| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
4. махаасааласуд̇д̇аван̣н̣анаа
4. Mahāsālasuttavaṇṇanā
200. жад̇уд̇т̇з лууко луукабаавуран̣од̇и ж̇ин̣н̣о ж̇ин̣н̣абаавуран̣о. убасан̇гамийд̇и гасмаа убасан̇гами? д̇асса гира гхарз адтасад̇асахассад̇ханам̣ ахоси. со жад̇уннам̣ буд̇д̇аанам̣ ааваахам̣ гад̇ваа жад̇д̇аари сад̇асахассаани ад̣̇ааси . ат̇асса б̣раахман̣ияаа гаалан̇гад̇ааяа буд̇д̇аа самманд̇аяим̣су – ‘‘сажз ан̃н̃ам̣ б̣раахман̣им̣ аанзссад̇и, д̇ассаа гужчияам̣ ниб̣б̣ад̇д̇авасзна гулам̣ бхиж̇ж̇иссад̇и. ханд̣̇а нам̣ маяам̣ сан̇г̇ан̣хаамаа’’д̇и. д̇з жад̇д̇аароби бан̣ийд̇зхи гхаасажчаад̣̇анаад̣̇ийхи убадтаханд̇аа хад̇т̇абаад̣̇асамб̣ааханаад̣̇ийни гаронд̇аа сан̇г̇ан̣хид̇ваа згад̣̇ивасам̣ д̣̇иваа нид̣̇д̣̇ааяид̇ваа вудтид̇асса хад̇т̇абаад̣̇з самб̣аахамаанаа баадиязггам̣ гхарааваасз аад̣̇ийнавам̣ вад̇ваа – ‘‘маяам̣ д̇умхз иминаа нийхаарзна яааваж̇ийвам̣ убадтахиссаама, сзсад̇ханамби но д̣̇зт̇аа’’д̇и яаажим̣су. б̣раахман̣о буна згзгасса сад̇асахассам̣ сад̇асахассам̣ д̣̇ад̇ваа ад̇д̇ано нивад̇т̇абаарубанамад̇д̇ам̣ табзд̇ваа саб̣б̣ам̣ убабхог̇абарибхог̇ам̣ жад̇д̇ааро годтаасз гад̇ваа нияяаад̣̇зси. д̇ам̣ ж̇здтабуд̇д̇о гад̇ибаахам̣ убадтахи.
200. Catutthe lūkho lūkhapāvuraṇoti jiṇṇo jiṇṇapāvuraṇo. Upasaṅkamīti kasmā upasaṅkami? Tassa kira ghare aṭṭhasatasahassadhanaṃ ahosi. So catunnaṃ puttānaṃ āvāhaṃ katvā cattāri satasahassāni adāsi . Athassa brāhmaṇiyā kālaṅkatāya puttā sammantayiṃsu – ‘‘sace aññaṃ brāhmaṇiṃ ānessati, tassā kucchiyaṃ nibbattavasena kulaṃ bhijjissati. Handa naṃ mayaṃ saṅgaṇhāmā’’ti. Te cattāropi paṇītehi ghāsacchādanādīhi upaṭṭhahantā hatthapādasambāhanādīni karontā saṅgaṇhitvā ekadivasaṃ divā niddāyitvā vuṭṭhitassa hatthapāde sambāhamānā pāṭiyekkaṃ gharāvāse ādīnavaṃ vatvā – ‘‘mayaṃ tumhe iminā nīhārena yāvajīvaṃ upaṭṭhahissāma, sesadhanampi no dethā’’ti yāciṃsu. Brāhmaṇo puna ekekassa satasahassaṃ satasahassaṃ datvā attano nivatthapārupanamattaṃ ṭhapetvā sabbaṃ upabhogaparibhogaṃ cattāro koṭṭhāse katvā niyyādesi. Taṃ jeṭṭhaputto katipāhaṃ upaṭṭhahi.
