| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༢. མཧཱརཱཧུལོཝཱདསུཏྟཝཎྞནཱ
2. Mahārāhulovādasuttavaṇṇanā
༡༡༣. ཨིརིཡཱཔཐཱནུབནྡྷནེནཱཏི ཨིརིཡཱཔཐགམནཱནུབནྡྷནེན, ན པཊིཔཏྟིགམནཱནུབནྡྷནེན། ཨཉྙམེཝ ཧི བུདྡྷཱནཾ པཊིཔཏྟིགམནཾ ཨཉྙཾ སཱཝཀཱནཾ། ཝིལཱསིཏགམནེནཱཏི – ‘‘དཱུརེ པཱདཾ ན ཨུདྡྷརཏི, ན ཨཙྩཱསནྣེ པཱདཾ ནིཀྑིཔཏི, ནཱཏིསཱིགྷཾ གཙྪཏི ནཱཏིསཎིཀ’’ནྟིཨཱདིནཱ (སཾ॰ ནི॰ ཨཊྛ॰ ༣.༤.༢༤༣; ཨུདཱ॰ ཨཊྛ॰ ༧༦; སཱརཏྠ॰ ཊཱི॰ མཧཱཝགྒ ༣.༢༨༥) ཝུཏྟེན སབྷཱཝསཱིལེན བུདྡྷཱནཾ ཙཱཏུརིཡགམནེན། ཏདེཝ ཧི སནྡྷཱཡ ‘‘པདེ པདཾ ནིཀྑིཔནྟོ’’ཏི ཝུཏྟཾ། པདཱནུཔདིཀོཏི རཱཧུལཏྠེརསྶཔི ལཀྑཎཔཱརིཔཱུརིཡཱ ཏཱདིསམེཝ གམནནྟི ཡཏྟཀཾ པདེསཾ ཨནྟརཾ ཨདཏྭཱ བྷགཝཏོ པིཊྛིཏོ གནྟུཾ ཨཱརདྡྷོ, སབྦཏྠ ཏམེཝ གམནཔདཱནུཔདཾ གཙྪཏཱིཏི པདཱནུཔདིཀོ།
113.Iriyāpathānubandhanenāti iriyāpathagamanānubandhanena, na paṭipattigamanānubandhanena. Aññameva hi buddhānaṃ paṭipattigamanaṃ aññaṃ sāvakānaṃ. Vilāsitagamanenāti – ‘‘dūre pādaṃ na uddharati, na accāsanne pādaṃ nikkhipati, nātisīghaṃ gacchati nātisaṇika’’ntiādinā (saṃ. ni. aṭṭha. 3.4.243; udā. aṭṭha. 76; sārattha. ṭī. mahāvagga 3.285) vuttena sabhāvasīlena buddhānaṃ cāturiyagamanena. Tadeva hi sandhāya ‘‘pade padaṃ nikkhipanto’’ti vuttaṃ. Padānupadikoti rāhulattherassapi lakkhaṇapāripūriyā tādisameva gamananti yattakaṃ padesaṃ antaraṃ adatvā bhagavato piṭṭhito gantuṃ āraddho, sabbattha tameva gamanapadānupadaṃ gacchatīti padānupadiko.
