| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫-৬. মহারুক্খসুত্তদ্ৰযৰণ্ণনা
5-6. Mahārukkhasuttadvayavaṇṇanā
৫৫-৫৬. ওজং অভিহরন্তীতি রসহরণিযো ৰিয পুরিসস্স সরীরে রুক্খমূলানি রুক্খস্স পথৰীআপোরসে উপরি আরোপেন্তি। তেসং তথা আরোপনং ‘‘ওজাযা’’তিআদিনা ৰিভাৰেতি। হত্থসতুব্বেধমস্সাতি হত্থসতুব্বেধো, হত্থসতং উব্বিদ্ধস্সপি। এত্থাতি এতিস্সং ৰট্টকথাযং। কম্মারোহনন্তি কম্মপচ্চযো।
55-56.Ojaṃ abhiharantīti rasaharaṇiyo viya purisassa sarīre rukkhamūlāni rukkhassa pathavīāporase upari āropenti. Tesaṃ tathā āropanaṃ ‘‘ojāyā’’tiādinā vibhāveti. Hatthasatubbedhamassāti hatthasatubbedho, hatthasataṃ ubbiddhassapi. Etthāti etissaṃ vaṭṭakathāyaṃ. Kammārohananti kammapaccayo.
পুন এত্থাতি এতিস্সং ৰিৰট্টকথাযং। ৰট্টদুক্খং নাসেতুকামস্স দল়্হং উপ্পন্নসংৰেগঞাণং সন্ধায ‘‘কুদ্দালো ৰিযা’’তি আহ। ততো নিব্বত্তিতঞাণং সমাধিপচ্ছিযা ঠিতং নিস্সায পৰত্তেতব্বৰিপস্সনারম্ভঞাণং। রুক্খচ্ছেদনফরসু ৰিযাতি এৰংভূতস্স ৰিপস্সনা একন্ততো ৰট্টচ্ছেদায হোতিযেৰাতি আহ ‘‘রুক্খস্স…পে॰… মনসিকরোন্তস্স পঞ্ঞা’’তি। তত্থ কম্মট্ঠানন্তি ৰিপস্সনাকম্মট্ঠানং। তং চতুব্বিধৰৰত্থানৰসেন ৰীসতি পথৰীকোট্ঠাসা, দ্ৰাদস আপোকোট্ঠাসা, চত্তারো তেজোকোট্ঠাসা, ছ ৰাযোকোট্ঠাসাতি দ্ৰেচত্তালীসায কোট্ঠাসেসু। ৰিঞ্ঞাণস্স চাতি ইতি-সদ্দো আদিঅত্থো পকারত্থো চ। তেন ভূতরূপানি ৰিঞ্ঞাণসম্পযুত্তধম্মে চ সঙ্গণ্হাতি। সত্তসু সপ্পাযেসু যস্স অলভন্তস্স কম্মট্ঠানং ৰিভূতং হুত্ৰা ন উপট্ঠাতি, তং সন্ধাযাহ ‘‘অঞ্ঞতরং সপ্পায’’ন্তি। সেসং সুৰিঞ্ঞেয্যমেৰ।
Puna etthāti etissaṃ vivaṭṭakathāyaṃ. Vaṭṭadukkhaṃ nāsetukāmassa daḷhaṃ uppannasaṃvegañāṇaṃ sandhāya ‘‘kuddālo viyā’’ti āha. Tato nibbattitañāṇaṃ samādhipacchiyā ṭhitaṃ nissāya pavattetabbavipassanārambhañāṇaṃ. Rukkhacchedanapharasu viyāti evaṃbhūtassa vipassanā ekantato vaṭṭacchedāya hotiyevāti āha ‘‘rukkhassa…pe… manasikarontassa paññā’’ti. Tattha kammaṭṭhānanti vipassanākammaṭṭhānaṃ. Taṃ catubbidhavavatthānavasena vīsati pathavīkoṭṭhāsā, dvādasa āpokoṭṭhāsā, cattāro tejokoṭṭhāsā, cha vāyokoṭṭhāsāti dvecattālīsāya koṭṭhāsesu. Viññāṇassa cāti iti-saddo ādiattho pakārattho ca. Tena bhūtarūpāni viññāṇasampayuttadhamme ca saṅgaṇhāti. Sattasu sappāyesu yassa alabhantassa kammaṭṭhānaṃ vibhūtaṃ hutvā na upaṭṭhāti, taṃ sandhāyāha ‘‘aññataraṃ sappāya’’nti. Sesaṃ suviññeyyameva.
মহারুক্খসুত্তদ্ৰযৰণ্ণনা নিট্ঠিতা।
Mahārukkhasuttadvayavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৫. মহারুক্খসুত্তং • 5. Mahārukkhasuttaṃ
৬. দুতিযমহারুক্খসুত্তং • 6. Dutiyamahārukkhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā)
৫. মহারুক্খসুত্তৰণ্ণনা • 5. Mahārukkhasuttavaṇṇanā
৬. দুতিযমহারুক্খসুত্তৰণ্ণনা • 6. Dutiyamahārukkhasuttavaṇṇanā
