д̣̇о жа суван̣н̣анаавам̣ бажчаа ануб̣анд̇ханааваабод̇аго вияа. бхаг̇аваа жаггарад̇анаанубхаавзна г̇аг̇анад̇алз самбаяаад̇ажаггавад̇д̇ирааж̇аа вияа, раахулабхад̣̇д̣̇о жа рааж̇аанам̣ анусамбаяаад̇абарин̣ааяагарад̇анам̣ вияа. бхаг̇аваа виг̇ад̇авалаахагам̣ набхам̣ бадибаннад̇аарагарааж̇аа вияа, раахулабхад̣̇д̣̇о жа д̇аарагаад̇хибад̇ино анумаг̇г̇абадибаннаа барисуд̣̇д̇хаосад̇хид̇аарагаа вияа.
Tattha bhagavā supupphitasālavanamajjhagato subhūmiotaraṇatthāya nikkhantamattavaravāraṇo viya virocittha, rāhulabhaddo ca varavāraṇassa pacchato nikkhantagajapotako viya. Bhagavā sāyanhasamaye maṇiguhato nikkhamitvā gocaraṃ paṭipanno kesarasīho viya, rāhulabhaddo ca sīhamigarājānaṃ anubandhanto nikkhantasīhapotako viya. Bhagavā maṇipabbatasassirikavanasaṇḍato dāṭhabalo mahābyaggho viya, rāhulabhaddo ca byaggharājānaṃ anubandhabyagghapotako viya. Bhagavā simbalidāyato nikkhantasupaṇṇarājā viya, rāhulabhaddo ca supaṇṇarājassa pacchato nikkhantasupaṇṇapotako viya. Bhagavā cittakūṭapabbatato gaganatalaṃ pakkhandasuvaṇṇahaṃsarājā viya, rāhulabhaddo ca haṃsādhipatiṃ anupakkhandahaṃsapotako viya. Bhagavā mahāsaraṃ ajjhogāḷhā suvaṇṇamahānāvā viya, rāhulabhaddo ca suvaṇṇanāvaṃ pacchā anubandhanāvāpotako viya. Bhagavā cakkaratanānubhāvena gaganatale sampayātacakkavattirājā viya, rāhulabhaddo ca rājānaṃ anusampayātapariṇāyakaratanaṃ viya. Bhagavā vigatavalāhakaṃ nabhaṃ paṭipannatārakarājā viya, rāhulabhaddo ca tārakādhipatino anumaggapaṭipannā parisuddhaosadhitārakā viya.
бхаг̇авааби махаасаммад̇абавзн̣ияам̣ оггаагарааж̇авам̣сз ж̇аад̇о, раахулабхад̣̇д̣̇оби. бхаг̇авааби сан̇кз багкид̇д̇акийрасад̣̇исо субарисуд̣̇д̇хаж̇аад̇икад̇д̇ияагулз ж̇аад̇о, раахулабхад̣̇д̣̇оби. бхаг̇авааби раж̇ж̇ам̣ бахааяа баб̣б̣аж̇ид̇о, раахулабхад̣̇д̣̇оби. бхаг̇авад̇оби сарийрам̣ д̣̇вад̇д̇им̣самахаабурисалагкан̣абадиман̣д̣ид̇ам̣ д̣̇званаг̇арзсу самуссид̇арад̇анад̇оран̣ам̣ вияа саб̣б̣абаалипулло баарижчад̇д̇аго вияа жа ад̇иманохаран̣ам̣, раахулабхад̣̇д̣̇ассааби. ид̇и д̣̇взби абхинийхаарасамбаннаа, д̣̇взби рааж̇абаб̣б̣аж̇ид̇аа, д̣̇взби кад̇д̇ияасукумаалаа, д̣̇взби суван̣н̣аван̣н̣аа, д̣̇взби лагкан̣асамбаннаа згамаг̇г̇ам̣ бадибаннаа бадибаадияаа г̇ажчанд̇аанам̣ д̣̇виннам̣ жанд̣̇аман̣д̣алаанам̣ д̣̇виннам̣ суурияаман̣д̣алаанам̣ д̣̇виннам̣ саггасуяаамасанд̇усид̇асуниммид̇авасавад̇д̇имахааб̣рахмаад̣̇ийнам̣ сирияаа сирим̣ абхибхавамаанаа вияа вирожим̣су.
Bhagavāpi mahāsammatapaveṇiyaṃ okkākarājavaṃse jāto, rāhulabhaddopi. Bhagavāpi saṅkhe pakkhittakhīrasadiso suparisuddhajātikhattiyakule jāto, rāhulabhaddopi. Bhagavāpi rajjaṃ pahāya pabbajito, rāhulabhaddopi. Bhagavatopi sarīraṃ dvattiṃsamahāpurisalakkhaṇapaṭimaṇḍitaṃ devanagaresu samussitaratanatoraṇaṃ viya sabbapāliphullo pāricchattako viya ca atimanoharaṇaṃ, rāhulabhaddassāpi. Iti dvepi abhinīhārasampannā, dvepi rājapabbajitā, dvepi khattiyasukhumālā, dvepi suvaṇṇavaṇṇā, dvepi lakkhaṇasampannā ekamaggaṃ paṭipannā paṭipāṭiyā gacchantānaṃ dvinnaṃ candamaṇḍalānaṃ dvinnaṃ sūriyamaṇḍalānaṃ dvinnaṃ sakkasuyāmasantusitasunimmitavasavattimahābrahmādīnaṃ siriyā siriṃ abhibhavamānā viya virociṃsu.
д̇ад̇рааяасмаа раахуло бхаг̇авад̇о бидтид̇о бидтид̇о г̇ажчанд̇ова баад̣̇ад̇алад̇о яаава убари гзсанд̇аа д̇ат̇ааг̇ад̇ам̣ аалогзси. со бхаг̇авад̇о б̣уд̣̇д̇хавзсавилаасам̣ д̣̇исваа ‘‘собхад̇и бхаг̇аваа д̣̇вад̇д̇им̣самахаабурисалагкан̣авижид̇д̇асарийро б̣яаамаббабхаабаригкид̇д̇ад̇ааяа виббагин̣н̣асуван̣н̣ажун̣н̣амаж̇жхаг̇ад̇о вияа, виж̇ж̇улад̇аабаригкид̇д̇о ганагабаб̣б̣ад̇о вияа, яанд̇асуд̇д̇асамаагад̣дхид̇арад̇анавижид̇д̇ам̣ суван̣н̣ааг̇гхигам̣ вияа, рад̇д̇абам̣сугуулажийварабадижчанноби рад̇д̇агамб̣алабаригкид̇д̇аганагабаб̣б̣ад̇о вияа, баваал̣алад̇аабадиман̣д̣ид̇ам̣ суван̣н̣ааг̇гхигам̣ вияа , жийнабидтажун̣н̣абууж̇ид̇ам̣ суван̣н̣ажзд̇ияам̣ вияа, лаакаарасаанулид̇д̇о ганагаяуубо вияа, рад̇д̇авалаахаганд̇арад̇о д̇ан̇кан̣аб̣бхуг̇г̇ад̇абун̣н̣ажанд̣̇о вияа, ахо самад̇им̣сабаарамид̇аанубхаавасаж̇ж̇ид̇асса ад̇д̇абхаавасса сирийсамбад̇д̇ий’’д̇и жинд̇зси. д̇ад̇о ад̇д̇аанамби ологзд̇ваа – ‘‘ахамби собхаами. сажз бхаг̇аваа жад̇уусу махаад̣̇ийбзсу жаггавад̇д̇ираж̇ж̇ам̣ агариссаа, маяхам̣ барин̣ааяагадтаананд̇арам̣ ад̣̇ассаа. звам̣ санд̇з ад̇ивияа ж̇амб̣уд̣̇ийбад̇алам̣ асобхиссаа’’д̇и ад̇д̇абхаавам̣ ниссааяа г̇зхассид̇ам̣ чанд̣̇арааг̇ам̣ уббаад̣̇зси.
