| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
6. махаасажжагасуд̇д̇аван̣н̣анаа
6. Mahāsaccakasuttavaṇṇanā
364. згам̣ самаяам̣ бхаг̇аваа взсаалияам̣ вихарад̇ийд̇и иминаа д̇ад̣̇аа бхаг̇авад̇о взсаалияам̣ ниваасабарижчинно буб̣б̣ан̣хаад̣̇ибхзд̣̇о саб̣б̣о самаяо саад̇хааран̣ад̇о г̇ахид̇о, д̇ат̇аа д̇зна ко бана самаязнаад̇и жа иминаа. буб̣б̣ан̣хасамаяанд̇и бана иминаа д̇аб̣б̣исзсо, яо бхигкаажаарад̇т̇ааяа бажжавзгкан̣агаало. адтагат̇ааяам̣ бана ‘‘д̇ийхи бад̣̇зхи згова самаяо вуд̇д̇о’’д̇и вуд̇д̇ам̣ висзсасса сааман̃н̃анд̇ог̇ад̇хад̇д̇аа. мукад̇хованасса буб̣б̣агаалагирияаабхаавасааман̃н̃ад̇о вуд̇д̇ам̣ ‘‘мукам̣ д̇ховид̇ваа’’д̇и. мукам̣ д̇ховид̇ваа зва хи ваасад̇хуро жз, взлам̣ саллагкзд̇ваа яат̇аажин̣н̣ам̣ бхааванаануяог̇ам̣, г̇ант̇ад̇хуро жз, г̇ант̇абарижаяз гад̇ибаяз нисаж̇ж̇аваарз ануяун̃ж̇ид̇ваа бад̇д̇ажийварам̣ аад̣̇ааяа вид̇аггамаал̣ам̣ убаг̇ажчад̇и.
364.Ekaṃsamayaṃ bhagavā vesāliyaṃ viharatīti iminā tadā bhagavato vesāliyaṃ nivāsaparicchinno pubbaṇhādibhedo sabbo samayo sādhāraṇato gahito, tathā tena kho pana samayenāti ca iminā. Pubbaṇhasamayanti pana iminā tabbiseso, yo bhikkhācāratthāya paccavekkhaṇakālo. Aṭṭhakathāyaṃ pana ‘‘tīhi padehi ekova samayo vutto’’ti vuttaṃ visesassa sāmaññantogadhattā. Mukhadhovanassa pubbakālakiriyābhāvasāmaññato vuttaṃ ‘‘mukhaṃ dhovitvā’’ti. Mukhaṃ dhovitvā eva hi vāsadhuro ce, velaṃ sallakkhetvā yathāciṇṇaṃ bhāvanānuyogaṃ, ganthadhuro ce, ganthaparicaye katipaye nisajjavāre anuyuñjitvā pattacīvaraṃ ādāya vitakkamāḷaṃ upagacchati.
гааран̣ам̣ яуд̇д̇ам̣, анужчавиганд̇и ад̇т̇о. буб̣б̣з яат̇аажинд̇ид̇ам̣ бан̃хам̣ абужчид̇ваа ан̃н̃ам̣ бужчанд̇о маг̇г̇ам̣ табзд̇ваа уммаг̇г̇ад̇о баривад̇д̇знд̇о вияа ход̇ийд̇и ааха ‘‘бассзна д̇аава барихаранд̇о’’д̇и.
Kāraṇaṃ yuttaṃ, anucchavikanti attho. Pubbe yathācintitaṃ pañhaṃ apucchitvā aññaṃ pucchanto maggaṃ ṭhapetvā ummaggato parivattento viya hotīti āha ‘‘passena tāva pariharanto’’ti.
365. ууругкамбхоби наама бхависсад̇ийд̇и зд̇т̇а наама-сад̣̇д̣̇о вимхаяад̇т̇од̇и гад̇ваа вуд̇д̇ам̣ ‘‘вимхаяад̇т̇авасзнаа’’д̇иаад̣̇и. ‘‘анд̇хо наама баб̣б̣ад̇ам̣ абхирухиссад̇ий’’д̇иаад̣̇ийсу вияа вимхаяаваажийсад̣̇д̣̇аяог̇зна хи ‘‘бхависсад̇ий’’д̇и анааг̇ад̇аважанам̣. гааяанваяанд̇и гааяаануг̇ад̇ам̣. ‘‘аяамби ко гааяо звам̣д̇хаммо звам̣бхаавий звам̣анад̇ийд̇о’’д̇иаад̣̇инаа (д̣̇ий. ни. 2.379; ма. ни. 1.112; ма. ни. 3.154) гааяасса асубхаанижжаад̣̇ид̇ааяа анубассанаа гааяабхааванаад̇и ааха ‘‘гааяабхааванаад̇и бана вибассанаа вужжад̇ий’’д̇и. анааг̇ад̇аруубанд̇и абхийд̇з ад̇т̇з анааг̇ад̇асад̣̇д̣̇ааробанам̣ анааг̇ад̇аббаяог̇о на самзд̇и. ад̇т̇обийд̇и ‘‘ууругкамбхоби наама бхависсад̇ий’’д̇и вуд̇д̇аад̇т̇оби на самзд̇и. аяанд̇и ад̇д̇агиламат̇аануяог̇о. д̇зсанд̇и ниг̇ан̣таанам̣.
365.Ūrukkhambhopi nāma bhavissatīti ettha nāma-saddo vimhayatthoti katvā vuttaṃ ‘‘vimhayatthavasenā’’tiādi. ‘‘Andho nāma pabbataṃ abhiruhissatī’’tiādīsu viya vimhayavācīsaddayogena hi ‘‘bhavissatī’’ti anāgatavacanaṃ. Kāyanvayanti kāyānugataṃ. ‘‘Ayampi kho kāyo evaṃdhammo evaṃbhāvī evaṃanatīto’’tiādinā (dī. ni. 2.379; ma. ni. 1.112; ma. ni. 3.154) kāyassa asubhāniccāditāya anupassanā kāyabhāvanāti āha ‘‘kāyabhāvanāti pana vipassanā vuccatī’’ti. Anāgatarūpanti abhīte atthe anāgatasaddāropanaṃ anāgatappayogo na sameti. Atthopīti ‘‘ūrukkhambhopi nāma bhavissatī’’ti vuttaatthopi na sameti. Ayanti attakilamathānuyogo. Tesanti nigaṇṭhānaṃ.
366. ад̇д̇ано ад̇хиббзд̇агааяабхааванам̣ вид̇т̇аарзнд̇о вид̇т̇аарад̇о д̣̇ассзнд̇о яз д̇ам̣ ануяуд̇д̇аа, д̇з наамаг̇од̇д̇ад̇о вибхаавзнд̇о ‘‘нанд̣̇о важчо’’д̇иаад̣̇имааха. гилидтад̇абаананд̇и гааяасса гилзсанад̇абаанам̣ буг̇г̇алаанам̣. ж̇аад̇амзд̣̇анд̇и мзд̣̇абхааваабад̇д̇ивасзна уббаннамзд̣̇ам̣. буримам̣ бахааяаад̇и гаалабарижчзд̣̇зна анаахаарааббаахаарад̇аад̣̇ивасзна гааяасса абажинанам̣ кзд̣̇анам̣ барижжаж̇ид̇ваа. гааяабхааванаа бана на бан̃н̃ааяад̇ийд̇и нияамам̣ барамад̇т̇ад̇о гааяабхааванааби д̇ава н̃аан̣зна на н̃ааяад̇и, сзсад̇оби на д̣̇иссад̇и.