ཝཎྞནཱབྷཱུམི ཙཱཡཾ ཏཏྠ བྷགཝནྟཾ ཐེརཉྩ ཨནེཀརཱུཔཱཧི ཨུཔམཱཧི ཝཎྞེནྟོ ‘‘ཏཏྠ བྷགཝཱ’’ཏིཨཱདིམཱཧ། ནིཀྑནྟགཛཔོཏཀོ ཝིཡ ཝིརོཙིཏྠཱཏི པདཾ ཨཱནེཏྭཱ ཡོཛནཱ། ཨེཝཾ ཏཾ ཀེསརསཱིཧོ ཝིཡཱཏིཨཱདཱིསུཔི ཨཱནེཏྭཱ ཡོཛེཏབྦཾ། ཏཱརཀརཱཛཱ ནཱམ ཙནྡོ། དྭིནྣཾ ཙནྡམཎྜལཱནནྟིཨཱདི པརིཀཔྤཝཙནཾ, བུདྡྷཱཝེཎིཀསནྟཀཾ ཝིཡ བུདྡྷཱནཾ ཨཱཀཔྤསོབྷཱ ཨཧོསི, ཨཧོ སིརཱིསམྤཏྟཱིཏི ཡོཛནཱ།
Vaṇṇanābhūmi cāyaṃ tattha bhagavantaṃ therañca anekarūpāhi upamāhi vaṇṇento ‘‘tattha bhagavā’’tiādimāha. Nikkhantagajapotako viya virocitthāti padaṃ ānetvā yojanā. Evaṃ taṃ kesarasīho viyātiādīsupi ānetvā yojetabbaṃ. Tārakarājā nāma cando. Dvinnaṃ candamaṇḍalānantiādi parikappavacanaṃ, buddhāveṇikasantakaṃ viya buddhānaṃ ākappasobhā ahosi, aho sirīsampattīti yojanā.
ཨཱདིཡམཱནཱཏི གཎྷནྟི། ‘‘པཙྪཱ ཛཱནིསྶཱམཱ’’ཏི ན ཨཛྫུཔེཀྑིཏབྦོ། ཨིདཾ ན ཀཏྟབྦནྟི ཝུཏྟེཏི ཨིདཾ པཱཎཨཏིཔཱཏནཾ ན ཀཏྟབྦནྟི ཝུཏྟེ ཨིདཾ དཎྜེན ཝཱ ལེཌྜུནཱ ཝཱ ཝིཧེཋནཾ ན ཀཏྟབྦཾ, ཨིདཾ པཱཎིནཱ དཎྜཀདཱནཉྩ ཨནྟམསོ ཀུཛ྄ཛྷིཏྭཱ ཨོལོཀནམཏྟམྤི ན ཀཏྟབྦམེཝཱཏི ནཡསཏེནཔི ནཡསཧསྶེནཔི པཊིཝིཛ྄ཛྷཏི, ཏཐཱ ཨིདྷ ཏཱཝ སམྨཛྫནཾ ཀཏྟབྦནྟི ཝུཏྟེཔི ཏཏྠ པརིབྷཎྜཀརཎཾ ཝིཧཱརངྒཎསམྨཛྫནཾ ཀཙཝརཚཌྜནཾ ཝཱལིཀཱསམཀིརཎནྟི ཨེཝམཱདིནཱ ནཡསཏེན ནཡསཧསྶེན པཊིཝིཛ྄ཛྷཏི། ཏེནཱཧ – ‘‘ཨིདཾ ཀཏྟབྦནྟི ཝུཏྟེཔི ཨེསེཝ ནཡོ’’ཏི། པརིབྷཱསནྟི ཏཛྫནཾ། ལབྷཱམཱིཏི པཙྩཱསཱིསཏི།
Ādiyamānāti gaṇhanti. ‘‘Pacchā jānissāmā’’ti na ajjupekkhitabbo. Idaṃ na kattabbanti vutteti idaṃ pāṇaatipātanaṃ na kattabbanti vutte idaṃ daṇḍena vā leḍḍunā vā viheṭhanaṃ na kattabbaṃ, idaṃ pāṇinā daṇḍakadānañca antamaso kujjhitvā olokanamattampi na kattabbamevāti nayasatenapi nayasahassenapi paṭivijjhati, tathā idha tāva sammajjanaṃ kattabbanti vuttepi tattha paribhaṇḍakaraṇaṃ vihāraṅgaṇasammajjanaṃ kacavarachaḍḍanaṃ vālikāsamakiraṇanti evamādinā nayasatena nayasahassena paṭivijjhati. Tenāha – ‘‘idaṃ kattabbanti vuttepi eseva nayo’’ti. Paribhāsanti tajjanaṃ. Labhāmīti paccāsīsati.