ат̇а нам̣ згад̣̇ивасам̣ нхад̇ваа ааг̇ажчанд̇ам̣ д̣̇ваарагодтагз тад̇ваа сун̣хаа звамааха – ‘‘гим̣ д̇аяаа ж̇здтабуд̇д̇асса сад̇ам̣ ваа сахассам̣ ваа ад̇ирзгам̣ д̣̇иннамад̇т̇и? нану саб̣б̣зсам̣ д̣̇вз д̣̇вз сад̇асахассаани д̣̇иннаани, гим̣ сзсабуд̇д̇аанам̣ гхарасса маг̇г̇ам̣ на ж̇аанаасий’’д̇и? со ‘‘насса васалий’’д̇и гуж̇жхид̇ваа ан̃н̃асса гхарам̣ аг̇амааси, д̇ад̇оби гад̇ибаахажжаязна иминаава убааязна балаабид̇о ан̃н̃ассаад̇и звам̣ згагхарзби бавзсанам̣ алабхамаано бан̣д̣аран̇г̇абаб̣б̣аж̇ж̇ам̣ баб̣б̣аж̇ид̇ваа бхигкааяа жаранд̇о гаалаанамажжаязна ж̇арааж̇ин̣н̣о д̣̇уб̣бхож̇анад̣̇угкасзяяаахи милаад̇асарийро бхигкаажаарад̇о ааг̇амма, бийтагааяа нибанно нид̣̇д̣̇ам̣ оггамид̇ваа вудтааяа нисинно ад̇д̇аанам̣ ологзд̇ваа буд̇д̇зсу бад̇идтам̣ абассанд̇о жинд̇зси – ‘‘саман̣о гира г̇од̇амо аб̣бхаагудиго уд̇д̇аанамуко сукасамбхаасо бадисант̇аарагусало, саггаа саман̣ам̣ г̇од̇амам̣ убасан̇гамид̇ваа бадисант̇аарам̣ лабхид̇у’’нд̇и ниваасанабаавуран̣ам̣ сан̣табзд̇ваа бхигкаабхааж̇анамаад̣̇ааяа язна бхаг̇аваа д̇знубасан̇гами.
Atha naṃ ekadivasaṃ nhatvā āgacchantaṃ dvārakoṭṭhake ṭhatvā suṇhā evamāha – ‘‘kiṃ tayā jeṭṭhaputtassa sataṃ vā sahassaṃ vā atirekaṃ dinnamatthi? Nanu sabbesaṃ dve dve satasahassāni dinnāni, kiṃ sesaputtānaṃ gharassa maggaṃ na jānāsī’’ti? So ‘‘nassa vasalī’’ti kujjhitvā aññassa gharaṃ agamāsi, tatopi katipāhaccayena imināva upāyena palāpito aññassāti evaṃ ekagharepi pavesanaṃ alabhamāno paṇḍaraṅgapabbajjaṃ pabbajitvā bhikkhāya caranto kālānamaccayena jarājiṇṇo dubbhojanadukkhaseyyāhi milātasarīro bhikkhācārato āgamma, pīṭhakāya nipanno niddaṃ okkamitvā vuṭṭhāya nisinno attānaṃ oloketvā puttesu patiṭṭhaṃ apassanto cintesi – ‘‘samaṇo kira gotamo abbhākuṭiko uttānamukho sukhasambhāso paṭisanthārakusalo, sakkā samaṇaṃ gotamaṃ upasaṅkamitvā paṭisanthāraṃ labhitu’’nti nivāsanapāvuraṇaṃ saṇṭhapetvā bhikkhābhājanamādāya yena bhagavā tenupasaṅkami.
д̣̇аарзхи сам̣бужча гхараа нигкаамзнд̇ийд̇и саб̣б̣ам̣ мама санд̇агам̣ г̇ахзд̇ваа маяхам̣ нид̣̇д̇ханабхаавам̣ н̃ад̇ваа ад̇д̇ано бхарияаахи сад̣̇д̇хим̣ манд̇аяид̇ваа мам̣ гхараа ниггад̣дхаабзнд̇и.
Dārehisaṃpuccha gharā nikkhāmentīti sabbaṃ mama santakaṃ gahetvā mayhaṃ niddhanabhāvaṃ ñatvā attano bhariyāhi saddhiṃ mantayitvā maṃ gharā nikkaḍḍhāpenti.