366. Attano adhippetakāyabhāvanaṃ vitthārento vitthārato dassento ye taṃ anuyuttā, te nāmagottato vibhāvento ‘‘nando vaccho’’tiādimāha. Kiliṭṭhatapānanti kāyassa kilesanatapānaṃ puggalānaṃ. Jātamedanti medabhāvāpattivasena uppannamedaṃ. Purimaṃ pahāyāti kālaparicchedena anāhāraappāhāratādivasena kāyassa apacinanaṃ khedanaṃ pariccajitvā. Kāyabhāvanāpana na paññāyatīti niyamaṃ paramatthato kāyabhāvanāpi tava ñāṇena na ñāyati, sesatopi na dissati.
367. имасмим̣ бана таанзд̇и ‘‘гааяабхааванамби ко д̇вам̣, аг̇г̇ивзссана, на ан̃н̃ааси, гуд̇о бана д̇вам̣ жид̇д̇абхааванам̣ ж̇ааниссасий’’д̇и имасмим̣ таанз. д̇ат̇аа ‘‘яо д̇вам̣ звам̣ ол̣ааригам̣ д̣̇уб̣б̣алам̣ гааяабхааванам̣ на ж̇аанааси, со д̇вам̣ гуд̇о санд̇асукумам̣ жид̇д̇абхааванам̣ ж̇ааниссасий’’д̇и зд̇асмим̣ ад̇т̇аван̣н̣анаатаанз. аб̣уд̣̇д̇хаважанам̣ наамзд̇ам̣ бад̣̇анд̇и гааяабхааванаасан̃н̃ид̇авибассанаад̇о жид̇д̇абхааванаа санд̇аа, вибассанаа бана баад̣̇агаж̇жхаанад̇о ол̣ааригаа жзва д̣̇уб̣б̣алаа жаад̇и аяан̃жа зд̇асса бад̣̇асса ад̇т̇о. ‘‘аб̣уд̣̇д̇хаважанам̣ наамзд̇ам̣ важанам̣ сияаа’’д̇и вад̇ваа т̇зро баггамид̇ум̣ аарабхад̇и. ат̇а нам̣ махаасийвад̇т̇зро ‘‘вибассанаа наамзсаа на аад̣̇ид̇о суб̣руухид̇аа б̣алавад̇ий д̇игкаа висад̣̇аа ход̇и, д̇асмаа д̇арун̣авасзнааяамад̇т̇о взд̣̇ид̇аб̣б̣о’’д̇и д̣̇ассзнд̇о ‘‘д̣̇иссад̇и, бхигкавз’’д̇и суд̇д̇абад̣̇ам̣ (сам̣. ни. 2.62) аахари. д̇ад̇т̇а аад̣̇аананд̇и бадисанд̇хи. нигкзбананд̇и жуд̇и. ол̣аариганд̇и аруубад̇хаммзхи д̣̇удтуллабхаавад̇д̇аа ол̣ааригам̣. гааяанд̇и жад̇усанд̇ад̇ируубасамуухабхууд̇ам̣ гааяам̣. ол̣аариганд̇и бхааванабум̣саганид̣̇д̣̇зсо, ол̣ааригаагаарзнаад̇и ад̇т̇о. д̇знзва вуд̇д̇ам̣ ‘‘аад̣̇аанамби нигкзбанамбий’’д̇и.
367.Imasmiṃ pana ṭhāneti ‘‘kāyabhāvanampi kho tvaṃ, aggivessana, na aññāsi, kuto pana tvaṃ cittabhāvanaṃ jānissasī’’ti imasmiṃ ṭhāne. Tathā ‘‘yo tvaṃ evaṃ oḷārikaṃ dubbalaṃ kāyabhāvanaṃ na jānāsi, so tvaṃ kuto santasukhumaṃ cittabhāvanaṃ jānissasī’’ti etasmiṃ atthavaṇṇanāṭhāne. Abuddhavacanaṃ nāmetaṃ padanti kāyabhāvanāsaññitavipassanāto cittabhāvanā santā, vipassanā pana pādakajjhānato oḷārikā ceva dubbalā cāti ayañca etassa padassa attho. ‘‘Abuddhavacanaṃ nāmetaṃ vacanaṃ siyā’’ti vatvā thero pakkamituṃ ārabhati. Atha naṃ mahāsīvatthero ‘‘vipassanā nāmesā na ādito subrūhitā balavatī tikkhā visadā hoti, tasmā taruṇavasenāyamattho veditabbo’’ti dassento ‘‘dissati, bhikkhave’’ti suttapadaṃ (saṃ. ni. 2.62) āhari. Tattha ādānanti paṭisandhi. Nikkhepananti cuti. Oḷārikanti arūpadhammehi duṭṭhullabhāvattā oḷārikaṃ. Kāyanti catusantatirūpasamūhabhūtaṃ kāyaṃ. Oḷārikanti bhāvanapuṃsakaniddeso, oḷārikākārenāti attho. Teneva vuttaṃ ‘‘ādānampi nikkhepanampī’’ti.
368. сукасаарааг̇зна саманнааг̇ад̇од̇и сукавзд̣̇анааяа б̣алавад̇арарааг̇зна саман̇г̇ийбхууд̇о. бадтаанз бадисид̣̇д̇хаа аважанзнзва. д̇асмаад̇и сукз тид̇з зва д̣̇угкассаануббаж̇ж̇анад̇о. звам̣ вуд̇д̇анд̇и ‘‘сукааяа взд̣̇анааяа нирод̇хаа уббаж̇ж̇ад̇и д̣̇угкаа взд̣̇анаа’’д̇и звам̣ вуд̇д̇ам̣, на ананд̇араава уббаж̇ж̇анад̇о. кзбзд̇ваад̇и гусалаани кзбзд̇ваа. г̇ан̣хид̇ваа ад̇д̇ано зва огаасам̣ г̇ахзд̇ваа. убхад̇обагкам̣ худ̇ваад̇и ‘‘гад̣̇аажи сукавзд̣̇анаа, гад̣̇аажи д̣̇угкавзд̣̇анаа’’д̇и багкад̣̇ваяавасзнаби взд̣̇анаа жид̇д̇асса барияаад̣̇ааяа ход̇и яат̇ааггамам̣ абхаавид̇агааяасса абхаавид̇ажид̇д̇асса.
368.Sukhasārāgena samannāgatoti sukhavedanāya balavatararāgena samaṅgībhūto. Paṭṭhāne paṭisiddhā avacaneneva. Tasmāti sukhe ṭhite eva dukkhassānuppajjanato. Evaṃ vuttanti ‘‘sukhāya vedanāya nirodhā uppajjati dukkhā vedanā’’ti evaṃ vuttaṃ, na anantarāva uppajjanato. Khepetvāti kusalāni khepetvā. Gaṇhitvā attano eva okāsaṃ gahetvā. Ubhatopakkhaṃ hutvāti ‘‘kadāci sukhavedanā, kadāci dukkhavedanā’’ti pakkhadvayavasenapi vedanā cittassa pariyādāya hoti yathākkamaṃ abhāvitakāyassa abhāvitacittassa.
