| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೪. ಮಹಾಸಾಲಸುತ್ತವಣ್ಣನಾ
4. Mahāsālasuttavaṇṇanā
೨೦೦. ಯಸ್ಮಾ ತಸ್ಸ ಬ್ರಾಹ್ಮಣಸ್ಸ ಅನಿಸ್ಸಯಸ್ಸ ಜಿಣ್ಣಭಾವೇನ ವಿಸೇಸತೋ ಕಾಯೋ ಲೂಖೋ ಜಾತೋ, ಜಿಣ್ಣಪಿಲೋತಿಕಖಣ್ಡೇಹಿ ಸಙ್ಘಟಿತಂ ಪಾವುರಣಂ, ತಸ್ಮಾ ‘‘ಲೂಖಪಾವುರಣೋ’’ತಿ ಪದಸ್ಸ ‘‘ಜಿಣ್ಣಪಾವುರಣೋ’’ತಿ ಅತ್ಥೋ ವುತ್ತೋ। ಪಾಟಿಯೇಕ್ಕನ್ತಿ ಪುತ್ತೇಸು ಏಕಮೇಕೋ ಏಕಮೇಕಾಯ ವಾಚಾಯ ವಿಸುಂ ವಿಸುಂ।
200. Yasmā tassa brāhmaṇassa anissayassa jiṇṇabhāvena visesato kāyo lūkho jāto, jiṇṇapilotikakhaṇḍehi saṅghaṭitaṃ pāvuraṇaṃ, tasmā ‘‘lūkhapāvuraṇo’’ti padassa ‘‘jiṇṇapāvuraṇo’’ti attho vutto. Pāṭiyekkanti puttesu ekameko ekamekāya vācāya visuṃ visuṃ.
ಸಮ್ಪುಚ್ಛನಂ ನಾಮ ಇಧ ಸಮ್ಮನ್ತನನ್ತಿ ಆಹ ‘‘ಸದ್ಧಿಂ ಮನ್ತಯಿತ್ವಾ’’ತಿ। ನನ್ದಿಸ್ಸನ್ತಿ ಅಭಿನನ್ದಿಂ। ಅತೀತತ್ಥೇ ಹಿ ಇದಂ ಅನಾಗತವಚನಂ। ತೇನಾಹ ‘‘ನನ್ದಿಜಾತೋ…ಪೇ॰… ಅಹೋಸಿ’’ನ್ತಿ। ಭುಸ್ಸನ್ತಾತಿ ನಿಬ್ಭುಸ್ಸನವಸೇನ ರವನ್ತಾ।
Sampucchanaṃ nāma idha sammantananti āha ‘‘saddhiṃ mantayitvā’’ti. Nandissanti abhinandiṃ. Atītatthe hi idaṃ anāgatavacanaṃ. Tenāha ‘‘nandijāto…pe… ahosi’’nti. Bhussantāti nibbhussanavasena ravantā.
ವಯೋಗತನ್ತಿ ಪಚ್ಛಿಮವಯಂ ಉಪಗತಂ। ಸೋ ಪನ ಯಸ್ಮಾ ಪುರಿಮೇ ದ್ವೇ ವಯೇ ಅತಿಕ್ಕಮವಸೇನ ಗತೋ। ಪಚ್ಛಿಮಂ ಏಕದೇಸತೋ ಅತಿಕ್ಕಮನವಸೇನ, ತಸ್ಮಾ ವುತ್ತಂ – ‘‘ತಯೋ ವಯೇ ಗತಂ ಅತಿಕ್ಕನ್ತಂ ಪಚ್ಛಿಮವಯೇ ಠಿತ’’ನ್ತಿ।
Vayogatanti pacchimavayaṃ upagataṃ. So pana yasmā purime dve vaye atikkamavasena gato. Pacchimaṃ ekadesato atikkamanavasena, tasmā vuttaṃ – ‘‘tayo vaye gataṃ atikkantaṃ pacchimavaye ṭhita’’nti.
ನಿಪ್ಪರಿಭೋಗೋತಿ ಜಿಣ್ಣಭಾವೇನ ಜವಪರಕ್ಕಮಹಾನಿಯಾ ಅಪರಿಭೋಗೋ ನ ಭುಞ್ಜಿತಬ್ಬೋ। ಖಾದನಾ ಅಪನೀಯತೀತಿ ಯವಸಂ ಅದದನ್ತಾ ತತೋ ನೀಹರನ್ತಿ ನಾಮ। ಥೇರೋತಿ ವುಡ್ಢೋ।
Nipparibhogoti jiṇṇabhāvena javaparakkamahāniyā aparibhogo na bhuñjitabbo. Khādanā apanīyatīti yavasaṃ adadantā tato nīharanti nāma. Theroti vuḍḍho.
ಅನಸ್ಸವಾತಿ ನ ವಚನಕರಾ। ಅಪ್ಪತಿಸ್ಸಾತಿ ಪತಿಸ್ಸಯರಹಿತಾ। ಅವಸವತ್ತಿನೋತಿ ನ ಮಯ್ಹಂ ವಸೇನ ವತ್ತನಕಾ। ಸುನ್ದರತರೋತಿ ಉಪತ್ಥಮ್ಭಕಾರಿಭಾವೇನ ಸುನ್ದರತರೋ।
Anassavāti na vacanakarā. Appatissāti patissayarahitā. Avasavattinoti na mayhaṃ vasena vattanakā. Sundarataroti upatthambhakāribhāvena sundarataro.