нанд̣̇иссанд̇и нанд̣̇иж̇аад̇о д̇удто бамуд̣̇ид̇о ахосим̣. бхавамижчисанд̇и вуд̣дхим̣ бад̇т̇аяим̣. саава ваарзнд̇и суугаранд̇и яат̇аа сунакаа ваг̇г̇аваг̇г̇аа худ̇ваа бхуссанд̇аа бхуссанд̇аа суугарам̣ ваарзнд̇и, бунаббунам̣ махааравам̣ раваабзнд̇и, звам̣ д̣̇аарзхи сад̣̇д̇хим̣ мам̣ б̣ахум̣ вад̇ваа вираванд̇ам̣ балаабзнд̇ийд̇и ад̇т̇о.
Nandissanti nandijāto tuṭṭho pamudito ahosiṃ. Bhavamicchisanti vuḍḍhiṃ patthayiṃ. Sāva vārenti sūkaranti yathā sunakhā vaggavaggā hutvā bhussantā bhussantā sūkaraṃ vārenti, punappunaṃ mahāravaṃ ravāpenti, evaṃ dārehi saddhiṃ maṃ bahuṃ vatvā viravantaṃ palāpentīti attho.
асанд̇аад̇и асаббурисаа. ж̇аммаад̇и лаамагаа. бхаасарзд̇и бхаасанд̇и. буд̇д̇аруубзнаад̇и буд̇д̇авзсзна. ваяог̇ад̇анд̇и д̇аяо ваяз г̇ад̇ам̣ ад̇игганд̇ам̣ бажчимаваяз тид̇ам̣ мам̣. ж̇аханд̇ийд̇и барижжаж̇анд̇и.
Asantāti asappurisā. Jammāti lāmakā. Bhāsareti bhāsanti. Puttarūpenāti puttavesena. Vayogatanti tayo vaye gataṃ atikkantaṃ pacchimavaye ṭhitaṃ maṃ. Jahantīti pariccajanti.
ниб̣бхог̇од̇и ниббарибхог̇о. каад̣̇анаа абанийяад̇ийд̇и ассо хи яаавад̣̇зва д̇арун̣о ход̇и ж̇авасамбанно, д̇аавасса наанаарасам̣ каад̣̇анам̣ д̣̇ад̣̇анд̇и, ж̇ин̣н̣ам̣ ниб̣бхог̇ам̣ д̇ад̇о абанзнд̇и, анд̇имаваяз д̇ам̣ вад̇д̇ам̣ на лабхад̇и, г̇аавийхи сад̣̇д̇хим̣ адавияам̣ сугкад̇ин̣аани каад̣̇анд̇о жарад̇и. яат̇аа со ассо, звам̣ ж̇ин̣н̣агаалз вилуд̇д̇асаб̣б̣ад̇ханад̇д̇аа ниб̣бхог̇о маад̣̇исоби б̣аалагаанам̣ бид̇аа т̇зро барагхарзсу бхигкад̇и.
Nibbhogoti nipparibhogo. Khādanā apanīyatīti asso hi yāvadeva taruṇo hoti javasampanno, tāvassa nānārasaṃ khādanaṃ dadanti, jiṇṇaṃ nibbhogaṃ tato apanenti, antimavaye taṃ vattaṃ na labhati, gāvīhi saddhiṃ aṭaviyaṃ sukkhatiṇāni khādanto carati. Yathā so asso, evaṃ jiṇṇakāle viluttasabbadhanattā nibbhogo mādisopi bālakānaṃ pitā thero paragharesu bhikkhati.
яан̃жзд̇и нибаад̇о. ид̣̇ам̣ вуд̇д̇ам̣ ход̇и – яз мама буд̇д̇аа анассаваа аббад̇иссаа авасавад̇д̇ино, д̇зхи д̣̇ан̣д̣ова гира сзяяо сунд̣̇арад̇арод̇и. ид̣̇аанисса сзяяабхаавам̣ д̣̇ассзд̇ум̣ жан̣д̣амби г̇он̣анд̇иаад̣̇и вуд̇д̇ам̣.