སབྦམེཏནྟི སབྦཾ ཨེཏཾ མཡི ལབྦྷམཱནཾ སིཀྑཱཀཱམཏཾ། ཨབྷིཉྙཱཡཱཏི ཛཱནིཏྭཱ། སཧཱཡོཏི རཊྛཔཱལཏྠེརཾ སནྡྷཱཡཱཧ། སོ ཧི བྷགཝཏཱ སདྡྷཱཔབྦཛིཏབྷཱཝེ ཨེཏདགྒེ ཋཔིཏོ། དྷམྨཱརཀྑོཏི སཏྠུ སདྡྷམྨརཏནཱནུཔཱལཀོ དྷམྨབྷཎྜཱགཱརིཀོ། པེཏྟིཡོཏི ཙཱུལ༹པིཏཱ། སབྦཾ མེ ཛིནསཱསནནྟི སབྦམྤི བུདྡྷསཱསནཾ མཡ྄ཧམེཝ།
Sabbametanti sabbaṃ etaṃ mayi labbhamānaṃ sikkhākāmataṃ. Abhiññāyāti jānitvā. Sahāyoti raṭṭhapālattheraṃ sandhāyāha. So hi bhagavatā saddhāpabbajitabhāve etadagge ṭhapito. Dhammārakkhoti satthu saddhammaratanānupālako dhammabhaṇḍāgāriko. Pettiyoti cūḷapitā. Sabbaṃ me jinasāsananti sabbampi buddhasāsanaṃ mayhameva.
ཚནྡརཱགཾ ཉཏྭཱཏི ཚནྡརཱགཾ མམ ཙིཏྟེ ཨུཔྤནྣཾ ཉཏྭཱ། ཨཉྙཏརསྨིཾ རུཀྑམཱུལེཏི ཝིཧཱརཔརིཡནྟེ ཨཉྙཏརསྨིཾ རུཀྑམཱུལཊྛཱནེ ཨནུཙྪཝིཀེ།
Chandarāgaṃ ñatvāti chandarāgaṃ mama citte uppannaṃ ñatvā. Aññatarasmiṃ rukkhamūleti vihārapariyante aññatarasmiṃ rukkhamūlaṭṭhāne anucchavike.
ཏདཱཏི ཨགྒསཱཝཀེཧི པསཱདཱཔནཀཱལེ། ཨཉྙཀམྨཊྛཱནཱནི ཙངྐམནཨིརིཡཱཔཐེཔི པིཊྛིཔསཱརཎཀཱལེཔི སམིཛ྄ཛྷནྟི, ན ཨེཝམིདནྟི ཨཱཧ – ‘‘ཨིདམསྶ ཨེཏིསྶཱ ནིསཛྫཱཡ ཀམྨཊྛཱནཾ ཨནུཙྪཝིཀ’’ནྟི། ཨཱནཱཔཱནསྶཏིནྟི ཨཱནཱཔཱནསྶཏིཀམྨཊྛཱནཾ།
Tadāti aggasāvakehi pasādāpanakāle. Aññakammaṭṭhānāni caṅkamanairiyāpathepi piṭṭhipasāraṇakālepi samijjhanti, na evamidanti āha – ‘‘idamassa etissā nisajjāya kammaṭṭhānaṃ anucchavika’’nti. Ānāpānassatinti ānāpānassatikammaṭṭhānaṃ.
སམསཱིསཱི ཧོཏཱིཏི སཙེ སམསཱིསཱི ཧུཏྭཱ ན པརིནིབྦཱཡཏི། པཙྩེཀབོདྷིཾ སཙྪིཀརོཏི ནོ ཙེ པཙྩེཀབོདྷིཾ སཙྪིཀརོཏི། ཁིཔྤཱབྷིཉྙོཏི ཁིཔྤཾ ལཧུཾཡེཝ པཏྟབྦཚལ༹བྷིཉྙོ།
Samasīsī hotīti sace samasīsī hutvā na parinibbāyati. Paccekabodhiṃ sacchikaroti no ce paccekabodhiṃ sacchikaroti. Khippābhiññoti khippaṃ lahuṃyeva pattabbachaḷabhiñño.