Tatrāyasmā rāhulo bhagavato piṭṭhito piṭṭhito gacchantova pādatalato yāva upari kesantā tathāgataṃ ālokesi. So bhagavato buddhavesavilāsaṃ disvā ‘‘sobhati bhagavā dvattiṃsamahāpurisalakkhaṇavicittasarīro byāmappabhāparikkhittatāya vippakiṇṇasuvaṇṇacuṇṇamajjhagato viya, vijjulatāparikkhitto kanakapabbato viya, yantasuttasamākaḍḍhitaratanavicittaṃ suvaṇṇaagghikaṃ viya, rattapaṃsukūlacīvarapaṭicchannopi rattakambalaparikkhittakanakapabbato viya, pavāḷalatāpaṭimaṇḍitaṃ suvaṇṇaagghikaṃ viya , cīnapiṭṭhacuṇṇapūjitaṃ suvaṇṇacetiyaṃ viya, lākhārasānulitto kanakayūpo viya, rattavalāhakantarato taṅkhaṇabbhuggatapuṇṇacando viya, aho samatiṃsapāramitānubhāvasajjitassa attabhāvassa sirīsampattī’’ti cintesi. Tato attānampi oloketvā – ‘‘ahampi sobhāmi. Sace bhagavā catūsu mahādīpesu cakkavattirajjaṃ akarissā, mayhaṃ pariṇāyakaṭṭhānantaraṃ adassā. Evaṃ sante ativiya jambudīpatalaṃ asobhissā’’ti attabhāvaṃ nissāya gehassitaṃ chandarāgaṃ uppādesi.
бхаг̇авааби бурад̇о г̇ажчанд̇ова жинд̇зси – ‘‘барибун̣н̣ажчавимам̣салохид̇о д̣̇аани раахуласса ад̇д̇абхааво. раж̇анийязсу руубаарамман̣аад̣̇ийсу хи жид̇д̇асса багканд̣̇анагаало ж̇аад̇о, гим̣ б̣ахулад̇ааяа ну ко раахуло вийд̇инаамзд̇ий’’д̇и. ат̇а сахааваж̇ж̇анзнзва басаннауд̣̇агз мажчам̣ вияа, барисуд̣̇д̇хз аад̣̇аасаман̣д̣алз муканимид̇д̇ам̣ вияа жа д̇асса д̇ам̣ жид̇д̇уббаад̣̇ам̣ ад̣̇д̣̇аса. д̣̇исваава – ‘‘аяам̣ раахуло маяхам̣ ад̇раж̇о худ̇ваа мама бажчад̇о ааг̇ажчанд̇о ‘ахам̣ собхаами, маяхам̣ ван̣н̣ааяад̇анам̣ басанна’нд̇и ад̇д̇абхаавам̣ ниссааяа г̇зхассид̇ачанд̣̇арааг̇ам̣ уббаад̣̇зд̇и, ад̇ид̇т̇з багканд̣̇о уббат̇ам̣ бадибанно аг̇ожарз жарад̇и, д̣̇исаамуул̣хаад̣̇д̇хиго вияа аг̇анд̇аб̣б̣ам̣ д̣̇исам̣ г̇ажчад̇и. аяам̣ ко банасса гилзсо аб̣бханд̇арз вад̣дханд̇о ад̇д̇ад̇т̇амби яат̇аабхууд̇ам̣ бассид̇ум̣ на д̣̇ассад̇и, барад̇т̇амби, убхаяад̇т̇амби. д̇ад̇о нираязби бадисанд̇хим̣ г̇ан̣хаабзссад̇и, д̇иражчаанаяонияамби, бзд̇д̇ивисаязби, асурагааязби, самб̣аад̇хзби маад̇угужчисминд̇и анамад̇аг̇г̇з сам̣саараваддз барибаад̇зссад̇и. аяан̃хи –
Bhagavāpi purato gacchantova cintesi – ‘‘paripuṇṇacchavimaṃsalohito dāni rāhulassa attabhāvo. Rajanīyesu rūpārammaṇādīsu hi cittassa pakkhandanakālo jāto, kiṃ bahulatāya nu kho rāhulo vītināmetī’’ti. Atha sahāvajjaneneva pasannaudake macchaṃ viya, parisuddhe ādāsamaṇḍale mukhanimittaṃ viya ca tassa taṃ cittuppādaṃ addasa. Disvāva – ‘‘ayaṃ rāhulo mayhaṃ atrajo hutvā mama pacchato āgacchanto ‘ahaṃ sobhāmi, mayhaṃ vaṇṇāyatanaṃ pasanna’nti attabhāvaṃ nissāya gehassitachandarāgaṃ uppādeti, atitthe pakkhando uppathaṃ paṭipanno agocare carati, disāmūḷhaaddhiko viya agantabbaṃ disaṃ gacchati. Ayaṃ kho panassa kileso abbhantare vaḍḍhanto attatthampi yathābhūtaṃ passituṃ na dassati, paratthampi, ubhayatthampi. Tato nirayepi paṭisandhiṃ gaṇhāpessati, tiracchānayoniyampi, pettivisayepi, asurakāyepi, sambādhepi mātukucchisminti anamatagge saṃsāravaṭṭe paripātessati. Ayañhi –
анад̇т̇аж̇анано лобхо, лобхо жид̇д̇аббагобано;
Anatthajanano lobho, lobho cittappakopano;
бхаяаманд̇арад̇о ж̇аад̇ам̣, д̇ам̣ ж̇ано нааваб̣уж̇жхад̇и.
Bhayamantarato jātaṃ, taṃ jano nāvabujjhati.
луд̣̇д̇хо ад̇т̇ам̣ на ж̇аанаад̇и, луд̣̇д̇хо д̇хаммам̣ на бассад̇и;
Luddho atthaṃ na jānāti, luddho dhammaṃ na passati;
анд̇хад̇амам̣ д̇ад̣̇аа ход̇и, яам̣ лобхо сахад̇з нарам̣. (ид̇иву. 88) –
Andhatamaṃ tadā hoti, yaṃ lobho sahate naraṃ. (itivu. 88) –
яат̇аа ко бана анзгарад̇анабуураа махаанааваа бхиннапалаганд̇арзна уд̣̇агам̣ аад̣̇ияамаанаа мухуд̇д̇амби на аж̇жхубзгкид̇аб̣б̣аа ход̇и, взг̇знассаа виварам̣ бид̣̇ахид̇ум̣ ваддад̇и, звамзвам̣ аяамби на аж̇жхубзгкид̇аб̣б̣о. яаавасса аяам̣ гилзсо аб̣бханд̇арз сийларад̇анаад̣̇ийни на винаасзд̇и, д̇аавад̣̇зва нам̣ ниг̇г̇ан̣хиссаамий’’д̇и аж̇жхаасаяамагааси. зваруубзсу бана таанзсу б̣уд̣̇д̇хаанам̣ нааг̇авилоганам̣ наама ход̇и. д̇асмаа яанд̇зна баривад̇д̇ид̇асуван̣н̣абадимаа вияа сагалагааязнзва баривад̇д̇зд̇ваа тид̇о раахулабхад̣̇д̣̇ам̣ ааманд̇зси. д̇ам̣ санд̇хааяа ‘‘ат̇а ко бхаг̇аваа абалогзд̇ваа’’д̇иаад̣̇и вуд̇д̇ам̣.
