| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. மஹாருக்க²ஸுத்தவண்ணனா
5. Mahārukkhasuttavaṇṇanā
55. பஞ்சமே உத்³த⁴ங் ஓஜங் அபி⁴ஹரந்தீதி பத²வீரஸஞ்ச ஆபோரஸஞ்ச உபரி ஆரோபெந்தி. ஓஜாய ஆரோபிதத்தா ஹத்த²ஸதுப்³பே³த⁴ஸ்ஸ ருக்க²ஸ்ஸ அங்குரக்³கே³ஸு பி³ந்து³பி³ந்தூ³னி விய ஹுத்வா ஸினேஹோ திட்ட²தி. இத³ங் பனெத்த² ஓபம்மஸங்ஸந்த³னங் – மஹாருக்கோ² விய ஹி தேபூ⁴மகவட்டங், மூலானி விய ஆயதனானி, மூலேஹி ஓஜாய ஆரோஹனங் விய ச²ஹி த்³வாரேஹி கம்மாரோஹனங், ஓஜாய அபி⁴ருள்ஹத்தா மஹாருக்க²ஸ்ஸ யாவகப்பட்டா²னங் விய வட்டனிஸ்ஸிதபா³லபுது²ஜ்ஜனஸ்ஸ ச²ஹி த்³வாரேஹி கம்மங் ஆயூஹந்தஸ்ஸ அபராபரங் வட்டஸ்ஸ வட்³ட⁴னவஸேன தீ³க⁴ரத்தங் டா²னங்.
55. Pañcame uddhaṃ ojaṃ abhiharantīti pathavīrasañca āporasañca upari āropenti. Ojāya āropitattā hatthasatubbedhassa rukkhassa aṅkuraggesu bindubindūni viya hutvā sineho tiṭṭhati. Idaṃ panettha opammasaṃsandanaṃ – mahārukkho viya hi tebhūmakavaṭṭaṃ, mūlāni viya āyatanāni, mūlehi ojāya ārohanaṃ viya chahi dvārehi kammārohanaṃ, ojāya abhiruḷhattā mahārukkhassa yāvakappaṭṭhānaṃ viya vaṭṭanissitabālaputhujjanassa chahi dvārehi kammaṃ āyūhantassa aparāparaṃ vaṭṭassa vaḍḍhanavasena dīgharattaṃ ṭhānaṃ.
குத்³தா³லபிடகந்தி குத்³தா³லஞ்சேவ பச்சி²பா⁴ஜனஞ்ச. க²ண்டா³க²ண்டி³கங் சி²ந்தெ³ய்யாதி கு²த்³த³கமஹந்தானி க²ண்டா³க²ண்டா³னி கரொந்தோ சி²ந்தெ³ய்ய. இத³ங் பனெத்த² ஓபம்மஸங்ஸந்த³னங் – இதா⁴பி ஹி மஹாருக்கோ² விய தேபூ⁴மகவட்டங், ருக்க²ங் நாஸேதுகாமோ புரிஸோ விய யோகா³வசரோ, குத்³தா³லோ விய ஞாணங், பச்சி² விய ஸமாதி⁴, ருக்க²ச்சே²த³னப²ரஸு விய ஞாணங், ருக்க²ஸ்ஸ மூலே சி²ன்னகாலோ விய யோகி³னோ ஆசரியஸந்திகே கம்மட்டா²னங் க³ஹெத்வா மனஸிகரொந்தஸ்ஸ பஞ்ஞா, க²ண்டா³க²ண்டி³கங் சி²ந்த³னகாலோ விய ஸங்கே²பதோ சதுன்னங் மஹாபூ⁴தானங் மனஸிகாரோ, பா²லனங் விய த்³வேசத்தாலீஸாய கொட்டா²ஸேஸு வித்தா²ரமனஸிகாரோ, ஸகலிகங் ஸகலிகங் கரணகாலோ விய உபாதா³ரூபஸ்ஸ சேவ ரூபக்க²ந்தா⁴ரம்மணஸ்ஸ விஞ்ஞாணஸ்ஸ சாதி இமேஸங் வஸேன நாமரூபபரிக்³க³ஹோ, மூலானங் உபச்சே²த³னங் விய தஸ்ஸேவ நாமரூபஸ்ஸ பச்சயபரியேஸனங், வாதாதபே விஸோஸெத்வா அக்³கி³னா ட³ஹனகாலோ விய அனுபுப்³பே³ன விபஸ்ஸனங் வட்³டெ⁴த்வா அஞ்ஞதரங் ஸப்பாயங் லபி⁴த்வா கம்மட்டா²னே விபூ⁴தே உபட்ட²ஹமானே ஏகபல்லங்கே நிஸின்னஸ்ஸ ஸமணத⁴ம்மங் கரொந்தஸ்ஸ அக்³க³ப²லப்பத்தி, மஸிகரணங் விய அரஹத்தப்பத்ததி³வஸேயேவ அபரினிப்³பா³யந்தஸ்ஸ யாவதாயுகங் டி²த காலோ, மஹாவாதே ஓபுனநங் நதி³யா பவாஹனங் விய ச உபாதி³ண்ணகக்க²ந்த⁴பே⁴தே³ன அனுபாதி³ஸேஸாய நிப்³பா³னதா⁴துயா பரினிப்³பு³தஸ்ஸ வட்டவூபஸமோ வேதி³தப்³போ³. பஞ்சமங்.
Kuddālapiṭakanti kuddālañceva pacchibhājanañca. Khaṇḍākhaṇḍikaṃ chindeyyāti khuddakamahantāni khaṇḍākhaṇḍāni karonto chindeyya. Idaṃ panettha opammasaṃsandanaṃ – idhāpi hi mahārukkho viya tebhūmakavaṭṭaṃ, rukkhaṃ nāsetukāmo puriso viya yogāvacaro, kuddālo viya ñāṇaṃ, pacchi viya samādhi, rukkhacchedanapharasu viya ñāṇaṃ, rukkhassa mūle chinnakālo viya yogino ācariyasantike kammaṭṭhānaṃ gahetvā manasikarontassa paññā, khaṇḍākhaṇḍikaṃ chindanakālo viya saṅkhepato catunnaṃ mahābhūtānaṃ manasikāro, phālanaṃ viya dvecattālīsāya koṭṭhāsesu vitthāramanasikāro, sakalikaṃ sakalikaṃ karaṇakālo viya upādārūpassa ceva rūpakkhandhārammaṇassa viññāṇassa cāti imesaṃ vasena nāmarūpapariggaho, mūlānaṃ upacchedanaṃ viya tasseva nāmarūpassa paccayapariyesanaṃ, vātātape visosetvā agginā ḍahanakālo viya anupubbena vipassanaṃ vaḍḍhetvā aññataraṃ sappāyaṃ labhitvā kammaṭṭhāne vibhūte upaṭṭhahamāne ekapallaṅke nisinnassa samaṇadhammaṃ karontassa aggaphalappatti, masikaraṇaṃ viya arahattappattadivaseyeva aparinibbāyantassa yāvatāyukaṃ ṭhita kālo, mahāvāte opunanaṃ nadiyā pavāhanaṃ viya ca upādiṇṇakakkhandhabhedena anupādisesāya nibbānadhātuyā parinibbutassa vaṭṭavūpasamo veditabbo. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. மஹாருக்க²ஸுத்தங் • 5. Mahārukkhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5-6. மஹாருக்க²ஸுத்தத்³வயவண்ணனா • 5-6. Mahārukkhasuttadvayavaṇṇanā