Yañceti nipāto. Idaṃ vuttaṃ hoti – ye mama puttā anassavā appatissā avasavattino, tehi daṇḍova kira seyyo sundarataroti. Idānissa seyyabhāvaṃ dassetuṃ caṇḍampi goṇantiādi vuttaṃ.
бурз ход̇ийд̇и аг̇г̇ад̇о ход̇и, д̇ам̣ бурад̇о гад̇ваа г̇анд̇ум̣ сукам̣ ход̇ийд̇и ад̇т̇о . г̇аад̇хамзд̇хад̇ийд̇и уд̣̇агам̣ од̇аран̣агаалз г̇амбхийрз уд̣̇агз бад̇идтам̣ лабхад̇и.
Pure hotīti aggato hoti, taṃ purato katvā gantuṃ sukhaṃ hotīti attho . Gādhamedhatīti udakaṃ otaraṇakāle gambhīre udake patiṭṭhaṃ labhati.
барияаабун̣ид̇ваад̇и уг̇г̇ан̣хид̇ваа ваа ваажуг̇г̇ад̇аа гад̇ваа. саннисиннзсууд̇и д̇ат̇ааруубз б̣раахман̣аанам̣ самааг̇амад̣̇ивасз саб̣б̣аалан̇гаарабадиман̣д̣ид̇зсу буд̇д̇зсу д̇ам̣ сабхам̣ ог̇аахзд̇ваа б̣раахман̣аанам̣ маж̇жхз махаарахз аасанз нисиннзсу. абхаасийд̇и ‘аяам̣ мз гаало’д̇и сабхааяа маж̇жхз бависид̇ваа хад̇т̇ам̣ угкибид̇ваа , ‘‘бхо ахам̣ д̇умхаагам̣ г̇аат̇аа бхаасид̇угаамо, бхаасид̇з сун̣иссат̇аа’’д̇и вад̇ваа – ‘‘бхааса, б̣раахман̣а, сун̣омаа’’д̇и вуд̇д̇о тид̇агова абхааси. ‘‘д̇зна жа самаязна мануссаанам̣ вад̇д̇ам̣ ход̇и яо маад̇аабид̇уунам̣ санд̇агам̣ каад̣̇анд̇о маад̇аабид̇аро на босзд̇и, со маарзд̇аб̣б̣о’’д̇и. д̇асмаа д̇з б̣раахман̣абуд̇д̇аа бид̇убаад̣̇зсу нибад̇ид̇ваа ‘‘ж̇ийвид̇ам̣ но д̇аад̇а, д̣̇зхий’’д̇и яаажим̣су. со бид̇ухад̣̇аяасса буд̇д̇аанам̣ муд̣̇уд̇д̇аа ‘‘маа мз, бхо, б̣аалагз винаасаяид̇т̇а, босиссанд̇и ма’’нд̇и ааха.
Pariyāpuṇitvāti uggaṇhitvā vā vācuggatā katvā. Sannisinnesūti tathārūpe brāhmaṇānaṃ samāgamadivase sabbālaṅkārapaṭimaṇḍitesu puttesu taṃ sabhaṃ ogāhetvā brāhmaṇānaṃ majjhe mahārahe āsane nisinnesu. Abhāsīti ‘ayaṃ me kālo’ti sabhāya majjhe pavisitvā hatthaṃ ukkhipitvā , ‘‘bho ahaṃ tumhākaṃ gāthā bhāsitukāmo, bhāsite suṇissathā’’ti vatvā – ‘‘bhāsa, brāhmaṇa, suṇomā’’ti vutto ṭhitakova abhāsi. ‘‘Tena ca samayena manussānaṃ vattaṃ hoti yo mātāpitūnaṃ santakaṃ khādanto mātāpitaro na poseti, so māretabbo’’ti. Tasmā te brāhmaṇaputtā pitupādesu nipatitvā ‘‘jīvitaṃ no tāta, dehī’’ti yāciṃsu. So pituhadayassa puttānaṃ muduttā ‘‘mā me, bho, bālake vināsayittha, posissanti ma’’nti āha.