369. вибассанаа жа сукасса бажжанийгаад̇и сугкавибассагассааад̣̇игаммигасса махаабхууд̇абариг̇г̇ахаад̣̇игаалз б̣ахи жид̇д̇ажаарам̣ нисзд̇хзд̇ваа гаммадтаанз зва сад̇им̣ сам̣харанд̇асса алад̣̇д̇хассаад̣̇ам̣ гааяасукам̣ на винд̣̇ад̇и, самб̣аад̇хз важ̇з саннируд̣̇д̇хо г̇ог̇ан̣о вияа вихан̃н̃ад̇и вибпанд̣̇ад̇и, ажжаасаннахзд̇уган̃жа сарийрз д̣̇угкам̣ уббаж̇ж̇ад̇зва. д̇зна вуд̇д̇ам̣ ‘‘д̣̇угкасса аасаннаа’’д̇и. д̇знааха ‘‘вибассанам̣ бадтабзд̇ваа’’д̇иаад̣̇и. ад̣̇д̇хаанз г̇ажчанд̇з г̇ажчанд̇зд̇и махаабхууд̇абариг̇г̇ахаад̣̇ивасзна гаалз г̇ажчанд̇з. д̇ад̇т̇а д̇ад̇т̇аад̇и д̇асмим̣ д̇асмим̣ сарийрабад̣̇зсз. д̣̇угкам̣ д̣̇уураабаг̇ад̇ам̣ ход̇и самаабад̇д̇иб̣алзна вигкамбхид̇ад̇д̇аа аббанаабхаавад̇о. анаббагам̣ вибулам̣. суканд̇и жхаанасукам̣ . оггамад̇ийд̇и жхаанасамудтаанабан̣ийд̇аруубавасзна руубагааяам̣ анубависад̇и, наамагааяоггаманз вад̇д̇аб̣б̣амзва над̇т̇и. гааяабассад̣̇д̇хигаммигассаби саммасанабхааванаа бадтабзд̇ваа нисиннасса гассажи аад̣̇ид̇ова гааяагиламат̇ажид̇д̇убагхаад̇ааби самбхаванд̇и, самаад̇хисса бана абажжанийгад̇д̇аа синид̣̇д̇хабхаавад̇о жа на сугкавибассанаа вияа сукасса вибажжанийго, ануггамзна жа д̣̇угкам̣ вигкамбхзд̇ийд̇и ааха ‘‘яат̇аа самаад̇хий’’д̇и. яат̇аа самаад̇хи, вибассанааяа банзд̇ам̣ над̇т̇ийд̇и ааха ‘‘на жа д̇ат̇аа вибассанаа’’д̇и. д̇зна вуд̇д̇анд̇и яасмаа вибассанаа сукасса бажжанийгаа, саа жа гааяабхааванаа, д̇зна вуд̇д̇ам̣ ‘‘уббаннааби сукаа взд̣̇анаа жид̇д̇ам̣ на барияаад̣̇ааяа д̇идтад̇и, бхаавид̇ад̇д̇аа гааяассаа’’д̇и. д̇ат̇аа яасмаа самаад̇хи д̣̇угкасса бажжанийго, со жа жид̇д̇абхааванаа, д̇зна вуд̇д̇ам̣ ‘‘уббаннааби д̣̇угкаа взд̣̇анаа жид̇д̇ам̣ на барияаад̣̇ааяа д̇идтад̇и, бхаавид̇ад̇д̇аа жид̇д̇ассаа’’д̇и яож̇анаа.
369.Vipassanā ca sukhassa paccanīkāti sukkhavipassakassaādikammikassa mahābhūtapariggahādikāle bahi cittacāraṃ nisedhetvā kammaṭṭhāne eva satiṃ saṃharantassa aladdhassādaṃ kāyasukhaṃ na vindati, sambādhe vaje sanniruddho gogaṇo viya vihaññati vipphandati, accāsannahetukañca sarīre dukkhaṃ uppajjateva. Tena vuttaṃ ‘‘dukkhassa āsannā’’ti. Tenāha ‘‘vipassanaṃ paṭṭhapetvā’’tiādi. Addhāne gacchante gacchanteti mahābhūtapariggahādivasena kāle gacchante. Tattha tatthāti tasmiṃ tasmiṃ sarīrapadese. Dukkhaṃ dūrāpagataṃ hoti samāpattibalena vikkhambhitattā appanābhāvato. Anappakaṃ vipulaṃ. Sukhanti jhānasukhaṃ . Okkamatīti jhānasamuṭṭhānapaṇītarūpavasena rūpakāyaṃ anupavisati, nāmakāyokkamane vattabbameva natthi. Kāyapassaddhikammikassapi sammasanabhāvanā paṭṭhapetvā nisinnassa kassaci āditova kāyakilamathacittupaghātāpi sambhavanti, samādhissa pana apaccanīkattā siniddhabhāvato ca na sukkhavipassanā viya sukhassa vipaccanīko, anukkamena ca dukkhaṃ vikkhambhetīti āha ‘‘yathā samādhī’’ti. Yathā samādhi, vipassanāya panetaṃ natthīti āha ‘‘na ca tathā vipassanā’’ti. Tena vuttanti yasmā vipassanā sukhassa paccanīkā, sā ca kāyabhāvanā, tena vuttaṃ ‘‘uppannāpi sukhā vedanā cittaṃ na pariyādāya tiṭṭhati, bhāvitattā kāyassā’’ti. Tathā yasmā samādhi dukkhassa paccanīko, so ca cittabhāvanā, tena vuttaṃ ‘‘uppannāpi dukkhā vedanā cittaṃ na pariyādāya tiṭṭhati, bhāvitattā cittassā’’ti yojanā.
370. г̇ун̣з гхаддзд̇ваад̇и абад̣̇зсзна винаа самийбамзва нзд̇ваа. д̇ам̣ вад̇а мама жид̇д̇ам̣ уббаннаа сукаа взд̣̇анаа барияаад̣̇ааяа тассад̇ийд̇и нзд̇ам̣ таанам̣ виж̇ж̇ад̇ийд̇и яож̇анаа.
370.Guṇe ghaṭṭetvāti apadesena vinā samīpameva netvā. Taṃ vata mama cittaṃ uppannā sukhā vedanā pariyādāya ṭhassatīti netaṃ ṭhānaṃ vijjatīti yojanā.
371. гим̣ на бхависсад̇и, сукааби д̣̇угкааби взд̣̇анаа яат̇аабажжаяам̣ уббаж̇ж̇ад̇зваад̇и ад̇т̇о. д̇амад̇т̇анд̇и сукад̣̇угкавзд̣̇анаанам̣ уббад̇д̇ияаа ад̇д̇ано жид̇д̇асса анабхибхаванийяад̇аасан̇каад̇ам̣ ад̇т̇ам̣. д̇ад̇т̇а д̇аава баасараасисуд̇д̇з б̣од̇хибаллан̇гз нисаж̇ж̇аа ‘‘д̇ад̇т̇зва нисийд̣̇и’’нд̇и вуд̇д̇аа. ид̇ха махаасажжагасуд̇д̇з д̣̇уггарагааригааяа д̣̇уггаражаран̣з нисаж̇ж̇аа ‘‘д̇ад̇т̇зва нисийд̣̇и’’нд̇и вуд̇д̇аа.
371.Kiṃ na bhavissati, sukhāpi dukkhāpi vedanā yathāpaccayaṃ uppajjatevāti attho. Tamatthanti sukhadukkhavedanānaṃ uppattiyā attano cittassa anabhibhavanīyatāsaṅkhātaṃ atthaṃ. Tattha tāva pāsarāsisutte bodhipallaṅke nisajjā ‘‘tattheva nisīdi’’nti vuttā. Idha mahāsaccakasutte dukkarakārikāya dukkaracaraṇe nisajjā ‘‘tattheva nisīdi’’nti vuttā.
