| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
4. මහාසාලසුත්‌තවණ්‌ණනා
4. Mahāsālasuttavaṇṇanā
200. යස්‌මා තස්‌ස බ්‍රාහ්‌මණස්‌ස අනිස්‌සයස්‌ස ජිණ්‌ණභාවෙන විසෙසතො කායො ලූඛො ජාතො, ජිණ්‌ණපිලොතිකඛණ්‌ඩෙහි සඞ්‌ඝටිතං පාවුරණං, තස්‌මා ‘‘ලූඛපාවුරණො’’ති පදස්‌ස ‘‘ජිණ්‌ණපාවුරණො’’ති අත්‌ථො වුත්‌තො. පාටියෙක්‌කන්‌ති පුත්‌තෙසු එකමෙකො එකමෙකාය වාචාය විසුං විසුං.
200. Yasmā tassa brāhmaṇassa anissayassa jiṇṇabhāvena visesato kāyo lūkho jāto, jiṇṇapilotikakhaṇḍehi saṅghaṭitaṃ pāvuraṇaṃ, tasmā ‘‘lūkhapāvuraṇo’’ti padassa ‘‘jiṇṇapāvuraṇo’’ti attho vutto. Pāṭiyekkanti puttesu ekameko ekamekāya vācāya visuṃ visuṃ.
සම්‌පුච්‌ඡනං නාම ඉධ සම්‌මන්‌තනන්‌ති ආහ ‘‘සද්‌ධිං මන්‌තයිත්‌වා’’ති. නන්‌දිස්‌සන්‌ති අභිනන්‌දිං. අතීතත්‌ථෙ හි ඉදං අනාගතවචනං. තෙනාහ ‘‘නන්‌දිජාතො…පෙ.… අහොසි’’න්‌ති. භුස්‌සන්‌තාති නිබ්‌භුස්‌සනවසෙන රවන්‌තා.
Sampucchanaṃ nāma idha sammantananti āha ‘‘saddhiṃ mantayitvā’’ti. Nandissanti abhinandiṃ. Atītatthe hi idaṃ anāgatavacanaṃ. Tenāha ‘‘nandijāto…pe… ahosi’’nti. Bhussantāti nibbhussanavasena ravantā.
වයොගතන්‌ති පච්‌ඡිමවයං උපගතං. සො පන යස්‌මා පුරිමෙ ද්‌වෙ වයෙ අතික්‌කමවසෙන ගතො. පච්‌ඡිමං එකදෙසතො අතික්‌කමනවසෙන, තස්‌මා වුත්‌තං – ‘‘තයො වයෙ ගතං අතික්‌කන්‌තං පච්‌ඡිමවයෙ ඨිත’’න්‌ති.
Vayogatanti pacchimavayaṃ upagataṃ. So pana yasmā purime dve vaye atikkamavasena gato. Pacchimaṃ ekadesato atikkamanavasena, tasmā vuttaṃ – ‘‘tayo vaye gataṃ atikkantaṃ pacchimavaye ṭhita’’nti.
නිප්‌පරිභොගොති ජිණ්‌ණභාවෙන ජවපරක්‌කමහානියා අපරිභොගො න භුඤ්‌ජිතබ්‌බො. ඛාදනා අපනීයතීති යවසං අදදන්‌තා තතො නීහරන්‌ති නාම. ථෙරොති වුඩ්‌ඪො.
Nipparibhogoti jiṇṇabhāvena javaparakkamahāniyā aparibhogo na bhuñjitabbo. Khādanā apanīyatīti yavasaṃ adadantā tato nīharanti nāma. Theroti vuḍḍho.
අනස්‌සවාති න වචනකරා. අප්‌පතිස්‌සාති පතිස්‌සයරහිතා. අවසවත්‌තිනොති න මය්‌හං වසෙන වත්‌තනකා. සුන්‌දරතරොති උපත්‌ථම්‌භකාරිභාවෙන සුන්‌දරතරො.
