| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. மஹாருக்க²ஸுத்தங்
5. Mahārukkhasuttaṃ
55. ஸாவத்தி²யங் விஹரதி…பே॰… ‘‘உபாதா³னியேஸு, பி⁴க்க²வே, த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தி. தண்ஹாபச்சயா உபாதா³னங்; உபாதா³னபச்சயா ப⁴வோ…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி’’.
55. Sāvatthiyaṃ viharati…pe… ‘‘upādāniyesu, bhikkhave, dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo…pe… evametassa kevalassa dukkhakkhandhassa samudayo hoti’’.
‘‘ஸெய்யதா²பி, பி⁴க்க²வே, மஹாருக்கோ². தஸ்ஸ யானி சேவ மூலானி அதோ⁴க³மானி, யானி ச திரியங்க³மானி, ஸப்³பா³னி தானி உத்³த⁴ங் ஓஜங் அபி⁴ஹரந்தி. ஏவஞ்ஹி ஸோ, பி⁴க்க²வே, மஹாருக்கோ² ததா³ஹாரோ தது³பாதா³னோ சிரங் தீ³க⁴மத்³தா⁴னங் திட்டெ²ய்ய. ஏவமேவ கோ², பி⁴க்க²வே, உபாதா³னியேஸு த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தி. தண்ஹாபச்சயா உபாதா³னங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.
‘‘Seyyathāpi, bhikkhave, mahārukkho. Tassa yāni ceva mūlāni adhogamāni, yāni ca tiriyaṅgamāni, sabbāni tāni uddhaṃ ojaṃ abhiharanti. Evañhi so, bhikkhave, mahārukkho tadāhāro tadupādāno ciraṃ dīghamaddhānaṃ tiṭṭheyya. Evameva kho, bhikkhave, upādāniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ…pe… evametassa kevalassa dukkhakkhandhassa samudayo hoti.
‘‘உபாதா³னியேஸு , பி⁴க்க²வே, த⁴ம்மேஸு ஆதீ³னவானுபஸ்ஸினோ விஹரதோ தண்ஹா நிருஜ்ஜ²தி. தண்ஹானிரோதா⁴ உபாதா³னநிரோதோ⁴; உபாதா³னநிரோதா⁴ ப⁴வனிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி.
‘‘Upādāniyesu , bhikkhave, dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho…pe… evametassa kevalassa dukkhakkhandhassa nirodho hoti.
‘‘ஸெய்யதா²பி, பி⁴க்க²வே, மஹாருக்கோ². அத² புரிஸோ ஆக³ச்செ²ய்ய குத்³தா³லபிடகங் 1 ஆதா³ய. ஸோ தங் ருக்க²ங் மூலே சி²ந்தெ³ய்ய, மூலங் சி²ந்தி³த்வா பலிக²ணெய்ய 2, பலிக²ணித்வா மூலானி உத்³த⁴ரெய்ய அந்தமஸோ உஸீரனாளிமத்தானிபி. ஸோ தங் ருக்க²ங் க²ண்டா³க²ண்டி³கங் சி²ந்தெ³ய்ய, க²ண்டா³க²ண்டி³கங் சி²ந்தி³த்வா பா²லெய்ய, பா²லெத்வா ஸகலிகங் ஸகலிகங் கரெய்ய, ஸகலிகங் ஸகலிகங் கரித்வா வாதாதபே விஸோஸெய்ய; வாதாதபே விஸோஸெத்வா அக்³கி³னா ட³ஹெய்ய, அக்³கி³னா ட³ஹெத்வா மஸிங் கரெய்ய, மஸிங் கரித்வா மஹாவாதே வா ஓபு²ணெய்ய 3 நதி³யா வா ஸீக⁴ஸோதாய பவாஹெய்ய. ஏவஞ்ஹி ஸோ, பி⁴க்க²வே, மஹாருக்கோ² உச்சி²ன்னமூலோ அஸ்ஸ தாலாவத்து²கதோ அனபா⁴வங்கதோ 4 ஆயதிங் அனுப்பாத³த⁴ம்மோ. ஏவமேவ கோ², பி⁴க்க²வே, உபாதா³னியேஸு த⁴ம்மேஸு ஆதீ³னவானுபஸ்ஸினோ விஹரதோ தண்ஹா நிருஜ்ஜ²தி. தண்ஹானிரோதா⁴ உபாதா³னநிரோதோ⁴; உபாதா³னநிரோதா⁴ ப⁴வனிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. பஞ்சமங்.
‘‘Seyyathāpi, bhikkhave, mahārukkho. Atha puriso āgaccheyya kuddālapiṭakaṃ 5 ādāya. So taṃ rukkhaṃ mūle chindeyya, mūlaṃ chinditvā palikhaṇeyya 6, palikhaṇitvā mūlāni uddhareyya antamaso usīranāḷimattānipi. So taṃ rukkhaṃ khaṇḍākhaṇḍikaṃ chindeyya, khaṇḍākhaṇḍikaṃ chinditvā phāleyya, phāletvā sakalikaṃ sakalikaṃ kareyya, sakalikaṃ sakalikaṃ karitvā vātātape visoseyya; vātātape visosetvā agginā ḍaheyya, agginā ḍahetvā masiṃ kareyya, masiṃ karitvā mahāvāte vā ophuṇeyya 7 nadiyā vā sīghasotāya pavāheyya. Evañhi so, bhikkhave, mahārukkho ucchinnamūlo assa tālāvatthukato anabhāvaṃkato 8 āyatiṃ anuppādadhammo. Evameva kho, bhikkhave, upādāniyesu dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho…pe… evametassa kevalassa dukkhakkhandhassa nirodho hotī’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. மஹாருக்க²ஸுத்தவண்ணனா • 5. Mahārukkhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5-6. மஹாருக்க²ஸுத்தத்³வயவண்ணனா • 5-6. Mahārukkhasuttadvayavaṇṇanā