Yathā kho pana anekaratanapūrā mahānāvā bhinnaphalakantarena udakaṃ ādiyamānā muhuttampi na ajjhupekkhitabbā hoti, vegenassā vivaraṃ pidahituṃ vaṭṭati, evamevaṃ ayampi na ajjhupekkhitabbo. Yāvassa ayaṃ kileso abbhantare sīlaratanādīni na vināseti, tāvadeva naṃ niggaṇhissāmī’’ti ajjhāsayamakāsi. Evarūpesu pana ṭhānesu buddhānaṃ nāgavilokanaṃ nāma hoti. Tasmā yantena parivattitasuvaṇṇapaṭimā viya sakalakāyeneva parivattetvā ṭhito rāhulabhaddaṃ āmantesi. Taṃ sandhāya ‘‘atha kho bhagavā apaloketvā’’tiādi vuttaṃ.
д̇ад̇т̇а яам̣гин̃жи руубанд̇иаад̣̇ийни саб̣б̣аагаарзна висуд̣̇д̇химаг̇г̇з канд̇ханид̣̇д̣̇зсз вид̇т̇аарид̇аани. нзд̇ам̣ мамаад̇иаад̣̇ийни махаахад̇т̇ибад̣̇обамз вуд̇д̇аани. руубамзва ну ко бхаг̇аваад̇и гасмаа бужчад̇и? д̇асса гира – ‘‘саб̣б̣ам̣ руубам̣ нзд̇ам̣ мама, нзсохамасми на мзсо ад̇д̇аа’’д̇и суд̇ваа – ‘‘бхаг̇аваа саб̣б̣ам̣ руубам̣ вибассанаабан̃н̃ааяа звам̣ д̣̇адтаб̣б̣анд̇и вад̣̇ад̇и, взд̣̇анаад̣̇ийсу ну ко гат̇ам̣ бадибаж̇ж̇ид̇аб̣б̣а’’нд̇и наяо уд̣̇абаад̣̇и. д̇асмаа д̇асмим̣ наяз тид̇о бужчад̇и. наяагусало хзса ааяасмаа раахуло, ид̣̇ам̣ на гад̇д̇аб̣б̣анд̇и вуд̇д̇з ид̣̇амби на гад̇д̇аб̣б̣ам̣ ид̣̇амби на гад̇д̇аб̣б̣амзваад̇и наяасад̇знаби наяасахассзнаби бадивиж̇жхад̇и. ид̣̇ам̣ гад̇д̇аб̣б̣анд̇и вуд̇д̇зби зсзва наяо.
Tattha yaṃkiñci rūpantiādīni sabbākārena visuddhimagge khandhaniddese vitthāritāni. Netaṃ mamātiādīni mahāhatthipadopame vuttāni. Rūpameva nu kho bhagavāti kasmā pucchati? Tassa kira – ‘‘sabbaṃ rūpaṃ netaṃ mama, nesohamasmi na meso attā’’ti sutvā – ‘‘bhagavā sabbaṃ rūpaṃ vipassanāpaññāya evaṃ daṭṭhabbanti vadati, vedanādīsu nu kho kathaṃ paṭipajjitabba’’nti nayo udapādi. Tasmā tasmiṃ naye ṭhito pucchati. Nayakusalo hesa āyasmā rāhulo, idaṃ na kattabbanti vutte idampi na kattabbaṃ idampi na kattabbamevāti nayasatenapi nayasahassenapi paṭivijjhati. Idaṃ kattabbanti vuttepi eseva nayo.
сигкаагаамо хи аяам̣ ааяасмаа, баад̇ова г̇анд̇хагудибаривзн̣з бад̇т̇амад̇д̇ам̣ ваалигам̣ огирад̇и – ‘‘аж̇ж̇а саммаасамб̣уд̣̇д̇хасса санд̇игаа маяхам̣ убаж̇жхааяасса санд̇игаа зд̇д̇агам̣ оваад̣̇ам̣ зд̇д̇агам̣ барибхаасам̣ лабхаамий’’д̇и. саммаасамб̣уд̣̇д̇хоби нам̣ зд̇ад̣̇аг̇г̇з табзнд̇о – ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ сигкаагаамаанам̣ яад̣̇ид̣̇ам̣ раахуло’’д̇и (а. ни. 1.209) сигкааяамзва аг̇г̇ам̣ гад̇ваа табзси. соби ааяасмаа бхигкусан̇гхамаж̇жхз д̇амзва сийханаад̣̇ам̣ над̣̇и –
Sikkhākāmo hi ayaṃ āyasmā, pātova gandhakuṭipariveṇe patthamattaṃ vālikaṃ okirati – ‘‘ajja sammāsambuddhassa santikā mayhaṃ upajjhāyassa santikā ettakaṃ ovādaṃ ettakaṃ paribhāsaṃ labhāmī’’ti. Sammāsambuddhopi naṃ etadagge ṭhapento – ‘‘etadaggaṃ, bhikkhave, mama sāvakānaṃ bhikkhūnaṃ sikkhākāmānaṃ yadidaṃ rāhulo’’ti (a. ni. 1.209) sikkhāyameva aggaṃ katvā ṭhapesi. Sopi āyasmā bhikkhusaṅghamajjhe tameva sīhanādaṃ nadi –
‘‘саб̣б̣амзд̇ам̣ абхин̃н̃ааяа, д̇хаммарааж̇аа бид̇аа мама;
‘‘Sabbametaṃ abhiññāya, dhammarājā pitā mama;
саммукаа бхигкусан̇гхасса, зд̇ад̣̇аг̇г̇з табзси мам̣.
Sammukhā bhikkhusaṅghassa, etadagge ṭhapesi maṃ.
сигкаагаамаанахам̣ аг̇г̇о, д̇хаммарааж̇зна т̇омид̇о;
Sikkhākāmānahaṃ aggo, dhammarājena thomito;
сад̣̇д̇хаабаб̣б̣аж̇ид̇аанан̃жа, сахааяо баваро мама.
Saddhāpabbajitānañca, sahāyo pavaro mama.
д̇хаммарааж̇аа бид̇аа маяхам̣, д̇хаммаарагко жа бзд̇д̇ияо;
Dhammarājā pitā mayhaṃ, dhammārakkho ca pettiyo;
саарибуд̇д̇о убаж̇жхааяо, саб̣б̣ам̣ мз ж̇инасаасана’’нд̇и.
Sāriputto upajjhāyo, sabbaṃ me jinasāsana’’nti.
ат̇асса бхаг̇аваа яасмаа на гзвалам̣ руубамзва, взд̣̇анаад̣̇аяоби звам̣ д̣̇адтаб̣б̣аа, д̇асмаа руубамби раахулаад̇иаад̣̇имааха. го наж̇ж̇аад̇и го ну аж̇ж̇а. т̇зрасса гира зд̇ад̣̇ахоси ‘‘саммаасамб̣уд̣̇д̇хо маяхам̣ ад̇д̇абхааваниссид̇ам̣ чанд̣̇арааг̇ам̣ н̃ад̇ваа ‘саман̣зна наама зваруубо вид̇агго на вид̇аггид̇аб̣б̣о’д̇и нзва барияааязна гат̇ам̣ гат̇зси, г̇ажча бхигку раахулам̣ вад̣̇зхи ‘маа буна зваруубам̣ вид̇аггам̣ вид̇аггзсий’д̇и на д̣̇ууд̇ам̣ бзсзси. мам̣ саммугкз тад̇вааязва бана сабхан̣д̣агам̣ жорам̣ жуул̣ааяа г̇ан̣ханд̇о вияа саммукаа суг̇ад̇оваад̣̇ам̣ ад̣̇ааси. суг̇ад̇оваад̣̇о жа наама асан̇кзяязхиби габбзхи д̣̇уллабхо. зваруубасса б̣уд̣̇д̇хасса саммукаа оваад̣̇ам̣ лабхид̇ваа го ну вин̃н̃уу бан̣д̣ид̇аж̇аад̇иго аж̇ж̇а г̇аамам̣ бин̣д̣ааяа бависиссад̇ий’’д̇и. ат̇зса ааяасмаа аахаарагижжам̣ бахааяа яасмим̣ нисиннадтаанз тид̇зна оваад̣̇о лад̣̇д̇хо, д̇ад̇ова бадинивад̇д̇зд̇ваа ан̃н̃ад̇арасмим̣ ругкамуулз нисийд̣̇и. бхаг̇авааби д̇ам̣ ааяасманд̇ам̣ нивад̇д̇амаанам̣ д̣̇исваа на звамааха – ‘‘маа нивад̇д̇а д̇аава, раахула, бхигкаажаарагаало д̇з’’д̇и. гасмаа? звам̣ гирасса ахоси – ‘‘аж̇ж̇а д̇аава гааяаг̇ад̇аасад̇иамад̇абхож̇анам̣ бхун̃ж̇ад̇уу’’д̇и.
Athassa bhagavā yasmā na kevalaṃ rūpameva, vedanādayopi evaṃ daṭṭhabbā, tasmā rūpampi rāhulātiādimāha. Ko najjāti ko nu ajja. Therassa kira etadahosi ‘‘sammāsambuddho mayhaṃ attabhāvanissitaṃ chandarāgaṃ ñatvā ‘samaṇena nāma evarūpo vitakko na vitakkitabbo’ti neva pariyāyena kathaṃ kathesi, gaccha bhikkhu rāhulaṃ vadehi ‘mā puna evarūpaṃ vitakkaṃ vitakkesī’ti na dūtaṃ pesesi. Maṃ sammukkhe ṭhatvāyeva pana sabhaṇḍakaṃ coraṃ cūḷāya gaṇhanto viya sammukhā sugatovādaṃ adāsi. Sugatovādo ca nāma asaṅkheyyehipi kappehi dullabho. Evarūpassa buddhassa sammukhā ovādaṃ labhitvā ko nu viññū paṇḍitajātiko ajja gāmaṃ piṇḍāya pavisissatī’’ti. Athesa āyasmā āhārakiccaṃ pahāya yasmiṃ nisinnaṭṭhāne ṭhitena ovādo laddho, tatova paṭinivattetvā aññatarasmiṃ rukkhamūle nisīdi. Bhagavāpi taṃ āyasmantaṃ nivattamānaṃ disvā na evamāha – ‘‘mā nivatta tāva, rāhula, bhikkhācārakālo te’’ti. Kasmā? Evaṃ kirassa ahosi – ‘‘ajja tāva kāyagatāsatiamatabhojanaṃ bhuñjatū’’ti.
ад̣̇д̣̇асаа ко ааяасмаа саарибуд̇д̇од̇и бхаг̇авад̇и г̇ад̇з бажчаа г̇ажчанд̇о ад̣̇д̣̇аса. зд̇асса гирааяасмад̇о згагасса вихарад̇о ан̃н̃ам̣ вад̇д̇ам̣, бхаг̇авад̇аа сад̣̇д̇хим̣ вихарад̇о ан̃н̃ам̣. яад̣̇аа хи д̣̇вз аг̇г̇асаавагаа згаагино васанд̇и, д̇ад̣̇аа баад̇ова сзнаасанам̣ саммаж̇ж̇ид̇ваа сарийрабадиж̇аг̇г̇анам̣ гад̇ваа самаабад̇д̇им̣ аббзд̇ваа саннисиннаа ад̇д̇ано жид̇д̇аружияаа бхигкаажаарам̣ г̇ажчанд̇и. бхаг̇авад̇аа сад̣̇д̇хим̣ вихаранд̇аа бана т̇зраа звам̣ на гаронд̇и. д̇ад̣̇аа хи бхаг̇аваа бхигкусан̇гхабаривааро батамам̣ бхигкаажаарам̣ г̇ажчад̇и. д̇асмим̣ г̇ад̇з т̇зро ад̇д̇ано сзнаасанаа нигкамид̇ваа – ‘‘б̣ахуунам̣ васанадтаанз наама саб̣б̣зва баасаад̣̇игам̣ гаад̇ум̣ саггонд̇и ваа, на ваа саггонд̇ий’’д̇и д̇ад̇т̇а д̇ад̇т̇а г̇анд̇ваа асаммадтам̣ таанам̣ саммаж̇ж̇ад̇и. сажз гажаваро ачад̣д̣ид̇о ход̇и, д̇ам̣ чад̣д̣зд̇и. баанийяадтабзд̇аб̣б̣адтаанамхи баанийяагуудз асад̇и баанийяагхадам̣ табзд̇и. г̇илаанаанам̣ санд̇игам̣ г̇анд̇ваа, ‘‘аавусо, д̇умхаагам̣ гим̣ аахараами, гим̣ во ижчид̇аб̣б̣а’’нд̇и? бужчад̇и. авассигад̣̇ахараанам̣ санд̇игам̣ г̇анд̇ваа – ‘‘абхирамат̇а, аавусо, маа угган̣тид̇т̇а, бадибад̇д̇исаарагам̣ б̣уд̣̇д̇хасаасана’’нд̇и овад̣̇ад̇и. звам̣ гад̇ваа саб̣б̣абажчаа бхигкаажаарам̣ г̇ажчад̇и. яат̇аа хи жаггавад̇д̇и гухин̃жи г̇анд̇угаамо сзнааяа бариваарид̇о батамам̣ нигкамад̇и, барин̣ааяагарад̇анам̣ сзнан̇г̇аани сам̣вид̇хааяа бажчаа нигкамад̇и, звам̣ сад̣̇д̇хаммажаггавад̇д̇и бхаг̇аваа бхигкусан̇гхабаривааро батамам̣ нигкамад̇и, д̇асса бхаг̇авад̇о барин̣ааяагарад̇анабхууд̇о д̇хаммасзнаабад̇и имам̣ гижжам̣ гад̇ваа саб̣б̣абажчаа нигкамад̇и. со звам̣ нигканд̇о д̇асмим̣ д̣̇ивасз ан̃н̃ад̇арасмим̣ ругкамуулз нисиннам̣ раахулабхад̣̇д̣̇ам̣ ад̣̇д̣̇аса. д̇зна вуд̇д̇ам̣ ‘‘бажчаа г̇ажчанд̇о ад̣̇д̣̇асаа’’д̇и.