ат̇асса буд̇д̇з мануссаа аахам̣су – ‘‘сажз, бхо, аж̇ж̇а бадтааяа бид̇арам̣ на саммаа бадиж̇аг̇г̇иссат̇а, гхаад̇зссаама во’’д̇и. д̇з бхийд̇аа гхарам̣ нзд̇ваа бадиж̇аг̇г̇им̣су. д̇ам̣ д̣̇ассзд̇ум̣ ат̇а ко нам̣ б̣раахман̣амахаасааланд̇иаад̣̇и вуд̇д̇ам̣. д̇ад̇т̇а нзд̇ваад̇и бийтз нисийд̣̇аабзд̇ваа саяам̣ угкибид̇ваа наяим̣су. нхаабзд̇ваад̇и сарийрам̣ д̇злзна аб̣бхан̃ж̇ид̇ваа уб̣б̣аддзд̇ваа г̇анд̇хажун̣н̣аад̣̇ийхи нхаабзсум̣. б̣раахман̣ияоби баггосаабзд̇ваа, ‘‘аж̇ж̇а бадтааяа амхаагам̣ бид̇арам̣ саммаа бадиж̇аг̇г̇ат̇а. сажз бамаад̣̇ам̣ аабаж̇ж̇иссат̇а, гхарад̇о во ниггад̣дхиссаамаа’’д̇и вад̇ваа, бан̣ийд̇абхож̇анам̣ бхож̇зсум̣.
Athassa putte manussā āhaṃsu – ‘‘sace, bho, ajja paṭṭhāya pitaraṃ na sammā paṭijaggissatha, ghātessāma vo’’ti. Te bhītā gharaṃ netvā paṭijaggiṃsu. Taṃ dassetuṃ atha kho naṃ brāhmaṇamahāsālantiādi vuttaṃ. Tattha netvāti pīṭhe nisīdāpetvā sayaṃ ukkhipitvā nayiṃsu. Nhāpetvāti sarīraṃ telena abbhañjitvā ubbaṭṭetvā gandhacuṇṇādīhi nhāpesuṃ. Brāhmaṇiyopi pakkosāpetvā, ‘‘ajja paṭṭhāya amhākaṃ pitaraṃ sammā paṭijaggatha. Sace pamādaṃ āpajjissatha, gharato vo nikkaḍḍhissāmā’’ti vatvā, paṇītabhojanaṃ bhojesuṃ.
б̣раахман̣о субхож̇анан̃жа сукасзяяан̃жа ааг̇амма гад̇ибаахажжаязна сан̃ж̇аад̇аб̣ало бийн̣ид̇инд̣̇рияо ад̇д̇абхаавам̣ ологзд̇ваа, ‘‘аяам̣ мз самбад̇д̇и саман̣ам̣ г̇од̇амам̣ ниссааяа лад̣̇д̇хаа’’д̇и бан̣н̣аагаарам̣ аад̣̇ааяа бхаг̇авад̇о санд̇игам̣ аг̇амааси. д̇ам̣ д̣̇ассзд̇ум̣ ат̇а ко сод̇иаад̣̇и вуд̇д̇ам̣. д̇ад̇т̇а зд̇ад̣̇авожаад̇и д̣̇уссаяуг̇ам̣ баад̣̇амуулз табзд̇ваа зд̇ам̣ авожа. саран̣аг̇аманаавасаанз жааби бхаг̇аванд̇ам̣ звамааха – ‘‘бхо г̇од̇ама, маяхам̣ буд̇д̇зхи жад̇д̇аари д̇хурабхад̇д̇аани д̣̇иннаани , д̇ад̇о ахам̣ д̣̇вз д̇умхаагам̣ д̣̇амми, д̣̇вз саяам̣ барибхун̃ж̇иссаамий’’д̇и. галяаан̣ам̣, б̣раахман̣а, баадиязггам̣ бана маа нияяаад̣̇зхи, амхаагам̣ ружжанадтаанамзва г̇амиссаамаад̇и. ‘‘звам̣, бхо’’д̇и ко б̣раахман̣о бхаг̇аванд̇ам̣ ванд̣̇ид̇ваа гхарам̣ г̇анд̇ваа буд̇д̇з ааманд̇зси ‘‘д̇аад̇аа, саман̣о г̇од̇амо маяхам̣ сахааяо, д̇асса д̣̇вз д̇хурабхад̇д̇аани д̣̇иннаани, д̇умхз д̇асмим̣ самбад̇д̇з маа бамаж̇ж̇ат̇аа’’д̇и. саад̇ху, д̇аад̇аад̇и. бунад̣̇ивасз бхаг̇аваа буб̣б̣ан̣хасамаяз бад̇д̇ажийварам̣ аад̣̇ааяа ж̇здтабуд̇д̇асса нивзсанад̣̇ваарам̣ г̇ад̇о. со сад̇т̇аарам̣ д̣̇исваава хад̇т̇ад̇о бад̇д̇ам̣ г̇ахзд̇ваа гхарам̣ бавзсзд̇ваа махаарахз баллан̇гз нисийд̣̇аабзд̇ваа бан̣ийд̇абхож̇анамад̣̇ааси. сад̇т̇аа бунад̣̇ивасз ид̇арасса, бунад̣̇ивасз ид̇арассаад̇и бадибаадияаа саб̣б̣зсам̣ гхараани аг̇амааси. саб̣б̣з д̇ат̇зва саггаарам̣ агам̣су.