374. чанд̣̇агаран̣авасзнаад̇и д̇ан̣хааяанавасзнаад̇и ад̇т̇о. синзхагаран̣авасзнаад̇и синзханавасзна. мужчаагаран̣авасзнаад̇и моханавасзна бамаад̣̇аабаад̣̇анзна. вибаасаагаран̣авасзнаад̇и баад̇угамяад̇аавасзна. ануд̣̇аханавасзнаад̇и рааг̇аг̇г̇инаа ануд̣̇аханавасзна. логуд̇д̇арамаг̇г̇авзважанамзва вадданиссаран̣асса ад̇хиббзд̇ад̇д̇аа.
374.Chandakaraṇavasenāti taṇhāyanavasenāti attho. Sinehakaraṇavasenāti sinehanavasena. Mucchākaraṇavasenāti mohanavasena pamādāpādanena. Vipāsākaraṇavasenāti pātukamyatāvasena. Anudahanavasenāti rāgagginā anudahanavasena. Lokuttaramaggavevacanameva vaṭṭanissaraṇassa adhippetattā.
аллаг̇г̇ахан̣зна гилзсаанам̣ асамужчиннабхаавам̣ д̣̇ассзд̇и, саснзхаг̇г̇ахан̣зна авигкамбхид̇абхаавам̣, уд̣̇агз багкид̇д̇абхааваг̇г̇ахан̣зна самуд̣̇аажаараавад̇т̇ам̣, уд̣̇умб̣арагадтаг̇г̇ахан̣зна ад̇д̇абхаавасса асаарагад̇д̇ам̣. иминаава наязнаад̇и ‘‘аллам̣ уд̣̇умб̣арагадта’’нд̇иаад̣̇инаа вуд̇д̇анаязна. сабуд̇д̇абхарияабаб̣б̣аж̇ж̇ааяаад̇и буд̇д̇абхариязхи сад̣̇д̇хим̣ гад̇абариб̣б̣ааж̇агабаб̣б̣аж̇ж̇аавасзна взд̣̇ид̇аб̣б̣аа. гудийжагаб̣ахууд̣̇агахам̣са-барамахам̣саад̣̇ибхзд̣̇аа б̣раахман̣абаб̣б̣аж̇ж̇аа.
Allaggahaṇena kilesānaṃ asamucchinnabhāvaṃ dasseti, sasnehaggahaṇena avikkhambhitabhāvaṃ, udake pakkhittabhāvaggahaṇena samudācārāvatthaṃ, udumbarakaṭṭhaggahaṇena attabhāvassa asārakattaṃ. Imināva nayenāti ‘‘allaṃ udumbarakaṭṭha’’ntiādinā vuttanayena. Saputtabhariyapabbajjāyāti puttabhariyehi saddhiṃ kataparibbājakapabbajjāvasena veditabbā. Kuṭīcakabahūdakahaṃsa-paramahaṃsādibhedā brāhmaṇapabbajjā.
376. гуд̇оби имасса аабосинзхо над̇т̇ийд̇и гол̣аабам̣. д̇знааха ‘‘чиннасинзхам̣ нирааба’’нд̇и. гол̣анд̇и ваа сугкагалин̇г̇арам̣ вужжад̇и, гол̣ам̣ гол̣абхаавам̣ аабаннанд̇и гол̣аабам̣. бадибаннасса убаггамамахад̇д̇аниссид̇ад̇аа багад̇ияаа гилзсзхи анабхибхууд̇ад̇ааяа. ад̇инд̇ад̇аа бадибагкабхааванааяа. д̇ат̇аа хи сугкагол̣аабабхааво, аарагаа уд̣̇агаа т̇алз нигкид̇д̇абхааво жа нид̣̇ассид̇о. обаггамигаахийд̇и гилзсаад̇иниг̇г̇ан̣ханубаггамаббабхаваахи. взд̣̇анаахийд̇и бадибад̇д̇ивзд̣̇анаахи. д̣̇угкаа бадибад̣̇аа хи ид̇хаад̇хиббзд̇аа.
376. Kutopi imassa āposineho natthīti koḷāpaṃ. Tenāha ‘‘chinnasinehaṃ nirāpa’’nti. Koḷanti vā sukkhakaliṅgaraṃ vuccati, koḷaṃ koḷabhāvaṃ āpannanti koḷāpaṃ. Paṭipannassa upakkamamahattanissitatā pakatiyā kilesehi anabhibhūtatāya. Atintatā paṭipakkhabhāvanāya. Tathā hi sukkhakoḷāpabhāvo, ārakā udakā thale nikkhittabhāvo ca nidassito. Opakkamikāhīti kilesaatiniggaṇhanupakkamappabhavāhi. Vedanāhīti paṭipattivedanāhi. Dukkhā paṭipadā hi idhādhippetā.
377. гим̣ бана на самад̇т̇о, яад̇о звам̣ барзхи жинд̇ид̇умби асаггун̣зяяам̣ д̣̇уггаражарияам̣ чаб̣б̣ассаани агаасийд̇и ад̇хиббааяо. гад̇вааби агад̇вааби самад̇т̇ова гааран̣асса нибпаннад̇д̇аа. ‘‘яат̇ааби саб̣б̣зсамби ко б̣од̇хисад̇д̇аанам̣ жаримабхавз анд̇амасо сад̇д̇аахамад̇д̇амби д̇хаммад̇аавасзна д̣̇уггаражарияаа ход̇иязва, звам̣ бхаг̇аваа самад̇т̇о д̣̇уггаражарияам̣ гаад̇ум̣, зван̃жа нам̣ агааси, на бана д̇ааяа б̣уд̣̇д̇хо ж̇аад̇о, ат̇а ко маж̇жхимааяа зва бадибад̇д̇ияаа’’д̇и д̇ассаа б̣яад̇ирзгамукзна сад̣̇звагасса логасса б̣од̇хааяа амаг̇г̇абхаавад̣̇ийбанад̇т̇ам̣, имасса бана бхаг̇авад̇о гаммавибаагавасзна чаб̣б̣ассаани д̣̇уггаражарияаа ахоси. вуд̇д̇ан̃хзд̇ам̣ –
377.Kiṃ pana na samattho, yato evaṃ parehi cintitumpi asakkuṇeyyaṃ dukkaracariyaṃ chabbassāni akāsīti adhippāyo. Katvāpi akatvāpi samatthova kāraṇassa nipphannattā. ‘‘Yathāpi sabbesampi kho bodhisattānaṃ carimabhave antamaso sattāhamattampi dhammatāvasena dukkaracariyā hotiyeva, evaṃ bhagavā samattho dukkaracariyaṃ kātuṃ, evañca naṃ akāsi, na pana tāya buddho jāto, atha kho majjhimāya eva paṭipattiyā’’ti tassā byatirekamukhena sadevakassa lokassa bodhāya amaggabhāvadīpanatthaṃ, imassa pana bhagavato kammavipākavasena chabbassāni dukkaracariyā ahosi. Vuttañhetaṃ –
‘‘аважаахам̣ ж̇од̇ибаало, гассабам̣ суг̇ад̇ам̣ д̇ад̣̇аа;
‘‘Avacāhaṃ jotipālo, kassapaṃ sugataṃ tadā;
гуд̇о ну б̣од̇хи мун̣д̣асса, б̣од̇хи барамад̣̇уллабхаа.