Addasā kho āyasmā sāriputtoti bhagavati gate pacchā gacchanto addasa. Etassa kirāyasmato ekakassa viharato aññaṃ vattaṃ, bhagavatā saddhiṃ viharato aññaṃ. Yadā hi dve aggasāvakā ekākino vasanti, tadā pātova senāsanaṃ sammajjitvā sarīrapaṭijagganaṃ katvā samāpattiṃ appetvā sannisinnā attano cittaruciyā bhikkhācāraṃ gacchanti. Bhagavatā saddhiṃ viharantā pana therā evaṃ na karonti. Tadā hi bhagavā bhikkhusaṅghaparivāro paṭhamaṃ bhikkhācāraṃ gacchati. Tasmiṃ gate thero attano senāsanā nikkhamitvā – ‘‘bahūnaṃ vasanaṭṭhāne nāma sabbeva pāsādikaṃ kātuṃ sakkonti vā, na vā sakkontī’’ti tattha tattha gantvā asammaṭṭhaṃ ṭhānaṃ sammajjati. Sace kacavaro achaḍḍito hoti, taṃ chaḍḍeti. Pānīyaṭṭhapetabbaṭṭhānamhi pānīyakūṭe asati pānīyaghaṭaṃ ṭhapeti. Gilānānaṃ santikaṃ gantvā, ‘‘āvuso, tumhākaṃ kiṃ āharāmi, kiṃ vo icchitabba’’nti? Pucchati. Avassikadaharānaṃ santikaṃ gantvā – ‘‘abhiramatha, āvuso, mā ukkaṇṭhittha, paṭipattisārakaṃ buddhasāsana’’nti ovadati. Evaṃ katvā sabbapacchā bhikkhācāraṃ gacchati. Yathā hi cakkavatti kuhiñci gantukāmo senāya parivārito paṭhamaṃ nikkhamati, pariṇāyakaratanaṃ senaṅgāni saṃvidhāya pacchā nikkhamati, evaṃ saddhammacakkavatti bhagavā bhikkhusaṅghaparivāro paṭhamaṃ nikkhamati, tassa bhagavato pariṇāyakaratanabhūto dhammasenāpati imaṃ kiccaṃ katvā sabbapacchā nikkhamati. So evaṃ nikkhanto tasmiṃ divase aññatarasmiṃ rukkhamūle nisinnaṃ rāhulabhaddaṃ addasa. Tena vuttaṃ ‘‘pacchā gacchanto addasā’’ti.
ат̇а гасмаа аанаабаанассад̇ияам̣ нияож̇зси? нисаж̇ж̇аанужчавигад̇д̇аа. т̇зро гира ‘‘зд̇асса бхаг̇авад̇аа руубагаммадтаанам̣ гат̇ид̇а’’нд̇и анааваж̇ж̇ид̇ваава язнаагаарзна аяам̣ ажало аноб̣ад̣̇д̇хо худ̇ваа нисинно, ид̣̇амасса зд̇иссаа нисаж̇ж̇ааяа гаммадтаанам̣ анужчавиганд̇и жинд̇зд̇ваа звамааха. д̇ад̇т̇а аанаабаанассад̇инд̇и ассаасабассаасз бариг̇г̇ахзд̇ваа д̇ад̇т̇а жад̇уггабан̃жагаж̇жхаанам̣ ниб̣б̣ад̇д̇зд̇ваа вибассанам̣ вад̣дхзд̇ваа арахад̇д̇ам̣ г̇ан̣хаахийд̇и д̣̇ассзд̇и.
Atha kasmā ānāpānassatiyaṃ niyojesi? Nisajjānucchavikattā. Thero kira ‘‘etassa bhagavatā rūpakammaṭṭhānaṃ kathita’’nti anāvajjitvāva yenākārena ayaṃ acalo anobaddho hutvā nisinno, idamassa etissā nisajjāya kammaṭṭhānaṃ anucchavikanti cintetvā evamāha. Tattha ānāpānassatinti assāsapassāse pariggahetvā tattha catukkapañcakajjhānaṃ nibbattetvā vipassanaṃ vaḍḍhetvā arahattaṃ gaṇhāhīti dasseti.
махабпалаа ход̇ийд̇и гийвамахабпалаа ход̇и? ид̇ха бхигку аанаабаанассад̇им̣ ануяуд̇д̇о згаасанз нисиннова саб̣б̣аасавз кзбзд̇ваа арахад̇д̇ам̣ баабун̣аад̇и, д̇ат̇аа асаггонд̇о маран̣агаалз самасийсий ход̇и, д̇ат̇аа асаггонд̇о д̣̇звалогз ниб̣б̣ад̇д̇ид̇ваа д̇хаммагат̇игад̣̇звабуд̇д̇асса д̇хаммам̣ суд̇ваа арахад̇д̇ам̣ баабун̣аад̇и, д̇ад̇о вирад̣̇д̇хо ануббаннз б̣уд̣̇д̇хуббаад̣̇з бажжзгаб̣од̇хим̣ сажчигарод̇и, д̇ам̣ асажчигаронд̇о б̣уд̣̇д̇хаанам̣ саммукийбхаавз б̣аахияад̇т̇зраад̣̇аяо вияа киббаабхин̃н̃о ход̇и, звам̣ махабпалаа. махаанисам̣саад̇и д̇ассзва взважанам̣. вуд̇д̇амби жзд̇ам̣ –
Mahapphalā hotīti kīvamahapphalā hoti? Idha bhikkhu ānāpānassatiṃ anuyutto ekāsane nisinnova sabbāsave khepetvā arahattaṃ pāpuṇāti, tathā asakkonto maraṇakāle samasīsī hoti, tathā asakkonto devaloke nibbattitvā dhammakathikadevaputtassa dhammaṃ sutvā arahattaṃ pāpuṇāti, tato viraddho anuppanne buddhuppāde paccekabodhiṃ sacchikaroti, taṃ asacchikaronto buddhānaṃ sammukhībhāve bāhiyattherādayo viya khippābhiñño hoti, evaṃ mahapphalā. Mahānisaṃsāti tasseva vevacanaṃ. Vuttampi cetaṃ –
‘‘аанаабаанассад̇ий яасса, барибун̣н̣аа субхаавид̇аа;
‘‘Ānāpānassatī yassa, paripuṇṇā subhāvitā;
анубуб̣б̣ам̣ барижид̇аа, яат̇аа б̣уд̣̇д̇хзна д̣̇зсид̇аа;
Anupubbaṃ paricitā, yathā buddhena desitā;
сомам̣ логам̣ бабхаасзд̇и, аб̣бхаа муд̇д̇ова жанд̣̇имаа’’д̇и. (т̇зраг̇аа. 548; бади. ма. 1.1.60) –
Somaṃ lokaṃ pabhāseti, abbhā muttova candimā’’ti. (theragā. 548; paṭi. ma. 1.1.60) –
имам̣ махабпалад̇ам̣ самбассамаано т̇зро сад̣̇д̇хивихааригам̣ д̇ад̇т̇а нияож̇зд̇и.