Brāhmaṇo subhojanañca sukhaseyyañca āgamma katipāhaccayena sañjātabalo pīṇitindriyo attabhāvaṃ oloketvā, ‘‘ayaṃ me sampatti samaṇaṃ gotamaṃ nissāya laddhā’’ti paṇṇākāraṃ ādāya bhagavato santikaṃ agamāsi. Taṃ dassetuṃ atha kho sotiādi vuttaṃ. Tattha etadavocāti dussayugaṃ pādamūle ṭhapetvā etaṃ avoca. Saraṇagamanāvasāne cāpi bhagavantaṃ evamāha – ‘‘bho gotama, mayhaṃ puttehi cattāri dhurabhattāni dinnāni , tato ahaṃ dve tumhākaṃ dammi, dve sayaṃ paribhuñjissāmī’’ti. Kalyāṇaṃ, brāhmaṇa, pāṭiyekkaṃ pana mā niyyādehi, amhākaṃ ruccanaṭṭhānameva gamissāmāti. ‘‘Evaṃ, bho’’ti kho brāhmaṇo bhagavantaṃ vanditvā gharaṃ gantvā putte āmantesi ‘‘tātā, samaṇo gotamo mayhaṃ sahāyo, tassa dve dhurabhattāni dinnāni, tumhe tasmiṃ sampatte mā pamajjathā’’ti. Sādhu, tātāti. Punadivase bhagavā pubbaṇhasamaye pattacīvaraṃ ādāya jeṭṭhaputtassa nivesanadvāraṃ gato. So satthāraṃ disvāva hatthato pattaṃ gahetvā gharaṃ pavesetvā mahārahe pallaṅke nisīdāpetvā paṇītabhojanamadāsi. Satthā punadivase itarassa, punadivase itarassāti paṭipāṭiyā sabbesaṃ gharāni agamāsi. Sabbe tatheva sakkāraṃ akaṃsu.