Kuto nu bodhi muṇḍassa, bodhi paramadullabhā.
д̇зна гаммавибаагзна, ажарим̣ д̣̇уггарам̣ б̣ахум̣;
Tena kammavipākena, acariṃ dukkaraṃ bahuṃ;
чаб̣б̣ассаанурувзлааяам̣, д̇ад̇о б̣од̇химабаабун̣им̣.
Chabbassānuruvelāyaṃ, tato bodhimapāpuṇiṃ.
наахам̣ зд̇зна маг̇г̇зна, баабун̣им̣ б̣од̇химуд̇д̇амам̣;
Nāhaṃ etena maggena, pāpuṇiṃ bodhimuttamaṃ;
гумаг̇г̇зна г̇авзсиссам̣, буб̣б̣агаммзна ваарид̇о’’д̇и.
Kumaggena gavesissaṃ, pubbakammena vārito’’ti.
д̣̇уггаражарияааяа б̣од̇хааяа амаг̇г̇абхаавад̣̇ассанад̇т̇ам̣ д̣̇уггаражарияам̣ агаасийд̇и гзжи. ат̇а ваа логанаат̇асса ад̇д̇ано бараггамасамбад̇д̇ид̣̇ассанад̇т̇ааяа д̣̇уггаражарияаа. бан̣ийд̇аад̇химуд̇д̇ияаа хи барамуггам̣саг̇ад̇абхаавад̇о абхинийхаараануруубам̣ самб̣од̇хияам̣ д̇иб̣б̣ачанд̣̇ад̇ааяа сикааббад̇д̇ияаа д̇ад̣̇ад̇т̇ам̣ ийд̣̇исамби наама д̣̇уггаражарияам̣ агаасийд̇и логз ад̇д̇ано вийрияаанубхаавам̣ вибхаавзд̇ум̣ – ‘‘со жа мз бажчаа бийд̇исоманассаавахо бхависсад̇ий’’д̇и логанаат̇о д̣̇уггаражарияам̣ агааси. д̇знааха ‘‘сад̣̇звагасса логассаа’’д̇иаад̣̇и. д̇ад̇т̇а вийрияаниммат̇анаг̇ун̣од̇и вийрияасса сам̣вад̣дханасамбаад̣̇анаг̇ун̣о. яат̇аавуд̇д̇амад̇т̇ам̣ убамааяа вибхаавзд̇ум̣ ‘‘баасаад̣̇з’’д̇иаад̣̇и вуд̇д̇ам̣. сан̇г̇аамз д̣̇вз д̇аяо самбахаарзд̇и д̣̇вигкад̇д̇ум̣ д̇игкад̇д̇ум̣ ваа барасзнааяа бахаарабаяог̇з. бад̇хаанавийрияанд̇и саммаббад̇хаанзхи аасзванавийрияам̣, саб̣б̣ам̣ ваа буб̣б̣абхааг̇авийрияам̣.
Dukkaracariyāya bodhāya amaggabhāvadassanatthaṃ dukkaracariyaṃ akāsīti keci. Atha vā lokanāthassa attano parakkamasampattidassanatthāya dukkaracariyā. Paṇītādhimuttiyā hi paramukkaṃsagatabhāvato abhinīhārānurūpaṃ sambodhiyaṃ tibbachandatāya sikhāppattiyā tadatthaṃ īdisampi nāma dukkaracariyaṃ akāsīti loke attano vīriyānubhāvaṃ vibhāvetuṃ – ‘‘so ca me pacchā pītisomanassāvaho bhavissatī’’ti lokanātho dukkaracariyaṃ akāsi. Tenāha ‘‘sadevakassa lokassā’’tiādi. Tattha vīriyanimmathanaguṇoti vīriyassa saṃvaḍḍhanasampādanaguṇo. Yathāvuttamatthaṃ upamāya vibhāvetuṃ ‘‘pāsāde’’tiādi vuttaṃ. Saṅgāme dve tayo sampahāreti dvikkhattuṃ tikkhattuṃ vā parasenāya pahārapayoge. Padhānavīriyanti sammappadhānehi āsevanavīriyaṃ, sabbaṃ vā pubbabhāgavīriyaṃ.
абхид̣̇анд̇анд̇и абхибхаванад̣̇анд̇ам̣, убарид̣̇анд̇анд̇и ад̇т̇о. д̇знааха ‘‘убарид̣̇анд̇а’’нд̇и. со хи ид̇арам̣ мусалам̣ вияа уд̣̇угкалам̣ висзсад̇о гассажи каад̣̇анагаалз абхибхуяяа вад̇д̇ад̇и. гусалажид̇д̇знаад̇и б̣алавасаммаасан̇габбаяуд̇д̇зна гусалажид̇д̇зна. агусалажид̇д̇анд̇и гаамавид̇аггаад̣̇исахид̇ам̣ агусалажид̇д̇ам̣. агусалажид̇д̇асса бавад̇д̇ид̇ум̣ аббад̣̇аанам̣ ниг̇г̇ахо. д̇ам̣д̇ам̣бадигкзбавасзна винод̣̇анам̣ абхиниббийл̣анам̣. вийрияад̇аабзна вигкамбханам̣ абхисанд̇аабанам̣. сад̣̇арат̇од̇и сабарил̣аахо. бад̇хаанзнаад̇и бад̣̇аханзна, гааяасса гиламат̇уббаад̣̇агзна вийриязнаад̇и ад̇т̇о. вид̣̇д̇хассаад̇и д̇уд̣̇асса. сад̇од̇и самаанасса.
Abhidantanti abhibhavanadantaṃ, uparidantanti attho. Tenāha ‘‘uparidanta’’nti. So hi itaraṃ musalaṃ viya udukkhalaṃ visesato kassaci khādanakāle abhibhuyya vattati. Kusalacittenāti balavasammāsaṅkappayuttena kusalacittena. Akusalacittanti kāmavitakkādisahitaṃ akusalacittaṃ. Akusalacittassa pavattituṃ appadānaṃ niggaho. Taṃtaṃpaṭikkhepavasena vinodanaṃ abhinippīḷanaṃ. Vīriyatāpena vikkhambhanaṃ abhisantāpanaṃ. Sadarathoti sapariḷāho. Padhānenāti padahanena, kāyassa kilamathuppādakena vīriyenāti attho. Viddhassāti tudassa. Satoti samānassa.
378. сийсавзтананд̇и сийсам̣ раж̇ж̇уяаа б̣анд̇хид̇ваа д̣̇ан̣д̣агзна баривад̇д̇агавзтанам̣. араханд̇о наама зваруубаа хонд̇ийд̇и иминаа яат̇ааяам̣, звам̣ висан̃н̃ийбхууд̇ааби худ̇ваа вихаранд̇ийд̇и д̣̇ассзд̇и. д̇знааха ‘‘мад̇агасад̣̇исаа’’д̇и, взд̣̇анааббад̇д̇аа вияа хонд̇ийд̇и ад̇т̇о. субинаббадиг̇г̇ахан̣ад̇о бадтааяаад̇и бадисанд̇хиг̇г̇ахан̣з сзд̇авааран̣асубинам̣ бассид̇ваа б̣раахман̣зхи б̣яаагад̇агаалад̇о бадтааяа.