Imaṃ mahapphalataṃ sampassamāno thero saddhivihārikaṃ tattha niyojeti.
ид̇и бхаг̇аваа руубагаммадтаанам̣, т̇зро аанаабаанассад̇инд̇и убхоби гаммадтаанам̣ аажигкид̇ваа г̇ад̇аа, раахулабхад̣̇д̣̇о вихаарзязва охийно. бхаг̇аваа д̇асса охийнабхаавам̣ ж̇аананд̇оби нзва ад̇д̇анаа каад̣̇анийяам̣ бхож̇анийяам̣ г̇ахзд̇ваа аг̇амааси, на аананд̣̇ад̇т̇зрасса хад̇т̇з бзсзси, на басзнад̣̇имахаарааж̇аанаат̇абин̣д̣игаад̣̇ийнам̣ сан̃н̃ам̣ ад̣̇ааси. сан̃н̃аамад̇д̇аган̃хи лабхид̇ваа д̇з гааж̇абхад̇д̇ам̣ абхихарзяяум̣. яат̇аа жа бхаг̇аваа, звам̣ саарибуд̇д̇ад̇т̇зроби на гин̃жи агааси. раахулад̇т̇зро нираахааро чиннабхад̇д̇о ахоси. д̇асса банааяасмад̇о – ‘‘бхаг̇аваа мам̣ вихаарз охийнам̣ ж̇аананд̇оби ад̇д̇анаа лад̣̇д̇хабин̣д̣абаад̇ам̣ нааби саяам̣ г̇ахзд̇ваа ааг̇ад̇о, на ан̃н̃асса хад̇т̇з бахин̣и , на мануссаанам̣ сан̃н̃ам̣ ад̣̇ааси, убаж̇жхааяоби мз охийнабхаавам̣ ж̇аананд̇о д̇ат̇зва на гин̃жи агаасий’’д̇и жид̇д̇амби на уббаннам̣, гуд̇о д̇аббажжаяаа омаанам̣ ваа ад̇имаанам̣ ваа ж̇анзссад̇и. бхаг̇авад̇аа бана аажигкид̇агаммадтаанамзва бурзбхад̇д̇амби бажчаабхад̇д̇амби – ‘‘ид̇иби руубам̣ анижжам̣, ид̇иби д̣̇угкам̣, ид̇иби асубхам̣, ид̇иби анад̇д̇аа’’д̇и аг̇г̇им̣ абхимад̇т̇знд̇о вияа ниранд̇арам̣ манасигад̇ваа сааяанхасамаяз жинд̇зси – ‘‘ахам̣ убаж̇жхааязна аанаабаанассад̇им̣ бхаавзхийд̇и вуд̇д̇о , д̇асса важанам̣ на гариссаами. аажарияубаж̇жхааяаанан̃хи важанам̣ агаронд̇о д̣̇уб̣б̣ажо наама ход̇и. ‘д̣̇уб̣б̣ажо раахуло, убаж̇жхааяассаби важанам̣ на гарод̇ий’д̇и жа г̇арахуббад̇д̇ид̇о гагкал̣ад̇араа бийл̣аа наама над̇т̇ий’’д̇и бхааванаавид̇хаанам̣ бужчид̇угаамо бхаг̇авад̇о санд̇игам̣ аг̇амааси. д̇ам̣ д̣̇ассзд̇ум̣ ат̇а ко ааяасмаа раахулод̇иаад̣̇и вуд̇д̇ам̣.
Iti bhagavā rūpakammaṭṭhānaṃ, thero ānāpānassatinti ubhopi kammaṭṭhānaṃ ācikkhitvā gatā, rāhulabhaddo vihāreyeva ohīno. Bhagavā tassa ohīnabhāvaṃ jānantopi neva attanā khādanīyaṃ bhojanīyaṃ gahetvā agamāsi, na ānandattherassa hatthe pesesi, na pasenadimahārājaanāthapiṇḍikādīnaṃ saññaṃ adāsi. Saññāmattakañhi labhitvā te kājabhattaṃ abhihareyyuṃ. Yathā ca bhagavā, evaṃ sāriputtattheropi na kiñci akāsi. Rāhulatthero nirāhāro chinnabhatto ahosi. Tassa panāyasmato – ‘‘bhagavā maṃ vihāre ohīnaṃ jānantopi attanā laddhapiṇḍapātaṃ nāpi sayaṃ gahetvā āgato, na aññassa hatthe pahiṇi , na manussānaṃ saññaṃ adāsi, upajjhāyopi me ohīnabhāvaṃ jānanto tatheva na kiñci akāsī’’ti cittampi na uppannaṃ, kuto tappaccayā omānaṃ vā atimānaṃ vā janessati. Bhagavatā pana ācikkhitakammaṭṭhānameva purebhattampi pacchābhattampi – ‘‘itipi rūpaṃ aniccaṃ, itipi dukkhaṃ, itipi asubhaṃ, itipi anattā’’ti aggiṃ abhimatthento viya nirantaraṃ manasikatvā sāyanhasamaye cintesi – ‘‘ahaṃ upajjhāyena ānāpānassatiṃ bhāvehīti vutto , tassa vacanaṃ na karissāmi. Ācariyupajjhāyānañhi vacanaṃ akaronto dubbaco nāma hoti. ‘Dubbaco rāhulo, upajjhāyassapi vacanaṃ na karotī’ti ca garahuppattito kakkhaḷatarā pīḷā nāma natthī’’ti bhāvanāvidhānaṃ pucchitukāmo bhagavato santikaṃ agamāsi. Taṃ dassetuṃ atha kho āyasmā rāhulotiādi vuttaṃ.
114. д̇ад̇т̇а бадисаллаанаад̇и згийбхаавад̇о. яам̣гин̃жи раахулаад̇и гасмаа? бхаг̇аваа аанаабаанассад̇им̣ будто руубагаммадтаанам̣ гат̇зд̇ийд̇и. руубз чанд̣̇арааг̇аббахаанад̇т̇ам̣. звам̣ гирасса ахоси – ‘‘раахуласса ад̇д̇абхаавам̣ ниссааяа чанд̣̇арааг̇о уббанно, хздтаа жасса сан̇кзбзна руубагаммадтаанам̣ гат̇ид̇ам̣. ид̣̇ааниссааби д̣̇вижад̇д̇аалийсааяа аагаарзхи ад̇д̇абхаавам̣ вирааж̇зд̇ваа висан̇карид̇ваа д̇ам̣ниссид̇ам̣ чанд̣̇арааг̇ам̣ ануббад̇д̇ид̇хаммад̇ам̣ аабаад̣̇зссаамий’’д̇и. ат̇а аагаасад̇хаад̇ум̣ гасмаа вид̇т̇аарзсийд̇и? убаад̣̇ааруубад̣̇ассанад̇т̇ам̣. хздтаа хи жад̇д̇аари махаабхууд̇аанзва гат̇ид̇аани, на убаад̣̇ааруубам̣. д̇асмаа иминаа мукзна д̇ам̣ д̣̇ассзд̇ум̣ аагаасад̇хаад̇ум̣ вид̇т̇аарзси. абижа аж̇жхад̇д̇игзна аагаасзна барижчиннаруубамби баагадам̣ ход̇и.