Anassavāti na vacanakarā. Appatissāti patissayarahitā. Avasavattinoti na mayhaṃ vasena vattanakā. Sundarataroti upatthambhakāribhāvena sundarataro.
පුරතොති උපත්‌ථම්‌භකභාවෙන පුරතො කත්‌වා. උදකෙ පතිට්‌ඨං ලභති තත්‌ථ පතිට්‌ඨතො ථිරපතිට්‌ඨභාවතො. අද්‌ධපතිට්‌ඨො හි දණ්‌ඩො දණ්‌ඩධරපුරිසස්‌ස පතිට්‌ඨං ලභාපෙති.
Puratoti upatthambhakabhāvena purato katvā. Udake patiṭṭhaṃ labhati tattha patiṭṭhato thirapatiṭṭhabhāvato. Addhapatiṭṭho hi daṇḍo daṇḍadharapurisassa patiṭṭhaṃ labhāpeti.
බ්‍රාහ්‌මණියොති අත්‌තනො බ්‍රාහ්‌මණියො. පාටියෙක්‌කන්‌ති ‘‘අසුකස්‌ස ගෙහෙ අසුකස්‌ස ගෙහෙ’’ති එවං උද්‌දෙසිකං කත්‌වා විසුං විසුං. මා නිය්‍යාදෙහි, අම්‌හාකං රුච්‌චනට්‌ඨානමෙවාති තව පුත්‌තානං ගෙහෙසු යං අම්‌හාකං රුච්‌චනට්‌ඨානං. තත්‌ථමෙව ගමිස්‌සාමාති සබ්‌බෙසම්‌පි එතෙසං අනුග්‌ගහං කාතුකාමො භගවා එවමාහ.
Brāhmaṇiyoti attano brāhmaṇiyo. Pāṭiyekkanti ‘‘asukassa gehe asukassa gehe’’ti evaṃ uddesikaṃ katvā visuṃ visuṃ. Mā niyyādehi, amhākaṃ ruccanaṭṭhānamevāti tava puttānaṃ gehesu yaṃ amhākaṃ ruccanaṭṭhānaṃ. Tatthameva gamissāmāti sabbesampi etesaṃ anuggahaṃ kātukāmo bhagavā evamāha.
තතො පට්‌ඨායාති සොතාපත්‌තිඵලපටිලාභතො පට්‌ඨාය. යදත්‌ථං මයං ඉමස්‌ස බ්‍රාහ්‌මණස්‌ස මහාසම්‌පත්‌තිදානාදිනා අනුග්‌ගහො කතො, සො චස්‌ස පුත්‌තපරිජනස්‌සපි අත්‌ථො සිද්‌ධොති සත්‌ථා න සබ්‌බකාලං තස්‌ස බ්‍රාහ්‌මණස්‌ස පුත්‌තානං ගෙහං අගමාසි, තෙ එව පන කාලෙන කාලං සත්‌ථු සන්‌තිකං ගන්‌ත්‌වා යථාවිභවං සක්‌කාරසම්‌මානං අකංසූති අධිප්‌පායො.
Tato paṭṭhāyāti sotāpattiphalapaṭilābhato paṭṭhāya. Yadatthaṃ mayaṃ imassa brāhmaṇassa mahāsampattidānādinā anuggaho kato, so cassa puttaparijanassapi attho siddhoti satthā na sabbakālaṃ tassa brāhmaṇassa puttānaṃ gehaṃ agamāsi, te eva pana kālena kālaṃ satthu santikaṃ gantvā yathāvibhavaṃ sakkārasammānaṃ akaṃsūti adhippāyo.
මහාසාලසුත්‌තවණ්‌ණනා නිට්‌ඨිතා.
Mahāsālasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 4. මහාසාලසුත්‌තං • 4. Mahāsālasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. මහාසාලසුත්‌තවණ්‌ණනා • 4. Mahāsālasuttavaṇṇanā