378.Sīsaveṭhananti sīsaṃ rajjuyā bandhitvā daṇḍakena parivattakaveṭhanaṃ. Arahanto nāma evarūpā hontīti iminā yathāyaṃ, evaṃ visaññībhūtāpi hutvā viharantīti dasseti. Tenāha ‘‘matakasadisā’’ti, vedanāppattā viya hontīti attho. Supinappaṭiggahaṇato paṭṭhāyāti paṭisandhiggahaṇe setavāraṇasupinaṃ passitvā brāhmaṇehi byākatakālato paṭṭhāya.
379. д̇хаммасарийрасса арог̇абхаавзна саад̇хууд̇и марисанияод̇и маарисо, бияааяанаважанамзд̇ам̣. д̇знааха ‘‘самбияааяамаанаа’’д̇иаад̣̇и. аж̇аж̇ж̇ид̇анд̇и звам̣ абхун̃ж̇ид̇ам̣ бхагаарасса ж̇агаараад̣̇зсам̣ гад̇ваа. д̇знааха ‘‘абхож̇ана’’нд̇и. звам̣ маа гарид̇т̇аад̇и ‘‘ломагуубзхи аж̇жхохаарзссаама ануббавзсзссаамаа’’д̇и яат̇аа д̇умхзхи вуд̇д̇ам̣, звам̣ маа гарид̇т̇а. гасмаа? яаабзссаамаханд̇и ахан̃жа яаавад̣̇ад̇т̇ам̣ аахаарамад̇д̇ам̣ бхун̃ж̇анд̇о яат̇аа яаабзссаами, звам̣ аахаарам̣ бадисзвиссаами.
379. Dhammasarīrassa arogabhāvena sādhūti marisaniyoti māriso, piyāyanavacanametaṃ. Tenāha ‘‘sampiyāyamānā’’tiādi. Ajajjitanti evaṃ abhuñjitaṃ bhakārassa jakārādesaṃ katvā. Tenāha ‘‘abhojana’’nti. Evaṃ mā karitthāti ‘‘lomakūpehi ajjhohāressāma anuppavesessāmā’’ti yathā tumhehi vuttaṃ, evaṃ mā karittha. Kasmā? Yāpessāmahanti ahañca yāvadatthaṃ āhāramattaṃ bhuñjanto yathā yāpessāmi, evaṃ āhāraṃ paṭisevissāmi.
380-81. зд̇аава бараманд̇и зд̇д̇агам̣ барамам̣, на ид̇о барам̣ обаггамигад̣̇угкавзд̣̇анаавзд̣̇ияанам̣ ад̇т̇ийд̇и ад̇т̇о. ран̃н̃о г̇ахзд̇аб̣б̣анан̇г̇алад̇о ан̃н̃аани санд̇хааяа ‘‘згзна ууна’’нд̇и вуд̇д̇ам̣. д̇ам̣ суван̣н̣абаригкад̇ам̣, ид̇араани раж̇ад̇абаригкад̇аани. д̇знааха ‘‘амажжаа згзнуунаадтасад̇араж̇ад̇анан̇г̇алааний’’д̇и. аал̣ааруд̣̇агасамааг̇амз лад̣̇д̇хаж̇жхаанаани ваддабаад̣̇агаани, аанаабаанасамаад̇хи бана гааяаг̇ад̇аасад̇ибарияаабаннад̇д̇аа саб̣б̣зсан̃жа б̣од̇хисад̇д̇аанам̣ вибассанаабаад̣̇агад̇д̇аа ‘‘б̣од̇хааяа маг̇г̇о’’д̇и вуд̇д̇о. б̣уж̇жханад̇т̇ааяаад̇и жад̇уннам̣ арияасажжаанам̣, саб̣б̣ассзва ваа н̃зяяад̇хаммасса абхисамб̣уж̇жханааяа . сад̇ияаа ануссаран̣агавин̃н̃аан̣ам̣ сад̇аанусааривин̃н̃аан̣ам̣. гассаа бана сад̇ияаад̇и д̇ам̣ д̣̇ассзд̇ум̣ ‘‘наяид̣̇а’’нд̇иаад̣̇и вуд̇д̇ам̣.
380-81.Etāva paramanti ettakaṃ paramaṃ, na ito paraṃ opakkamikadukkhavedanāvediyanaṃ atthīti attho. Rañño gahetabbanaṅgalato aññāni sandhāya ‘‘ekena ūna’’nti vuttaṃ. Taṃ suvaṇṇaparikkhataṃ, itarāni rajataparikkhatāni. Tenāha ‘‘amaccā ekenūnaaṭṭhasatarajatanaṅgalānī’’ti. Āḷārudakasamāgame laddhajjhānāni vaṭṭapādakāni, ānāpānasamādhi pana kāyagatāsatipariyāpannattā sabbesañca bodhisattānaṃ vipassanāpādakattā ‘‘bodhāya maggo’’ti vutto. Bujjhanatthāyāti catunnaṃ ariyasaccānaṃ, sabbasseva vā ñeyyadhammassa abhisambujjhanāya . Satiyā anussaraṇakaviññāṇaṃ satānusāriviññāṇaṃ. Kassā pana satiyāti taṃ dassetuṃ ‘‘nayida’’ntiādi vuttaṃ.
382. бажжубадтид̇аад̇и д̇ам̣д̇ам̣вад̇д̇агаран̣авасзна бад̇иубадтид̇аа убадтааяагаа. д̇знааха ‘‘бан̣н̣асаалаа’’д̇иаад̣̇и. бажжаяаб̣аахуллигод̇и бажжаяаанам̣ б̣аахуллааяа бадибанно. аавад̇д̇од̇и буб̣б̣з бажжаяаг̇зд̇хаббахаанааяа бадибанно, ид̣̇аани д̇ад̇о бадинивад̇д̇о. д̇знааха ‘‘расаг̇ид̣̇д̇хо…бз… аавад̇д̇о’’д̇и. д̇хамманияаамзнаад̇и д̇хаммад̇ааяа. д̇амзва д̇хаммад̇ам̣ д̣̇ассзд̇ум̣ ‘‘б̣од̇хисад̇д̇ассаа’’д̇иаад̣̇имааха. б̣аараан̣асимзва д̇ад̇т̇ааби жа саб̣б̣аб̣уд̣̇д̇хаанам̣ авиж̇ахид̇ад̇хаммажаггабавад̇д̇анадтаанамзва аг̇амам̣су. бан̃жаваг̇г̇ияаа гира висаакамаасасса ад̣̇д̇хамаасияам̣ г̇ад̇аа. д̇знааха ‘‘д̇зсу г̇ад̇зсу ад̣дхамаасам̣ гааяавивзгам̣ лабхид̇ваа’’д̇и.
382.Paccupaṭṭhitāti taṃtaṃvattakaraṇavasena patiupaṭṭhitā upaṭṭhāyakā. Tenāha ‘‘paṇṇasālā’’tiādi. Paccayabāhullikoti paccayānaṃ bāhullāya paṭipanno. Āvattoti pubbe paccayagedhappahānāya paṭipanno, idāni tato paṭinivatto. Tenāha ‘‘rasagiddho…pe… āvatto’’ti. Dhammaniyāmenāti dhammatāya. Tameva dhammataṃ dassetuṃ ‘‘bodhisattassā’’tiādimāha. Bārāṇasimeva tatthāpi ca sabbabuddhānaṃ avijahitadhammacakkapavattanaṭṭhānameva agamaṃsu. Pañcavaggiyā kira visākhamāsassa addhamāsiyaṃ gatā. Tenāha ‘‘tesu gatesu aḍḍhamāsaṃ kāyavivekaṃ labhitvā’’ti.