114. Tattha paṭisallānāti ekībhāvato. Yaṃkiñci rāhulāti kasmā? Bhagavā ānāpānassatiṃ puṭṭho rūpakammaṭṭhānaṃ kathetīti. Rūpe chandarāgappahānatthaṃ. Evaṃ kirassa ahosi – ‘‘rāhulassa attabhāvaṃ nissāya chandarāgo uppanno, heṭṭhā cassa saṅkhepena rūpakammaṭṭhānaṃ kathitaṃ. Idānissāpi dvicattālīsāya ākārehi attabhāvaṃ virājetvā visaṅkharitvā taṃnissitaṃ chandarāgaṃ anuppattidhammataṃ āpādessāmī’’ti. Atha ākāsadhātuṃ kasmā vitthāresīti? Upādārūpadassanatthaṃ. Heṭṭhā hi cattāri mahābhūtāneva kathitāni, na upādārūpaṃ. Tasmā iminā mukhena taṃ dassetuṃ ākāsadhātuṃ vitthāresi. Apica ajjhattikena ākāsena paricchinnarūpampi pākaṭaṃ hoti.
аагаасзна барижчиннам̣, руубам̣ яаад̇и вибхууд̇ад̇ам̣;
Ākāsena paricchinnaṃ, rūpaṃ yāti vibhūtataṃ;
д̇ассзвам̣ аавибхаавад̇т̇ам̣, д̇ам̣ багаасзси нааяаго.
Tassevaṃ āvibhāvatthaṃ, taṃ pakāsesi nāyako.
зд̇т̇а бана буримаасу д̇аава жад̇уусу д̇хаад̇уусу яам̣ вад̇д̇аб̣б̣ам̣, д̇ам̣ махаахад̇т̇ибад̣̇обамз вуд̇д̇амзва.
Ettha pana purimāsu tāva catūsu dhātūsu yaṃ vattabbaṃ, taṃ mahāhatthipadopame vuttameva.
118. аагаасад̇хаад̇уяам̣ аагаасаг̇ад̇анд̇и аагаасабхаавам̣ г̇ад̇ам̣. убаад̣̇иннанд̇иаад̣̇иннам̣ г̇ахид̇ам̣ бараамадтам̣, сарийрадтаганд̇и ад̇т̇о. ган̣н̣ажчид̣̇д̣̇анд̇и мам̣салохид̇аад̣̇ийхи асампудтаган̣н̣авиварам̣. наасажчид̣̇д̣̇аад̣̇ийсуби зсзва наяо. язна жаад̇и язна чид̣̇д̣̇зна. аж̇жхохарад̇ийд̇и анд̇о бавзсзд̇и, ж̇ивхааб̣анд̇ханад̇о хи яаава уд̣̇арабадалаа мануссаанам̣ вид̣̇ад̇т̇ижад̇уран̇г̇улам̣ чид̣̇д̣̇адтаанам̣ ход̇и. д̇ам̣ санд̇хааязд̇ам̣ вуд̇д̇ам̣. яад̇т̇а жаад̇и яасмим̣ огаасз. санд̇идтад̇ийд̇и бад̇идтаад̇и. мануссаанан̃хи маханд̇ам̣ бадабариссааванамад̇д̇ан̃жа уд̣̇арабадалам̣ наама ход̇и. д̇ам̣ санд̇хааязд̇ам̣ вуд̇д̇ам̣. ад̇хобхааг̇ам̣ нигкамад̇ийд̇и язна хздтаа нигкамад̇и. д̣̇вад̇д̇им̣сахад̇т̇амад̇д̇ам̣ згавийсад̇ияаа таанзсу ван̇гам̣ анд̇ам̣ наама ход̇и. д̇ам̣ санд̇хааязд̇ам̣ вуд̇д̇ам̣. яам̣ ваа банан̃н̃амбийд̇и иминаа сукумасукумам̣ жаммамам̣саад̣̇ианд̇араг̇ад̇ан̃жзва ломагуубабхаавзна жа тид̇ам̣ аагаасам̣ д̣̇ассзд̇и. сзсамзд̇т̇ааби бат̇авийд̇хаад̇уаад̣̇ийсу вуд̇д̇анаязнзва взд̣̇ид̇аб̣б̣ам̣.
118. Ākāsadhātuyaṃ ākāsagatanti ākāsabhāvaṃ gataṃ. Upādinnantiādinnaṃ gahitaṃ parāmaṭṭhaṃ, sarīraṭṭhakanti attho. Kaṇṇacchiddanti maṃsalohitādīhi asamphuṭṭhakaṇṇavivaraṃ. Nāsacchiddādīsupi eseva nayo. Yenacāti yena chiddena. Ajjhoharatīti anto paveseti, jivhābandhanato hi yāva udarapaṭalā manussānaṃ vidatthicaturaṅgulaṃ chiddaṭṭhānaṃ hoti. Taṃ sandhāyetaṃ vuttaṃ. Yattha cāti yasmiṃ okāse. Santiṭṭhatīti patiṭṭhāti. Manussānañhi mahantaṃ paṭaparissāvanamattañca udarapaṭalaṃ nāma hoti. Taṃ sandhāyetaṃ vuttaṃ. Adhobhāgaṃ nikkhamatīti yena heṭṭhā nikkhamati. Dvattiṃsahatthamattaṃ ekavīsatiyā ṭhānesu vaṅkaṃ antaṃ nāma hoti. Taṃ sandhāyetaṃ vuttaṃ. Yaṃ vā panaññampīti iminā sukhumasukhumaṃ cammamaṃsādiantaragatañceva lomakūpabhāvena ca ṭhitaṃ ākāsaṃ dasseti. Sesametthāpi pathavīdhātuādīsu vuttanayeneva veditabbaṃ.
119. ид̣̇аанисса д̇аад̣̇ибхаавалагкан̣ам̣ аажигканд̇о бат̇авийсаманд̇иаад̣̇имааха. идтаанидтзсу хи араж̇ж̇анд̇о ад̣̇уссанд̇о д̇аад̣̇ий наама ход̇и. манаабааманаабаад̇и зд̇т̇а адта лобхасахаг̇ад̇ажид̇д̇асамбаяуд̇д̇аа манаабаа наама, д̣̇вз д̣̇оманассажид̇д̇асамбаяуд̇д̇аа аманаабаа наама. жид̇д̇ам̣ на барияаад̣̇ааяа тассанд̇ийд̇и зд̇з пассаа уббаж̇ж̇ид̇ваа д̇ава жид̇д̇ам̣ анд̇омудтиг̇ад̇ам̣ гаронд̇о вияа барияаад̣̇ааяа г̇ахзд̇ваа таад̇ум̣ на сагкиссанд̇и ‘‘ахам̣ собхаами, маяхам̣ ван̣н̣ааяад̇анам̣ басанна’’нд̇и буна ад̇д̇абхаавам̣ ниссааяа чанд̣̇арааг̇о нуббаж̇ж̇иссад̇и. г̇уут̇аг̇ад̇анд̇иаад̣̇ийсу г̇уут̇амзва г̇уут̇аг̇ад̇ам̣. звам̣ саб̣б̣ад̇т̇а.