ат̇згад̣̇ивасам̣ ж̇здтабуд̇д̇асса гхарз ман̇г̇алам̣ бажжубадтид̇ам̣. со бид̇арам̣ ааха – ‘‘д̇аад̇а, гасса ман̇г̇алам̣ д̣̇змаа’’д̇и. амхз ан̃н̃ам̣ на ж̇аанаама? нану саман̣о г̇од̇амо маяхам̣ сахааяод̇и? д̇зна хи д̇умхз бан̃жахи бхигкусад̇зхи сад̣̇д̇хим̣ сваад̇анааяа саман̣ам̣ г̇од̇амам̣ ниманд̇зт̇аад̇и. б̣раахман̣о д̇ат̇аа агааси . бхаг̇аваа ад̇хиваасзд̇ваа бунад̣̇ивасз бхигкусан̇гхабаривуд̇о д̇асса г̇зхад̣̇ваарам̣ аг̇амааси. со харид̇убалид̇д̇ам̣ саб̣б̣аалан̇гаарабадиман̣д̣ид̇ам̣ г̇зхам̣ сад̇т̇аарам̣ бавзсзд̇ваа б̣уд̣̇д̇хаббамукам̣ бхигкусан̇гхам̣ бан̃н̃ад̇д̇аасанзсу нисийд̣̇аабзд̇ваа аббод̣̇агабааяаасан̃жзва каж̇ж̇агавигад̇ин̃жа ад̣̇ааси. анд̇арабхад̇д̇асмим̣язва б̣раахман̣асса жад̇д̇аароби буд̇д̇аа сад̇т̇у санд̇игз нисийд̣̇ид̇ваа аахам̣су – ‘‘бхо г̇од̇ама, маяам̣ амхаагам̣ бид̇арам̣ бадиж̇аг̇г̇аама наббамаж̇ж̇аама, бассат̇асса ад̇д̇абхаава’’нд̇и. сад̇т̇аа ‘‘галяаан̣ам̣ во гад̇ам̣, маад̇аабид̇убосагам̣ наама бораан̣агабан̣д̣ид̇аанам̣ аажин̣н̣амзваа’’д̇и вад̇ваа махаанааг̇аж̇аад̇агам̣ (ж̇аа. 1.11.1 аад̣̇аяо; жарияаа. 2.1 аад̣̇аяо) наама гат̇зд̇ваа, жад̇д̇аари сажжаани д̣̇ийбзд̇ваа д̇хаммам̣ д̣̇зсзси. д̣̇зсанаабарияосаанз б̣раахман̣о сад̣̇д̇хим̣ жад̇уухи буд̇д̇зхи жад̇уухи жа сун̣хаахи д̣̇зсанаанусаарзна н̃аан̣ам̣ бзсзд̇ваа сод̇аабад̇д̇ипалз бад̇идтид̇о. д̇ад̇о бадтааяа сад̇т̇аа на саб̣б̣агаалам̣ д̇зсам̣ г̇зхам̣ аг̇амаасийд̇и. жад̇уд̇т̇ам̣.
Athekadivasaṃ jeṭṭhaputtassa ghare maṅgalaṃ paccupaṭṭhitaṃ. So pitaraṃ āha – ‘‘tāta, kassa maṅgalaṃ demā’’ti. Amhe aññaṃ na jānāma? Nanu samaṇo gotamo mayhaṃ sahāyoti? Tena hi tumhe pañcahi bhikkhusatehi saddhiṃ svātanāya samaṇaṃ gotamaṃ nimantethāti. Brāhmaṇo tathā akāsi . Bhagavā adhivāsetvā punadivase bhikkhusaṅghaparivuto tassa gehadvāraṃ agamāsi. So haritupalittaṃ sabbālaṅkārapaṭimaṇḍitaṃ gehaṃ satthāraṃ pavesetvā buddhappamukhaṃ bhikkhusaṅghaṃ paññattāsanesu nisīdāpetvā appodakapāyāsañceva khajjakavikatiñca adāsi. Antarabhattasmiṃyeva brāhmaṇassa cattāropi puttā satthu santike nisīditvā āhaṃsu – ‘‘bho gotama, mayaṃ amhākaṃ pitaraṃ paṭijaggāma nappamajjāma, passathassa attabhāva’’nti. Satthā ‘‘kalyāṇaṃ vo kataṃ, mātāpituposakaṃ nāma porāṇakapaṇḍitānaṃ āciṇṇamevā’’ti vatvā mahānāgajātakaṃ (jā. 1.11.1 ādayo; cariyā. 2.1 ādayo) nāma kathetvā, cattāri saccāni dīpetvā dhammaṃ desesi. Desanāpariyosāne brāhmaṇo saddhiṃ catūhi puttehi catūhi ca suṇhāhi desanānusārena ñāṇaṃ pesetvā sotāpattiphale patiṭṭhito. Tato paṭṭhāya satthā na sabbakālaṃ tesaṃ gehaṃ agamāsīti. Catutthaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 4. махаасааласуд̇д̇ам̣ • 4. Mahāsālasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 4. махаасааласуд̇д̇аван̣н̣анаа • 4. Mahāsālasuttavaṇṇanā