387. ‘‘ад̣̇д̇хаабход̇о г̇од̇амасса саавагаажид̇д̇абхааванаануяог̇амануяуд̇д̇аа вихаранд̇и, но гааяабхаавана’’нд̇и имам̣ санд̇хааяааха ‘‘згам̣ бан̃хам̣ бужчи’’нд̇и. имам̣ д̇хаммад̣̇зсананд̇и ‘‘абхиж̇аанаами ко банааха’’нд̇иаад̣̇игам̣ д̇хаммад̣̇зсанам̣. асаллийно д̇ан̣хаад̣̇идтигилзсаанам̣ самужчиннад̇д̇аа д̇зхи саб̣б̣асо на лид̇д̇о. анубалид̇д̇од̇и д̇ассзва взважанам̣ д̇ан̣хаананд̣̇ияаа абхаавзна. г̇ожараж̇жхад̇д̇амзваад̇и г̇ожараж̇жхад̇д̇асан̃н̃ид̇з паласамаабад̇д̇ияаа аарамман̣з, ниб̣б̣аанзд̇и ад̇т̇о. яам̣ санд̇хааяа баал̣ияам̣ ‘‘буримасмим̣ самаад̇хинимид̇д̇з’’д̇и вуд̇д̇ам̣ саннисийд̣̇аабзмийд̇и паласамаабад̇д̇исамаад̇хинаа ажжанд̇асамаад̣̇аанавасзна жид̇д̇ам̣ саммад̣̇зва нисийд̣̇аабзми. буб̣б̣аабхог̇знаад̇и самаабаж̇ж̇анад̇о буб̣б̣з бавад̇д̇ааабхог̇зна. барижчинд̣̇ид̇ваад̇и самаабаж̇ж̇анагкан̣ам̣ барижчинд̣̇ид̇ваа. д̇знааха ‘‘саад̇хугаара…бз… авижчиннзязваа’’д̇и. звамасса барижчиннагааласамаабаж̇ж̇анам̣ яат̇аабарижчиннагаалам̣ вудтаанан̃жа б̣уд̣̇д̇хаанам̣ на бхаарияам̣ васийбхаавасса д̇ат̇аасуббаг̇ун̣абхаавад̇од̇и д̣̇ассзнд̇о ааха ‘‘б̣уд̣̇д̇хаанам̣ хий’’д̇иаад̣̇и. д̇хаммасамбадиг̇г̇аахагаанам̣ ассаасаваарз ваа. д̇ад̣̇аа хи д̣̇зсияамаанам̣ д̇хаммам̣ убад̇хаарзд̇ум̣ на саггонд̇и, д̇асмаа д̇асмим̣ кан̣з д̣̇зсид̇ад̣̇зсанаа нирад̇т̇агаа сияаа. на хи б̣уд̣̇д̇хаанам̣ нирад̇т̇агаа гирияаа ад̇т̇и.
387. ‘‘Addhābhoto gotamassa sāvakācittabhāvanānuyogamanuyuttā viharanti, no kāyabhāvana’’nti imaṃ sandhāyāha ‘‘ekaṃ pañhaṃ pucchi’’nti. Imaṃ dhammadesananti ‘‘abhijānāmi kho panāha’’ntiādikaṃ dhammadesanaṃ. Asallīno taṇhādiṭṭhikilesānaṃ samucchinnattā tehi sabbaso na litto. Anupalittoti tasseva vevacanaṃ taṇhānandiyā abhāvena. Gocarajjhattamevāti gocarajjhattasaññite phalasamāpattiyā ārammaṇe, nibbāneti attho. Yaṃ sandhāya pāḷiyaṃ ‘‘purimasmiṃ samādhinimitte’’ti vuttaṃ sannisīdāpemīti phalasamāpattisamādhinā accantasamādānavasena cittaṃ sammadeva nisīdāpemi. Pubbābhogenāti samāpajjanato pubbe pavattaābhogena. Paricchinditvāti samāpajjanakkhaṇaṃ paricchinditvā. Tenāha ‘‘sādhukāra…pe… avicchinneyevā’’ti. Evamassa paricchinnakālasamāpajjanaṃ yathāparicchinnakālaṃ vuṭṭhānañca buddhānaṃ na bhāriyaṃ vasībhāvassa tathāsuppaguṇabhāvatoti dassento āha ‘‘buddhānaṃ hī’’tiādi. Dhammasampaṭiggāhakānaṃ assāsavāre vā. Tadā hi desiyamānaṃ dhammaṃ upadhāretuṃ na sakkonti, tasmā tasmiṃ khaṇe desitadesanā niratthakā siyā. Na hi buddhānaṃ niratthakā kiriyā atthi.
огаббанийяамзд̇анд̇и ‘‘д̇ассаа зва гат̇ааяаа’’д̇иаад̣̇инаа вуд̇д̇ам̣ ад̇ивияа ажчарияаг̇ад̇ам̣ адтуббад̇д̇им̣ суд̇ваа ийд̣̇исий бадибад̇д̇и саммаасамб̣уд̣̇д̇хассзва ход̇ийд̇и убаваад̣̇авасзна вад̣̇ад̇и, на сабхаавзна. д̇знааха ‘‘сад̇т̇ари басаад̣̇амад̇д̇амби на уббанна’’нд̇и. гааяад̣̇арат̇од̇и бажжаяависзсавасзна руубагааяасса бариссамаагааро. убаад̣̇иннагзд̇и инд̣̇рияаб̣ад̣̇д̇хз. анубаад̣̇иннагзд̇и анинд̣̇рияаб̣ад̣̇д̇хз. вигасанд̇и суурияарасмисампассзна. д̇ад̣̇абхаавзна магулаани хонд̇и. гзсан̃жи д̇инд̇инигаад̣̇иругкаанам̣ . бад̇илийяанд̇и ниссаяаруубад̇хаммаавибпааригад̇ааяа. аруубад̇хаммад̇ааяа бан̃жавин̃н̃аан̣аанан̃жзва гирияаамаяавин̃н̃аан̣аанан̃жа аббавад̇д̇исан̃н̃ид̇аа авибпааригад̇аа ход̇и, яад̇т̇а нид̣̇д̣̇аасаман̃н̃аа. д̇знааха ‘‘д̣̇арат̇авасзна бхаван̇г̇асод̇ан̃жа ид̇ха нид̣̇д̣̇аад̇и ад̇хиббзд̇а’’нд̇и. д̇ад̇т̇а д̣̇арат̇авасзнаад̇и д̣̇арат̇авасзнзва, на т̇инамид̣̇д̇хавасзнаад̇и авад̇хааран̣ам̣ авад̇хааран̣апалан̃жа нид̣̇д̇хаарзд̇аб̣б̣ам̣. д̇ам̣ санд̇хааяаад̇и гааяасса д̣̇арат̇асан̇каад̇асарийраг̇илаанахзд̇угам̣ нид̣̇д̣̇ам̣ санд̇хааяа. сарийраг̇илаанан̃жа бхаг̇авад̇о над̇т̇ийд̇и на саггаа вад̇д̇ум̣ ‘‘бидти мз ааг̇илааяад̇ий’’д̇и (д̣̇ий. ни. 3.300; ма. ни. 2.22; жуул̣ава. 345) важанад̇о. саммохавихаарасминд̇и бажжад̇д̇з зд̇ам̣ бхуммаважананд̇и ааха ‘‘саммохавихаарод̇и вад̣̇анд̇ий’’д̇и, саммохавихаарасмим̣ ваа барияаабаннам̣ зд̇ам̣ вад̣̇анд̇и, яад̣̇ид̣̇ам̣ д̣̇иваа нид̣̇д̣̇оггамананд̇и яож̇анаа.