ಪುರತೋತಿ ಉಪತ್ಥಮ್ಭಕಭಾವೇನ ಪುರತೋ ಕತ್ವಾ। ಉದಕೇ ಪತಿಟ್ಠಂ ಲಭತಿ ತತ್ಥ ಪತಿಟ್ಠತೋ ಥಿರಪತಿಟ್ಠಭಾವತೋ। ಅದ್ಧಪತಿಟ್ಠೋ ಹಿ ದಣ್ಡೋ ದಣ್ಡಧರಪುರಿಸಸ್ಸ ಪತಿಟ್ಠಂ ಲಭಾಪೇತಿ।
Puratoti upatthambhakabhāvena purato katvā. Udake patiṭṭhaṃ labhati tattha patiṭṭhato thirapatiṭṭhabhāvato. Addhapatiṭṭho hi daṇḍo daṇḍadharapurisassa patiṭṭhaṃ labhāpeti.
ಬ್ರಾಹ್ಮಣಿಯೋತಿ ಅತ್ತನೋ ಬ್ರಾಹ್ಮಣಿಯೋ। ಪಾಟಿಯೇಕ್ಕನ್ತಿ ‘‘ಅಸುಕಸ್ಸ ಗೇಹೇ ಅಸುಕಸ್ಸ ಗೇಹೇ’’ತಿ ಏವಂ ಉದ್ದೇಸಿಕಂ ಕತ್ವಾ ವಿಸುಂ ವಿಸುಂ। ಮಾ ನಿಯ್ಯಾದೇಹಿ, ಅಮ್ಹಾಕಂ ರುಚ್ಚನಟ್ಠಾನಮೇವಾತಿ ತವ ಪುತ್ತಾನಂ ಗೇಹೇಸು ಯಂ ಅಮ್ಹಾಕಂ ರುಚ್ಚನಟ್ಠಾನಂ। ತತ್ಥಮೇವ ಗಮಿಸ್ಸಾಮಾತಿ ಸಬ್ಬೇಸಮ್ಪಿ ಏತೇಸಂ ಅನುಗ್ಗಹಂ ಕಾತುಕಾಮೋ ಭಗವಾ ಏವಮಾಹ।
Brāhmaṇiyoti attano brāhmaṇiyo. Pāṭiyekkanti ‘‘asukassa gehe asukassa gehe’’ti evaṃ uddesikaṃ katvā visuṃ visuṃ. Mā niyyādehi, amhākaṃ ruccanaṭṭhānamevāti tava puttānaṃ gehesu yaṃ amhākaṃ ruccanaṭṭhānaṃ. Tatthameva gamissāmāti sabbesampi etesaṃ anuggahaṃ kātukāmo bhagavā evamāha.
ತತೋ ಪಟ್ಠಾಯಾತಿ ಸೋತಾಪತ್ತಿಫಲಪಟಿಲಾಭತೋ ಪಟ್ಠಾಯ। ಯದತ್ಥಂ ಮಯಂ ಇಮಸ್ಸ ಬ್ರಾಹ್ಮಣಸ್ಸ ಮಹಾಸಮ್ಪತ್ತಿದಾನಾದಿನಾ ಅನುಗ್ಗಹೋ ಕತೋ, ಸೋ ಚಸ್ಸ ಪುತ್ತಪರಿಜನಸ್ಸಪಿ ಅತ್ಥೋ ಸಿದ್ಧೋತಿ ಸತ್ಥಾ ನ ಸಬ್ಬಕಾಲಂ ತಸ್ಸ ಬ್ರಾಹ್ಮಣಸ್ಸ ಪುತ್ತಾನಂ ಗೇಹಂ ಅಗಮಾಸಿ, ತೇ ಏವ ಪನ ಕಾಲೇನ ಕಾಲಂ ಸತ್ಥು ಸನ್ತಿಕಂ ಗನ್ತ್ವಾ ಯಥಾವಿಭವಂ ಸಕ್ಕಾರಸಮ್ಮಾನಂ ಅಕಂಸೂತಿ ಅಧಿಪ್ಪಾಯೋ।
Tato paṭṭhāyāti sotāpattiphalapaṭilābhato paṭṭhāya. Yadatthaṃ mayaṃ imassa brāhmaṇassa mahāsampattidānādinā anuggaho kato, so cassa puttaparijanassapi attho siddhoti satthā na sabbakālaṃ tassa brāhmaṇassa puttānaṃ gehaṃ agamāsi, te eva pana kālena kālaṃ satthu santikaṃ gantvā yathāvibhavaṃ sakkārasammānaṃ akaṃsūti adhippāyo.
ಮಹಾಸಾಲಸುತ್ತವಣ್ಣನಾ ನಿಟ್ಠಿತಾ।
Mahāsālasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೪. ಮಹಾಸಾಲಸುತ್ತಂ • 4. Mahāsālasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೪. ಮಹಾಸಾಲಸುತ್ತವಣ್ಣನಾ • 4. Mahāsālasuttavaṇṇanā