པརིཔུཎྞཱཏི སོལ༹སསུ ཨཱཀཱརེསུ ཀསྶཙིཔི ཨཏཱཔནེན སབྦསོ པུཎྞཱ། སུབྷཱཝིཏཱཏི སམཐབྷཱཝནཱཡ ཝིཔསྶནཱབྷཱཝནཱཡ ཙ ཨནུཔུབྦསམྤཱདནེན སུབྷཱཝིཏཱ། གཎནཱཝིདྷཱནཱནུཔུབྦིཡཱ ཨཱསེཝིཏཏྟཱ ཨནུཔུབྦཾ པརིཙིཏཱ།
Paripuṇṇāti soḷasasu ākāresu kassacipi atāpanena sabbaso puṇṇā. Subhāvitāti samathabhāvanāya vipassanābhāvanāya ca anupubbasampādanena subhāvitā. Gaṇanāvidhānānupubbiyā āsevitattā anupubbaṃ paricitā.
ཨོམཱནཾ ཝཱཏི ཨཝཛཱནནཾ ཨུཉྙཱཏནྟི ཨེཝཾཝིདྷཾ མཱནཾ ཝཱ། ཨཏིམཱནཾ ཝཱཏི ‘‘ཀིཾ ཨིམེཧི, མམེཝ ཨཱནུབྷཱཝེན ཛཱིཝིསྶཱམཱི’’ཏི ཨེཝཾ ཨཏིམཱནཾ ཝཱ ཀུཏོ ཛནེསྶཏཱིཏི།
Omānaṃ vāti avajānanaṃ uññātanti evaṃvidhaṃ mānaṃ vā. Atimānaṃ vāti ‘‘kiṃ imehi, mameva ānubhāvena jīvissāmī’’ti evaṃ atimānaṃ vā kuto janessatīti.
༡༡༤. ཝིསངྑརིཏྭཱཏི ཝིསཾཡུཏྟེ ཀཏྭཱ, ཡཐཱ སངྒཱཀཱརེན གཧཎཾ ན གཙྪཏི, ཨེཝཾ ཝིནིབྷུཉྫིཏྭཱཏི ཨཏྠོ། མཧཱབྷཱུཏཱནི ཏཱཝ ཝིཏྠཱརེཏུ, སམྨསནཱུཔགཏྟཱ, ཨསམྨསནཱུཔགཾ ཨཱཀཱསདྷཱཏུཾ ཨཐ ཀསྨཱ ཝིཏྠཱརེསཱིཏི ཨཱཧ ‘‘ཨུཔཱདཱརཱུཔདསྶནཏྠ’’ནྟི། ཨཱཔོདྷཱཏུ སུཁུམརཱུཔཾ། ཨིཏརཱསུ ཨོལཱ༹རིཀསུཁུམཏཱཔི ལབྦྷཏཱིཏི ཨཱཧ ‘‘ཨུཔཱདཱརཱུཔདསྶནཏྠ’’ནྟི། ཧེཊྛཱ ཙཏྟཱརི མཧཱབྷཱུཏཱནེཝ ཀཐིཏཱནི, ན ཨུཔཱདཱརཱུཔནྟི ཏསྶ པནེཏྠ ལཀྑཎཧཱརནཡེན ཨཱཀཱསདསྶནེན དསྶིཏཏཱ ཝེདིཏབྦཱ། ཏེནཱཧ ‘‘ཨིམིནཱ མུཁེན ཏཾ དསྶེཏུ’’ནྟི། ན ཀེཝལཾ ཨུཔཱདཱརཱུཔགྒཧཎདསྶནཏྠམེཝ ཨཱཀཱསདྷཱཏུ ཝིཏྠཱརིཏཱ, ཨཐ ཁོ པརིགྒཧསུཁཏཱཡཔཱིཏི དསྶེནྟོ ‘‘ཨཔིཙཱ’’ཏིཨཱདིམཱཧ། ཏཏྠ པརིཙྪིནྡིཏབྦསྶ རཱུཔསྶ ནིརཝསེསཔརིཡཱདཱནཏྠཾ ‘‘ཨཛ྄ཛྷཏྟིཀེནཱ’’ཏི ཝིསེསནམཱཧ། ཨཱཀཱསེནཱཏི ཨཱཀཱསདྷཱཏུཡཱ གཧིཏཱཡ། པརིཙྪིནྣརཱུཔནྟི ཏཱཡ པརིཙྪིནྡིཏཀལཱཔགཏམྤི པཱཀཊཾ ཧོཏི ཝིབྷཱུཏཾ ཧུཏྭཱ ཨུཔཊྛཱཏི།