119. Idānissa tādibhāvalakkhaṇaṃ ācikkhanto pathavīsamantiādimāha. Iṭṭhāniṭṭhesu hi arajjanto adussanto tādī nāma hoti. Manāpāmanāpāti ettha aṭṭha lobhasahagatacittasampayuttā manāpā nāma, dve domanassacittasampayuttā amanāpā nāma. Cittaṃ na pariyādāya ṭhassantīti ete phassā uppajjitvā tava cittaṃ antomuṭṭhigataṃ karonto viya pariyādāya gahetvā ṭhātuṃ na sakkhissanti ‘‘ahaṃ sobhāmi, mayhaṃ vaṇṇāyatanaṃ pasanna’’nti puna attabhāvaṃ nissāya chandarāgo nuppajjissati. Gūthagatantiādīsu gūthameva gūthagataṃ. Evaṃ sabbattha.
на гад̇т̇ажи бад̇идтид̇од̇и бат̇авийбаб̣б̣ад̇аругкаад̣̇ийсу згасмимби на бад̇идтид̇о, яад̣̇и хи бат̇авияам̣ бад̇идтид̇о бхавзяяа, бат̇авияаа бхиж̇ж̇амаанааяа сахзва бхиж̇ж̇зяяа, баб̣б̣ад̇з бад̇амаанз сахзва бад̇зяяа, ругкз чиж̇ж̇амаанз сахзва чиж̇ж̇зяяа.
Na katthaci patiṭṭhitoti pathavīpabbatarukkhādīsu ekasmimpi na patiṭṭhito, yadi hi pathaviyaṃ patiṭṭhito bhaveyya, pathaviyā bhijjamānāya saheva bhijjeyya, pabbate patamāne saheva pateyya, rukkhe chijjamāne saheva chijjeyya.
120. мзд̇д̇ам̣ раахулаад̇и гасмаа аарабхи? д̇аад̣̇ибхаавасса гааран̣ад̣̇ассанад̇т̇ам̣. хздтаа хи д̇аад̣̇ибхаавалагкан̣ам̣ д̣̇ассид̇ам̣, на жа саггаа ахам̣ д̇аад̣̇ий хомийд̇и агааран̣аа бхавид̇ум̣, наби ‘‘ахам̣ ужжаагулаббасуд̇о б̣ахуссуд̇о лаабхий, мам̣ рааж̇арааж̇амахаамад̇д̇аад̣̇аяо бхаж̇анд̇и, ахам̣ д̇аад̣̇ий хомий’’д̇и имзхи гааран̣зхи гожи д̇аад̣̇ий наама ход̇и, мзд̇д̇аад̣̇ибхааванааяа бана ход̇ийд̇и д̇аад̣̇ибхаавасса гааран̣ад̣̇ассанад̇т̇ам̣ имам̣ д̣̇зсанам̣ аарабхи.
120.Mettaṃrāhulāti kasmā ārabhi? Tādibhāvassa kāraṇadassanatthaṃ. Heṭṭhā hi tādibhāvalakkhaṇaṃ dassitaṃ, na ca sakkā ahaṃ tādī homīti akāraṇā bhavituṃ, napi ‘‘ahaṃ uccākulappasuto bahussuto lābhī, maṃ rājarājamahāmattādayo bhajanti, ahaṃ tādī homī’’ti imehi kāraṇehi koci tādī nāma hoti, mettādibhāvanāya pana hotīti tādibhāvassa kāraṇadassanatthaṃ imaṃ desanaṃ ārabhi.
д̇ад̇т̇а бхааваяад̇од̇и убажаарам̣ ваа аббанам̣ ваа баабзнд̇асса. яо б̣яаабаад̣̇од̇и яо сад̇д̇з гобо, со бахийяиссад̇и. вихзсаад̇и баан̣иаад̣̇ийхи сад̇д̇аанам̣ вихим̣санам̣. арад̇ийд̇и банд̇асзнаасанзсу жзва ад̇хигусалад̇хаммзсу жа угган̣тид̇ад̇аа. бадигход̇и яад̇т̇а гад̇т̇ажи сад̇д̇зсу сан̇каарзсу жа бадихан̃н̃анагилзсо. асубханд̇и уд̣̇д̇хумаад̇агаад̣̇ийсу убажаараббанам̣. уд̣̇д̇хумаад̇агаад̣̇ийсу асубхабхааванаа жа наамзсаа вид̇т̇аарад̇о висуд̣̇д̇химаг̇г̇з гат̇ид̇аава. рааг̇од̇и бан̃жагаамаг̇ун̣игарааг̇о. анижжасан̃н̃анд̇и анижжаанубассанааяа сахаж̇аад̇асан̃н̃ам̣. вибассанаа зва ваа зсаа асан̃н̃ааби сан̃н̃аасийсзна сан̃н̃аад̇и вуд̇д̇аа. асмимаанод̇и руубаад̣̇ийсу асмийд̇и маано.
Tattha bhāvayatoti upacāraṃ vā appanaṃ vā pāpentassa. Yo byāpādoti yo satte kopo, so pahīyissati. Vihesāti pāṇiādīhi sattānaṃ vihiṃsanaṃ. Aratīti pantasenāsanesu ceva adhikusaladhammesu ca ukkaṇṭhitatā. Paṭighoti yattha katthaci sattesu saṅkhāresu ca paṭihaññanakileso. Asubhanti uddhumātakādīsu upacārappanaṃ. Uddhumātakādīsu asubhabhāvanā ca nāmesā vitthārato visuddhimagge kathitāva. Rāgoti pañcakāmaguṇikarāgo. Aniccasaññanti aniccānupassanāya sahajātasaññaṃ. Vipassanā eva vā esā asaññāpi saññāsīsena saññāti vuttā. Asmimānoti rūpādīsu asmīti māno.
121. ид̣̇аани т̇зрзна бужчид̇ам̣ бан̃хам̣ вид̇т̇аарзнд̇о аанаабаанассад̇инд̇иаад̣̇имааха. д̇ад̇т̇а ид̣̇ам̣ гаммадтаанан̃жа гаммадтаанабхааванаа жа баал̣иад̇т̇о жа сад̣̇д̇хим̣ аанисам̣сагат̇ааяа саб̣б̣о саб̣б̣аагаарзна висуд̣̇д̇химаг̇г̇з ануссад̇инид̣̇д̣̇зсз вид̇т̇аарид̇оязва. имам̣ д̣̇зсанам̣ бхаг̇аваа нзяяабуг̇г̇алавасзнзва баринидтаабзсийд̇и.
121. Idāni therena pucchitaṃ pañhaṃ vitthārento ānāpānassatintiādimāha. Tattha idaṃ kammaṭṭhānañca kammaṭṭhānabhāvanā ca pāḷiattho ca saddhiṃ ānisaṃsakathāya sabbo sabbākārena visuddhimagge anussatiniddese vitthāritoyeva. Imaṃ desanaṃ bhagavā neyyapuggalavaseneva pariniṭṭhāpesīti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
маахаараахуловаад̣̇асуд̇д̇аван̣н̣анаа нидтид̇аа.
Māhārāhulovādasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 2. махаараахуловаад̣̇асуд̇д̇ам̣ • 2. Mahārāhulovādasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 2. махаараахуловаад̣̇асуд̇д̇аван̣н̣анаа • 2. Mahārāhulovādasuttavaṇṇanā
