| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೫. ಮಹಾರುಕ್ಖಸುತ್ತವಣ್ಣನಾ
5. Mahārukkhasuttavaṇṇanā
೫೫. ಪಞ್ಚಮೇ ಉದ್ಧಂ ಓಜಂ ಅಭಿಹರನ್ತೀತಿ ಪಥವೀರಸಞ್ಚ ಆಪೋರಸಞ್ಚ ಉಪರಿ ಆರೋಪೇನ್ತಿ। ಓಜಾಯ ಆರೋಪಿತತ್ತಾ ಹತ್ಥಸತುಬ್ಬೇಧಸ್ಸ ರುಕ್ಖಸ್ಸ ಅಙ್ಕುರಗ್ಗೇಸು ಬಿನ್ದುಬಿನ್ದೂನಿ ವಿಯ ಹುತ್ವಾ ಸಿನೇಹೋ ತಿಟ್ಠತಿ। ಇದಂ ಪನೇತ್ಥ ಓಪಮ್ಮಸಂಸನ್ದನಂ – ಮಹಾರುಕ್ಖೋ ವಿಯ ಹಿ ತೇಭೂಮಕವಟ್ಟಂ, ಮೂಲಾನಿ ವಿಯ ಆಯತನಾನಿ, ಮೂಲೇಹಿ ಓಜಾಯ ಆರೋಹನಂ ವಿಯ ಛಹಿ ದ್ವಾರೇಹಿ ಕಮ್ಮಾರೋಹನಂ, ಓಜಾಯ ಅಭಿರುಳ್ಹತ್ತಾ ಮಹಾರುಕ್ಖಸ್ಸ ಯಾವಕಪ್ಪಟ್ಠಾನಂ ವಿಯ ವಟ್ಟನಿಸ್ಸಿತಬಾಲಪುಥುಜ್ಜನಸ್ಸ ಛಹಿ ದ್ವಾರೇಹಿ ಕಮ್ಮಂ ಆಯೂಹನ್ತಸ್ಸ ಅಪರಾಪರಂ ವಟ್ಟಸ್ಸ ವಡ್ಢನವಸೇನ ದೀಘರತ್ತಂ ಠಾನಂ।
55. Pañcame uddhaṃ ojaṃ abhiharantīti pathavīrasañca āporasañca upari āropenti. Ojāya āropitattā hatthasatubbedhassa rukkhassa aṅkuraggesu bindubindūni viya hutvā sineho tiṭṭhati. Idaṃ panettha opammasaṃsandanaṃ – mahārukkho viya hi tebhūmakavaṭṭaṃ, mūlāni viya āyatanāni, mūlehi ojāya ārohanaṃ viya chahi dvārehi kammārohanaṃ, ojāya abhiruḷhattā mahārukkhassa yāvakappaṭṭhānaṃ viya vaṭṭanissitabālaputhujjanassa chahi dvārehi kammaṃ āyūhantassa aparāparaṃ vaṭṭassa vaḍḍhanavasena dīgharattaṃ ṭhānaṃ.
ಕುದ್ದಾಲಪಿಟಕನ್ತಿ ಕುದ್ದಾಲಞ್ಚೇವ ಪಚ್ಛಿಭಾಜನಞ್ಚ। ಖಣ್ಡಾಖಣ್ಡಿಕಂ ಛಿನ್ದೇಯ್ಯಾತಿ ಖುದ್ದಕಮಹನ್ತಾನಿ ಖಣ್ಡಾಖಣ್ಡಾನಿ ಕರೋನ್ತೋ ಛಿನ್ದೇಯ್ಯ। ಇದಂ ಪನೇತ್ಥ ಓಪಮ್ಮಸಂಸನ್ದನಂ – ಇಧಾಪಿ ಹಿ ಮಹಾರುಕ್ಖೋ ವಿಯ ತೇಭೂಮಕವಟ್ಟಂ, ರುಕ್ಖಂ ನಾಸೇತುಕಾಮೋ ಪುರಿಸೋ ವಿಯ ಯೋಗಾವಚರೋ, ಕುದ್ದಾಲೋ ವಿಯ ಞಾಣಂ, ಪಚ್ಛಿ ವಿಯ ಸಮಾಧಿ, ರುಕ್ಖಚ್ಛೇದನಫರಸು ವಿಯ ಞಾಣಂ, ರುಕ್ಖಸ್ಸ ಮೂಲೇ ಛಿನ್ನಕಾಲೋ ವಿಯ ಯೋಗಿನೋ ಆಚರಿಯಸನ್ತಿಕೇ ಕಮ್ಮಟ್ಠಾನಂ ಗಹೇತ್ವಾ ಮನಸಿಕರೋನ್ತಸ್ಸ ಪಞ್ಞಾ, ಖಣ್ಡಾಖಣ್ಡಿಕಂ ಛಿನ್ದನಕಾಲೋ ವಿಯ ಸಙ್ಖೇಪತೋ ಚತುನ್ನಂ ಮಹಾಭೂತಾನಂ ಮನಸಿಕಾರೋ, ಫಾಲನಂ ವಿಯ ದ್ವೇಚತ್ತಾಲೀಸಾಯ ಕೋಟ್ಠಾಸೇಸು ವಿತ್ಥಾರಮನಸಿಕಾರೋ, ಸಕಲಿಕಂ ಸಕಲಿಕಂ ಕರಣಕಾಲೋ ವಿಯ ಉಪಾದಾರೂಪಸ್ಸ ಚೇವ ರೂಪಕ್ಖನ್ಧಾರಮ್ಮಣಸ್ಸ ವಿಞ್ಞಾಣಸ್ಸ ಚಾತಿ ಇಮೇಸಂ ವಸೇನ ನಾಮರೂಪಪರಿಗ್ಗಹೋ, ಮೂಲಾನಂ ಉಪಚ್ಛೇದನಂ ವಿಯ ತಸ್ಸೇವ ನಾಮರೂಪಸ್ಸ ಪಚ್ಚಯಪರಿಯೇಸನಂ, ವಾತಾತಪೇ ವಿಸೋಸೇತ್ವಾ ಅಗ್ಗಿನಾ ಡಹನಕಾಲೋ ವಿಯ ಅನುಪುಬ್ಬೇನ ವಿಪಸ್ಸನಂ ವಡ್ಢೇತ್ವಾ ಅಞ್ಞತರಂ ಸಪ್ಪಾಯಂ ಲಭಿತ್ವಾ ಕಮ್ಮಟ್ಠಾನೇ ವಿಭೂತೇ ಉಪಟ್ಠಹಮಾನೇ ಏಕಪಲ್ಲಙ್ಕೇ ನಿಸಿನ್ನಸ್ಸ ಸಮಣಧಮ್ಮಂ ಕರೋನ್ತಸ್ಸ ಅಗ್ಗಫಲಪ್ಪತ್ತಿ, ಮಸಿಕರಣಂ ವಿಯ ಅರಹತ್ತಪ್ಪತ್ತದಿವಸೇಯೇವ ಅಪರಿನಿಬ್ಬಾಯನ್ತಸ್ಸ ಯಾವತಾಯುಕಂ ಠಿತ ಕಾಲೋ, ಮಹಾವಾತೇ ಓಪುನನಂ ನದಿಯಾ ಪವಾಹನಂ ವಿಯ ಚ ಉಪಾದಿಣ್ಣಕಕ್ಖನ್ಧಭೇದೇನ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬುತಸ್ಸ ವಟ್ಟವೂಪಸಮೋ ವೇದಿತಬ್ಬೋ। ಪಞ್ಚಮಂ।
Kuddālapiṭakanti kuddālañceva pacchibhājanañca. Khaṇḍākhaṇḍikaṃ chindeyyāti khuddakamahantāni khaṇḍākhaṇḍāni karonto chindeyya. Idaṃ panettha opammasaṃsandanaṃ – idhāpi hi mahārukkho viya tebhūmakavaṭṭaṃ, rukkhaṃ nāsetukāmo puriso viya yogāvacaro, kuddālo viya ñāṇaṃ, pacchi viya samādhi, rukkhacchedanapharasu viya ñāṇaṃ, rukkhassa mūle chinnakālo viya yogino ācariyasantike kammaṭṭhānaṃ gahetvā manasikarontassa paññā, khaṇḍākhaṇḍikaṃ chindanakālo viya saṅkhepato catunnaṃ mahābhūtānaṃ manasikāro, phālanaṃ viya dvecattālīsāya koṭṭhāsesu vitthāramanasikāro, sakalikaṃ sakalikaṃ karaṇakālo viya upādārūpassa ceva rūpakkhandhārammaṇassa viññāṇassa cāti imesaṃ vasena nāmarūpapariggaho, mūlānaṃ upacchedanaṃ viya tasseva nāmarūpassa paccayapariyesanaṃ, vātātape visosetvā agginā ḍahanakālo viya anupubbena vipassanaṃ vaḍḍhetvā aññataraṃ sappāyaṃ labhitvā kammaṭṭhāne vibhūte upaṭṭhahamāne ekapallaṅke nisinnassa samaṇadhammaṃ karontassa aggaphalappatti, masikaraṇaṃ viya arahattappattadivaseyeva aparinibbāyantassa yāvatāyukaṃ ṭhita kālo, mahāvāte opunanaṃ nadiyā pavāhanaṃ viya ca upādiṇṇakakkhandhabhedena anupādisesāya nibbānadhātuyā parinibbutassa vaṭṭavūpasamo veditabbo. Pañcamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೫. ಮಹಾರುಕ್ಖಸುತ್ತಂ • 5. Mahārukkhasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೫-೬. ಮಹಾರುಕ್ಖಸುತ್ತದ್ವಯವಣ್ಣನಾ • 5-6. Mahārukkhasuttadvayavaṇṇanā