114.Visaṅkharitvāti visaṃyutte katvā, yathā saṅgākārena gahaṇaṃ na gacchati, evaṃ vinibhuñjitvāti attho. Mahābhūtāni tāva vitthāretu, sammasanūpagattā, asammasanūpagaṃ ākāsadhātuṃ atha kasmā vitthāresīti āha ‘‘upādārūpadassanattha’’nti. Āpodhātu sukhumarūpaṃ. Itarāsu oḷārikasukhumatāpi labbhatīti āha ‘‘upādārūpadassanattha’’nti. Heṭṭhā cattāri mahābhūtāneva kathitāni, na upādārūpanti tassa panettha lakkhaṇahāranayena ākāsadassanena dassitatā veditabbā. Tenāha ‘‘iminā mukhena taṃ dassetu’’nti. Na kevalaṃ upādārūpaggahaṇadassanatthameva ākāsadhātu vitthāritā, atha kho pariggahasukhatāyapīti dassento ‘‘apicā’’tiādimāha. Tattha paricchinditabbassa rūpassa niravasesapariyādānatthaṃ ‘‘ajjhattikenā’’ti visesanamāha. Ākāsenāti ākāsadhātuyā gahitāya. Paricchinnarūpanti tāya paricchinditakalāpagatampi pākaṭaṃ hoti vibhūtaṃ hutvā upaṭṭhāti.
ཨིདཱནི ཝུཏྟམེཝཏྠཾ སུཁགྒཧཎཏྠཾ གཱཐཱཡ དསྶེཏི། ཏསྶཱཏི ཨུཔཱདཱཡརཱུཔསྶ། ཨེཝཾ ཨཱཝིབྷཱཝཏྠནྟི ཨེཝཾ པརིཙྪིནྣཏཱཡ ཨཱཀཱསསྶ ཝསེན ཝིབྷཱུཏབྷཱཝཏྠཾ། ཏནྟི ཨཱཀཱསདྷཱཏུཾ།
Idāni vuttamevatthaṃ sukhaggahaṇatthaṃ gāthāya dasseti. Tassāti upādāyarūpassa. Evaṃ āvibhāvatthanti evaṃ paricchinnatāya ākāsassa vasena vibhūtabhāvatthaṃ. Tanti ākāsadhātuṃ.