Okappanīyametanti ‘‘tassā eva kathāyā’’tiādinā vuttaṃ ativiya acchariyagataṃ aṭṭhuppattiṃ sutvā īdisī paṭipatti sammāsambuddhasseva hotīti upavādavasena vadati, na sabhāvena. Tenāha ‘‘satthari pasādamattampi na uppanna’’nti. Kāyadarathoti paccayavisesavasena rūpakāyassa parissamākāro. Upādinnaketi indriyabaddhe. Anupādinnaketi anindriyabaddhe. Vikasanti sūriyarasmisamphassena. Tadabhāvena makulāni honti. Kesañci tintinikādirukkhānaṃ . Patilīyanti nissayarūpadhammaavipphārikatāya. Arūpadhammatāya pañcaviññāṇānañceva kiriyāmayaviññāṇānañca appavattisaññitā avipphārikatā hoti, yattha niddāsamaññā. Tenāha ‘‘darathavasena bhavaṅgasotañca idha niddāti adhippeta’’nti. Tattha darathavasenāti darathavaseneva, na thinamiddhavasenāti avadhāraṇaṃ avadhāraṇaphalañca niddhāretabbaṃ. Taṃ sandhāyāti kāyassa darathasaṅkhātasarīragilānahetukaṃ niddaṃ sandhāya. Sarīragilānañca bhagavato natthīti na sakkā vattuṃ ‘‘piṭṭhi me āgilāyatī’’ti (dī. ni. 3.300; ma. ni. 2.22; cūḷava. 345) vacanato. Sammohavihārasminti paccatte etaṃ bhummavacananti āha ‘‘sammohavihāroti vadantī’’ti, sammohavihārasmiṃ vā pariyāpannaṃ etaṃ vadanti, yadidaṃ divā niddokkamananti yojanā.
389. убанийд̇зхийд̇и д̣̇осамаг̇г̇ам̣ нинд̣̇аабат̇ам̣ убанийд̇зхи. абхинанд̣̇ид̇ваад̇и самбияааяид̇ваа. д̇знааха ‘‘жид̇д̇зна самбадижчанд̇о’’д̇и. анумод̣̇ид̇ваад̇и ‘‘саад̇ху саад̇хуу’’д̇и д̣̇зсанааяа т̇оманавасзна анумод̣̇ид̇ваа. д̇знааха ‘‘ваажааяаби басам̣санд̇о’’д̇и. самбад̇д̇з гаалзд̇и баб̣б̣аж̇ж̇ааяог̇г̇з гаалз ануббад̇д̇з.
389.Upanītehīti dosamaggaṃ nindāpathaṃ upanītehi. Abhinanditvāti sampiyāyitvā. Tenāha ‘‘cittena sampaṭicchanto’’ti. Anumoditvāti ‘‘sādhu sādhū’’ti desanāya thomanavasena anumoditvā. Tenāha ‘‘vācāyapi pasaṃsanto’’ti. Sampatte kāleti pabbajjāyogge kāle anuppatte.
г̇ан̣ам̣ винод̣̇зд̇ваад̇и г̇ан̣ам̣ абанзд̇ваа г̇ан̣абалиб̣од̇хам̣ чинд̣̇ид̇ваа. бабан̃жанд̇и авасзсагилзсам̣. ‘‘бун̃н̃аваа рааж̇абууж̇ид̇о’’д̇и вуд̇д̇амад̇т̇ам̣ виварид̇ум̣ ‘‘д̇асмин̃хи гаалз’’д̇иаад̣̇и вуд̇д̇ам̣. чанд̣̇аваасахаран̣зна убосат̇агаммам̣ гаронд̇о.
Gaṇaṃ vinodetvāti gaṇaṃ apanetvā gaṇapalibodhaṃ chinditvā. Papañcanti avasesakilesaṃ. ‘‘Puññavā rājapūjito’’ti vuttamatthaṃ vivarituṃ ‘‘tasmiñhi kāle’’tiādi vuttaṃ. Chandavāsaharaṇena uposathakammaṃ karonto.
сагалам̣ рад̇д̇им̣ б̣уд̣̇д̇хаг̇ун̣аанам̣язва гат̇ид̇ад̇д̇аа т̇зрасса н̃аан̣ам̣ д̣̇зсанаавибхаван̃жа вибхаавзнд̇о ааха ‘‘зд̇д̇агаава, бханд̇з, б̣уд̣̇д̇хаг̇ун̣аа’’д̇и. имааяа, бханд̇з, д̇умхаагам̣ д̇хаммагат̇ааяа анавасзсад̇о б̣уд̣̇д̇хаг̇ун̣аа гат̇ид̇аа вияа ж̇ааяанд̇и, звам̣ санд̇зби ананд̇аабаримзяяаава д̇з, гим̣ ид̇о барзби виж̇ж̇анд̇зваад̇и т̇зрам̣ д̇ад̇т̇а сийханаад̣̇ам̣ над̣̇аабзд̇угаамо ааха ‘‘уд̣̇ааху ан̃н̃зби ад̇т̇ий’’д̇иаад̣̇и. раж̇ж̇асса бад̣̇зсигад̇д̇аа, яат̇аавуд̇д̇асубхаасид̇асса жа анаг̇гхад̇д̇аа вуд̇д̇ам̣ ‘‘аяам̣ мз д̣̇уг̇г̇ад̇абан̣н̣аагааро’’д̇и. д̇ияож̇анасад̇иганд̇и ид̣̇ам̣ баригкзбавасзна вуд̇д̇ам̣, д̇ан̃жа ко мануссаанам̣ барибхог̇авасзнаад̇и д̣̇адтаб̣б̣ам̣.
Sakalaṃ rattiṃ buddhaguṇānaṃyeva kathitattā therassa ñāṇaṃ desanāvibhavañca vibhāvento āha ‘‘ettakāva, bhante, buddhaguṇā’’ti. Imāya, bhante, tumhākaṃ dhammakathāya anavasesato buddhaguṇā kathitā viya jāyanti, evaṃ santepi anantāparimeyyāva te, kiṃ ito parepi vijjantevāti theraṃ tattha sīhanādaṃ nadāpetukāmo āha ‘‘udāhu aññepi atthī’’tiādi. Rajjassa padesikattā, yathāvuttasubhāsitassa ca anagghattā vuttaṃ ‘‘ayaṃ me duggatapaṇṇākāro’’ti. Tiyojanasatikanti idaṃ parikkhepavasena vuttaṃ, tañca kho manussānaṃ paribhogavasenāti daṭṭhabbaṃ.
махаасажжагасуд̇д̇аван̣н̣анааяа лийнад̇т̇аббагаасанаа самад̇д̇аа.
Mahāsaccakasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 6. махаасажжагасуд̇д̇ам̣ • 6. Mahāsaccakasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 6. махаасажжагасуд̇аван̣н̣анаа • 6. Mahāsaccakasutavaṇṇanā
