| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. মহাসালসুত্তৰণ্ণনা
4. Mahāsālasuttavaṇṇanā
২০০. যস্মা তস্স ব্রাহ্মণস্স অনিস্সযস্স জিণ্ণভাৰেন ৰিসেসতো কাযো লূখো জাতো, জিণ্ণপিলোতিকখণ্ডেহি সঙ্ঘটিতং পাৰুরণং, তস্মা ‘‘লূখপাৰুরণো’’তি পদস্স ‘‘জিণ্ণপাৰুরণো’’তি অত্থো ৰুত্তো। পাটিযেক্কন্তি পুত্তেসু একমেকো একমেকায ৰাচায ৰিসুং ৰিসুং।
200. Yasmā tassa brāhmaṇassa anissayassa jiṇṇabhāvena visesato kāyo lūkho jāto, jiṇṇapilotikakhaṇḍehi saṅghaṭitaṃ pāvuraṇaṃ, tasmā ‘‘lūkhapāvuraṇo’’ti padassa ‘‘jiṇṇapāvuraṇo’’ti attho vutto. Pāṭiyekkanti puttesu ekameko ekamekāya vācāya visuṃ visuṃ.
সম্পুচ্ছনং নাম ইধ সম্মন্তনন্তি আহ ‘‘সদ্ধিং মন্তযিত্ৰা’’তি। নন্দিস্সন্তি অভিনন্দিং। অতীতত্থে হি ইদং অনাগতৰচনং। তেনাহ ‘‘নন্দিজাতো…পে॰… অহোসি’’ন্তি। ভুস্সন্তাতি নিব্ভুস্সনৰসেন রৰন্তা।
Sampucchanaṃ nāma idha sammantananti āha ‘‘saddhiṃ mantayitvā’’ti. Nandissanti abhinandiṃ. Atītatthe hi idaṃ anāgatavacanaṃ. Tenāha ‘‘nandijāto…pe… ahosi’’nti. Bhussantāti nibbhussanavasena ravantā.
ৰযোগতন্তি পচ্ছিমৰযং উপগতং। সো পন যস্মা পুরিমে দ্ৰে ৰযে অতিক্কমৰসেন গতো। পচ্ছিমং একদেসতো অতিক্কমনৰসেন, তস্মা ৰুত্তং – ‘‘তযো ৰযে গতং অতিক্কন্তং পচ্ছিমৰযে ঠিত’’ন্তি।
Vayogatanti pacchimavayaṃ upagataṃ. So pana yasmā purime dve vaye atikkamavasena gato. Pacchimaṃ ekadesato atikkamanavasena, tasmā vuttaṃ – ‘‘tayo vaye gataṃ atikkantaṃ pacchimavaye ṭhita’’nti.
নিপ্পরিভোগোতি জিণ্ণভাৰেন জৰপরক্কমহানিযা অপরিভোগো ন ভুঞ্জিতব্বো। খাদনা অপনীযতীতি যৰসং অদদন্তা ততো নীহরন্তি নাম। থেরোতি ৰুড্ঢো।
Nipparibhogoti jiṇṇabhāvena javaparakkamahāniyā aparibhogo na bhuñjitabbo. Khādanā apanīyatīti yavasaṃ adadantā tato nīharanti nāma. Theroti vuḍḍho.
অনস্সৰাতি ন ৰচনকরা। অপ্পতিস্সাতি পতিস্সযরহিতা। অৰসৰত্তিনোতি ন ময্হং ৰসেন ৰত্তনকা। সুন্দরতরোতি উপত্থম্ভকারিভাৰেন সুন্দরতরো।
Anassavāti na vacanakarā. Appatissāti patissayarahitā. Avasavattinoti na mayhaṃ vasena vattanakā. Sundarataroti upatthambhakāribhāvena sundarataro.
পুরতোতি উপত্থম্ভকভাৰেন পুরতো কত্ৰা। উদকে পতিট্ঠং লভতি তত্থ পতিট্ঠতো থিরপতিট্ঠভাৰতো। অদ্ধপতিট্ঠো হি দণ্ডো দণ্ডধরপুরিসস্স পতিট্ঠং লভাপেতি।
Puratoti upatthambhakabhāvena purato katvā. Udake patiṭṭhaṃ labhati tattha patiṭṭhato thirapatiṭṭhabhāvato. Addhapatiṭṭho hi daṇḍo daṇḍadharapurisassa patiṭṭhaṃ labhāpeti.
ব্রাহ্মণিযোতি অত্তনো ব্রাহ্মণিযো। পাটিযেক্কন্তি ‘‘অসুকস্স গেহে অসুকস্স গেহে’’তি এৰং উদ্দেসিকং কত্ৰা ৰিসুং ৰিসুং। মা নিয্যাদেহি, অম্হাকং রুচ্চনট্ঠানমেৰাতি তৰ পুত্তানং গেহেসু যং অম্হাকং রুচ্চনট্ঠানং। তত্থমেৰ গমিস্সামাতি সব্বেসম্পি এতেসং অনুগ্গহং কাতুকামো ভগৰা এৰমাহ।
Brāhmaṇiyoti attano brāhmaṇiyo. Pāṭiyekkanti ‘‘asukassa gehe asukassa gehe’’ti evaṃ uddesikaṃ katvā visuṃ visuṃ. Mā niyyādehi, amhākaṃ ruccanaṭṭhānamevāti tava puttānaṃ gehesu yaṃ amhākaṃ ruccanaṭṭhānaṃ. Tatthameva gamissāmāti sabbesampi etesaṃ anuggahaṃ kātukāmo bhagavā evamāha.
ততো পট্ঠাযাতি সোতাপত্তিফলপটিলাভতো পট্ঠায। যদত্থং মযং ইমস্স ব্রাহ্মণস্স মহাসম্পত্তিদানাদিনা অনুগ্গহো কতো, সো চস্স পুত্তপরিজনস্সপি অত্থো সিদ্ধোতি সত্থা ন সব্বকালং তস্স ব্রাহ্মণস্স পুত্তানং গেহং অগমাসি, তে এৰ পন কালেন কালং সত্থু সন্তিকং গন্ত্ৰা যথাৰিভৰং সক্কারসম্মানং অকংসূতি অধিপ্পাযো।
Tato paṭṭhāyāti sotāpattiphalapaṭilābhato paṭṭhāya. Yadatthaṃ mayaṃ imassa brāhmaṇassa mahāsampattidānādinā anuggaho kato, so cassa puttaparijanassapi attho siddhoti satthā na sabbakālaṃ tassa brāhmaṇassa puttānaṃ gehaṃ agamāsi, te eva pana kālena kālaṃ satthu santikaṃ gantvā yathāvibhavaṃ sakkārasammānaṃ akaṃsūti adhippāyo.
মহাসালসুত্তৰণ্ণনা নিট্ঠিতা।
Mahāsālasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. মহাসালসুত্তং • 4. Mahāsālasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. মহাসালসুত্তৰণ্ণনা • 4. Mahāsālasuttavaṇṇanā
