| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. মহারুক্খসুত্তং
5. Mahārukkhasuttaṃ
৫৫. সাৰত্থিযং ৰিহরতি…পে॰… ‘‘উপাদানিযেসু, ভিক্খৰে, ধম্মেসু অস্সাদানুপস্সিনো ৰিহরতো তণ্হা পৰড্ঢতি। তণ্হাপচ্চযা উপাদানং; উপাদানপচ্চযা ভৰো…পে॰… এৰমেতস্স কেৰলস্স দুক্খক্খন্ধস্স সমুদযো হোতি’’।
55. Sāvatthiyaṃ viharati…pe… ‘‘upādāniyesu, bhikkhave, dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo…pe… evametassa kevalassa dukkhakkhandhassa samudayo hoti’’.
‘‘সেয্যথাপি, ভিক্খৰে, মহারুক্খো। তস্স যানি চেৰ মূলানি অধোগমানি, যানি চ তিরিযঙ্গমানি, সব্বানি তানি উদ্ধং ওজং অভিহরন্তি। এৰঞ্হি সো, ভিক্খৰে, মহারুক্খো তদাহারো তদুপাদানো চিরং দীঘমদ্ধানং তিট্ঠেয্য। এৰমেৰ খো, ভিক্খৰে, উপাদানিযেসু ধম্মেসু অস্সাদানুপস্সিনো ৰিহরতো তণ্হা পৰড্ঢতি। তণ্হাপচ্চযা উপাদানং…পে॰… এৰমেতস্স কেৰলস্স দুক্খক্খন্ধস্স সমুদযো হোতি।
‘‘Seyyathāpi, bhikkhave, mahārukkho. Tassa yāni ceva mūlāni adhogamāni, yāni ca tiriyaṅgamāni, sabbāni tāni uddhaṃ ojaṃ abhiharanti. Evañhi so, bhikkhave, mahārukkho tadāhāro tadupādāno ciraṃ dīghamaddhānaṃ tiṭṭheyya. Evameva kho, bhikkhave, upādāniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ…pe… evametassa kevalassa dukkhakkhandhassa samudayo hoti.
‘‘উপাদানিযেসু , ভিক্খৰে, ধম্মেসু আদীনৰানুপস্সিনো ৰিহরতো তণ্হা নিরুজ্ঝতি। তণ্হানিরোধা উপাদাননিরোধো; উপাদাননিরোধা ভৰনিরোধো…পে॰… এৰমেতস্স কেৰলস্স দুক্খক্খন্ধস্স নিরোধো হোতি।
‘‘Upādāniyesu , bhikkhave, dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho…pe… evametassa kevalassa dukkhakkhandhassa nirodho hoti.
‘‘সেয্যথাপি, ভিক্খৰে, মহারুক্খো। অথ পুরিসো আগচ্ছেয্য কুদ্দালপিটকং 1 আদায। সো তং রুক্খং মূলে ছিন্দেয্য, মূলং ছিন্দিত্ৰা পলিখণেয্য 2, পলিখণিত্ৰা মূলানি উদ্ধরেয্য অন্তমসো উসীরনাল়িমত্তানিপি। সো তং রুক্খং খণ্ডাখণ্ডিকং ছিন্দেয্য, খণ্ডাখণ্ডিকং ছিন্দিত্ৰা ফালেয্য, ফালেত্ৰা সকলিকং সকলিকং করেয্য, সকলিকং সকলিকং করিত্ৰা ৰাতাতপে ৰিসোসেয্য; ৰাতাতপে ৰিসোসেত্ৰা অগ্গিনা ডহেয্য, অগ্গিনা ডহেত্ৰা মসিং করেয্য, মসিং করিত্ৰা মহাৰাতে ৰা ওফুণেয্য 3 নদিযা ৰা সীঘসোতায পৰাহেয্য। এৰঞ্হি সো, ভিক্খৰে, মহারুক্খো উচ্ছিন্নমূলো অস্স তালাৰত্থুকতো অনভাৰংকতো 4 আযতিং অনুপ্পাদধম্মো। এৰমেৰ খো, ভিক্খৰে, উপাদানিযেসু ধম্মেসু আদীনৰানুপস্সিনো ৰিহরতো তণ্হা নিরুজ্ঝতি। তণ্হানিরোধা উপাদাননিরোধো; উপাদাননিরোধা ভৰনিরোধো…পে॰… এৰমেতস্স কেৰলস্স দুক্খক্খন্ধস্স নিরোধো হোতী’’তি। পঞ্চমং।
‘‘Seyyathāpi, bhikkhave, mahārukkho. Atha puriso āgaccheyya kuddālapiṭakaṃ 5 ādāya. So taṃ rukkhaṃ mūle chindeyya, mūlaṃ chinditvā palikhaṇeyya 6, palikhaṇitvā mūlāni uddhareyya antamaso usīranāḷimattānipi. So taṃ rukkhaṃ khaṇḍākhaṇḍikaṃ chindeyya, khaṇḍākhaṇḍikaṃ chinditvā phāleyya, phāletvā sakalikaṃ sakalikaṃ kareyya, sakalikaṃ sakalikaṃ karitvā vātātape visoseyya; vātātape visosetvā agginā ḍaheyya, agginā ḍahetvā masiṃ kareyya, masiṃ karitvā mahāvāte vā ophuṇeyya 7 nadiyā vā sīghasotāya pavāheyya. Evañhi so, bhikkhave, mahārukkho ucchinnamūlo assa tālāvatthukato anabhāvaṃkato 8 āyatiṃ anuppādadhammo. Evameva kho, bhikkhave, upādāniyesu dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho…pe… evametassa kevalassa dukkhakkhandhassa nirodho hotī’’ti. Pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. মহারুক্খসুত্তৰণ্ণনা • 5. Mahārukkhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫-৬. মহারুক্খসুত্তদ্ৰযৰণ্ণনা • 5-6. Mahārukkhasuttadvayavaṇṇanā