༡༡༨. ཨཱཀཱསབྷཱཝཾ གཏནྟི ཙཏཱུཧི མཧཱབྷཱུཏེཧི ཨསམྥུཊྛཱནཾ ཏེསཾ པརིཙྪེདཀབྷཱཝེན ཨཱཀཱསནྟི གཧེཏབྦཏཾ གཏཾ, ཨཱཀཱསམེཝ ཝཱ ཨཱཀཱསགཏཾ ཡཐཱ ‘‘དིཊྛིགཏཾ (དྷ॰ ས॰ ༣༨༡; མཧཱནི॰ ༡༢), ཨཏྠངྒཏ’’ནྟི (ཨ॰ ནི॰ ཨཊྛ॰ ༡.༡.༡༣༠) ཙ། ཨཱདིནྣནྟི ཨིམནྟི ཏཎྷཱདིཊྛཱིཧི ཨཱདིནྣཾ། ཏེནཱཧ ‘‘གཧིཏཾ པརཱམཊྛ’’ནྟི། ཨཉྙཏྠ ཀམྨཛཾ ‘‘ཨུཔཱདིནྣ’’ནྟི ཝུཙྩཏི, ན ཏཐཱ ཨིདྷཱཏི ཨཱཧ ‘‘སརཱིརཊྛཀནྟི ཨཏྠོ’’ཏི། པཐཝཱིདྷཱཏུཨཱདཱིསུ ཝུཏྟནཡེནེཝཱཏི མཧཱཧཏྠིཔདོཔམེ (མ॰ ནི॰ ༡.༣༠༠ ཨཱདཡོ) ཝུཏྟནཡདསྶནཾ སནྡྷཱཡ ཝདཏི།
118.Ākāsabhāvaṃ gatanti catūhi mahābhūtehi asamphuṭṭhānaṃ tesaṃ paricchedakabhāvena ākāsanti gahetabbataṃ gataṃ, ākāsameva vā ākāsagataṃ yathā ‘‘diṭṭhigataṃ (dha. sa. 381; mahāni. 12), atthaṅgata’’nti (a. ni. aṭṭha. 1.1.130) ca. Ādinnanti imanti taṇhādiṭṭhīhi ādinnaṃ. Tenāha ‘‘gahitaṃ parāmaṭṭha’’nti. Aññattha kammajaṃ ‘‘upādinna’’nti vuccati, na tathā idhāti āha ‘‘sarīraṭṭhakanti attho’’ti. Pathavīdhātuādīsuvuttanayenevāti mahāhatthipadopame (ma. ni. 1.300 ādayo) vuttanayadassanaṃ sandhāya vadati.
༡༡༩. ཏཱདིབྷཱཝོ ནཱམ ནིཊྛིཏཀིཙྩསྶ ཧོཏི, ཨཡཉྩ ཝིཔསྶནཾ ཨནུཡུཉྫཏི, ཨཐ ཀིམཏྠཾ ཏཱདིབྷཱཝཏཱ ཝུཏྟཱཏི? པཐཝཱིསམཏཱདིལཀྑཎཱཙིཀྑཎཱཧི ཝིཔསྶནཱཡ སུཁཔྤཝཏྟིཨཏྠཾ། ཏེནཱཧ ‘‘ཨིཊྛཱནིཊྛེསཱུ’’ཏིཨཱདི། གཧེཏྭཱཏི ཀུསལཔྤཝཏྟིཡཱ ཨོཀཱསདཱནཝསེན པརིགྒཧེཏྭཱ། ན པཏིཊྛིཏོཏི ན ནིསྶིཏོ ན ལགྒོ།
119.Tādibhāvo nāma niṭṭhitakiccassa hoti, ayañca vipassanaṃ anuyuñjati, atha kimatthaṃ tādibhāvatā vuttāti? Pathavīsamatādilakkhaṇācikkhaṇāhi vipassanāya sukhappavattiatthaṃ. Tenāha ‘‘iṭṭhāniṭṭhesū’’tiādi. Gahetvāti kusalappavattiyā okāsadānavasena pariggahetvā. Na patiṭṭhitoti na nissito na laggo.
