| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. මහාසාලපුත්‌තසුත්‌තං
10. Mahāsālaputtasuttaṃ
40. ‘‘හිමවන්‌තං, භික්‌ඛවෙ, පබ්‌බතරාජං නිස්‌සාය මහාසාලා පඤ්‌චහි වඩ්‌ඪීහි වඩ්‌ඪන්‌ති. කතමාහි පඤ්‌චහි? සාඛාපත්‌තපලාසෙන වඩ්‌ඪන්‌ති; තචෙන වඩ්‌ඪන්‌ති; පපටිකාය වඩ්‌ඪන්‌ති; ඵෙග්‌ගුනා වඩ්‌ඪන්‌ති; සාරෙන වඩ්‌ඪන්‌ති. හිමවන්‌තං, භික්‌ඛවෙ, පබ්‌බතරාජං නිස්‌සාය මහාසාලා ඉමාහි පඤ්‌චහි වඩ්‌ඪීහි වඩ්‌ඪන්‌ති. එවමෙවං ඛො, භික්‌ඛවෙ, සද්‌ධං කුලපුත්‌තං නිස්‌සාය අන්‌තොජනො පඤ්‌චහි වඩ්‌ඪීහි වඩ්‌ඪති. කතමාහි පඤ්‌චහි? සද්‌ධාය වඩ්‌ඪති; සීලෙන වඩ්‌ඪති; සුතෙන වඩ්‌ඪති; චාගෙන වඩ්‌ඪති; පඤ්‌ඤාය වඩ්‌ඪති. සද්‌ධං, භික්‌ඛවෙ, කුලපුත්‌තං නිස්‌සාය අන්‌තොජනො ඉමාහි පඤ්‌චහි වඩ්‌ඪීහි වඩ්‌ඪතී’’ති.
40. ‘‘Himavantaṃ, bhikkhave, pabbatarājaṃ nissāya mahāsālā pañcahi vaḍḍhīhi vaḍḍhanti. Katamāhi pañcahi? Sākhāpattapalāsena vaḍḍhanti; tacena vaḍḍhanti; papaṭikāya vaḍḍhanti; pheggunā vaḍḍhanti; sārena vaḍḍhanti. Himavantaṃ, bhikkhave, pabbatarājaṃ nissāya mahāsālā imāhi pañcahi vaḍḍhīhi vaḍḍhanti. Evamevaṃ kho, bhikkhave, saddhaṃ kulaputtaṃ nissāya antojano pañcahi vaḍḍhīhi vaḍḍhati. Katamāhi pañcahi? Saddhāya vaḍḍhati; sīlena vaḍḍhati; sutena vaḍḍhati; cāgena vaḍḍhati; paññāya vaḍḍhati. Saddhaṃ, bhikkhave, kulaputtaṃ nissāya antojano imāhi pañcahi vaḍḍhīhi vaḍḍhatī’’ti.
‘‘යථා හි පබ්‌බතො සෙලො, අරඤ්‌ඤස්‌මිං බ්‍රහාවනෙ;
‘‘Yathā hi pabbato selo, araññasmiṃ brahāvane;
තං රුක්‌ඛා උපනිස්‌සාය, වඩ්‌ඪන්‌තෙ තෙ වනප්‌පතී.
Taṃ rukkhā upanissāya, vaḍḍhante te vanappatī.
උපනිස්‌සාය වඩ්‌ඪන්‌ති, පුත්‌තදාරා ච බන්‌ධවා;
Upanissāya vaḍḍhanti, puttadārā ca bandhavā;
අමච්‌චා ඤාතිසඞ්‌ඝා ච, යෙ චස්‌ස අනුජීවිනො.
Amaccā ñātisaṅghā ca, ye cassa anujīvino.
‘‘ත්‍යස්‌ස සීලවතො සීලං, චාගං සුචරිතානි ච;
‘‘Tyassa sīlavato sīlaṃ, cāgaṃ sucaritāni ca;
පස්‌සමානානුකුබ්‌බන්‌ති, යෙ භවන්‌ති විචක්‌ඛණා.
Passamānānukubbanti, ye bhavanti vicakkhaṇā.
නන්‌දිනො දෙවලොකස්‌මිං, මොදන්‌ති කාමකාමිනො’’ති. දසමං;
Nandino devalokasmiṃ, modanti kāmakāmino’’ti. dasamaṃ;
සුමනවග්‌ගො චතුත්‌ථො.
Sumanavaggo catuttho.
තස්‌සුද්‌දානං –
Tassuddānaṃ –
සුමනා චුන්‌දී උග්‌ගහො, සීහො දානානිසංසකො;
Sumanā cundī uggaho, sīho dānānisaṃsako;
කාලභොජනසද්‌ධා ච, පුත්‌තසාලෙහි තෙ දසාති.
Kālabhojanasaddhā ca, puttasālehi te dasāti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. මහාසාලපුත්‌තසුත්‌තවණ්‌ණනා • 10. Mahāsālaputtasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 9-10. පුත්‌තසුත්‌තාදිවණ්‌ණනා • 9-10. Puttasuttādivaṇṇanā