༡༢༠. བྲཧྨཝིཧཱརབྷཱཝནཱ ཨསུབྷབྷཱཝནཱ ཨཱནཱཔཱནསྶཏིབྷཱཝནཱ ཙ ཨུཔཙཱརཾ ཝཱ ཨཔྤནཾ ཝཱ པཱཔེནྟོ ཝིཔསྶནཱཡ པཱདཀབྷཱཝཱཡ ཨནིཙྩཱདིསཉྙཱཡ ཝིཔསྶནཱབྷཱཝེན ཨུསྶཀྐིཏྭཱ མགྒཔཊིཔཱཊིཡཱ ཨརཧཏྟཱདྷིགམཱཡ ཧོཏཱིཏི ‘‘མེཏྟཱདིབྷཱཝནཱཡ པན ཧོཏཱི’’ཏི ཝུཏྟཾ། ཡཏྠ ཀཏྠཙི སཏྟེསུ སངྑཱརེསུ ཙ པཊིཧཉྙནཀིལེསོཏི ཨཱགྷཱཏབྷཱཝམེཝ ཝདཏི ཉཱཡབྷཱཝཏོ ཨཉྙེསམྤི། ཨསྨིམཱནོཏི རཱུཔཱདིཀེ པཙྩེཀཾ ཨེཀཛ྄ཛྷཾ གཧེཏྭཱ ‘‘ཨཡམཧམསྨཱི’’ཏི ཨེཝཾ པཝཏྟམཱནོ།
120. Brahmavihārabhāvanā asubhabhāvanā ānāpānassatibhāvanā ca upacāraṃ vā appanaṃ vā pāpento vipassanāya pādakabhāvāya aniccādisaññāya vipassanābhāvena ussakkitvā maggapaṭipāṭiyā arahattādhigamāya hotīti ‘‘mettādibhāvanāya pana hotī’’ti vuttaṃ. Yattha katthaci sattesu saṅkhāresu ca paṭihaññanakilesoti āghātabhāvameva vadati ñāyabhāvato aññesampi. Asmimānoti rūpādike paccekaṃ ekajjhaṃ gahetvā ‘‘ayamahamasmī’’ti evaṃ pavattamāno.
༡༢༡. ཨིདཾ ཀམྨཊྛཱནནྟི ཨེཏྠ གཎནཱདིཝསེན ཨཱསེཝིཡམཱནཱ ཨསྶཱསཔསྶཱསཱ ཡོགཀམྨསྶ པཏིཊྛཱནཏཱཡ ཀམྨཊྛཱནཾ། ཏཏྠ པན ཏཐཱཔཝཏྟོ མནསིཀཱརོ བྷཱཝནཱ། ཨེཏྠ ཙ ཏསྶེཝ ཐེརསྶ བྷགཝཏཱ བཧཱུནཾ ཀམྨཊྛཱནཱནཾ དེསིཏཏྟཱ ཙརིཏཾ ཨནཱདིཡིཏྭཱ ཀམྨཊྛཱནཱནི སབྦེསཾ པུགྒལཱནཾ སཔྤཱཡཱནཱིཏི ཨཡམཏྠོ སིདྡྷོ, ཨཏིསཔྤཱཡཝསེན པན ཀམྨཊྛཱནེསུ ཝིབྷཱགཀཐཱ ཀཐིཏཱཏི ཝེདིཏབྦཱ།
121.Idaṃ kammaṭṭhānanti ettha gaṇanādivasena āseviyamānā assāsapassāsā yogakammassa patiṭṭhānatāya kammaṭṭhānaṃ. Tattha pana tathāpavatto manasikāro bhāvanā. Ettha ca tasseva therassa bhagavatā bahūnaṃ kammaṭṭhānānaṃ desitattā caritaṃ anādiyitvā kammaṭṭhānāni sabbesaṃ puggalānaṃ sappāyānīti ayamattho siddho, atisappāyavasena pana kammaṭṭhānesu vibhāgakathā kathitāti veditabbā.
མཧཱརཱཧུལོཝཱདསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Mahārāhulovādasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༢. མཧཱརཱཧུལོཝཱདསུཏྟཾ • 2. Mahārāhulovādasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༢. མཧཱརཱཧུལོཝཱདསུཏྟཝཎྞནཱ • 2. Mahārāhulovādasuttavaṇṇanā
